السبت، نوفمبر 07، 2009

علام الديرة؟



كان البحر أزرق
كان الشجر أخضر
وطبع الهوى حنيّن
من رقته ينباس
والحب كنا دوم
نلقاه وسط القلب
نلقاه في الشارع
نلقاه في الكراس
...حتى شوارعنا
كانت تعرف تحب
كانت حنان وقلب
كانت دفا وإحساس
يا حليوة قولي لي:
علام الديرة متغيرة؟
علام الناس غير الناس؟
يا حليوة شلي صار؟


كان البحر مالح
!!وإحنا نذوقه عذب
كان الشتا قاسي
!!وإحنا نحسه قلب
كانت سموم الصيف
..كلما هبت علينا
نستطرب السامر
ونموله ..نسناس
يا حليوة قولي لي :
علام الديرة متغيرة؟
علام الناس غير الناس؟

يا كويت يا حبيبة
قولي شللي صار؟
جرحك ماهو خافي
أنا أحسه نزفه
غنيته ياماسنين
وعيوني تعرفه
بس أنتي
كنتي دوم..أكبر من أحزانك
كان الربيع يذبل
وتخضر أغصانك
وكان الزمن يحلى
كله عشانك
ونطرزك في القلب
ونرددك أنفاس
ولو تجرحك نسمة
قلوبنا صاحت
وتقولك:لا باس
ولا تحزن الديرة
ولا تنكسر هالناس


مسفرالدوسري
.
.
.
.
وعلام الديرة متغيرة؟
وعلام الناس غير الناس؟
.
.
أزمة فكر؟
أم أزمة أخلاق؟
!!
.
.
.
رغما عن:
الاحتقان السياسي...وإزدواجية الأخلاق في وطني
وتغير ملامح الطيب حولي...وجمود الاحساس  وفقدنا له
رغما عن كل هذا
صباحك حب يا وطن
صباحك جميل رغم الألم
صباحك خير وورد ونوير
رغماعن  كل ما يدعو لفقد الأمل
نحن لن نفقد الأمل
:)








هناك 17 تعليقًا:

Sweet Revenge يقول...

مالنا الا الامل استكانة

وصباح تفائل ومحبة

:)

L!fe يقول...

كلام جميل ممزوج بطعم الالم ..

ومع هذا كله .. مالنا غير ترابج
يا لكويت وصبحج الله بالخير ياكويت
يا احلى صباح .. وصحبج الله بالخير اخيتي :)

جبريت يقول...

كنت ابي اجاوب بس انتي جاوبتي الي بقلبي من نفسج

صباح الخير رغم الهموم الي نعيشها

مو مترقعين من ولا صوب

الحل؟؟؟

الحــــر يقول...

صباح الكلام العذب أخييتي

انا أقول اديره مثل ما أهي بس الناس صارت أنفوسها غير


ولكن هم نقول صباح الوطن

:)

بنت الشاميه يقول...

والله ياشيخة البنات
كله من السياسه
نتريق سياسه
نتغدى سياسيه
نتعشى سياسيه
ننام سياسه
بالله اكو ديره مغتثه بالسياسه مثلنا
كل هذا لانهم بيدمرون ديمقراطيتنا
ويخلونا نقول عوووووع ما نبيها
بس حريمتهم محنا قايلنهاااا
بس نصد شويه وشويتين
وهذى ارضنا مثل ما هي ارضهم
ونحبها اكثر منهم لان ما لنا غيرها
والله كريم

aL-NooR . يقول...

صبااااااااح السما الزرقا
والتفاااااؤل

صباحج خير يا بلاد(ن) كل ما فيها خير
:**



------------
ييت بزورج ولا الباب مسكر بويهي
:(

ميمة السبيت يقول...

* مشالله عليه كلماته عجييبة

ياحلاة الكويت الصبح مع هالجو العجييب مشالله الله يديمها علينا هالنسمات الحلوه و تخفف من حدة نفسياتنا و اعصابنا اللي دايما مشدودة
صباح الورد و النوير

Peace يقول...

رغما عن كل الم
صباحك حب يا وطن

نحن لن نفقد الأمل
سنسعد بكل المهن

G يقول...

أنا كل ما أحس ان عندنا لويه بالديره أفرح,لأنه دليل على ان فطرتنا للحين سليمه وما تعودنا على الغلط

احنا مثل الواحد الصاحي لما ياخذ برد يعاطس وصوته يتغير ونفسيته تتعب لأنه ماتعود على المرض. تلاقينه يحس انه بيموت على شي علاجه بسيط وماياخذ أكثر من يومين

أما المريض مرض كايد مثل السرطانات الله يكافينا وياكم فيسكت ويتصبر لأنه المرض مستشري بجسمه وتعود عليه أو ممكن مايحس فيه أصلا.

وعلى قولة د/أحمد الربعي الله يرحمه
تفائلوا...الكويت مازالت جميله

SHOOSH يقول...

مسفر الدسوري هذا كلامه عجيب

و صباحج خير

:)

Enter-Q8 يقول...

ازمة قيم

Sn3a يقول...

اخييه
الكلمات تعور القلب
وتولد دموع تغلي

ربي يردلنا كويتنا
ويحميها من شر يحاوطها
وشر داخلها
وربي يصفي النوايا

someone_q8 يقول...

السلام عليكم
اختي استكانة , متى ما صارت الكويت عند البعض عبارة عن كيكة ولازم ياكل منها كثر ما يقدر راح اتشوفين هالنماين متروسين بالديرة

لكن الامل موجود بإذن الله

ARTFUL يقول...

صباح الخير يا وطني

:)

أُمْ حَــسَـــنْ يقول...

مساءج فل استكانة ...

دوام الحال من المحال و هذي الكويت صل على النبي

chandal/danchal!! يقول...

احب برنامج

good morning America

:p


مزمزيل استكانة خانم, علام حفيزج الثاني مسكر!

خااالف تعرف يقول...

نكاد نفقد الامل

في هذا البلد
فكل يوم يضربه نائبة
سياسية كانت او اقتصادية او اجتماعية


والله المستعان