الأحد، أكتوبر 17، 2010

غربة

في بقعه  الصحراء الصغيرة :
رمال صفراء...نخلتين
وعلى بعد الخطوتين
سيف وبحر
وكوت صغير
وناس تسافر كل يوم
حدها الفقر
!!
فقر:للقمة العيش
للأمان
لللاستقرار
للوطن
فقر...والكل لاهي على رزقة ولقمته
فقر..وشوية مناوشات على تمر
فقر..بس القلوب تجمعت بدو وحضر
فقر  وناس هاجرت لهديرة وركزت
عاشت وتعايشت
وتآلفت القلوب...وتباركت صحراء من عليها الرحمن بالذهب
وراح  الفقر
شبعت البطون..وفوق الشبعه طمعت
وتشرقدت
و تلتفتت و قالت:
منهو اللي وصل قبل؟
منهو فينا أصل هالديرة ومنهو اللفو؟
وبدت لعبه جديدة:
منو فينا الراس ومنو العصعص؟
ومن فينا (.....)ومنهو القطو؟
!!
وآه يا ديرة هلي
يا كوت صغير وبحر
يا جهراء ونخل
وغوص ولولو
وسفر
هقوتج كان الفقر لديرتي احسن قدر؟
!!
.
.
كنا فريج ..ودكيكين بآخر السكة
وصبي صغير علموه اهله يبيع ويشتري ويعتمد على نفسه
وبنيات بدويرة...ومطوعه تحفظهم المعوذات والفاتحة
ورجال تروح الزبير وتبيع بالبصره
ورجال تسافر...تدور العلم والفكرة
سفر...تعب...سلاح...وكفاح
وديرة انبنت بالتعب وراحت فداها ارواح
و وارتفع بيرق وكبرت سدره
كلينا ياما منها كنار
ويا السدرة ياللي جمعتنا جميع منو اليوم بيقطع كل شي من جذره؟
.
.
.
هذا هو السيف...هذا هو الرمل نفسه
هذا اليال...وهناك النخل..والسدرة
بس شصار؟
ناس تبوق ولا تخاف...ناس تسب وتحتفل بسبها
ناس تختلف...وتاخذ حقها بنفسها
هي صارت شريعة ديرتنا شريعة غاب
!!
شصار؟
شصار يا ديرة هلي
!!
أنا أحس يا ديرتي  بغربة

هناك 18 تعليقًا:

ikhalifa يقول...

كنت حاس انج اهنه
بعدني ما قريت البوست

ikhalifa يقول...

قريت البوست ة لا اجد إجابة
و لكن الخير موجود فيكم

ميمة السبيت يقول...

** ايه والله صح لسانج عورتي قلوبنا

Engineer A يقول...

أقسى

وأصعب

غربه !!

:(

Kuw_Son يقول...

الله المستعان ..

شكراً لكِ استكانة

Yara يقول...

آخ طلعت من حنايا القلب بعد ماأكملت قراءة بوستج الرومانسي الجميل اللي بالضبط يعكس واقع وأصل الديرة وأهلها
جد أشعر بخوف لأول مرة خوف غريب ويديد
الله يستر

I7na 3shagnaha يقول...

sa7 lsanich

:**

candle يقول...

عورتي قلبي !

يبيلنا نفضه ,
طراق يخلينا نحس بقيمة هالديره اللي عطتنا

يبيلنا تفاؤل

لازم نبطل مقارنات

لازم نخلص في وظائفنا وان كانت بسيطه وننسى اللي باق واللي انحاش من الدوام واللي تقاعد تقاعد طبي واهوا صاحي واللي مسجله حضور ومايحضر أشهر ونخلص لله أولا لينصلح حالنا

لازم اللي يدرس يدرس بنيه خالصه لله أولا ولمنفعه ديرته وأهل ديرته والبشر عموما دون تصنيف

لازم نعلم عيالنا واخوانا ونسولف بتفاؤل ومانذكر بس مساوئ الديره طول الوقت لازم ننشر الأمل

لازم نبطل نصنف الناس أما معانا وأما ضدنا ونبطل نعمم

لازم نشتغل مانقعد ونتحسر

أكثر من 80% من الكويتيين مخلصين بس سلبيين ومحبطين وبس يتحلطمون

انا أشوف ان النكت والاخبار اللي تعيب على وضع الكويت قاعده تزيد الوضع سوء وتحبط ونشرها مصيبه حتى
وان كان ظاهرها مضحك

باصلاح النوايا تصلح الأمور وكلي أمل بديرة الخير وعيالها الخيرين

** تعليقج على البوست اللي فات أسعدني , أحبك الله الذي احببتني من أجله , والله لا يخليني

kuwaiti_cool يقول...

السيف اهو السيف
والبحر اهو البحر
والسدره بمكانها ماتغيرت
واقفه شامخه نتظلل بها

لكن مشكلتنا بالنفوس
نفوس الامس ليست نفوس اليوم

زمان كان فيه رؤوس تقود

واليوم
ضاعت الطاسه

مابقى لنا غير السدروه

شكرا لك

t7l6m.com يقول...

ياريت في ناس بإيدهم السلطه والقرار يقرون البوست ويدركون أنه مو كلام إستكانه بروحهاهذا كلام كل كويتي وكويتيه تحب الكويت بصدق
وتخاف عليها وتتمنى إنها تكون الأفضل بين الدول

Touché يقول...

أبدعت وآلمت

البوابة يقول...

ياحلو ذيك الأيـــام ذكّـرتنا بزمن الأول
كــان بلدنا متقـدم وعلـى الخليج الأول
كلامنا مسـمار بلوح ما له مجال يتأول

إلحين كل من يتلون ويدور على اللي يفيده
ما همّـته الـكويت هـمّــه يـزيـد اللي فـــيده (في يده)
لا تفقــد الأمــل وتقــول : غطــيني ياتفيده

خــلـك أبيض وأسود إرجع مثل الأول

يا تفيده = المثل الأصلي يا صفيه

Shkhabee6.blogspot.com

3.D3aijany يقول...

Mashalla 3alaich knt bs2al meno katba bs 3rft men el.comments meno ;)
jameelaa jedan (Y)

AuThoress يقول...

آآآآه
يا وطني


:(

ARTFUL يقول...

كلامج؟؟

فينا شعور متناقض

ما بين عجابي بالمكتوب وسعادتي

وحزني على حالنا

اييي والله

صج الفقر أحسن لنا؟؟

وين كنا ووين صرنا!!!

يالله تلطف فينا

صح السانج

!!

|:| DUBAI |:| يقول...

سوري بس وايد جرحتوا في الكويت

: )

بنت الشاميه يقول...

استكانه بعد اللى صار تصدقين
قلت بقلبي الجوع والفقر احسن لنا
لاني احب ديرتي ومن خوفى عليها
ولا اني اعيش هالغربه.....اموت وانا واقفه

كم انت جميله يا استكانه

فيلسوف يقول...

إلى كل محب لمحمد صلى الله عليه وسلم
و محب للكويت

مهم جدا
اتمنى منك المشاركه

http://felsoof.blogspot.com/2010/10/blog-post_22.html