السبت، مايو 16، 2009

الحمدلله

الساعة الثالثه والربع فجرا
!!
العيون متخيطة
شربت كل أنواع القهوة
وانتلفت أعصابي...ليش عاد؟
مادري
في كل دائره هناك كم مرشح منيشنه عليهم ابيهم يفوزون
فاز من فاز وخسر من خسر ولله الحمد نؤمن بالدمقراطية
أسرتي الجميلة نائمة اخواني،امي ،وابوي ولا احد على اعصابه الا انا
أفكر احيانا ماذا لو أن ابي مرشح بأحد الدوائر
أعتقد كنت نايمة حاليا في احد هذه المدارس من الشطة
ومضيعه وين بيتنا تالي الليل
ومتهاوشه ويا كل المدونين
!!
.
.
.
تغافلتني اكثر من غفوة وانا اتابع النتايج،المضحك ان احلامي من قلب الحدث
رأيت نفسي في اول الحلم أرتدي بالطو معصومه وحجابها بنفس الأسلوب
ثم رأيت اني احشي كوسى والف ملفوف مع رولا
ثم كأني اتمشى مع سلوى اجسار والفت فجأة لتتحول د.سلوى لوجه خالتي بدرية
ثم فجأة طلعت لي نوال المقيحيط تصرخ:
وثقب الأوزووووووون؟
وعاشت احلامي الخربوطية
.
.
.
اليوم الفاصل الفكااهي كان لجدتي حفظها الله ،تريد مرشح:
ما يبمبع
امه كويتيه
مو متزوج ثنتين
ما يعيب على الحكومه ولا قص يقص لسانه
يستحسن من غير لحية ،واذا عنده لحية مرتبه ..شلون مرتبه؟
مادري اهي لها مقياس خاص
!!
فاكشتفت ما تسوا العنوه أودي جدتي لأن لا يعجبها احد
.
.
.
أختي الصغيره هذه المرة الأولى التي تقف فيها متابعه الانتخابات عن قرب من المدرسه،اثناء وقوفها وجدت حقيبه يد صغيره ضايعه،سئلت عن صاحبتها فلم يصلها رد،اتصلت علي قلت لها تروح لأقرب ضابط
الضابط واختي فتحو الحقيبه وجدو فيها:
مشط يفرق الشعر البني القديم،بوك وأرقام كثيرة مصفطه مليون صفطه،ودهن عود
!!
الضابط سئل اختي وهي ياهل هالطول:
تروحين وياي المخفر؟
طبعا خافت
قالت لا
قالها اوكي عيل قطيها اي مكان يمكن يبوقها اي بنغالي ولا هندي وخلاص
@@
.
.
.
.
أخيرا:
اليوم كنت بمشوار لصديليه في السالمية،بعد ان شريت ما اريد سئلني البائع السوري ان كانت اسيل ستفوز؟
قلت له اللهم اعلم،وناقشني كثيرا عن الانتخابات الكويتيه وانبهرت من متابعه المقيمين لنا
شريت ما ريد وخرجت بعد ان اعطيته محاضره بالدمقراطية الكويتية،وما سوا علي الشوح اللي كنت فيه
حيث اني بمجرد ركوبي لسيارتي تنحرت وقررت ان لا تتحرك على غير عادتها
اتصل بالشباب اخواني لا يردون كل واحد بمقر
اتصل بأبوي ،ابوي مندوب لا يرد
اتصل بعمامي....قضاه ،دوانيه ،حجز لا احد يرد
اروح لمين؟
.
.
.
.
.
النهايه كانت ان الصيدلاني اتصل على الكهربجي الذي نقل سيارتي لي عنده
وضع لي كرسي وطلب لي جاي
وانا ريل على ريل عند باب الكراج قاعده وهو يبدل البطاريه ويسئلني:
بده تفوز رولا؟
:D~
عندي مشكله اذا سولفت مع غير كويتي،دائما احمل مسؤليه اني سفيرة الكويت ولابد اعكس الوجه المشرق لها
بغض النظر عن المكان والاشخاص
وهذا ما حصل
.
.
ولا عزاء للسمت ولا للبرستيج
.
.
.
.
ختاما:
هذه الانتخابات الأولى من نوعها بفوز اربع نساء،نسئل الله ان يحفظهم ويطرح فيهم البركة ويوفقهم ويكونون الوجه المشرق لنساء الكويت
اما البناات الخربوطيات الراقصات المستهبلات عند بيبان المقرات والمدارس فأنا اعلن أنهن فعلا لا يمثلن الا انفسهن وفشلونا
مبروك...لكل الفائزين ولكل من ناصرهم
وشكرا لكل من رشح نفسه ولم يحالفه الحظ فقد اراحة الله من المسؤلية
وشكرا لكل المدونين الذين طوال هذه الفتره أمتعونا
ولكل من تناجر وتعاسر مع غيره تعوذو من ابليس بس الحمدلله قضينا
نتم بالنهايه حبايب عسى ربي يحفظما ويحفظ ديرتنا
وأخيرا:
أذن الأذان الثاني للفجر،وانتهى يوم من اطول ايام الكويت واجملها
الله يحفظ الكويت وشعبها ويوفقنا جميعا
اكتب هذا البوست بعين واحده،حيث ان عيني اليمين تعاني من شئ ما لا عرف ماهو،لكنه انتفاخ واصل حده اليوم
يجعلني اتحول لغرصان..عين عوره وعين صحيحة
:(
.
.
.
تصبحون على خير
وصباح الخير يا كويت

هناك 59 تعليقًا:

Yin مدام يقول...

أستكانة النعسة أم عين عورة وعين صحيحة

يا حلوج
ويا حلو أحلامج
لووول موتيني من الضحك وخففتي عني التوتر
الله يحفظج يا رب
ويحفظ جدتج والله شروطها صعبة لو يخلونها مسؤولة عن تنقيح المتقدمين للترشيح
جان علومنا علوم
:)))

أعتقد الغالبية مثلج على طول نصير سفراء للكويت والله يديم هالحالة علينا
:))

ومبروك فوز النساء
وذكرى الرشيدي سياسيا اكتسحت الرابعة وقفزة كبيرة باتجاه التغيير

مبروك لمن فاز وهارد لك لمن خسر
والأهم من كل ما سبق إن كل من فاز يحط الله بين عيونه وبقلبه ويحط مصلحة الكويت فوق كل إعتبار
ويا رب نشوف إنجازات وعمل صادق وتغيير فعلي بالبرلمان
:))

تصبحين على ألف خير يا أستكانتنا
وإن شاءالله تقعدين ولا أثر لأي ورم ولا غيره

:)))
والحمدلله رب العالمين

شـقـــران يقول...

الغالية استكانة

صباح الجاسمين
:))

كيف الاحوال


تبين الصج...والله انك خير سفيرة للبلد

أدب وثقافة واخلاق وعلم ومعرفة

ماشاء الله عليك وربي يزيدك من فضله



وثاني مرة سوي سيرفس للسيارة ترى موقته تخرب ايام الانتخابات
:)


وسلميني على الجده كثير السلام


نسيت
مبرووووك فوز معصومة وباقي المرشحات


الفال لك...لو بدائرتي أنا وزهرة الجوري وراكان سينغل لك
:)



تقبلي مني اجمل التحايا وارقها

ma6goog يقول...

تستاهلون يا نساء الكويت كل خير

و نأمل بديموقراطية أفضل مع الاربعة نائبات

Kuwait يقول...

صبحج الله بالنووووووووور ..
مبروووووووك دخووول النائبات بمراكز مشرفه :)
وانا اشاركج نفس الشعور الكل نايم وانا محترقه اعصابي :(
الصدمه دويسسسسسسسسسسسان باط مرارتي

أستاذ حمام يقول...

احلى صباح للكويت.. تفتحت فيه اربع ورود.. احيوا الامل فينا من جديد..

.. يا سلام عليج يا د.معصومة:
- اول وزيرة
- اول امرأة تدخل قاعة عبدالله السالم
- اول نائبة منتخبة
- اكثر نائبة اصواتا من بين زميلاتها الفائزات
- اول وزيرة مستقيلة
- اول اول مرشحة في دائرتها

.. لم يكن اختيارك الحكيم من سمو الامير حينها وزيرة خاطئا.. بوركت انتي وزميلاتج..

.. وبانتظار التغيير،

عيدي يا كويت يا اغلى بلد

esTeKaNa يقول...

مدام yin
~~~~~~~~~~~~
ياصباح الفرح كله
اجمل مافي اليوم ان سهرنا كلنا مع بعض
:)
الله يحفظج ويديم عليج الفرح
ويجعلك انتي واسرتك الجميلة اجمل سفراء للكويت دائما


الله يبارك لما فاز ويعينهم على تحمل المسؤولية يارب



وأنتي من اهل الخير يا الغالية
:))

esTeKaNa يقول...

شقران
~~~~~~~~
يا صباح اللاتين
:)
عسى ربي يحفظ زهره الجوري
ويبارك براكان
ولا يحرمنا من طلة شقران
.
.
.
الله يسلمك من كل شر
يا هناي بهالصباح الجميل
اخجلتم تواضعنا
اللهم اجلعني خير مما يظنون
والله اليوم فكرت هل ممكن في يوم انزل مرشحة؟
فكان جواب عقلي حتى الآن:
ابعد عن الشر وغنيلو
:))
الله يبارك للجميع ويوفقهم يارب

esTeKaNa يقول...

ma6goog
~~~~~~~~~~
نتمنى ذلك الله كريم
:)






kuwait
~~~~~~~~~~
دويسان:
أعظم صدمه بحياتي
:(
ما زلت مبهورة
هذه الانتخابات نتائجها جدا غريبه






أستاذ حمام
~~~~~~~~~~~~
حق لها الفرح بهذه الانجازات الكبيرة
وحق لها الفخر وهي الأولى بأمور كثيره
:)
الله يحفظها ويبارك لها
ويعينهم على المسؤليه يارب

الحــــٌر يقول...

وانت بخير ومبرووك وصول المرأة
وعسى يكون لها دور ايجابي للحين ما طلعت النتايج فا ندري جم وحده بس اقل شي ثنتين مبروكين عليهم
:)

Najmah يقول...

آآآآآه
طايحة مريضة بالفراش موقادره اتحرك
أذوني تذبحني والكمادات على راسي
وعيوني متقلقصه على شاشة التلفزيون
وأبوي يغفى شوي ويقعد يقول لي ها شصار
!!
الحمدلله
عسى ربي يطرح البركه والخير
ويوفقهم لمصلحة الكويت
تصبحين على خير

حاطب ليل يقول...

مبروك علينا
هالعرس

Blog 3amty يقول...

"الظاهر"
أن قوى المجبوس أسقطت الكشري بالثالثة

Cooookies يقول...

hehe allah yakteblehum ilkhair bilmajlis .. inshallah metfa'leen oo nabe e9la7

مركبنا يقول...

استكانه


صباح المسؤولية
ما عطاج ربي الي عطاني
حطيت راسي ونمت (=

Ra7aLaH يقول...

9ABAAA7 MAJLES YEDEED :D
MABROK!
Mu7ar ams kan faal khayer il 7amdelah ;D

U know WHO يقول...

سوووووسوووو
يسعدلي هالـ صباح
يوم غير عن كل الأيام
يوم فيه أربع كويتيات في المجلس

الحمدالله والشكرله

مبروك علينا وعلى الكويـت
444444444444444444444444444
444444444444444444444444444
444444444444444444444444444

mellow يقول...

على قولة إختي

صباح الحريم في المجلس
:)))

مقاييس يدتج الله يطول بعمرها لازم نعتمدها بالإنتخابات الياية

بنت الشامية يقول...

صباح الخير ياكويت
صباح الفوز والنجاح
ما بقيناااا نكسر حاجز الصوت
ويفوزونا بناتنااااا
مبروك لهم ...مبروك لنا
مبروك للكيت
اليوم صج يوم تاريخي بالكويت
الله يبارك لنا فيهن
نون النسوة دخلت المجلس
كوزيرات
والوم بتدخلنون النسوة
كنائبات
مبرووووووووووووك

الله يحفظ الكويت

chandal/danchal!! يقول...

tsk tsk tsk

يا ربي عل اللي يروحون صيدليات بالسالمية!

:p


لأ والألاطة ريل على ريل وتشرب الشاي!

:p

ما شاءالله على الصيدلاني والكهربجي

بلبل بلبل أرجنتيني
.
.
.


لووووووووووووووووول على محتويات الجنطة!


شكلج نسيتي تذكرين "بوفاس" أو "وازلين"... ما يستغنون عنه!


أنا مع عمي الشرطي... خليبتلش فيها اي بنجالي!
.
.
.

صباح طيب يا كويت ويا استكانتنا

:)

mtfa2el يقول...

الحين مو لو داش الجويهل أحسن من الدويسان ؟؟؟
الدويسان ؟؟
الدويسان عاد !!!
يالله تفضلي هذا صار نائب بمجلس الأمة و يقولون الجويهل ما يصير يدش المجلس

اففففففففف

ARTFUL يقول...

نسأل الله التوفيق لكل من فاز

سواء وافقنا بالأفكار والمبادئ والا لا

بس نتمنى يحطون الكويت بين عيونهم ويشدون حيلهم


عاشت المعلمة حسوكة بتاعت الكراجات


;p

مبروك عليكم الحريم

بس استكانه نبي لمسات انثوية بالمجلس

بوكيه ورد

بخور
عطورات

كل النواب حالقين ومرتبين دشاديشهم نظيفه ومكويه

نبي شغلات حلوة نحس في حريم

;p

ARTFUL يقول...
أزال المؤلف هذا التعليق.
جنون إحساس يقول...

كثير من النتائج غير مرضية ووجوه لم اتمنى رؤيتها لكن الحمدلله على قدره

واتمنى فعلاً ان تكون الكويت نصب اعينهم قبل كل شي

ENG.MEMO يقول...

لو الاجدر هوا اللى يفوز
يبقى مفيش مشاكل
صباح الفل

ikhalifa.com يقول...

عينج فيها ظبظوب

U know WHO يقول...

سوووسووو

توني رادة أسير عليج مرة ثانية عقب فرارتي علـ مدونات طوول النهار

أبي استكانة جاي بزعفران الله يخليج
:)

الله يهداج.. ذكرتيني بمشط يدتي الله يغمدها الينة

يمجع الشعر تمجع

أحلى شي فيه الصوب بوضروس وسيعة مايمجع
؛)

ليت من يمشط فيه كشيش لحايا المرشحين إياهم كوسيلة من وسائل التأديب
:)

I7na 3shagnaha يقول...

صباح المجلس الفوشي

:))

مبروك ماياكم

;p

يعطيكم خيرهم و يكفيكم شرهم

:))))

monshg يقول...

No comments about the girls who danced yesterday. It`s showed us theirs backgrounds and ethics. I hope kuwaiti girls not to be affected after this new era, when the women be members of the parliament, and changed theirs identities or skins. It`s just a matter of time to be sure about this.

sorry for my english, I use an english PC at this time!


:D

أبو الدســتور يقول...

مواصفات النائب موجودة
العبدالجادر
:))
انزين عسى ماشر رايحه الصيدلية

أُمْ حَــسَـــنْ يقول...

استكانة
شكرا على المقالة الاكثر من رائعة

نتائج الانتخابات هذه السنة أكثر من غريبة..الصراحة ماكنت أتوقع أن 4 حريم يفوزون بالانتخابات!!
هذه البداية :)

البركة في النواب و ناطرين اللي فيه الخير لمصلحة الكويت


تحياتي
ام حسن

kandroz يقول...

لووول ناس تنام هالحزه وناس توها تقعد
انا ماحب اتابع من اول شي
نمت مبجر عشان اقعد للصلاة واتابع :P

مبرووووووووووووك 4 حريم بالمجلس

Cr8ivia يقول...

مبروك مبروك
فرحه تاخرت وايد
المهم يات

fatto يقول...

ماتشوف شر عيونج الحلوه .. حطيلها كمادات جاي :)


ومبروك لفوز المراه :)

اجتماعي يقول...

ههههه
ثاني مدونة دمها خفيف

===

في شغلة ودي أعلق عليها

إهي فوز أسيل .. اللي أعتبره تعويض لها

بعد الكلام اللي طلع عنها .. الله عوضها خير

وخسف بالبعض .. اللي نعتقد إنهم كانوا السبب باللي صار

مع إني معاهم .. وضد أسيل
بالفكر طبعا مو بشي ثاني

بس لازم أسجل إعتراضي على التسجيل اللي إنتشر

.. عموما

الله يوفق الجميع .. رياييل وحريم

~ هند ~ يقول...

سلامة عيونج ..
على قولةikhalifa فيها ظبظوب
ونحن نقول بظبوظ :))

إن شاء الله اطيبين بسرعه..

مبروكين على النتايج والله يديم عليكم كل خير ..

ReLaaaX يقول...

ياحلااااااااااااتها والله أم العيون المخيطة


لا عيل آنا كنت فاجة صفحة النتايج ومخلية اللابتوب يمي :)))

اغط وارد اجيك النتايج ;p




الحمدلله .. وان شالله يكون هالمجلس احسن من اللي قبله

U know WHO يقول...

سوووسووو

شنو نيو لوك يديد مع المجلس اليديد ؟

بس حلو حلو
:)

ولد الديرة يقول...

ايه هاي فازت رولا :)

جان قلتي له لا فازت عطني البطارية ببلاش :p

lawyer يقول...

عسى اهني المكان الصح حق يعلقوون؟؟


اشفييييج كلشوي مغيره اللوك

دودهتينااااا يا رفيجتي


عندج وقت فاضي وايد؟؟

ووفرااااااااغ صح


انااااااا ببلششششش احمر العين






انا الحين مسويه نفسي طيبه و خوش رفيجه بسسسسسسسس بعديييييييييييييييييين لألألألألألألألألألأ



افترسسسسسسسسسسس



ادري ميته ضحك
بس شعععععععععره و اصرخ

charisma يقول...

عين عوره وعين صحييحه وييه اسم الله علييج :)) والله يا استكانه هالغبره الى كل شوى تحووشنا فيها الهييل والهويييل محد مرتاح
سلامات يالغالى سلامات

والف مبروك للنتايج الحلوه للمراه الكويتيه يا حلوهم ومبروك لباجى النواب والله يصلحهم لهالبلد اجمعين

:*

mellow يقول...

ياااااااااااي تكونة شنو هالستايلات الحلوة

ألوان مدونتج تذكرني بآيس كريم لذيذ كنت احبه و آنا ياهل
:))

Kuw_Son يقول...

واضح ان كتابة الموضوع تمت في الساعات الأولى من الفجر .. يا كثر البدليات
:P

عسى الله يبارك في جهود المخلصين .. و لا نحتج على إرادة الشعب .. هذا اختيارنا و نحن نؤمن بالتعددية .. وعسى الله يوفق الجميع

U know WHO يقول...

ألو
صباح الخير
هني إستكانة
ولا النمرة غلط؟
سووسوو
ماصارت تجميييل
إشدعوة

ولا ألحين فترت نقاهة

يلا نبي الـ لوك الأخير شنو؟

chandal/danchal!! يقول...

@@

ما بغيتي تغسلين من الحننه!

:)

بس خوش نتيجة؟

شنو نوع حننتج وبجم الكيلو؟
:p

esTeKaNa يقول...

الحر
~~~~~~
الله يبارك فيك صارو اربع
:)





NAJMAH
~~~~~~~~~
سلامات يا الغالي سلامات
غدا الشر من بعد السخونه
:)









حاطب الليل
~~~~~~~~~~~~~
عسى ربي يبارك بايامنا كلها
:)








BLOG 3amty
~~~~~~~~~~~~~~
ادري الجمله كلها عشان تكتب الظاد
الظاد ام عصايه
:Pp~
شاطر شاطر
:pP~








Cooookies
~~~~~~~~~~~~~~~
مالنا الا التفاؤل
:)
الله يوفق الجميع







مركبنا
~~~~~~~~~~
زين تسوين
انا صار لي يومين منقلب راسي
ما سوت علي
:)








Ra7aLaH
~~~~~~~~~~~~
الله يبارك بالجميع
الحمدلله
:)








U know WHO
~~~~~~~~~~~~~~
عسى ربي يطرح فيهم البركة ويوفقهم
قولي امين
:)

esTeKaNa يقول...

mellow
~~~~~~~~
مقاييس يدتي تقدرين تسعملينها حتى حق الزواج
:Pp~
انا قلت لج اني ولهانه عليج؟
وايد وايد وايد فقدتج من غير شر
عسى ربي يحفظج ويسعد قليبج اللي احبه
:*








بنت الشامية
~~~~~~~~~~~~~~
آمين عسى ربي يحفظها ويطرح فيهم البركة
:)








chandal/danchal!!
~~~~~~~~~~~~~~~~~~~~
يا صباح اللألاطة
:)
انتي ما شفتي ويه اخوي
لي يومج يقلدني
يقول حق امي رزه الظهر وريل على ريل والجاي تشربه متمتعه تحسسك انها بمكان حلو بقهوة حلوة وجبالها بحر
فشلتنا
ركبي السياره
روحي داخل ليش قاعده بره
Hehehehehehe
شسوي والله ما بغيت اقعد بس لزم علي
:Pp~
تضحكين على محتويات الجنطة؟
ترا بالثالثه
شوفي اخاف جنطتج مستحية
ترا عادي عادي
:)))
صباح الشوق كله

esTeKaNa يقول...

mtfa2el
~~~~~~~~~~~~~~
أنا شاكة انك اشتغلت بالحملة الانتخابيه حق الجويهل
يايب خوش رقم
!!
ولا تتكلم عن صدمه الدويسان
انا ما زلت مبهوره
:(







ARTFUL
~~~~~~~~~~~~~~~
ياهلا ويا مرحبا
ههههههههههه
تبي لمسات حريم؟
صج ضحكتني
تذكرت فراشين المجلس يلبسون دشاديش عنابيه شد ،دودهتني كان عندي شغل هناك
امشي واسلم عبالي موظفين
اتوقع راح يلبسون بدل بعد الدشاديش
وبيبون فراشات بعد
من باب التغير
:PP~








جنون إحساس
ّّ~~~~~~~~~~~~~~~
وعلينا ان انرضى بالدمقراطية بكل صورها
الله يطرح فيهم البركة ويوفقهم للكويت يارب
:)








ENG.MEMO
~~~~~~~~~~~
صاج والله
مو كل من فاز كان هو الاقدر استحقاقا للفوز..تحالفات
قبائل
وحظ
الامر في احيان كثيرة بعيدا عن فكره الاستحقاق الصحيح

وصباحك ورد
حياك الله










بن علي
~~~~~~~~~
ظبوب؟
اسم الله علي شنو يعني
اشفيها عيوني
:(








U know WHO
~~~~~~~~~~~~~~~
وااااحد شاي وصلحووووو
:Pp~
تدرين الواحده عقب قعده الكراجات
تتحول من بنت رقيقه الى مخلوق اخر يسم معلومه توحة
:pP~
يا حلاة ذاك المشط
تدرين متى كنت احس بقمة الانجاز؟
لما اتسبح والمشط يعيش حياته يزلق يزلق
ههههههههههههه
بس ترا اهو مو مقياس حق نعومه الشعر
قالت لي عمتي لان هالمشط عقد حياتي ،كان همي ابيه يمشطوني فيه وما يعورني
وبكل الحالات لابد يدور له علبوكه يعورها
واي مادري شنو يعني علبوكة انتي فهميها
:Pp~








I7na 3shagnaha
~~~~~~~~~~~~~~~~~~
انا بروحي متدوده وانا ارد على المباراكات ويايني احساس اني معصومه مبارك
بعد تقولين مبروك ما ياكم
رسمي تدودهت
:pP~
الله يبارك فيج









monshg
~~~~~~~~~~
حيالله اخوي المنشق بالانجليزي
:)
أنا أوافقك الراي
الله يهديهم
وجه غير مشرف ابدا للكويت






أبو الدستور
~~~~~~~~~~~~~
مو بدائرتنا
:)
عيوني يا ابو الدستور عيوني
:Pp~









أم حسن
~~~~~~~~~
حيالله ام حسن
:)
الكل مندهش من هذه الانتخابات والنتايج،وسواء رضينا او لا
فنحن نؤمن بالدمقراطية
الله يوفق الجميع يارب

نورتي المدونه يا ام حسن







kandroz
~~~~~~~~~~~
ياهلا ويا مرحبا
كنت ابحث عن مدونتك
هناك رساله خاصه لك
:)
وزين تسوي نمت وقعدت
احسن مني
:pP~










Cr8ivia
~~~~~~~~~~~~~
الحمدلله عسى ربي يوفقهم
:)






fatto
~~~~~~~
شكرا يا صديقتي
الشر ما اييج ان شاء الله
:)








اجتماعي
~~~~~~~~~~~
يا هلا
عساك دوم تضحك ومستانس
:)
كلام موضوعي اخوي اجتماعي
اتمنى الكل يقراه
ويشوف كيف ان الحمدلله فينا الكثير يؤمن بالاختلاف ويحترمه
الله يوفق الجميع






هند
~~~~~
انتي وبن علي خوفوتوني
شنو يعني ظبظبوط
اسم الله على عيوني
:Pp~









RElaaax
~~~~~~~~~~~~
عين عورة وعين صحيحة
:)
الله يوفقهم للخير يارب

esTeKaNa يقول...

U know WHO
~~~~~~~~~~~~~
ياربي يايني احساس جني قاعده اتمكيج واحد يطالعني
ومن كثر الخبه سح الكحل وعفست الدنيا
hehehehehe
الله يسلمج انا مسلمه امور تجميل المدونة للزين،فاي تغير معناته الزين قاعده تمارس هوايتها بمدونتي
تدرين صديقتي ولازم اشجع هوايتها
:Pp~
لا والله قاعدين نسنع الامور شوي
وانتي علقي قولي لنا ايهو اجمل دامج معانا على الخط
:)









ولد الديرة
~~~~~~~~~~~~~
عاد تصدق فشلني
يوم بدل البطارية قلت له عندك كي نت
قال :
شووووووووووووو
كي نت
في كراج عندو كي نت
:(
يعني انا شدراني مافيه
عبالي في كي نت
:pP~








lawyer
~~~~~~~~~
ياربي الواحده ما تاخذ راحتها واهي تسنع بلوقها
ههههههههههههههههههههههه
ياربي اتمكيج والناس مجابليني
خليني على راحتي
:pp~
فدييييت الطيبة انا عسى ربي يحفظها
:*









Charissma
~~~~~~~~~~~~
سكتي انا وعيوني صايره فتنه على المجتمع
الحمدلله اني باجازه قاعده بالبيت
:pp~
الف الف مبروك يا الغاليه
عسى ربي يطرح البركة بالجميع يووفقهم يارب








mellow
~~~~~~~~~~
صج حلو؟
عيل انا رايحة راده اطالع
عاجبتني الالوان شرحة
بس احس جنه سيراميك دار بنيه
:pP~








Kuw_Son
~~~~~~~~~~~
عاش من شافك اخوي العزيز
:)
طوف البدليات كان فجر والله اعلم بحالتنا
:Pp~
اللهم امين







U know WHO
~~~~~~~~~~~~~~~~
ألوو ألوو
لو سمحتي اختي تقصرين صوت الراديو عندج
:pP~
ياربي رد لي احساس ابي اصير مذيعه
:D~
حبيبتي ما زالت الزين تجري عمليات التجميل،فتارة نرفع الشعر وتاره نفله
وتاره نمكيج
وتاره انا امسح المكياج
hehehehe
لي نستقر ونطلع بشي حلو ان شاء الله
وتبين الصج؟
انا هاليومين لاهيه شوي
بس بأقرب وقت لابد اكتب شي يديد ولهانه ولهانه









chandal/danchal!!
~~~~~~~~~~~~~~~~~~~
hahahahahaha
وااااي استحيت
تفشلت
تذكرت شكل اليهال روسهم فيها حنة بالزمن الغابر ويطبون بالبحر
:Pp~
حنه يمنيه ما تشوفينها كانت صابغه
:)

انا يا صديقتي من اواني من كنت ياهل
ماحب حتى اسطر
رفيجتي تسطر لي وتلون لي الدفتر
انا بس ام شطة ابي اكتب واحل
:PP~
وما زلت اعاني من هالشي
ترا عمري ما سويت لوك حق مدونتي
الله يعافي المتبرعين
:))
وحاليا الزين قاعده تلبق عسى ربي لا يخليني منها
:)

U know WHO يقول...

سوووسووو
دام سمحتي لي بلـ مشاركة
شفكج عااااد
:)
1- اللون البيج كان وايد حلو
2- هذا اللون زين بس مو ستايلج
3- اللوق الفوقي صار أسود وأبيض مو واضح والكلام إللي عليه مو واضح بعد
4- حلات لستكانة بألوانها تشوق أكثر

وأشووف ورد لج
؛)

U know WHO يقول...

سووسوو
يبي لج ستايل كويتي أندلسي
ممكن تقوولين الدمشقي يركب
؛)

U know WHO يقول...

ستايل غابات

والله يلوق

؛)

ikhalifa.com يقول...

أبويه ، طلعي أنتي و الزين من البلوق خلوني أنا أشتغل
راسي عورني من الألوان

ما يجيبها إلا رجالتها

Manal يقول...

السلام استكانة

:)

اول شي وصلي سلامي لجدتج يحليلها
بس صج سئليها اي نوع لحية تحب
:)


يحليلها

الله يحفظها

اما الانتخابات فكانت شي من الخيال

دخول المرأ وبهالقوة شي ان شاء الله يبشر بالخير

وتتحرك عجلةالتغيير ان شاء اله لتطال كل ما يعكر صفو الاجواء في ديرتي الحبيبة الكويت

:)

ومنها لاعلى ان شاء الله

وتكون الكويت دايما درة على خريطة العالم

:)

:)

لك مني اعذب التحايا
:)

I7na 3shagnaha يقول...

شحلاته الوردي


ليش أخضر؟؟ ما احبة



بس هم حلو عليج


:))

mtfa2el يقول...

ايي و المرة الياية بيصير من المراكز الخمس الأولى

شنو أسيل أحسن منه ؟؟؟؟؟؟؟

lawyer يقول...

استكانه اشعندج كل يوم اتغيرين الصاله و المواعييييين والاستكاناااات



يوم حسبتها طلع اكثر من مره مغيره في يوم واحد


اخاف في احد بعرس عندكم :D

Sn3a يقول...

والله لاتشوفينا انا وامي
اللي يقول ابونا مترشح
ابوي خو نام وراه دوام

امي ماسكه جفنها بيدها عشان لاتنام لوووول
وتبي تعرف الفايزين بكل الدوائر مادري ليش

اهم شي الضابط @@
واو عاش الامن بديرتنا الحبيبه

لوووووووووووووووووووول اتخيلج ريل على ريل بكراج
يغربل ابليسج
يحاتون رولى واسيل مايحاتون الرياييل
يتروالي حتى المقيمين ملو من الرياييل وبلاويهم بالمجلس


عسى راح الانتفاخ من عينج؟

مستعدة يقول...

يقدم فريق وصال الإعلامي بالتعاون مع نادي talent group لجامعة الخليج مسرحية:
"فريج بني نايم"

فكرة المسرحية: مسرحية كوميدية إجتماعية و إنسانية تعكس حياة فريج كويتي مميز و تدور الاحداث في يوم واحد بانتظار شروق الشمس..
المسرحية مقدّمة بالتعاون مع مجموعة شبابية مميزة لكون الفريق يحتوي على العنصر النسائي فقط..

يوم السبت والأحد الموافق 23-24 مايو 2009

على مسرح جامعة الخليج - مشرف

الساعة السابعة والربع مساءا

لمزيد من التفاصيل : 97547705

wesal.media@live.com

مكان حجز وبيع التذاكر: جامعة الخليج.

the Play's short clip commercial ;)

http://www.youtube.com/watch?v=3642LMsKxX8

BornConfuzed يقول...

Elbar7a gareit postich gabl la argid, chan a7lam benti5abatkum, w I had to drive you off in a black ma5fee jeep 3ashan elvoters were attacking you! W tgooleen
a7lamich '3areeba =P