الجمعة، نوفمبر 26، 2010

واذكريني

 عندما تحب:
اصنع لمن تحب ذاكره خاصه فيك
اخلق له تفاصيل جديده....وارتباطات شرطية....واغاني واماكن لم يعرفها الا بك
ستغيب يوما عنه...وتظل دوما معه
إستكانة

إستكانة ذكرى(1)
نظرت للفضا بينها وبينه،سرقت يدها من ايدينه وقبل ان تمضي ابتسمت لعينه وقالت:
إذا طق المطر ورد عشب أخضر وسط حوشك
اذا صار الورد جوري على غصونك ...تذكرني
إذا زاد الهوا وأنشدت حبالك على خيامك..
تذكرني..وخلني مرة أمر على بالك

*فتحيه عجلان*
غابت...ومرت على البال امرار:
مع كل ديمة مطر،وعشب اخضر مبتل،وكل ما ورد جوري على غصن القلب
و مع كل نسمة هوا ...وخيام
تنهد...ذكرها..ابتسم
واجمل الذكرى ذكرى لها القلب يبتسم
كانت عاشقه ذكيه،خلقت له ذاكره استثنائيه،وارتباطات شرطية مابين وجودها والفرح
غابت هي..وظل الفرح مرهون بحضورها


وإستكانة جنون (2)
عندما تحب:
اصنع ذاكرة من تحب،ارسم له الدنيا باحساسك،ولون له الايام بألوانك،ودع عطرك في راحة ايديه،تذكره اينما ذهب انك هنا مابين جنبيه،استوطن كل تفاصيله،وازرع لك في كل شئ...شئ  جديد يذكره فيك
:
في الاشاره الفاصلة  مابين الشامية وكيفان انطلق مسرعا متعديا كل اشارات الحياة،تشبثت هي بكرسيها:
يمه يمه اسم الله على قلبي
،ضحك اهو:
يا جبانه!
استوقف الحياه بلحظة وقف فيها بمحاذاه بحر شويخ،مسك يدها ومشى باتجاه البحر:
ماحب امشي على الرمل،انا لابسه كعب!
قطيه...وامشي حافيه؟...استبقها وتخلى عن (نعاله) وضحك:
يالله عشان نصير اثنين ميانين
ابتسمت،مسكت كعبها بيدها وضحكت:
احس اني مينونه.
أحلى شي بالدنيا الجنون
انغمست ارجلهما بالرمل...حركت نسمات الهواء غترته....تجاوزته لشالها...امواج البحر وضحكاتها وصوته يغني لها:
قزر عمري اسولف فيج..وكل منج وكل مافيج غصب ينحب غصب ينحب..
على خدج نوير الربيع زاهي..نظر عينج طفل عن دنيته ساهي...
وسهى بها،وسهت به،ومرت عشر سنوات،وظل بحر شويخ ذاك المكان الذي كلما مرا من جنبه،تنهدا،تناظرا وابتسما..
ولأنه عاشق صنع لها ذاكره مكان...واغنيه...وجنون

وإستكانة أمومه (3)
في كل فجر تبدأ هي رحلتها معهم،استيقاظها اليومي قبل استيقاظ عيونهم،رفع الستائر لتدخل الشمس لغرفهم،فتح المذياع  وارتفاع صوت القرآن في صباحهم،رائحه الحليب الغارق بالهيل،وانقسام افطارهم مابين البيض والكورن فليكس،قبله الصباح،وشنطة المدرسه،مراجعه امتحان ،وتذكير بأذكار الصباح،وتوصيلهم حتى باب المدرسة
ونسئلها:
وليش كل هالتعب؟وين الخدم والسايق؟
وتبتسم:
انا أصنع ذاكره اطفالي،اخلق تفاصيل استثنائيه لطفولتهم،وذكريات جميلة ،سيذكرون يوم رائحة الهيل والحليب وصوت المعيقلي في كل صباح،سأظل انا الصباح في عيونهم واجمل ذكرياتهم ،وفي يوما ما سيكبرون ،ستبحر بهم الدنيا بعيدا ويكتبون.:
نحن لرائحه امي،وصباحات امي...


:إستكانة شعر(3)
اذكريني بأول انفاس الفجر..مع نسيم الصبح ..لاهب العطر
ولا اكتمل وجه القمر واصبح بدر..اذكريني
واكتبي لي لو سطر
!!



إستكانة الختام:
صوت مشتاق في غفله من الزمن،يجيئك بلحظة غير مخطط لها ليقول لك:
البارح ذكرناك...بمكان...بأغنيه...بأكل..وبشي تحبه
وسؤال الجمعة:
شلي يذكرونك به الناس؟

هناك 21 تعليقًا:

Sn3a يقول...

استكانه بوستج قديم
اقصد ان خفييف مثل قبل
تدرين شكثر اقرى بوستاتج ماعرف شكتب كومنت

بس الحين بكتب اي شي المهم اسمي يكون موجود

اعشق الرمل
لان الخطوات المرسومه عليه تأكدلج انج مشيتي بهالطريج
وتحفزج ترسمين خطوات ييديده عشان لما توصلين لهدفج
تشوفين مسيرتج
الصخر اللي اذاج
الصغير
والكبير

والصدف الناعم وصوت البحر
الله


انا اقول هذي اللي تودي عيالها مدارس اكيد ماتداوم دوامي
;p



شللي يذكروني فيه الناس
الازواج السعداء يذكروني بالرومانسيه اللي اركنها على جنب
الناجح يذكرني بهدفي
الشاطر يذكرني بحبي للدراسه
الانيقه تذكرني بانوثتي

البنت الانيقه الام الناجحه الزوجه الغاليه والموظفه الفعاله تذكرني باللي ابي اكونه

le Koweit يقول...

الله
الفقرة الاولى رووووووعة
:)

مجرد أمنيـــــات يقول...

3azezty estekana ele ketabteee raw3a 59ooo9an l2ne a3sha8 el thkrayaaaaat wa mn 7oby laha eta5tht el ta9weeer el photo'3rafy hwaya leee wa abda3t feeee

El thekrayat swa2 kanat zeeena aw sheeeena y'6el laha el 2thar fe nfoosna ..

Wa laken TB8a el thekra el 6ayba ehya ele tt3ala8 B2th'han el nas ..

Teslemen 3ala el tadweeen el ra23

مجرد أمنيـــــات يقول...

3azezty estekana ele ketabteee raw3a 59ooo9an l2ne a3sha8 el thkrayaaaaat wa mn 7oby laha eta5tht el ta9weeer el photo'3rafy hwaya leee wa abda3t feeee

El thekrayat swa2 kanat zeeena aw sheeeena y'6el laha el 2thar fe nfoosna ..

Wa laken TB8a el thekra el 6ayba ehya ele tt3ala8 B2th'han el nas ..

Teslemen 3ala el tadweeen el ra23

candle يقول...

أبيييه والله العظيم كنت أغني (اذكريني بأول انفاس الفجر) ماعديت المقطع جان افتح صفحتج جان ألقى العنوان وأخترع جنج قاعده يمي وتغنين معاي تكملين جملتي

شتسمين هالحاله ؟!!!

مممم شللي يذكرني به الناس !!!
ممممممم
حاليا بنام ماعندي ذاكره بس اذا تذكرت برجع أعلق :)

chandal/danchal!! يقول...

:)

الريوق مرتبط بأمي واخواني وصينية مدورة تحتها حصير

مو بس تصنع ذاكرة, تصنع ريج يقدس الريوق ويستحسن يكون وايد مبجر

انا كلش مو خوش ام, الريوق ما يدور عندي وعيالي على ابوهم ما يشتهون الريوق


ما عندي فكرة الناس شتذكرني فيه

بس امي كل ما شافت شي مرتبط بالوسواس قالت يا ليتج معاي
وطبعا من قبل لا تعد علي السالفة ادري انها مو خوش نقصة

خوش بوست كعادتك استكانة
وان شاءالله دوم تنذكرين بكل طيب
:*

ikhalifa يقول...

البوست هذا وايد رومانسي
يصعب على أمثالي التفاعل معاه
:P

اممممم
ما أدري

أنا لو كنت أحب ما أبغي أقول للي أحبها اذكريني
إلا إذا فارقت الدنيا
و لا أحب أسمع منها اذكرني
يا نعيش ذاكرة حية متجددة أو ننسى و انتهى

chــاي أخضر يقول...

" أهوجس"
لـ أصنع ذكرى متوقدة دائما

وأخاف من صنع الذكرى

عندي الذكرى مقرونة بـ الألم:/

هنيئـا لمن يستلذها

Yara يقول...

راااااائع
ثلجت أطرافي وأنا أقرا بوستج

وفز قلبي

حسيت فيج

العشق يخرج أفضل ما فينا
نبدع حين نحب

تحياتي عزيزتي

ARTFUL يقول...

قبلا لا أبدي في بوستج الجميل عندي تعليق على الحجية جندلة مراسلتنا من المرقاب لما قالت

-------------------

الريوق مرتبط بأمي واخواني وصينية مدورة تحتها حصير

-------------------

حصييير تكفين انتي من أي جيل؟؟

وتبيني أقولج عنج صغيرة يا ظالمة

;p
****************************
أهلا أهلا صباح الخير اختي استكانة

شلونكم وشلون الاهل والاخوان

والله البوست جميييل جدا

استمتعت بقرايته

مادري الناس شيذكروني فيه

بس عندي واحد من الربع عنده لكل سفره وطلع وفتره بحياته اغنيه

انا مرتي حاولت تصنع لي ذاكرة لكل حدث

بس مخي مصين الذاكرة زفت

!!!

;D

chandal/danchal!! يقول...

صباح الخير منتق القلب

بس كلمة راس حق زين الشباب

خويل

ما كانت حصير بس الصينية ما تنحط دايركت عالارض فكانت مدة مدورة من زارا هوم
:p

esTeKaNa يقول...

sn3a
ّّّّّّ~~~~~~~~
ياهلا وأمية هلا
هلا بلي لها الخافق يهلي
نورتي بلوق استكانة من بعد غياب
اي كلمة تكتبينها لها وقع في قلب استكانة
وكيف لا؟
واللي بينا وان كان بلوق وكومنت الا انه بالنسبه لي عشره صدق لهاقدر كبير في قلبي
:***
ياربي تكونين مثل ما تتمنين واكثر
ونصيحه من استكانة:
لا تركنين شي على جنب
عيشي كل ما تتمنين بالوقت المناسب
:)
صباحج ورد

esTeKaNa يقول...

le Koweit
~~~~~~~~~~~
صباح الروعة
:)

esTeKaNa يقول...

مجرد أمنيـــــات
~~~~~~~~~~~~~~~~~~
صباح الامنيات الجميلة
:)
المصور:
شخص موهوب قادر على التقاط لحظة باحساسها ومشاعرها وبتوقيتها
وان لم اكن ماهرة بالتصوير الا اني احترم واقدر كل مصور
فهنيئا لك بهذه الموهبه

نورتي استكانة بتعليقك الجميل
حياك الله
:)

esTeKaNa يقول...

candle
~~~~~~~~~
يسمونها حالة القرين
انا قرينج الطيب
hehehehehehe
:p
يا عساه نومة العافية يارب
وفعلا:
احس انتي من الناس اللي يتركون في القلب اثر
يذكرونك الناس باشياء كثيرة
فعادة شلي يذكرونك الناس فيه؟
اغنيه
مكان
اكله
احساس؟
:)

esTeKaNa يقول...

chandal/danchal!!
~~~~~~~~~~~~~~~~~~~~~~~~
يا صباح الرد فلفيت
:)
ما سويتي فيني خير يوم قلتي لي عن الكوكنت في الرد فلفيت
ناطره على احر من الجمر اي مناسبه واطلبها،مابي اطلبها مني والطريج واحتفل باكلها بروحي
:p
تدرين انتي شنو تنذكرين فيه؟
البوستات خفيفة الطينة
الاغاني المصرية القديمة
شاورما ايكيا
الرد فالفيت
ومفنز ستاربكس النزهه
و ضحكتي على فرس فرس
نوفمبر بيكري
ومصر واسبانيا
:))
اشياء كثيرة علقتيها بالذاكرة
انتي انسانه مؤثرة بالمجتمع
كل شي تقولينه ينطبع
فانا اكيده اللي حولج يذكرونج باشياء كثيرة
.
.
.
ووازين الحصير والله
طلع الحصير من زارا هوم
عاد انا من رواده صايره
:P

esTeKaNa يقول...

ikhalifa
ّّّ~~~~~~~~~~~
اشكر..واقدر..واحترم محاولاتك الحثيثه للتفاعل مع الرومانسية
:))
وانا معاك بالذاكرة المتجدده
والدليل الفقره الثانيه
عشر سنوات،ما زالا مع بعض،وما زالا يذكران ذاك المشهد الرقيق الذي جمعهما
:)

esTeKaNa يقول...

chــاي أخضر
~~~~~~~~~~~~~
نحتاج عمر من (الفرح) وكثير من الحزن وحياه تعجن مشاعرنا وتصهرنا لتخلق منا اخرين قادرين على استعراض ذاكرتنا،والابتسام امامها دون ان نحزن
.
.
.
صباح الذكريات الجميلة
:)

esTeKaNa يقول...

Yara
~~~~~~~~
العشق يخرج افضل مافينا
.
.
ما أجملك
!!
فعلا العشق (الصحيح)يخرج اجمل مافينا من مشاعر جميلة
:)
دمتي جميلة
رقيقه
تنورين استكانة بتعليقاتك الجميلة
:)

esTeKaNa يقول...

ARTFUL
~~~~~~~~~~~
يا صباح الورد
:)
بداية:
بينك وبين جندله انا ما اتدخل
انا بس مراقب
:p
ثانيا:
نحاول مرارا ومرارا
عل وعسى نصنع لكم ذاكره
بس ماكو فايدة
انا عندي امل،بس دام انت للحين ابو بنتين وما قدرت عليك ام شيخه
جني بفقد الامل
:p
الله يحفظكم ياربي ويسعدكم ولا يغير عليكم الا للافضل
:)

esTeKaNa يقول...

chandal/danchal!!
~~~~~~~~~~~~~~~~~~~~
صباح النداره يا منتق قلبي انتي
:**
شاقتني مدة زارا هوم
لي مرور عليهم
اي شخص يبي يسوق بضاعه عندي مجرد ان يقولج قولي لي عنها
:P