السبت، أغسطس 29، 2009

عيارة البنات

-1-
قبل اسبوع كان نهارنا الأول في رمضان
قبل اسبوع كنا فرحين نبارك لبعض في رمضان
اشلون مر هالاسبوع بهالسرعه؟
سبحانك ربي ،فعلا ايام معدودات
نسئل الله قبول صلاتنا وصيامنا وقيامنا وأن نكون ممن صام رمضان إيمانا واحتسابا فغفر له ما تقدم من ذنبه
آمين
.
.
.
.
-2-
البارحة كان افطار ابناء عمتي في بيتنا،البيت عباره عن شباب متأمرين كل واحد متشرقد بصوب،وجودهم ذكرني بذكرى طفولية غابره
كنت كلما ضايقني ولد عمتي،عرفت كيف استفزه،وكلما اقترب ليكفخني طالعته:
تبي تطقني طقني بس قولي عادي ريال يطق بنات؟
انا عادي بس اخاف عليك كل من راح يطنز عليك يقولون فلان يطق البنات وكلهم بيضحكون عليك ترا
!!
فيصر على اسنانه ويصرخ،وانحاش انا هاربة
ومتى ما احتد اللعب وصارت هوشه بينهم صرخت:
فلان لا تسبني،معصب قولي يا موزه،يا برتقاله،بس لا تسبني سب صبيان ترا عيب انا بنت
!!
ودامه عيب شمقعدج وياهم يا استكانة؟
كنت اعرف كيف استغل وجودي بينهم،اشتري ما اريد وانظر لأخي فيدفع لان عيب البنت تدفع،ومتى ما ثقلت الأغراض بيدي وضعتها في يد ابوي،فانا بنت ما اقدر اشيل شي ثقيل،العب مع اخواني وعيال عمتي وأتناجر مهم ومتى يننتهم ونوى أحدم مد يده بققت عيني ونزلت لي دمعتين:
ترا عيب الريال يطق بنت،
وكبرت واستمرت حالة استغلالهم فمتى ما كنت مدعوة لعرس ازرعهم وهم بانتظار توصيلي واذا تحطلم احدهم مسكت مفتاح سيارتي:
انا عادي اروح العرس بروحي ماحب اكلف عليكم بس ترضون اروح جذي؟
وفي المطارات ما زلت لا احمل حقيبه ولا ادري عن جواز،اللهم اضع رجل على رجل بانتظار احدهم ومتى ما اقبل متعسر ابتسمت:
يا بعد قلبي قلبك انت يعطيك العافيه،ها خلصنا؟

تمتعي بأنوثه وجودك،علميهم ان يكونون دوما من حولك ولأجلك
،وبالنهايه اقصى ما يسعدهم ابتسامة جميلة وكلمه تجبر خاطرهم
:))
..
انا ماخذه حقي وزياده من اخواني وعيال عمتي وعمامي الذي تربوا معي في البيت الكبير،حتى لاب توبي متكفل فيه ولد عمي بصدر رحب،
ممممم تهقون يقرا بلوقي؟
:D
.
.

الحقيقه التي أفكر بها الآن
لكل حق واجب مقابل يتمثل في اكثر من مشهد :
..
يتصل بي اخي على الظهاري هو متشرقد بغرفته وانا على مكتبي بالدوام:
استكانة شنو الفطور؟
انا بالدوام
أي شنو الفطور ما تدرين؟ شنو ما تدشين المطبخ انتي المفروض ايدج بإيد امي
!!
فاغلق الهاتف متحلطمة،ليش ما يدش اهو وهو راجع من دوامه قبلي؟
..
اكون في لوية اكثر من مشوار يتصل بي ابوي:
وين امج ما ترد؟
مادري يبه انا طالعه
انزين وين السايق؟
مو معاي
اخوج بالشاليه ولا البيت
مااااااااااااااادري
!

فاتسائل بيني وبين نفسي:
الى متى انا مكتب الاستعلامات في هذا البيت؟
وإلى متى ابوي متى ما خلص ما عنده رقع التليفون واظل انا وحدي اتمتم:
الله يسلمك الله يسلمك
.
.

اخي الثاني متسمت بالصاله ويتصل بي:
استكانة دقي طلبي لنا كنافه
دق انت
لا دقي انتي انا مادري أي واحده احلى

وما زالت سلسله الحنة والكراف على قلب استكانة مستمره،وما زلت اكسر خاطر نفسي حين تكون سيارتي اخر سياره ترجع للبيت ورغم ذلك ابوي يتحلطم:
ما شفنا شي من ايدج هالسنه؟
اييه حقنا ما تسوين شي بس باجر حق ا سعيد الحظ بنشوف سوالف
أنظر ليدي المسكينه وافكر:
كيف يشوفون شي من ايدي وانا اروح الدوام وارجع بعين مخيطه من النوم
وليش ما نشوف شي من ايدهم الكبيرة الملحة مثلا؟
وليش كل ما قال ابوي سعيد الحظ رفع اخوي حاجبه وتطنز؟
اكتشفت ان اخواني يغارون من مجرد التفكير بوجود غريب بينهم
:P
.
.
قبل يومين اعتمدت خطة ناجحة جدا:
كيف تكونين سنعه بدقائق؟
اتبعي الخطوات التاليه بالترتيب:
استيقظي من نومتك قبل الفطور بربع ساعه او نصف ساعه حسب حاجة ملامج وجهك للرجوع لحالته الطبيعيه بعيدا عن بوهه المخده
ارتدي احد دراريع رمضان المقصمله
ارفعي شعرك كله بقلم،ونزلي لك خصلتين تمويه يعني من اللويه والتعب
اركضي الى حيث المطبخ ولا تنسين في الطريق ان تقولي:
لاااااااااااااااااااااا اله الا الله بصوت يسمعه من كان متشرقد بالصاله
صبي مرقتكم على خبزات الرقاق الرقيقه ووزعي اللحم والبطاط فوق التشريبه
وزعي السبموسه والكبه بالتساوي بالصحون
زمي شفايفك وعقدي النونه وخلطي السلطة بتركيز
وعندما يجلس الجميع على السفره استمري واقفه الى حين ان يؤذن المؤذن فطلي بوجوههم واحد واحد:
أي شوربه تبي؟
اصب لك فيمتو؟
بيذان؟
عطني صحنك احط لك شوية من هذا
::P
الى ان يطلب منك ان ترتاحي قليلا وتفطرين ،فيابعد روحي تعبانه وصايمة وقايمة بالكل،
فتتنهدين وتجلسين على الكرسي وتدعين وتاكلين تمرتك وقد سجلتي موقف سنع بأقل بوقت قياسي وبأقل الإمكانيات


مع تحيات:استكانة
:p



هناك 49 تعليقًا:

ikhalifa.com يقول...

و الله نحن مقصوص علينا

كبرياء وردة يقول...

يمممممه منج

طلعتي عياره :p

الخيلاء يقول...

اي صح صح

ليش الصبيان اتكالين

انا عيل صايره سويت فاكتري هالرمضانيه لول

اخواني يحبون الحلو الفناتق
فا انا متكفله هالرمضانيه بالحلو بما اني اجازه

كل يوم من يفتحون عيونهم ها شنو الحلو

و طبعا تعالي سمعي التعليقات لي ذاقوه و قبل لا يروحون التراويح يالله اسمع كلمه سنعه

شحلوه لذيذ نبي منه حق الدوانيه

اليوم سبرايز ماكو شي لول

امي بتسوي القيمات فا انا بريك


و هالخطه كنت اتبعها لي السنه
السنه ربي فتح على و قمت ادخل المطبخ و المشكله كيكه تضبط و عشر يختربون استغفر الله لول

Addictioneer يقول...

يمن حظج
احنا بناتنا من وهم صغار لسانهم يلوط اذانهم
اذكر والله كلما اتناجر مع بنت عمي, تعطيني ذاك الكلام المعسل المرصع ببريق الفيروز الخالص وروح المسك
وبالاخير انطق من عمي

EngineRaa يقول...

مساج الله بالخير والكرامة ،،، بصراحة فطست من الضحك على البوست ، انا كنت احسب بس انا الى اشتكي من هالسوالف طلعنا كلنا بالهوا سوا

:))))
وازيدج من الشعر بيت انا متزوجة وبيت ريلى واختي هم متزوجة تلقين الوالده الله يحفظها اتدق على تقولي وين اختج اليوم ما بينت او ما دقت وادق عليها ما ترد انزين انا شدراني اهي بيت وانا بيت اقوولها ما عليه يمه اكييد انشغلت بس اهي ما تخلى لازم اتكلمج او تمر عليج لا تحاتين وانا بعد ياييتج
ولا سالفة الوالد الله يحفظه مع التلفون انا ودي اعرف شالسر الى يخلى بعض الكبار مو كلهم يسوون هالحركة؟؟؟؟
بعديين ما دام انتي ببيت اهلج ما تزوجتي انا اقووولج اخذي راحتج على الاخر ما كو احلى من الدلال على الابو
والاخوان هذي مو عياره بنات هذي من باب الميانه ومعرفة غلاج عندهم

لان بعد الزواج يتغير الوضع لان مثل ما قلتي انت كل حق مقابله واجب وبييت ريلج راح تقوومين بدور امج ببيتكم "الله يخليلج الوالده ويحفظها" بس الله يقطع ابليسج انت لما كتبي البوست فضحتينا كشفت سر من اسرارنا الحين بينتبهون وما راح اطووف عليهم رحنا فيثها

:)))))

صياما مقبولا وفطارا شهيا

BeeDoO يقول...

كل البنات يستغلون ضعفهم .. والشباب لازم يدقون الصدر .. لزوم النخوة
في المقابل لكل شي ضريبة .. وكما تدين تدان
:D

أبو الدســتور يقول...

الى متى انا مكتب الاستعلامات في هذا البيت؟

ضحكتني

دام السرور بهالبيت انشاءالله

Nikon 8 يقول...

الخطة جميلة ... بس ما تنفع صحاب المسؤوليات مثلي
مسؤولية بيت ... تعب عمل .... واجبات إجتماعية .... إشراف على المطبخ .... إشراف على مواعين نقصات الجيران... والحين تجهيز للقرقيعان
لووووووووووووية
ودي أروح للصالون أحط حنة بشعري ما ني قادرة !!!

ميمة السبيت يقول...

** مساج الله بالخير

شوفي انا مع اني ساكنه بروحي بس برمضان كل يوم فطوري عند امي الله يحفظها و دايما اروح قبل الآذان بنص ساعه عشان اصب الماي و اوزع السلطه حتى العام كنت صج اكسر الخاطر لأني كنت بالثامن و كنت شبيهة
free welli يعني
كنت شوي اخرع بس والله ما قعدت اوزع كل شي صج ان هالحركه ماتصير إلا برمضان بس يالله عالأقل سوينا شي ..

شنو فطوركم اليوم :) ؟؟

أتيت متاخرة يقول...

يا حلو الحمال والدلال برمضان
ويا كره النساه كرهاه

ذلك الكائن الذي لم يتعدى السنتميترين المتكون بداخلي قد فتح لي باب الدلال والتحنوس كل كيف كيفي فمن فتوى امي لي بعدم جواز صيامي وان ربي لن يتقبل مني وآنه نص يومي ارجع
ودلال اخوي اللي مسويني يا دهينه لا تنكتين الى توجيب عيالي ان حتى قلاص الماي يوقفون لي به على باب الحماممن اخلص وصلة الاستفراغ يشربوني اياه
الى خواتي اللي كل يوم يتصلون يسألوني اشخاطرج تاكلين على الفطور ويسوونه ويدزونه لي

ما يحتاي اني اتعير عيارة البنات ولا اصب لاحد ولا اوزع بالصحون
بس فعلا كونا نستخدم عيارتنا الانثوية في الحصول على ما نريد هذا شيء مشروع ومحلله لنا ربنا
فلحد يناشبنا

عنيف يقول...

والله نبهتيني على الخوات يطيحون فينا كرف واخر شي ما يبون ينكرفون اها خوش خوش


وفوق هذا على الطاوله كل واحد يخدم نفسه


بس صج الحلو انتو الي تعرفون فيه مو احنا الشباب

SHOOSH يقول...

يعطيج العافيه

:)

chandal/danchal!! يقول...

loooooooooooooooooool

شريرة يا استكانة

:p

اتفق معك بان الوحدة لازم تدلل عمرها عل آخر... بس عند امي وابوي الود ودي اعكهم مو اشيلهم جياس... من جذي ماحب اروح السوق معاها لول

:p

غيرهم والله ما اشيل العود واستنفذ كل الفاسيليتيز... شنو يعني فاسيليتي بالعربي؟

:p



في شي ثاني قبل لا انسى


امي اول ما تدخل البيت لازم تسألني: وين اخوج؟... مادري... انزين اختج... هم مادري... انتي تدرين عن شي حمدلله والشكر

:(((

طفارتي هالسؤال... واشكرج من اعمق اعماقي انج طرحتيه وخصصتيله مكان بالبوست

ترا يبيله بوست بروحه!



هذي مو صب القفشة اللي ورى الاستكانة؟

:p

RoOra يقول...

LOOL
walaah 5Osh 7rka estkana 6l3taii mo hayna ;P~
oO alah y5leeLch e5waNch oO babatech ;*

Sn3a يقول...

اللهم اميين ويتقبل منا ومنكم صالح الاعمال يالغاليه

ماني ذاكره طفولتي
لكن اهيا ابعد مايكون عن الانوثه;p

الله وكيلج انا سويت كيكه هالرمضان ماكلو حتى نصها
محد قام ياكل بالبيت
الحلو قام يظل وهالشي غريب
فخلاص قلتلهم كيكه وسويت وماكليتو
ماتسوى عليهم طلبو

بس احلى شي وانتي بالدوام يسالونج شنو الفطور


بسوالف الجوازات والسفر انا الايد اليمنى لابوي فماقدر اتدلع وانطر
خصوصا لما نكون بمطارات اجنبيه
اصلا ياويلي ان تحركت من يم ابوي;p


انا استيقظ على كيفي والله وكيلج مجابله اللابتوب واتشرط اقولهم حطو هالصحن هني
ولا السطه هناك
لاتطوفج الخزة اللي استقبلها منهم;p


وعلى فكره
صج صج صج ويعلم الله اشكثر استانست لما قريت:ثالث خواتي
بالبوست اللي طاف
يابعد عمري ربي يفرح قلبي ويطمنج مثل مافرحتي قلبي

نمووول يقول...

آآه منكم ومن عيارتكم
اتوقع بيقرا البلوق وبعدها ماكو لابتوب ههههههه

بس طلعتي مو هينه استكانة الحمدلله ما طحت عن وحدة مثلج تطلعلي قرون

ياحلو اليمعة ويا حلو رمضان وصاجة بسرعة طار اول اسبوع

شكرا والله يحفظكم ويخليكم لبعض ..

kandroz يقول...

لووووووووووول
حريم هالوقت :P

t.q8 يقول...

والله خوش خطه
راح يتم التنفيذ باذن الله



:)

مرسي

Hope يقول...

مسا الورد و النوير

.
.

يمه منج يا استكانه
والله طلعتي مو هينه
=p

انا للأسف مو طالعة عليج
و تبط جبدي سالفه الجمعيه
اخواني الاعزاء عندهم عقده ما يرضون يدزون العربانه ولا يشيلون جياس
ريايل طول و عرض و انا شايله الجياس .. والله فشله

.
.
للأسف
عيارة البنات ما استغليتها الا بشي واحد
ايام المدارس بس اوصل عند الباب و لا الوالد ناطرني
اسلم عليه و ابوسه و يشيل جنطتي اللي على قولته حاطه فيها صخر
و حتى عيال العم لما ايوون ياخذوني عودتهم يشيلون لي الجنطه
بعد تدرين مو زين اشيلها على ظهري لي السياره
=p

بس احلى شي لما كنت العب مع الشباب كرة
تصدقين ان كانو يبون انظم حق فريق الصبيان
و عرضوا على صفقه مغريه جداً
قالوا لي احنا تشاورنا و قررنا نشتريج لوول
اهم شي انهم بيشتروني .. مصدقين روحهم
و عرضهم كان عباره عن بفك و ككاو
بس هوب رفضت عرضهم المغري جداً

=p

لأن وعليه عليهم فريق البنات كله مغلوبين

.
.

و على سالفه الريال ما يطق البنت
هذي معتمدتها من زمان لوول
و وايد مستفيده منها

.
.

تصدقين بديت اشك ان كل ريايل الكويت نفس الشي
و نفس الموديل
انا نفس حالتج
دقي ع المطعم طلبي لنا
هوب القنوات مو شغاله دقي ع الايه آر تي
الشوتايم تونا مجددينه و القناه مو شغاله دقي شوفي شالسالفه المباراة بعد شوي تبدي
و من هالحجي
هو دقوا انتو مو ريايل ...
يماااااا منهم مجهزين اعذارهم حق كل شي عندهم عذر

.
.

تصدقين عاد خطتج مالت السنع ما تنفع معاي
جاكيني و يدرون عني لووول

.
.

تسلم ايدج على هالبوست الخفيف و الحلو
يعطيج العافيه استكانتنا

=]

jonoon 3aqel يقول...

اي و الله..
اثر احنا اللي ينقص علينا بكلمة و نص..و ابتسامة
====
انا عمري 22 سنه..و كل خواتي اكبر مني..
اختي اذا تبي مني شي و حاسه الوقت غير مناسب او اني ممكن ارفض
و هي تناديني عشان تعطيني الاوردر تقولي رشودي

هههههههههه
==========

ايش سالفة "شاي الضحى"؟ احس استكانة اخف

دمتي بخير
تحياتي

jonoon 3aqel يقول...

سوري سوري..
انسي موضوع شاي الضحى..انا خلطت بين امور بالغلط

تحياتي

سلة ميوّه يقول...

يمـه يمـــه يمـــــه ياعيارة البنات

:)


ذكرتيني على طاري رقعة التلفون وانتي معلقه الله يسلمك:) أثري الوضع طبيعي :) وأنا طول الوقت أتحلطم عبالي إنها اهانه:) بس أنا لي تعلقت أقول لا لا بعد عمري لاتنطروني على الغدا..حافظكم الله
والتلفون من سنة يدي على الخد وماكو احد عالخط:)
.....

استكانه..من الضحك نسيت أقولج....


مساءج سُكر

Яeema يقول...

حبيبتي و الله

أن أقولج الأدهي
باليل زهبي كل شي المنيو و شنو تبون و شنو مشتهين
و أول ما تدخلين البيت تنحنحي و بإسكات يبي وياج شي و فرغيه بالصحن كأنك مسويته
لا من شاف و لا من دري
ههههههه

تشيحطي و عزميهم عليه بعد

حَافِـيَةُ الَقَدمَيّـنْ ولِبَاسِي المَطـرْ يقول...

لوووول والله لعبتيها صح
مو أنا مدلعتهم اخر دلع p;
حتى الجياس اشيل عنهم اقول حرام :/

Common_Sense يقول...

لازم يكون في خطة مضادة باسرع وقت

بس مشكلة تكسرون الخاطر معنه ندري انه مو صج

المقوع الشرقي يقول...

الغالية استكانة الجاي المنعنع
عجبتنى تكتيكاتج
و يالله تلحقين راس
:)
تحياتى

لحظه يقول...

يا خف طينتج موتيني من الضحك ولا بوهة المخدة عساج من عواده

Miss-Q8 يقول...

لووووول
خطيرة يا استكانة ;p

المشكلة ما تمشي عندنا هالحركات
بيتنا مدرسة عيايرة
ماكو امل تقصين عليهم بحركاتهم
يعرفونها

الواحد عندنا بحسن نية يسوي الشي و هم يشكون فيه
هالمرة بنية شينة ؟
لووول
حده ماكو امل


بس يمه منج ;p

7osen يقول...

مايصير هذا غش

:)

xname يقول...

لنا من العياره نصيب كبير :p

Note:
برمضان اللي فات كنتي حاطه صوره فيها نجديه وبعد هالصوره فيها نجديه
شرايج تسوين عرض :p

she is me يقول...

كل يوم وحدة ادش المطبخ
وياويلها الي ما ادش بيومها
طول اليوم تنسأل: وين الحلو .. وين شغلج اليوم .. اليوم ما فطرنا عدل لين ينكسر خاطرها
وكل وحدة تتفنن عشان تصير أسنع من الثانية


واخوي اذا سألني متى يومج
أتهاوش وياه
أدري يحب الي أسويه أكثر من خواتي الثنتين
بس لازم أناجره
واذا زعل ضميري أنبني


الله يديمها عليكم يمعة قولي امين

aL-NooR . يقول...

يا حلو عيارتنا ..تحسسنا بقيمتنا بالمجتمع .. بما اننا نصف المجتمع ..و امهات النصف الآخر ..فأننا المجتمع
كلـــــــــــــــــــــه

:D

******************

Sweet Revenge يقول...

وليش عيارة
اصلا احنا الله خلقنا علشان ندلع
ولا اهم شمهنتهم
"خايفة انطق عقب هالرد"
لو تشوفين شنو كنت اسوي باخواني لما اكون مريضة
بس بعدين اكشفوني محد قام يعطيني ويه :p

ARTFUL يقول...

والله العظيم كيدهن عظيييييييييييم

من صغرته من صغرته وهو يلعب بالعكر والزفر

;p

تلعب وتناقز معاهم ولا عوروها قعدت اتبجبج

ايي انثبري شلج فيهم

;D

حلوه قولي يا موزة يا برتقالة

صج مؤدبة بس ما توقع بنت تسب جذي الحين

تعالي انتي مو نفس بنات هالوقت

لما تسلم تكلم رفيجتها وينج يا حمارة ،، يا الكلبة مشتاقتلج حييييييل

@@

وكل ما يزيد الشوق يزيد السب

;p

شوفي الؤال ما عنده مشكله يشق عمره علشان يريح امه او اخته او مرته بس بمهامه يعني بالشيل بالحط بالشغل

بس امور البيت من العيال والغدا والعشا وين العيال وين امج كلها تكون صوبكم
----------
اتنهدين وتقعدين جنه صج مع الويه

;D

كلها مرقه وصبيتيها

بس ترا مهو أي واحد يشرب يبيلها نفس

شكوووو

;p

justice maker يقول...

مشكلتي يا استكانه ان انا من عمر عمري ماحب احد يقولي انتي بنية ماتسوين جذي والا جذاك ومن عمر عمري وانا ماتطيح على لساني كلمة انا بنية لا تسوونلي جذي ونزاغة الطفولة عاد يعني اطفرهم عشان احط راسي براسهم مو عشان يعاملوني بنية حراام نسويلها شي وياما تكفخت وياما خفسوا الكرة على ويهي .. عادي يعني .. فالدلال والعز اللي قلتي عنه مامر علي وشوقتيني لو مجربته اخيييه حسافه بس شنسوي طبع فيني من زمان ولا يزال .. راااس برااس .. قومي سوي جذي حق اخوانج قومي حطيلهم الاكل قومي مادري شنو .. ليييش ماعندهم ايد يسوون مثلي مثلهم .. لوما ادري ان الوالده اهيه اللي مردها راح تسويه والتنابل بيقعدون ولا كأنه جان ماسويت بس شنقول رياييل هالايام عبالهم عيب يشتغلون ...

ضحكني بوستج صراحه يعطيج العافيه

shakshaka يقول...

عيل انا امي تشييش ان درت داقيين علي ولا قالولها دقينالج قالت اي وه خو بس اليوم ناسبه الموبااااايل هاهاهاهاها لا بس الموضوع عندها ينقلب كرامه وحركاات لوول

اما سالفة عيال العم والعمه فا كنت مستغله انوثتي صح

تخيلي يا استكانه اقولهم ما اعرف اركض ما اوعى الا هاللي ماسكيني من ايدي الثنتييين و طارو فيني علبو يركضوووني لاني خبرج ما عرف
:P

ياثقل طينتي

bent el deera يقول...

بوستاتج رائعه كالعاده
:>

dm3t _almghor يقول...

يسعدلي مساج يا استكانة

والله صدقتي الشباب كله اتكاليين ما أدري ليش وكل مكدشينا
:)
ما أحب اذا امي اسألتي عن احد من خواني وخواتي ختى واحنا متزوجين الحين اذا ييت زرتها تقولي عيل وين اختج
انا اشدراني هي في بيتها وانا في بيتي

انتي الكبيرة لازم تسألين عن اخوانج

هذي حجي

:|)))))))))))))))

دلعي نفسج على كيفج

The.One يقول...

great tip ;)

Barrak يقول...

من كلامج مبين انج فنر هالبيت

بخور السوق يقول...

والله احلى شي الوصف لعيارة السنع الأخيره ترى صج والله استكانه كلامج عدل لا تيين جنج مسيره عليهم ومتسمته عالطاوله يحسون انج طبانه وما منج فايده واذا اشتطيتي ومثلتي دور الشطه الكل يطق لج سلام على قولة أمي حشا مو بنات جناين كله معلقين ما تنزلون الا آخر شي لووووووووول

ARTFUL يقول...

المود يقلب عندج بشكل غير طبيعي اسم الله عليج الرحمن الرحيم

عسى الله يحفظج ويريح بالج ويمسح على قلبج ويسمح دربج ويكتب لج السعاده



لا تطولين علينا وادعيلنا بهالشهر الفضيل

:)

غمنده هانم يقول...

يعطيج العافيه صج عيارة بنات ماعليه ادلعي لاحقه على الشقى وعساج على القوه استكانه

غمنده هانم يقول...

يعطيج العافيه صج عيارة بنات ماعليه ادلعي لاحقه على الشقى وعساج على القوه استكانه

ViPyah يقول...

ياحافظ عليج
بس تعرفين كيف تاخذيم حقج

يعطيج العافية

الوتيــــــــــن يقول...

وي ماهنوج بالدلع :\

يوءدون احيانا الانوثه .. نب نتدلع عليهم يقلبونها علينا واي

بوست جميل جدا

|:| DUBAI |:| يقول...

هاهاهاها
ألحين أثبتي أنج بنت
و يا زين البنات
أحلى عيارة
أنا أصلا كل ما أشوف الليقمات
أذكرج
لا تسأليني ليش
خخخخخ


الناس يذكرونج باستكانة شاي

بس أنا بالليقمات

لأنج لذيذة
و توصلين للبطن بسهولة

خخخخخ

: )

رمضان مشرق عزيزتي

و ربي يخليج لأهلج

مستمعة في قراية البوستات اللي
ما شفتها

!!

أتيت متاخرة يقول...

شوفي يا استكانة
هذا آخر انذار لج
يا تقطعين صمتج
يا تقطعين صمتج



ترى تستاثمين فيني وفي زيون الصغيرة اللي بطني خبرج متنسية واخاف يطلع في ويه زيونه الصغيرة استكانة
شيفجج بعدين بطب البنية بجبدي وهيا في ويهها استكانة
وما يرضيج

خو بعد ما اقدر ما اصبح وامسي على
مدونتج


ولهت عليج شويه
اشتقت لسوالفج هم شويه

يلا عفيه ردي لنا

ikhalifa (self-challange 1) يقول...

ألحين بذمتج
و عيني في عينج
@@

ما وحشناكيش؟

لو ما رمضان جان حطيت اغنية لطفية ما وحشتكش

:)