الأربعاء، أكتوبر 13، 2010

أرض ..أرض

بسم الله الذي لا يضر مع اسمه شئ في الأرض ولا في السماء
لم اكن يوما ممن يخفي تفاصيله في بين طيات روحه خوفا من العين،ولم اكن للحظة اشك أن بعض الامور التي حصلت في الفتره الاخيرة مرتبطة شرطيا بشئ ما فكنت دوما وابدا أؤمن بأن من يحصن نفسه ويرقيها لن يصيبه السؤ ابدا
فماذا حصل؟
.
.
تبدو لطيفة
!!
هذا كان انطباعي الأول عنها عندما قابلتها للمرة الأولى بعد عودتي من الاجازه وتكليفي من قبل المسؤول لتدريبها لعده شهور مؤقتا،لطيفة هي ،هادئه قليله الكلام،ترتدي عاده بنطال بلون وقميص بلون آخر وعلى راسها تتقاطع كل الالوان بالشيله،ومشكلتي الاساسه كانت دوما بعيونها التي لم اكن اعرف ان كانت زرقاء..بنية..زيتيه..او ربما تكون خضراء


البداية،الحكاية الأولى:
--------------------------
في البدء كانت هنا تجاورني في مكتبي،وانا كنت قد قسمت خطة التدريب لمراحل،بدأت بالشرح فوجدتها منصته،تسمعني باهتمام،وكلما انصتت كلما شعرت بالحبور اكثر،فمنذ متى اصبحت انا ادرب الموظفين الجدد وينصتن لي بكل هذا الاهتمام؟ انا حتما يوما ما سأقف على مدرج واشرح لعشرات الطلبه،تشطح بي احلامي  وتستدركها هي بسؤال عرضي:
استكانة...يصير اشوف السوار اللي بيدج؟
شعرت بخيبه الأمل،فقد كانت منتبهه لسواري وليس لي،اعطيتها الاسوار،قلبته،ابتسمت،قالت لي انه جميل وملفت للنظر،وقلت لها انها هدية من عمتي الكبيرة وهو عزيز علي جدا
.
.
في نفس اليوم،وفي طريق عودتي للمنزل كنت امسك بمقود السياره،فسقط السوار بحضني  فجأة،دون ان يكون هناك سبب لذلك،الغريب بالأمر ان السوار انكسر واعتقد لا يعيده الى ما كان عليه سوى ان يتم لحمه ربما
!!



الحكاية الثانيه:
--------------------
لم اربط اي ارتباط شرطي بينها وبين السوار،فربما كان على وشك ان ينكسر ولا علاقه للأمر بعيونها ابدا هكذا ظننت في حينها،وبعد اسبوعين من الحادثه الاولى وبعد انتهاء الدوام كنا متوجهين لمواقف السيارات وهي تستشيرني بمسأله شراءها لسياره جديدة وكان الموضوع كله يتعلق بالسيارات،صادف في ذلك اليوم ان سيارتي تقف بجانب سيارتها،نظرت لسيارتي وقالت:
إستكانة سيارتج جنها توها اليوم طالعه من الوكاله،التواير نظيفه ولا فيها شي،مو مثل سيارتي
رغم هدؤها ،فهناك نبره صوت تخرج مفاجئه منها حين تمدح شئ ما،قلت لها اني لم افكر يوما بأن أنظر لتواير سياره،وانها فعلا دقيقه،ضحكنا وركبت كل واحده سيارتها
.
.
بعد يومين بالضبط:
بنجرت التواير الخلفيه في مواقف الافنيوز!


الحكاية الثالثة:
-----------------------
كانت ثرثرة بنات صباحية،أكتفي انا بقهوتي وتجلس هي بجانبي،بينما الموظفات يتكلمن عن الخدم ومشكله هروبهن وكيف يتحمل الكفيل كل شئ
سئلتني احداهن:
استكانة ما عندج خدامة؟
جاوبتها:
لا
!!
كان الأمر صعب بالبداية،ولكن مع ترتيب الوقت والمسؤوليات تصبح الامور اكثر بساطة وسلاسه،فجأة قالت هي:
انا مادري انتي اشلون تلقين وقت حق كل شي،ياربي اليدين ثنتين وانتي من الصبح اشلون يمديج تسوين ريوق،تنظفين وتكوين ملابسكم وتيين تكتبين وايد وبليل تردين تسوين وتسوين وبلا بلا بلا
لا اذكر كيف انتهى الحوار
ولكني اذكر تماما ان في صباح اليوم التالي:
،انسكب الماء المغلي على يدي اليسرى  ورجلي واحترقت اذاب قلبي
،ادهن نفسي كل يوم بكريم الميبو برائحة السمسم،اشعر بالغثيان من الرائحة وكأني صمونه بالسمسم  تتمشى
!!
الحكاية الرابعة:
--------------------------
يوم الأحد هذا وبمجرد ان وضعت حقيبتي على المكتب قالت:
استكاااااانة...مع مقطه تشره
!!
شريت نفس الكحل اللي قلتي لي عنه،ما طلعت نفس خطه عينج
استغربت،كحلي للدوام بسيط غير ملفت،ولست انا بصاحبه العيون الفتانه العجيبه،البنت ما عليها قاصر جمال،والامر لا يستحق ان اكذب ولا ان تتشره هي،اخرجت الكحل من حقيبتي فورا واعطيتها اياه في ذات اللحظة،قلت لها كل ما عليك حرق طرف الكحل واعطاءه قليل ليبرد ثم ضعي خط رفيع داخل عينج وسحبي عند الزواية
ضحكت وقالت:
ولا راح تطلع مثل عينج،انتي عينج لوزيه انا عيني مدوره
جلست على مكتبي اشرب قهوتي وافكر بكلمة لوزيه،عيوني لوزيه؟لما لم يقل لي احد من قبل ان لي عيون اللوز
وضحكت

الأثنين صباحا:
قالت لي الدكتورة هناك غدد ملتهبه تحت الجفن بالزوايه اليسار مما يسبب لك الالم والدموع،قطره وكمادات دافيه وسينتهي الامر ان شاء الله،ومن ذلك اليوم وإلى هذه اللحظة وأنا اشعر بأني قرصان لتركيزي بعيني اليمنى فقط
!!
الحكاية الخامسة:
----------------------
نظرا لخروج اكثر من موظف باجازه هذا الاسبوع انكتبت علي اربع ملفات في يوم واحد كل منهم يتطلب بحث وكتابة،جلست واريهنيت على المكتب،صديت على البلوقرز والفيس بوك،كتبت وكتبت وكتبت وكانت هي بجانبي تساعدني بتدبيس الورق وترتيبه،وبينما انا اكتب رفعت راسي فجأة وتنهدت فوضعت يدها على راسي وقالت:
عفيه مخ ما يتعب،استكانة خلصتي ثلاثه مواضيع وكاتبه وايد وايد  بساعتين
!!
شصار اليوم؟
صباحا فقدت توازني صباحا واطيح طيحة معتبره  على وجهي ،وبذات المكان الذي وضعت يدها فيه على جبهتي جرح و صعروره لا اعرف كيف ممكن معها ان اواجه المجتمع
حتى الطيحة غريبة،في احد جرب يطيح على ويهه؟
هل انا هوية؟
!!
.
.
.
.
كل هذا ولم انتبه،الا عندما انتقلت لمكتب صديقتي اليوم،رأت وجهي فشهقت:
استكانة،من كافخج على يبهتج؟
قلت لها حكاية الجرح وغرابته فقالت لي فجأة:
شفيج استكانة...عيونج..ايدج ...واليوم جبهه الصمود
!!
ضحكت،قلت لها الحمدلله امور بسيطه
فقالت دون ان تنظر  لعيني:
انا اقول اخذي من اثرفلانة
راعتني كلمتها،ونشفت ريجها بالسؤال ان كانت لاحظت منها شي،ولكنها لم تجيبني الا بقول واحد:
قعدي مع نفسج وراجعي كل كلمة تقولها والشي لللي يصير فيج وراح تشوفين
.
.
وضعت ثلجة في قلب فوطه صغيرة،ورجعت لمكتبي،استغل عدم مرور احد فأضع الفوطه على الهضبه المجروحه في جبهتي،وبمجرد ان اسمع اقدام احد اعيد الفوطه للطاولة وانظر للشاشه،باقي للبنت اسبوعين معنا،وانا متضايقه لأني محتاره هل هناك ارتباط شرطي بين ما يحصل وما بين كلماتها؟
ام اني الموضوع ليس الا حوادث بسيطة تتابعت علي؟
عندما سولفت لأخي هذا الصباح قالت هذي مفيده جدا لو يتم استثمارها محليا او حتى في استخدامها في المباريات،وعندما رأى جديتي قال لبسي مدرعه من صمت،لا تتكلمي عن شئ واصبري كلها اسبوعين،انا ااعلم انها اسبوعين والامر لا يتعلق بالصمت،الامر يتعلق بأني تحت مجهرها
اليوم ثلاث جمل متتاليه:
ربعج وايد
امج وايد تدق عليج
وشكله وايد يحبج
.
.
ياربي شنو بيصير؟
الله يستر
!!

هناك 74 تعليقًا:

الاوركيده يقول...

ياحياتي يا استكانه

الله ياكافيج شرها انشاء الله وشر عيونها

اتفق معاج بسالفة الرقية بس اتبعي نصيحة زميلتج اخذي ماي وشربي من وراها واقري المعاوذات في قلبج وانتي قاعدة يمها ، الله يحميج ويحفظج يارب

:***

جنة الحواس يقول...

واي يمه شنو هذي ! آنا اخترعت
استغفرالله ! المفروض من يوم و رايح تصيرين معاها صنم و ما تلبسين شي يلفت النظر و ما تطلعين من بيتكم إلا و انتي محصنة روحك


صج صيري لا أسمع لا أرى لا أتكلم
ووصي أهلج ما يدقون عليج .. خلج عالمسجات .. لا تسوين شي جدامها


لين الله يفرجها !

chandal/danchal!! يقول...

اف تنرفزت!
ودي احذفها بالأطلس!
ولو اني ماحب سوالف العين والنظلة, بس في ناس صج ما يذكرون ربهم وما يثمنون كلامهم وعلى كل شي يعلقون


سلامتج حبيبتي وما تشوفين شر, شبقى منج يا عمري عمرج! لحمة هبرة وناقصها شوية بطاط وقرع!

آسفة عالتشبيه! بس متمزعة جبدي من اليوع ومشتهية مشخول ومرقة هوا!

esTeKaNa يقول...

الاوركيده
ّ~~~~~~~~~~~~
ما شاء الله ما تخلي وراها شي
كل شي تشيله بيدها
:))
وانا ماحب التبربس
بس الرقيه لابد منها
يا بعد قلبي انتي
:*

esTeKaNa يقول...

جنة الحواس
~~~~~~~~~~~
اصير صنم؟
يا ليت اعرف اشلون اصير صنمة
:)
والتليفون انحط سايلنت
ووصديقاتي كلكم بالمراسله
وامي..تصبر لي هدة الدوام
وهو..الله يستر
:P

حبيبتي انتي اشلونج؟
اشلون البيبي؟
:**

esTeKaNa يقول...

chandal/danchal!!
~~~~~~~~~~~~~~~~~~~~~
عطيني الاطلس اهوووه انا احذفه عنج
:P
والله يا جندل في ناس لو يدعمون المونده قالو نضلوني
!!
هل كيف نضلوج وانتي داعمه مونده
وين عويناتج ما تشوفين
انا صج ماحب هالموديل
.
.
بس اللي حاصل معاها يزاها الله خير كل شي تعلق عليه،لو اكح علقت،وما تعلق مباشره لا تخمر
تخز
بعدين وفجأة تعليق على الهامش
.
.
.
الله يسلمج من الشر،بروحي اشم ريحه سمسم واحس روحي قرصان،بعد تخليني احس روحي لحمة هبره وشوية بطاط وقرع
هههههههههههه
يا حبي لج
:))

الزين يقول...

استكانه ترى انا رافعة حاجب واحد ومتخصره وقاعده احاجيج

قولي ايه
وبدق سيارتي سلف واييج طايره من الأحمدي
واتنزها من ييبها
واسقيها ماي
واخليج تشربين وراها

قل اعوذ برب الفلق
شنهي هذي
ويعه
ما يخلون شي الا يفز قلبهم فيه

وانتي اهو
انا الحين تاله اذنج
ان تحجيتي ولا قلتي ابوي اخوي امي زوجي
شلعت اذنج
ما تيوزين
شناااطره
تشلعج من القاع مثلا
اففففففف

يالله قولي تعالي

ترى انا حاطه ايدي على خدي واطالع التليفون ناطرتج تدقين

esTeKaNa يقول...

الزين
~~~~~~~~
نزلي حاجبج
شيلي ايدج من خدج
ضحكي لي
.
.
.
يالله الحين ادق
هههههههههههه
زيوووووون محروقه ايدي
ومصعرر راسي
ولحمة هبره على قوله جندل مو ناقصني الا بطاط وقرع
فديري بالج على مشاعري
:)))
وصمن بكم عمين
ما راح اتكلم
:)

ikhalifa يقول...

أعوذ بالله !!
@@
بل بل بل بل بل بل بل بل
بل بل بل بل بل بل بل بل

صبري بشرب ماي
أح

بل بل بل بل
مب عين عليها

@@

هذه عيون و لا أشعة ليزر
صيىري لوح و غطي راسها بكعد ماي
و عقب تسبحي

بل بل بل بل

صبي عينها بقلم رصاص مبراي...و فتحي البراية و حطي البقايا في العين الثانية

و لا أقولج...تكلمي معاها بنفس الطريقة..قوليلها بل بل بل شلون قدرتي تتعلمين بسرعة مو مخ عليج
شوفي الحظ إللي عليج عطوج كومبيوتر يديد مو انا و عليه
أول مرة أشوف بنطلون مفصل على وحدة مثلج تقولين صابغة ريولج مب لابسة بنطلون !!

تعلمي منها و داوها بالتي كانت هي الداء
و وصي ربعج يقولولها إن عينج حارة و خلها تتحرص منج
بس تأثير عينج يطلع بأثر رجعي بعد أربع أيام

صدقيني سويها و هي اللي بتنحاش منج

Hope يقول...

السلام عليكم و رحمة الله و بركاته

حبيبتي استكانه اسم الله عليج،، سلامتج

ديري بالج على روحج
ترى شكلها صج عينها حاره.. و الناس هالايام مبطلين عينهم على كل شي
والله يحسدون الواحد ع اللي يسوى و اللي ما يسوى.. حتى الضحكه يحسدونج عليها اللهم يا كافي
ما تدرين باجر شبتحط عينها فيه
ترى ما يسوى عليج .. دايما اقري على روحج و خصوصا لما تكونين حوالينها
و لي قالت شي ولا علقت قوليلها ذكري الله.. ترى ما فيها شي.. الكلمة ما تزعل، و عادي لي قلتي لها جذي
الواحد لازم دايما يذكر الله لما يشوف شي يعجبه

الله يحفظج من كل شر

Kurinkato يقول...

ana agool eqray el m3wthaat b wayeha

o golay ( o j3alna mn bain aydeehum sadan o mn 5alfahum sadan o a'3shaynahum f hum la yab9roon)
kel ma shefteeha

o deray baleech 3ala nafseech
\
salamt :*

ARTFUL يقول...

ول ول ول ول

صاروخ مهي عين

ذكري الله وتعوذي من ابليس

مل ما اقرا قصة مادري اضحك والا اتكدر

شهالناس اللهم يا كافي

انشغلوا بروحكم غربل الله ابليسكم

!!!

لو انا منج ابطها بالويه

ان انطقت بكلمة عني

بنط بويها اقولها ذكري الله قولي لا اله الا الله

لجمتيني لما قلتي بس
السوار وانكسر

والراس انفضخ

والتواير انبطن

والعوينات تعورن

ما بقى فيني شي صاحي

رحميني الله يستر عليج ويفكني من شرج

!!!

سلامات وخطاكم السو

والميبو له بديل

من ريحتة القوية نزلوا واحد نفس مفعوله بس ماركة ثانية يكون بالعسل ريحته عسل وخفيفه جدا

بس اذا حطيتيه لا تقولين احس اني قيمر

!!!

;p

سلام

Sami يقول...

اقري المعوذات ..و ما كو عين في الدنيا تصيبج

esTeKaNa يقول...

ikhalifa
~~~~~~~~~~~
خوش نصيحة
عجيبة
:)
انا اليوم على ضحك قلت لها شفتي جبهتي؟
عين ما صلت على النبي
تدري شقالت؟
على شنو عين كلها جبهه
ههههههههههههههههه

كلها جم يوم وتمشي
الله يهديها ياربي ويحفظنا جميعا
:)

esTeKaNa يقول...

Hope
~~~~~~
يا بعد قلبي انتي
صاجة :
اشيا تسوا
واشيا فعلا ما تسوا
!!
تدرين وين المشكلة؟
الحياء
وايد اخاف اضايقها من غير لا اقصد
فالحل عندي:
الرقيه واذكار الصباح وماكو الا العافيه ياربي الله يعدي هالاسبوع على خير
:)

esTeKaNa يقول...

Kurinkato
~~~~~~~~~~~~
يسلمج ماقصرتي
شكرا على هالدعاء احبه
ومن زمان ما قلته
:)

esTeKaNa يقول...

ARTFUL
~~~~~~~~
اضحك افا عليك
انا وانا اكتب يتني الضحكة
:))
واي ارتفل ضحكتني
ههههههههههههههههه
اي والله
التواير انبطن والعوينات تعورن
تذكرت مرت يدي
:P
وصج شنو اسمه الكريم الثاني؟
تاخذ فيني اجر
انا مو حابه هالسمسم كلش بس مظطره
:)

esTeKaNa يقول...

sami
~~~~~~~
عدل
يزاك الله خير
:)

الليوان يقول...

استكانة

من صجج انتي !!!!
كل هذا وتقولين كلها جم يوم وتمشي
وين دوامج اهو بس قولي
والله والله لخليها تدردرع دولكة ماي ونسقيج عقبها
بعدين الله يصلحج
لا تخلين النية صافية مع الكل يابعد قلبي انتي
واااااااااي
حدي انغثيت
عاد انا منقرصة من العين
واااايد
بس المهم التحصين لاتخلينة
كل يوم اقري المعوذات والفاتحة سبع مرات وقولي تحصنت بالله ربي وخالقي من شر كل ذي شر
وقولي لي شفتيها
اللهم اني اعوذ بك من شر ما اجد واحاذر
واللهم اكفنيها بما شئت
واللهم اني اعوذ بك من شر طوارق الليل والنهار الا طارق يطرق بخير يارحمن
والا اقولج تعالي اقرى انا عليج :)

عمى بعين العدو
ودي اكتب لين باجر بس فشلة طولت

حافظج الله
:)

عثماني يقول...

لا اله الا الله

الحل عندي

دعميها وهي طالعه من الدوام

ان شالله راح ترتاحين بعدها .. بس تأكدي انها ماتت

و اذا ما ماتت .. رجعي قري ودعميها

وهكذا الى ان يطلع السر الالهي

:)

ما عليج با ان شالله

ikhalifa يقول...

يعني هي مضايقتج و مفلعتج و كاتبه فيها بوست بحاله و ما تبين تضايقينها!!
و الله الناس حظوظ!! مب حظ عليها
على قولت أم عليوي
ياليتك يا بوحظين تعطيني حظ من حظينك

عيل أنظل و يراعون احساسي و يصبرون علي متى أروح
و يكتبون فيني بوست
!!
عفية عين و حظ!!

هذه و هي متدربة..عيل لو ثبتوها شو بتسوين!!
مالت أقول مالت علي...


حظوظ!!

mtfa2el يقول...

يا معودة كنت باعلق
بس هونت
بعدين قلت اعلق
بعدين هونت

اخاف تشوف بلوقج و تصكنا عين واحد واحد و نروح فيها احنا اللي علقنا

:))

لا يبا ماكو الا العافية اقري المعوذات و قولي باسم الله الذي لا يضر مع اسمه شي في الأرض و لا في السماء و هو السميع العليم
و اقري دعاء من خاف قوما
" رب اكفنيهم بما شئت "

و اذا توكلتي على رب العالمين حق التوكل .. بيحفظج من شر كل ذي شر
:)

و ناشبيها شفيج ساكتة
لو انا واحد يسويلي جذي جان ازرده و ازنطة لما تطلع روحه و يتعوذ من ابليس لما يشوفني

شدعوه قوة خارقة اللي عندها
ختحرر فلسطين بالمرة جان عينها حارة جذي
:))

العين حق
بس لا تعطينها اكبر من حجمها
لاهي اللي تقدر تضر و لا اهي اللي تنفع

ikhalifa يقول...

انا بعدني مقهور

انتي تعرفين أن كل يوم يبدلون لمبة غرفتها
قبل لا تنام ما تعب روحها تطفيها، بس تخزها و اللمبة تحترق
تعرفين إن ما تسخن الماي حق القهوة!!
تيب ماي بارد و تقول حشى ما تقول من الكويت تقول ماي من جبال الألب...عطول يتبخر
تصدقين أن من كثر ما بدلوا لمبات غرفتها قالت حشي إنتي كل يوم تتبدلين..ردت اشتغلت من روحها
تعرفين أن سيارتها كانت أصلا طيارة

أنا بصراحة و الشهادة لله بعثت لها شحنات سلبية...ردي علي باجر إذا داومت و لا لأ

I7na 3shagnaha يقول...

matsalifnee @@nha yomain o aredhom laha

abeehom bshaghla :)


SALAMAT :**

3laich bil ruqiyah o inshala ma3laich shar

3ad ana 3aks chandal.. i really believe bil @@ o specially itha kanat le @@ zirq ;p

kal ho na ho يقول...

العين حق.. حتى اللي يحبج ويخاف عليج له فزة ..!

لا تستحين المرة الجاية-الله لايجيب مرة جاية- وقبي عليهم وقولي:اذكروا الله

تصدقين وتامنين بالله..حتى عيني اليسار منتكسة هالأيام!!


:(

ودمتم

شـقــران يقول...

استكانتنا الغالية

مساء النوير

حقيقة تنرفزت وشدة أعصابي

لاحول ولاقوة إلآ بالله

الحسد موجود ومذكور في الدين...فحصني نفسك منه أشدما تحصين


ورأي إمّا أن تتحاشي حتى الكلام معها بالأعذار والأشغال أو...أن تأخذي إجازة اسبوعين أو أقل..حسب قدرتك ؛ فهذه البنت لاتعاشر ولاتجاور هدها الله وإيانا

لاحظت خلال حوارك معها أنها لم تذكر الله ولا مرة!!؛


حفظك الله وأحبابك من شر الحساد وعيونهم


لكِ مني أجمل وأعذب تحايا المساء

kuwaiti_cool يقول...

القاروره العزيزه
ذات العيون اللوزيه :)
استكانه
مساؤك ورد طائفي بعبق العود الهندي المعتق


اختي العزيزه
العين حق
ويجب عليك الإكثار من قرائه المعوذات بسرك بعد كل موقف يحدث معها

وعليك بإتباع سنه الرسول
بأخذ باقي ماتشربه
او غسول السكاين ان وجد من بعدها
والإغتسال به

الله يستر عليك
ويتمم عليج
ويزيد
من محبه الناس لك
ويحفظ لك امك ويطول بعمرها مع الوالد

ويتمم عليك انتي وزوجك الكريم بالسعاده والحب

عموما
الحذر ثم الحذر
من صاحبه العيون الدائريه :)

وياليت لو تقدمين لنا خدمه تريح الكويتيين وتغضب الإنبطاحيين

لو انج تاخذينها واطقين فيها فره مقابل شاطيء الشويخ ويا ريت لو اتخلينها اتركز بالبيوت بدقه

يمكن نرتاح
ودمتم

شـقــران يقول...

الغالي متفائل

مساء الخزامى يالحبيب
:)

حاولت الدخول لمدونتك ولم استطع...ولايوجد هناك رابط...عسى ماخلاف؟؟


لك مني أجمل وأعذب تحايا المساء

حياتي هدف مو عبث يقول...

اسمها لطيفة :o

ما دري شنو التصرف الصح حقيقةً
لكن صدي عنها كثر ما تقدرين
أو بطيها ابويهها اشكره
قوليلها ذكري ربج

ربي يحفظج ويبعد عنج الشر
:*

diamonda يقول...

المعوذات
+
اعوذو بكلمات الله التامه من كل شيطان وهامه ومن كل عين لامه
+
الحمدلله الذي خلقني وسواني وزان مني ما شان من غيري
+
الدعاء اللي قلتي: بسم الله الذي لا يضر مع اسمه شيء بالارض ولا في سماء وهو السميع العليم

لا تطلعين من البيت الا وانتي قايلتهم! واخذي من أثرها!!!! العين حق! والحسد مذكور بالقرآن
والحين الناس صارو يطالعونج حتى على الابتسامه! حطي بالج ولاتهملين الموضوع

الله يكافينا الشر أجمعين

الجودي يقول...

قال صلى الله عليه وسلم (( العين حق ولو كان شيء سابق القدر لسبقته العين ، وإذا أستغسل أحدكم فليغتسل ))

استكانه

حبوبه ليش ما تقولين لها تقول تبارك الرحمن ترى ما ترتاحين إلا لما اتبارك و تذكر الله و هذه ما فيها لا احراج ولا عيب إذا اهي مو منتبه لروحها بعد ما يسوى اطيرج جذي كلامها صجم الله يصلحها
يا تقولين لها تذكر الله أو إنتي ذكري الله جدامها لي قالت أي شي قولي إيه ماشاء الله تبارك الرحمن جود تحس و تعيد وراج

و ربي يحفظج و يسلمج من كل شر

:**

Najmah يقول...

@@
يماااا
!!!
والله انا اخترعت
كل يوم الصبح اقري المعوذات
وارقي نفسج
ترى صج الناس ماتشوف الي عندها
تشوف الي عند غيرها
وممكن على اي شي تقارن ويفز قلبها
ديري بالج على نفسج
وعسى ربي يحفظج من كل شر
ويحرسج ويكافيج ياصديقتي
:**

Nikon 8 يقول...

يمه إسم الله على قلبي
أنا البعيدة خفت منها
إشلون إنتي المتلقية الأولى لصواريخ عينها
بعد ما يبيله البنت نظالة
يا ساتر
هذي وهي قليلة الكلام
ومع كل فتحة حلج فيها كارثة
الله يكافيج شر فزة قلبها وحرارة عيونها

SHOOSH يقول...

كااااااااااااااك


خطاج السو

عندي وحده بالدوام نفسها

ربما تصير لها

عزج الله مره لابسه صندل

قالت لي

اللللله شحلاته عليج لو أنا لابسته يطلع يجيب اليهد

بس اطلعت جان يطيح على رجلي ملف كبير ذيلي اللي فيهم حدايد عالاطراف


ومن المكتب الى الطواريء

SHOOSH يقول...

كاتبه تعليق اشطوله و انمسح

بس هونت

:(

Nurah يقول...

الله يكفيك شرها
أعيذك بالرحمن الرحيم من شرها
خليك على التحصين
و ما عليك بااس إن شاء الله

:)

أندلسي يقول...

الله اكبر عليها
هذي شر يجب الابتعاد عنها

بس ترا مو كافي الانسان يذكر ربه بلسانه العادة احنا نقول اذكر الله قول ما شاء الله ويقوله هالناظل بس مو من قلبه والذكر مو بالقول بالايمان بالقلب

العين والحسد حق وانا مريت بتجارب
كثيرة كثيرة ولقيت ان اكثر شي يتاثر بسرعه بالعين بعد جسم الانسان اهما المسابيح والزجاج والكرستال

انا اخر موقف صارلي شريت مسباح ب750 فلس من المباركية وانا مو من عادتي اشتري مسابيح بس هذا بالوانه المتعدده شدني وشريته مريت واحد من الربع وشافه بيدي وانا ما قاعد احركه بس بيدي قالي خوش مسباح فجاه انقطع المسباح وكانه احد تله من ايدي طبعا اهوا حس على دمه وبرر ان ما يقدر يطلع وياي

قبلها كنت حاط صورتي في كرستال والصوره بنص المكتب ياني شخص وقالي حلوه هذي اول مره اشوف هالطريقه وين سويتها قتله بدبي ورحت اخلص له شغله رديت والله بدون اي تاثير لقيتها طايحه ومتفتته قطع صغار

الله يحمينه من هالنظاله

EngineRaa يقول...

"اعوذ برب الفلق ومن شر ما خلق"
الله ايكافيج شرها , نصيحتي لج غير التحصين اخذي من اثرها والاهم انها من تقوول لج شي خليها تقوول ما شاء الله ولا ايهمج انج تحرجينها هالنوعية منجب ولا تنحرج وانا متعمده اقولج جذيه عشان جود تنتبه على نفسها شوي.
حافظج الرحمن من كل شر اخيتي الغالية

سلة ميوّة يقول...

انتي من صجج!!!

قريت الثلاث جمل اللي بالأحمر
واتعرفين الشعور
اللي عصره بالقلب توصل للي المعده

هذا الشعور اللي اييج وانتي راكبه قطار الموت...
مادري ..المهم مو هذي السالفه السالفه
اخذي من اثرها شربي من وراها...
والا اقري المعوذات اشكرها بويها

ولا تنطرين شيصير وللي يعافيج!!!

الله يكفيج شرها وشر امثالها

وعسى ربي لا يكدر خاطرج...والله يهديج الله يهديج كل هذا وكل هاللي قالته وانتي اتسولفين جدامها عن وعن...

وتلفونج سكري بالدوام الله يخليج هالاسبوعين...
و ريلج قولي سافر اسبوع ومايدق خير شر..

و امج الله يحفظها ويحميها وعساها على راس البيت دايما بصحة وعافيه

ترى بقعد على اعصابي لي اسبوعين جدام...

أرض أرض؟؟ لا أرض جو بحر..هذي..
قطيعه!

|:| DUBAI |:| يقول...

طفا طفا طفا
الله يحفظج
و يبعدج عنج كل شر
المعوذات و آية الكرسي
بليز

كلمة ماشاء الله
معدومة عند وايدين

خص البنات
لا اله الا الله
لو بكشتج بعد بيرمسون
: )

ARTFUL يقول...

عيزت ابي اذكر اسمه ماني ذاكره انشالله بس احصله اقولج

:)

t7l6m.com يقول...

العين حق
وأنا مستغرب شنو صبرج عليها
المفروض كاشتها من المكتب بعد ثاني حادث بالكثير
أم عيون دائريه
بل بل

N.Rhythm يقول...

مادري اضحك ولا ابجي
لقيت احد يشاركني بهالموضوع
خل اقولج
ويا هالبنت
طفا ايفوني طفا استكانه تخيلااي ماصارله يومين عندي
سيارتي اليديده ثالث يوم من طلعتها من الوكاله داعمه مظله بيتنا!
بقمه امي وانا بالاستقبال طحت وتكرفست وطاحت واختفت بقدره قادر
طقم استكانات
"مو خواتج =p"
تكسروا
هههههه
تبين بعد اقول
انا صرت مقضضه منهالسالفه
المعوذات اقريها
وتبين الصج لا تستحين قولي ذكري الله
واسم الله عليج

:: بـوح الصمـت :: يقول...

قل أعوذ بربّ الفلق :|

إستكانتي العين حقّ , طبعاً مو لي درجة الوسّواس بسّ في أشياء ما ينسكت عنها "><

الله يحرسج ويحميج بعينه اللي ما تنام حبيبتي , لا تنسين الرقية وإذا قالت شيّ جدّامج قوليلها قولي ما شاء الله , جود تستحي على ويهها وتذكر الله , استغفر الله شهالنّاس , حدّددها تغث :( !!

ضيّقتي خلقي :(

طمنينا عليج عاد , والله يحفظج يا
حبّابة البلوقرز إنتيّ
:*

الـسـنـبـلـة يقول...

بصراحة انا اخترعت

بس ضروري ضروري ضروري قبل ما يخلصون هالاسبوعين تشربين ماي شاي عصير اي شي من وراها ضروري

الراية يقول...

استكانه عيل لو عندج اللي عندي في الدوام والمشكلة انها من اهلي من تشوفني اشتغل تقولي نشيط اليوم وحياتج بعدها لازم 3 ايام ماداوم مريض بطلت اشتغل والسبب اهي

esTeKaNa يقول...

الليوان
~~~~~~~~~
عاد تدرين انا شنو متعتي وانا صغيرة؟
احط راسي بحضن امي ولا ابوي ويقرا ويمسح على راسي
!!
تصدقين قلتي بقرا عليج جان اتذكر هالمنظر
انا يايتني طفوله متأخره ديرو بالكم
:P
ويا بعد قلبي انتي
صاجة اهم شي التحصين
وانا صايره كل يوم احرص على الرقيه الشرعيه كاملة وربج الحافظ
:)

esTeKaNa يقول...

عثماني
~~~~~~~~~~
فكر إجرامي ولكنه عملي
لا خلا ولا عدم من خططك العجيبة
:)

esTeKaNa يقول...

ikhalifa
~~~~~~~~~~~~~~~~
ههههههههه
ضحكني تعليقك
تدري؟
احيانا اتمنى اكون أكثر جرأه في بعض الأمور،بس دايم اخاف اجرح اللي امامي
:)

esTeKaNa يقول...

mtfa2el
~~~~~~~~~~~~
هههههه ضحكتني على انك خايف تصكنا عين جماعية
:P
وفعلا اهم شي الانسان ما يعطيه مثل هالمواضيع اكثر من حجمها
في ناس لو تطقها الطوفه قالت عين
:)
الله يحفظنا وإياك ان شاء الله

esTeKaNa يقول...

ikhalifa
~~~~~~~~~~~~~~
داومت
هههههههههههههه
:)))

esTeKaNa يقول...

I7na 3shagnaha
~~~~~~~~~~~~~~~~~~~
البنت صار عليها طلب لأنها مفيده جدا
:P
العين حق
الله يكافينا الشر
انامدري ليش استاحش من العين الزرقاء اثاريج مثلي

الله يحفظنا ويحفظ حبايبنا
:)

esTeKaNa يقول...

kal ho na ho
~~~~~~~~~~~~~~~~~
إسم الله على عويناتج
الظاهر برج الثور هاليومين داير عليه فايروس العين اليسرى
ولا تسئليني شنو هالفايروس
تأليف استكاني بحت
:P

esTeKaNa يقول...

شـقــران
~~~~~~~~~~~~~
ياهلا وأمية هلا
ويا رحب وأمية رحب
حيالله شقران ويا حيالله هذي العودة الجميلة لمدونة استكانة
:))
تبي الصج؟
تحاشيتها بقدر المستطاع
والتزمت الرقيه الشرعيه
اول مرة في اسبوع واحد اروح الطبيب ثلاث مرات متتالية
!!
عموما الله الحافظ وان شاء الله ماكو الا العافية

شاكرة لوجودك الرقيق
:)

esTeKaNa يقول...

kuwaiti_cool
~~~~~~~~~~~~~~~~~
أخي العزيز

يا مساء الخير والبركة في عصرية هذه الجمعة المباركة
تعليق..به رائحة العود والورد
جزاك الهل كل خير على التذكير والتوصيه
والله يحفظنا وإياك وكل من نحب من كل شيطان ولامة ومن كل عين هامة
.
.
.
وبالنسبه للبنت صاير عليها طلب
:P
ودي اتمشى معاها على شاطي الشويخ
بس اخاف اهي ترد وانا لا
:)

esTeKaNa يقول...

حياتي هدف
~~~~~~~~~~~~
تبدو لطيفة
بس اهي مو اسمها لطيفه
انتي بس لطيفه يا بعد كل اللطيفات الجميلات
:))))
وشكرا على النصيحة

esTeKaNa يقول...

diamonda
~~~~~~~~~~~~~~
تعليق كامل متكامل
يزاج الله كل خير يا بعد قلبي انتي
الله يحفظ الجميع يارب
:*

esTeKaNa يقول...

الجودي
~~~~~~~~~
اللهم صلي وسلم على سيدنا وحبيبنا محمد
تصدقين يا زين اللي ذكر ربج ما يطيح من لسانهم ما تكشين منهم سبحان الله
وتبين الصج؟
انا استحي اقولها ذكري الله
بس ان شاء الله ما انسى ذكره قياما وقعودا في قلبي
الله يحفظج من كل شر يا الجودي
:*

esTeKaNa يقول...

najmah
~~~~~~~~
حبيبتي انتي
الله يحفظج من كل شر ولا يحرمني من وجودج العذب
:*

esTeKaNa يقول...

Nikon 8
~~~~~~~~~~
الله يا انا متلقيه صواريخ
شي قلته وشي ما قلته
:))
وسبحان الله انا لافت نظري انها قليله الكلام،بس الكلمة ما شا ءالله ما تثنيها الا صاير شي
الله يكافينا الشر
!!

esTeKaNa يقول...

SHOOSH
~~~~~~~~~~~~
وي حبيبتي اسم الله عليج
!!
حتى انتي عندج ارض ارض؟
هذي اكيد بنت عمها
:P

esTeKaNa يقول...

Nurah
~~~~~~~~~
جزاج الله خير يا الغالية
:)

esTeKaNa يقول...

أندلسي
~~~~~~~~
سبحان الله
!!
اول مرة انتبه ان فعلا الذكر لازم يكون من القلب مو بس اللسان واول مرة اعرف معلومه اكثر الأشياء تأثرا بالعين
تصدق؟
السوار اللي بيدي ذهب
انا لي الحين مادري اشلون من النص انكسر
:(
الله يكافيك الشر ويحفظك من العين وشيل اي شي ملفت للنظر حولك
الناس على كل شي تطالع
:)

esTeKaNa يقول...

EngineRaa
~~~~~~~~~~~~~~
تصدقين انا وايد مستحيه منها اخاف احرجها بس الظاهر لازم اخذ من اثرها
.
.
الله يحفظنا وياج ياربي
:**

esTeKaNa يقول...

سلة ميوة
~~~~~~~~~~
يا بعد قلبي قلبج انتي
اي اعرف شعور قطار الموت
نفس الشعور لما تتحرك شفايفها وتتكلم احس ودي احط على ويهي درع
!!
انا ما اتكلم معاهاب كل شي
بس البنت متدربه قاعده بمكتبي
ما اقدربهالحال اسكت مرة واحده
:)))
ربي الحافظ
وعممنا النصايح
وماحدش بيدق علي ولا بيكلمني ابدا
:P

esTeKaNa يقول...

|:| DUBAI |:|
~~~~~~~~~~~~~~~~~~
اي والله حتى بالكشه يرمسون
lol
ترا حبيت الجملة السابقه
:))
حبيبتي يا عروسه انتي
الله يحفظنا جميعا يارب

ANGEL HEART يقول...

واي الله يعينج في ناس ماينفع معاهم حتى التحصين

انا اول عادي بعدين صرت اعاني ومن اقرب الناس يعني ماكو فكه :|

وتخيلي من بعد العيد باسبوع كنت رايحه حق ناس وبابهم طحت على ويهي انا قلت طيحه عاديه بس لي يومج هذا ريلي ذابحتني ماقدر امشي عليها الا شوي وهذا كنت محصنه نفسي يعني:p

فانتي حصني نفسج بزود اقري الرقيه يومياا واذاقالت لج شي بويهج قولي لها ذكري ربج يعني لا تسمعين وتسكتين

وماتشوفين شر

esTeKaNa يقول...

ارتفل
~~~~~~~
كلفنا عليك يا خوي
ماعليه تأقلمنا على الميبو
:)

esTeKaNa يقول...

t7l6m.com
~~~~~~~~~~~
أثر عيونها مو فوري
بعد الحجوة بيومين تصيب
عشان جذي ما نتبهت بالبدايه
:))
الله الحافظ

esTeKaNa يقول...

N.Rhythm
~~~~~~~~~~~~
ياربي الناس تخرع
على اقل شي تنضل
.
.
الله يحفظج ياربي ويحفظ كل من تحبين
حياج الله نورتي المكان
:)

esTeKaNa يقول...

بوح الصمت
~~~~~~~~~~~
يا زين هالطله يا بوح الصمت
:**
تصدقين انا مدري ليش مستحيه اقولها ذكري الله
!!
بس رب ضاره نافعه
هالشي خلاني على طول استذطر الرقيه الشرعيه والاذكار
والله الحافظ
:)

esTeKaNa يقول...

الـسـنـبـلـة
~~~~~~~~~~~~~~~
من قررت اني بشرب من وراها
وهي تشيل كل قلاص بعدها
:))
الله يحفظنا يارب

esTeKaNa يقول...

الراية
~~~~~~~~~
كفاها الله السميع العليم
في ناس غريبين على كل شي يعلقون
!!
الله يحفظك من كل شر يارب ويديم النشاط عليك
:)

الخيلاء يقول...

حبيبتي استكانه الله يكافيج شرها .. كفاها السميع العليم ماشاء الله عليها وحده بوحده ..

انتي لا اتسولفين معاها بشي حتى تلفوناتج لا اتردين عليها جبالها خوفج اتودرج .. و من اتشوفينها اقري المعوذات بويها .. و قوليلها ذكري الله

و الله يحفظج يارب و يخليلج حبايبج