الأربعاء، يونيو 17، 2009

كلاكيت ثاني مرة

بعد إجازه خاصة استمرت ما يقارب الشهرين ،قضيت ليلة أرق طويلة أفكر:
اجازتي تخلص الأثنين أو الثلاثاء؟
بقدر ما تحفظ عقولنا اشياء مهمه،بقدر ما تنسى اشياء تافهه وسهله
!!
صبيحة الأثنين وبعد نوم ساعتين اتوكل على الله بملبوس جديد وسياره جديده ،وشخطة كحل اختزلها للمناسبات السعيده،وماجله متنوعه من القهوة والجاي والبساكيت، واذهب للعمل لأكون اول موظفه في الاداره من الساعه السابعه والثلث انا على مكتبي،فأقرر ان ارتب اوراقي وأبدأ بمراجعه ما طافني،واضع ورد على مكتبي لأفتح شهيتي للحياة
.
.
رائع احساس انك شخص تشغل حيزا من فراغ هذا الكون،يفتقدك الكل من التي بوي الى مدير هذا المكان
هل هم فعلا افتقدوني ام هي مجاملة يجاملون فيها وجودي؟
ايا كان انا وجدت بريق افتقاد في اعينهم جميعا،وسوالف مكدسه يريد كل منهم الانفراد فيني،زميلي رزق بمولود،وموظفتين متناجرين كل منهما تريد ذكر كل التفاصيل،وفلانة على وشك انفصال،ترقيه فلان،وفلان ينتظر فراغي ويقول لي:
بيني وبينج ولا يطلع منج انا خطبت
!!
وكل السوالف تنتهي بجمله:
استكانة عليج الله لا تقولين حق احد ما قلت الا لج
فيأتيني احساس الدريشه التي اراها في الكنيسه من خلال الافلام،تلك الدريشه التي يقف اماما الكل فيعترفون بكل شئ ويرحلون
لما الكل يعيش نظريه المؤامره؟
ولما لا يعرف البعض كيف يستمتع بالفرح؟
أكثر ما اضحكني المستشار الذي اتصل بي منذ الصباح :
انتي بنتنا يا استكانة ،ومبروك مبروك،فرحنا لك أوي
فأجاوب :
الله يبارك فيك وشكرا
اعتقدت المباركة لأمر متعلق بالعمل ولكني طقيت بريك قوي عندما قال:
ربنا يرزقك بالذريه الصالحة يارب
!!
ذرية ؟
يالله صباح خير
.
.
السكرتيره تنظر لزميلتي،وزميلي يخزهم ويطالعني،وعلامات استغراب السكرتيره تحيط بي:
استكانة انتي خلصتي اجازتج؟
استغرب سؤالها،طالما انا موجوده فأنا اكيد خلصت اجازتي
فينظر لهم زميلي ويفضحهم:
مو باجر مسوين لها مفاجأه؟ ليش ما سويتوها اليوم
!!
.
.
الجهاز لا يعمل،ومكتبي به نواقص أتصل على المسؤول فيجاوبني:
لما تداوم استكانة تكلمناالاستاذه باجازه
الاستاذه اللي باجازه منو؟اكيد انا
استوعبت ببساطة اني من زود النشاط داومت قبل الاجازه،والمشكله اني مسلمه على الكل،والسؤال :
اي اهم؟
راحتنا ام فشلتنا من خيانه ذاكرتنا لنا؟
الساعه التاسعه وعيوني تتخيط من النوم،التقط حقيبتي وأقرر المرور على المديرلاشرح له ما حصل فأنا قررت الرجوع للبيت،ضحك،بل قهقه من الضحك،حفزني ان اكمل هذا النهار:
استكانة في ملف انا ناطرج تشوفينه،وبعدين الساعه تسع شباقي على الدوام
!!
شباقي؟باقي عمر،وافكار متأرجحه في بالي هل ارجع للبيت ام اكمل دوام هاليوم دفعة بلا عني وارضاء لوطني،ببساطة قررت الرجوع للبيت وطوال الطريق افكر كيف استيقظت وذهبت من ذاك الصبح ومن الحرة نمت نومه واحده من العاشره صباحا الى العصر،واستيقظت اشعر بأني كل تلك الوجوه التي رأيتها صباحا كانت حلم
.
.
استوعب اني مجنونه احيانا،ولكن يضحكني اكتشاف ان الجنون معدي
!!
في صبيحة اليوم التالي يعاد ذات المشهد،سلامات واشواق مكرره ،مع ضحكات مكتومه ،وزميلتي تناديني تعالي غرفه الاجتماعات،ذهبت وانا اعلم وهم يعلمون اني اعلم بأنهم اعدو لي حفله بسيطة بمناسبه عودتي،اثناء الافطار اضحكني زميلي عندما قال :
استكانة الغريب انك تدرين من امس ان في مفاجأة ورغم ذلك متفاجئه،انا اغبطك على سعادتك بكل شئ،انا لو اداوم من الصبح قبل اجازتي من الحرة امدد اجازتي اسبوع ولا اسبوعين
:)
.
.
.
صباح جديد،انا سعيده بأنه صباح ويك اند ،رغم اني ما داومت الا يومين
بعد الاجازه انا في صراع ايهمااجمل:
حياة موظفه ام ربة بيت؟
راودتني اجابه صباحية غافيه في حضن الكسل:
بلا طموح بلا بطيخ علقي شهادتج وصفطي طموحج وقعدي بالبيت
:)
.
.
شنو مزاج استكانة اليوم؟
عندما تحب،تشعر بأنك فخور بمن تحب
تعشق كل تفاصيله وتتحلى عليه
والمزاج مزاج ..أنا حبيبي
وأنا حبيبي بسمته تخجل الضي
يكسف سنا بدر الدجا من جبينه
هذا حبيبي
راعي العيون الناعسه رمشها في
لسلهمت ذاب الهوى من حنينه
وهذا حبيبي
...
له نظرة لاهي سراب ولا مي
راعي الهوى تفنى وراها سنينه
نور الصبايا بسمة الدار والحي
نوره على شمس الضحى مستبينه
...
دامه معي كل القرايب فنا حيّ
بالروح أضمه يوم قلبي ضنينه
يا صاحبي لا تنشد الروح عن شيّ
أنا حبيبي نور كل المدينة
.....
HaPpy Week EnD

هناك 38 تعليقًا:

Sweet Revenge يقول...

يحليلج يا استكانه مداومة قبل الدوام
انا اعد الاجازة عد


لسلهمت ذاب الهوى من حنينه


ما تتخيلين شكثر احب هالاغنية
وخاصة هالمقطع
نهاية اسبوع سعيد الكِ
وحبيبي بسمته تخجل الضي ;)

I7na 3shagnaha يقول...

طبعا ربة بيت :)

انزين شلون شهرين اجازة؟ ما تبون موظفين ؟

الله يهنيج
:)

chandal/danchal!! يقول...

على هالمزاج اكيد ريوقج "تميـــز"

:p



عودا حميدا

:)

esTeKaNa يقول...

Sweet Revenge
~~~~~~~~~~~~~~~~~
شفتي الخداي
:Pp~
تحبين هالأغنيه؟
ياربي انا قايله هالبنت ذوق
والكلمات عجيبة
انا اذا سمتعها اتبوسم حمدلله والشكر
:pp~
ودامج تحبينها
فالأغنيه اهداء من استكانة لج
:)








I7na 3shagnaha
~~~~~~~~~~~~~~~~~
اجازه مو شهرين لا
اقل بشوي
تدرين امومه
:PP~






chandal/danchal!!
~~~~~~~~~~~~~~~~~~~
ريوقي كل خير يالله من فضلك
:)
تدرين امس ذكرتج وانا اشتري ماجله الريوق
قولي ليش؟
شاريه بسكوت تك صغيييييييير
وبس اتحلى عليه
:Pp~

:: بـوح الصمـت :: يقول...

وأنا أنطر لاب توبي ينفتح قاعدة أقول .. يارب يارب إستكانة منزلة بوست ;) ;p

ولهت عليج :*
ياا حلات الإجتهاد :)

شسالفة الذرية الصالحة لا يكون مطلعين عليج إشاعة مرة ثانية ;p


ربي يفتح عليج الرزق من أوسع أبوابه .. شكراً على رسم إبتسامتي الصباحية في هذا اليوم المشرق الجميل ;"*

ميمة السبيت يقول...

** احنا شنو اللي تافخنا و ذابحنا غير ريوق الدوام ، يالله الله يهنيج و يوفقج بدوامج و صباجكي سكر و فطاير

Yin مدام يقول...

لوووووووول

استكانة موتيني من الضحك
عليج مواقف الله لا يحرمنا لا منها ولا منج

:))

الله يسامحج خو دقي تأكدي من اجازتج قبل لا تداومين... خربتي على زملائج المفاجأة

:))

الله يسعدج دوم ويحفظج يا سنفور تيربو


نهاية اسبوع أجمل من الجمال

:))

glomhilda يقول...

صباحك ورد مسقطي مني لج


^_^
يحليلج..مشتطة عالدوام

النسيان نعمة..بس مو دوم :)

عاجــل يقول...

اذا قعدتي بالبيت ما تأذين غير الخدم وريلك ويمكن الجيران

لكن بالدوام راح تأذين أمة محمد

لا يا معودة

البيت أبرك

Q80 Blogger يقول...

تدرين شنو أتمنى بس ؟

اتمنى يكون عندي مثل اسلوبج في روايه القصص .. ولا على مواقفي الشبيه اصكر عليج .. محد يقوم يزورج

بس عاد وين الاسلوب :P


ومبروك الرجوع للحيّز الذي تملئينه

esTeKaNa يقول...

بـوح الصمـت
ّ~~~~~~~~~~~~~~
يا صباح التوليب والورد كله
:)
يا بختي تدعين انزل بوست؟
هذا ادعيه حق واحده ما تكتب بوستات
انا اسم الله علي هاليومين متدفقة بوستات الله يعينكم
:Pp~
ولهت عليج العافيه ماقصرتي
والمستشار الذكي افترض ان غياب هالمده كلها مع شخطة كحل الصبح دلائل على اني تأهلت زي مابيقولو
:))
اللهم امين ولك بمثله يارب
اسعدتي الصباح

ARTFUL يقول...

أقوى شي بالبوست العنوان


كااااااااااااك

;D

اجازه شهرين يا ظالمه؟

عليج بالعافيه

انا استانس اذا رحت الدوام شبعان نوم

ونشيط والله تلاقين الكشره من اهني لي هني اضحك مع هذا واتحرش بهذا

بس قليل ما اقوم شبعان نوم

;p

الاغنيه اختيار موفففففففق

استمتعت وانا اغنيها


وهابي ويك اند

:)

esTeKaNa يقول...

ميمة السبيت
~~~~~~~~~~~~~
صباح الورد كله
:)
تصدقين انابالاجازه وايد وايد ضعفت
اصلا خلصت
!!
بس الدوام والقعده تمتن صاجة
:)

esTeKaNa يقول...

Yin مدام
~~~~~~~~~~
من وين طالعه الشمس اليوم؟
:)
اشتقنا والله اشتقنا
يا كبر مكانج الله اعلم افقدج بكل بوست
حيالله الغاليه فرحتيني والله
:*

esTeKaNa يقول...

glomhilda
~~~~~~~~~~~~~
يا صباح الهنا
:)
انا ابي مع الورد حلوى مسقطيه نذوقها
:pP~
شرايك بس بالموظفه المشتطة؟
:))

esTeKaNa يقول...

عاجــل
~~~~~~~~~
الحين انا أأذي أمة محمد
!!
انا ثروة وذخر للأمة الاسلامية والعربيه على فكرة
:Pp~


زارتنا البركة يا عاجل

esTeKaNa يقول...

Q80 Blogger
~~~~~~~~~~~~~~~
تصدق؟
بوست انا معصبه وانت تقولي ماحد قال منو انت
والحين تبي تكتب ومحد يقول يزورني على قولتك

ليش تغار مني؟
LOOOOOOOOL
:))
والله يا كويتي بلوقر لك اسلوب حلو الله يحفظك،انا ممن يستمتع بقراءتك ولو كنت مقل،وهذي مو مجاملة
انت تعطيني امل بوجود شباب فيهم العقل والالتزام والذكاء
الله يحفظك
:)

glomhilda يقول...

والله يا إستكانة وعد مني لج..إذا ربي كتبلي أزوركم

أييبلج أحلى حلوى مسقطية من إيد أحل شايب
:**

mtfa2el يقول...

ليش تعلقين شهادتج ؟؟

الحين الموضة شهادات وهمية
بيعيها انا شراي
:)))

ودي بشهادة حقوق الصراحة ..ها شقلتي ؟؟

فريج سعود يقول...

في عرف اهل الوزارات تداومين الساعة وحدة الظهر علشان تسوين اقرار عودة ولان ما في طقة كرت يوم الردة من الاجازة

تعلموا تعلموا

الخيلاء يقول...

Hehehehehehehehe
انتي عجييبه

احد ينسى يوم العوده للدوام

Back to work

اختربت المفاجاه و هذا بخور السوق ليش يعلمج جان تثبت قبل ..

زين سويتي ياحلو النومه اذا ماوراج شي ياكل قلبج

عطله سعيده

:)

حلم جميل بوطن أفضل يقول...

كم مرة ذكرت "إستكانة" في هذا البوست ؟

Nikon 8 يقول...

نفس خطتي أبدا ما أداوم أول الإسبوع إذا رجعت من الإجازة
!!!
حتي يقصر علي الإسبوع
:)
ونفس الموقف صار بس في إستقبال
!!!
ومن كثر ما كنت حابه أوجبهم وحريصة على الموعد رحت لهم وإكتشفت إن الإستقبال باكر
:)
ومع هذا إستقبلوني بكل رحابة صدر
عودة محموده للدوام
ونهاية إسبوع سعيد
:))

الحــــٌر يقول...

الكلاكيت الأول كان عنوانه المفروض
نشاط زايد وحسافة
:)
والكلاكيت الثاني عنوانة
انا تعبان بس فرحان
:)

4 يقول...

بدعتي ... مداومة قبل دوامج

بس شي جميل صارت ذكرى حلوه


انا اشعر ان موظفة ذات نجاحات امر جدا مهم

اولى من القعده بالبيت لأسباب كثيره


بالتوفيق ... ومع حركات جديده اونس

ReLaaaX يقول...

انتو شفييييييييكم مخليني انطرب هالايام انتي على براقش ;p


اسعدتيني صراحه --> شفيها اللي قالبه عربي؟ :p

بن جبلة يقول...

غلطانة
حد ينسى؟

Sn3a يقول...

ربي يتمم عليج محبه الناس ومعزتج بقلبهم
تستاهلين يالغاليه
تصدقين
مرات ودي جذيه
ودي اسولف مع الكل بدوامي
واكون اجتماعيه وجذيه

ومرات من كثر ما اسمع بلاوي الدوام واهل الدوام
وشلون يزلغون لبعض
ويكبرون على بعض
اقول انا بسلم وادخل وبودع واطلع فقط لاغير


مشكلتي ماعرف اصير بالنص
يا يمين يا يسار


مرات ماتتعبين من كثره سوالفهم وشرايج ومارايج وبيني وبينج

ولا بس انا اللي مالي خلق الناس;p

ريــــــانــه الـعـــــود يقول...

أنا حبيبي بسمته تخجل الضي

:)

ذوقج حلو

الاغنية راقية .. وبيني وبينج

ربة بيت .. بيتج وعيالج اولى ;p

الله يرزقج كل الي تتمنينه استكانة :)

بو محمد يقول...

:-)

أحترم الحماس للعمل احترام غير محدود

بس مو جذي

:-D

خسبقتي الزملا و عفستي عليهم خطتهم

نهاية أسبوع ملؤها الفرحة و البهدة و الرضى من رب العالمين إن شاء الله

دمت و الأهل و الأحبة برعاية الله

charisma يقول...

Hahahaha men al7een etrawdech elfkra :D estkana taw elnaas hahahahahha edhfehaa rawedtech embacher :p aw b3den elmoder ma ydre ena lo bga 3al dwam sa3aa ham tswa el6al3a :p ya 7loha el nshe6a walaa :* 9baa7 el nhshaa6

candle يقول...

واي انتي عسل ..انا نفسج دايما بالاجازات التي تتعدى الاسبوع اتلخبط مادري متى تخلص اجازتي بس طبعا لو يموتون ما أداوم قبل الموعد دايما أحط افتراضية اليوم الأبعد واذا طلعت غلطانه أحسبها يوم عرضي :)
وويك اند سعيد عليكي وعلى الكل يا فل
ومزاجاتج الغنائيه خيالية كالعادة

عنيف يقول...

ممكن ابداء الرأي في اخر مقاله كتبتها ؟؟؟

http://kuwaitfreevoice.blogspot.com/2009/06/blog-post_19.html

ويشرفني المرور

esTeKaNa يقول...

ARTFUL
~~~~~~~~
الراحة والنوم احلى شي بالدنيا
:)









glomhilda
~~~~~~~~~~~~~
يا بعد قلبي انتي
قاعده اضحك معاج
:**








متفائل
~~~~~~~~~
البيع لأعلى سعر
متعوب على الشهاده تدري
:Pp~






فريج سعود
~~~~~~~~~~~
محنا من ربعهم
بس شكرا عرف جديد توني اعرفه
:pP~






الخيلاء
~~~~~~~~
تدرين شنو ضحكني؟
لما فضحهم حزته السكرتيره وسويت روحي ما سمعت
مثلت عشان ماحرجه ترا
:Pp~







حلم جميل بوطن أفضل
~~~~~~~~~~~~~~~~~~~~
سؤال ذكي مثل هذا
انت الاقدر على حله
:pP~














Nikon 8
ّ~~~~~~~~~~
واي يا زين شيخة بنات دار عزيزه
انا دوام وافتشلت
اشلون الاستقبال
lol
اشوة انهم رحبو فيج
الله يحفظج يارب
:)))

esTeKaNa يقول...

الحر
~~~~
hehehe
صدقت
:)




4
~~~~
حدي بددددعت
:))
شكرا على الاجابه






ريللاكس
~~~~~~~~~
وي يا زينها السعيده
:Pp~







بن جبلة
~~~~~~~~~~
الخداي وما يسوي
:pp~

esTeKaNa يقول...

ريانة العود
~~~~~~~~~~~~~
قليل مما عندكم يا ريانه العود
:)
جواب مقنع
:pP~
اجمعين يارب










بومحمد
~~~~~~~~
شفت يا ابو محمد
استكانة تخدت واقعدت
بس العجيب انهم طوفو لي السالفه
:Pp~
اللهم امين واجمعين يارب








كريزما
~~~~~~~~~~
صباحج سكر
:*
شفتي؟
الساعه تسع ويقولي شباقي
ما يدري ان عمر شطوله يا كره الدوام الطويل
:))







candle
~~~~~~~~~~
يا بعد قلبي والله
انتي العسل الله يحفظج
:*
وعجبتني فكره ازيد يوم ويصير عرضي
شكرا شكرا
تم اعتماد الخطة
:pP~

esTeKaNa يقول...

عنيف
~~~~~~
تامر امر اخوي
:)

Kuw_Son يقول...

مبروك السيارة .. و تكسرينها بالعافية