الثلاثاء، أغسطس 18، 2009

مخالفة الذاكرة

(1)
منذ الصباح وأنا اشعر بشئ غريب في الشارع اليوم،سيارتي الوحيده تتمخطر بالشارع لا أحد حولها،ستاربكس فاضي جدا على غير العاده،وانا مغمضه وامشي،حين استقريت على المكتب اكتشفت ان الساعه ست ونص وخمس
@@
سابقه هي الأولى من نوعها في حياتي،قبل الدوام بساعه واصله ،مضحية بنومتي العزيزه ويايه الدوام
بذمتكم انا مو مكسب للكويت؟
:P

(2)
سئلني ولد خالتي :
في مخالفه اسمها اظهار مظاهر الفرح والسرور؟
لا اول مرة اسمع
منذ الصباح وانا احوس في موقع وزارة الداخليه واتسائل عن هذه المخالفه ولم اجد لائحة او نص يفسرها،
ولا جريمه ولا عقوبه الا بنص، ووين النص؟
احد يخالف احد لأن يظهر مظاهر فرح وسرور؟
انتظرت الى وقت الدوام ما حبيت اخرعه من صباح الله خير، وبعثت له مسج لأني اريد ان ادخل على صفحة مخالفاته وكان لي ما أردت،ساعه وأنا ادقق ،انتبهت للتاريخ،اكتشفت ان تاريخ المخالفة كانت في يوم وفاه الشيخ سعد رحمة الله عليه،فربطت اسم الله علي الرحمن الرحيم،واتصلت اسئله :
اين كنت في هذا التاريخ؟
وماهي مظاهر الفرح والسرور اللي مسويها حضرتك والكويت في حزن؟
واشلون يهنا لك قلبك تظهر مظاهر فرح وسرور في هذا اليوم؟
شاغلت نفسي وشاغلته وهو ناسي ،تذكرت ان اذنه اليسار ما يسمع فيها بشكل جيد،اذن لابد انه كالعاده كان مطول على الأغاني،اذن هذي اهي المخالفه:
كان يسمع أغاني في يوم وفاه الشيخ ومعلي الصوت
:D~
اعطيته درس بحب الوطن ودرس آخر بالانتباه للكاميرات،ودروس في في المخالفات المروريه رغم ان باب النجار مخلع
شسلطني عليه من الصبح؟
ولما انا مستعده ان اكنسل اشيا مهمه في حياتي مقابل شئ سخيف يشغل بالي بس المهم افهمه؟
ولما اشعر بالانتصار متى ما ربطت فكرتين ووصلت لنتيجة منطقية؟
ولما استهلك نفسي في احيان كثيرة بأشياء فعلا مالها معنى؟
!!
(3)
مابين الحين والآخر اتخلص من الأشياء الغير ضرورية والغير مرغوب فيها في خزانة ملابسي،اتمنى لو اقوم بهذا الشئ مع ذاكرتي،أنا أحفظ اشياء مالها داعي،وانسى اشياء مهمه:
كيف تذكرت ان ولد خالتي لا يسمع بإذنه اليسرى رغم ان قايل هالسالفه لي من اربع سنين ولا احد يدري ولا هو بالشئ المهم بالنسبة لي؟
كيف اتذكر اسماء رباعيه لبنات لا يعنون لي شئ كانو معي في المرحلة الإبتدائية؟
كيف اتذكر فلانة شنو كانت لابسه بعرس قبل سنوات؟
كيف اتذكر كلمات أغنيه سخيفه تعلق في بالي،وهذا اسبوع الأغاني السخيفه؟
كيف اتذكر ما قاله لي دكتور في محاضره صباحية قديمه قبل ثلاث سنوات؟
كيف أذكر رقم هاتف لصديقة سافرت مع زوجها منذ اربع سنوات؟
كيف اتذكر اشياء وتفاصيل صغيره جدا معلقه في جدران ذاكرتي؟
كيف اذكر ملامح أشخاص وكأنها مرسومه في ذاكرتي بتفاصيلها الدقيقة؟
وبالمقابل:
كيف انزل من سيارتي وامشي عشر دقائق في السوق ومن ثم اذكر فجأة اني نسيت ايقاف تشغيل سيارتي وتركتها تشتغل
بل كيف اركن سيارتي المسكينه وحين ارجع اكتشف اني نسيت ارفع السايد بريك
كيف اخذ سيارتي من خدمه ايقاف السيارات وامشي ثم اتذكر اني نسيت المفتاح عند الريال
كيف تمر علي ايام كثيرة اصل للعمل فأكتشف اني ناسيه موبايلي وبوكي بالبيت
كيف ممكن اني ما زلت كل سبت اقرا سورة الكهف وانسى اقراها يوم الجمعة
كيف انسى لفه البيت كل اسبوع مرة
والكارثه:
كيف خرجت البارحة من الدوام واكتشفت اني نسيت ابصم
!!
إضافه لكل ذلك فأنا أمارس شئ غريب دون ان اشعر بنفسي:
أبوي يسولف لي عن رحلته للهند وانجازاتهم بهذه السفره وأنا اسئله:
عندهم جباتي؟
بريانيهم مثل البرياني عندنا؟
أخوي يكلمني عن سفرته اسئله:
انتو جم واحد؟
الساعه جم طيارتكم؟
!!
قد يعتقد البعض اني غير مركزه،وأن اسئلتي لا معنى لها،لكني بيني وبين نفسي اربط معلومات واستنتنج اشياء معينه في بالي،مثل الاستنتاج الخطير الذي صرحت به لصديقتي امس:
البنت تسولف عن دورة داخلتها مع زوجها ونقاشهم حول موضوع معين وكتب يقرأونها مع بعض
فجأة قلت لها:
انا سعيده بكم،الطيبون للطيبات،انتي تستحقين انسان ناجح مثل فلان وهو محظوظ لأن له زوجه مثلك
انا فخورة بكم
انا شكو سعيده وفخورة بهم؟
أحد سئلني عن مشاعري؟
.
.
تقول امي اني كنت طفله اكتب كثيرا وأسئل كثيرا،ولكن الامر هاليومين مستفحل
مستفحل؟
ممم
وكلمه مثل مستفحل من الكلمات المخزنه في ذاكرتي لمجموعه كلمات غريبة ايضا سمعتها في مكان ما
انا اخزن كلمات ايضا
!
اعتقد اني احتاج ترتيب ذاكرتي لأنها بدأت تصبح بطيئه لأنها تحفظ اشياء كثيرة،
وبدأت اشعر بأني افقد فطنتي وذكائي يخوني في احيان كثيرة وهذا اعتراف مني يبرر للجميع التسبه لحالي
هل تعانون من حفظ اشياء مالها داعي مثلي؟
.
.
.
ختاما:
انا سعيده بقرب رمضان
كلما أقبل رمضان شعرت بحنين له من نوع خاص
وكأني على بعد ايام من لقاء حبيب قد غاب وطول الغياب:
اللهم سلمنا إلى رمضان وسلم رمضان لنا
وأعننا على صيامه وقيامه

هناك 75 تعليقًا:

Sweet Revenge يقول...

يا صباح النشاط والانتعاش

مانبي نجذي مخالفات ,بعد الاوادم بدون مخالفة عاقدين النونه
هالمرة بتقوليلهم مخالفة لاظهار مظاهر الفرح والسرور
يعني الي اسمة سعيد ياخذ مؤبد :p

الله يشفيه ولد خالتج بس ليش يخالفونه مايصير عنده عذر طبي

ااااايه الذاكرة احس افضل علاج لتحسين الذاكرة التغافل عن الامور الي تزعجنا
ومحاولة نسيانها
وفي علاج بس لاتضحكين علي توصلين الدم لراسج
توقفين علي ايدينج ;)
او مثل افكارج تتكوكسين
بس بروحج بالغرفة عاد انا حذرتج ان شافج احد يصكج مخالفة اعمال وناسة وشطانه
ولاتحاتين تصير في احسن عائلات
مرة نسيت مفتاح السيارة علي باب السيارة وسبحان الله محد باقها :)
عسل سوالفج والله

Sweet Revenge يقول...

احم احم ,الاولي :)

Enter-Q8 يقول...

يا سبحان الله معقولة

طبعا قاعده تستغربين
لكن قاعد اتذكر منابر النور من كم سنة كانت و شنو كنا احنا فيها

رزنامـــــة يقول...

"كيف انزل من سيارتي وامشي عشر دقائق في السوق ومن ثم اذكر فجأة اني نسيت ايقاف تشغيل سيارتي وتركتها تشتغل"

لووووووووووووووووووووووول
الله يقطع بليسج
بكل جدية قاعد اقرا الموضوع وفجأة اقرأ الجملة السابقة واضحك كثيرا عليها

واضح ان مشكلتك في الذاكرة الوقتية قصيرة الاجل يكون التخزين فيها يحتاج وقت

اما الاسئلة التي تسألينها فجأة بنص السوالف واللي يسمعك يقول شكو هالسؤال بالموضوع ، فهي لمعرفة التفاصيل بالشكل الذي تملئين فيه اطار القصة بمنظورك الخاص

هذا والله اعلم
وصلى الله وبارك على سيدنا محمد

ikhalifa.com يقول...

كل عام و أنتي و الجميع بخير :)

Purplecious يقول...

افهمه؟ولما اشعر بالانتصار متى ما ربطت فكرتين ووصلت لنتيجة منطقية؟ولما استهلك نفسي في احيان كثيرة بأشياء فعلا مالها معنى؟

نفسي بالضبططططططط

يمكن لأن الاشياء البسيطة ممكن تنحل بسرعة فتعطيج شعور الانتصار من دون عناء

صباحج عسل و قيمر (مادري شفيني اليوم اشتهيت اتريق عسل و قيمر بس ما حصلي) هههههههههه

و مبارك عليج الشهر مقدما
:**

عنيف يقول...

اولا


انتي مكسب للكويت ونص يعني ما شاء الله عليج حتى الحارس مال الدوام انتي مقعدته لووول


ثانيا الذاكره لو نمسح السخيف الي فيها ونخلي المهم لنا شي طيب بس ماكو الا نروح طبيب نفسي ونقلب ميانين

أتيت متاخرة يقول...

عندج سوء في التخزين والاسترجاع للمعلومات في الذاكرة القصيرة المدى

يعني الحالة مو مستفحلة وايد بس تحتاج لصبر ووقت للعلاج


هيهيهيهيههيهيهي

لا تخافين بسم الله عليج ....

آنه نسيت الهاند بريك وما طلعت من الشغل الا رايحة وييييييييييين قولي زين ما دعمت واحد من الطلبة لأني ذاك اليوم مسجلة تاخير بعد الدوام

violinist_q8 يقول...

صباح النور
ومبارك عليج الشهر مقدما بسبب فرحتج بقرب رمضان :) اقولها الحين وبشوفة هلاله
ان شاءالله

New Bride يقول...

مبارك عليج الشهر :) و يا حلو روحة الدوام مبجر بس انا تصير لي مرة بالسنة :)


انا وايد انسى و هالشي متعبني امس نسيت الفرن شغال و نمت فزيت فجأء بنص الليل و رحت المطبخ و طفيته الحمدالله الله حفظنا

بس مادري ليش نذكر اشياء قديمة و الحين ماكو شي :)

الزين يقول...

شفتي هاللي قصيتيه وحوادث النسيان مالتج يا استكنكن


ولا شي يم سالفتي

ذكريني اسولف لج

لأن عقبها بتشكين بقواي العقلية


:)))


وصباح النسيان يا بعدي

:**

alala يقول...

ضحكتيني على سالفة افتخر فيكم :)

عندنا و عندج خير انا ذاكرتي اعتبرها سيئة و لله الحمد و المنة

لكني اتذكر اشياء مالها داعي سمعتها منذ زمن مضى لأناس لا تربط بيني و بينهم ذيج العلاقة و بسهولةاربط احداث باحداث


اكره شي اغنية سخيفة تعلق LOL

تونسج العافية قولي آمين ... و تعودينه بالصحة و العافية مع من تحبين ان شاء الله :)

نون النساء يقول...

يبيلج صيانة عملية
:P~



انا من كثر ما انسى
الناس تستغرب إذا تذكرت شي وكان بموعده


ويا مسا النسيااان يا تكنكن

SHOOSH يقول...

كلامج حلو

أنا في ذاكرتي أشياء مستحيل أنساها ..أتوقع حتى لو يحوشني الزهايمر هل الذكريات ما أنساها

أحفظ أشياء سخيفه وايد و مالها معنى .. مواقف عبيطه وايد مخزنه داخل مخي

جمل و عبارات انقالت لي من سنين ذاكرتها بالحرف و بالكلمه

و على الاوذر سايد

أنسى كل شي مهم .. أنسى موبايلي .. أنسى المواعيد .. يتخربط على الخميس و يدش باليمعه

مشكله

:)

esTeKaNa يقول...

Sweet Revenge
~~~~~~~~~~~~~~~~~
ياهلا ويا مرحبا بالأولى
:)
مو صح المخالفه اسمها غريب؟
انا استغربت صراحة
وبعدين شنو هالحلول يالله من فضلك؟
لوووول
وعلى سيارتج:
مال الحلال ما يضيع وانا اخيتج
ربي حافظها لج
:)

esTeKaNa يقول...

Enter-Q8
~~~~~~~~~~~~
اييه يا بو وليد
كنا جم مدون
وكانت عدد المدونات قليله جدا وعلى قلب واحد
وانت كنت من اوائل الناس اللي تبنت الموضوع
بو وليد ولهنا على منابر النور
السنين تركض
:)
م

esTeKaNa يقول...

رزنامـــــة
~~~~~~~~~~~~~~
ياهلا ومرحبا برزنامه
:)
يا عسى دوم تضحك ومستانس،بس دير بالك ترا العياب عند الباب
:P
وشكرا لأنك استوعبت حقيقة اسئلتي وشفت لها اسباب مقنعه
أفدتنا افادك الله
:)

esTeKaNa يقول...

ikhalifa.com
~~~~~~~~~~~~~~~
وأنت بخير حياك الله
:)

esTeKaNa يقول...

Purplecious
~~~~~~~~~~~~~~
يا بعد قلبي قلبج
قيمر وعسل؟
ياربي شوفو بساطة هالبنت ما تنحب؟
:)))
تصدقين انا بالسفر كل يوم اتريق قيمر وعسل ،يختج قيمرهم بره غير
ناااااطع
وكلش ما يسمن ماشاء الله
:Pp
تهقين نفرح لأن الربط سهل واحساس بالانجاز من غير تعب؟
مممم
اشوة استكانة لها ولايف
:)

esTeKaNa يقول...

عنيف
~~~~~~~~
يا مرحبا بعنيف
نقلب ميانين؟
هههههههههههه حسافه علينا
:))
عسى وصل سلامنا للوالده الغاليه الله يحفظها؟

esTeKaNa يقول...

أتيت متاخرة
~~~~~~~~~~~~~~
هلا بزين البحرين
:)
مممم
يعني حالتي مو خطرة ان شاء الله؟
:p

esTeKaNa يقول...

violinist_q8
~~~~~~~~~~~~~~~~
ياهلا ويا مرحبا باخوي العزيز
علينا وعليك يزاك الله خير
هذا انت ما تقصر اكثر من سنتين وانت راعي واجب لابد تبارك لنا بكل مناسبه لا خلا ولا عدم
:)

esTeKaNa يقول...

New Bride
~~~~~~~~~~~~~
انا للحين مو مصدقه اني من الست ونص وانا قاعده بهالمكتب
ودي اصور
:p
يمه يمه الفرن؟
لاديري بالج انتي نسيانج خطر الله يحفظج
:)

esTeKaNa يقول...

الزين
~~~~~~~~~~
صباح العقل اللي ردي لي روحي
:*
مو زين تخليني اشك فيج
انتي قاعده ترتبين دثرتي
اذا انا وانتي بهالحاله شنسوي بعدين
:p

esTeKaNa يقول...

alala
~~~~~~~~~
لاحظتي فخورة فيكم؟
انا شكو افخر بعيال الناس
LOL
يا كرة الاغاني السخيفه
عيل في بنت سنعه يوم كامل تغني:
يا بو ناصر وعذاب العين من شين تشوفه
:p


الله يسلمج ماقصرتي

esTeKaNa يقول...

نون النساء
~~~~~~~~~~~~
أنساك
دة كلام
أنساك يا سلام
:p~
مزاجي ام كلثومي يا نون
عيل تقولين يبي لي صيانه؟
والله انا اشوف يبيلي فورمات من اول ويديد
وين تنصحيني اروح
:p

esTeKaNa يقول...

SHOOSH
~~~~~~~~~~
حلت دنياج قولي امين
:)
بس القى حل حق مشكلتي
راح اعطيج خبر ضروري
لأن الحال من بعضو
:)

ARTFUL يقول...

كاااااااااااااااااك

انا ببدي من تحت

والله ذبحتيني ضحك

;D

انا صج انا انا صج أنسى أا صج أسئلتي بايخة أنا صج أتذكر شغلات مالها داعي

;D

شفيج اتحسفين على روحج

;D

آآآآآخ بالنسبة حق الذاكرة انا عندي صفر ويمكن تحت الصفر

لان كل الشغلات المهمه اللي أحتاجها من معادلات وقوانين وأرقام وترتيب في الدوام وغيره أكيد الف بالميه ناسيها واحتاج اراجعها كل شوي حتى لو اني متأكد هم أرد أتأكد وأقول ايي اسم الله علي ذاكر

;p

بس الشغلات التافهه اللي مالها داعي ومابي أذكرها تكون جدامي

السكرتير يعاني مني أقوم من مكتبي اروحله وأسطر جدامه مثل الاهبل
يقولي شفيك

اقوله نسيت شبقولك

@@

احس فقدت الذاكرة

اكبر مصيبة لما اذكر شغلات بسيطه تضايق مرتي وانسى شغلات مهمه تبيها

;D

تين وتقعد فقيرة

;D

-----------
بذمتكم انا مو مكسب للكويت؟
-----------

والله مكسب بس شوي فاقد الشعور وهذا يضر بالمجتمع

عيل واحد يطلع 6:30 ما يحس

حرام عليج متى قاعده

@@

وانا اشوف اليوم الدرب ماشي والزحمه أقل من أمس أثاري استكانه اهي اللي مسوية زحمه كل يوم

;p

نشوفج على خير ومبارك عليج الشهر مقدما

وعطلة نهاية اسبوع سعيده وجميلة تسر الخاطر والناظرين

:)

maha يقول...

استكانتي العزيزة

اولا
كل عام وانتي بخير وعسى يلحقنا وياج خيره


ثانيا
خففي القهوه شكل الكافيين عامل عمايله
معاج

ثالثا
لازلت على الوعد توقعي ايميل مني

4 يقول...

:)

حمودي يقول...

نسيتي اتبصمين بالطلعة ؟ يعني بالسستم انتي نمتي بالدوام لي ثاني يوم بيقولون شهالموضفه الشاطرة

dm3t _almghor يقول...

حبيبتي استكانة يسعد الله مساج

مبارك عليج الشهر وتقبل الله طاعتج

صح والله شنو اللي سلطج على ولد خالتج

الواحد من الصبح مالا خلق نصايح

:))))))))

اما بالنسبة حق النسيان والذاكرة

والله انا عندي مشكلة اتذكر الشي اللي مالا داعي والمهم انساه
هذي مشكله مو لاقية لها حل !!!!

بس سالفة أنسى سيارتي واتذكر بعد 10 عشر دقايق

هذي صج مشكلة
:)))))))

بالنسبة حق الدوام مبجر اكيد مكسب حق الكويت وموظفة مثالية بعد

t.q8 يقول...

مبارك عليج الشهر مقدما

انا للاسف اعني من قوة الذاكره
والبذات اتذكر كل موقف محرج مريت فيه وقول يارب الناس ناسين الموقف

بس اعاني من نسيان الاسماء يعني ممكن اقعد وياج سنه وتلاقيني مو حافظه اسمج

Reem يقول...

إييييه يالنسيان !
و شرط ما أتذكر إلا المواقف اللي كل الناس ناسينها ، طبيعي جداً نكون متيمعين بصالة البيت و فجأة أضحك أقولهم " تذكرون لما .. " .. و محد يتذكر ، هذا إذا ما إنصكيت بوحدة مثل " هذا أكيد من تأليفج " .. لول !

طبعاً كل هذا بصوب ..
و لما تطرشني الوالده أيبلها شغله بصوب ثاني .. أوصل المكان ، و ألف فجأة عشان أرجع أسألها " يما شنو كنتي تبين ؟ "

و خطر جداً أن يحدث هذا الحدث أمام الوالد القائد ..

عادي يعطيني محاضرة بو ساعه و ربع عن أشياء كثيرة جداً .. بس لأني نسيت شنو كان يبي !

؛
؛

لول وايد سولفت مو ؟
إحم ، مبارك عليج الشهر ؛*
و الله يقدرنا على صيامه و قيامه ..

و ترى حدي فخورة فيج ..
و سعيدة جداً
p;

Chaotic pOsha يقول...

أولا توني أدري ان في مخالفة جذي
بس اشوف انها مناسبه بهالوضع وزين تسوين عطيتيه درس وطني
:))

انا لما بديت أداوم كنت شاده حيلي أول وحده أوصل المدرسه من الست ونص وياهو شعور حلو وتكون نفسيتج مرتاحه لا زحمه ولا تكود شغل يعني في مجال تاخذين وقتج عشان تفكرين شنو بتسوين
بس المدرسات اللي معاي مايخلون أحد بحالة إذا ييت مبجر عطوني جم كلمه تحبط وإذا ييت متأخره هم مو عاجبهم

ألحين أوصل المدرسة حده بحده :(



وبالنسبه للذاكره
واتوقع كلنا نعاني من هالشي
بس محد كثري أنا ياما صارتلي مواقف نفس اللي واجهتيها مع انها مضحكه بس تنرفز

الحــــٌر يقول...

والله الكبر شين
:))))

شفيج مشيبة روحج أخييتي

قاعدة من الفير

وكلة تنسين

وتسألين أسئلة

جنه يدتي الي قاعد تسأل

وأهم شي

الصراحة الجباتي


:))))

لو أنا مو أخالف الذاكرة إلا أعطيها إبعاد

:))

أتغشمر أخييتي

دمتي بخير

وكل عام والجميع بخير

ومبارك عليكم الشهر

chandal/danchal!! يقول...

يبيلج كورس مكثف من القروضات

يقولج وحدة بوحدة للذاكرة والرجيم

;p


ما خليت شي ما طحنته على بو اقوي ذاكرتي... واشوف صديقة خبري فيها من ايام الثانوي... يوم اسالتني جم رقمي... قومي وطلعي الموبايل من الجنطة عشان اعطيها رقمي... ليش؟ ... الله العالم!


ويوزي عن الاسئلة اللي مالها داعي بعز السالفة



هالنمونة ما افتح معاهم مواضيع

:p


وعساكم تعودونه كل سنة وتصومونه

:)

Sn3a يقول...

انتي مكسب للكويت والكويتيين بعد جبدي

عادي مرات في اشيا تتراكم بالذاكره
وماتكون مهمه

بس لازم ماترهقين تفكريج
انا لما افكر وايد تلاقيني واصله مثلا الجامعه
ومادري شلون سقت كل هالمسافه
هالشي خطر مو حلو الواحد يتعود عليه
انتي محاميه المفروض تكونين متأكده ان ماكو اسئله من غير معنى
وان الربط اللي قاعد يصير هذا يدل انج نبيهه اسم الله عليج الرحمن
بالعكس شي حلو مو سيء

لكن ضحكتيني بجمله انا شكو سعيده وفخوره

مبارك عليكم الشهر
والله يكتبلنا نصومه الصيام الحق يارب

حَافِـيَةُ الَقَدمَيّـنْ ولِبَاسِي المَطـرْ يقول...

انتي شنو نساااايه p;
خلف الله على ابوي p;

Common_Sense يقول...

welcome to the club

جربي brain exercises

شكلهم سخيف بس ينفعون :)

هذي اعراض الابتعاد عن الدراسة

http://www.lumosity.com/

عنيف يقول...

وصل طال عمرج وصل وتقولج الله يسلمج ويبلغج بالخير انشالله

SHAHAD يقول...

يااا حلااااتج وياا زين ذااكرتج
عندي نفس المشكلة
أيام الجاامعة كنت أنسى جنطتي بالمحااضرة :/
مو هني الفشلة
الفشلة لما عادي أتمشى مع البنات وعقب بروح سيارتي وأوصل عندها وأكتشف إني مو ماسكة جنطه بايدي :/
وعقب اروح القاعة ألقى فيها محاضرة شباب وأدش وعيوني بالأرض وأأشر على جنطتي
عاااد تخيلي نظرات الشباب ://

ههههه بس والله الحين لما اتذكر اموت ضحك : ))

esTeKaNa يقول...

ARTFUL
~~~~~~~~~~~
ياهلا ويا مرحبا بابو شيخة
اي اي عندي وعندك خير
اوصل لي المكان ومشتطة و امشي بسرعه
وآخر شي اكون ناسيه شنو ابي
:))
الله يسلمك ما قصرت
وسلامنا لشيوخه وام شيخة الله يحفظها

esTeKaNa يقول...

maha
~~~~~~~~
ياهلا ويا مرحبا بالمها
:)
تصدقين انا مبدعه وايد وايد اشرب قهوة
!!
وناطره ايميلج من قلب
:)

esTeKaNa يقول...

4
~~~~
:)

esTeKaNa يقول...

حمودي
~~~~~~
وراح يتأكدون اكثر اني نايمة بالدوام لما يدرون اني باصمة ست ونص
مو اقولك انا مكسب
:P

esTeKaNa يقول...

dm3t _almghor
~~~~~~~~~~~~~~~~~
ياهلا ويا مرحبا بالغالية
:)
يبيلنا كلنا فورمات حق الذاكرة
علامنا بس ننسى
:P

esTeKaNa يقول...

t.q8
~~~~~~~
اكتشفت ان النسيان صاير ظاهره
:P
انا بعد عندي مشكله بالأٍسماء
والمشكلة اذكر الاسماء اللي ما تعنيني
وانسى الاسماء المهمه
:)

esTeKaNa يقول...

Reem
~~~~~~
وي يا زين سوالف الريم
نورتي استكانة
وترا انا بعد بالضبط جذي اذكر اشيا ماحد ذاكرها الا انا والعكس صحيح
:))
علينا وعليج حياج الله

esTeKaNa يقول...

Chaotic pOsha
~~~~~~~~~~~~~~~~
ما شاء الله على هالأوادم
تين مبجر يعلقون
تيين متأخر يعلقون
ما يخلون أحد
:))
يبيلنا حل سريع حق ذاكرتنا تونا صغار
:)

esTeKaNa يقول...

الحــــٌر
~~~~~~~~~~~
يمة يمة
لا تقول الكبر شين
انا صج اخاف من الكبر
:P
تصدق انا بالضبط لما اسئل جني عيوز
مادري اشفيني انشف الريج
:)))
حياك الله يا الحر
علينا وعليك حياك الله

esTeKaNa يقول...

chandal/danchal!!
~~~~~~~~~~~~~~~~~~
هلا بالطيب الغالي
عزيز وشوفتك منوة
:)
عيل تقولين اكل قروضات؟
اي مالي الا القروضات
انا وراي مستقبل من الحين انسى مو خوش شي
:p
بس مو خوش دعايه
كل هالدعايه واخر شي ناسيه موبايلج
:)))
وان شاء الله بحاول ما اسئل اسئله بالنص جنها فاصل اعلاني

esTeKaNa يقول...

حَافِـيَةُ الَقَدمَيّـنْ ولِبَاسِي المَطـرْ
~~~~~~~~~~~~~~~~~~~~~~~~~~~~~~
أدعي لي
حالتي كسيفه
:p

esTeKaNa يقول...

Sn3a
~~~~~~
يا مسا السنع كله
سامحيني صار لخبطة شوي بالترتيب
:))
تصدقين سنعه
انا فعلا مرهقه جدا عقليا
وايد قاعده افكر بامور كثيرة وبالضبط هذي حالتي اوصل نص الشارع مادري وين رايحة او يروح الوقت ما احس
!!
عساها على خير
:)
يا زين رمضان
عسى ربي يعينا على صيامة ويتقبله منا يارب

esTeKaNa يقول...

Common_Sense
~~~~~~~~~~~~~~~
بجربها بعد شسوي
مع اني للحين ما ابتعدت عن الدراسه وايد
:)))

esTeKaNa يقول...

عنيف
~~~~~~
عسى ربي يحفظها يارب
حياكم الله
:)

esTeKaNa يقول...

SHAHAD
~~~~~~~~
هلا بالشهد
عاد جنطة بكبرها؟
LOOOOOOOOOOL
هذا واحنا تونا شباب
الله يستر علينا اذا عيزنا
:)

candle يقول...

عسل :)

ZooZ "3grbgr" يقول...

كيف اخذ سيارتي من خدمه ايقاف السيارات وامشي ثم اتذكر اني نسيت المفتاح عند الريال




مممممممممممم




تاخذين سيارتج وتمشين بدون مفتاح؟؟؟

إزاي بأأأأأأه


شكلي انا اللي ما قمت اركز

ودي اطوف بس ما اقدر

:p~~

استكنكن

لا تسوين فورمات بليييييييز

احبج واحب البروسيسر والميموري فيج

سوي كلين اب

وبعدها ديفراقمنت

وماس ابديت

ومافيج الا العافية انشاالله

:**

فريج سعود يقول...

الحال من بعضه


ومبارك عليج الشهر

BeeDoO يقول...

الكبر شين :D
لعبي يوغا تساعد على التركيز


رمضان .. جو من نوع آخر

مبارك عليكم الشهر

xname يقول...

استكااانه
أخاف زهايمر
LoooL
لا اظحك معاااج

تصدقين كله أقول لاختي انتي مفخره للكويت والأمه العربيه والإسلاميه
إذا بغيت منها شي هههههههههه


وأنتي أكبر مفخره للبلوقريين ..
ومابي شي:p

فيج زحمه أفكاار رتبيهم قبل لا تصير حوادث فكريه :p

البوست له رونق ثاني الصبح

The.One يقول...

لووووووووول
عاد والله قام أقول أشلون طرى على بالها أنه ولد خالتها سمعه خفيف بأذنه
ولا تطرحين موضوع التدقيق العنيف هذا



ذاكرتج عنيفه والله
اللهم لاحسـد ;p

esTeKaNa يقول...

candle
~~~~~~~~
يا صباح الخير على الناس السهرانه البارحة
:)

esTeKaNa يقول...

ZooZ "3grbgr"
~~~~~~~~~~~~~~~~~~
هلا بالطش والرش
:*
واي قلتي احبج جان اتبوسم
واشوف الشاشه على جنب
يختج احب الحجي الحلو انا
:Pp~
حبيبتي انتي فطينه
بس صج سيارتي عادي امشي شوي من غير مفتاح
في دقمه يم السكان اطقها وتشتغل
:)

esTeKaNa يقول...

فريج سعود
~~~~~~~~~~~~~
علينا وعليك
حياك الله
:)

esTeKaNa يقول...

BeeDoO
~~~~~~~~~
عاد أحب اليوغا
مالي الا اهي
:p~
علينا وعليك

esTeKaNa يقول...

xname
~~~~~~~~
يا صباح الورد كله
:)
واي عجبتين كلمه حوادث فكرية
الله يستر احس صج هذا اللي بيصير
LOL

esTeKaNa يقول...

The.One
~~~~~~~~~~~~
اسم الله علي اسم الله علي
اللهم بارك فيه ولا تؤذيه
:p~

alala يقول...

زعلانة على بوناصر @@ يا حظج

انا مرة علقت على اسخف اغنية ممكن تخطر على بالج و ما ادري منو تغنيها و ما ادري ليش حافظتها

ياوردة
قولي لي يحبني

اشوه نسيت الباجي

LOL

احس نفسي هزوء و انا اغنيها :P

esTeKaNa يقول...

alala
~~~~~~~~
lol
عيل سمعي الاغنيه الأسخف:
وعدا الليل على مهلو
على مهلو
وألبي يا عين من ألو
من آالو
.....
اغنيه قديمه مغبره حق ايهاب توفيق اللي انا اساسا ما اسمع له
ووترا ديري بالج لازم تتدلعين وانتي تقولين على مهلو
على مهلو
:P

Ra-1 يقول...

أبوي راح يدفع مخالفاتي ولقى مع مخالفات السرعة مخالفة إزعـاج!!!
:)
آنا ما أذكر إني أزعجت أحد هاههها

esTeKaNa يقول...

Ra-1
~~~~~~~~
أنتي آخر واحده ممكن تزعج احد
loooool
صج مخالفة غريبه
:P

Ra-1 يقول...

هاهها شفتي شلون آنا مظلومة
:p

EngineRaa يقول...

صباح الخير والسعادة يا اغلى استكانه ومبارك عليج الشهر الفضيل . تدرين ليش يصير معاج هالشيء اتحسين انج مو مركزة وتسالين اسئلة يعتبرها البعض داشه عرض بالموضوع هذا يرجع لطبيعتج برؤية تفاصيل الموضوع لاستكمال الرؤية كامله يعني مثل الشخص الى يركب قطع البزل، اما الشرود القصير الاجل يحدث لنا جميعا لما يكون فى بالج اكثر من موضوع مهم وخاص فيج وتحاولين اترتبينهم بتوافق مع بعض وافضل حل لهذه الحالة الورقة والقلم لترتيب الامور والاكثار من الماء وتناول الاغذية المضادة للاكسدة مثل الفراوله والكشمش ولا تكثرين من المنبهات والاغذية الدهنية(جني قلبت دكتورة)لوووول
:)