الثلاثاء، يوليو 13، 2010

غير

قال مسفر:
واشلون اقول؟

وشلون أقول إن أنتى غير
وشلون أقول
إن انتى تغرين النوارس بالغرق
فــالازرق الفاتح
وشلون تغرين الرصاص
يحب ويصافح
وشلون تغرين الشتا
يدفّى ريشة طير
وشلون بعيونك مساى
دايم مسا خير
شلون أقول إن انتى غير
شلون أقول إن انتى غير
غير البنات
وشلون أخلّى للحكى عنّك
طعم سكّر نبات
شلون أقول إسمك ولا
يصير لسانى ..نعناع
وتصير
حروفى غزلان
ويصير 
قمر صوتى صلاة
شلون أعنّيك وماتصحى عصافير الفجر
ولا يطول عشب البحر
أو تزهر بدربى حصاة
وشلون أقول إن انتى غير كل البنات
وشلون أقول إن انتى غير
غير البشر
ياللى إذا تبسّمتى
يفزّ
من سدرة الليل.. النهار
وتقرب سما
ويكبر قمر
وإن قلتى للدنيا مسا الخير إنولد
من شفّتك
مليون نجمه
وإنتشى فيك السهر
شلون أقول إن انتى غير
كل البشر
**
.
.
.
وباغت الصمت بسؤال:
تشبهنا القصايد احيان؟
تبسمت:
احيان نكون احنا كلنا بضع قصائد...واغاني...واحلام
وابتسم:
تدرين ان هالقصيدة تشبهك؟
هزت كتوفها وضحكت:
يمكن تكون بنت خالتي،او واحده من اهلي
ضحك وسئلها:
من علمج تكونين غير؟
غير كل البشر؟
وجلت النظرة خجل
والتفتت لشي بعيد وسئلت:
تدري ليش نشوف الأشياء غير؟
غير...
بنظرة قلوبنا
واحساس ارواحنا
قلبك اللي علمني اني غير كل البشر
تدري اي الحب أجمل؟
أجمل الحب ذاك الذي من بعده تحب نفسك
دنيتك
وتعشق كل تفاصيلك
:)

تسند على ظهر دنيته ..هز راسه ..وابتسم:

أنتي تغرين النوارس بالغرق
فالأزرق الفاتح
وتغرين الرصاص
يحب ويصافح
:)

.
.
.
صباحكم خير
ومساكم رضا






**
كلمات انتي غير:
مسفر الدوسري