الخميس، يناير 01، 2009

أنا ونجيم

رائحة الهيل المنغمس في حليبتها
ودفئ الحب الذي يحيط جلستها
قواري،تصطف بجمال على دوتها
وهي هناك...نفنوفها الحمر المخمل
وشال...وجواريب...وكل ما حملته خزانتها
أشفق على البرد من استعدادتها
!!
قرص عقيلي ...ورهشه...ودرابيل الشمالي المنعوته
تقلب بتلك الأكياس وتسئلني:
ممممم ،ما شريتي لي لسان الثور؟
ابتسمت
جدتي واعرفها
تبحث دائما عن الشئ غير الموجود ويشتهيه قلبها
!!
منذ زمن اكتشفت ان النساء الكبيرات بالسن يسعدن بمجرد الحديث عن انفسهن وماضيهن
فاعتمدت هذه الخطة مع جدتي....كم سؤال،وتنبر هن وهناك واتركها تتكلم
ذاك اليوم تعبت وانا احاول فتح مواضيع وهي حزينه
بوزها من العساره واصل لي الخفجي
اشفيج يمه؟
نجيم ...يا عل ماكو نجيم
انحاش
!!
بلعت ضحكتي،ومثلت اني منبهره متعجبه:
انحااااش؟
تتنهند بألم:
اشهرين ندربه،ويوم خذا الليسن،خذا الجواز من خالج قال بدخل فلوس البنك
وهذا يوم وذاك يوم انحاش
!!
والمشكله اللي خذيت منها السايق هنديه اسمها راني
ادق يا راني عطيني رقم نجيم تسكره
وخالج يدق يقولها عطيني وين مكتبج مو راضيه
.
........
انا اعلم...الكل استحقر حزنها الكبير على السايق ولم يشتط معها
والسايق يروح ونلقى بداله عشر
!!
كسرت خاطري
لا تستهين بأحزان غيرك ايا كانت احزانه
شعرت بأني اريد ان افعل اي شئ بسيط لاسعادها
اتصلنا على قريب لجدتي يعمل بالمطار
ليأتينا الخبر بعد ساعه:
السايق مسافر من يومين
.......
تربعت مقابلها.....اذيب الدرابيل في حليبتها وافكر
فجأة طرت لي فكره:
يمة وين رقم راني؟
اعطتني نوتتها
:فديت نوته جدتي
الاسامي كبييييييييييرة
وكل اسم مقابله علاقه القرابه ،مثلا:
بدريه جنة غنيمة اختي ام يوسف
!!
ليش المسمي الوظيفي كله
هذا غير ان الاسم عوي
وبعض البصمات ...لانها تقلب الصفحات بصبعها
:pP~
اتصلت على راني من تليفوني لانها لا ترد على تليفون جدتي:
الو ....لو سمحتي عندج خدامه مسترجعه؟
تشتط راني :
اي ماما كل شي فيه
ضحكت:
وين مكتبكم؟
وتشتط أكثر:
حولي ،شارع بن خلدون....بلا بلا بلا
كتبت عنوان المكتب واعطيت الهاتف لجدتي المشتطة:
شوفي رانيووووو اذا ما عطيتني رقم نجيم هذي ترا بنت مال انا بوليس
والله نيي انتي مكتب نمجعج من شعرج سمعتي
looooooooool
اهم شي اني انا بوليس
وبنروح نمجعها من راسها
واللي يضحك...راني خافت وعطتنا رقم نجيم
.
.
.
.
.
اخزن الرقم بهاتفي وجدتي اشتطت وعدلت قعدتها:
شنسوي يمه؟
الرقم عندنا
!!
تفكر:
شوفي انا اظنتي اهو زعل،انا قايله له ييب كركم من الجمعيه ما ياب
في هندي ما يعرف البهارات
زفيته زف
يا يمة البهارات بالهند اسمها غير عندنا...الكركم مو اسمه كركم
لم تقتنع
فنجيم يسوي روحه مخدي ولا اهو بقليب كل شي يفهم
!!
و ومرة قالت له:
لا أدة الضحى صوبن هدومك بروحك وغسل السياير
ما فهم
!!
يمه ...اشلون يفهم؟
.
.
.
اتصلت على نجيم،بمجرد ان رد على الهاتف وسمع صوت جدتي
اغلق الخط
!!
وي يا علك يا نجيم ما تربح
حر قلبي عسى ربي يحر قلبه
قامته ضحكتي....ندق مرة ثانيه
ترد زوجته واكلمها:
وين نجيم؟
ترد بنزره:
نجيم كويت ،نجيم ماكو يجي
وطرباخ بويهنا
يا يمة...سكرته شنسوي الحين؟
جدتي تستعسر،تدعي على نجيم وحرمه المصون
اتصلت مرة ثانيه لترد زوجته:
الو وين نجيم؟
ترد بنزره:
نجيم مو هني
بس قرقر كل شوي سوي تليفون
!!
أنا تنزر فيني وكل شوي طرباخ بويهي؟
فجأة....تخرج مني استكانة العياره الشيطانة
وبمنتهى البرود
ارد عليها:
انتي زوجه نجيم؟
انا سوي تليفون يبي كلام عشان نجيم سوي زواج واحد فلبيني مني
الحين هذا فلبيني يبي نجيم ،عشان اهيا وايد حبي هذا زوج مال انتي
:Pp~
انياهاهاهاها
:pP~
وفجأة....وفجأة
زوجة نجيم تصارخ من مفرق راسها:
نجيييييييييييييييييييييييييييييم سوي زواااااااااااااااااااااااااااااااااااااااااااج
!!!
لاااااااااااااااااااااااااااااااااااا
جدابه انتي جذابه
نجيم مني ماكو سوي زواااااااااااااااااااااااااااااااااااااااااااااج
وطيت صوتي:
مادري
!!
هذي فلبيني يمكن بعد في بيبي ما شاء الله
:pP~
زوجه نجيم تصارخ من قمة راسها
وجدتي تشرق كل ملامح وجهها وتنقلني:
قولي لها شعرها اسوود ناااااعم مسبسب وبيضه ويها نضر وبنت حموله مو مثلج يا المصعويه
!!
رديت على زوجه نجيم:
هذي فلبينيه وااااااااايد حلوة
وااااااايد حبي انتي زوج
طوط...طوووووط.....واختفت زوجة نجيم
~~~~~~~~~~~~~~
لفيت وجهي...جدتي تكعكع،بكل ما تعنيه الكعكعه من معنى
loooooooooooooooooool
يا زين فرحتها ...كل شوي تسئلني:
هقوتج دبغته عن خاطري؟
لا يمه نتفته نتفته
!!
بعد ساعه تسئلني.:
جم الساعه عند نجيم؟
اقولها يعني ظلمت الدنيا
تكركر بروحها:
تهقين نام بالبيت ولا بالسكه
أظنتي رفسته
:D
اييي المرة تحر
يقولج قبل واحد تزوج على مرته ،وقال لمرته الاولى اخذي فخذ هاللحم وديه حق شريجتج
وقبل مو مثلكم
يتزوج عليها ريلها ..تموت بحرتها وتسكت شتسوي وين تروح؟
المهم
المرة الأولى من الحرة اخذي الفخذ وطول الطريج تقرم فيه وتقول:
يحبني
ما يحبني
يحبني
ما يحبني
!!
يوم انها وصلت لشريجتها ماكو بالفخذ الا عظمه
اييي حرة القلب يا بنيتي خلتها تقرم اللحم
!!!
بققت عيوني....بغيت اغص بالحليب:
هذي مرة ولا شرياصه؟
انا خابره ورده تحبني ما تحبني مو فخذ لحم
:Pp~
.
.
.
.
خرجت منها بوقت مبكر لاني اريد ان استعد للمخيم اليوم
قبل ذهابي قبلت راسها ودعت لي:
عسى ربي يبرد قلبج مثل ما بردتي قلبي بنجيمو
فطينه ،اسم الله عليج على جدتي الله يرحمها
عساج ما تذهنين
!!
ياربي....انا شكو اطلع على جدة جدتي ام امي
انا فطينة من روحي اسم الله علي
:Pp
الملم اغراضي وقبل ان اذهب تناديني:
عسى ربي يفرحني فيج عروس
ولا يطول شدة
!!
شدة؟
يا يمة.....ليش تحسسيني اني بغزو
:pP~
يا زينها...قد أكون ارتكبت شئ خاطئ
ولكن اشعر بمرح غريب
يارب سامحني
:)
.
.
.
من شوي رجعت من المخيم
الهوا والغبار شي مو طبيعي
!!
عمي نادى صاحب الخيل ليركب الاطفال
وجدت نفسي مرتزه واركب الخيل قبلهم
من زمان ما ركبت خيل
وايد استانست
المضحك بالموضوع الهندي يقولي:
واحد دينار
سئلته:
عندك كي نت
.
.
ياربي متى اشيل بمخباتي خرده
ليش انا عايشه على الكي نت؟
.
.
احساس اللحظي:
ظهري يعورني حيل
!!
ومزاجي اليوم:
فدوة لج ...عمري وكل اللي تبينه
عين خلج...ما تشوف الا انتي زينه
ولا يا زينه
الزعل جايد علينا
!!
شتمنى؟
غير وصلك يا حياتي
وأتعنى..وأتعنى وطول وقتي لك احاتي
هاج عمري واخذي ايامه بيديج
انا عمري ...عمره ما يغلا عليج
وكل حياتي
كل حياتي
فدوة لعيونج ...
يا زينة