الخميس، مايو 21، 2009

في وداع ولقاء....سيارة

بعد ست سنوات من العشرة،وبعد سنين كنا معا على الحلوة والمرة،أفارقك اليوم يا حبيبتي وفي القلب عبرة
لقائنا الأول ،كان بعد سنة من سحب قرار القياده مع وقف التنفيذ الصادر من السلطات العليا في بيتنا
جئتي لي هدية والدي العزيز،فحملتيني معك شابة لم تتجاوز التاسعة عشرة،فكنتي شريكة جنون اللحظات الأولى التي بدأت بالتعرف فيها على شوارع الحياة الجديدة من حولي:
أحتضن سكانك،أزنط عمري بحزامك،وننطلق معا،كنتي معي في كل طقة رصيف في شوارع الكويت،في كل فوق تحت غبية الفها فأفاجئ بها كل من تجاوزت وعديت
حملتيني وأنا طفلة خرجت للتو لعالم آخر محملة بقصص الجدة عن رجل غريب يسمى ذئبا بشريا يختطف بنات الكويت ويغريهن بمعسول الكلام،تذكرين ذاك اليوم؟
كنت امشي على قدمي في مواقف المجمع الكبير ابحث عنك لأني كالعادة نسيت مكان وقوفي ،أمشي وتتبعني سيارة كبيره تمشي بقربي،وكلما اسرعت زادت سرعتها البطيئة واصبحت جنبي،امشي وتمر في بالي شريط القصص المرعبه التي سمعتها في طفولتي،وهاجس سوف يتم اختطافي،فتتبلسني حالة ربكة غريبه وخوف يوصل قلبي للركبة،كنت احتاج ان اصرخ :
اين انتي يا سيارتي؟
تذكرين مسلسل الرعب الذي عشته حتى اللحظة التي التفت بها صاحب السياره وسئلني:
اختي وين صافطه نبي الموقف؟
فشعرت آنذاك بهوالة احساسي وخوفي
سيارتي الصبورة،تذكرين شارع الجامعه الداخلي؟
حيث تصطف السيارات على يمين ويسار الشارع،التزم بحارتي بغض النظر عن وقوف السيارات على جوانب الطريق،نلتزم بالحاره ،والحارة حاره،هكذا قالت لي مدربة القيادة
، كنت متأخره زدت من سرعتي في اللحظة التي فتح بها سائق التاكسي باب سيارته فدعمت الباب دعمه معتبره
فارتجف وتدندنل الباب كضرس طفل بالسادسه من عمره،وقفت لأعتذر ولكنه مسخرني امام كل زملاء الجامعه ودعا علي بالعما
كان يصرخ بصوت جماهيري ،وانا ابتسم للجماهير من حولي،اعلم انك في وقتها انحرجتي كما انحرجت انا
ما عليه يا سيارتي،مجتمع لا يقدر بسمتنا وأدب اعتذارنا
..............
سيارتي مستودع اسراري وشقتي الصغيره:
كتب الجامعه،ملفات القضايا،حذاء رياضي مريح،وكعب للمناسبات المفاجئة،كريم في درج السيارة،وبخورة في اي وقت قد احتاجها
..............
سيارتي وبداية التمرد:
وزميله جامعه نسيت ملامحها،تقنعني في اول سنه ان اصل معها هنا هنا لأول مطعم على البحر،ولأنه مشوار قصير لا يحتاج اخذ اذن،اذهب معها وقلبي متواكل،وأصل في أول مغامرات التمرد في حياتي لأجد أمي في نفس المكان،
وأنا دايما مفضوحه
:(
،وانقرص قرصه معتبره ،لا طلعه دون اذن مرة اخرى،لم تكن امي لتنتبه لي لولاك يا سيارتي
كنتي تتوترين معي في الأيام التي نتجاوز معا التاسعه والنصف،فأسرع معك وانا اسمع في اذني تهديدابوي:
اذا عديتي العشر رجعي من المكان اللي ييتي منه
!!
اصبح سندريلا وانتي حصاني،ويتسلط علينا الشارع زحمه،والاشارات كلها حمرا ،وتتصل امي:
وينج؟..عند اللفه
اتصال ثاني...وينج....عند اللفه كاني كاني
اتصال ثالث..وييييييييييينج؟...كاني ها ها الحين بلف اللفه مالت البيت ...فتصرخ فديت صرختها:
لفي اللفه استكانة ما صارت هاللفه
واضحك وتضحكين يا سيارتي معي
..........
في لحظات الإختناق:
اختبئت فيك واصطنعنا مشوار يبعدني عن الجميع،ويلقيني في طرقات الحزن مشرده ابكي معك وامامك،فكنتي كتومه لم تفضحي ضعفي أبدا لأي احد ،وعندما فرحت عشتي سعادتي معي ببريكات عفست كل الأمة معي
أنت الأولى..ولأوائل الأشياء دوما قيمة أخرى
هل كنتي تشعرين في الفتره الأخيرة في تغير بعلاقتنا واني ربما سأخونك؟
فمنذ أن بدأت بالبحث عن بديل وأنتي تتنحرين فجأة بالطريق،احترق قلب بطاريتك،وبدعتي بي في كل حين
افا يا ذا العلم...تشكين بغلاج وانتي ادرا،منا الوفا يا وفي الروح يتعلم؟
وفية انا لك،ولكن كل شئ في الحياة يتغير تماما كتغير مشاعرنا وشخصياتنا ونظراتنا للأمور
سامحيني:
إن كنت قد اعتدت ان اعطشك طويلا قبل ان أرويك بنزينا،او ان كنت في يوما ما نسيت ان امسح على سكانك بعد البنزين واقول لك عاااااااااافيه
سامحيني ،اذا كنت قد غلغصتك يوما وبحثت عن اي شخص يخرجك من المأزق
سامحيني ان كنت قد وضعتك بموقف محرج جدا مع ابي حين اكتشف مخالفاتنا نحن الاثنتين معا
اليوم اودعك بعد سنين حملتيني فيها شابه ملتزمه خائفه ،وودعتيني اخرى متمرده،تبعد عن السكان،تشرب بابونج وبيدها الاخرى السكان،وخوفا من ان تتعفس ملابسها تجلس فوق حزام الأمان،تجتاز اشاره جنها ما تدري،ولا يهمها متسكع يصل لحوش البيت في أي زمان
:pP~
سيارتي الغاليه:
ستكونين بصحبة سائقنا،انا اعلم ان غبي نوعا ما،ولكن الحياة تجبرنا في احيان كثيره على معايشة الأغبياء،لكنه القدر
،حاولي أن تتأقلمي معاه،ان لم ترتاحي عطيني خبر،فقد أحرر قيدك لآخر يكون أحن عليك مني
أما أنتي يا سيارتي الجديدة:
فيا مرحبا يا مرحبا بك في عالمي وحياتي،كوني صديقة وفيه وتعلمي الكتمان
لا تقولي لأحد اني أصبح بإذاعه القرآان ولكن أحيانا اذا كنت سعيده ربما أصفق تحت السكان
كوني معي صبورة:
أنا لا أجيد فهم التكنلوجيا التي تحملينها،فتحملي غبائي،ولحظات سعادتي وانبهاري
رغم معزة السيارة الأولى،فلك ايضا معزه استثنائية،فانتي أول شئ اشتريه من حر مالي مع اشتراطي عدم مشاركة ابي لي بفلس واحد
!!
حلوة كلمه حر مالي؟
نعم انتي من حر مالي،باسمي،وكل مافيك ينتمي إلي،فديري بالك على نفسك،وديري بالك علي
لن ندعم الرصيف،لن نحك سياره جارنا،لن نبتون معا في الطريق،سنكون معا أعقل وأنضج وأجمل
ختاما:الله يعطيني خيرك ويكافيني من شرك،ويجمع بيننا بالخير

هناك 59 تعليقًا:

~ هند ~ يقول...

الله يعطيج خيرها ويكفيج شرها :)

اكيد رح تحبج من أول طلعه .. لأنج حبيبه

ربي يحفظج يا غاليه ،،

3teej يقول...

الف مبروك ويعطيج خيرها ويكافيج شرها

3teej يقول...

الف مبروك يعطيج خيرها ويكافيج شرها

ikhalifa.com يقول...

هاهاهههههاهها
لا لا
غشاشة فاشلة
سواقة فاشلة
متمردة فاشلة
ما تنفعين تدشين وياي في العصابة
يمكن الطريقة الوحيدة اللي ممكن استفيد منج هي تسلفيني سيارتج اليديدة أكشخ فيها حق المهمات الصعبة
:P
مبروك مبروك
منج البترول منها
منها
السيارة شو تييب؟

المهم، حسيت جنج واحد معدد يراضى الحرمة الأولانية و يغازل اليديدة
:P
شو شعورج و أنتي معددة?
:P

Q80 Blogger يقول...

اي تعلمتي على الاولى وعورتيها لين قلتي بس .. بعدين تقومين تغازلينها !!!
تقصين على منو ؟

ماراح تمشي هالسوالف على اليديده :)

Najmah يقول...

:****
لووووووووووول
ياجمالها صديقتج الوفية
:))
مبرووووك الف الف مبروووووك
ربي يعطيج خيرها ويكفيج شرها
وطلعات سعيدة صديقتي
:))

صبا يقول...

بالمباااااارك

تعطيج خيرها وتكافيج شرها يارب

عليج بالعافيه
وتستاهلين كل خير يالغاليه




ما قلتي اي لون
:)

U know WHO يقول...

سووووسووو
ألف ألف مبرووووك

يعطيج خيرها ويكافيج شرها

نيو لووك ونيو كار
فيه شي بعد ماندري عنه
:P








لاتخافييين أتغشمررر

U know WHO يقول...

أبيييييه
توني أستوعب إن سيارتي صار لها 10 سنين

صج يبي لي سيارة يديدة
بس مو عاجبني شي
واللي عاجبتني مو عاجبني الوكيل

واللي حاجزتها توصل 2010
ومادري بجم أخاف فلووسي ما تكفي
تدرين مع الأزمة البورصوية
أخيتج باطة بطة

؛)

بس تدرين سووسوو
أنا من تنحك سيارتي حكة ولا تنطق طقة أكرها

يعني سيارتي كارهتها من شريتها

ومن بدا ريلي يسوقها ساعات ويقرمش فيها سمبوسك وانا مو مشتهيتها

:)
سوالفي سوالف ويا السيارات

بس سوالفج تشوق أكثر أنا كله استهتااار

جني طولتها
سوووووووري

chandal/danchal!! يقول...

الله يعطيج خيرها ويكفيج شرها يا استكانتنا الغالية

:)))

هالمرة الذبيحة علي

كل تاير عليه ذبيحة... عساها مودرن وثلاث تواير؟

:)

تصدقين اني مارة ابي اتشكر منك على تعليقك بالبوست اللي قبله واذا بي اتفاجأ ببوست يديد!

ميخالف طوفيلي "اذا بي" ... آخر مرة

:)


جميل سردك لسيارتك القديمية

تذكرت أيام الاولدز موبيل

احم

حشى عايشة المرطة مو جندل!!

تخيلي اول ما سقت.. كانت اولدز موبيل!!!

:(((

الله يسامح اللي جابوني بدري

I7na 3shagnaha يقول...

انا سيارتي عمرت وياي 12 سنة

بس صدمني تعليق من أحد أقاربي

والا انا ما كنت حاسة بعمرها

وبما اني شديدة التأثر بكلام الناس

شريتلي سيارة

بس ما بعت عزيزة

خذاها ريلي اللي يعشق كل عتيج

بعناها قبل سنتين

تدرين ليش

مالها مصفط

:((

Enter-Q8 يقول...

تبيعينها على خرابها نفس المجلس الجاي

Yin مدام يقول...

استكانة الغالية

واعلية عليج يوم يشخط فيج سائق التاكسي
كسرتي خاطري
:)))

لوووووووول
الله يحفظج موتيني من الضحك
استمتعت بهالبوست إستمتاع ما له حدود
وغربت وشرقت وياج بذكرياتي الخاصة
سقت سيارة أيام الثانوية بدون إجازة بتحريض من أبي وعدم رضا من أمي ورفضت أمي الحبيبة إني أطلع إجازة إلى أن أتخرج
وتخيلي دربوني في 5 أيام وسادس يوم أختج شاخطة على الهاي واي وماخذة فرة حول المنطقة على بو بييب خبز إيراني لووول
وسنة كاملة على هالحال
لحد يقول محتاج شي من الجمعية
إلا أختج عند الباب
:))

لا دعمت رصيف ولا شخطت بالسيارة وبشهادة أبوي كنت فلتة زماني بالقيادة

وبعد ما تخرجت وفي يوم استلام الرخصة
رادة البيت وأمي يمي ومن كثر ما دودهتني



ططرررربببببااااااااااااخخخخخ
دشيت بكراج بيتنا
لوووووووووووووووووول

والمصيبة الأدهى كان عندنا ضيوف
وعيال خالي وعيال عمتي كلهم واقفين عند البااااااااااب
فضحوني !!

يا زينها من أيام
:)))

شكرا لك من القلب على إحياء ذكريات قد نسيتها
:))

الله يعطيج من خير الجديدة ويكفيج من شرها وشرور الدنيا باللي فيها وعسى سايقكم يدير باله على السيارة القديمة
:)))

Sweet Revenge يقول...

ميروك مبروك,الله يعطيج خيرها ويكفيج شرها يالله لو سمحتي مريني وخذيني فرة بالسيارة :)

مركبنا يقول...

مبررررررررررررررررررررررررروك


يعطيك خيرها ويكافيج شرها

شعور الملكية الخاصة عجيب

والاهتمام المبالغ فيه

بالنسبة لي كانت ايام ومضت

يومين اهتمام ولحقت ربعها

(=

Hope يقول...

مبروك عليج السيارة اليديده
يعطيج خيرها و يكافيج شرها
كاسره خاطري القديمه ... اكيد تزلقت مشاعرها
مسكينه ، عسى بس ما صدمتيها و مهدتي للسالفه ؟
=p

Reem يقول...

بالمبارك ..
الله يعطيج خيرها و يكافيج شرها يارب

ANGEL HEART يقول...

وااااي ياحلوج شلون عايشه تفاصيل معاها

عسى الله يعطيج خير اليديده ويكفيج شرها وتهنين فيها
الفال لبي مواعديني وطال الانتظار :)

الحــــٌر يقول...

الله يعطيج خيرها ويكفيج شرها
ومبروووك تستاهلين
:)

4 يقول...

لله يعطيج العافية ويحفظج ويحفظها

صارلي فوق الشهر ما شفت سيارتي الغالية


عورت قلبي .... بس امس من كثير ما اشتقت لها شريت لها هديه

جنون إحساس يقول...

لووول بالمبارك
الله يعطيج خيرها ويكافيج شرها
اقري عليها رجاءً

الزين يقول...

:****


يا صباح الوله

صحيت حسيت ان فيني سوااالف



دقيت لج وشكلج مكبرة المخدة


لي عودة مع البوست

عججججبه

Nikon 8 يقول...

بالمبارك على السيارة الجديدة
:)
أنا مثلك أتوالف مع سيارتي وما أغيراها بسرعة
:)
الله يعطيج من خيرها ويكافيك شرها
:)

حسام بن ضرار يقول...

السيارة عزيزه و صعب جداً الواحد يفرط فيها

سيارتي صار لها عندي 7 سنين و فعلاً تسكربت و بدت تكلفني بالتصليح

بس صعب علي جدا جدا جدا اني اتخلى عنها

ودي اشتري سيارة جديدة بس مو مطاوعني قلبي اثمن سيارتي القديمه و اشوف احد غيري يملكها

بالمبارك عليج الموتر الجديد و يعطيج خيرها و يكافيج شرها

بنت الشامية يقول...

مبروك ...يعطيج خيرها ويكافيج شرها

احلى شيئ بداية التمرد
لووووووووووول
اول كله حسبالى اذا سووووينا هالتمرد
ما راح نشوف احد يعرفنا
وبالاخير ايي على روسناااااا
ههههههههههههههه
مبروك والله يهنيج فيهااااااا

متى تمرين علي نتمشى فيهااااا..؟؟؟؟
((((:

ضـاد يقول...

هههههههههههههههه
ضحكتيني والله
عاد تصدقين! ماكو على سواقة البنات p;
احلى شي الدفاشه ولا ماتعيشين. لوما الدفاشه جان تميتي باللفه ليييي قـُبل


يالله الله يعطيج خيرها و يكفيج شرها ياربي
حافظج الرحمن

:)

lawyer يقول...

يااااااااااااااااازين هالبووووووووووووووووووست


صج عبرتااااااااااااي عن احسااااااااااااااااس كل انسان و علاقته بسياااااارته

صاااااااااااااجه


اول ما سقت كنت بالجامعه

بحولي قطيييييييييعه

اصعب تهريب بحياتي سويته تتوقعين شنووووووووووووو؟؟


اروح ماكدونالدز شارع بن خلدون و قلبي يعورني و يتكتي العرررررررق


اشلون رايحه و امي ماتدري



و مره رحت سووووووق شرق ستااااربكس والا امي الي فووووووووووووق قاعده بالقهوه تطالع الي داش والا طالع مااااااااوعيت الا تررررررررررررن

شلته بسرعه و قلت لها يمااااا علووووووويا تحن علي نبي اغراض من سوق شرق


قالت ادري كاني فوووووووووووقج اشووووووووووفج





واي اناااااااااااااااا اول مالت علي صصصصصصصصصصصج خوافه ههههههههههههه



عسى ربي يااااااااااااااااارب يباركلج في كل رزق تحطينه على عمرج و يكثر خيييييرج

و يزييييييدج و تحطييييييييييين كل الي بخاطرج

و يباااااااااركلج في سيااااارتج اليديده و كل شي يديد في حيااااااااااتج

:: بـوح الصمـت :: يقول...

لوووووووووووووووووووووووووووووووووول :)

حبيتها سيارتج ;p :*

الله يعطيج خيرها ويكفيج شرها ويحفظج من كل شـر :*


عليج بالعافية حبيبتي =)

glomhilda يقول...

:)صباحج جديد استكانة

ماشاء الله
مبروك يالغالية

ربي يديكي خيرها ويكفيكي شرها قااادر ^_^ يا كريم

فديت الوفية حتى مع الجماد

مغامرات سعيدة بإذن الله مع العروس الجديدة

عاد ما أوصيج..تصدقي عشان ربي يكافيج شر الحساد والشوارع


(save me a ride)

charisma يقول...

Heheheheheh maabroook 7bebty yewarech 5erha aw yakfech sharha 3lech bl 3afya :* wana agraa bostech rdeteny ayam el jam3a aw awal sayaraa f3laan fargaha kan 9a3eb kh9oo9aan sayarat el jam3aa gher 3an ay sayara leaanaa shaafaat eltheeem wl thalayeem men e3lemeyah awal mra yesogoon loooool

الزين يقول...

يا مساء السيايير اليديدة

عسى ربي يبارك لج فيها ويحفظج من كل شر يارب


شوفي انا سيارتي اللي قبل هذي بعتها وحالي يقول روحي والقلب داعي لج

خلال شهر واحد سويت حادث فيها وبغيت اروح فيها

صلحتها وطلعتها من الكراج جان تحترق جدام البيت

قلت عوووع ما بيها

وتميت احوس لين لقيت السيارة اللي بخاطري

شي ما استكانه

على فكرة سيارتج تعبر عن شخصيتج

عشان جذي تحبينها

اما انا حكاية غرامي مع سيارتي شي مو طبيعي

:))


لا تضكين علي

بس اوله عليها وافقدها

وما ارضى احد يسوقها غيري

وكل ما طلعت ورديت تشوفيني افتر داير ما دارها اتفحصها

@@

وسواس كله خايفه تنشخط ... تنزلق

مدري بس من محبتي لها اداريها يختج

:)


تهقين هذا يسمونه جنون السيايير

مدري


بس اتصور انتي بتسوين مثلي

:)

ميمة السبيت يقول...

ياحلوج يا استكانه و ياحلو كلامج و اسلوبج عجييييييييييب صراحه اما سالفة اللفة اشوه ونستيني يعني مو بس انا لووووول


يالله عليج انشالله بألف و 600 عافية يالغاليه و صفطي عدل عن التقلقص

candle يقول...

شالنطاعه .. جنج أنا أرتبط عاطفيا حتى بقلم بك اذا طول عندي مده ويعز علي فراقه :) عاد السياره شي ثاني .. عسى الله يحفظج ويهنيج فيها يعطيج خيرها ويكافيج شرها

ARTFUL يقول...

الله يعطيج خيرها ويكفيج شرها

تستاهلين كل خير يا استكانه

انا اسجل اعجابي بكتابتج

بس والله يا استكانه انتوا الحريم

تسوون من الحبه قبه

واذا تعلقتوا بالشي تسوونه جنه

ويضيق خلقكم اذا بعتوه او شي

انا ما عمري تعلقت بسيارتي هالكثر

اذا حصلي احسن منها ازتها وبالطقاق

;D

لما قلتي اترسين السيارة بانزين واطقينها وتقولين لها بالعافيه تذكريني ابنتي لما اشربها حليب عقب اطقطق ظهرها علشان اتريع

كااااااااااااااااااك

;D

عاد الركاده وانا اخوج

ششتريتي؟؟

والا سررررر

;p

نهــــــــــار يقول...

السلام عليكم...
الله يعطيج خيرها ويكفيج شرها...
........
بس صراحه ماشي أمل حق الشرده عندج...
أول ظهره أمج زختج...
ههههههه
...........
دمتِ بخير

esTeKaNa يقول...

هند
~~~~~~~~
الله يسلمج ما قصرتي
:)



3ateej
~~~~~~~~
عتيج؟
:)
الله يبارك فيك ماقصرت

esTeKaNa يقول...

ikhalifa.com
~~~~~~~~~~~~~~~
hahahahahahaha:))
لا صدقني فيني شر مستخبي
:Pp~
الله يبارك فيك ماقصرت يا بن علي
شعوري وانا معدده؟
صراحة
صراحة
احساس بتأنيب الضمير
انا مادري اشلون الرجل يهنا له قلبه يعدد
:pP~

ikhalifa.com يقول...

فيج شر مستخبي!
يعني تبغين تدشين العصابة؟

esTeKaNa يقول...

Q80 Blogger
~~~~~~~~~~~~~~~
واي لا تقولون لي جذي
بروحها كاسره خاطري سيارتي القديمه
احسها تطالعني بطرف عين
:(







najmah
~~~~~~~~~
شرايج فيني انا مو وفيه؟
:Pp~
يبارك فيج يا صديقتي







صبا
~~~~~
هلا بصبا الجمال كله
:)
الله يبارك فيج
ولونها...ممم لون حلو
:pP~

esTeKaNa يقول...

U know WHO
~~~~~~~~~~~~~
احم شكيتي فيني؟
يسلمج شكي فيني
مادري ليش ماكو احد يشك فيني
:Pp~
الحين اذا عاجبتج انتي مالج شغل بالوكيل؟
بتناسبينه؟
:)
انا واعليه سيارتي شافت ظيم وظلايم من تحكك الرصيف والسياير
بعدين عليه بالعافيه ريلج
بس ذكرت شي ضحكني
تدرين انا اسوي رجيم التزم عدل
ما يخرب رجيمي ولا يخربطني فوق تحت الا شنو ياترى؟
.
.
.
.
السمبوسه
:pP~

لا تقولين طولتي
هذا بلوقج ومكانج يا الغاليه

esTeKaNa يقول...

chandal/danchal!!
~~~~~~~~~~~~~~~~~~~~
الله يسلمج يا الغاليه
يابعد قلبي قلبج
ياربي الله لا يخليني حوش البلوق كله ذبايح ماقصرتو
:Pp~
الله يا أنا حبيت إذا بي
زيدي منها
ترا انا احب هالسوالف
وبعدين هاليومين انا مستقره بالبيت
الله يعينكم على البوستات
:pP~
بعدين جندوله ليش تتشكر مني؟
ترا انا ما اقول كلام من ورا قلبي
انا فعلا فرحانه لج وادعي لج من قلبي عسى ربي يتمم عليج
:*
هههههههههههه
يالله نبي بوست عن الأولدز موبيل
:Pp~

esTeKaNa يقول...

I7na 3shagnaha
~~~~~~~~~~~~~~~~
يا بعد قلبي قلبج يا عزيزه
دارت عليج الدواير وصار ما عندج مصفط
:(
تصدقين انا محتاره
وين اصفط القديمه وين اصفط اليديده
مابيهم يغارون من بعض
:Pp~

esTeKaNa يقول...

enter-q8
~~~~~~~~~~~~~
لازم تربط كل شي بالمجلس
انسى انسى
:Pp~






مدام
yin
~~~~~~
اهلا اهلا مدام
ياربي لما اقولج بس مدام احس روحي سيلانية
:Pp~
ترا سايق التاكسي كان بدوي
تقدرين تقولين مسخرني على مستوى رفيع
:))
مااااشاء الله
شنو هالذكريات الحلوة؟
انا كنت جبانه
وما زال فيني بقايا هالجبن
اهم شي الجبن
لوووووول
حيالله الغاليه
ونستيني بتعليقج
:*

esTeKaNa يقول...

sweet Revenge
~~~~~~~~~~~~~~~~
الله يبارك فيج
وافا عليج تامرين امر
تم اعتماد موعدك في جدول مواعيدي
:pP~






مركبنا
~~~~~~~
الله يبارك فيج
يعني تهقين راح افقد اهتمامي فيها بعدين؟
ممممم
ما يندرا
:Pp






Hope
~~~~~~
تزلقت مشاعرها؟
واااااي لا تعورين قلبي
انا بروح مشاعري مزلقه
اصير انا وسيارتي مشاعرنا جذي
:(
لا انا قاعده امهد لها الموضوع
ومتدرجه وياها
لا تحاتون
:)

esTeKaNa يقول...

Reem
~~~~~~
الله يبارك فيج
شكرا يا الريم
:)









ANGEL HEART
~~~~~~~~~~~~~~~
حلت دنياك قولي امين
:)
الله يسلمج ماقصرتي
ويالله الفال لج قريبا







الحر
~~~~
الله يسلمك يا الحر
ماقصرت
:)







4
ّ~~~~
شهر ما شفتيها؟
من غير شر وينها مسافره؟
:Pp~

esTeKaNa يقول...

جنون إحساس
~~~~~~~~~~~~
ان شااااااء الله
:)
الله يبارك فيج ماقصرتي







الزين
~~~~~~~
يا صباح السوالف
شفت رقمج يدق كنت نايمة
عبالي انج متقلقصه باحلامي
:**









Nikon 8
~~~~~~~~~
نتوالف من شفافية مشاعرنا
:)
الله يسلمك ماقصرتي







حسام بن ضرار
~~~~~~~~~~~~~
الحمدلله
يعني مو بس انا ارتبط عاطفيا بسيارتي؟
:)
الله يبارك فيك ماقصرت

fatto يقول...

انتي وحده عجيييبه .. كل شي عندج له معنى .. ويلا منو يفكر نفس تفكيرج ابسياره !!

الصراحه ودي اصير نفسج اقدر كلشي من حولي حتن الاشياء البسيطه :)


يعطيج خيرها ويكفيج شرها يارب :)

esTeKaNa يقول...

بنت الشامية
~~~~~~~~~~~~~
يا هلا بشيخة الشامية كلها
:*
اشرايج فيني انا والتمرد؟
ما سوت علي
انزفيت زفه معتبره ما من تمرد عقبها
:))
الله يبارك فيج
وي امرج؟
جاااااااان بخت
جود انها تتبارك فيج يا الغاليه

esTeKaNa يقول...

ضاد
~~~~~~
ياهلا ويا مرحبا
اشتقنا للضاد
:)
وصاجة على الدفاشه
ههههههههههههههههههههه
قبل كنت استحي طول الطريج عيني على المنظرة اشوف السياير وراي
شهالحاله
شوفي جدام
هههههههه
الله يسلمج ماقصرتي
:)

esTeKaNa يقول...

Lawyer
~~~~~~~~
وقال أحبك
أويلااااااه
:Pp~
فطومه حزتها كان هالماكدونالدز يحجي
وسبحان الله تمر السنين
يصير المكان عادي
وانتي نفسج تتمردين على كل شي ويصير عادي
:)
بس على سالفه سوق شرق
ههههههههههههههههههههههه
انا كله اقول ربي حافظني بامي
عسى ربي لا يحرمنا منهم يارب


ويا بعد قلبي على هالدعاء
اللهم امين واجمعين يارب
:)

esTeKaNa يقول...

بوح الصمت
~~~~~~~~~~
حبتج العافيه ماقصرتي
حتى اهي تسلم عليج
:pP~
ماقصرتي









glomhilda
~~~~~~~~~~~~
صباح المشاعر الجميلة
ومساء الوفاء كله
:)
وسيارتي صارت عروس؟
هههههه
وشكرا من القلب ويزاج الله خير على النصيحة ،ان شاء الله ما انسى واتصدق
:*








charisma
~~~~~~~~~~~
ياهلا ويا مرحبا
الله يعافيج يا الغاليه ماقصرتي
:**
هههههههه
اي والله شافت ظيم
انا اخاف احد يسوقها
تقوم تقوله عن اسراري
انا اشهد ان فيها اسرار
:))
ترا ردتج البلوقات ردت روحنا
وايد فرحانه انا بوجودج مرة ثانيه بينا
الله لا يحرمنا

esTeKaNa يقول...

الزين
~~~~~~~~
يا مسا الورد كله
لابد تركبينها عشان تتبارك ترا
:**
وي اسم الله عليج الله حفظج
!!
اخييييه يا الزين اخيه
اذا هذا احساسنا بالسياير
اشلون احساسنا مع الدنيا كلها
:)))
بصير مثلج؟
يا ليت دايم اصير مثلج
:*

esTeKaNa يقول...

ميمة السبت
~~~~~~~~~~~~
ياهلا ويا مرحبا بميمه السبت
:)
حلت دنياج قولي امين
هاا انتي وياي على نفس اللفه؟
اكيد انتي اللي مسويه زحمه مو انا
:pP~
وافا عليج لا توصين حريص
عسى ما اصفطها يمي بالدار مو بالكراج
:))
الله يعافيج ماقصرتي

esTeKaNa يقول...

candle
~~~~~~~~~~
تدرين ان كلمه النطاعه جميلة؟
:)
ارتباطنا العاطفي مع الجمادات المنسوب ملكيتها لنا دلالة عل رهافه مشاعرنا وشفافيتها
:)
اللهم امين ويزاج الله خير ماقصرتي

esTeKaNa يقول...

ARTFUL
~~~~~~~~~
الله يسلمك ماقصرت
ويزيدني شرف اعجابك بكتاباتي
:)
طبعا نتعلق ولا تقارن بنت بريال
نحن من زهره وانتم من المريخ اخي العزيز
:Pp~
انا بالنسبه للسياره
فشرايك فيني؟
مثل ما انت حنون على شيوخه انا حنونه على سيارتي مع فارق التشبيه
عسى ربي يحفظها الجميله
:)
ما اقدرررر اقول
ولا ودي اسطر السياره بنص البلوق
:pP~

esTeKaNa يقول...

نهار
~~~~~
ياهلا ويا مرحبا بنهار الامارات كله
:)
شرده
وزختني؟
ياربي كلامكم غريب بس جميل
:)
هههههه
حياج الله

esTeKaNa يقول...

بن علي
~~~~~~~~~
اي ليش لا
:Pp~








Fatto
~~~~~~~~
hahaha:))
تهقين انا انسانه عجيبه؟
ترا استحيت لا تقولين لي جذي
:Pp~
انتي جذي صدقيني
بس يمكن ما خطر ببالج تعبرين
ولو تعطين نفسج فرصه التعبير راح تكتشفين روعه مشاعرج من داخل
:)
حياج الله

ولد الديرة يقول...

اذكر المستملق المقدوني الأكبر كان عنده بيت يقول


احسد البنز لا قامت تسوقه



الله يحفظج

:)

esTeKaNa يقول...

ولد الديرة
~~~~~~~~~~~~
سلم لي عليه
:Pp~
وعسى ربي يحفظك يا ولد الديرة
:)