الثلاثاء، يوليو 07، 2009

الأخطبوطه

اجتماع أول
~~~~~~~~~
الساعة السابعة الا ربع يرن هاتفي برقم غريب يقطع تسلسل أحداث الحلم في نهاية النومة
اناظر الهاتف رقم غريب،احقره واكمل النومة دون انتبه للساعة
اصرار المتصل يحتم علي ان ارد وكانت المفاجأة المتصل:
مديري بالدوام
:D~
استكانة وينج؟
واناظر سقف غرفتي وافكر:
انا وين ؟وانته مين؟وعايزين ايه؟
!!
هلا بو يوسف امرني
فلانة ولدت
ماااااااااشاء الله شيابت؟
استكانة مو مهم اشيابت تعالي بسرعه عندنا اجتماع واهي ماسكة كل الشغل ،روحي المكتب اخذي الملفات وتعالي وبلا بلا بلا
.
.
.
قدرة قادر انا بالشارع،مخده لابسه لفه وتتمشى،الفارق مابين الاتصال ووصولي وقت قصير،اشلون خلصت مادري،أقرأ الملفات بسرعه ،هذه اول مره احضر اجتماع من هذا النوع،احساسي مختلط،هو سيكون مسؤل عن كل شئ،اي سؤال يرد زميلي،وأنا حافظة لي كلمتين وكاشخين فيني زياده عدد
السمت ،رزه الظهر،واتصفح بالأوراق وانا مادري وين الله قاطني وفجأة مسج:
اقعد ياللي كاشخ
هالطول ويحضر اجتماعات

!!
رفعت عيني واكتشفت ان خالي موجود بالاجتماع ممثل عن جهة أخرى ماهو احساسي بالضبط؟
مممم احساس ياهل الروضه اللي حافظ شعر ولما شاف امه وابوه ،استحى وتشرقد ونسى شنو بيقول

:)))
اللي صار خلاني افكر:
ليش الطفل ما يستحي من الناس بس اذا شاف اهله استملق واستحى؟
وليش اهلي والناس القراب مني انا مانعتهم منع تام من قراءه بلوقي؟




يااااااااااااااااااااارب
~~~~~~~~~~~~
ساعه وربع وهو هنا في المقعد المقابل يشرح لي الموضوع وانا مبتسمه ومنصته بكل حواسي،عندما انتهى كان لابد ان اشرح له ابعاد الموضوع بشكل صحيح،الدنيا اخذ وعطا وحوار،اكتشفت ان من كثرة اقتناعه بكلامه مايسمع،والأسئله معه من نوع:
شسمك؟
30
عمرك؟
حامد
!!
قلت ميخالف يا استكانة،الصبر الصبر،واظل اتكلم معه ويقاطعني،الى ان اكتشفت انه اهو على خط فحيحيل وانا على خط الملك فهد لا يوجد نقاط التقاء،تعبني
:(
الحمدلله أذن الظهر
يارب يارب ياااااااااااااااااااااااااااااااااااااااارب ما يرد




الأخطبوطه
~~~~~~~~
بخاطري اوقف بمنتصف هذا الممر وأصارخ من مفرق راسي :
انا بنت لها يدين وعقل واحد فقط لا غير
ماني اخطبوطه

!!
استكانة اسم الله عليج شاطره،واديلووو ملفات،والله انا انسانه طيبة ينقص علي بمعسول الكلام،بس لا والف لا ان وصلني ملف واحد زياده الحين بحذفه من الدريشه اللي يم مكتبي وان شاء الله يطيح على راس اللي في بالي
:P~
ومن باجر بمشي كله مفهيه وسرحانة
وبسوي روحي ما افتهم شي ولن يؤثر فيني معسول الكلام
!


الفضالة
~~~~~~~
مرت سنه على فقده
دون اهتمام يرقى لمستوى حدث مؤلم كهذا الحدث
الله يفك عوقه يارب ويقر عين اهله وعين اهل الكويت كلهم فيه
شكرا لأستاذ حمام على تبني قضية الفضاله
هو ومركبنا وجميع المدونين
انتر كويت
~~~~~~~~
عايشه بحيرة من أمري مع أخوي انتر كويت
أن كتبت بوست بالدوام قالي ما شاء الله اشلون تكتبين بالدوام
الفجر :يقولي بذمتج هذا وقت
الحين كاتبه الظهر
وما ادري توقيت هالبوست راح ايوز له ولا لا
وسؤالي:
هل للبوست أوقات معينة؟
:P~
:)

هناك 76 تعليقًا:

ikhalifa.com يقول...

أحلى بوستات تكتبينها يوم تتحلطمين

إنزين ألحين دامج أخطبوطة
إذا أبغي أقولج كفج
لازم أعيدها ثمان مرات؟
:P


دعواتي الخالصة لرجوع الفضالة إلى أهله
و بإذن الله تقر عينكم فيه

mtfa2el يقول...

اييي يا الدنيا
صرنا نكتب تعليقات و محد يعبرنا
زين انحط التعليق أصلا
:p

و الله على اليهال انا اكتشفت انه كل واحد أملق من الثاني .. ما ينعطون ويه زيادة عن خمس دقايق
هالمرة يقول شعر
لا ول

mtfa2el يقول...

بعدين انسي فكرة الدعاية خلاص باشوفلي بلوق ثاني أسوي الصفقة معاه
:p

الحــــٌر يقول...

شوفي استكانة
اذا انتي بالملك فهد واهو بفحيحيل
يعتمد وين رايحين يعني اذا حادرين الديره هذا ويهي اذا اقنعتوا بعض
بس اذا رايحين صوب الشاليهات الطريج الي اهو فيه راح يخلص وغصب طيب بيي بنفس طريجج

بسسسسسسس
على ما أظن انتو رايحيين الديره
صح

:)))

دمتي بخير

Sweet Revenge يقول...

"ولن يؤثر فيني معسول الكلام"

حطي عينج بعيني هههههه
مو يا يبنا ورا الا معسول الكلام والله
;)


حسين الفضاله
الله يفك اسره ويفرج كربه
امين

Kuw_Son يقول...

أهم شي تفهين .. بو قليب العين عليه و الكل يقط الشغل فوق راسه .. خلج مفهية كثر ما تقدرين ..

و ضحكتني سالفة الخال هههههه .. فعلا شرحج للشعور اللي حاشج واقع نعيشه بعض المرات :)


و أنا بعرف شلون مانعة أهلج و اللي يعرفج حيل من قراءة البلوق ؟

أتيت متاخرة يقول...

ويييييييييه الحمد لله آنه اجااااااااااازة ومحد يقدر يقطعها ويقولي دااااااااااومي بالمدرسة
المدرسة مبنده
بس هالنتفه عارف لي من تغمض عيني الصبح وامه مداومه يعطيني
واااااااااااااااااااء

مخده لابسه لفه
عجبتنييييييييييييييييي مووووت

مجربه الطلبة اللي عندي شحليلهم ومن يشوفون الأم يتخسبقون اشلاااااااااااااا يا حظي خل اليوم يعدي على خير


الأخطبوطه
~~~~~~~~

كل شي له حدود يا استكانه
حطااااي حدود وتعاوني بحدود
سمعتااي


الفضالة
~~~~~~~
ربي يرده لكم سالم غانم

esTeKaNa يقول...

ikhalifa.com
~~~~~~~~~~~~~~~~~
اللهم امين يا اخوي
سنة مو شوية بغيابه
الله يرده بالسلامة

esTeKaNa يقول...

mtfa2el
~~~~~~~~~
التشره دلاله على شنو؟
كبر السن وانا اخيتك
:P~
ما مداني ارد
من الصبح وانا بلوية وهذا البوست اثبات
:)
لا لا لا تسحب العرض
انا قاعده ادور مصدر ثاني للرزق بعد ما اصير مفهيه
:P

عنيف يقول...

عادي شي عادي صدقيني الصدمات الي صارت اليوم شغله عاديه وانه خالج قاعد يوهقج لسبب واحد انه يعرف شخصيتج وشلون يخالفج الراي بكل بساطه والي يبي يقط شغله عليج قولي له اوكي ولا تسوينه وشوفي منو الي راح يتوهق انتي ولا اهو؟؟؟

esTeKaNa يقول...

الحر
~~~~
ما تتخيل شكثر كنت منبهره وانا اقرا كلامك
عطيتني امل
وفهمتني عدل
الحين
يا الف وياه ونكمل صوب نويصيب
يا نروح الديرة
:)
كنا رايحين الديرة
وما زلنا
بس ما زال عندي امل
:P~

esTeKaNa يقول...

Sweet Revenge
~~~~~~~~~~~~~~~~
أحط عيني بعينج؟
ما أئدرش ما أئدرش
:P~
انا شمودرني غير معسول الكلام؟
هذا بلا ابوك يا عقاب
:)))
اللهم امين

esTeKaNa يقول...

Kuw_Son
~~~~~~~~~
خليج مفهيه كثر ما تقدرين
lol
هذي اجمل نصيحة سمعتها بحياتي
:P~
ماحد يدري عندي بلوق
واللي يدري انا مستحلفته بحب ان ما يفتح البلوق دام انا بكبري موجوده عندهم
ومهددتهم اني راح ادري
hehehehe
تحس الموضوع غريب؟

esTeKaNa يقول...

أتيت متاخرة
~~~~~~~~~~~~~~
ياهلا بالغالية
اي اجازه امومه والمدرسه مبنده
يا بختج عسى ربي يهنيج
انا صايره ما حلم اني اكون عروس
احلم اني اكون ام واخذ اجازه امومه
:P~
اللهم امين
يزاج الله خير

Najmah يقول...

looooooooool
انا عاجبني العنوان
اخطبوطة
^_^
استكاااانة
تبين ايي اساعدج؟
ترى الشغل نعمة
كلش مو حلو احساس البطالة
:\

لحظه يقول...

يا حلوج يا استكانه ضحكتيني مخده لابسه لفه أنا ألحين أمومة حذفيلي ملف دام الشغل متكود عليج ترى أعين وأعان وانا أختج
دام أنا وياج نفس التخصص

طائر بلا وطن يقول...

"مخدة لابسة لفة و تتمشى"

LOL



ربي يجازي هالإجتهاد و الشطارة بمنصب
مرموق و مستقبل بهار .. منصف على الأقل


الليالي الظلما دايما بعازة بدر
و يوم أظلمت عليهم على طول قفزتي
في اذهانهم

هذا دليل على انهم عارفين أدائك
و واثقين من فهمك و المامك و درايتك


مأجورة

يا

الاخطبوطة
:P

ميمة السبيت يقول...

* عاش الخال يحليله مسجات بعد

شوفي ساعات الشغل و اللويه يضيع الوقت ماتشوفين الساعه إلا صارت 2 مشالله مادري شلون يمر الوقت و اعتقد انه شي وايد زين اخلينا انريح عقولنا من التفكير اللي ذابحنا

ركزي بملفاتج و الله يعينج

nanonano يقول...

شعور وايد بايخ..تقومين و تروحين الدوام على عيله

أنا أقعد طول اليوم بس قلبي يرقع

و أتفق معاج..ليش خلينا اللي يعرفونا يعرفون أن عندنا مدونه

و أنتركويت..بو وليد..يمون..أهوه العمده

ميمة السبيت يقول...
أزال أحد مشرفي المدونة هذا التعليق.
Deema يقول...

قريت المقال اللي فيه مقابلة معاك انتي و الزين و كذا وحدة من جميلات المدونات

مما استأنست بقراءته
:)

أكملي مشوار التخطبط
;p

Safeed يقول...

ليش الطفل يستحي من أمه و أبوه؟

سهلة .. لأن الطفل لما يحفظ القصيدة ، يحفظها عشان يقولها جدام الناس ، بالتالي تقديره لنفسه يكون من تقدير الناس اللي يشوفونه لأول مرة له

هالشي يسمونه
having mode

و هو عندما يقيّم الإنسان نفسه بناء على ما "يستحوذه" و ليس بناء على ما "يملكه من ملكات داخلية" .. يستحي من أمه و أبوه و حتى جيرانهم و عيال عمه و كل شخص قريب منه لأنه هو عارف تقييمهم له شنو .. لذلك ما يحب إنه "يُعاد" تقييمه مرة ثانية من قِبلهم

هذا باختصار شديد

:)

بعدين جنه هالسؤال مكرر و مجاوبه من قبل انا هني!!

...

الاخطبوط له عدة أيدي .. و لكنه ما يملك عقل :)

هذا هو الفارق

jonoon 3aqel يقول...

الله يكون في عونك...

هاي كله تأثير سفرة هلك!!!!

الله يحفظك و يحفظهم...

و على منع الاهل من البلوج...
أنا اصلا ما قلت لهم ان عندي واحد :)

تحياتي

ARTFUL يقول...

لا ظلمتي بختج في التقاء شارعج وشارع خالج بس عند جليعه

الله يعينج على الدرب

;p

انا لو اقوم وباجي نص ساعه على الدوام او ربع ساعه ما اقدر اطلع على طول لازم اسبح

لاني اذا لبست وطلعت على طول راح اكره عيشتي طول فترة الدوام

!!!!

فآرتفل والتأخير ربع

!!!!

من التركيز العالي ما طليتي بوجوه الحاظرين

;D

الله يرد حسين بالسلامه

بس الوقت فاشل والأفشل منه لما تنزلين بوست بالويك إند

;p

Hope يقول...

الله عليج يا استكانه
ذكرتيني بأيام الروضه لما كل ما اتيي امي ابجي
اســـتـــحـــي اسوي شي جدامها لوول
مره عمتي قالت لها يبا خلاص لبسي برقع و روحي عشان ما تعرفج و تبجي

.
.

كلش مو شي لما تكونين طيوبه و تساعدين الناس و بعدين يستغلونج و يمصخونها
الشاطر و اللي يسوي شغله بضمير اهو اللي يكدشونه
بهالزمن صار لازم نتعلم نقول لأ

.
.

الله يرد الفضاله سالم يا رب
و يقر عين اهله و يفرح قلوبهم

.
.

استكانه ... تسلم ايدج على هالبوست الحلو

ReLaaaX يقول...

استكانه آنا برد اعلق بس الله يعينج يالاخطبوطه;p

عفره يقول...

لا والله ماله وقت و لا له فرصه
بس حلوه هاااذي امام الامر الواقع
مشكله اذا كان الاتكال عليج و انتي متخربطه و مو عارفه شتسويين
و تبين تبيضين الويه
يالله الحمدالله عدت على خييير
و كافي انج سويتي إلي عليييج

~ هند ~ يقول...

استمري في كتابة الدايري :)


>> ممكن رابط المقابله؟

سالفة قلب يقول...

مخده لابسه ملفع
هههههههههههههههه
هههههههههههههههههههههههههههههههه
هههههههههههه
هههههههههههههههههههههههه
ههههههههه

تخيلت الوضع شفت المخده واهي اتمشى وكاشخه بالملفع

ياحلات المخده والله
(;

سالفة قلب يقول...

مخده لابسه ملفع
هههههههههههههههه
هههههههههههههههههههههههههههههههه
هههههههههههه
هههههههههههههههههههههههه
ههههههههه

تخيلت الوضع شفت المخده واهي اتمشى وكاشخه بالملفع

ياحلات المخده والله
(;

Nikon 8 يقول...

تصدقين إني بالإجتماعات آخذ راحتي وأتكلم ولكن من يكون واحد يصير بالإجتماع أصير طرمه
!!!
ما أدري ليش؟؟؟؟

الزين يقول...

انا لابسه الخضر بو وردة ورايحة هناك على الوعد

كلمة شحدا ما بدى لك

:)))))))




لا تنسين تنسقين بالألوان


اهم شي الفيونكه تكون ضابطه


والفحص جاااااري

حلم جميل بوطن أفضل يقول...

أهم شئ الحلم !! شنو كانت أحداثه ؟؟ أنا كنت موجود ؟؟

ikhalifa.com يقول...

هاهاهاها
توني أستوعب سالفة حامد

أنا أقابل عشرين واحد في اليوم من صنف 30

ضربي20 في 30
و اثنين باليد
وزعيهم على ايادي الأخطبوط
كم يطلع عندج؟







بعد ما يبله تفكير


حامد
:P

الخيلاء يقول...

يا مساء الظهر
:)

ياكرهم لي كشخوا فينا الدوام
اتحسين مالج سالفه بس زياده عدد
بس بعد اوامر عليا لازم

:

اممم الاخطبوطه على وزن الامبراطوره
:p

:

الله يرد الفضاله الاهله و يفرحهم بشوفته
:

تبين بمبكن كيك لول
متسلطه عليج انا
;D


:

ضيقتي خلقي على النقصه
شكلهم الي يشتغلون خذوها يازت لهم
فشلوني :"(

بس حقج بالفايت مو بالبايت

:)

جنون إحساس يقول...

اسم الله عليج يالأخطبوطة
أما المخدة اللي لابسة لفة كلنا مخدات الصبح
لوول عجبني الوصف


والله يرد الفضالة لأهله سالم

Eng.Nadia يقول...

مسااااءك فل يا اغلى استكانه انا اتابع مدونتك من مده بس هذي اول مره اكتبلك كومنت بس بصرااااحه وايد واايد اسلوبك حلو ويفرح القلب ولما اكون مضايقه وودي اريح وافصل ادخل الى مدونتك واعيش مع سوالفك لانها اهى نفس المواقف الى نعيشها كل يوم وكل
لحظه بس قاعده اشوفها بمنظور ثاني.ويعطييج ربي العافيه
بأقولك سررررر الي لفت نظرى لمودونتك اسمها لانى اعز الجاي وايد لووووول

على نفسها جنت براقش يقول...

تتوقعين تسوى فلانه استقبال؟؟

ويهك واتى بالسياره
هلى يا ترى كان فيه اثر سفطات المخده؟
العيون ما زالت مبققه لان المخ ما استوعب انه صاحى؟

ولما قال خالك هالطول قصده مادى يعنى انتى طولك ربه متر
:)

والا معنوى يعنى انك صغير السن و مدلل



خط فحيحيل
والا فحاحيل؟؟؟

:)

تبين اكثر

بالبوست الياى

:P

لكن فى مكانه سؤالك
ليش نستحى من اقرب الناس لنا؟؟

اذا عرفتى لا تخبين و شاركينى الحل

Sn3a يقول...

خنت حيلي احس كسر فيج لما قال مو مهم شيابت
خو شوي شوي شفيه مستعيل

لوووول ضحكني خالج لما دزلج المسج

مو ياحبيبتي يا استكانه
نيتج صافيه عشان جذيه ماتدورين ماوراء المدح
الناس الحين تمدح الناس اللي يستاهل
لان يكون قد المسئوليه ..مسئوليته...ومسئوليتهم!

الفضاله!
معقوله الكويتي جذيه رخيص عندنا؟
معقوله احنا رخاص عندهم!

سبحان الله
لو امريكي اهو المصيود
جان حتى احنا بجينا عليه
بس اي مقيوله
منهم لله

لؤلؤة يقول...

أحس فيج صدقيني استكانة
مو أخطبوطة...بس سبع صنايع على قولتهم

:)

maha يقول...

أخطبووووووطة

أحلى شي بالتدريس عطلة الصيف

ومنها للأعلى يا أخطبوطة

alala يقول...

صباحك سكر :)

شوفي يا ست البنات انا قبل كنت بشركة شهادتي هندسة بس و حياتج كان عندي مدير ناقص يقول لي ما عليج امر ييبي الهوفر و نظفي اهنيه !!! اكتشفت ان لما يعطيني شغل اخلصه على طول و غيري ينام الملف على مكتبه ايام و اسابيع LOL

الشغل نعمة و يعطيج احساس انج تحللين معاشج و وقت الدوام يمر بسرعة

اللهم كما جمعت بين يوسف و يعقوب اجمع بين حسين الفضالة و اهله

اللهم يا رب الضلال يا راد الضاله اردد علينا ضالتنا بعزتك و سلطانك فانها من فضلك و عطائك

اللهم يا جامع الناس ليوم لا ريب فيه اجمع بين حسين الفضالة و اهله

بنت الشاميه يقول...

استكانه انت لفلفتي الموضوع علينا بسرعه
لو سمحتى نبى بوست طويل عريض
شقاااااال خالج لما شافج بالاجتماع وخلال وبعد الاجتماع...وبالزواره. اهم شيئ بالزواره


وكتابة البوست ما لها وقت.....كله على المود والمزاج ....وهو الاساس فى تحديد وقت الكتابه

ترا حتى كتابة التعليقات او الرد عليهااااا.....تحتاج مود رااااايق
يارب
حسين الفضاله رده لنا سلام يارب
رحمتك وااااسعه
اللهم امين

esTeKaNa يقول...

عنيف
~~~~~
صاج والله
:)
حيالله العنيف

esTeKaNa يقول...

najmah
~~~~~~~
بالعكس يا صديقتي
احساس البطالة عجيب
انتي حرة نفسج
تلذذي ما عندج احد ودج تنتفينه وتجاملينه
looooool
لا خلا ولا عدم
المفروض تكونين فخورة وانتي رفيجتج اخطبوطه
hehehe

esTeKaNa يقول...

لحظة
~~~~~
وي يا بعد قلبي قلبج انتي
حسيت شاشه اللاب توب دريشه وبحذف ملفات
:P~
حمدلله على السلامة ومبروك ما ياج
ما تقصرين ،عسى ربي يحفظج ويسعد قلبج ويبارك لج بالبيبي ويطرح فيه البركة
يكفيني المشاركة الوجدانية
:P

esTeKaNa يقول...

طائر بلا وطن
~~~~~~~~~~~~~
تدري؟
لو احد يقولي الليالي الظلما دايما بعازه بدر
يمكن يمكن
اشتغل اربعه وعشرين ساعه مثل ماكدونالدز
:P~
مع اني قايله ما راح يأثر فيني معسول الكلام
:))
ربنا يجبر بخاطرك ويسعدك
مثل ما انا شاقه الابتسامة من هني لي هني مع تعليقك
:)

esTeKaNa يقول...

ميمة السبت
~~~~~~~~~~~~
تدرين؟
ودي احبج من قلبي
:*
يزاج الله كل خير على التعليق الاول

وصاجة الشغل وايد مفيد كافي تصدين عن الحجي القيل والقال
:)

esTeKaNa يقول...

nanonano
~~~~~~~~~~~~~
اسم الله عليج الرحمن الرحيم
وصفتيها عدل
قعدت طول اليوم احس قلبي يرقع وقاعده اركض
:)
وطبعا بو وليد يمون افا عليج
:P

esTeKaNa يقول...

Deema
~~~~~~~~
شكرا يا الديمة
سبقتيني
ناوية اكتب موضوع بالمناسبه
:)
حياج الله

esTeKaNa يقول...
أزال المؤلف هذا التعليق.
esTeKaNa يقول...

Safeed
~~~~~~~~~
سفيد الحكمة
دائما وابدا تعليقك ذو حكمه وقيمة
ما شاء الله عليك
:)

esTeKaNa يقول...

jonoon 3aqel
~~~~~~~~~~~~~~~
ياهلا ويا مرحبا
آمين واجمعين ان شاء الله
:)
وفعلا
احسن شي ماحد يدري عن المدونة
:)

esTeKaNa يقول...

ARTFUL
~~~~~~~~~
حيالله ارتفل
:)

على نفسها جنت براقش يقول...

ماكو شغل

بس حبيت اتليقف و انت تردين على التعليقات
:)

esTeKaNa يقول...

Hope
~~~~~~
يختي يختي وااااازين اليهال اللي يستحون
قاعده اتبوسم جني اشوفج بيبي ومستحيه
:))
الجواب بتعليق سفيد ما شا ءالله عليه

وفعلا انا صايره شخصيه مو انا
عادي اقول لا ولا جنه العيد
ولا حتى قهوة بيخلوني اسويها وافتر عليهم بعد هذا اليي ناقص
:P

esTeKaNa يقول...

براااقش
~~~~~~~~
نطري امي انتي نطري
يايج الدور
:PP~
loooooool
يا حلو اللي متربعه ومجابلتني والله
:**

esTeKaNa يقول...

ReLaaaX
~~~~~~~~~~
حياج الله اي وقت
:)





عفرة
~~~~~
إي والله الحمدلله
:))





هند
~~~~~
مو لاقية الرابط
:(

esTeKaNa يقول...

سالفة قلب
~~~~~~~~~~~~
يا زين اللي تكركر والله
شفتيني اتمشى وراج بالبلوقات واتحلى عليج
هههههههههههههههههههههه
واي على طاري المخده
تعرفين الزوقه ام قحفيه؟
واااااااااااااااااااااي
مال من يلبسها لفه ويتمشى وياها
:PP~
ولهانه عليج كثر ماكو بعد
:**

esTeKaNa يقول...

Nikon 8
~~~~~~~~
عندي وعندج خير
والتفسير في تعليق سفيد الحكمة
:)

esTeKaNa يقول...

الزين
~~~~~~
loooooooooooooooooool
شرقت من الضحك
هههههههه
ماحد عارف الغمنده الا انتي
:P

esTeKaNa يقول...

حلم جميل
~~~~~~~~~
راجعت ذاكرتي
قلبت المشاهد
مني مناك
مالك اي اثر
:P

esTeKaNa يقول...

ikhalifa.com
~~~~~~~~~~~~~~~~
loooool:))
الله يعينك وياجرك
يتعبون
التعامل بروحه معاهم جهاد وصبر

esTeKaNa يقول...

الخيلاء
~~~~~~~
يا مسا البمبن كيك
:))
يا بعد قلبي انتي
انا اللي فشلانه
تأخرت وايد وانتي ادرا بالظروف
كافي ادري اني طريت في بالج وتنقصتي لي شي من قلبج
حبيبتي انتي
:*

esTeKaNa يقول...

جنون احساس
~~~~~~~~~~~
وصف حرفي لللحال الصباحي
:)
حياج الله

esTeKaNa يقول...

Eng.Nadia
~~~~~~~~~~~
ياهلا ويا مرحبا بمهندسه نادية
تو ما تبارك البلوق نورتينا
:)
عسى ربي يحفظج ويشرح صدرج ويونسج بالعافيه مثل ما ونسني تعليقج واسعدني
:)
حياج الله

esTeKaNa يقول...

على نفسها جنت براقش
~~~~~~~~~~~~~~~~~~~
فيني ضحكة
ماعرف ارد عليج وانتي قاعده مجابلتني
:PP~
اي سوت استقبال
رحت لها
مو عبالج انا مو سنعه
نو نو انا سنعه اوجب الناس
:)))
انتي لاحظتي اني اقوله اشيابت؟
لوووووووووول
يعني هل يا ترى كان في لحظتها عبالي المدير يدقدق يبشرنا فلانة ولدت مثلا
:P~
اما خالي
فاللي اعرفه عن نفسي ماني طويله
بس مو قصاصه
so
كان يقصد صغير السن ومدلل
وغزال وما يصيدونه
شكو غزال مادري بس حبيت اقولها بهالمناسبه السعيده
:PP~

اما السؤال
فانظر لسفيد الحكمة
:))
ليش حسيت اخر تعليقج بينط محمود سعيد للعطور
جنه فاصل اعلاني
وانتظرونا
لووول

esTeKaNa يقول...

Sn3a
~~~~~~~
في واحده تسئل مديرها فلانه شولودت؟
لووووول
حده كسر فيني خبني الله يهديه
:))
يا بعد قلبي
يا ليت اكون بالصفاء اللي تشوفينه
:)
صج موضوع الفضاله يكدر
الله يرده سالم يارب

esTeKaNa يقول...

لؤلؤة
~~~~~~~
يا حسرتي
سبع صنايع والبخت ضايع
هذا المثل
خوفج من البخت الضايع
:P~

esTeKaNa يقول...

maha
~~~~~~~
عيز مني ابوي صيري مدرسة
قلت ابد طموحي
ها خلي طموحي يفيدني
:P~

esTeKaNa يقول...

alala
~~~~~~~
مسائك ورد
:)
حيالله مهندستنا
انا استمرض اذا صرت من غير شغل بسرعه اتملل،بس مالله امر بالتهاليك مو جذي عاد
راسي افتر
:)
واللهم امين
الله يسمع منج يزاج الله خير

esTeKaNa يقول...

بنت الشامية
~~~~~~~~~~~~~
يا هلا ويا مرحبا بشيخة الشامية
:)
هههههههه
سوري بوستاتي صايره مو مرتبة
:)
خالي يتحلى علييي
استحي اكتب بوست اقول خالي يتحلى علي
عباله انا وايد صغيره على اني اشتغل
احضر اجتماع
انا اتكلم وهو يتبوسم يا بنت الشامية
:))
وصاجة
كل شي يبيله مود
واحنا شعافسنا غير المود وانا اخيتج

~ هند ~ يقول...

:(
زعلت على الرابط

بس مستانسه اني على موعد مع بوست يديد منج :))

DiLLi O MiLLi يقول...

:)
ياااااحلاااات بوستاتج لما يكون مودج رايق


أنتي متأكدة أن خالج ما كتبلج بالمسج
أقعد
زبوط النقعة كاشخ
ويحضر الأجتماعات
لوووووول
:)


منووو حـــامد؟؟

منووو اللي في بالج
اللي تبين تفضخين راسة بالملف؟؟

:)





أأأأيييييه
حسين الفضالة قصتة قصة
الله يكون في عون أهلة
ياااربي يرجعة بالسلامة



لااااا طبعا ماله أوقات معينة
يعني
بلوقات التحلطم متى ما كان هناك حلطومه تشوفينا .. أهوووو وووويييين الاب توب؟؟
البلوقات الشعرية .. متى ما نزل الوحي
البلوقات الرومانسية .. متى ما فاضت المشاعر
بلوقات الفضفضة .. متى ما حب الواحد يفضفض
بلوقات المصاخه .. متى ما حب الواحد يتميصخ
بلوقات الشووح .. متى ما حب الواحد يتشيحط

يعني .. حب المـــــود



شخبارج بس أنتي؟
بدون الأهل ... وحيدة كالجريدة
مثـــلي

:)

esTeKaNa يقول...

هند
~~~~~~
بحاول القا لج رابط
:)
حياج الله

esTeKaNa يقول...

Dilli o Milli
~~~~~~~~~~~~~~~~~~
وحيدة كالجريده مثلي
@@
ماجده الرومي مو ديللي
:P~
وين سالفه ما سمعتج
تقولي مافيها رومانسيه
فيها فيها
بس مخشوشه في قعر بير عميق
:P~
والله يا ديللي يوم خالي قال هالطول وكاشخ طريتي في بالي،قلت بس ناقص يقولي زبوطه النقعه
هههههههههه

وبالنسبه لأوقات البلوقات
اهم شي المؤثرات الصوتيه في التعليق
ههههههههههههههههههه
خاصه في بلوقات التحلطم أهوووو
بس بلوقات شوح ومصاخة شي شي
ما مر علي تصدقين
لازم انزل بوست اشوح فيه
P~

اما اخباري
فالله الحمد اخبار خير
انظف
واطبخ
واكتب بوستات
واطلع
يعني قاعده احاول اعيش حياتي صح واصير رايقه وزينه ،عشان اقدر اكتب حق الناس اللي احبهم
ويااااااا حبي لج يا دييللي
:***