الخميس، يوليو 30، 2009

كن بخير

إليك:
في ليل الغياب سئلتهم أنا عنك
عساه مرتاح وسعيد؟
عسى قلبه لقى له أحباب؟
وعسى روحه لاقت لها وليف؟
عسى صدقت معاه الأماني
وتحقق لك كل يريد؟
.
.
وكان الجواب دمعة:
هو من بعدك حزين
غدر به زمانه
خانته الأماني
شرده الحزن على شوارع الألم
متغرب...مكسور..ووحيد
جرحه ضيعك
وضاع هو من بعدك
وتم في كل ليلة
يوقف على عتبة بابك.. مشتاق وخايف
يوصلك
وترده عزته عنك بعيد
..
..
..
سمعتهم..وما اكذب عليك
عاتبني أنا قلبي عليك
وشرهت عشرتك
وحتي طيبتي ..زعلت مني عليك

يومها
شاغلني قلبي عليك
ودمعت عين الوله وآه حرقت برد هاليل وسئلتني:
من يسرقك من بين الناس لحضن حناني؟
من يكفكف لوعة أحزانك في غيابي؟
كيف اخبيك فيني عن جرح هالدنيا وغدرها؟

من يغفي ليلك،ويمسح على راس تعبك،ويهمس لك:
تصبح على خير وورد ونوير
من يسمعك؟
من يسئلك:
كيف اصبحت؟
وين رحت؟
ووين جيت؟
من يفهم عيونك..ويسمع صمتك..ويعشق جنونك

يا أنته
يا مني
يا نبضة حزني وفرحي:
لا ضاقت عليك الدنيا
ولا ضيعك حزن صمتك والألم
ولقيت نفسك في ليله قيظ على رصيف هالدنيا وحيد
تعال لي
لايخوفك بعدي
مهما ابتعدت
بتم نجمة في ليلك تضوي لك كل طريق
يا سماي..ويا أول احلامي..،ويا أوفى من جرح روحي
انا انسى جروحي والحزن
بس تبقى انته سعيد
..
..
..
لا تردك خطوتك،ولا يبعدك عني كبر
لاتشيح وجهك التعب عني
وتردد كلام قايله قاسي كبير:
الدمع انخلق للنساء،
وعمر الرجال ما تشتكي
ما يحزن رجل..وعيب يبكي
تردد قساته...واسمعك تون
تدمع عينك
وتختنق
واختنق
.
.
ليه تسرف في حق حالك؟
ليه تقسى على نفسك وعلى احبابك؟

تعال
اترك عنك هالكذب وقولي:
شخبار عينك؟
بعدها تبرق كل ما زاد لي حنينك؟
وشخبار قلبك؟
من جرحة في غيابي؟
هو ما درا جارحك أن دنيتي وفرح قلبي
بسمتك
هو ما درا اني عشانك ألم عمري وانثره ورد بطريقك تدوسه
ولا تجرح الدنيا طرفك
هو ما درا اني انا لعينك البس لثام واركب فرس،وارضى بسهام الغدر في قلبي
ولا يمسك احد
!!
.
.
وينها عيونك؟
وينه جنونك؟
وينه قلبك والوله؟
وينك أملك والفرح؟
وينه صوتك ياللي سكوتك هدني
.
.
تعال لي واقترب
بتلقى لك بقلبي:
بيت كبير،وسرير تغفى به طفل غرير
واحساس قلب..بلا شرط يحبك،اقصى أمانيه:
تكون بخير
.
..
..
..
هذا اناا
ببقى هنا
مهما ابتعدت عنك
يبقى لك فيني قلب كبير يضمك
يسكن رجفة ضلوعك
يسندك
وبلا سبب..وبلا أمل...و بلا شرط
يحبك
ينتظراشراقك
ولحظة تريح فيها هم انهك اكتافك
..
..
وان فرقتنا الخطاوي
وخذاك الخوف وباعدك
غيب
وابتعد
بس قبل لا تغيب..لا تترك يدي
ضمها بكفوفك
اسمع حسها
رجفة خوفها
وحس حنانها
يمكن..في يوم تشتاقها
ويمكن
في يوم بتاخذني لك
بتدلني عليك
وبدخل انا لعقر قلبك
بفتح ستاير الصمت،وانفض غبار الوقت،وأرتب بعثرة دنيتك:
هذا هنا..وهذا هناك.
ذاك انساه..وهذا خله هنا
بعطر هالمكان،وذاك ابخره،وانثر شذى احساسي فيك
بتطير حولك فراشاتي
وتزهر في دينتك ورود
بتغدي هالدنيا احلى
وبتشوف للفرح طعم وصوت ولون
وبتتنهد
بتحس هالدنيا غير
وبسئلك بعدها:
اشلونك؟
وتبتسم وتقول:
انا بخير
وابتسم
وأخفت النور عشان تغفى وتنام
واترك بجانب سريرك وردة
وأطرف الباب
وأرحل وأكتب لك على طرف الورق كلمة:
معاي
بدوني
ما ابغى شي
ي
كفيني تكون بخير
......
همسة السفر بآخر أيامه:
كل زين أشاهده وأنتم بعيد
منوتي ليتك معي
وإن سهرت الليل أهوجس بك وأعيد
هل لأجلك مدمعي
وأنت هاجس خاطري
وأنت فرحة ناظري
يا قريب ويا بعيد
فيك أمسي ..وحاضري

هناك 21 تعليقًا:

BeeDoO يقول...

يكفيني تكون بخير
ختام حلو

Dark angel يقول...

كتابة رائعة وفيها مسحة حزن

وان كان للفراق ألم فالوقت كفيل بعلاجه مهما قيل بوجود علاجات أخرى لن يشفيه سوى الوقت ..

تحياتي لك

:)

alala يقول...

ترجعين بالسلامةان شاءالله :)

ikhalifa.com يقول...

Well written
I like it :)

Um il sa3af wil leef يقول...

الله ..أبدعتي

Manal يقول...

كم افتقدت كتاباتك يا الغالية
:)


لي عودة

mantovani يقول...

ليكن بخير

===

و لكل من يريد ان يكون بخير
ليقرأ هذه الكلمات الجميلة

استكانه ...

الى ان نلتقي ... كوني سعيدة


مانتوفاني

الخيلاء يقول...

وينها عيونك حبيبي
سافرت مثلك حبيبي

:

عوار قلب
:

كوني بخير

وترى ولهنا عليج يلا عاد
مس يوو وايد :**

Reem يقول...

عساك بخير ..
كثر ما يحمل إحساسك ، نوايا خير

:
:

إستكانه
آلمتني ..
و أحببتها جداً

عساج بخير :*

DanDash يقول...

أول مرة ما أقدر أكتب و أرد

Najmah يقول...

تعرفين لما قلبج يتنح
وتخنقج العبرة؟
!!!
استكانة
:***********
احبج
كثر ماتعبتني الحروف
وكثر مالميت احساسي فيها
يالله ردي
ولهانة عليج اكثر مما تتصورين
:*****

أثـَـر ... يقول...

مسـافِرة , في بُعد عنْ منآي الوطـَن

يجتاحـُنيْ بضعٌ من هـَذا الشـّعورْ

أتيت متاخرة يقول...

استكانة
أيتها العذبة
كن بخير استثارتني كثيرا
فهذا أقصى ما اتمناه

كوني بخير انت ايضا

candle يقول...

تدرين ان هذي اغنية السفر عندي .. ما أحس اني مسافره اذا ما سمعتها أساسا ما أذكر اني سافرت بدونها ....

وأنت هاجس خاطري
وأنت فرحة ناظري
يا قريب ويا بعيد
فيك أمسي ..وحاضري

شكرا بوست رقيق ظريف نفسج :)
لا تطولين علينا

صــوت الــمــدامـــع يقول...

كن بخير

ياهذا البعيد اينما كنت

:’(

kazmawy يقول...

هو راح يكون بخير دام انتى بخير يالغالية طمنينا عليج شلون السفرة وشلون تقييم المسابقة الخليجية ؟؟طلعت النتايج ترى صوتنا لج واشتغلنا مفاتيح انتخابية بعد :))

أُمْ حَــسَـــنْ يقول...

welcome back estekana X

marypoppins يقول...

استكانة.. مبدعه كالعاده
الله يحفظج.. وايد احب اقرالج بس أول مره اعلق ..دمتي بخير :)

esTeKaNa يقول...

BeeDoO
~~~~~~~~~~
حياك الله
:)





Dark angel
~~~~~~~~~~~~~~
الاروع هو مرورك اختي العزيزه
حياك الله
:)








alala
~~~~~~~~~~~
الله يسلمج شكرا
:)








ikhalifa.com
~~~~~~~~~~~~~~~~~
سعيده لأنك حبيتها
شكرا
:)










Um il sa3af wil leef
~~~~~~~~~~~~~~~~~~~~~~
قليل مما عندكم
:)







Manal
~~~~~~~~~~~
أنا
وكل استكاناتي
نفتقدك اكثر من ما تتصورين
:)
بانتظارك
عسى وصلت لج سلاماتي؟
:*









mantovani
~~~~~~~~~~~~~~
يا مرحبا باخي مانتوفاني
:)
سأكون سعيده طالما لي أحبة يقرأون بوحي وكلماتي
شكرا لك
:)












الخيلاء
~~~~~~~~~~
انا مو ولهان انا
دنيا من الوله
:))
كاني بعد شوي بركب الطياره وراجعين يا اغلى بلد
:**
الله يحفظج ويسعدج
كل ما اشوف تعليق منج افرح
الله لا يحرمني
:)







Reem
~~~~~~~
بعيدا عن الألم
كوني دائما بخير
:)








DanDash
~~~~~~~~~~~
من وين طالعه الشمس اليوم؟
ترا اشتقنا لك
:)
مجرد وجودك يسعد قلب استكانة
بس قولي لي:
انتي بخير؟








Najmah
~~~~~~~~~~
صديقة قلبي وروحي
عساج بخير؟
:)
يالله كلها جم ساعه بركب الطياره وبرجع
ولما ارجع بكون بروحي
تحمليني بسولف لج شهر
:))
فديت اللي قلبها يتنح
عسى عينج ما تدمع الا من فرح
يا حبيبة قلب استكانة انتي
:**








أثر
~~~~~
سعيده لوجود أثرك هنا
:)









أتيت متاخرة
~~~~~~~~~~~~~~
سأكون بخير طالما هناك قلوب عذبة كقلبك يا صديقتي
:)
سلامي للمزاين عيالج
الله يحفظهم










candle
~~~~~~~~~~
قمة الحب:
ان كل زين تشاهدينه تتمنين ناس معينين معاج
الناس الصادقه اللي تحبج من قلب
:)
ماني مطوله
كاهي ساعات واركب طيارتي
ادعي ربي يحفظني راجعه بروحي
:)






صــوت الــمــدامـــع
~~~~~~~~~~~~~~~~~~~~~~~
زيارتك الأولى نورت مدونة استكانة
حياج الله
:)





































kazmawy
~~~~~~~~~~
يا مرحبا بأخوي الغالي
عسى ربي يحفظك ويسعدك وين ما كنت
:)
خوش سفره سريعه بس ممتعه،وكاني ساعات وراجعه الكويت من غير اهلي من غير شر
:)
بالنسبه للمسابقه فلا خلا ولا عدم،ربي رزقني اخوان دنيا انت من اولهم ماقصرو وياي
التصويت انتهى اخر يوم بشهر سبعه
المدونات اللي خذت اكبر عدد بالتصويت ينعرضون على لجنة التحكيم وتالي تطلع النتيجة
:))
صدقني مجرد وقوفكم وياي فرحني
هذي اجمل نتيجة
الله لا يحرمني
:)










أُمْ حَــسَـــنْ
~~~~~~~~~~~~~~
شكرا ام حسن
:)
يارب تكونين بخير








marypoppins
~~~~~~~~~~~~~~~~
وتو ما تبارك البوست
:)
عسى ربي يحفظج ويسعدج
نورتي البلوق بتعليقج
:)

Manal يقول...

بعد جبدي
وصلت
والله وصلت وصار عندي شوق اني اشوفج
واللقاء بالكويت
:)
قريبا ان شاء الله

aisha يقول...

ماشاءالله عليج استكانة كلماتج أكثر من روعة يخزي العين بصراحة انا ماعرفتج الا من بنت عمتي كله تقرى عنج من قترة طويلة فلما كلمتني عنج وقالت عن كتاباتج انها حلوه صج ماتوقعت بهالروعة ماقول الا الله لايحرمنا منج ودمتي سالمة

atooosha