الأحد، مايو 24، 2009

دكتور تمرية

.......
أنتي عيونج والعتيم سبحان رب(ن) خالقه
قصيده لشاعر قديم..عاشق ومحد صدقه

إحدى أمنياتي غير المحققة أن يكون لعيني عاشق يكتب في عتيمها قصائد وأشعار،أعتقد أني تنازلت عن حلم تماما وأنا أرى انتفاخ عيني التي سترعب كل الكلمات والأشعار،
ألم وانتفاخ يغمض عيني ويجبرني التنكر بالنظاره السوداء
.......

في عياده الدكتور المدلقم جلست بهدؤ على الكرسي الأسود،هو يتكلم بالتليفون وأنا أنظر لأصابع يده الكبيرة كالدرابيل،
هل هناك علاقه طرديه بين الرجل المدلقم والطيبة؟
كنت دائما أظن أن كلما كان الرجل اضخم كل ما كانت يده كبيرة،كلما كان أحن وكانت الأمان بجنبه واحة كبيرة ،الا اليوم ،يده مرعبه جدا،يغلق التليفون وينظر لعيني،مد صبعه الدرابيلي لعيوني فجأة،انتفضت وطيرت يده ببوكس بالهواء لا شعوري كنوع من أنوع الدفاع الشرعي عن عيوني
ضحك،طمني ثم قرب المكبر من عيوني،وكتب لي وصفه طالبا مني عدم ارتداء عدسات في عيوني
عدسات؟
أنا لم ارتدي في حياتي كلها عدسات لا طبيه ولا ملونه،فنظري ممتاز اللهم لك الحمد وولم اعتد لبس عدسه ملونه قد تغير لون الحياة في عيوني ،ودائما اتخيل ان ارتديت عدسه ملون اني لن ارى شئ
!!
يعيد التشخيص وأتغلغص ببلاعيمه بمليون سؤال:
لماذا؟كيف؟اشفيها؟أي صوب
أعترف اني انسانه تنشف الريج أحيانا،وأني في الآونه الأخيرة صايره وسواسيه وأخاف على نفسي كثيرا،وأعتقد ان دكتور مدلقم مل مني ونفذ صبره فاستند على كرسيه ونصحني نصيحة أبويه:
شوفي يبه عيونج مافيها شي جايد ان شاء الله،قبل لا تحطين أي قطرة غسليها بماي زمزم وحطي عليها تمرية
تمرية؟
عندما وصلت مع دكتور مدلقم لمرحله التمريه قررت ان ارجع لبيتي انا ونظارتي السوادء
انا رايحة حق الدكتور ولا ماما غنيمه؟
:(
.
.

أغسلل عيني بماء زمزم ووأنظر للتمرية
في أحد يوكل عينه تمرية؟
يا الله كم هو مرعب ومضحك احساس اني انسانه غبيه ولكن لأجل عين تكرم ألف عين،اعلم ان لا علاقه لها بالموضوع ولكن كان بخاطري اكتبها
المهم
قناعه الدكتور بأن الاشيا البسيطة الشعبيه اذا لم تنفعنا لن تضرنا ،اقنعتني نوعا ما وذكرتني ببعض المسلمات في بيتنا التي لم ولن تتغير عبر السنين
.........

أولا :الفكس
كحة ،الم بطن ،ظهر،برد ،أي تعب نفسي وعاطفي،ولودعمت دون ان تدري الطوفة،وحتى لو كنت متضايق من تشكيله الحكومه أو نتائج الانتخابات الأخيرة فإن أول حل عند أمي :
الفكس
مزعج ،رائحته تشعرني بالدوار البحر،لا اعلم ما علاقه الفكس بدوار البحر ولكنه يصدعني
اذكر أن امي طلبت مني وأنا اصغر سنا أن أمرق ظهر اخي بالفكس فقد كان مريض
شسويت؟
وضعت في يدي اليمنى فازلين-وازلين بقول آخر- دهنت به ظهره

وقليلا من الفكس في يدي اليسرى ووضعته بالقرب من أنفه،الغريب أن اخي يا بعد عيني قام الصبح يتشكرني لأن الفكس ريحه ويشعر بأنه بات أفضل

!!
انياهاهاها

كنت اشعر بالانتصار لهدم مسلمه أمي بالفكس
اذن وبناء على ما سبق فالموضوع هنا قد يرجع احيانا للإيحاء النفسي الذي نبثه في من حولنا فأنا دهنت أخي بفازلين ولم اضعه عليه نقطة من الفكس السحري كما تسميه امي

لنهتم بالإيحاءات النفسيه الني نرسلها لقلوبنا وللناس حولنا

......................................
ثانيا:كلونيا أم بنت
هل يعرف أحد كلونيا أم بنت غير بيتنا؟


كلونيا أم بنت هي أبشع كلونيا بالدنيا:

لأن رائحتها غريبه لم تحدد مسارها وهدفها بالحياه،نعم رائحة ضايعه لا تعرف ماذا تريد ،حالها حال الكثيرين من البشر الضايعين
كلونيا أم بنت هي مسلمه أبوي الذي لا يناقش ولا يجادل فيها ،فعندما يهلكني البرد والأنفلونزا،او أشعربأي تعب،يقترب أبوي مني أبوي بعيون صايده الحركة، وبيده حبيبته كلونيا أم بنت:
ها يبه تبين احط لج شوي؟
أخواني لأنهم سنعين متصالحين مع الدنيا سلمو بالفكس وكلونيا ام بنت،اما انا كالعاده لابد أن أسئل واقتنع قبل القيام بأي أمر،وهذه مشكله حياتي،عقلي الذي يعمل لا يكل ولا يمل،حتى بالتعب وتحت انقاض الألم اسئل ابي:
انت رجل جامعي مثقف عاقل،كيف تقتنع أن كلونيا بشعه ممكن تطير المرض؟
فيكون الرد المعتاد:
مكسورة وتبرد،مو شرط كل شي تقتنعين فيه ،بعدين انا الابو هني

يضحكني ابوي هو وأمي عندما ينفذ صبرهم مني فيذكروني بحقيقه دورهم في مشهد حياتي:
استكانة انا الأبو هني أو كلمه أمي المعتاده اذا اشتطيت:

انا امج ولا انتي أمي؟..أنا الأم هني

صح صح ،انت الابو وانا كومبارس بعد بطولتك انت وامي في حياتي،وفعلا لا يشترط ان اقتنع بكل شئ،فالحياه تتطلب في أمور كثيرة اغفال العقل وتجاوز بعض القناعات الخربوطيه
وتظل كلونياام بنت صاحبه الصداره في بيتنا

.

.

كاسرة خاطر نفسي،أنظر للمرآه وأفكر بمستقبلي
هل يضيع حلم عاشق عيني؟ وما ذنب المجتمع برعب عيني؟
لا وألف لا،تمرية تمرية،أحركها بيدي،اقربها من عيني

،في اللحظة التي يدخل بها ابي طايرة بوهته:
حسافه عليج ،وصلتي مرحله توكلين عينج تمرية ،انا قايل هالبنت بتضرب فيوزات مخها
!!

هل فعلا ضربت فيوزات مخ استكانة؟

حسافه علي

:(
.....
همسه:
ويا عيون الكون غضي بالنظر
اتركينا اثنين...عين تحكي لعين
اتركينا الشوق ما خلا حذر
بلا خوف بنلتقي...بلا حيرة بنلتقي
بلتقي بعيونها وعيونها أحلى وطن

تحديث هام:
بعد يوم طويل جدا ومتعب خارج البيت انا وعيوني التي تحولت الى لوميتين
رجعت للبيت لأجد أخبار وجود حرب ضروس ضد استكانة في مدونة المرشحة السابقه بنت الشامية
ومطالبات للاعتذار الرسمي وتصعيد الأمر الذي أدى لسحب سفارة لوير من الدولة الإستكانية
واني من هذا المنبر أعلن ان حرية الراي مكفوله ،واني انسانه حرة ،اوكل عيني تمريه أوكلها لقيمات كيفنا
ولم ولن اعتذر للفكس ولا للجماعه الفكسيون في مدونة بنت الشامية
وانادي اهل الخير لجمع مبلغ الدية
اوبس غلط غلط استكانة هذي مو سكوب
قصدي اني من هذا المنبر انادي جميع مرتادي مدونة استكانة للوقوف بجانبي
فالله الله بابنتكم استكانة
ياني احساس صالح السعيد مادري ليش
:pP~
لي عوده للتعليقات بعد ان انهي المرافعه عند بنت الشامية
:)

‏هناك 94 تعليقًا:

lawyer يقول...

في هالبوووووووست

انتي خسرتاي اعز صديقاااااااااااااات التدوين و رفيقات الدرب الصعب


اناااااا و الزييييييين






انا
لانج طبيتاي في كلونيا ام بنت


و الزين لانج طبيتااااي في الفكس





ونرجع لتاريخ كلونيا ام بنت العريق


اهي فعلااااااااااا زينه تدرين ليش

لان استخدموها علااااااج في انجلترااا اول


نسبه الحكول فيهااا كبيره
فتنزل الحراره

واذا حايشج هواا

حطاااي بالسرررره

بسرررررررعه تطيبين






أأأأأأأأأأأأل مثقفين و جامعييييييييييين و مايدرووووووووووووووون عن فوائد كلونيا ام بنت




نهاهاهاهاهااااااااااااا





من الصبح و انا ذاااااكره شسمه

وادعيييييييلج من كل قلبي يااااااااارب


ترا مو ناااااسيتج لا تخافين


عسى الله يفتحها عليييييييييج

Najmah يقول...

لوووووووول
سلامات يالغالي سلامات
آخ من ريحة الفكس
وينهم بعض الناس هالبوست حقهم
;p
احنا عندنا المقدس زيت الزيتون
عيونج اذونج بطنج ظهرج
كل شي زيت زيتون
!
استكانة
بدال لاتحطينها على عيونج سمي واكليها
والله يوفقج بامتحانج
ويوفقني معاج
;*

I7na 3shagnaha يقول...

ما هقيتها منج

حطيتي تمرية

:))))


بس طلعتي مشاغبة مو هينة

نجرية

وتحبين المداحر

تذكريني بوحده أعرفها

:)))

انا مع امج

الفكس و بس

تدرين

اللي سويتي في اخوج و يا الفازلين

يسمونه

placebo effect

وهو احد طرق العلاج

ماشاءالله عليج

دكتورة و افوكاتو مرة واحده

:)

الزين يقول...

@@

تمرية بالعين


استكانة لا ياكل عينج النمل

ترى يشم ريحة الدبق من الفريج اللي وراكم كاني قلت لج

وبعدين تعالي بقول لج هذا دكتور لو حواااي


شهالدكاترة اللي طالعين لنا
هدوا الطب وجابالو شغل يداتنا


:$

ما عليج منه
روحي حق دكتور ثاني



والفكس مو بس حبيب الماما

حبيب الزين بعد
وطلع في قاسم مشترك بيني وبين امج شتبين بعد
:)))


وكلونيا بو بنت
لها قصه معاي
اقولها لج تالي
بس هم نتشارك المعاناة منها انا وياج

:))))


صباحج تمرية يا بعد التمر كله
:**

4 يقول...

لوووووووووووووووول

حده الوضوع خلا الابتسامه ما تغيب عن ويهي

بالنسبة لمسلمات بيتكم غريبة عجيبة
كلونيا ام بنت هذي عمري ماشفتها
حبري كلونيا 555 هذي عجيبة

احنا من مسلمات بيتنا كمادت جاي للعين ... مادري شكو جاي بالعيون

ماتشوفين شر
والدكتور بوتمرية اكيد شهادته من الهند

حجزت الكرسي لأول

Deema يقول...

كلونيا أم بنت، أو بومبيا بقول آخر
الله يفكنا من شرها! مرة دشيت سيارتي و الا ابوي من زود الشي مبخرها و ممردغ السيارة منها

مسيكين، تخيلي بخور و بومبيا

و طول طريج الحدرة من الشاليه، و نحن نتنفسها بالإضافة إلى ريحة الحلّ اللي حاطته خادمتنا

--
و سلامة عيونج

Sn3a يقول...

وي سلامااات يالغاليه

شدراج ان مو عين العاشق سوت بعيونج جذيه@@

والله انا معاج ان كل ريال مدلقم حنون بس ضحكتيني بصبع الدرابيل
مع اني ماحب الدرابيل بس ودي اكل الحين عناد;p

بس ويت يعني اهو من صجه التمريه تحطينها بعيونج؟
اخاف قصده تاكلينها زينه للنظر
والله مادري


انا اكره الفكس وماذكر اني حطيته
بس شنو كلونيا بو بنت اول مره اسمع فيها
لووول انا الابو هني
ضحكتني الجمله



انتي بس حطي التمريه بعينج واحلى عاشق بيكتب فيج معلقه
بس انا اشك ان هالعاشق حساوي
تمريه عاد;p

أبو الدســتور يقول...

تمرية ها
انزين شلون يحطونها بالعين
وثاني شي سلامة عيونج

mellow يقول...

لا يكون حطيتي تمرية؟؟
لايكووووووووووووووووووووووون بعدين شيفج عينج من الدبق؟
آنا مرة يكون طالعها فيها يعني بغذي شعري جان أحط ويا حمام الزيت قفشتين عسل طاحت إيدي و آنا أغسل شعري 6 وجوه شامبو موراضيييييييييي يروووووح
تصدقين قعدت أربع أيام أغسل شعري مو راضي ينظف
مير كلما أتلفت ألقى النمل ياي صوبي
بعدين قلت ألحين نمل باجر الله يعلم ، و أروح الصالون قلت لهم يا جماعة الخير غسلوا شعري

لا تعيدين مأساتي آنا بعرضج


أما المسلمات ..فكلونيا بومبيا (أم بنت على قولتج) هذي من المسلمات عند بيت عمي .
أما أمي من العناصر السحرية عندها الطماط
الاكل ماصخ ...حطي طماط
الأكل مالح...حطي طماط
الأكل حار...حطي طماط
و إذا عطشتي
.
.
.
.
.
.
.
.
.
.
.

إكلي عرموط

اجتماعي يقول...

سلامة عينج

سالفة التمرية يديدة

بس كلونيا أم بنت .. إهي العطر الذي لا يتغير بتغير الزمان ولا المكان ولا البشر

أما .. أنا الأبو وأنا الأم

لا تعليق غير .. هههه

عانينا منها فترة
:)

Kuw_Son يقول...

لووووول .. تمرية للعيون !!

أنا أنصحج بالسؤال عن مؤهلات الدكتور العلمية ..

الظاهر انه متخرج من جامعة صنعاء !!
و شهادته بالطب الشعبي "عطار" !

الله يعينج على عيونج ..

الكلونيا هذي خبري فيها في حلاق باكستاني كنت أحلق عنده أيام الثانوية !!

بنت الشامية يقول...

استكااانه...جنه بدينا نختلف
اول شيئ نزلى اعتذار للفيكس وكلونية ام بنت....لانهم من التراث الكويتي العتيق

وانا بصير مع لوير والزين
كل شيئ مقبول الا الهجووووم على الفيكس وام بنت

لو سمحتى متى بتنزلين اعتذارج لهم
ياالله بسرعه والا بتقوم مظاهرااااات عارمه...يم بيتكم وانا المحرك الاول
وامى قبلي
ههههههههههههههههههههههههه
بس حلوه التمريه على عيونج
عاد الله يهداه لو قايل حطى خيار
كمدات شاي دافئ
سوووي ماسك لعيونج
بس تمريه لا واااايد قويه
اخاف انج رايحه حق الحواي بالجمعيه مو طبيب عيون
سلاماااااااااااااات
وما تشوفين شر يالحبيبه

ARTFUL يقول...

الفكس وبوفاس

!!!!!

والله حق البرد ولا مثلهم!!!



بس انا خابر يجمدون العين بجاي مهو تمرية

التمرية حق المفاصل تمزق بالكاحل

اربطه الركب

نحط لها تمرية

يعني غالبا عقب كل لعب كرة

بس العين؟

أخاف العينج فيها تمزق اربطه؟؟

;p

سلامتج ما شتوفين شر وانا اخوج

انا الحين قاعد اعيش دور الزوج الكبير مع مرتي

اقولها انا ريلج الكبير عييب

;p

وعلى شيوخ بعيش دور انا ابوج الكبير
;p

على فكرة اخيتي ترا لا اتأملين وايد بريل المستقبل اخاف تنصدمين بالحياة وتوكلين شعرج تمرية

;p

الوالد لما قالج حسافة عليج توكلين عينج تمرية

قوليله عيل اكو واحد يكلون سرته؟؟
;p


بالنهاية ما اتمنالج الا الشفاء العاجل وترجع عينج كما عين البقرة ((ترا البقرة لها أحلا عين))

اذا ما اعجبتج نغيرها
;p

همسة باذنج

ترا الحلج تحت والعين فوق

;p

الزين يقول...

لوووووووووووووول


استكانه كله بصوب وتعليق ميللو بو طمام بصوب

ابيه انسدحت بالمكتب على كتر

مت من الضحك




وخلاص انا قررت بسوي حزب بضمنا انا ولوير وبنت الشامية

وبنسميه حزب الفكس

:)


شلون عينج الحين يا بعد عيني

:**

أستاذ حمام يقول...

كت بيست>>> انياهاهاها

حلوة منج باندا الشريرة

بس انا الوالدة "بندول" واقطع.. واذا مزاجها عالي "شربت مضاد حيوي"؟


الله عطيهم الصحة والعافية ويخليهم لج ذخر بطولة العمر وسعة الرزق والسعد والفرح امين يارب العالمين

وخطاج السو ماتشوفين شر

دكتورج مانصحج بالهرده؟

:)

ARTFUL يقول...

تعالي شصار على موعد الساعه خمس؟؟

:)

انشالله صار على ما تشتهين؟؟

والا الموعداليوم؟؟

جنة الحواس يقول...

نسيتي الدوا الأزرق

حبيب أمي ..مداوي كل الجروح .. أهو لونه بنفسجي بس مادري ليش يسمونه أزرق

chandal/danchal!! يقول...

كتبت تعليق وراح!

ألف سلامة عليج... بشرينا عنج الحين!



ما خبرنا نجمد عيونا بتمرية!!!

خابرتها حق الكسور والرضة بعيد الشر!


انا مع نجمتنا المتألقة

بلاعيم
لتبة
سخونة

زيت الزيتوووووووون قطفة اولى


والبوفاس والفيكس ما اشتهيهم

لاصقة ريحته بخشمي

امشي وازف عل فاضي

اجابل ريلي اقوله ريحتك فيكس

تمر جدامي الفلبينية اتهمها بانها متدهنة بفيكس

امي تمشي وتفوتح ريحتها فيكس

وبوستج ريحته فيكس!

أُمْ حَــسَـــنْ يقول...

هههههه استكانة ضحكتيني على سالفة التمرية ..انا خبري كمادات جاي اخضر مو تمرية عاااد!!


يلا ماتشوفين شر و عسى ربي يحفظلج عويناتج

بوتشخيص يقول...

سلامات سلامات ما تشوفين شر استاذتنا :)

لول اي صاج بس الاحسن حطي كمادات جاي حار على عينج و تلقينها زينه انشالله :)

QiYaDiYa يقول...

توني رادة من الامتحان البطيخي
و اقرا بوستج
مت ضحك ;p


عيل احنا بالبيت العسل
كل شي يصير فينا على طول عسل !
سواء مع ماي دافي ولا بروحه

ابوي عنده قنااعة تااامة
ان العسل ينقي الجسم فتطلع كل الامراض منه

عاد التطبيق وين يكون
مخيم مرتقى ;p

الفير وحدة طاقة علينا الباب
الي معاها بالغرفة تعبانة
اروح ولا الاخت متسبحة و نايمة فماخذة برد

على طول الروم سيرفيس
لو سمحت نبي عسل
الفير و عسل !!
انصدم !

سكرت التكييف و عطيتها عسل يالله نامي
و تصيرين زينة ان شاء الله

و صج اقعدت الصبح الحمدلله مافيها شي
;p


المخيم الياي ان شاء الله اول شي اخذه معاي العسل ;pPp~


الصراحة الفكس لا يطاااق !
و كلونيا ام بنت ما تدرو عندنا ابدا ;p


و سلاامااات ما تشوفين شر ;**

jonoon 3aqel يقول...

تمرية!!!!
هاي يعني تمر مع ملح و لا أيش؟؟؟؟

احنا عندنا من المسلمات...

طبعا اولهم الفكس..و شغله السحري...

و سحّه و ملحه...اللي هو تمر (ولا 50 فردة) مع ملح و يسخنونه مع زيت..و ينحط مكان الم المفاصل و لا الرجل اذا كانت ملتويه...

اذا كان هذي هي التمرية...
ف نصيحة أخوية.....بلاها الروحة حق هالدكتور مره ثانيه..

الله يقومج بالسلامه..أجرو عافية ان شاء الله

تحياتي

مـــــي يقول...

الفيكس والفازلين لا زم يتدرس في المناهج الدراسية شي مفروغ منه والصراحه يعني انا انصح الناس فيه :)اما بالنسبه لكلونيا ام بنت ما عندنا بس عندنا كلونيا ليمون اثريييية جدا جدا جدا بس في بيت جدتي

U know WHO يقول...

سوووسووو
سلامات سلامات

اشرايج

إقلعي لي عين
واقلع لج عين
ونعيش عور إحنا الأثنين

؛)

أنا مثلج ماحب الأصابع درابيييل
صج صاحبها طيب بس مادري...
أحب الأصابع زقاير
؛)

وييييييي ما شفتيني يووووم عمليت الليزك

يالهوي يالهوي
فضحت الدكتوووووور فضيحة
ما سوت عليييه

إحنا موديلنا بوفاس
مرقدووووش
طبيخة
مرة
حلتيتة
خروعععع

:)
الوازليييين
خذينا الوكالة
؛)

كلونية أم بنت تعرفت عليها يوم تزوجت
طلع ريلي من ربعها

الله يا ريحتها
جنها ريحت هندي كاشخ

بس عاد تمرية ولا عنها بالعيووون
أكيد طنازة من الدختر

يقولون قطري عسل بالعين
بس ترى يحرق

وأحسن علاج للعين
النووووووووووووووووم

؛)

ikhalifa.com يقول...

سلامت عيونج :)

Yin مدام يقول...

إستكانة الشعبية

عزيزتي الفكس وما أدراك ما الفكس
وكلونيا أم بنت فوقه
هذول رجاءً لا تيين صوبهم صج صج صج خط أحمر
لوول

ترى جدتي الله يرحمها كانت تحط تمرية على أي نوع من الأورام وخاصة الدمامل والـ أوكي ما أذكر اسمه عدل فإذا غلطت فيه مو تضحكين
الجنجل؟؟
المهم التمرية تنفع

وكمادات ماي دافي ويفضل كمادات دافية لشاي طابخ عدل

وسلامات يا أم عيون فتاكة سلامات

ما أعرف أشعار جان قصدت بعيونج وونستج شوي
:))

حافظج الرحمن يا الغالية
:))

Nikon 8 يقول...

الفكس والزعتر الشاي من الأشياء اللي ما أستغني عنها لا في الكويت ولا في السفر وطبعا معاهم الوازلين
:)
وكلونيا ام بنت صارت وحدة منا وفينا من فتحت أمي عينها وهي تشوفها ولا تقدر تستغني عنها
:)
والتمرية خابرتها لعلاج الرضات وليس ورم العيون اللي خبري يحطون لنا كمادات تي باج شاي دافي
!!!!
سلامات ... تطيبين إشاء ويجي اللي يتغزل بالعيون الصاحية إنشاء الله
:)

qesat_5ayal يقول...

أنا ما عرفت كلونيا أم بنت إلا من بوستات شاي حليب
الله يذكره بالخير
:)

وحاولت أدور ببيت يدي ولا يدتي
بس ما شفت لها أثر

حتى الجمعيات أحيانا أوقف أبي اشوفها
ما ألقاها
:P

بروح أسأل يدتي عنها
ونشوف التاريخ العريق إذا وجد





احنا مثل بين نجمة
زيت الزيتون حل لكل شي


بس شي في ريحة انسي استخدمه
:)

وماتشوف شر عيونج
وتلقين اللي يتغنى ويشعر فيها
:)

بنت الشامية يقول...

حبيبة قلبى ...مرى مدونتى زشوفى بوستى اليديد
كل شيئ الا الفيكس وكلونيا ام بنت
ههههههههههههههه

ANGEL HEART يقول...

ماتشوفين شر يارب

تمريه وعالعين !!


متاكده دكتور اخاف من دكاتره جامعات الفلبين استغفر الله ياربي مانبي ناخذ ذنبه

الفكس حبيب الشعب بس كلونيا ام بنت ماحب ريحتها تيبلي صدااااااع

someone_q8 يقول...

السلام عليكم

سلامات اختي وماتشوفين شر ولا بأس طهور ان شاء الله

وبعدين انا ابي اعرف اشمعنى الامهات يحبون الفكس والآباء يحبون كلونيا ام بنت ؟؟؟؟؟؟؟؟؟

الوالدة الله يحفظها لااااااازم قبل ما تنام اتدهن ارويلاتها بالفكس و اتغطيهم ويالله تنام !!!

كلونيا ام بنت لي اهنيه لاحقتني ؟؟ مادري ليش اتذكرتي بيوم اليمعة خصوصا باليمعهة واذا كان الغدا سمك
يمكن عشان ريحة الزفرة ؟؟؟ يحطون هالكلونيا والبخور ؟؟؟ :)

شـقـــران يقول...

استكانتنا الغالية


مساء الخزامى والنفل والكادي
:)

كلش ولاعنون استكانة...مستعد ارسل فريق طبي من اسبانيا وماجاورها من الدول يكشفون على عنونك الرقيقة
:))

.
.

الدفاع الشرعي لوول...والله ضحكتيني من قلب...حقيقة ما ألوم هذا الدفاع الشرعي أمام الاصبع الدربيلي

:))

.
.
.

والله صدقتي..الفكس هو الحل الدائم لدى الوالدة ايضا...الله يخليهم لنا ويحفظهم

كلونيا أم بنت!،،،اممممم،،،أظن أظن مار علي
:)


لاتخافين...راكان مغرم في عنونك
:p



أهنيك على اختيار هذه الهمسة الرقيقة


عيونها أحلى وطن
!

تقبلي مني أجمل التحايا المسائية الرقيقة

As YoU LiKE يقول...

في كلونيا ثانية
اسمها ثلاث خمسات وفي تقليد ثلاث سبعات او العكس على مااعتقد :P

اما الفكس عجييييييب ..

سلامااات ..

esTeKaNa يقول...

يا مساء الخير كله
يا مسا البخور والعطور من غير فكس ولا كلونيا ام بنت
ولا عزاء للفكسيون
:pP~
بعد يوم طويل جدا ومتعب
قرأت تعليقاتكم وضحكت من قلبي
اكتشفت كم مدون ومدونه يمكن يصيرون لي من ادوية بيتهم
:))
كنت اريد الرد على كل تعليق
ولكن
وصلت البيت لأجد حرب ضروس من الفكسيون في مدونة بنت الشامية
فاعذروني على التأخير
فانا لم ولن اعتذر لأحد
انا اعتذر عن مشاعري؟
أبدن(ن)هذي فيها قبايل
:Pp~

مـي يقول...

سلاااامة عيونج
لاباس طهور إن شاء الله

ماتشوفين شر يالطيبة

ولد الديرة يقول...

اعتقد عاديتي نص مجتمع المنشعين

ديري بالج :>

candle يقول...

مو صج انا عبالي محتفظه بالسر الخطيير حق نفسي ان الحل بالفكس في ٩٠٪ من الأمراض الموسميه و العرضيه
وعبالي بس أنا الباقيه من الأجيال الغير ديناصوريه اللي ليلحين حامله الرايه ومصره أسمي الوازلين وازلين بقصد أو بغير قصد..
كلونيا بو بنت الحمدلله غير دارجه في بيتنا رغم اني مقتنعه بفوائدها في انزال درجة الحراره .. الله يعينج ويشافي عينج امتعتيني بهالبوست الشرباااااتي كالعاده :)

DiLLi O MiLLi يقول...

يســـــــــــــــقط
حـــــزب الفكــــــــــس البعثي

الفكــس وأم بنت .. خُـــــزعبلاااات الماضي
وسبب رئيسي بالتلوث البيئي بديرتنا

سنقوم بأنشاء لجنة أزالة الفكس وأم بنت
وسيكون عملها أزالة التعديات اللاحضارية بالديرة
ألا وهي أم بنت والفكـــس
وستبدأ عملها من منطقة الشــــــــــــــــامية
حيث التعدياااات وااااصلة حدهـــــااااااا
السكان يشتكون من أنبعاث الروائح الفتاكه من
منزل بنت الشاميــــــــــــــــة







وصارت الصكه عند بنت الشامية
لوووووول
:)

esTeKaNa يقول...

lawyer
~~~~~~~~
ايييييها يا دنيا
اثاري الصداقات صايره على المحك
على طريف
!!
الواحده ما يمدي تعبر عن مشاعرها
وتصد شوي
ترجع تلقى حرس ضروس وسحب سفارات
@@
اي يا لوير المشكله انج انتي اول من علق فأنتي وضعتي اول بذره للتأزيم
:Pp~






وفاصل اعلاني:
الله لا يحرمني من دعائج يابعد قلبي انتي
:*

esTeKaNa يقول...

Najmah
~~~~~~~~~~
صباح الخير يا صديقتي الزيتونيه
:Pp~
انا ابوي يحب الزيت زيتون بالاكل
اي شي اي شي لابد يغرقه زيت زيتون
اثاريج من اتباع الزيت زيتون يا نجومه؟
:))
الله يسلمج يا بعد قلبي انتي
ذكريني بس اشوفج بقولج شي
:*

esTeKaNa يقول...

I7na 3shagnaha
~~~~~~~~~~~~~~~~~
إي حطيت
وفشلت حيل من ابوي يوم انبهر
بس على قولته بكل جواد كبوه
انا الجواد عشتو
بس هاليومين زايده كبواتي اللهم يا كافي
:pP~
بعدين انا اداحر؟
!!
دة انا غلبانه يا بيه
:Pp~
صج والله اسمه جذي؟
اسم الله علي
والله يا اخيتي انا احس اني موهوبه
اني ذكيه
بس ماحد حاس فيني
الحين تشققت عقب تعليقج رديتي فيني الامل
:pP~

esTeKaNa يقول...

الزين
~~~~~~~~
يمممممممه!
لا تقولين النمل ياكل عيوني اخترعت
لا فركتها زين ما تعفست ملامحني من كثر ما فركتها
:Pp~
ناطرة القصص
والله انتي خوش صديقه
لوما المؤزمين
:pP~

esTeKaNa يقول...

4
~~~
يا صباح البسمة الحلوة
:)
عسى ربي يحفظج ويدومها بسمتج
وهذي الكلونيا اهي يمكن نفسها اللي قال عنها الزميل
As You like
!!!
طلعت مشهورة وانا مادري
:)

esTeKaNa يقول...

Deema
~~~~~~~~
وااااااي
انا قريت التعليق حسيت بريحة البومبيا والبخور والحل
عسى ما كان حر؟
يا بعد قلبي قلبج
اشلون وصلتو البيت هذا جهاد
هذا بالضبط تلوث نفسي عشتيه
:)))
الله يحفظ الديمه
عدل عدل اسمها بومبيا
الظاهر انا وياج ذات الجيل والبيئه
:Pp~

esTeKaNa يقول...

sn3a
~~~~~~
هلا بالسنع كله
هلا بللي تفزع حق استكانة
الله يوم شفتج عند بنت الشامية
حسيت ايي استكانة وراها ظهر
:Pp~
بس تعالي سنعه
انا قلت ابي عاشق يتغزل بعيني ويشعر
مو عاشق يطقني عين وتورم عيني
لا هذا مابيه
:p~
تكرهين الفكس؟
اشوة حسيت اني طبيعيه عبالي بس انا
:)
ههههههه
ضحكتيني
اي والله عاشق حساوي
:Pp~

esTeKaNa يقول...

ابو الدستور
~~~~~~~~~~~~~
اي نعم تمرية
انا اللي فهمته اني احطها جنه كمادات
بعدين انا مداني احطها؟
للحين يطنزون علي
:pP~
الله يسلمك من كل شر

esTeKaNa يقول...

mellow
~~~~~~~~~~~
يا صباح العسل
:)
هههههههههههههههههه
واي ميلو موتيني من الضحك
عسل بشعرج؟
هذا كله من تأثيرات المنتديات ونصايح البنات ،عسل بالشعر
هرده نامي فيها
مايونيز وبيض بالراس
كيكه مو ادميه
:Pp~
يا بعد قلبي يا ميلو
ست وجوه شامبو؟
انا لو منج اقرع واقعد
عاد عسى عقبها تبارق شعرج الحرير؟
:))
بعدين لما ما رضى يروح العسل جان كليتي طمام؟
هههههههههههههههههههههههههههههه
واي زوقه اللله يحفظها
انا اقول حق امي قبل لا تعطيني نصيحة بحكم منصبح كا ام قولي مادري
عادي قولي مادري مافيها شي
مو كل شي فكس
وبيت عمج بومبيا؟
عيل اكيد انتي بنت عمي
:pP~

esTeKaNa يقول...

إجتماعي
~~~~~~~~~
الله يسلمك
حتى انتو تعرفون هالكلونيا؟
ويييه طلعت مشهوره صج
:))
هههههه
حياك الله يا اجتماعي

esTeKaNa يقول...

Kuw_Son
~~~~~~~~~~~~~~
دكتور العيون خط أحمر
مااقدر اتكلم
لانه رفيج اخوي وابوي
lol
الكلونيا نفسها بالحلاق؟
ما شاء الله
اهي اسم الله عليها كلونيا ذكية متعدده الاغراض
:Pp~

esTeKaNa يقول...

بنت الشامية
~~~~~~~~~~~~~~~~~
الله يا الدنيا
ما جنه حبينا
ما جن سهرت عيني
ما جن سهرت عينه
اييييييييييييييه يا بنت الشامية
الحين اطلع وارد شوي القى حرب ضروس ضدي؟
ليش تكميم الافواه
انا هنا اعبر عن مشاعري
ولا بعد اكتم وما اقول شنو بخاطري
ما يصير تصيرون بيزنطين انتو والزمن علي
:Pp~

esTeKaNa يقول...

ARTFUL
~~~~~~~~~~
تمزق اربطة؟
يا ويل قلبي
يعني انا العيون والركب عندي نفس الشي
:pP~
هههههههههههه
بدعت يا ارتفل
عسى ربي يحفظ ام شيخة الغاليه
ويطرح البركة بالجميلة شيوخه

عيل عين بقره ها؟
طلعت عيني
اشوة انك ترجمتها على طول
:))

esTeKaNa يقول...

الزين
~~~~~~~~~~
يا صباح الحلول الطماطية
:))
هههههههههههههه
لو سمحتي
بلاسدحات على كتر بالمكتب
تبين تضحكين؟
ضحكي سايلنت نفس حالتي بالدوام لمااضحك بدون صوت بس ملامحي تتعفس
ههههههههههههههههه
ولو سمحتي بس تحسيني متضايقه
قولي لي طماط
:Pp`

esTeKaNa يقول...

أستاذ حمام
~~~~~~~~~~~
صباح الإنياهاها
:)
عسى ربي يحفظ الوالده ويرزقك برها
بندول واقطع؟
ههههههههههههه
على الاقل اهي منصبها والده
شوف الدكاتره؟
لو تقوله اي اعراض بيعطيك بالنهايه نفس العلاج بندول ومضاد حيوي
وبناء على ما سبق اكيد الوالده دكتورة
:)
اللهم امين ماقصرت
هرده؟
ههههههههههههههه
لا يمكن اهو مأجل هذي المرحله من العلاج حق شي ازيد
:p~

esTeKaNa يقول...

artful
~~~~~~~~~
اسم الله عليك
شدراك؟
:Pp~
كان امس
بس اللهم لك الحمد كل شي ماشي تمام
:)
شكرا على السؤال

esTeKaNa يقول...

جنة الحواس
~~~~~~~~~~~~
صباح مداوي كل الجروح
:)
تعرفين لي قالو اسود جذاب؟
هذا نفس الفكرة:
ازرق جذاب
:pP~
صح مادري اشلون نسيته
هذا شي رئيسي حق الشاليهات والبر حيث تكثر الجروح اول ما لنا هالدوا
انتي اكيد تصيرين لي
:Pp~

esTeKaNa يقول...

chandal/danchal!!
~~~~~~~~~~~~~~~~~~~
صباح الخير صديقتي الزيت زيتونيه
:)
تهقين عيوني فيها رضه؟
يعني اشلون
!!
ممممممممممممم
انا ما خبرت طحت على ويهي رواسي عشان يصير جذي بعيني
:pP~
يا بعد قلبي انتي
تتهمينها بالفكس؟
صار الفكس تهمه؟
ههههههههههههههههههههه
انا بوستي ريحته فكس
اخييييه يا جندوله
روحي شوفي بوست بنت الشامية
مسويه علي حمله اهي ورفيقات التدوين لوير والزين
روحي شوفي بلوقها بس تجبلين تكفخ فيج ريحة الفكس
:P~

esTeKaNa يقول...

أم حسن
~~~~~~~~~
يا صباح الضحكة الحلوة يا ام حسن
:)
ستري على ما وايهتي
لكل جواد كبوه
وانا مافكرت عدل
الحين ارد الفكس والكلونيا
واقوم احط تمريه
شهالخداي
:Pp~
الله يسلمج من كل شر

esTeKaNa يقول...

بو تشخيص
~~~~~~~~~~~
ياهلا ويا مرحبا زارتنا البركة
الله يسلمك من كل شر
:)
ممممممممم
عيل تقول دكتور مدلقم صاج؟
انت الوحيد اللي قلت صاج
اكيد زميلك ولا هذا شي اكبر من عقولنا ما نفهمه
:pP~
احط كمادات؟
اوكي
علم
كل شي حطيت فيها الله يستر
:)

esTeKaNa يقول...

QiYaDiYa
~~~~~~~~~~~~
يا صباح العسل يا قيادية الفرح كله
:)
لييييييييييييش الامتحان بطيخي؟
انتي اهم شي مقدمه زين؟
ترا الامتحانات البطيخية مرات تفاجئج وتكون نتيجتها زينه سئليني
:Pp~
ترا عمي الله يحفظه صاج
انا بعد أؤمن بالعسل وايد اكثر من ما تتصورين واحبه على الريج ويا ماي دافي
على الاقل شي مافيه ريحة
:)
وتصدقين قياديه احنا مهما قلنا ما زلنا نحمل افكار اهلنا
احس يوم من الايام بنتي بتقولي بطني
خشمي
راسي
بقولها مالج الا الفكس وام بنت
:pP~
الله يسلمج من قصرتي

esTeKaNa يقول...

jonoon 3aqel
~~~~~~~~~~~~~~~~
يا مرحبا بالجنون العاقل
:)
تقريبا تمريه مع بعض المكونات الأخرى ولكن ليس ملح
:)
حتى انتو عندكم الفكس؟
والله الفكس مشهور وعليه القيمة
:P~
سحة وملحه؟
هذي اسمها بس يخوف
:))
الله يسلمك من الشر ماقصرت

esTeKaNa يقول...

مي
~~~~
يا مرحبا
يا صباح الفازلين
:)
مي كل كريمات الترطيب اللي طلعت
ولافي مثل الفازلين
اذا تدهنتي فيه تقعدين يومين تتبارقين وتلمعين
pP~
وكلونيا الليمون عجيبه
عندنا نستخدمها في يوم الجمعه بعد السمج
:)

esTeKaNa يقول...

U know WHO
~~~~~~~~~~~~~~~~
we we!
اقلع عين؟
انا انتفخت بغا يوقف قلبي
تبين اقلعها
هههههههههه
:)
تهقين الاصابع الزقاير غير؟
ممممممممم
خوش
خليني انتبه وراي مستقبل
:pP~
وي يا بعد قلبي قلبج
اسم الله على عويناتج،ترا العين شي حساس ومهم ،لو شايفه البوكس اللي طير ايده جان عرفتي اشكثر العين شي مهم عسى عيني ما تبجيج
مالها شغل بس بخاطري اقولها
:Pp~
ما شاء الله خذيتو وكاله الفازلين؟
يدتي كانت بتاخذها
بس الظاهر عرضكم اقوى
pP~
عيل تعرفتي على كلونيا ام بنت عند ريلج؟
اكيد ريلج يصير لنا
:))
وتصدقين؟
نمت عدل احس روحي وايد احسن الحمدلله

esTeKaNa يقول...

بن علي
~~~~~~~~
الله يسلمك
:)

esTeKaNa يقول...

Yin مدام
~~~~~~~~~~~
إستكانه الشعبيه؟
تدرين حسيت اني حاطة مروايس
طيران
او قاعده اخبز رقاق واتمشى بيوم البحار
ههههههههههههههههههه
يا هلا ويا مرحبا بمدام ين حبيبة قلب استكانة
:*
الحين الفكس والكلونيا خط احمر؟
عيل روحي مدونة بنت الشامية مسوين علي حرب ضروس اثاريج من فريقهم
:Pp~
الله يرحم جدتج عساها بجنات النعيم
اسم جليجل
هههههههههههههههههههههههه
المفروض ما اضحك
بس ضحكتيني
ترا صح انا قالي في صغير بعيونج يمكن عشان جذي قالي حطي تمريه
اسم الله عليج فهمتيها
هذي رباه اليده ماحد فهمها الا انتي
:pP~
ويا بعد قلبي قلبج انتي
الله يسلمج من كل شر
:)

esTeKaNa يقول...

Nikon 8
~~~~~~~~~~
ياهلا بزينه دار عزيزه
:)
انتي تعبرين عن كل بيت كويتي
عسى ربي يحفظج ويسلمج من كل شر
:)

esTeKaNa يقول...

qesat_5ayal
~~~~~~~~~~~~~~~
ياهلا ويا مرحبا
:)
يا زين بوستات جاي حليب
فقدناها من غير شر
:)
والزيت زيتون شي مهم بكل بيت
الله يحفظنا وإياكم ان شاء الله

esTeKaNa يقول...

بنت الشامية
~~~~~~~~~~~~~~
هههههههه
:)
هذا كله من نواب التأزيم انا ادري
:Pp~

esTeKaNa يقول...

ANGEL HEART
ّّّّّّ~~~~~~~~~~~~~~~~
الشر ما ايييج
:)
الفكس طلع خط احمر بهالديرة
pP~
وصاجة كلونيا ام بنت تيب الصداع
مو طبيعيه ريحتها
:)

esTeKaNa يقول...

someone_q8
~~~~~~~~~~~~~~~
وعليكم السلام ورحمة الله وبركاته
ياهلا ومرحبا
الشرما ييك ماقصرت
:)
تقول:
وبعدين انا ابي اعرف اشمعنى الامهات يحبون الفكس والآباء يحبون كلونيا ام بنت
والرد:
هذا موضوع يحتاج دراسه ومنهجيه علميه ،راح احاول اتبنى الموضوع ليكون عنوان رسالتي الماجستير
:Pp~
بس باعتقادي البسيط ان اهو الموديل جذي،موديل الام تحب الفكس والابو كلونيا
:)
هههههههههههههههههههه
عسى ربي يحفظ لك الوالده ويطول بعمرها
صح زينه عقب السمج
بس احنا نحط مع البخور كلونيا ليمون تعرفها؟
اذا تعرفها معناته انت تصير لنا
:pP~

esTeKaNa يقول...

شـقـــران
~~~~~~~~~~~~~
يا صباح التمرية
:)
ايييييييه يا شقران
عسى ربي يحفظك ويجبر بخاطرك زي منت جابر بخاطري
:Pp~
أما الدفاع الشرعي
فلو شايفني ضحكت من صج
شقران يتني قوه طيرت ايده
سبحان الله كنت مستهينه بنفسي ولكن حزه الهجوم على العين يلهمك ربي القوة


عسى ربي يسعد قلبك ويديم الضحكات القلبيه
:)

حتى والدتك الكريمه؟
ممممم
الفكس هو احد علامات الامومه في الكويت
وسلامي الخاص للصعلوك الجونيور راكان
فديت عيونه
:)

esTeKaNa يقول...

As YoU LiKE
~~~~~~~~~~~~~~
زارتنا البركة
:)
اسم الكلونيا صعب
والتقليد اصعب
:pP~

الله يسلمك ماقصرت

esTeKaNa يقول...

مي
~~~~
الشر ما ييج يا الغاليه
:)

esTeKaNa يقول...

ولد الديرة
~~~~~~~~~~~~
الأخ من رواد الحزب الفكسي ؟
pP~

esTeKaNa يقول...

candle
~~~~~~~~~
يا صباح الشربات
يا هلا بشمعه الجلاس
وحيالله زميله الجيل الغير ديناصوري حاملين الرايه
:Pp~
مرات ايني احساس انا عيوز دايره فيها اله الزمن وحذفتها هني
:))
والله يا زين هالاسرار
:)
حياج الله

esTeKaNa يقول...

DiLLi O MiLLi
~~~~~~~~~~~~~~~~~~
يسقط
يسقط
يسقط
يسقط حزب الفكس البعثي
:pP~
وااااااااااااااااااي يا دللي
وشك ولا القمر؟
ردت روحي يوم شفتج
شفتي يا دللي رفيقات درب التدوين
شفتي حبايب قلبي لوير والزين وبنت الشامية؟
شفتي الحرب الضروس على زبوطه النقعه
يعني اشلون بللله
ماعبر عن مشاعري
واذا عبرت صار تصعيد واعتذارات؟
وش ذا التأزيم؟
Pp~
عااااااشت ديلي
وعاشت لجنة التعديات
:)
مير اني شميت بخور وانتي مجبله
انا من كتبت هالبوست وانا اشم ريحة فكس
:pP~

الخيلاء يقول...

ههههههه

انا معاج و على استعداد اني اسفرج للخارج وي قصدي ادفع الديه لا لا قصدي اوقف معاج بالسراء الضراء

ما اوطن الفكس ويع
ولا استحمل ريحته اووف

حتى الفازلين انا مو ربعه

ما حب اي شي يتلزق

خل انسوي حزب لا للفكس لول

و سلامه عيونج يا بعد عيني اتشوفين شر ان شاء الله جمديها بجاي دافي تراه زين للعين المريضه

و عشان اشاعر يلقى شي يتغزل فيه :)

ريــــــانــه الـعـــــود يقول...

لووووول اهم شي تمرية .. اخذي قطنة وحطي فيها ماي ورد وحطيها بعيونج ونامي .. يمكن تعبانة محتاجة راحة (عيونج) ;)

على سوالف الامهات .. انا ذقت الويييل

امي تسويلي عصير جرجير مع شمندر عشان فقر الدم + سلطة تونة وبصل عشان الشعر

استغفر الله كل يوم اكل اشياء غريبة عجيبة مادري شنو بالضبط بناء على اوامر الوالدة


الحين انا الام/ الابو والا انتي ؟! لول وايد اسمعها ;p

بوست حلو حلو حلو

بنت الشاميه يقول...

الخيلاء :

افاااااا صرتي وياااها
الفيكس له افضال علينا وعلى اهاليناااا...لما هو جااان علوم
هذى شكره عالميه
الحين صار الفيكس وزين
حرااام عليم
اللى ما له اول ماااله تالي

اكو احسن من الفيكس
اكو ابهى من الفيكس
اكو اجمل من الفيكس
هو اهلى وناسي
الله الله الله ياشعب الفيكس
لوووووووووووووووووووووووووووول

سبمبوت يقول...

يا حليلج يا استكانة ..

أمج عندها الله ثم الفكس .. وأمي عندها الله ثم الفازلين، كل شيء يطيبة الفازلين حتى الشعر الناشف !!

الله ........... تمرية والله شهيتيني .. يا ربي تحسين وحدة تتنسى :)

ما تشوفين شر يا بعد عيني .. ذكرتيني بنفسي لما كانت تطلع لي نفرة في خشمي كانت تصك فيني الدنيا لإني كنت اعتقد ماكو أحد راح يحبني ويدوب في دباديبي والسبة نفرتي .. وكانت رفيجتي تمسح وتقرا عليها المعوذات


لو سمحتووووووووووو حدكم عن استكانة .. ترى اذا بغيتي محامية أنا جاهزة

ولد الديرة يقول...

esTeKaNa

لووووووووول

لاااااااااااااااا

مسيكين اللي بينشع على فيكس

احس ان الرئة عنده دبقة :>

سألي الوالد عن اللي يدردعون ام بنت مؤكد سامع فيهم :>

Najmah يقول...

آبييييه آبييييه
ترى بوستج سبب لي عقدة
توني زفيت خدامتنا اقولها ريحتج فكس
ليش حاطه فكس؟
تقول لي بطني يعورني
قتلها والفكس شعلاقته
يالله روحي تسبحي وشبي بخور
بعدين تعالي
:pP

ShLaLaT يقول...

ماااااااا ارضى على ام بنت

حبيبة العايله
مقدسه عندي بشكل خاص

كلونيا ام بنت
+
كلونيا سارة الورديه
!!

ويأتي منقذ البشريه الفازلين
حق المشق
؛P

قلب طفله يقول...

لووووووووول

الفكس من الامور الاساسية بالحياة و كلونيا ام بنت و كلونيا ريقدور و كذا شي غيرهم اذا ما انوجدوا بالبيت مصيبه :P

حبيبتي استكانه ما تشوفين شر
و سلامة عينج

و مبروووك على السياره لو انها
يت متأخره الله يعطيج
من خيرها و يكافيج شرها

:****

charisma يقول...

واى موتينى ضحك وسعتى صدرى
الا يقووولج تمريييه هالمدلقممم
اشوه انج سحبتى عمرج وطلعتااااى
ههههههههههههههههه

وانا اتفق معاااج بموضوع الفكس والنفسيه انا عمرى ما حطيييت فكس ولا اوااطنه بعيشت الله
وعلى فكره الرجل الكويتى يموووت على شى اسمه فكس

اما كلونيا ام بنت فعن تجربه شخصيه ممتازه وخافضه للحراره المرتفعه

وبمر بنت الشاميه اشوف شفيييكم شكلها صااارت
;p

maha يقول...

استكانه العزيزة


ما تشوف شر عويناتج


بس المهم لحط يطعم التمرية بهيل !!!!حذار

لأن تاليها

ماراح يقعد من التمرية شي

esTeKaNa يقول...

الخيلاء
~~~~~~~~~
هلااا بالطيب الغالي
عزيز وشوفتك منوة
هلا بالحلوى والمتاي
اشلونج؟
:*
يا بعد قلبي قلبج انتي
بتسفريني؟
اوبس
قصدي توقفين وياي؟
ههههههههههههههههههههه
حبيبتي والله هذا العشم
وهذيله بنات الكويت الاحرار اللي ما يحبون الفكس
:Pp~
والشر ما ييج ماقصرتي
لا عيون ولا شعر بعيوني
ماكو فايده يا صديقتي
HEHEHEHEH

esTeKaNa يقول...

ريانة العود
~~~~~~~~~~~~~~
يا صباح الورد كله
:)
ههههههههه
عسى ربي لا يحرمج من حنانها
واعليه يحاتون الدم
والشعر
والبشره
زين منهم
تهقين بنكون امهات جميلات بحنانا واحساسنا مثل امهاتنا؟
:)
حلت دنياج قولي امين

esTeKaNa يقول...

بنت الشامية
~~~~~~~~~~~~~~
ياااااربي هالبنت
يايه هني تناشبني بمؤيديني
مااااااااايصير
خلي الناس تعبر عن رايها
ولا
لا
لا
للفكس
هههههههههههههههههههههههههه
بس احتمال بفكر بفكر
محافظة على الهويه الكويتية والسمت الكويتي يمكن افكر من هالباب انزل تحفظ على رايي بالنسبه للفكس
وليس اعتذار
:pP~

esTeKaNa يقول...

سبمبوت
~~~~~~~~
يا مرحبا بأم غدن
:)
يلله نبي اسم حلو مثل هالاسم لو سمحتي
:Pp~
واهم شي الفازلين
تلك التركيبه اللزجه السحرية المانعه لدخول الهواء القامته بكل مسامات البشره
:pP~
حبيييييييييبتي انتي الشر ما ييج
واي سمبموت
ما شفتي ويهي لما قلتي حدكم عن استكانة
تشققت تشققت
لا خلا ولا عدم يا صديقتي
:)

esTeKaNa يقول...

ولد الديرة
~~~~~~~~~~~
ابوي شايفني اوكل عيني تمرية
ومصدوم
اخاف اسئله هالسؤال واقول هالكلمه يشك فيني
يحذفني بالسكة
Pp~
براعي مشاعره عقب صدمته
وتالي بسئله
:PP~

esTeKaNa يقول...

Najmah
~~~~~~~~
loooooooooool
حبيبتي صرتي مثلي تشمين البوست
:Pp~








شلالات
~~~~~~
LOL
ضحكتيني على منقذ البشرية
صاجة صاجة
:)

esTeKaNa يقول...

قلب طفلة
~~~~~~~~~~~
ياهلا بقلب الطفلة
:)
بشريني عنج عساج بخير؟
فاقدتج من غير شر

لوووووول صاجة امور اساسيه بالحياه
بس لابد اعبر عن رايي
pp~
الله يبارك بحياتج ماقصرتي

esTeKaNa يقول...

charisma
~~~~~~~~~~~~
هلااااا هلاااااا
اي تصدقين قالي اتمرية
ليتج شايفه ويهي يوم قال
عبالي قال شي ما سمعته
شكيت قلت انا اصلا كله ما اسمع
شنو دكتور؟
قالي تتتتتممممممريييية
:D~
بعدين اكتشفت ان التمرية زينه حق الجليجل اذا تعرفينه
:)
الرجل الكويتي يموت على الفكس؟
هههههههههههههههههه
مو بشاره
Pp~
وكلونيا ام بنت صاجة خافضه
بس انا ابي افهم
اشلون كلونيا تكون خافضة للحراره
مدري اشلون سحرسحر
:)))

esTeKaNa يقول...

Maha
~~~~~~
يا هلا بالمها
:)
الشر ما ييج يا الغاليه
علم علم
شكرا على الصيحة الذهبيه
:)