الاثنين، أكتوبر 12، 2009

ملاحظات استكانية

(1)
،أنيقة ملفته للنظر،شذى عطرها يفوح في الممر،اعرف انها وصلت كل يوم من ضربات كعبها على الارضية،ومن العيون التي تتلاقط حولها،عادية ولكنها تعرف بشخطة كحلها وخواتمها والماركات التي تتشكشك فيها كيف تلفت النظر،زمليتي جميلة للعين ،وحبيبة،ولكنها مزعجة للإذن:
واي فلان عمى بعينه
سكتي الله ياخذج
مالت عليهم ياكلون....

هي تتكلم بطريقة عادية وطبيعيه،وانا انسانة شديده الحساسية اتجاه الكلمات،فعليا اشعر بأن انوثتها وجمالها كلها تنسف بعيني في اللحظة التي تدعي على احد او تسبه



(2)
تكليف خارج حدود جهة العمل يجمعني به ،زميل ثلاثيني ذكي وعبقري جدا،قيل لي ستستفيدين من رؤيته وتفكيره وسيكون هو المدرب الاساسي لك
ساعات العمل طويلة،وهو للاسف قراق
!!
الكراجات...المبارات...السياسة...الكويت...الشاليه...الزواج...الاطفال...الدوانية..المدونات...الجرايد...الحرامية..السفر...الحياة...الدنيا
في البداية شعرت بأن شي مناسب ان يسولف ليمضي الوقت
ثم بدأت الدنيا تلف وتفر فيني فاكتفيت بهزات راسي :
أي
اممم
اها
ردات فعل مقتضبه،وهو يتكلم وانا اقلب الاوراق لعل وعسى يفهم ان الدنيا قامت تفتر فيني،ولكن سكوتي جعله يعتقد اني واحد من الربع فانطلق بذات السرعة
عندما انتهيت من هذا العمل الذي ولله الحمد لم يطول،اكتشفت :
ان كون الرجل قراق امر غير محبب ابدا،والحقيقة الاخرى ان لكل مقام مقال،ما يقال في حدود العمل غير ما يقال في حدود اخرى،والحوار مع بنت يختلف تماما عن الحوار مع شاب
!!
لم اكن اريد ان ادقر حماسه وسوالفه،ولكني شعرت بأني غير قادره على المجاملة اكثر
عبقري وقراق مع الحريم؟
ماكو فايدة



(3)
نحن نختار صداقاتنا غالبا
ولكن لا نختار عوائلنا واقاربنا فهم قدر

!!
احيان قد يأتيني موقف من شخص قريب جدا يضايقني،ولكن كون هذا الشخص قريب مني يجعلني اتألم بصمت خوفا من ان اتكلم وتهتز صورهم في عيني وعين من اشكي له
وذاك شئ غير واقعي متعب اهلكت به نفسي

فأنت وهم بالنهاية بشر،وحصول خلاف طبيعي فحتى المواعين بالمطبخ تتراقع
اشكي وعبر عن مشاعرك ولكن للأشخاص الثقه القريبين الكتومين فقط
استغرب حين تجلس هي على طرف مكتبي وتسولف:
امس زايرتنا عيوز النار
منو؟
خالتي أم حمّود
حمّود ريلي ما يفتهم تخيلي امس شقايل وبلا بلا بلا بلا
اشعر بقلبه كبد:
أولا:وان كانت خالتها شريرة ولكن لا تسمى عيوز النار فهي بالنهاية ام زوجك وجده ابنائك
ثانيا:لو كان زوجك اصغر رجل بالكويت،نادي الاسم كما هو

وهذي ملاحظة مهمة:
لا احب من تنادي زوجها امامي:
حمود،خلود.عبود
واحد من الربع؟
وختاما:
ايا كان سؤ زوجك،لا تجعليه موضع حديث ولو لصديقة دوام تثقين فيها،حافظي على الصورة على اللفظ والكلمة
:(




(4)
ولدنا انا وهو في ذات الاسبوع،فكان قريبي هذا بالذات صديقي الصدوق،لا زلت اذكر حين جائني يركض وكنت في الإبتدائية يقول لي:
تدرين فلانة قالت وقالت وقالت عنج
!!
فضربه جدي رحمة الله على فمه:
عيب سوالف هالحريم انت ريال ما تنقل حجي

من يومها صمت هو وتعلم ان لا ينقل حجي،ولكن الغريب اني ما زلت اصادف رجال من نقالين الحجي
الم يكن لهم اب او جد يضربهم على فمهم ويقول لهم:
عيب سوالف الحريم؟

(5)
عندي موضوع بحث معين،اخذت موعد وحضرت لجهة عملها،من بداية اللقاء وحتى آخره وانا عاجزه عن التركيز لسبب سخيف وخاص فيني:
البنت تتعلج
!
وليس اي تعلج،البنت تتعلج بحماس منقطع النظير،وانا عقلي مع شفايفها وهي تتحرك وتتعلج بحماس،وصوت العلج ينرفزني بطريقة غريبه وعجيبه لدرجة اني انهيت الموضوع بسرعه وهربت من صوت العلج
.
.
.
نعم اعترف اني انسانة شديده الحساسية اتجاه بعض الأمور
قد تكون المشكلة فيني وليست في المجتمع
انا مهووسه بإنتقائيه اللفظ والكلمة والعبارات في وقتها المحدد
تلفت نظري امور بسيطة:
لا احب العلج في مكان عام
لا احب الأظافر الطويلة
لا احب صبغ الاظافر على أظافرالقدم
ولا احب البنت اللي تدعي وتسب على الماشي
!
وحين التفت لأي رجل:
اشعر بالإشمئزاز من اولئك الذين ممكن يقطعون سالفه عشان يطالعون بنت
من الفانيله الحفر تحت الدشداشه
من الرجال كثيرين الكلام نقالين الحجي
ولا احب اولئك الذين ممكن يتكلمون لبنت عن سوالف الرجيم والضعف
عيب
!
شفيني اليوم؟
زحمة في حياتي،وجوه كثيرة،احداث كثيرة،ومواقف متتابعه تجعلني في احيان كثيرة حين افقد قدرتي على التعبير او شجاعتي للتعبير عن رأيي اتخيل ان فوق راسي غيمه فيها علامة تعجب
او استفهام او تعليق
وما زلت اتمنى ان املك ريموت كنترول احرك به المجتمع حولي
وزر في وجه المزعجين اضغط عليه فيكون الحل:
بلوك وديليت من حياتي
:)

هناك 37 تعليقًا:

shakshaka يقول...

انا مااذبحتني الا الريمونت اخر شي...اكيييييييد ريمونت مو ريموت؟:P
لوول ولهان انا بالحيل ولهان اييي يا استكانتنا العلج وما ادراك ما العلج اموت منه ما اقدر وانا خالتي تتعلج باصوات فظيعه فا اقعد اخز اخز وفجأه صيااااح شكشك هذا وانا ياهل لوول و ليه يومج محد يتعلج جدامي فا الحل في البجوه:P

ARTFUL يقول...

صباح الخير

شلون اخيتي

ببدي من تحت مع ام العلج أحس وانت مجابلتها
أحس راسج يتحرك مع براطمها

;D

أما سالفة الريال لما يقطع السالفة علشان يشوف بنت ينرفزني ودي اقوم اهبده على راسه

بس مرات ما الومه من هول ما يشوف

;p

أظافر طويلة نهي نهي نهي

بس سالفة الرجيم مع البنت ليش عيب!!

الحين سالفة الرجيم سالفة دارجة
بس ذكر التفاصيل فيها محرج
لما تقول انا عندي كريشة صغيرة اهي شبتقول؟!؟
عندي كريشة،، وبيج ماك على الأجناب
;p

-------

تنقل الحجي عيب عيب عيب حتى على البنات انا اشوفه عيب
الوالده الله يحفظها تزف اخوي الصغير واختي الصغيرة اذا نقلوا حجي او كل واحد يفتن على الثاني
!!!

-------------

احترام الزوجه للزوج واحترام الزوج للزوجة شي ضروري خاصة جدام اهاليهم

:)

------------

الريال يبي يسولف ما يبيج تنحرجين ويضيق خلقج هذا يزاه

ما يبين بعينكم

;p

------------

ما اخفيج سر قبل كنت دايما اشوف البنات ملائكة يمشون على الأرض

ما يسبون ما يغلطون ما يغشون بالامتحانات

ما يجذبون

لما دخلت الجامعه تغيرت كل هالمفاهيم

بس قمت اتنرفز لما اشوف البنت تسوي جدامي هالشغلات

!!!

وعسى ربي يحفظج

وهديت الشغل ودخلت علشانج

:)

EngineRaa يقول...

صبحج ربي بكل خير يا احلى استكانه،،،
شوفى يالغالية انا معاج بكل الي قلتيه لانها جميعها ظواهر سلبية بدات تغزو مجتمعنا والمؤسف انها بدأت تؤلف وتصير عادية وهذه الطامه الكبرى فأذا صار الغلط شيء عادي بالتالي زاد الابتعاد عن الامور الذوقية الراقية .
بل انا اصر على الالتزام بما ربونا عليه اهلنا والزم ابنائي بنفس المبادىء وهذا واجب للحفاظ على سمعتنا وهويتنا واخلاقنا ولا يجرفنا التيار .
حافظج الكريم والله يكملج بعقلج الرزين

ميمة السبيت يقول...

** نفس مأساتي ما احب اشوف احد يتعلج جدامي عادي اقولهم لو سمحتي قطي العلج بس ياخوفي على يوم اطيح بوحده ملسونه ويا كثرهم هالأيام

نون النساء يقول...

بصي

أحياناً ولمواقف شبيه قد نتعرض لها بشكل يومي.. وخصوصاً ما ذكرتيه في البوست..

اتمنى لو أن الدقرة
شيء يتم تعليمه لنا


كنت ولا زلت أتعرض لمواقف مع أشخاص
تعدت كثيراً مسألة العلج
والقرقة

ياليتها يايه على علج جان هانت
هههههههههههه




لكني أشاركج الأمنية
في الحصول على ريموت كنترول مجتمعي
وأمارس فيه أفضع أنواع البلوك وديليت


:)

SHOOSH يقول...

(1)

Well I might swear lama a3a9eb but I always make sure it's not loud (most likely "hams')and not to a particular person. LooL and it's mostly in english madry why !

yah and it's always THEM mako a7ad mo3ayan

**** them. **** them. the **** ! kela jam3 :)


السب العلني و الصراخ و الدعوه على الأوادم بصوت مو شرط يكون عالي حتى لو تجاوز حدود سمعك لنفسك و صار ممكن إلي يمك يسمعه أعتبره نوع من الهلاقه و قلة إحترامك لنفسك أولا و للناس ثانية


البنت (وحتى الرجل) المفروض دايما يكون صوتها واطي لي تحجت يدام الناس هالمره صراخ و سب

يا ساتر

(2)

آنا خلقه من الله ما اعرف أركز .. اتحرك وايد .. عبثيه وايد ..أي شي يشتت انتباهي (هذا لو قدرت أنتبه) وتركيزي و لو شي بسيط

صعب اللي يدامي يخليني أركز معاه

يا ألعب بدباسه .. يا قلم .. يا ورقه
I can't stay focused

هالمره واحد يقرق و ينط من موضوع لي موضوع ؟؟؟ وايد صعب

الله يعينج

آنا أقول بيني له إنج مو قادره تركزين عادي ما فيها شي

(3)

تصغير الاسماء عاده مو حلوه

آنا بالبيت تعلمت ما نصغر أسامي بعض لو شيصير .. حتى لو اخوي و عمره 3 سنين

خالد ما يصير خلود و عبداالله ما يصير عبود

ممنوع

ولا بيكبرون و يصيرون رياييل و إحنا ألسنتنا ماخذ عالتصغير

not so good

You can always block and delete :* but make sure they deserve it .. give chances bel awal


ملاحظاتج عجيبه

أول مره بحياتي أكتب تعليق بحجم بوست

في مكان احد يعلق وراي ؟؟؟

:)

سلام

esTeKaNa يقول...

shakshaka
~~~~~~~~~~~~~
looooool
واي تذكرت قبل لما اقول:
بششور شعري
اششور مو اسشور
:P~
يا بعد قلبي اللي ولهان بالحيل ولهان
واي يا بعد قلبي قلبج شهالرقه؟
تبجين من صوت العلج
ويلوموني فيج
رقه رقه
:P
تصدقين انا اتنرفز من صجي
:)

esTeKaNa يقول...

ARTFUL
~~~~~~~~~~
يا مرحبا يا بو شيخة
:)
يتحرك مع براطمها
loool
بالضبط
احس نفسي متنرفزه من صجي
:)
صح سالفه الرجيم دارجة
بس انا ماحبها لسبب ان الحوارات فيها اذا طالت تصير مو شي
عيل ذاك اليوم واحد يسولف ويا واحده يقولها جنج سمنتي حيل عقب البيبي
متى الرجيم؟
انا لو احد يقولي جذي تيني سكته قلبيه
عيب عيب
!!

ويعطيك العافيه يارب
تشوف البنات ملائكة لانك طالع من مجتمع نظيف،عسى ربي يحفظهم ويبارك لك باهلك ويبلغك بشيوخه

esTeKaNa يقول...

EngineRaa
~~~~~~~~~~~~~
عسى ربي يبارك لج بعيالج ويبلغج فيهم قولي امين
:)
وصاجة المشكلة اذا اعتادت عيونا واصبحنا نستسهل كل شي ونعتقد ان عادي وهو ماهو عادي للاسف

esTeKaNa يقول...

ميمة السبيت
~~~~~~~~~~~~~~
ياربي انا احس العلج مو بكل مكان
تصدقين انا من كنت ياهل ابوي من نوصل السوق قال :
قطو العلج
:))

esTeKaNa يقول...

نون النساء
~~~~~~~~~~~~~
ياربي ليش اهلنا ما علمونا نندقر؟
انا خلاص بغير موديلي
بمشي وادقر بالناس
:Pp~
بس يختج ذابحتنا التربيه والسنع
:)))
ويبيلنا جهاز البلوك والديليت

New Bride يقول...

صباح الخير :)

وايد يبتي نماذج موجوده حوالينا كلنا

و اتفق معاج بأغلبها و خاصة بالريال اللي ينقل الحجي

بس اختلف معاج بشغلتين
الريال القرقة
وايد شي حلو انه الريال يتكلم :) انا من وجهة نظري افضل القرقة

و الشغله الثانية صبغ الأظافر :)

مبدعة يا استكانة و دايما بوستاتج مميزة

chandal/danchal!! يقول...

الله ياني شطحت شطحة

تذكرت الفلبينية اللي ب
Sfera

العلج مو معطيها طريج وفوق هذا تطربق بجوتيها (عزج الله)

يعني النرفزة مرفوعة لأُس اثنين... وتزيد النرفزة ويزيد الأُس معاها الى ثلاثة لما تطربق وراج بكل ربعة تروحينها وكأنك بتبوقين بوقة, وتتليقف على راسج شتاخذين شما تاخذين

يخرب بيوتكم خلاص هونت ماني شارية شي



تدرين شنو اكثر شي ينرفزني وممكن ابق بويه اللي جدامي!

اللي "ينشقون"... والله يعطيني على قد نيتي... بالطيارة اللي يمي ينشق

المسيد... تشم هروين مو تنشق

الجمعية... المحاسب واللي يحط الاغراض بالجيس ينشقون

المدير... يتنحنح وينشق!

Safeed يقول...

رد عام

لمّا نملة غريبة تدخل بيت نمل مخالفين لها شيصير فيها؟ لمّا حشرة غريبة تدخل خلية نحل شنو يصير فيها؟

في الحالتين النمل أو النحل راح يهاجمون هالحشرة الغريبة، جسم الانسان لما يدخل فيه مخلوق غريب شنو يسوي فيه؟ حتى لو كان هالجسم "اصبع أو ذراع أو كلية" من أخ أو قريب لذلك يلجا الاطباء لتعطيل المناعة حتى يتكيف الجسم معاه

طباعنا و أحكامنا العقلية تمشي على نفس هالنمط، لما نصف الحريم "بالقرقة" فاحنا نعطي صفة (لازمة) مثل ما يسمونها بالمنطق لهالجنس، بالتالي نستغرب أو "نكش" لو شفنا ريال يقرق أو ريال ينقل حجي أو ريال يتشبه بالحريم بأي صفة أو هيئة لأننا نعتبره مثل "الشي الغريب" اللي دخل بالغلط وسط محيط متآلف

.
.

بالنسبة للكلام القبيح والعلج والصوت العالي فهذي آداب، كل مجتمع أو بيئة او محيط يصيغ له آداب يتعارف عليها أبناءه ..وهالآداب تتفاوت من بيئة للثانية

وبسبب هالتفاوت يمكن نشوف فيها احنا (شي معيب) بينما صاحبها يشوف فيها شي اعتيادي ما يستحق كل هالضجة عليه

الآداب "متغيرة" لكن الأخلاق "ثابتة" لذلك ممكن نستنكر أو نشجع بعض الآداب وغيرنا يخالفنا فيها لكن مستحيل احد يختلف على قيمة الصدق او الامانة او غيرها من الاخلاق

.
.

إذا ضاق صدر المرء عن كتم سره فصدر الذي يستودع السر اضيق

يا ليت الناس يستوعبون أن البشر مو حوائط مبكى
!!

ikhalifa يقول...

1
اممممم ....المهم هي حلوة؟

2
و الله ما عرفنالكم

3
كلام سليم

4
و هم كلام سليم

5
أنا ما عندي مشكلة مع أي نوع من الأصوات عدا الـ...و لا بلاش
ما عندي مشكلة من يكلمني و هو ياكل لبان
مشكلتي مع الآي كونتاك
أصدع من اللي يكلمني و هو لابس نظرات شمسية
أو أللي يكلمني و ما يطالعني
أحس في شيء غلط

مطعم باكه يقول...

اللي يسولف وايد وما يدقق اذا انتي تسمعين له هذا خوش ولد ..

عندي واحد من الربع يهذر ويبيني غصب اسمع له , ومرات يقول انت معاي ؟ اقوله اي .. يقولي انا شقلت ؟

هني انا اصير مثل رفيجتج اللي بمثال واحد :) ..

ازفه زف سنة بساعه لأنه ما يستحي :)

بس بيني وبينج لو وقفت على هالصفات اللي حطيتها تهون ..

اكو ناس فيهم نذالة ودناة نفس بشكل مزعج ..

بشكل عام انا استطيع التعايش مع كل الصفات الا البخل , احس ان البخيل انسان حقير وما يستحق الصداقة !!

سلة ميوّه يقول...

إستكانه ..
رغم إن الملاحظات عن واقع أليم
إلا أنني ضحكت دون توقف
:)لأنني تذكرت وقائع من حياتي..
ومع قرائتي للتعليقات لاحظت أنها وقائع ممن حياتنا...
1 اتفق معك...قد تكون الفتاة مجرد قالب ملون لكعكة فاسده إن كانت على شاكلت زميلتك...
أحياناً حينما أرى مثلها أخاطب نفسي ( ماشالله شنو شعورها وإهي زوغه ) حتى تتكلم فيخيب ظني وأقول (يازينج ساكته انا اقول )

2
يقتلني الرجل الصامت! فأشعر انني اعيش أمام شيء غامض..في نفس الوقت لا أحب ال ( هذار )هذا لايمنع أن يكون منطلقاً بهذرته بين فتره واخرى وصامتاً أحياناً...بس في الوقت المناسب
3

مستحيل ان اذكر مساوء شخص أحبه حتى امام نفسي


4
تعلمت منذ صغري

اللي حجالك يحجي فيك...
وانا مؤمنه بها





5 العلج وما ادراك مالعلج.....

في سانغفوره يخالف من (يتعلج علناً او يرمي العلج على الأرض ) شرايج انطبقها؟؟؟؟




إستكانه تعلمين مدى حبي لقرائة بوستاتك...
وحبي يزيد كل يوم



حبي

Common_Sense يقول...

"Ignorance is bliss", you think too much :)

Nikon 8 يقول...

النماذج التي ذكرتيها تنرفز اللي ما يتنرفز
إستكانتنا الغالية تطمني فانت بخير
والعيب ليس بحساسيتك
العيب بتصرفاتهم الخالية من اللباقة والأتيكيت
وإلا إش سالفة المسبات على الطالغة والنازلة والتلفظ بألفاظ غير لائقة على أهل الزوج والعلج بأصوات اللهم كافي
!!!!
كلشي عاد ولا الريال نقال الحجي والقراق
وين تجمعوا عليج كلهم بوقت واحد
الله يعينج
:)

jonoon 3aqel يقول...

(1)
بشكل عام...انتقاء الكلمات يعكس شخصية المتكلم..
و لا اعتقد انك حساسة..
لأني ايضا انزعج من الناس اللي يصغرون اسم شخص..مع ان هذا الشخص يناديهم بأسمهم عدل!!

(2)
قراق يعني حجاي..
مممم ماصادفت نوعيه كذا..

(3)
للأسف..في الصيف كانت صدمة هزت كيان الأسرة كاملة..
تخيلي...مو شخص اللي تفاجأ ببعض الأفراد من الأهل..
لأ..
عيلتي كاملة صادتها البوهة من التصرفات الخطأ اللي اضطرينا نواجهها من قبل هذا الشخص..
المهم..
مازال الشعور.." لا نريد الكلام..حتى لا ننصدم أكثر"

(4)
"الم يكن لهم اب او جد يضربهم على فمهم ويقول لهم:
عيب سوالف الحريم؟"

سؤال وجيه..
لم يضربني أحد على فمي..لكن الحمدلله تعلمت دون ضرب :)

(5)

هههههههههههههههههههههههههههههههههههههههههههههههههههههههههههه
====================

هل هذا التعليق الطويل يجعلني في خانة الرجال القراقين (الجايين)؟
اتمنى لأ..

دمتي مرتاحة

تحياتي

BeeDoO يقول...

1- هاذي مال قبقاب يقظ راسها عشان تعرف تتكلم

2- هذا علاجه لعبة سنيك بتلفونات نوكيا قبل وتعتبيرينه حاله حال الرادو

3- انا مرتي بخليها تناديني عمي والا .. يا (سي) على غرار نبوية مرت قحطة .. والا بيت اهلها :D

4- هذا علاجه دقرة تخليه يتحسف على كل كلمة قالها .. وصدقيني يتوب

5- هالاشكال يبيلهم معهد اعادة تأهيل مع كلاسات أدب اشوي واختبارات تربية مع اعطائهم فترة تجربة بعد الدورة لأنهم ما يستوعبون بسهولة

لكل التساؤلات هناك أشباه اجابات .. وهاذي أشباه اجاباتي :D

t.q8 يقول...

صباحك معطر

صدقيني الريمونت ماراح تستانسين فيه
لان الناس المزعجين اهما بهارات الحياه
فاذا تقبلناهم او ماتقبلناهم فوجودهم لازم علشان مانمل من الحياه

Sweet Revenge يقول...

قوة استكانه :)

طبعا النموذج الاول هذا منتشر وايد لبس واناقة واخر شي لاتشوفين المنطق واسلوب الكلام
نورية اللهم ياكافي
والمصيبة علي بالها ستايل وكول
الرسول يقول ":" ليس المؤمن بالطعان و لا باللعان و لا بالفاحش و لا بالبذي "
2 شوفي الريال يتكلم معاي اوكي بس قرقة مالها داعي اكيد بمل حلاته تكانة والكلام بحساب
3 هذا تابع موديل واحد نفس الطريقة
4 الله يرحمة يدج ,المشكلة استكانة الام والابو الي يعلمون عيالهم هالعادة "ابوك شيقول عني ""امك شتقول عني "
الله يرحم يدج
هذا الحركة مو تنرفز الا تموت
وخاصة لي صارت من اليهال

5 انا الي اعرفة التعلج عي بالصراحة وشكلة مو حلو ابد
طلع مو بس انا الي عندي شغلات غريبة
انا ما اعرف اتكلم مع اي احد لابس نظارة شمسية
ما اعرف اتكلم مع احد مااشوف عيونة واطلب منهم صراحة ان يفصخونها
وصدقيني حده مريح اسلوب بلوك دليت
ريحي راسج
:*

ZooZ "3grbgr" يقول...

تخيلي ان انتي قاعده بمكتبج

واتييلج عميله الله يهداها

والمكتب زجاج وارضيته خشب

واهي مو تتعلج

لأ

تطق بالعلج بضمير

جراااك

جراااااااك

انزين شصار على الصناديق؟؟

جرااااااااك

واتهقين اسحب جزء من وحداتي ولا اخليهم بعد جم شهر؟

جراااااااااااااك

وصوت العلج يصير عندج له صدى

واساسا ما احب احد يطق بالعلج

بذمتج ساعتها شتسوين؟؟

وانتي ملزومة تظل ابتسامتج وتتحكمين بالبودي لانقويج مالج!!!؟؟

والله تحطمت يومها

اول ما طلعت بغيت ابجي

ظلت عندي 27 دقيقه

قلت اعد الدقايق احسن ما اعد جم مره طقت بالعلج

وعلى فكره

مو علج بوسهم ولا اي ببل جم او بالكويتي بو تفافيخ

لا

علج بصري مادري علج ماي مادري شيسمونه اصلي

Kandroz يقول...

تتشابه الافكار في رقم 3
استاذتي قبل سبوعين يمكن كنت كاتب بوست وكاتب مقوله عن هالشي اللي كاتبته برقم ثلاثه

لانه فعلا مريت بهالشي


قواج الله

أتيت متاخرة يقول...

صباحج ومساج حب وسعادة
ياني ولهانه عليج وعلى سوالفج

بعيدا عن هالاشكال اللي تغث
فمهما كان الشكل واللبس والماركة فهي ما تضيف لشخصية الانسان ممكن تجمل الشكل الخارجي فقط بس الخلق ما اعتقد

العلج .... آحس غلط اتعلج جدام احد

الحل مو بالريموت كنترول يا استكانة
الحل بالتربية السنعة

المقوع الشرقي يقول...

آآه ياللعلج يا استكانه ينرفززز
الصوت جكجك
..
يا شين نقاليين الحجى لا من مرة ولا ريال
.

وترا هذا ربا
اللي يتعلم من صغرة
تلقين من يروح عند ناس الام تنشد منو وشلون وشصار
فتصير طبع
عزت الله
طبعن أقشر.
وتسلمين على الملاحظات
:)

خاتون يقول...

شفيج اسمـ الله عليج قبل جم يوم كنتي فوق السحاب ...
موضوعج في وايد نقاط قوية مو أنتي حساسة إلا بعض الناس يسون حساسية عبارة عن أمراض سارية بالمجتمع و يا مالج تشوفين أكثر من هالناس و على
قولة يدتي الناس مشكاهم على الله
أما العلج عاد حدي أحبه و على طول بحلجي بس مو متحمسه محد يحس فيني بهدوء لأنه أدري أنه وايد ناس يكرهونه فأشيله بس فترة المحاضرات و إن دريت انه اللي جبالي ما يحبون التعلج
السب و الدعاوي مقرفة ما أحب لا أدعي و لا أسب أحس أنه أحنا لازم نرتقي
و حمد الله على السلامه يوم أنه الله فكج من القراق ههههههه
قواج الله و كثري و عجلي ترانا ننتظر ^_^أورفار

Super Sara يقول...

صباحو ورد و نور و بركة

والله صدقتي يا استكانة بكللل ما كتبتي

فكم من فتاة يقتل جمالها و تتعثبر أناقتها و يتبخر بريستيجها لحظة تفتح فمها ؟

و كم من رجل تهرب منه الهيبة بسبب أفعاله و عمايله ؟

و كممم هي كثيرة الأشياء اللي تنرفز بين الناس الذين بات من الصعب عليهم التفريق بين الحرية و بين الوقاحة
أراهن لو أنك علقتي على موضوع العلج -لأكلتك بقشورك- طبعا!! من انتي حتى تنزعجي من علجها ؟!

لا زلت احمد الله على اني كنت عند أبلة فوزية مدرسة البدنية التي كانت تطير قلوبنا بخزّتها ما أن تلمح وحدة منا حطت - ريل على ريل - و كانت دائما تقول : الئعدة دي عيب ئدام الكبار!!

فتعلمت أن العيب .. لا يتغير بمجرد أن نكبر .. العيب يظل عيب ...
و قلة الذوق تظل قلة ذوق
و العلج يظل مزعج و كريييه جداً خاصة بالنسبة لي !! شكراً لج لانج مثلي !!

:

الله يسعدج مثل ما أسعدتينا
حسستيني أن الدنيا بخير فعلاً .. تحية

المقوع الشرقي يقول...

استكانه الغالية
دزيت تعليق
الظاهر علق
انا العلج مثلج ما اواطن اللي تتعلج
وتطقطق
ينرفز
ولا بعد احب الريال يتعلج
أحسه اشارة على ملاقته
:)
ويه جان زين أكو ريموت
حزت اللي تبين تخلينه ميوت
:)
من نوع
باقية النون فى بوستي السابق على ردة اعيالنا
مو قلتى بتكتين نون
:)
والله أول ما قريت أنهم ردوا ذكرتج
بس ها نفس ما شرطنا على أختىى
وانتى بمنزلتها
أصلي بالحلاو الحار والخرده(كثري منها..:) وحلا و
بو بقرة
يا ليت يكون الحمر..مادري ليش أحبه زود مع أنهم نفس الطعم

قولى آمين عسانا نكت نون على ردة الفضالة
واجازة ممتعة يا الغالية

ولد الديرة يقول...

esTeKaNa

يا اخيتي اصبري هذا بلاء من رب العالمين

عايشين في عصر مقطًّن

فعلا فيه نساء ورجال يراهم الفرد ويحسبهم اوادم ولكن من اول دقيقة حوار يحس البني آدم بغثيان ولو كانوا ملكات وملوك جمال

عاد انا شسوي

اسد اذوني وابقق عيوني

:p

مت ضحك على ملاقة البعض في التحدث عن الريجيم مع البنات

قواج الله

السنع سنع لو كان من مدغشقر والقلق قلق لو رابي بفريج الشيوخ

xname يقول...

(1)
سمعتي بمن حبك سبك !!
هذا اللي قاعد يصير
وحده تطيح الميانه تسب... تناديج تس..تسولف طبيي تسب كل ما كبرت السبه كبر غلاج !!!


كانت علوقتي الحقران يقطع المصران لوول ..لانه البنااات ما يسبون
قانون الوالده
ولما اشوف بنات الاهل كلهم يسبون أقول الحقران يقطع المصران
وعقب تطورت ما أنزل مستواي لمستواكم لووول حدي خطيييره ...

وبعدين اذا عصببببت يا الهيس او الهسيه وبسس


والشي اللي سوته امي حلو لانه حتى اللي تسب رفيجاتها من باب الميانه توقف عندي وماتسب ...تقول ما اقدر =))
والحين رفيجاتي قاموا يسوموني اكس الله يغربل بليسج و اذا بيغيرون يامال العافيه =D

Expatriate يقول...

"اشعر بالإشمئزاز من اولئك الذين ممكن يقطعون سالفه عشان يطالعون بنت
"

الله يا كثرهم

اجار الدين كشمش يقول...

المكتوب يعرف من عنوانه

والناس بيئات ومعروفه من الاسم او من اول جلسه

ولن تتغير الحياة يا استكانه

والحل الصبر والتعايش وعدم الجدال

الا مع من هو من بيئتك

فمالله

بخور السوق يقول...

يا هلا وغلا بهالطله



استمتع اذا صار البوست يومياتج





وااااي السب وما ادراك ما السب ومالمشكله بمكان عام وامام الملاء لا حيا ولا مستحاااااا فعلا نشاز ويخرب الهيبه كلها






الريال القراق ..انا ما استحمل المره القراقه هالدور
ريال كلللللللش مو لايق.....






اما اللي فجر قريحتي كلها يا استكانه





العللللللللللللللللللللللجججججججججججججججججججججججججججججججججججججججججججججججججججججججججججججججججججججججج





اففففففففففففففففففففففففففف





وساعات مضطره تنثبرين بالمكان ما تتحركين ..طول المده حوار داخلي وااحد ماكو غيره ...





(ابي اكفخ ) ابي اكفخ ابي افلع ما اواااااااااطن صوته ولا شكل المره اللي تتعلج ...




وطبعا اذا ما يلوق عالمره فمن باب اولى الريال ....






وتكفين اذا لقيتي الريموت ابي منه 3 واحد بستخدمه و2 بخشهم للزمن :))))))))))))))))))))))))))))




دمتي بخير

Sn3a يقول...

قوة اخيتي شلووونج


تصدقين وحده من زميلاتي العزيزات
ماحببني فيها
الا انها لما تعصب
تقول الله يهدي فلان
ولا الله يهدي علانه
يارب تينن



وااي مع اني ماحب الريال الساكت
بس ماحب واحد يتكلم وايد
اصلا ماحب بنت تسولف بسالفه طويله فما بالج بريال مايسكت وييييه!!



مسكينه
عاد عيوز النار؟!؟
حرام
امي كله تقول محبه الخاله من محبه الزوج



يتروالي الرياييل نقالين الحجي اكثر من الحريم حاليا;p


انا بعد ماحب الفانيله الحفر!!
في احد يلبسها للحين؟
اما على طاري ريال يتكلم عن الرجيم
انا حاشني موقف
صج صج ماعرفت شيسوي
كنت طالعه مع اختي او رفيجتي ماذكر
واهيا طلبت كيكه جان يطالعنا ويقول هيدي فيها شي الفين كالوريز بتسمنكم 2 كيلو
ايا ولد اللذينه
لا واذكر ان كليناها كلها من القهر
;p

esTeKaNa يقول...

استمتع بالرد على كل تعليقاتكم
ولكن انا لظروف خاصه صار لي اسبوع خارج الكويت وما رجعت بعد
:)
الى ان ارجع
عسى ربي يحفظكم ويسعدكم
وان شاء الله بأقرب وقت يتم الرد على تعليقاتكم الجميلة
من غير علج طبعا
:P