الخميس، سبتمبر 17، 2009

كاني

شرود

نوم النهار لا يعوض نوم الليل
والانسان قادر على الاحتفاظ بقواه العقليه ثلاثة ايام بدون نوم ،وبدخول رابع يوم مواصل دون نوم يبدأ يفقد تركيزه وقواه العقليه
.هذا هو يومي الرابع دون نوم وكنت فعليا افكر هل
ستتفاعل حالة الشرود التي اعاني منها مع الأرق وافقد قواي العقليه وتركيزي؟
لا داعي لأن افكر كثيرا،نظرة على وجهي الدايخ وخطوتي الفاهيه لأكتشف اني اعيش حالة شرود
!!
.
.
.
كنت قد عطيت الوالده خبر البارحة بأني اليوم ساستئذن من الدوام لقضاء كم مشوار ومن ثم ارجع للبيت مرة واحده فلتتوقع تأخري،ولكن لظرف ما لم اخرج من العمل حتى نهاية الدوام،فبدل من ان اخرج الساعه العاشره صباحا لم اتمكن من الخروج حتى الواحده والنصف،وقضيت لي كم مشوار هنا وهناك حتى اذن العصر،فصليت ومن ثم فكرت :
أشعر بأني احتاج شئ جديد
فما الذي احتاجه في حياتي في هذه اللحظة؟
احتاج شئ جديد ومختلف قادر على انعاش هذه اللحظة وجعلي سعيده
شسوي
؟
قررت ان اسهل شئ مختلف ان اتغير انا شكليا،فاتصلت على صديقتي التونسيه العامله في الصالون لأقول لها اني احتاج ان اقص شعري واغير به قليلا، وكان لي ما أريد،دقائق وكنت في الصالون المزدحم انتظر دوري،وتمارس علي العاملات تسويقهن الناجح:
شو رأيك تصبغي شعراتك؟
بدك منكير وبيديكر؟

واتسمت وتلك تعمل لي شعراتي ،والأخرى تدلك يدي،وانا بعالم آخر مع تلك البنت الجالسه بجانبي تسولف سالفه تلو الأخرى رغم انها لا تعرفني،
اليوم ايقنت ان هناك شئ ما في وجهي يجعل كل الناس تسولف معي ،الى جانب اني اشتط واسولف،وهذا شئ غير صحي،
انا امشي واسولف مع الناس بالمستوصف...بصالون...بالعمل وفي كل مكان ،واستمتع بالاستماع للغرباء ميقنه انك بهذه الحوارات تعرف ثقافات العقول حولك ،هذا شئ جميل ولكن مو زين يهدوني اهلي كثيرا بروحي
:P
.
.
.
الوقت يمضي وانا مابين مسجات وتليفون وفلبينيه تسولف لي عن زوجها المصري كيف تزوجته وهو عامل في كنتاكي وقصه حبهم العظيمه،والبنت بجانبي تسولف لي عملها،وانا بدأت ادوخ وافقد تركيزي
الساعه الخامسة والنصف تقريبا او السادسه الا ربع :
خرجت من الصالون متجهه للبيت ،كل دقيقتين اناظر اصابع يدي واتحسف امسك السكان،وكل شوي الف شيلتي بشكل جيد واتخيل وجه امي حين تراني،واتسائل عن ماذا يمكن ان يقول اخي عن شكلي الجديد وهو صريح دائما وجرئ؟
وصلت المنطقه وااذا بدورية تترك لسيارتي وتؤشر لي،اتلفف واحكم حجابي واتحطلم:
قمة قلة الأدب ،قبل المغرب في نهار رمضان يشير لي بالوقوف؟
يسرع بجانبي،فالف وجهي وافكر:
هل يعتقد اني ياهل سأخاف من لباسه ؟ انا اقدر ارفع قضية استغلال وظيفه عامه؟

احقره وامشي متجهه للبيت ،وعند بدايه الفريج انظر لسياره اخي واقفه واخي على وشك الخروج فأشير له من بعيد بيدي فيطق ذاك البريك العجيب وينزل بوسط الشارع والشرر يتطاير من عينيه:
انتي ويييييييييييييييييييينج؟
شايفه جم الساعه؟
تدرين من الساعه جم انتي طالعه؟
من الثمان الصبح للحين مع اذان المغرب
!!
قبل ان اجيبه يتلفت للدورية ويكلمهم ويتشكر منهم وانا في حالة انبهار،اركن سيارتي ادخل البيت مع اذان المغرب،واذا بأمي:
ذايبة في وسط الصاله دموع....قلاصات ماء...اختي تغسل وجهها...والخدامه تركض وتلمني..افتح الباب فتتحب امي ا:
انتي وينج؟
وبكل برود:
انا كاااااااااااااااااااني
:)
فتسجد امي شكر على الأرض وتكمل بكاءها:
الحمدلله ربي ما يقصر
ربي ما يقصر
!!
.
.
.

هاو اشفيكم؟
اكتشفت ان امي تتصل علي من الساعه الرابعه عصرا حيث انها تتحرا دخولي على الساعه الثانيه على الكثير،واثناء اتصالاتها انتهى شحن التليفون وسكر
السيناريو الأول ان التليفون مافيه شحن،مع مرور الوقت تحول السيناريو ان تليفوني مبيوق،مع الساعه الخامسه امي قررت ان قد اختطفت،ثم السيناريو الأخير....اكيد حادث ولا نعلم اين البنت
ابوي كان السيناريو عنده مختلف،اني لا انام ولم اكل بشكل جيد اكيد دخت وطحت في مكان
امي قررت الاتصال بأرقام الصالونات،صديقاتي،والدوام
اخي بلغ الدوريات والمستشقيات
ابوي الساعه السادسه الا ربع قرر ياخذ السياره ويذهب لموقع عملي قد اكون هناك

كل هذه السيناريوهات،وانا في الصالون متشرقده على ذاك الكرسي،رجلي منقوعه بالماء،واصابعي بين يدي تلك الفلبينيه وشعراتي عند التونسيه تقصص وتسوي،وناسيه حتى رفع الهاتف على اسرتي لأقول لهم اني قضيت كم مشوار واني قد اتأخر
!!
.
.
.
اعلم اني بدعت بأني ناسيه نفسي والهاتف وطالعه من البيت الساعه الثامنه صباحا وراجعه الساعه سادسه مساء ،ولكن هل من الطبيعي ان يحصل كل هذا بأمي؟
اشعر بتأنيب الضمير،انتظر ان تهدأ،اجلس بجانبها على الفطور،اضع لها من كل شئ،وهي صاده عني،اقولها يمه تقولي وصمه
!
فأقمت ضحكتي
عندما تغضب امي ويكون الوضع شاد ،تساورني حالة ضحك،،وهذا امر اعرفه بنفسي حتى بالعمل،عندما يصرخ الجميع ويكون الوضع متوتر لآخر درجة ...لا اعرف لما اشعر بأني اريد ان اضحك
اليوم كل ما ناظرت وجه ابي القلق وسمعت ردود اخي على اصدقائه في العمليات والدوريات اشعر بأن الأمر كان بالنسبه لهم مرعب ،واشعر بانحراج اخوتي حين يسئلونهم:
وين لقيتوها؟
متى ردت؟
شصار؟
فيتمتم اخي:
مممم ماقصرت ماقصرت
لا كاهي والله لا الحمدلله
:)
بعد الفطور شعرت بأن الأوضاع هدأت،نزلت وابتسمت بوجه امي :
ها يمه شرايج بالنيو لوك؟
شيفه
!
التفت لأخواني:
ها شرايكم بالنيولوك ؟
فيرفع لي احدهم حاجبه:
استكانة كل اللي صاير فينا وانتي بكل برود شرايكم؟
انتي المفروض حتى تستحين تنزلين من دارج يا الهوية
!!
....
نفسيتي تعبانه:
امي تقول لي شيفه،اخوي يقول لي هويه،وعندما سئلت جدتي عن معنى هوية قالت هي حاله اشد من الخداي المعروف
.
.
ختاما:
نعم شعرت بتأنيب الضمير ولمت نفسي لأني صاكه جهازي من الظهر وناسيتهم،ولكن من ناحية أخرى اكتشفت حبهم الشديد وخوفهم علي،وعندما صرحت بأني سعيده بحبهم لي قال لي ابي بكل بساطة:
وايد عليج اكتشافج
!
اعتقد ان علي ان احتفظ بمشاعري وماء وجهي،فكل جمله اليوم اقولها يكون الرد عليها جارح،عموما اكتب هذا البوست اعتذارا للحبيبه الغاليه حلوة اللبن امي التي تفطرت اليوم دولكه فيمتو من كثر ما نشف ريجها واعتذر لها اعتذار رسمي امام عيون الجميع عن كل ما فعلته في قلبها اليوم
:)
وأخيرا:
ماهي العبر المستفادة اليوم؟
أولا:
لا تواصل ثلاثة أيام وخذ قدرك الكافي من النوم وإلا ستبدأ تقط خيط وخيط
ثانيا:
لا تصرح عن مشاريعك بالإٍستئذان بوقت مبكر لأني ستكتشف ان زميلك سبقك واستئذن وتركك
ثالثا:
اي بنت سنعه ،لو تلف فوق تحت بالشارع تدق تطمن امها:
ترى لفيت فوق تحت لا تحاتين ما كملت سيده
رابعا:
ضع دائما معاك تليفون احتياطي او شحن سياره للحالات الصعبة
خامسا:
اختار الوقت المناسب لتسئل من حولك عن رأيهم بشئ يهمك مراعاة لمشاعرك من كلمه عرضيه قد تخرج منهم ردة فعل على موقف معين
هذا وبلله التوفيق
:)

هناك 67 تعليقًا:

ikhalifa (self-challange 1) يقول...

يبا اخذي بلاك بيري و كل خمس دقائق ديزي
send location

:P

نعيماً :)

7osen يقول...

تصدقين استكانة
والله بطيتي جببببدي

والله زين اخوج بس عصب وما عبر عن هذي العصبية بطريقة ثانية

الصراحة الصراحة
يعني هذا شي المفروض مايصير من استكانة ( السنعة ) ، شلون تسوين جذي ؟؟

يعني مافكرتي بالمسكينة أمج
ولا أبوج شبيصير فيهم وانتي من الصبح طالعة
ماطرى على بالج إن في ناس تحاتيج
يعني الصراحة
المفروض إنج تعاقبين على هالتصرف لأن هذي لامبالاة مستفزة
ولا طالعتلي من الصبح ورادة الساعة ست بدون لا تقولين حق أحد من اهلج
شنو هذا

لا وبعد تقولين لهم شرايكم بالنيو لوك

المفروض يومين بس تعتذرين عن هالتصرف اللا مبالي إللي غريبة يطلع من إستكانة

وثاني مرة نامي عدل علشان ماينعاد هالموقف

ikhalifa (self-challange 1) يقول...

و قمنا نلون بعد؟!!
:P

Sn3a يقول...

امبييه شسويتي يالغاليه فيهم
لووول ضحكتيني يغربل ابليسج

شله مواصل هالكثر
انا ان واصلت يومين وتلاقيني بعد الامتحان في سبات عميق مايقومني منه الا الحاجه للكافيين والقهوه

عيل انا مالي موعد معين ان طلعت عاادي البس واطلع اوصل اشاره وارد البيت لان ايني احساس اني ما راح استانس;p

لا وياتني فتره اقول حق امي خو ليش ماتدقون تسألون
مساكين قامو يدقون قمت اعصب


لاتعيدينها
بس اكيد النيو لوك حلو
صج ان شعري حتى واهو طويل مو حلو بس يختج اخاف اقصه بس لازم اقلدج
نعيما صج
;p

SHOOSH يقول...

بدعتي

Sarah / Arikashika يقول...

أستكانه
زيارتي الاولى لمدونتج
والله ضحكتيني
لانها صارت وايد معاي ومع اختي !
وقرت عين امج فيج!
والله يخليها لكم يارب ويطول بعمرها !
بس بصراحه ماقصرتي فيهم !
الله يعينهم والله يعينج على التعليقات ;p

تحياتي

ARTFUL يقول...

لنا رده

على جنون الانسان


;p

~ شَــهْـــرزاد ~ يقول...

والله يا استكانة عندنا وعندج خير

أنا ليلحين امي تحاتيني وانا متزوجة

ذاك اليوم نفس الحالة خلّص شحني
وكنت طالعه من الجامعه عندي جم مشوار
وطولت ..واهيا تدق تدق تدق وما من إجابة

دقت على زوجي وعفسته بدوامه
ودفت على رفيجاتي تسأل عني

وقعدت على نااااااااار

حطت ببالها ان صارت جريمة بشقتي الجديدة وأنا وحيدة

تخيلي
!!!

حلو ان الام تحاتي عيالها بس بالمعقول على أية حال انا اتكلم جذي بس بعدي ما جربت احساس الأمومة

أتوقع لي صرت أم ..أحس بشعورها
الله يخليها لي
:**

تحياتي لوالدتك الجميلة
:**

حسام بن ضرار يقول...

فعلاً طمئنة الاهل واجبه لأن المحاتاة تلعب دورها وايد

مع انني شاب في الثلاثين، دخلت الى بيتنا في احدى الليالي الشتاء المنصرم الساعه 1 لأجد البيت مقلوباً رأساً على عقب فقط لأن شحن موبايلي خلص من الساعه 10 مساءاً و انا معزوم بالوفره، و كانت محاتاة بأن السيارة انقلبت فيني

هذا و انا شاب

فكيف هو الحال بالنسبه للفتيات؟

ما ينلامون الاهل

و الله يخلي لج اهلج و يحفظهم

Manal يقول...

يا حلوج والله يا حلوج يا عسل
:)

الله حافظج بعينة الي ما تنام
تسلملي هالام يا بعد جبدي
:)

وبالنسبة للنوم
انا من رديت من الكويت لما الحين مو حاسة اني ماخذة كفايتي من النوم

الكل بالبيت مداوم الا انا يدقون علي نايمة لي الظهر
:)

Hope يقول...

صباح الورد ..

اوله اوله اوله
شلون نسيتي روحج جذي شلووووون ؟

O_o

لو انا اسوي جذي جان امي تذبحني
و تمصع رقبتي بعد
والله ما تنلام امج فيج
اللي سويتيه مو شويه
مسكينه كسرت خاطري
لا تعيدينها مره ثانيه

مـي يقول...

مريت بنفس الموقف ، مع اختلاف التفاصيل ، كان يوم صعب جدا ، أسأل الله أن يشرح صدورنا بطاعته ، ويرزقنا من فضله وكرمه ، ويشملنا برحمته في هذي الايام المباركة

Chaotic pOsha يقول...

يحليلج والله ضحكتيني استكانه خوش سالفه
وانتي الصاجة الام دايما تحاتي

لو رافعه تلفون الصالون وداقه على امج مو احسن

بس الحمدلله عالسلامه

QiYaDiYa يقول...

حراااام علييييج
ليش تخبصينهم جذي !!!

لو اسويها بابوي
يمكن ما تشوفيني على قيد الحياة عقبها ;p


بس المهم ان ما فيج شي ..
و مرة ثانية مو شرط تقولين كل صغيرة و كبيرة
بس اذا شفتي تلفونج مافيه شحن
دقي على امج قوليلها يماااااااااا
ترى تلفوني مافيه شحن و انا بالصالون لا تحاتووني !

و جذي لما تقولين يمه ما راح تقولج و صمة و يصير هالاكشن كله ;p


الحياة تجارب و انا اختج
و شكرا لمشاركتنا هذه التجربة ;p

Addictioneer يقول...

شي ضروري البنت تدق على اهلها
والحمدالله عالسلامة

لحظه يقول...

وااي لالالا مو صج أول شي نعيما القصة الحلوة ثانيا لو أنتي بنتي جاان زنطج وا عليه على أميمتج قلب الأم
وأنتي حدج كووول
أياك والعودة لمثل هالفعلة

وعيدج مبارك وتكبرين وتنسين..

reemas يقول...

وايد عليج اكتشافج
لووووووووووووول
ذبحتني هالجمله من الضحك
تحسين محترين منج
ههههه
مشكوره علي هالقصه استكانه
اللي ذكرتني ايام ما كنت اواصل ٢٨ ساعه في خفارات المستشفى
و عقبها يقولون ليش الدكتور ما يبتسم
انا حتى لو ابي ابتسم حزتها ماذكر شلون ابتسم

المهم حمدلله على السلامه من المغامره
و مبروك عليج النيولووك
و الله يخليكم حق بعض
ولا يحرمكم من محبتكم لبعض

:))))

سلة ميوّه يقول...

صبـــاحك نووووم:)

اول شي: تدرين فيج وايد مني :)
مادري من وين يايبه هالطبع يالله سترك..
ألا وهو حالة الضحك الي يتيج في اوقات غلط!
أذكر مره كنا انمر على المرضى وسألني الدكتور الكبيييير :) سؤال وانا فهيييت عطيته تأتأه من اهني لي الجهرا...والا يشخلني ..وللأسف بكل برودة دم وقلة ذوق يتني الضحكه
!!!!!

ثاني شي:استكااااانه من دروس اليوم تعلمت الكثييير:)
وثالثهم.:انتي عسل


حافظج ربي

jonoon 3aqel يقول...

ههههههههههههههههههههه

اضحك الله سنك..
الله يبارك لك في اهلك..و يبارك فيكي
و يجعل قلوبكم دوم مع بعض و صافيه تجاه بعض..

ذكرتيني بأخوي الصغير..
يوم هو ف صف أول..طلع مع ولد اخوي عقب المدرسة..و بدل ما يدشون البيت..راحوا بيت جيرانا يتغدون و يلعبون..يازعم "غداهم حلو"...و أمي و مرت أخوي طارت عقولهم..تموا ساعتين يحاتونهم و دواره في هالقوايل..
سبحان الله...مرت اخوي تقرر تطلع ف البلكونه...و إلا هذا هم يلعبون ف الحوش
خخخخخخخخخخخخخخخ
الله لا يرويك الضرب اللي كلوه...من وهم ينسحبون من بيت الجيران..ف الشارع..و انتهاءا في بيتنا الميمون
ههههههههههههههههههههههههههههههههههه
ههههههههههه

بسي فضايح :)

ادام الله عليكم الامن و الامان و راحة البال

تحياتي

chandal/danchal!! يقول...

نعيما على النيو لوك

:)

ام العبر من حطيتي العبر والهوية ضاربة العبارات عندج


بما انك انسانة رقيقة وما تحبين تنزفين... ما قلتي شالعجب امي ما دقت علي مع ان هذي طلعتي من الثمان الصبح وتشيكين على الموبايل كل ما تميتي؟

انا لو منها جان كمشت شعراتك اللي مستانسة عليهم وقنزعته اكثر من ماهو مقنزع وخليت اسم مدونتك "جميلة بو حريد او دياية تعدي"

:p

جبريت(عنيف سابقاً) يقول...

كاني اها ما قصرتي والله بكاني مالتج لوووول


بعدين ليش يحاتون البنت اكثر من الصبي ؟؟؟؟


انا ما يحاتوني يمكن ليش متعودين اني هايت منذ الصغر؟؟؟
يجوز


اهم ما بالسالفه انج تبين ترفعين قضيه على الشرطي استغلال وظيفه مادري مركز شي جذي واهو فقير مسكين يدور عليج

SHAHAD يقول...

لووووووووول
حدج بدعتي
ايام الجامعة
ابوي حاط لي موبايل بدرج السيارة مع خط احتياطا لووول
غير الموبايل اللي بيدي لوول
يبيلج تسوين هالحركة : ))

الله يخليلج اميمتج يااارب
ويطول بعمرهااا :*

alwasmi يقول...

نعيما جان قصيتي شعرج تواليت
اقتباس: واذا بأمي
ذايبة في وسط الصاله دموع....قلاصات ماء...اختي تغسل وجهها.
اكتب هذا البوست اعتذارا للحبيبه الغاليه حلوة اللبن امي التي تفطرت اليوم دولكه فيمتو من كثر ما نشف ريجها

كاااااك موقادر امسك نفسي من الضحك
البوست مضحك صراحه
بس زين رد الوالد فيج وايد عليج اكتشافج طالعه من معاليق القلب

الله يخليهم لج

مطعم باكه يقول...

اربعة ايام بدون نوم :) !!

انا مرة قعدت 24 ساعة متواصلة ..

وما اتذكر شنو صار بعدها هههههههههه

عموما الحمد لله على السلامة :)

لأن فعلا مو زين الإنسان يسوق واهو تعبان ..

واحد من الربع كان مواصل يوم واحد بس .. طلع من بيتهم وراح للمصبغه بالليل ..

يقول اتذكر اني طلعت من المصبغه وشغلت السيارة .. وبعدها ما اتذكر شي .. لقيناه مسوي حادث بعيد عن المصبغة بمسافة كبيرة :)

كان يسوق واهو نايم :)

الله ستر عليه

اعجبج ولا ما اعجبج يقول...

الحمدلله على سلامتج لقيت احد مثلي ينسا التلفون
انا اكثر واحد بالدنيا اكره هالاداة و احس انها تسبب الضيق و التلفونات اللي مالها داعي مرات تخرجنا من اسعد اوقاتنا
بـ صراحة الحياة بدون تلفون متعة
صج مرات ابوي يعصب علي و يقولي ليش ما ترد علي ( مع اني ما ارد على احد ولا ادري ان في احد اتصل فيني اساسا )
و اخيرا ً اقول الله يهدي اهلج عليج و يقولون رايهم بالنيو لوك :p
نعيما ً و عيدج مبارك :D

مَـــــعْــــمَــــعَـــــه يقول...

ما ابي اعلق تعليق قوي ويزيد من حالة تأنيب الضمير عندج .... بس في خوش مثل يقول اللي ايده بالماي مو مثل اللي ايده بالنار ... والله يخليلج اهلج ان شاء الله ويحفظهم

النقطتين الثالثة والرابعة المفروض ما يطوفونج لانهم من البديهيات

-mate يقول...

مو قبول
:P

ونعيماً
:D

!!

|:| DUBAI |:| يقول...

استكانة

سرطت اللبانة اللي في حلجي
من الغصة .. زين ما لفوج راشددددي

خخخخخخخ

بس يقبرني النيو لوك

;)

Common_Sense يقول...

Common Sense is not so Common ;p

ريانة العود يقول...

الحمدلله ع السلامة يا قااااي من السفر ..

ماتنلام الوالده تخاف ولا الاهل ..
بالعكس افرحي ولا تتضايقين ..
بدون هالموقف شلون كنتي بتعرفين انهم يحبوونج هاااالكثر :)


بس صج صج صج حرام عليج اللي سويتيه بالوالده :/
حبيبتي اكره هالشعور..
لي تحريت احد وتأخر :"(


مرة ثاانية اشحني موبايلج قبل الطلعه :)

استكاانه ..
زياارتي ليست الاولى
ولكن قلمج يستفزني للرد ..

من المتاابعين ان شاء الله :)

الزين يقول...

استكانه

تدرين انا لو مكان امج شنو بسوي صح

:@


حرام عليج

نهنهتي قلبها

dm3t _almghor يقول...

حبيبتي استكانة قاعدة اقرا ومت من الضحك وموم صج
!!!!

ما فكرتي ولو للحظة وحدة ان امج ليش
مادقت عليج تسأل عنج او ابوج
لمسكينة مايسوى عليها خرعتها ما ألومها حطي بالج مرة ثانية الله يحفظج من كل شر

بالعافية عليج النيولوك

:))))))))

بخور السوق يقول...

والله عسل عسل سوالفج موتيني من الضحك من صجج تخلين التلفون مسكر وهالحزه بعد؟؟؟؟؟؟

مالوم الوالده بعد عمري تحاتيج عسى الله لا يروعها عليج ولا يخليج منها واللي موتني من الضحك كالعاده الوالد الله يحفظه (وايد عليج اكتشافج) لووووووووووووووووووووووول اي والله واايد عليج احنا بحاله وصياح وشرطه وانتي مكتشفه الحب لووووووول



وصلت السالفة مخافر ودوريات والمره تعجل بالصالون هههههههه



وكلمة هويه هاذي من كثر ماهي مندقققه منج هههههههههه


اما الفوائد عجيبه واهمها استئذان الدوام ماكو انحس من زميلات الدوام الموقرات .....



كل عام وانتي بخير استكانه وتقبل الله طاعتكم جميعا عسى الله يجعلنا واياكم من الفايزين برضاه

xname يقول...

lOOl
تدرين لو امي تقرا بوستج جان تقول عشان جذيه البنت مالازم تطلع بروحها :p بس أشوا ماتدري عن درب البلوقز


على قصه الشعر صارلي شهرين أفكر
يمكن أقصه وياج XD

candle يقول...

واااي لأ لأ استكانه بنخسر بعض على هالبوست .. صج مت ضحك بس لو انا مكانهم كلش ما اكتفي بردود الأفعال اللي صارت انتي متأكده ماكو تشفير على اللي سووه فيج اهلج لأني بصراحه حسيتهم عايله مثاليه وبنظلج ترا .. عموما الحمدلله على السلامه وهذا درس ان شاءالله مايتكرر :)))
وعاد يللا نبي بوست عيديه من اللي قلبي يحبهم

EngineRaa يقول...

صبحك الله بالخير اخيتي استكانه الغاليه ،،،، اولا باقولك نعيما شنو ما سويتي الحلو حلو معنى انا ما شفتج بس انا شفت روحج بكتاباتج.وهذا مو شويه
اما سالفتج مع اهلج عادي جدا جدا انهم ايسوون جذيه لان الامهات بالذات ايعزوون المحاتات مثل الزاد .بس بيني وبينج ما الومهم انت بنت فهذا حالنا بالديره احاتون البنيه .وعلشان اتعرفين ان الامهات كلهم جذيه احنا الحين متزوجات وكل وحده عندها ريل مسئول عنها اتخبره بكل شي خلينا بس انقول حق الوالده بمر هالساعه الفلانية ونتاخر عليها 10 دقايق ما توصلين بيت الاهل الا كل خواتج واخوانج متصلين وينج اشفيج
تاخرتي امي تحاتي

انا في مره بايام الجامعه اول سنه بعد التحرير كان عندنا مشروع مادة من مواد الهندسة و المشروع مشترك بين عدة طلبه فلازم نقعد بالكلية انكمل المشروع وموعدتسليمه مابقي عليه شي فكنا نتاخر ليه بعد الثمان بالليل وفي اخر يوم اخذنا الوقت وعدت الساعه عشر ليلا وانا مبلغه الوالده اني راح اتاخر وطبعا ذاك الوقت ما كان فيه موبيلات مثل الحين الا ما ندر كان( انطلق واحد... انطلق اربعه) جان تذكرون المهم ما طلعت من باب الكلية الا واهيا واقفة بالسيارة مع اختي وتنطرنا نطلع انا شفتها وكان معاي زميلتي وزميلى حسيت باحراج وكان ودي تنشق الارض وتبلعني بس لما سمعتها واهي اتكلم عذرتها من الافكار الي مرت ببالها وخصوصا تونا طالعين من غزو .فطولي بالج وراضيها

فــــــرنـــــــاس يقول...

كل عام وأنت بخير

فرناس

t.q8 يقول...

عيدج مبارك وتقبل الله طاعتج

بنت الشامية يقول...

عيدج مبارك وتقبل الله طاعتج وعساج

تعودينه إن شاء الله بصحة وعافيه

ولهت عليكم

Sweet Revenge يقول...

لا استكانه كلش مو خوش سالفة
الحمد لله عدت علي خير
ممبروك علي القصة اليديدة ما ادري ليش اتخيلتها نفس قصة فكتوريا بيكهام
;)
وكل عام وانت بخير وعساكم من العايدين والفايزين
يارب :)

عثماني يقول...

عيـدك مبـارك

وتقبـل الله طاعتكم

وكـل عـام وأنت بخيـر

:)

esTeKaNa يقول...

بن علي
~~~~~~~
خوش فكرة طافتني
:P





7osen
~~~~~~~~
اسفه اسفه حسين
اول مرة اقرا لك تعليق عندي معصب
:))
ميخالف لكل سنعه كبوة
على وزن لكل حصان كبوة
:P

esTeKaNa يقول...

Sn3a
~~~~~~~
اهلا اهلا بصديقتي السنعه
عيدج مبارك
:)
انا عجبه :
ان دقو قلت بسكم حنه
واذا ما دقو سويت فلم انتو ما تسئلون عني
:P
خليني اقولج سر:
انا اخاف على شعري
قلبي يعورني اذا قصيته

بس هاليومين صايره متهورة اقص واصبغه بعد،التغير يونس
:P

esTeKaNa يقول...

Sn3a
~~~~~~~
اهلا اهلا بصديقتي السنعه
عيدج مبارك
:)
انا عجبه :
ان دقو قلت بسكم حنه
واذا ما دقو سويت فلم انتو ما تسئلون عني
:P
خليني اقولج سر:
انا اخاف على شعري
قلبي يعورني اذا قصيته

بس هاليومين صايره متهورة اقص واصبغه بعد،التغير يونس
:P

esTeKaNa يقول...

shoosh
~~~~~~~~
حدي
:P





Sarah / Arikashika
ّ~~~~~~~~~~~~~~~~~~~~~~~
ياهلا ويا مرحبا
حياج الله الساعه المباركة نورتي المدونة
وتصدقين
جنه التعليقات زفوني اكثر من اهلي
:P

esTeKaNa يقول...

ARTFUL
~~~~~~~
حياك الله
:)





شَــهْـــرزاد
~~~~~~~~~~~~~~~~
ياهلا ويا مرحبا بشهرزاد الجميلة
نورتي المكان
:)
الظاهر امج تصير حق امي؟
:P
الله يحفظهم ويطول بعمرهم
عاد تصدقين انا كل شي انتقدته بأمي اشوف روحي لا شعوريا اسويه
فصدقيني يوم من الايام بنتج بتكتب بوست امي شهرزاد شمسويه فيها بالمحاتاه
:P

عيدج مبارك
نورتي البلوق
:)

esTeKaNa يقول...

حسام بن ضرار
~~~~~~~~~~~~~~~
ياهلا ويا مرحبا بحسام
شوف المحاتاه وهذا انت ريال الله يحفظك
!!
ما ينلامون
عسى ربي لا يخلينا منهم ويحفظ لك كل غالي وغيدك مبارك
:)









Manal
~~~~~~~~~
ياهلا ويا مرحبا
حلت دنياج واااي الله يجبر بخاطرج انا من عقب هالسالفه ماحد قالي يا حلاتج
:P
خلاص الحين راح رمضان وتتعدل النومه
عسى ربي يعوده علينا وتقبل الله طاعتج
:)

esTeKaNa يقول...

Hope
~~~~~~
احم احم
جني انزفيت مرة ثانيه
:P
اي والله ما تنلام
انا لي اليوم وانا ااحاول اصلح موقفي
:P
عيدج مبارك يا صديقتي

esTeKaNa يقول...

مي
~~~~
اللهم امين
وعيدج مبارك
:)







Chaotic pOsha
~~~~~~~~~~~~~~~~
عسى الضحكة ما تفارقج
:)
الله يسلمج وعيدج مبارك










QiYaDiYa
ّّ~~~~~~~~~~~~~
أنا اعتقد انهم كانو بيسون فيني وأد البنات
:P
شكرا على النصايح الثمينه
وفعلا الحياة تجارب
:)
حبي لي نجمه ولهانه عليها وايد
وخليها تحبج لي
وعيدكم انتي وياها مبارك
:)

esTeKaNa يقول...

Addictioneer
~~~~~~~~~~~~~~~~~
صحيح
الله يسلمك
:)








لحظه
~~~~~~~
loooool
واي ضحكتني كلمه وإياك
:P
لا بس بس
توبه من دي النوبه ما اعودها
:)
ايامج سعيده يا اجمل لحظة

esTeKaNa يقول...

reemas
~~~~~~~~~
لو شايف ابوي وهو يقولها
كان معصب من صجة حسيته بينتفني
:P
الله يعينك دكتور
صج الانسان من التعب مستحيل يقدر يتحكم بكل تصرفاته وردات فعله
الله يعطيك العافيه يارب
وعيدك مبارك وتقبل الله طاعتك
:)

esTeKaNa يقول...

سلة ميوّه
~~~~~~~~~~~~
يا صباح العسل
والضحكة
وخف الطينة
:)
اصلا منو يحصل ناس مثلنا؟
بعز العصبيه نبتسم
الله يحفظنا قولي امين
:))
حيالله دكتورتنا وعيدج مبارك يارب

esTeKaNa يقول...

jonoon 3aqel
~~~~~~~~~~~~~~~~~
ياهلا ويا مرحبا
انا ضحكتك؟
انت اللي موتني من الضحك على سالفتكم
يا زينه الله يحفظه ويبلغكم فيه رايح مستانس وناسيكم
:P
عيدك مبارك وتقبل الله طاعتك

esTeKaNa يقول...

chandal/danchal!!
~~~~~~~~~~~~~~~~~~~~~
looooooooool
قريت تعليقج حق امي
قالت يا حلوها
هذي اللي تبرد القلب تخيلي
:P
ما سوت علي هالشعرات
كل ما طليت على امي قالت لي شيفه
انزين وبعدين؟
باجر عيد اشلون اواجه المجتمع وامي كل يوم تقولي شيفه
يمكن اتعقد
:P
عيدج مبارك يا الغاليه

esTeKaNa يقول...

جبريت(عنيف سابقاً
~~~~~~~~~~~~~~~~~
أنا صايرة شريرة
على طول برفع قضيه على الريال
:P
عيدك مبارك
وسلامي الخاص للوالده العزيزة








SHAHAD
~~~~~~~~~~
خوش حركة الله يحفظج ويحفظ لج اهلج
:)
عيدج مبارك








alwasmi
~~~~~~~~~~~
قول امين
عسى ربي يدوم ضحكتك وفرحتك وعيدك مبارك
:)








مطعم باكة
~~~~~~~~~~~~~
فعلا المواصل شي متعب يفقدك التركيز
الحين خلص رمضان من غير شر ونرد نسنع النومه
:)
عيدك مبارك
تحياتي لاسرتك الجميلة

esTeKaNa يقول...

أعجبج ولا ما أعجبج
~~~~~~~~~~~~~~~~~~~
التليفون في احيان كثيرة يكون شي مزعج للغاية
:P
ايامك سعيده وحياك الله








معمعه
~~~~~~~~~
شكرا لتقدير مشاعري
صار لي يومين كل من يزفني
:P
عسى ربي يحفظ لك كل من تحب
:)

esTeKaNa يقول...

mate
~~~~~~
ينعم بحالك
:)
وعيدك مبارك








|:| DUBAI
~~~~~~~~~~~~~~~~~~
وي اسم الله عليج الرحمن الرحيم
:P
زين ما سو لي وأد البنات
الله حفظني
:P

esTeKaNa يقول...

Common_Sense
~~~~~~~~~~~~~~~~
hehehehe:))
عيدك مبارك









ريانة العود
~~~~~~~~~~~~~~
زيارتك تنور البلوق كله
حياج الله نورتي المكان
وعيدج مبارك
:)

esTeKaNa يقول...

الزين
~~~~~~~
يا صباح العيد الجميل
:)
اي حبيبتي ادري ادري
واي خفت منكم
:P








dm3t _almghor
~~~~~~~~~~~~~~~~~~
يا عسى الضحكة ما تفارقج
صج صج انا بدعت وحاسه وضميري مأنبني
يختج صاير قلبي كلش بارد مادري اشفيني
:P

esTeKaNa يقول...

بخور السوق
~~~~~~~~~~~~
ياهلا ويا مرحبا ببخور السوق والزين كله
:))
انتي ما شفتي ويهي وانا اقول الاكتشاف
اهم مشتطين وانا اتنهد من قلب
واتعبر
واقولهم واااااي انتو صج تحبوني
تصدقين؟
زين ما صار وأد البنات
من ذاك اليوم كل ما اسئل امي اشلون شكلي تقولي شيفه تخيلي
مادري اشلون بقدر اواجه المجتمع باجر عيد اخاف اتعقد
:P

حبيبتي انتي
عيدج مبارك وتقبل الله طاعتج
عسى ربي يحفظج ويسعدج مثل ما كل تعليق منج يسعد قليبي
:)

esTeKaNa يقول...

xname
~~~~~~~
ما انصح اي ام تقرا هالبوست
راح تكرهني
lol
يالله قصي شعرج
عيد عيد
:P
عيدج مبارك

esTeKaNa يقول...

candle
~~~~~~~~~~
لا وي نخسر بعض؟
عيل ماكو الا اشيل هالبوست من عرجة
:P
طبعا في تشفير
مو كل شي ينقال وانا اخيتج
بس اقولج انا كان بيصير فيني وأد البنات
:P
تصدقين قريت تعليقج وكتبت بوست العيد بمزاج
استكانات العيد كلها اهداء لج
عيدج مبارك وتقبل الله طاعتج
:)

esTeKaNa يقول...

EngineRaa
~~~~~~~~~~~~~~~
يا صباح السنع كله
:)
حلت دنياج قولي امين
عسى ربي يجبر بخاطرج مثل ما جبرتي بخاطري ماحد قالي شكلج حلو من كثر ماهم ماهم معصبين
:P
عيدج مبارك وتقبل الله طاعتج

esTeKaNa يقول...

فرناس
~~~~~~~
اهلا بفرناس
وانت بخير وصحة وسلامة
:)








t.q8
~~~~~~~
اهلا وسهلا
ايامك سعيده كلها يارب
:)







بنت الشامية
~~~~~~~~~~~~~~~~~~~
انتي هلال هالعيد
:)
ولهنا عليج يا الغاليه
عسى ايامج كلها سعيده وتقبل الله طاعتج يارب

esTeKaNa يقول...

Sweet Revenge
~~~~~~~~~~~~~~~~
والله خوش قصه انا عاجبتني
بس كلش ما سوت علي
:P
عيدج مبارك يا صديقتي الجميلة
:)





عثماني
~~~~~~~~~
ياهلا ويا مرحبا بعثماني
تبارك البلوق كله بمباركتك
:)
عسى ربي يحفظك وايامك كلها سعيده يارب

malak يقول...

وااااااي حرام عليج


حرقتي دمهم


والحمدلله عدت على خير :D

aisha يقول...

هههههههههههههه لووووووووول يحليلج استكانة حدج بدعتي والله زين ماحصلتي طقة من اهلج يلا الحمدالله انها عدت على خير مرة ثانية يا ماما لاتعيدينها:p