السبت، سبتمبر 26، 2009

الشايب والرمان

الساعه الواحدة والربع فجرا:
بدأت بكتابة هذه التدوينة في تمام الساعة الواحده والربع فجرا،أنا و وبصحبتي باديه صغيره بها عصير جوافه بارد وتسبح بالعصير حبات رمان لذيذه تتناغم بجمال مع الجوافه المقطعه
ليش اكل جوافه ورمان هالحزه؟
مادري
ربما هو اكتشافي المتأخر اني نسيت اتعشى،اضف اليه اني احب مزج الاشياء المتناقضه،فمابين الطعم الحامض لحبات الرمان وسكر الجوافه اشعر بطعم لذيذ لهذه اللحظة
!!
.
.
.
أشعر بأن هذه الليله طويلة:
بالي مشغول،والأفكار تصول وتجول،وصار لي مده وانا اكرر محاولات النوم ،وما زلت انتظر تشريف النوم
لما لا يكون لنومتي رقم هاتف ثابت ابعث لها رساله متى ما اردتها؟
.
.
.
ما زلت افكر بأحداث هذا اليوم،يومي كان قد مختلف بزياره العم الشايب المريض
:
تلك الزياره التي كنت أأجلها يوما بعد يوم بحجة أنه رجل كبير لن يذكر ابنائه ولا احفاده حتى يذكرني،كان ذلك سبب ولكن السبب الرئيسي الذي اخفيه في قلبي اني فعليا اخاف ان ازوره ومن ثم يتوفاه الله واشعر بحزن شديد وانا اعرف نفسي اذا حزنت كيف انتكس
!!
قبل اسبوعين دخل في غيبوبه طويله ،كان لها اكبر اثر سلبي على والدي،حين دخل بغيبوبه شعرت بأن اعذاري واهيه وشعرت بندم بأني لم ازره ،كان لابد ان ازوره واحتسب النيه برا بوالدي وجدي رحمه الله ورضاء للرحمن دون ان افكر هل سيعرفني او لن يعرفني
:(
.
.
اليوم بعد صلاه العصر لبست عبائتي وذهبت مع ابي لمستشفى مكي جمعه،المستشفى هادئ،والممر طويل،وطوال الممر صور للشيخ جابر وسعد رحمهما الله :
هل ترى اداره المستشفى لا تعلم ان شيوخنا توفاهم الله؟

الممرات الطويلة ،وجوه الناس القلقه المنتظرة،وزوار يروحون ويجيئون،والمرض في كل مكان،اتأمل كل شئ حولي وأفكر بكل شئ في حياتي:
هل احتاج ان افقد راحتي واستقراري وصحتي لأشعر بقيمة النعم البسيطة الجميله التي اعيشها في كل لحظه؟
اللهم ما اصبح بي أو بأحد من خلقك من نعمه فمنك وحدك لا شريك لك فلك الحمد ولك الشكر
.
.
.

ركبنا الاصنصير،ومن ثم اتجهنا لجناح الرجال، ومن ثم غرفته، كان صوت التلفزيون عالي جدا،وهو مستلقي على ظهره،يناظر اللاشئ،جسمه كان يبدو نحيل اكثر من اللازم ،وانبوبه تدخل في انفه للأكسجين،وابره طويله تخترق يده السمراء موصوله بكيس صغير يقطر به الماء
اجر وعافيه اجر وعافيه....لا ماشاء الله اليوم الوجه نور ما عليك الا العافيه

هكذا ابي ينشر الفرح والأطمئنان بكل شئ حوله،يقبل راس الشايب يمسح على يده،يدعي له ،وانا موقوفه مثل الصنم وراء ابي اناظر لقاءهما فأشعر بشئ من روحي يبتسم وانا ارى ابي يقرأ عليه ويدعي له :
هذا الرجل الحنون البار أبي
وهذا الرجل المدعو ابي اغلى شخص عندي بالدنيا
!!
يسحبني ابي من يدي:
عمي هذي بنتي
فيبتسم:
ما شاء الله انتي بأي صف؟
فضحكت...انا خلصت كل الصفوف اشتغل الحين
شعرت بشئ منعش وانا في الخامسه والعشرين وموظفه ويسئلني الشايب انتي بأي صف؟
وطبعا ذلك احساس طبيعي لكل بنت تتمنى دوما ان ترى اصغر من الحقيقة
:)
.
.
.

يلتفت الشايب على ابي ويطلب منه وضع كرسيي على يمين سريره،على ان يجلس ابي على يساره،يسئله ابي عن صحته فيجيب:
تعبت اليوم عن ثلاثه ايام مادري الحين عشا ولا عصر،ماني قادر حتى اتحرك،قلت حق الدكتور خلصني من الآخر متى اموت؟جان فيها موته يالله ماني خايف من شي

كان متوتر،غاضب لعدم وجود الجميع حوله،ينسى من زاره ومن لم يزوره ووظل ابي يهديه:
عمي كلها جم يوم وتطلع انت بس لو تهد هالسقاير عنك،اشلون مدخل السقاره ببايب الاكسجين؟
باللله انفجر فيك والله يا عمي انت انتحاري
يكلمه ابي وانا اتأمل ملامحه،يشبه الممثل احمد مظهر ولكنه اسمر منه،جفسه الركب،ونظرته،وسقارته التي تحدى فيها العالم ودخنها وهو متجاهل بايب الاكسجين،كل هذا جعلني رغم عني ابتسم وانا اقف امام شايب كويتي قديم بايعها وفعليا ماهو هامه حتى الموت
ويا ترى ماهي المرحله التي يصل لها الانسان حتى لا يهمه ولا يخاف حتى من الموت
!
كان ابي يتكلم وهو يتجاهل تحذيراته ونصائحة ويجفس ريله ويطالعني صامتا،فاسئله :
عمي صاير تشبه جدي الله يرحمه

فيبتسم..كان اقرب من لي
اشلون؟

ارخى ظهره على السرير ومسك يدي اليمنى،وقام يسولف عن جدي،عن الغوص ،عن ضياعهم في الهند ذيج السنه،عن العمل في المينا،وسالفه تير سالفه،اكتشفت وهو يسولف انه شايب بعمره اجمل ما يريده شخص يفتح معه مواضيع ليسولف،وكنت مستمتعه بانعاش ذاكرته وسوالفه التي وصلنا بها للغوص والحج وتزوير الانتخابات ومن ثم سوالف عن صديقه الشاعر زيد حرب...
كان يتكلم ويرى تعابير وجهي وانا اتابع كلامه وذكرياته،،واسئله،وابتسم له وفجأة تعب من الكلام وتتابعت كحاته بشكل ارعبني،ومن ثم اخرج عزكم الله شئ من فمه
:(
كنت مرعوبه لكني لم اسحب يدي التي في يده خوفا من ان اجرح شعوره،بل حاولت بقدر المستطاع السيطرة على ملامح وجهي حتى لا يبين خوفي او حتى اشمئزازي من شئ
،والغريب اني لا شعوريا وجدت نفسي امد يدي له ومسحت كل ما خرج من فمه بيدي وهو يدفعني بعيدا عنه،نادينا الدكتور،تضبطت الامور
،هدأ هو وعادت الأمور طبيعيه فعدت للكرسي حيث كنت فمد يده يمسك يدي ويقبلها وعينه تدمع وظل صامت فاهتزيت من داخلي:
من انا ليقبل هذا الرجل الكبير عمرا ومكانه يدي الصغيرة؟
.
.
.
الساعه الخامسه عصرا ،بدأ الزوار بالتوافد،حين دخل ذاك الرجل الطويل تحركت من مكاني مستئذنتهم بالخروج ،فمسك الشايب يدي:
لا ما تطلعين مامن غريب هذا فلان

انحرجت في داخلي،انا اساسا لا اعرف منو فلان،ولكن يدي المعلقه بيده جعلتني اقف مكاني،وكلما تحركت سئلني:
وين رايحة؟
فاجيبه باني لن اذهب لمكان طالما ان يدي بيده فيبتسم،رجل اخر يدخل الغرفه،اناظر وجه ابي المتوهق لوجودي بين هالرجال،ويدي معلقه بيد الشايب،تساورني ضحكة من توتر ابي،ومن يدي المعلقه،ولكن كلما وجدت وجهه مبتسم شعرت بشئ غريب:
هل معقوله ان وجودي يفرحه لهذه الدرجة؟
ما بقى شايب لم اسلم عليه،والمضحك اني لا اصافح ولكن العم كل شوي اذا شايب قالي سلمي واذا شاب سحب يدي بعيد،هذا ما يسمى بالحجاره المنتقاه،الساعه الخامسه والنصف قبلت راسه مستئذنه اياه بالذهاب فسئلني:
بتزورين عمج مرة ثانيه؟
اكيد
أي خليني اشوف وجه حلو بدل هالشيبان اللي مجابليني
ضحكت،وقبل ان اخرج سمعته ينادي ابي:
اخاف اموت،ترا بنتك امانة،مو تعطيها أي واحد سامعني يا صبي
!!
كلمته عورت قلبي،يوصي ابي علي؟
أسئل الله العظيم رب العرش الكريم ان يشفيه ويطيل بعمره
وبعدين
هل الصبي ابوي؟
لما لا يراعون برستيج ابوي كأب امام عيني
:)
.
.
.
خرجت وانا اجتر ذكرياتي في داخلي لهذا الشايب:
لعيد الذي كنت اراه فيه ،ملامحة الدقيقه،سماره الكويتي القديم،وسجارته المعلقه على طرف شفته،وصوته الجهوري الذي كان كفيل بجعلي ارتجف في مكاني،كل هذا ذهب ولم يبقى الا رجل نحيل يستلقي على سريرة يناظر الباب ينتظر من يزوره
زياره بسيطة،وابتسامه،ودعاء صادق ،وشويه سوالف اشيا بسيطة مقابل تلك السعاده التي كانت تشع من عينه ،اليوم خرجت منه انا سعيده،راضيه عن نفسي
في أحيان كثيرة تحتاج ان تتأمل بالتفاصيل الصغيره حولك
وأن تسعد بإٍسعاد من حولك سعاده يتسلل من خلالها كل النور والفرح لقلبك
.
.
الساعة الثانية وعشر دقائق:
ولم يبقى في البادية سوى حبتين رمان،وو جب علي ان اتعوذ من ابليس وانام، فغدا يوم جديدوانا بانتظار بعض الأخبار،وربما انتظاري لهذه الأخبار هو سبب قلقي هذه الليله،يارب يكون كل شئ مثل ما اريد واحسن
.
.
انتهت حبات الرمان
انتهت معها هذه التدوينة
وغدا يوم آخر
.
.
ولا ما انتهيت..
توي معك يا اجمل العمر ابتديت
.
.
.
صباح الرمان
والبدايات الجميلة


هناك 31 تعليقًا:

Enter-Q8 يقول...

الموضوع بصوب و الباديه بصوب
تصدقين و تأمنين بالله اني قعدت احوس ابي باديه اللحين
بس بحط فيها لبن المراعي اقص على عمري

حياتي هدف مو عبث يقول...

أحلى صباح لأحلى استكانه

كل كبار السن فرحتهم بمن يسولف معاهم ويذكرهم بشبابهم ومغامراتهم

يدتي تدلع علينا اتسوي نفسها مختنقة ولا رئتها اتعورها فأقولها اي اي من الزقاير فتعصب علي تقول انا ما اشرب زقاير بس يدك الله يرحمه كان يحب الزقاير وو وتشرح لي كل شيء وتستذكر ذكريات جميلة ومؤلمة لأنه هو توفى بالسرطان
وأنا عمري كان سنة وأنا أخر من صوّر معاه فتجمع الصور وحكايات جدي ومغامراته معاها والبسمة ما تفارق وجهها وهذا هو أفضل ما أستطيع أن أقدمه لها :)

ترى البوست عوّر قلبي لأني أحب الرجال الكبار بالسن وأشعر بالود اتجاههم حتى لو ما أعرفهم

الله يشفيه ويشافي جميع المرضى

وبالعافية على العصير والرمان
:)

4H يقول...

يزاج الله خير على سماحة نفسج يوم قعدت تنظفينه

موقف جعلني أعلق رغم مروري الدائم

ikhalifa مخاوي الذيب يقول...

دربج خظر يا بنت العم :)

Sweet Revenge يقول...

يا حلو سوالفج يا استكانه
ادعي بطول العمر للوالدك وعمة
وفعلا هالزياراة البسيطة تسعد قلوبهم وتفرحهم وعساه في ميزان حسناتج
بس الله يهداج شوقتينا علي الجوافة بالرمان ;)
بداية اسبوع سعيدة ولو انه دوام بس بعد العيد كلش موووو شي
للحين محد مداوم بس انا
:(

violinist_q8 يقول...

اسال الله العظيم رب العرش العظيم ان يشفيه ، الكبار بالعمر دايما مايعاندون المرض . باذن الله زيارتج اليايه له تكون عنده بالبيت

نون النساء يقول...

وايد أحب الشياب
واستمتع جداً بالحديث معاهم خصوصاً
لما يبدون يسردون ذكرياتهم

واللي تعتبر بالنسبة لي مغامرات وأكشن

بس العيايز لأ
ليش مادري
:/

يمكن لأن النماين اللي مرو علي فيهم عوابه زايده
هههههههههههههههههههه




الله يشفيه ان شاء الله ويلبسه تاج العافيه
مأجور ان شاء الله



ناوليني الباديه مالتج
موووو متسحره البارح

جبريت(عنيف سابقاً) يقول...

كالعاده بوستات جميله وتخفف على الواحد عوار الراس

ذكرتيني بيدي الله يرحمه

وخالي الله يطول بعمره

وخالي الثاني الله يطول بعمره بعد

وعمي الكبير عميد العايله الله يشافيه ويعافيه ويطول بعمره

استانس لما اسمع منهم سوالفهم عن الكويت بسيطة الدخل والعيشه المره الي عاشوها لأجل كرامات البشر الجاحدين لدورهم الفعلي ببناء الدوله الحديثه ذات الدخل العالي

كل التجاعيد والشيب الي بروسهم صار لأجل جيل البعض منه تافه نعيشه حاليا

ARTFUL يقول...

عسى الله يقومه بالسلامه

الشايب على فصلات

عسى الله يحفظه

اي والله روحيله فقير ما يشوف غير هالشياب واحد بموت وواحد قرب يموت خل يشوف شي يرد روحه

حلوه الحجاره المنتقاه

وبيني وبينج تراهي زينه

;p

ودي احلف اني اعرفج لوما انج محاميه

;p

الا طلع الوالد صبي هااا مبروك سلمي عليه وقوليلي مبروك على الرتبه اليديده

;p

تصدقين ما احب الجوافه بس احب الرمان

واحبه اكثر لما اشوف بنيتي اتل حبة الرمان من ايدي علشان تحطها بحلجها

قبل فترة كنت آخذ الحبه وابطها بحلجا علشان اتلذذ بقطرات العصير

لما فهموني ان بنيت اكبرت وعادي تحط الحبه بكبرها بحلجها

;p

اقول لا تصدقين انتي باي صف يعني صج

الشايب يقول حق ابوج صبي شتبين يقول عنج؟!؟!

-----------------
ولا ما انتهيت..توي معك يا اجمل العمر ابتديت

هذا الشعر او النثر او الاغنيه دايما تذكرني فيج

واستانس فيها تعطيني روح الامل والحيوية

:)

SHOOSH يقول...

الله يشافيه و يطول بعمره يارب

أكره مستشفى مكي جمعه

لي ذكريات فيه حدها كئيبه

:**

shakshaka يقول...

صباحك سكر استكانتنا :)

ياحلو الشياب صاجه كله معجعجيييين بييدنا الله يشافي يارب

star يقول...

صباح الخير

قاعده أحمص توست واحترق و أناأقرى البوست

لأنج ذكرتيني بخالي حبيبي الله يرحمه و يغمد روحه الجنة كان بنفس الوصف الي ذكرتيه لما أزوره بالمستشفى قبل وفاته بس الفرق أنه يبين شايب و أهوه صغير بالعمر وخالي ما توفى من المرض الشين لأ بسبب السجاير تلفت رئته وسكرت شرايينه وظلت هالسجاير الخايسه معاه لغاية وفاته


الله يلطف بشايبكم ويرحم خالي ويجعل مثواه الجنه

آمييين

t.q8 يقول...

استكانه بجيتيني

والله مادري ليش دمعت عيني لما طلب منج انج تزورينه


لاتقطعينه زوريه

jory يقول...

عليج بالعافية :)

maha يقول...

قروضات


شاي منعنع


حبات رمان

توليفة حلوه آخر روآاان

يساويها في الحلاوة وصلج بآخر عرووق أهلج ( عبارة الوالدة لما نستفزها بأهلها)

عسى مايشغل بال الإستكانة إلا الأمور الطيبة

الـسـنـبـلـة يقول...

رمان و جوافة ...
combination غريب

بس عليج بالعافية أنا احب التفنتق بالأكل :P

اندمجت وايد بالموقف تذكرت يدي الله يرحمه

الله يقوم العم بالسلامة

دمتم

إيلاف يقول...

: ) أظنها كانت تجربة جميلة ..
أغبطكِ عليها ,

وأنا أقرأ , ارتسمت بداخلي مشاعر كثيرة , منها التعاطف , ومنها الفرح
: )

جميل أن نرسم ابتسامة على شفةٍ أعياها التعب , وسرقت منها الأيام نضارتها

.,,.Sweet Sense.,,. يقول...

اول شي ربي يشفي هالشايب ويقوم بالسلامة ويلبسه لباااس العافية
ويطول ربي في عمره ومأجور ان شاء الله
,,
فعن أبي هريرة رضي الله عنه قال : قال رسول الله صلى الله عليه وسلم: ( من عاد مريضاً ، أو زار أخاً له في الله ناداه منادٍ أن طبت وطاب ممشاك ، وتبوأت من الجنة منزلاً ) .
مأجورة ان شاء الله ياستكانه
وربي يسعد قلبك مثل ما اسعدتي هالشايب بزيارتك وشوفتك
؛؛

اما موضوع عصير الجوافه بحبات الرمان هذا جديد .. ولازم اجربه
وبالعافية عليك
:]
دمتي مبدعه

سلة ميوّه يقول...

أول شي: صباح التدوينات الحلوة والكلام العسل....

ثاني شي: ابتسامه طولها متر كانت على ويهي وانا اقرا البوست :)
ثالث شي:

على سؤال واحد بجاوبج....
إذا كان وجودج يفرح وإلا لأ
....إذا وجودج بين أسطر بوست يرسم ألف ابتسامه على ويوهنا...
شلون وجودج الحقيقي بين ناس تحبينهم؟؟؟؟

الله يحفظج لشبابج ويرزقج كل ماتتمنينى واكثر
ويخليج لكل من يحبج ويخلي كل اللي تحبينهم:)

والله يشافي العم الشايب و يبارك له بعمره ويرحمنا برحمته اجمعين



حبي

ChEMiCaL-ENG يقول...

السلام عليكم

الله يشفيه و يعافيه و المرض كفارة ذنوب بإذن الله

بر الوالدين يكون ببر أقاربهم و أصدقائهم و السؤال عنهم فالله يجزاك خير خاصة و أنج أدخلتي السرور إلى قلبه


أما سالفة صبي هذي تذكرني بسوالف الشياب

يقعد الواحد فيهم يتكلم و يقول يوم أني ورع قد فلان

و يأشر على واحد بآخر العشرينات متزوج و عنه عيال

عادي يكسر فيه و الشباب يقزرون عليه الأسبوع

حي الله الورع، تبي عصير بفك قول لا تخاف

الشياب بركة البيوت الله يعافيهم لنا

dm3t _almghor يقول...

الله يشافيه ويعافيه يارب ويعطيه الصحة والعافية اللهم آمين

زيارة المريض واجبة فشلون لم يكون لها اثر حلو وراحة نفسية للمريض بالعكس الشعور الحلو اللي عطيتي اياه يعطيج دافع انج تستمرين بزيارته وتشوفين الضحكة وراحة البال وانتي لج دور فيها :)

الله يا استكانه اذا انتي قادرة على اسعادنا وماخذه القلب واحنا بعاد شلون اللي عايش يمج اكيد يابخته
الله يوفقج حق فعل الخير يارب ويسهل دربج

الخيلاء يقول...

الله يشفيه و يخليه

ذكرني بعمي :"( الله يرحمه

شنو سر تعلقهم بالسقاير

Nikon 8 يقول...

إذا العم الشايب من جيل زيد الحرب
عيل قربنا من بعض
لأن خال الوالده كان من ربعه ويقصدون على بعض أشعار
:)
من وين رياييل الأول يخافون من الموت وهم قزروا حياتهم في مواجهة مع الموت لأجل لقمة عيشهم
وكلمة بحار أو غواص شوية عليهم
المفروض نسميهم سباع البحر
الله يخفف على العم الشايب آلامه ويشافيه ويآجره

ميمة السبيت يقول...

** أنا رمان و رووووب بس مو بالبادية لووول

- الله يخليلكم الوالد و يديمه على راسكم اهو شمعة و نور البيت وزيارة المريض واجبة و وصى عليها الرسول " عليه الصلاة و السلام "

الله يجازيج خير و يطمن قلبج و ينومج باجر من الساعة 9 بدون ولا فكرة

** ليش الرياييل أول مايحطون راسهم عالمخدة ينامووون على طووول و احنه نتقلب 6000 مرة و و مايحلى التفكير إلا حزة النوم ؟؟؟

aisha يقول...

يحليلهم الشياب يهبلون ياحلوهم وياحلو سوالفهم والله استكانه ذكرتيني بيدي الله يرحمه يحب اني اسولف معاه وكله يسولفلي عن زمن اول وعن ايام الغوص احس من سوالفه ان قبل اهل الديره كانو ايد وحده وقلوبهم على بعض نادر ماتلقين في حقد وحسد بس ماقول الا الله يرحم ايامهم وايامنا والجيل اللي بعده

ويزاج الله خير ويعطيج العافيه على اللي سويتيه صج انا شي بسيط بس بالنسبه لعم ابوج شي كبير كافي انج فتحتي قلبج له الله يخليهم لكم ويشافيه يارب

aisha يقول...

يحليلهم الشياب يهبلون ياحلوهم وياحلو سوالفهم والله استكانه ذكرتيني بيدي الله يرحمه يحب اني اسولف معاه وكله يسولفلي عن زمن اول وعن ايام الغوص احس من سوالفه ان قبل اهل الديره كانو ايد وحده وقلوبهم على بعض نادر ماتلقين في حقد وحسد بس ماقول الا الله يرحم ايامهم وايامنا والجيل اللي بعده

ويزاج الله خير ويعطيج العافيه على اللي سويتيه صج انا شي بسيط بس بالنسبه لعم ابوج شي كبير كافي انج فتحتي قلبج له الله يخليهم لكم ويشافيه يارب

Angel Orchid يقول...

بوست مو طبيعي
وانا اقرأ تمنيت ان لا تنتهي الكلمات
ماعندي مانع اقعد اقرأ كتاباتج طووول اليوم

ننطر جديدج :)

why me يقول...

علشان جذي زيارة المريض فيها أجر



الله يشافيه ويعافيه ويطول بعمره يارب

Hope يقول...

مساء الخير

والله زين سويتي
مساكين هالشياب شيبون من الدنيا غير يسمعون كلمه حلوه
و يحسون ان الناس مهتمين فيهم

و بالذات لما يكون مريض و احد يزوره
ما تصدقين شكثر بيفرح و يستانس

والله يا حلو سوالفهم الشياب .. يونسون
سوالفهم ما تنمل
احلى شي لما يعلقون على سالفه وحده و يعيدونها مليون مره لما تحفظينها لووول

الله يشافيه و يعافيه يا رب و يزاج الله الف خير على اللي سويتيه .. في ميزان حسانتج ان شاء الله

فراوله يقول...

صباح الورد والجوري
غاليتي الحبيبه
هالنوع من الزيارات لهؤلاء الناس
فيها من الاجر الكبير
والذكريات الجميلة التي تتم عالقه بمخيلتنا
الا ماله نهايه
:)
اللهم شافيه وعافيه
وجزاك الله مليون خير
:**

esTeKaNa يقول...

شكرا لكل كلمة كتبت في البوست
العاده ارد على كل تعليق على رواق
المشكلة:
هاليومين مشغوله اكثر من اللازم فلا اجد وقت للرد على الجميع
أنا اسفة جدا
والى ان نجد الوقت المناسب
عسى ربي يحفظكم جميعا
:)