الخميس، أغسطس 13، 2009

صباح مسفر

في مساء ضاحك جمعنا بليلة أحد قلت لها:
الأيام صايرة مملة،ويا غث الأحد
يا ليت أروح الصبح مكتبي وألقى وردتين،وبيت شعر،واسم مجهول يشغل فكري ويعطي للأيام لون
!!
اتسعت عينها واسئلتني:
ليش مجهول؟
ولو يصير شنو بتسوين؟
بتحبينه؟
بتشوفين منو؟
وليش تزوجت ولي يومج ماحد دز لي وردتين؟
وليش اصلا وردتين؟ ليش ما يكونون اربع خمس؟
وليش احنا بالذات ما تواجهنا قصص هالحب؟

ضحكت وقلت لها:
شوي شوي علي،مو كل شي له جواب
ولا كل احساس له عمق آخر
بعض الأماني جنون،أمنية ونقطة وينتهي الموضوع
وبعض الاحساس عابر..خلق ليكون عابر

تنهدت أنا وهي تطالعني:
استكانو شفيج؟
يعني شنو؟ ليش عابر ونقطة ليش انتي جذي؟ ليش تبين ورد وليش؟
يا الله يالله عليج،حلم حلم،حتى بأحلامي مناشبيني
عفستي ابو الاحساس واهله
:P
.
.
.
.


صباح الخميس :
وردة جوري وتيلوب ابيض وكرت صغير:
إهداء لمن
طيبها قسوة جفاها ضحكها هيبة بكاها روحها حدة ذكائها تملائك بالأسئلة

!!
نفس عميق،وافكار تتراكض،وأخرى تتكوكس،واحساس يستهبل ويسوي وقوف على الرأس:
هذا اسمي،وهذا بيت شعر،وهذا مكتبي منو هالعاشق المجهول؟
اقرا الكرت:
مجهول
في احد يعرف بنفسه مجهول؟
!!
اقلب الكرت:
.
.
.
مجهول وفي رواية أخرى :
ابنة خالتج شيخة
:P
.
.
.
ودبغت الأحلام كلها وتكرفست الأماني على جنون واستهبال ابنة خالتي الصباحي
ضحكت بعدها وضحك معي هذا الصباح ،وأرسلت لها:
ذوبتي الصبح رقه ،شهالحركات؟
قليل مما عندك،بس لو ربي يفكك من بوستات حزب التحرير،،وانتقالاتك المجنونة بين بوست وآخر
يا اختي طقي اشاره حقنا
Looooooool
أنا أفكر بصوت عالي،البوست من عقلي لي المدونة هذا يزاي اثقفج شوي؟
ماحب هالسوالف، الحين بوست يديد،ولهت على احساسك وانتي تكتبين
فا
قدة احساسي،ماعدت اقدر اكتب باحساس ولا عاد يحسون فيني هالناس،وعندي مليون شغله الحين مو وقته
!!
عشان خاطري استكانة كتبي لو قصيدة تحبينها
نظرا لوجود طفل مختبأ فيك،وسفر زوجك وبشلتي فيج،راح اكتب لج هالبوست
.
.
.
.
كان الصباح مع مسفر،مسفر،ولقلب مسفر سر صغير له احساس لذيذ جدا:
أنا عندي.. سر صغير
لو سمحتيلي..بقوله
أنا من فتره أحس
شي غامض يملى صدري
ينثر النعناع فيه
والقناديل ب حقوله
شي يخليني أسولف
فيك
..
ويورق النهار
من بعَد موسم ذبوله
شي يخلّيني أصابع .. من حبر
ويملى أوراقي شعِر
والفرح يصير حبيب
والقمر يصير قريب ..حيل
وايديني تطوله

شي غامض
يحتويني
يشعل شموع بحنيني

يرسم اشجار ونوارس
فوق سواحل..في جبيني
تنطرك مع كل موجه
ولك أبد
تشتاق وتوله
كل يوم أفتح بريدي
وأتخيل لون عيدي
أحلم بغيمه تجيني
ولاّ كلمه ..خضرا
عذرا
من بريدك
وأَنكِسِِر لو هو تأخر
يوم بريدك
في وصوله

ولما أشوف رساله منك
يفرح القلب ويهلّي
بالهوى.. وطلة رسوله
كل رساله
من بريدك
تنثر السكّر في كفي
وتحيي في عمري الطفوله

ترسم أبواب ودرايش
في فضا الليل ..وتخلّي
الصباح دايم ينوّخ
في مدى روحي ذلوله
أنا عندي سرّ صغير
من عرفتك
مدري شنهو
وماني عارف
كيف أقوله
.
يالله عليك يا مسفر:
كيف يوصف احساسه الغامض نعناع؟
وكيف يحس ان الفرحة حبيبة،والقمر بيدينه يطوله؟
وكيف يكون الفرح كلها رساله من بريده؟
وان تأخرت الرساله ينكسر كله؟
سر مسفر..اجمل سر
!!
واحساسه بالوله شي ثاني،بقصيدة كامله يسئلها ويشاغب قلبها:
وَلَهْتي لوْ شْوَيّ علي؟
إشْتقتي لي؟
قوليلي:
وشْلون المسا .. مِنْ غيري
وشْلون الصّباح
وشْلون يُمُرّْ.. يومِك عليك
باهِت،وبَرْدان،وحَزين؟
ولاَّ يُمُرّْ مِن بَعْدي رَوعه ومِمْتلي؟
حَسَبْتي إن الفَرقا مابيني وبينك..للأبد
ولاَّ ابْتِسَمْتي في سِرّكْ وقِلْتي هَالزَّعَل
مهما يطُوْل
سحابة صيف أَكيد..أكيد بْتِنْجِلي؟
ولو تِسْمعيْن أَغاني حِنّا نْحِبّها
مايشَاغِبِك قلبك يقول:
عَشَاني إتَّصْلي عَليه
وَحَشْني صُوته
ضحْكِتِه..
حتى جُمِرْ كلامه واحِشْني ..وأَبيْه
عَشَاني إَتّصْلي عَليه
عَشَاني أَرجوك اسْأَلي

حبيْبتي
ماشَاغَبك قلبك عليّْ؟
بالله قوليلي الصّحيح:
إشتقتي لي؟
أَمَانه ودّي أَسْألِك
طُوْل الفُراق ..فَكَّرْتي فيّ؟
قَعَدْتي مَرَّه بْغِرْفِتِك ..تِتْمَنْظَريْن
وكِنْتي بْكامل زيْنِتِكْ
وقلتي لْ غَنَجْ أنُوْثِتِك:
ودّي يشوف تسْريحِتي
نَفْسي يشِمّْ هذا العِطِر
ويقوللّي رايه ف الرُّوج الجديد
وأَيّْ اللّي أَحْلى.. هذا
ولاَّ روجي الأَولي؟

ودّي يشَارِكْني دَلال أنوثتي
ويضُمّني
ويمْسَح على راسي بْحَنان
هوْ يَدري إن لمْسَةْ ايْديه

فيها حياتي ومَقْتلي
حَبيْبتي فَكَّرْتي فيّ
وانتي على تَسْريحتك
اشتقتي لي؟
ما اكذب عليك
أنا كثير إشتقتلك
عُمْري أَحِسّه مِن غيرك خَليْ
لا أرضي أرض
ولا نجوم
تزيّن الليل بْسماي وتعْتِلي
ضايع وينْقِصْني انتِماء
لاني لأَحَدْ .. ولاني لي
أنا كثير اشتقتلك

حبيْبتي

ما اشتقتي لي؟

.

.

.

فقط مسفر الدوسري أقرا كلماته باحساسي فأتمنى في يوم أكون ملهمه شاعر

او انا بكبري شاعر انظم احساسي مثل عقد لولو يزين قلب كل من قراه ويحس فيه

ابي اصير شاعره

شسوي؟

حققت من أحلامي اشيا كثيرة وباقي حلم اكون شاعره شلون الحين؟

:)

.

.

ختاما:

لشيخة القلب:

شكرا لأنك اضحكت هذا الصباح،ورداتك تزين المكتب برائحة محبة من نوع آخر

اقري القصيدة مع التحفظ على كلمة روج لاني ماحبها

:P

تضحكني كلمه روج

:P

للطارق ومنشق:

للحوار معكم ثقافه من نوع آخر شكرا لكم على مشاركتكم في البوست السابق

:)

للجميع:

اليوم خميس،وحيالله الخميس واهله

HApPY WEEK ENd