الثلاثاء، أغسطس 17، 2010

الجمعية في رمضان

يقتضي منطق الأشياء تفسير الأمر التالي:
في أيام الفطر العادية نحن نأكل ثلاث وجبات إن لم تكن أكثر
وفي رمضان،نحن نأكل وجبه واحده الى اثنتين رئيسية
بمعنى:
أن عدد وجباتنا قل
فلما الزحمة الغير عادية في الجمعية؟
.
.
.
لا أعرف كيف اذهب للجمعية مرة واحده او مرتين بالشهر،فأنا من النوع الذي شرائه من الجمعيه قطاعي وحسب المزاج اضف اليها ان احد هواياتي بالاضافة للقراءة والكتابة ..الذهاب للجمعية الله يحفظكم من هذه الهواية الغير مفيده ابدا
!!
في رمضان:
ما إن يتناصف النهار حتى ينطلق جموع الصائمين الى الجمعيات،كل من ساحب له عربانه وعيونه في قمة راسه،وورقه بيده ويبحث عن ما يحتاجه ويخرج بعربانه مليئه بما يحتاجه وما لا يحتاجه لذا فمن غير المستحب دخول الجمعية وانت صائم وجائع
.
.
في رمضان:
يصاب الناس بسهوة،تجعلهم يتصرفون بشكل  غريب وظريف جدا،كما  البارحة حين كنت قد رتبت عربانه الجمعية بأغراضي،والتفت لشراء قليل من الزيتون،فاكتشفت ان احداهن جبعت عباتها على راسها واخذت عربانتي ومشت بها منطلقه لرف آخر وانا انظر لها مستغربه فقد اخذت عربانتي بكل مافيها ومشت
ما ان استدركت نفسي حتى مشيت مسرعه ورائها،فالوقت ثمين والزمن ضيق ولا وقت لي لاعاود اخذ كلما اخذته
وصلت لي عندها:
لو سمحتي
فالتفت علي بعيون مندهشه:
نعم؟
لو سمحتي عربانتنا
!!
ثلاث دقائق تنظر لعربانتي في يدها ولوجهي ،وخمس اسئله من نوع:
هاو عرباانتج؟..لا..عربانتي...خزياه...عيل وين عربانتي
:)
ضحكت،دعيت لي ولها بالثبات،وشهالحاله اللي الواحد ما يأمن حتى على عربانته؟
في رمضان:
يتكلم الناس بصوت عالي،يتحاورون بين الرفوف دون ان يعلمون تسئلني احداهم::
هذا نشا المحلبيه؟
اقلب العلبه وابتسم:
اي  هذا اهو
تأخذ علبه النشا وتنظر لشده الشبنت في يدي،كنت قد وضعت ثلاث شدات بجنب بعض ومسكتهن كمسكه عروس متجهه للعربانتي عنده فسئلتني:
من وين هالخضره؟ اللي بيدج شاتر انا اللي ماخذته ذابل؟
ضحكت ،وصممت ان اعطيها ما يدي ،خوفا من ان نغص بثلاث شدات لا يتعدا سعرها الربع دينار،الغريب اني بمجرد ان طاولتها اياه اخذته ومشت،حتى ما قالت لا
!!
:)
في رمضان:
اعتدت ان ار تلك العجوز،لها وقت محدد بالجمعية كل يوم،ولا يصادف ان اراها الا في رمضان،تدخل الجمعية فترفع بوشيتها ،صوت تعليقها وحوارها مع سائقها يضحكني،عند قسم الخضروات تقف هي في اول الصف يتبعها رجلين ومن ثم انا
يضع السائق اغراضها على الكاشير،وتنظر هي بطرف عينها لموظفة الكاشير فتسئلها:
أنتي منين أنتي؟
بفتحه ظاهره على همزة أنتي،فتجيبها الموظفه:
سيلان ماما
!!
فتهز راسها غير  مقتنعه:
ما خبرنا عندكم هالبياض؟
يبتسم الطابور الواقف وراء تلك العجوز ،ويتليقف الرجل السكبه الواقف خلفها  تماما ويجيب :
لا خالتي السيلانيات فيهم بياض
فتلف وترفع حاجب واحده وعباتها على طرف فمها:
شدرااااااك؟
تبخصهم أنتاااااا
انتا ونبرة ممطوطه تصيبتني بحالة ضحك،احاول كتم ابتسامتي فلا استطيع،يضحك الرجل فتتسلل ضحكة للجميع
:)
في رمضان:
يتم اعتماد كتاب المطاحن،وتختفي مقاديره من كل رفوف الجمعيات،ومن ذكاء الشركة لا يكون لطباختها مقادير الا من منتجاتها المتنوعه
في رمضان:
تر جيران لم ترهم الا في الجمعية،وتر بنات يرتدين عبي لا يرتدينها الا في رمضان،وتر الوجوه من غير تلطخ،وكثير من الرجال يعود لهم احساسهم بالمسؤوليه اتجاه اسرهم فيكون اول خطوة بطريق المسؤوليه الذهاب للجمعية
:)
في رمضان:
أشعر بأن هناك مسحة من بركة تصيب كل شئ
الوجوه
المشاعر
الأماكن
في رمضان أحب كل شئ
حتى الجمعية
:)

إستكانة الختام:
اللهم ما اصبح بنا أو أمسى من نعمة فمنك وحدك لا شريك لك
فلك الحمد ولك الشكر

هناك 53 تعليقًا:

ikhalifa يقول...
أزال المؤلف هذا التعليق.
ميمة السبيت يقول...

** اشوه مو بس انا من عشاق الجمعية تدرين شنو المشكلة لما تدشين تبين شي واحد و يكون حده عادي مايجاوز الدينارين و تطلعين ب 30 دينار مادري شلون

ودي اطبخ شي ماعرف غير هالشيزكيك و اكلها بروحي

جبريت يقول...

انا لازلت وسأبقى ما حييت ما احب الجمعيه حتى لأغراضي الشخصيه اذا احد راح اقوله اييبهم لي واتحاسب معاه بالبيت

لكن للضرورة احكام ساعات اروح واضطر اني ادش الجمعيه لأنه ماكو بالبيت غيري والوالده تبي شي شيات حق البيت فتطيح براسي

بالنهايه شكرا يا خدمة توصيل على تواجدكم

الجودي يقول...

روحة الجمعية برمضان لها نكهة مختلفه الحوارات التلقائية إلي عند الأرفف لروادها ممتعه ناس تدعي و ناس تشكي و ناس اتحلطم عالم و الكل يركض


:)

لج أجر الإبتسامه اليوم وصلج مع قرايتي للبوست إن شاء الله

:)

ARTFUL يقول...

صباح الخير

صباح رمضان المبارك

شطابخه اليوم؟؟

نبي طباخ ونفاخ يبرد الجبد ويترس العين والمعده (بضم الميم وتسكين العين ورنة الدال البحرينيه) احم احم

;p

والله هالحجيه ماره علي ما أظن انها غربية، صاحبة كلمة أنتاااااااا

ما ثبتي اسم سايقها؟؟

;D


انا البارحه كان لي فكرة أكلة وطبقتها البعلة بلمساتها الجميلة وكانت النتيجة خيالية


عسى الله يحفظكم

لا تنسينا من دعائج



وسلامي للبعل والوالد والوالده

:)

chandal/danchal!! يقول...

اشترك معاج بهواية الجمعية بس مو برمضان


ابي ساور كريم مو لاقية!

ابي كرواسان حق عبيد ولدي مو لاقية!

ابي خبز لبناني فريش مو لاقية!

ابي وصفة ما يكون فيها كريمة كي دي دي الحمرا ولو انها بيضا ابيض من بياض السيلانية اللي تكلمتي عنها هم مو لاقية!



مطة "انتا" زبيرية صرف

:)

عثماني يقول...

مساج الله بالخير

و مبارك عليج الشهر

:)

هالكويتيين مخامط حتى على العرباين بالجمعية !!؟

طيب بالله انتي شارية يقط .. خابرج تحبين اليقط .. والحجية اللي خمطت عربانتج ايلها حارج من اليقط ... شلون بالله !!؟

ثانيا انتي الله يهديج .. تهيتين عربانتج بالجمعية ... المرة اليايه ربطيها بطرف عباتج

:)

و بعدين شلون تفرطين بشدات الشبنت !!؟

اللي يفرط بشدة شبنت .. يفرط في وطن

( الوطنية ذابحتني هاليومين )

:)

الحجية مالت السيلانية من جماعة .. ما دريتااااا !!؟

:)

كل جمعية و انتي والعائلة بخير

طموحة مملوحة يقول...

شهر البلع والاكل استغفر الله

رمضان شهر التلفزيون ووالفيمتو ... ماكو شغل

kal ho na ho يقول...

يبدو أن المنتمين لبرج الــ ..."الغزلان"
يتصفون بهواية روحة الجمعية.. تصدقين عاد لما أحس بقتة وضيق أروح الجمعية .. وأبد من أدشها يغدي شري وأمدح فالي عقب




فلتحيا الجمعية
:)

ودمتم

Fahad Al Askr يقول...

جمعيتكم وناسة أحسها عل وصفج مكان جيد للالتقاء بأصدقاء جدد

حبيت ثلاث شدات بجنب بعض ومسكتهن كمسكه عروس متجهه للعربانتي

قهقهت حتى كدت أن آخذ قرائي ونركب الباص اثنثن اثنين ونروح رحلة حق مدونتج، بس هونت تالي قلت يمكن مو مزهبة حالج تستقبلين قرائي والحمقى والمجانين اللي معاهم

Super Sara يقول...

ايييه
موضوعج ياي بوقت صح

من ساعة تجهزت و طلعت اييب اغراض الحلو
لقيت ماكو سيارة :( ابوي ماخذها

شنو احتريييت ..
لوول

شكراً استكانة
الله يفرج عنج مثل ما انتي دايماً مفرجة عننا بكلامج الحلو :)

:

she is me يقول...

يا حليلها العيوز .. تينن

^^

بالنسبة لي أكره الجمعية بنهار رمضان
فوق انها مضيعة للوقت .. الناس كل واحد نفسه بخشمه ..ما يتحاجون

أذكر موقف قدييييم
خذتني أمي أنا واختي من المدرسة وقلنا:خنروح الجمعية نشتري روب حق السحور

ولا زحمة الله أكبر وعرباين مترسه
والناس .. تقوليله لو سمحت شوي .. مو بعيد يتهاوش معاج
كان أول يوم رمضان

كرهت نفسي يومها .. وطلعنا من الجمعية ..
^^

استكانة .. أستانس عليج^^

Nikon 8 يقول...

إستكانة بما إنك ربة بيت جديدة
لاحظي قيمة مشترواتك من الجمعية بآخر الشهر
راح تنذهلين من المجموع
!!!
دائما أقول الجمعية كانها بيت أبوي
أروح لها كثر ما اروح اروح أبوي
ولازم أثبت وجودي فيها كل يوم تقريبا
:)

قلب طفله يقول...

الجمعيه قبل الفطور ما تنبغى
من الزحمهو كل من نفسه بخشمه
اللي تعاني من مشوار الجمعيه اميمتي ترد و تقول شفيهم الناس لووول

بس يا حلو رمضان بكل ما فيه :)

Basees يقول...

من النصائح الطبية للصائم
الدخول إلى الجمعية قبل الفطور مضر للبوك

Princess Sara يقول...

يآ زين رمضآن و يآ زين جمعيتنآ :)
مآ طريتي الفيمتو !؟
دايماً ما في و مخلص :p

بوست اينن استكآنة
ضحكتني العيوز
جمعيتنا ما أشوف فيهآ عيآيز
يمكن وقتي غلط أنا بجرب الصبح :p

يآ حلوهم و يآ حلو بركتهم بكل مكآن
أحب رمضآن
;)
و أحب بلوقج
تحيآتي
و مبارك عليج باجي الشهر :)

ام الحفيز يقول...

واللله يستكانه
هذه هي النعمه اللي يبيلها الحمد والشكر اللهم لا تغير علينا الا بالاحسن اللهم امين ،،،،ديره شعبها خف طينه ومتسامح وقلوبهم بيضه مثل بياض القطنه الا ما ندر منهم اللهم يصلحهم اشنبي بعد الا الستر والامن والامان اللهم يتمم علينا ديرتنا بحكامها وشعبها اللهم امين

تصدقين عاد شوقتين لروحة الجمعية من باجر ان الله احيااااااانه انا بالجمعية اوسع صدري مثل ما وسعتي صدري بسوالفج ابرك من هالمسلسلات اللي تيب الغثاااااااا

I7na 3shagnaha يقول...

fe rmothan : jam3yatna mafeeha vimto :(

الخيلاء يقول...

ولهانه انا .. و بعدين يعني متى دوري :*

اتصدقين انا ما احب مشوار الجمعيه ثقيل على قلبي ياربي .. و الي عندي ايتشهون اشياء مقاديرها مو موجوده و طبعا انسي واحد منهم ايب لج الناقص .. و ان طرشتي السايق ما يلقونه ويه و لا يعطونه اغراض غلط .. مايبرد قلبج الا انتي اتروحين ..
و ان رحتي ضاع وقتج اتقولين مجاعه الله يهديهم ..
انا هالاسبوع شفت شنو بسوي و خذيت كل المقادير الي احتاجها و قلت لهم لو تشتهون من اليوم لي باجر ماني مسويه الا الي موجوده اغراضه .. وه اللهم اني صايمه لوول

انا بروح العمره استكانه اتوصين دعوه اسبشيل لا يردج الا ايميلج :**

QiYaDiYa يقول...

انا بعد مبتلشة بهواية الجمعية ! ;s

حتى اول ما توظفت مسكت الجمعية
و الحين برمضان متفقة مع امي ان اغراض الجمعية علي ;p

بالنسبة حق بيتنا وضعنا طبيعي
و ما عندنا مخامط الجمعية لا اول الشهر ولا برمضان

الكل يشتكي من زحمة الجمعية
الا جمعيتنا ترى ما فيها احد
و القى موقف عند الباب
و الكاشير فاضي

;p


و مبارك عليج الشهر متأخر ;***

7osen يقول...

بوست حلو

فعلا الجمعيات مشكلة
أنا ما احب اروح الجمعية بس إذا انجبرت وفي رمضان فعلا تنبط جبدي من المخامط
شي غريب
...

رمضان غير .. أجوائه فيها شي مختلف من الرحة والسكينة

تحياتي لج
:)

فيلسوف يقول...

جزاك الله خير

والله ضحكتيني

هالموقف صارلي قبل كم يوم

الاهل يبونكيك يسوون حلو

اول ما وصلت ركن الكيك

ولا ما شاء الله الثلاجات فاضيه إلا من كم علبة

شكله اهل الكويت كلهم سووا حلو ذاك اليوم

تقبلي مروري
:)

نهــــــــــار يقول...

السلام عليكم ...
ويبقى السؤال الأهم بالنسبه لي
اللبن
ليش يختفي ؟؟؟؟
فقط في رمضان
.....
موقفي اليوم كان
رجل كبير بالسن ومعه شاب عشريني وطفل والشاب العشريني يسأل الكبير بالسن أي نوع لبن تحب
وهو ينظر إلى الأرفف الفارغه
ومن بعيد اضحك بخاطري بعد
أن ظفرت بنوع من اللبن الذي لا اعرفه
كوني من عشاق اللبن طوال العام تصيرلي أزمه برمضان
ما احصل اللبن إلي أحبه
...
والله المستعان

AuThoress يقول...

الجمعية في رمضان .. كرنفال جوع
باختصار تام

انا عندي سؤال واحد... إذا الفطور ست ونص...يعني يادون تقومون من السفرة 7 ... ويبدأ الهضم... حتى 9 ونص .. على اعتبار الهضم ساعتين طبيا .. يتخللة شاي وقهوة وتناتيف حلو ... زين؟ متى تاكلون غبقة وسحور؟

احس بالاستحالة التامة لفعل شيء كهذا :/ إذن ..... النتيجة ... ليش تشترون أكل بهالكميات؟

ترى الفطور.. بالضبط مثل الغداء في الايام العادية


استكااانة
ما احلاك وصفك جميل

Hope يقول...

مسا الخير


ما شاء الله طلع الكل يحب الجمعيه يعني مو بس انا

انا يا اشتكانة لازم كل اسبوع اروح الجمعيه
اشري و اشري و اشري بهالاغراض و بالاخير نصهم ما استخدمهم
فصايره لما اروح الجمعيه احاول اضبط نفسي مو كل شي اشتهيته خمطته ولو ان في اشياء ماقدر اقاومها p=

و اليوم بروح الجمعيه لول
بس صج ملاحظه ان الواحد يدش الجمعيه يبي شغله ولا ثنتين يطلع و اهوا مو مخلي شي مو ماخذه

و على طاري العيايز ذكرتيني بوحده كذا مره اشوفها بالجمعيه اهيا و سايقها
تهبل دمها خفيف.. تمشي و تسولف مع الناس حتى اللي يوزن الخضره تسولف معاه
شفتها بالصيدليه و وحده جدامها تحاسب ،سألها الكاشير عن رقم الصندوق قالت مافي، ولا تنط العيوز طق طق رقمي و تقوله الرقم لول
و المره اخترعت جنها تقول هذا من وين طلعت
ولا تروح صوبها العيوز تقولها هلا والله ببنيتي شلونج و تقولها ما عندكم صندوق ؟ عادي نطق صندوقنا
و تسولف وياها جنه تعرفها من 20 سنه


والله الجمعيه تونس و ما تنمل لو تروحين لها كل يوم
لازم في شغله تبينها ما تطلعين ايدج خاليه

p.s, ur post made my day =]
دمتِ لنا بألف خير يا الغاليه

esTeKaNa يقول...

ميمة السبيت
~~~~~~~~~~~~~
الجمعية بروحها ادمان الله فكج منه
وبالنسبه حق الجيس كيك :
عندي وعندج خير
:P

esTeKaNa يقول...

جبريت
~~~~~~~~
لا تعود على الجمعيه وانا اخيتك
وراك دنيا
:p
الله يرزقك بر الوالده ورضاها يارب
:)

esTeKaNa يقول...

الجودي
~~~~~~~~~
عسى الابتسامة ما تفارقج قولي امين
:))

esTeKaNa يقول...

ARTFUL
~~~~~~~~~~~
ياهلا ويا مرحبا بأبا شيخة
:)
الطباخ خله على صوب
بكتب بوست كامل عنه
:P
عسى ربي يحفظ لك البعله السنعه المسنعه،ترا المرة اللي تطبخ وتهتم فيك نعمة من رب العالمين
اشكر ربي على نعمته ودير بالك عليها وحطها بعيونك
الله يحفظكم ويتمم عليكم يارب

esTeKaNa يقول...

chandal/danchal!!
~~~~~~~~~~~~~~~~~~~~~~~
ياهلا وأمية هلا
:**
ترا امس طريتي ببالي
والله لو اقدر جان وصلت لج هالغريضات لي عندج
رايحة الظهر كارفور الافنيوز تصدقين لقيت ساور كريم وتالي جابلت المخبز
لا بقى كرواسان
لا بقى بريوش
كل ما شميت ريحة شي توه خالص خمطته ومشيت
:)))

esTeKaNa يقول...

عثماني
~~~~~~~~~~~~
أربط العربانه بطرف عباتي؟
خابره هذي حركة الحريم قبل حق عيالهم
مو حق عربانه اذا انسحبت تكفرست انا وياها
:P
اييييه انا نويت هالشبنت دفعة بلا
بس اللي حارني انها ما ثنتها
ما قالت لا
!!
وشعلاقه الشبنت بالوطنيه؟
يا حسرتي مو زين الصيام عليك يا عثماني قمت توزع صكوك الوطنيه بشبنت
:P
الله يحفظك يا عثماني ويتقبل منا ومنك صالح الاعمال ويعينك على صيامه وقيامه انت والاسره العزيزه

esTeKaNa يقول...

طموحة مملوحة
~~~~~~~~~~~~~~~~
هلا وغلا
:*
اي والله للاسف في ناس فاهمينه جذي

esTeKaNa يقول...

kal ho na ho
~~~~~~~~~~~~~~~
فلتحيا...فلتحيا
:))
يا زين ...برج الغزلان والله
ساكنيه فاهمين بعض
:P

esTeKaNa يقول...

Fahad Al Askr
~~~~~~~~~~~~~~~~~
العزيز فهد العسكر
.
.
في كل زوايا الحياة حين تتأمل ستجد الف حكاية وحكايه تكتبها،والف صديق ينتظر منك مبادره ليفتح لك قلبه ويثرثر ولو كان بالجمعيه
:))
يا بو عسكر
استكانة ومدونتها ترحب دوما وابدا في فهد وكل من معه
افا عليك بس
:)

esTeKaNa يقول...

Super Sara
~~~~~~~~~~~~~~~
يا بعد قلبي انتي على هالدعاء الحلو
امين واجمعين يارب
:**
مشكله اذا مخططه على شي
وصار شي خارج التوقعات
مثل ..ان السياره ما تكون موجوده
:))
بس خيرة عشان ما تروحين الجمعيه وتشترين الاكو والماكو
:p

esTeKaNa يقول...

she is me
~~~~~~~~~~~~~~~
ياهلا ويا مرحبا
:**
سبحان الله مرات يصير موقف واحد يكرهج بالمكان كله
!!
الله يحفظج من الجمعيه ترا بروحها مصرف
:))
وحبيبتي انتي
يا فرحتي يوم انج تستانسين علي ويا بختي فيج
:*

esTeKaNa يقول...

Nikon 8
~~~~~~~~~~~~
صديقتي الجميلة
انا منذهله وخالصه
:))
علمتني واحده من الصديقات فكرة الاظرف،تحطين ظرف خاص للجمعيه فيه مبلغ معين وتعلمين نفسج ما تتجاوزينه
ما قدرت اضبطها ولا اطبقها
:p

esTeKaNa يقول...

قلب طفلة
~~~~~~~~~~
يا بعد قلبي الوالده
الله يحفظها ولا يخليكم منها ويرزقج برها ورضاها يارب
:*

esTeKaNa يقول...

Basees
~~~~~~~~~~~
اتفق معك تماما تماما
:))))

esTeKaNa يقول...

Princess Sara
~~~~~~~~~~~~~~~~
ياهلا ويا مرحبا
:)
فعلا العيايز لهم بركة بكل شي
سبحان الله من اشوف عيوز اتذكر يدتي واحس بنوع غريب من الراحة
الله يحفظهم ويطول بعمرهم يارب
وحيااج الله يا ساره نورتي بلوق استكانة ونورتي قلبها
:*

esTeKaNa يقول...

ام الحفيز
~~~~~~~~~~~~~
ياهلا ويا مرحبا بأم الحفيز
تو ما تبارك المكان
:**
يا زينج ويا زين نظرتج لكل الأمور
فعلا..
احنا بنعمه الله لا يغير علينا الا للأحسن
:)

esTeKaNa يقول...

I7na 3shagnaha
~~~~~~~~~~~~~~~~~~~
ما نفطن حق الفيمتو الا برمضان
!!
في بكارفور انا مسويت له دعايه اليوم
؛
:P
اييب لج انتي وجندل ويه واحد
:)

esTeKaNa يقول...

الخيلاء
~~~~~~~~~~~
حبيبتي يا الخيلاء
:**
خوش خطة سويتيها،وفعلا من ابرك الاوقات وافضلها قبل الفطور،الواحد وده يقرا قرآان وده يدعي مو يضيع وقته بهالجمعيات
!!
زين تسوين،الله لا يحرمهم منج يارب
وتروحين وتردين بالسلامة
ادعي لي يا الخيلاء وايد،انا دايم محتاجه دعاء
الله يسمح دربج ويتقبل منج وبس تردين ايميل..انا وايد ولهانه عليج

:***

esTeKaNa يقول...

QiYaDiYa
~~~~~~~~~~~~~~~~
حبيبتي انتي
تو ما نور المكان
شخبارج؟
وان شاء الله كل امورج طيبة؟
.
.
يا زين الموظفه والله
:**
وين جمعيتكم دليني
:)

esTeKaNa يقول...

7osen
~~~~~~~~~~
ما تستشعر احيانا ان الشياطين فعلا مربطة؟
:))
اشعر بهالشي لما اشوف ابتسامة الوجوه
الفرحه بين الناس
والسكينه المنتشره بكل مكان
.
.
الله يبارك لنا برمضان ويتقبل منا يا حسين،ويكتب لك الخير كله قول امين
:)

esTeKaNa يقول...

نهــــــــــار
~~~~~~~~~~~~~~~~~
يا مرحبا بالنهار الجميل
:)
نقدر نقول عندكم أزمه لبن
:p
سبحان الله في كل مكان في ازمه اكل معين
:))

esTeKaNa يقول...

AuThoress
~~~~~~~~~~~~~~~
صديقتي العروس الجميلة
.
.
الفطور:
غداء متأخر
والسحور:
افطار مبكرجدا كافي عليه حليبه او قطعه بسكوت
:))
ولكن الناس تبدأ الحفله عندها من الفطور حتى الامساك،واخر رمضان السؤال المعتاد والتحلطم:
ما ندري ليش نمتن

:P
حيالله صديقتي الحلوة دائما

esTeKaNa يقول...

Hope
~~~~~~~~~
محبين الجمعيه اهم اللي مسوين الزحمه
:P
واي يا زين العيوز
انا تدرين شلي يونسني بالعيايز؟
يمونون على المجتمع كله
:))
وتصدقين ،انا الحين قاعده اقاوم واجاهد نفسي اذا ابي شي اوصيهم ايبون لي ما اروح انا،انا اذا رحت خميت الاكو والماكو لا وصايره اتنقص من الجمعيه ليش؟
احد يتنقص كل يوم
كل ما شفت شي امي تحبه طخيته وديته،خالتي...رفيجتي...واخذي عاد
حلوة النقصه
بس عاد كل يوم
:P
انا لازم اجاهد نفسي المحبه للجمعيه
:))
حياج الله
نورتي نورتي

esTeKaNa يقول...

فيلسوف
~~~~~~~~~
ياهلا ويا مرحبا بالفيلسوف
اذا اهلك عندهم كتاب المطاحن
فاعرف ان كل مقادير الطبخات مو موجوده بالجمعيه
:)))
الله يحفظ لك الاهل ولا يحرمهم منك يارب

Mishari يقول...

مبارك عليج وعلي الموجودين واللى مو موجودين الشهر
:)
هالمواقف ما اشوفها لدشيت الجمعية لسبب واحد
اكون مقفل واطيييير على بلح الشام ويكون مخي مشغول بقطايف اليوز اللى قاعدين يسونها بالبيت

:))

كل عام وانتو بخير جميعا

خشرة يقول...

انا برمضان اعشق الفرع لان ما اشوف احد و ما ياخذ مني المشوار 7 دقايق
و ما اخمط وبس وماكو طابور
صج الجمعية برمضان بروحها مسلسل

~ فجر ~ يقول...

؛) خوووش جوله بالجمعيه
احلى هوايه واحلى مكان عندي الجمعيه
مكان حلو للشراء ومشاهدته المواقف الظريفه

كل رمضان وانتي بخير استكانه :*

Kuw_Son يقول...

Haha ha haaa ... 5aberhom entaaaaaa :p !!