الأربعاء، مايو 13، 2009

شلتك بيوفي..وطن


تذكر؟
زواير البيت الكبير،ظهر الخميس،وقلوب يجمعها حب كبير

تذكر؟
أحمد وسعود،مضاوي وفهد،وشيخة وحمود
..

تذكر؟

باب الدوانيه المفتوح

راديو بني كبير وصوت النهمة وإيقاع مرواس، يجلس هو مستند على مسنده الحمر،
وأتسلل لمكانه وأجلس جنبه على تيبل صغير

وأسمع معاه نهمة بحر،تختصر حكاية عمر،وأسئله عن جبله وشرق وماضي الكويت

تذكر؟

كان مساء الخميس،ألعب مع لولو،وأحمد وفهد والكل متجمعين،وألتفت القاه بوسط الصاله،الكل يحبه والكل يهابه،اذكر اني يومها سئلته عن سؤال سئلتني إياه صاحبتي بالمدرسه:

يدي،أحنا من وين ياين؟أحنا اهل السعوديه ولا العراق ولا إيران أكيد محنا من الأرض طالعين؟

فاجئني ومد ايده على شفتي التي سئلت وضربها

!!طق حلجي

انكسرت عيني ودمعت فشلتي،كيف يضربني جدام الكل وانا المدلله؟

وضربة من يحبك تبقى بقلبك لها معنى كبير

صديت بعيني سحبني لحضنه تالي وحط عينه بعيني وقال:

!!أبوي انتي،عيب هالحجي يا بنيتي

قولي لصاحبتج أنا بنت الكويت،الكويت أصلي وأمي وأبوي وأهلي،ومنها ابدي وانتهي،واللي له ديرة غير الكويت يروح لاصله ويترك لنا الكويت

تذكر؟

الشفر القديم،طلعة كيفان،وعوض دوخي يترنم بفن وألحان،وأنا بنت صغيرة ،اقصى احلامي أوصل شعب الخالد بخاطري بيتزا من العالمية ترفة وصغيرة صغيرة،اذكر ان كان يحكي لي حكاية البحر والفقر،والمرض اللي قعده بديرة الهند البعيده،مرض وتركوه هناك شهور ورجعو له صدفه وكتب له ربي يرجع للديرة



كان يتنهد ،ويقولي حمدي الله ،شوفي الكويت،ما عاد نسافرعنها بعيد،وربي رزقنا هالخيروعسانا لها نرد الجميل

وكنت ألصق وجهي بنافذه السيارة،تتحرك امامي الصور:

الفيحاء،الشامية،بحر شويخ ،والأبراج،وعيون أطفال،وقصص وحكايا وأسرار

وارفع يدي الصغيره أنا واسناني المكسره وأقول:

الحمدلله على الكويت

والحمدلله انا عندي احثن يد بالدنيا يمكن لو ما رديت انا ما ييت

ولا يمكن كنت هنديه
:Pp~

تذكر؟

مساء الفرح ،طفله ترقص حولك بمرح ،أولى ابتدائي واستكانة تفوقت

كيكة كبيرةواقصى الفرح شعر مفلول،صور تجمعنا بذاك الزمن الجميل

كتافيات عمتي للسقف،وحجاب امي غريب،وعمي يضحك وله زلف عجيب

وسعود..كان يمر بأقسى مراحل الجكر،ونظارات زوج عمتي شي رهيب

وقتها حضنتني وقبلت لي راسي:

عفيه على الشاطره،خلج دايم متفوقه عشان تردين للكويت فضلها

...............

ومرت السنين ،انت رحلت ،وما رحل في داخلي حسك،وعيونك وشئ في روحي غرسته


وآه يا جدي

هقوتك رجعنا للكويت فضلها؟

رحلت انت..يا عساك بجنات النعيم

بس تدري؟:

من بعد عينك عن زواره البيت الكبير ما انقطعنا



أحمد غدا كاتب كبير،وبكل يوم له مع التحالف نشاط جديد،ونورا كل يوم لها بالجريدة مع الائتلافيه صورةواليوم مع الشايجي والدلال اهي بلوية،وفهد..تذكر فهد؟

فهد تدعي له كل يوم جدتي،عسى السعدون يفوز ولا ينكسر خاطر هالفهد؟

ومضاوي،التزمت وتنقبت،وقبل اسبوع ملجت،ومحمد بعيد ما همه فلان ولا علان يفوز


وبقى شيخة،همها رولا دشتي وأسيل،وسعود مع السلف بحال عجيب

................................


وهذا احنا نلتقي كل خميس واتعلم انا من البيت الكبير:

أتحرص على كل كلمة وما أعمم على حزب ولا فكر تهمه،ذاك عمي،وهذا خالي،وهذي اختي وهذي انا،

علمني البيت الكبير ان الكل فيه خير وبركة وحب للديرة وان تغير شكله

تعلمت بالنهايه لا فكرت أصوت أصوت لديرتي ولقناعتي لا عشان شيخة ولا لخاطر فهد

علمني البيت الكبير،نتلاقي كل خميس،نختلف وعلى راس جدتي بقبله نتفق،وتبقى في قلوبنا

انت ..وجدتي ..والكويت


الكويت....وآه يا ديرة هلي

ما شفتو بعيونكم الكويت؟


تتكئ على جدار الزمن،ملامحها تختصر كل الألم،تناظرنا بعين العتب وتسئلنا:

أجدادكم غرسو فيني الأمل،ومن بعدهم انا جف فيني ريق الصبروانا انتظر

وينكم؟

فقدتو فيني الأمل؟



...وآه ياوطن

من جهرائك لحد الفحيحيل،في كل ذرة رمل،ومع كل نسمة هواء،و كل نجمة لمعت بسما الكويت

بكل موجة بحر في ذاك الجون


بعروق يد كل شايب افنى عمره يبني السور،ويغوص البحر ،ويسافر بصحرا شاعر وكله صبر

بعود وبخور كل عجّيز ربت أجيال وصبرت من بيوت الطين لقصور الرخاء


وبحق دمعة جابر في يوم ألم،و سجدة سعد على ارض هالوطن



بحق وطن النهر،ووجابر ويا سعد ،وديرة عشقناها وايد عشقناها
!!لن نفقد الأمل

أحنا شباب الغد نزرع في كل لحظة وردة حب على أرضك

نسقيها من ماء صدقنا وروح أخوتنا وإيمانا أننا مهما اختلفنا لن نكفر بدمقراطيتنا وبالنهايه سنرجع لبيت كبير يجمعنا

وطني..وطن النهار يا وطني





إنت الأمل لي هل..وأنت النهار لي طل

آه ..أه يا وطن ياللي انولدت من جديد

أنت محيط الأرض يا موج البحار..وطن النهار

وياك آه ..عبرت الزمن الله شكبر يا كويت يا كويت

اشكثر يا كويت

قلبي خفق يا كويت..يا كويت..شلتك بيوفي وطن

وياك عبرت الزمن الله شكثر يا كويت يا كويت


إنت الوطن بس أنت..إنت الأصل بس أنت


إنت الحياه بس أنت..غصبن على الآلام ترجع وطن من جديد



وطني..وطن النهار



......................



تذكرو:

الكويت عروس


وأنا وأنت مستأمنين بالتحري والسؤال والتفكير الصادق العميق من يستحق حمل جزء من مسؤلية وطنا؟

وتذكرو لي مشيتو..والدنيا معكم رخية


الدنيا معكم رخية

تذكرو من بناها..يوم الليالي عصية

يوم الليالي عصية

وصية اللي سبقوكم..والدار معكم وصية

الدار معكم وصية

...............................
اللهم احفظ الكويت وشعبها من كل مكروه

اللهم احفظنا واصلح ذات بيننا واجمعنا على حب الكويت


اللهم ولي أمورنا خيارنا ولا تولي أمورنا شرارنا

اللهم آمين


هناك 49 تعليقًا:

Q80 Blogger يقول...

انا اول

كاتبه البوست عن الكويت من الامارات ؟

:)

fatto يقول...

الله يرجم يدج يارب .. والله يخليلكم يدتج الغاليه والبيت الكبير .. والله لايفرقكم ابيمعاتكم الحلوه .. والله لايفرقنه عن حبيبتنه الكويت
اللهم امين :)


ايام الكتافات كانو ( تحفه ) لووول
وكل ماكبرت الكتافيه كل ماكانو
اوبهه ) يعني حد الكشخه لوول )

Yin مدام يقول...

روعة يا استكانة روعة

بجيتيني وذكرتيني بجدتي الله يرحمها وبكلامها وبكل ما زرعته فينا عيالها واحفادها وبأهلي واللي علمونا إياه

ما تفرق بين أحد ويوم سألتها وأنا عمري 10 سنين احنا من وين قالت لي من الكويت وفي الكويت ونحيا ونموت للكويت

ما أنساها يوم صار الغزو دخلت عليها ولقيتها تبجي وتنوح وتقول أه يا قلبي أه يا الكويت
وتقول دقي على جيرانا واحد واحد تفقديهم وتفقدي أهلهم

الله يرحمج




آمين يا استكانة آمين

حاطب ليل يقول...

الله

4 يقول...

waaaaaaaaaaaaaaaaaaaaaaaaaaaaaay

hatha 2l-7achee 2san3 ...

t9la7 7zayah 7g 2l-yahal nrabeho0om 3aleha

7ja la kbro0o ma yshfooon 7altna hathe...

3ajeeeba ya astekana.... 3jeba

glomhilda يقول...

يوووووووه عليج يا استكانة
:")أنا مو من شي أحب الكويت

ربي يحفظها لكم ويبارك في أرضها وسماها
ربي يرزق أميركم البطانة الصالحة ويطول بعمره في الخيرات
ربي يألف بين قلوب أهل الكويت ويصلح أحوالهم ويجعلهم على فلب رجل واحد

وربي يحفظ علاقة الأخوة اللي بين الكويت وحبيبة قلبي عمان :)

الزين يقول...

آآآخ يا صديقتي


وآآآه ياوطن

لك من يحبك


:**


صباح النهمة واليامال
صباح الكويت يا استكانة

أستاذ حمام يقول...

"علمني البيت الكبير ان الكل فيه خير وبركة وحب للديرة وان تغير شكله

تعلمت بالنهايه لا فكرت أصوت أصوت لديرتي ولقناعتي لا عشان شيخة ولا لخاطر فهد

علمني البيت الكبير،نتلاقي كل خميس،نختلف وعلى راس جدتي بقبله نتفق،وتبقى في قلوبنا"

الله يلم شملنا ويقربنا من بعض اكثر واكثر..

الحين الحين ودي اسمع اغنية وطن النهار.. بس خل ادور الكلينكس لحظة :)

جان حطيتيها فوق.. :)

كلمات "عتيجة" ورائعه

أستاذ حمام يقول...

في اغنيتين اهديهم حق قرائج الكرام..

نبع الوفا - سليمان الملا

http://www.niceq8i.tv/videos/53/

وطن النهار - عبدالكريم عبدالقادر

http://www.youtube.com/watch?v=UmG5Lyv1uYE

"أحبج يالكويت"

Sweet Revenge يقول...

آمين يا استكانه :)
ومنورة مكانج ,الحمد الله علي السلامة

Blog 3amty يقول...

أصلي بوستج !


قاعد أقراه واشرب حليب صفرة !


(حيب وزعفران)

أبو الدســتور يقول...

مهما اختلفنا لن نكفر بدمقراطيتنا


صح لسانج

تحياتي

Um il sa3af wil leef يقول...

بوست جميل ..

I7na 3shagnaha يقول...

صباح الوطنية اللي تعور القلب

تصدقين اول مرة بوست يبجيني


عجبني بيتكم الكبير

وشلون كل واحد فيكم له توجه

و بالاخير هالتوجهات كلها تتحد في حب الجدة

الله يخليلكم اياها و يرزقها الصحة و العافية

ويحفظ لنا الكويت
و يهدي ربعنا

عشقناها وايد عشقناها
:))

الحــــٌر يقول...

آمين يا رب
:)

lawyer يقول...

واشلون لكم تكسرون بخاطر عروس يوم فرحتهااااا

Najmah يقول...

آه يا استكانة
حنيت لريحة الماضي
رمل البحر
سوالف يدي
وطن النهار
حنيت لا سافرت اكتب اسم ديرتي بكل مكان
واسولف عنها مع كل انسان
حنيت ارجع بعد السفر مليانة شوق
امسك علم الكويت واركض
طاير من الفرحة طاير
حنيت لاحساس الوحدة اللي يجمع القلوب
نعارض ونختلف
ونتفق كلنا على حب الوطن
:***
ربي يحفظ ديرتنا ويحميها من كل مكروه

ARTFUL يقول...

ذبحتيني بهالبوست

والله لو ناوي اكتب جذي ما قدرت

السهل الممتنع

استكانه قلبتي المواجع

آآآآآه يا وطن

من ولج نرجع يا ديرة هلي وناسي

الله يرحم يدانا

مادري احنا تغيرنا والا في ناس لفوا علينا غير عنا وغيرونا

مع ان الكويت بقلبنا كل شي

والله لو أسافر يوم اشتاق لها

الويك اند اللي طاف سافرت رديت السبت وكلي شوق والله الشوق طافح


بيت اليد البيت العود
جمعت الأهل والاخوان

اختلاف نشاطاتنا يجمعنا حب امنا وابونا حب الكويت

الله يكتب الخير لها يا رب

Sn3a يقول...

،اقصى احلامي أوصل شعب الخالد
وين هالمكان اللي شكله يبيع بيتزا;p


ربي يرحم رياييل قبل
كانو يشوفون الكويت بكل شي
الحين كل واحد مهتم لقروضه ووين يسافر وموديل سيارته


وبالختام
لدعائج
اللهم امين
امييييين

DiLLi O MiLLi يقول...

:"(

الله يهداج يا أستكانة
أشهالبوست اللي يبجي !! ناقصيين ؟؟؟

جااان طعمتيه بجم سطر فكاهي يااااحااافظ





بعديين تعاااالي
اللي يقراااه يقوول
اللي كاتبته عمرها 90 سنه !!ء

هههههههه
من ويين مطلعه شــــعب الخــــالد
يااااا حلاااااته ويااا حلاااات الخـــالد
:)
أناااا مااا لحقت عليه بهالأسم !!ء
لحقت عليه يسمونه السالمية
بذمتج موو شعــب الخــالد أحلاااااا؟؟
;)

شفتي السدرة المحوطه بسياج حديد جهة البحر يم نادي الشعب
هذي سدرة الخالد كانت بوسط بيت الخالد الكبير .. الشيخ جابر الله يرحمه مارضى يشيلها .. وعشان يحميلها أمر أنه يحوطونها



أمااااا بيتزا العالمية .. الله الله الله على ذاك الطعم العجييييب
كل يوم وترك لاااابد ناكلهاااا
مداومين عندهم .. لوووول
:)


أمااااا سالفة الكتافات سالفه
وبعديين تعالي .. أنتي لحقتي عليهم !!؟؟
أبوي الله يحفظه .. مشهور بالتوصّف
مره خالتي دخلت علينا بذيج البدله وذيج الكتافات العجيبة .. مساند !!ء
ألتفت علي أبوي جان يقول لي : علام خالتج ناسيه العلاق بالبدله !!؟؟؟
لووووووووووووول
:))))






أأأأأأأيييييييه يا أستكانة
ياااارب الناس تعتبر من المجلس اللي فات
وتعرف الصالح من الطالح
وتنتخب اللي قلبه على هالديرة الصغيرة




بوووست يجمّـــــــد

:***

دروازة يقول...

مع كل سطر أشم ريحة بخور

مع كل سطر أحس بفرحة اليمعة

مع كل سطر أسمع صوت أم كلثوم من الكاتردج بالبونتياك الازرق مال الوالد

آآآآآآآآآآآه ه ه

من الاعماق ... آآآآآآآآآه ه ه

وين ذاك الزمان

علشان تعرفين اني مشدق

مرة كنا في زيارة حق عم الوالدة

بالسعودية

تدرين شنو أهداني؟

أهداني راديو كان موضة حزتها

كان مغلف بجلد أدعم وبكرته اللي تدورين فيها المحطات فضية تكسر العين

كان مشهور هالراديو وايد

كان عمري وقتها أقل من 10 سنين :)

ذكرت هالراديو يوم ذكرتي صوت عوض الدوخي من الراديو الخشب

ذكريات

احبها .. وانا حدي متعلق في هالذكريات... لأني ما أجد في حاضرنا شي يوازيها.. لا من انجازات ولا من اخلاقيات بشر


أكثر شي أثر فيني في بوستج كان هذا السؤال العميق اللي اجابته تكدر :

هقوتك رجعنا للكويت فضلها؟

أنا اعتقد ...

مو بس ما رجعناه

أعتقد ان الكويت شاخت وشابت في وقتنا ...وقت الخير ... بينما كانت عروس ودانة في زمان أول ... زمن أول الطفرة

السبب ... هو اجابة لسؤالج

لان حنا ما رجعنا لها فضلها ولو ذرة

بس


يكفي

غلقت

الله يرحم جدج.. أو مثل ما يقولون هني في تونس (عزيزج) ويديم الصحة والعافية على جدتج ( عزيزتج)ويديمها وعليج وعلى الأهل كلهم

سلام :)

U know WHO يقول...

سوووسوو
عوااارر قلب

الكويـت الكويـت بلادنا الكويـت
إصرارنا نورها
أرواحنا سورها
كلما زادت المحن حولها أو قسى الزمن
أصبح الناس كلهم نغمة في فم الوطن
الكويـت الكويـت بلادنا الكويـت

ikhalifa.com يقول...

الله يوفقكم :)

charisma يقول...

اميين يا رب العاليمن

غورقت عيونى والله
عصرتى قلبى ورجعتينى لزوارة الخميس وزوارة اليمعه
زوارتنا متشابهه بطيب اهلها سبحان الله كلنا نفس البيوت اول نفس العادات نفس التقاليد النفوس متشابهه نتخرج من بيت اليد واليده انتعلم منهم الى ما اتعلمنا المدارس
الله يقدرنا ان نكمل هالدرب ولا ينقطع

ابدعتى وصح السانج
والله لا يخلييج من حبايبج
:**

chandal/danchal!! يقول...

بسمي بوستك (صدى التاريخ)... من كاظمة... عد الى الدنيا كقيثار المغني... تقف الدنيا جلالا... عندما يوقف الأيام تاريخ يغني



يا حادي الزمن... رجع صدى وطني

في كل أغنية... مغزولة الشجن

أعد حديث الليالي... وذكريات النضال

وافتح كتاب بلادي يا صدى الزمن
.
.
.


تسلم ايدج على هالبوست

:)
.
.
.

كنت ناوية أكتب بوست عن بيتزا العالمية... كان عندي قريبة تشيل من زيتونها وتحطه بصحني!!!!!!!


المشكلة اني كنت لاهية بالرقص ومشرعه حلجي عالآخر(كنت ياهل بو ثمان سنين)... يوم طليت بصحني.. وإلا الاخت مشطبة عالبيتزا ومخليتلي زيتوني وزيتونها!!!

كرهت الزيتون ومن جم سنة بس اللي رديت أسلم على هالقريبة!!!

يا ربي قلبي أسود من الزيتون!

:p

ShLaLaT يقول...

قواج الله يا استكانه

Cooookies يقول...

ameen ya rab .. hehe post 6ali3 men galb =)

Reem يقول...

الله عليج ..
و اللهم آمين

Nikon 8 يقول...

آآآآآآآآآآآآآآآآآه
يا إستكانة
البيت الكبير كان فيه اللمةمن ناس أشكال وألوان
كان فيه خذ وخل بين ساكنيه ورواده
كان فيه التسامح بشكل لا يتصور
كنا ناكل كلنا من طبخة وحدة ومن جدر واحد
الأولاد يتعافرون ويعورون بعض وبعد شوي كل واحد يسأل عن الثاني
والبنات يتحاربون وبلحظة يردون على بعض
والحريم ... الله يا الحريم يتعايون ويتناجرون لكن ما يشيلون بقلبهم على بعض لدرجة إن حنا يوم كنا صغار كنا نقعد بحضونهم كلهم ... كلهم كانوا بحنان أمنا الصجية
الله يعيد التراحم والتسامح والمحبة في بيتنا العود الكويت
آمين

qesat_5ayal يقول...

اللهم آمين

والله يكتب اللي فيه الخير

kandroz يقول...

سلمت يداكِ
فديت ترابج كويت ربي يحفظها من كل طماع : )

~ هند ~ يقول...

عسى ربي يرزقكم كل خير ويحمي ديرتكم من كل سوء..

أحسنت في موضوع الصلاة..
اللي ما يخاف ربه في صلاته ..
ما راح يخافه في شي أهون من الصلاة

وإن شاء الله هالمره تكوون غير بحسن اختياركم ووعيكم

:))

Q80 Blogger يقول...

اللهم ولي أمورنا خيارنا

آمين

Manal يقول...

تسلم الانامل الذهبية والقلب الحلو
وحنية الروح على الوطن حبيبتي استكانة

صج استكانة كويتية
:)
اصلية

ربي ما ننحرم من امثالج

والوطن غالي
والله الوطن غالي

وشايلينة بقلوبنا
:)

ما نفرط فيه لو شنو ومنو يكون

:)

موضوع حلو هذا والاخير الي سكرتي تعليقاته

:)

I7na 3shagnaha يقول...

استكانة

دودهتيني اكثر مانا مدودهة

منين يا خلاف

مرشح قوي و امين

علم و تقوى و اخلاق و امانة ووطنية

صعبة جدا


يبيلها كوكتيل مرشحين

ليما الحين ماني عارفة

باجر بجابل الورقة و اسمي

واللي يطلع يطلع

moodart.net يقول...

بخصوص الطائفية والقبلية والحزبية والتصويت لها
اعتقد ان الكل يبحث عن تمثيل له في مجلس الامه وهذا حق مشروع
لهذه الطائفة او تلك
لكن ان تقبل بوجود عصبية قبلية وحزبية وآثار طائفية في بلدك ولا تنبذها اولا .. وتطالبها بعدم البحث عن تمثيل لها في المجلس ..!

المشكله تبدأ من الصفر ومن التربية لآنشاء جيل جديد .. اما الجيل الحالي فقد نضج على عصبيته
واما الجيل القادم فجميعنا نراه ونتحسر عليه .. لكننا بنفس الوقت نجاملة ونقول انه سيرفع علم الكويت

لذا ارى ان هذه المشكلة لا تحل بالشعارات والاماني .. اما ان تكون هناك قرارات صارمة واما ان نجلس ونتحسر على الجيل القادم
ويأتي احدهم ويقول لا تيأس من وطنك وتفائلوا
والكويت بخير
/ping kuwait

ikhalifa.com يقول...

صح لسانج على البوست اليديد :)

باجر بقعد أتابع انتخاباتكم في التلفزيون ، يمكن نشوف استكانة تتمشى مني و لا مناك
حطي ورقة نعناع عشان أعرفج
:P

العرزالــــــه يقول...

ييت بعلق

بس كل ما انتقل من جمله الى مابعدها

احس نفسي وكأني اطير واحلق على نسمات وطنيه دفينه

نسمات عميقة وقديمه ماكنت اعلم انها لازالت موجوده..او انها وجدت بالاصل

ايــــه يا استكانه

يا اختي العزيزه

ذكرتني بالذي مضى

وقلبي خفق ياكويت!

esTeKaNa يقول...

مساء اللحظات الأخيرة
مساء وطن النهار
ومساء نبع الوفا الصافي
:)
كل تعليق أمتعني وامتع الجميع
وكل تعليق يحتاج مني اجمل تعقيب
ونظرا لضيق الوقت ووجود ضيوف عندي فليسمح لي الجميع بإرجاء التعليقات على البوست حتى اقرب فرصه
بإستثناء من أعتقد اني لابد ان استغل الوقت بالرد والتعقيب عليهم

فشكرا لمروركم
وشكرا لسماح لي بتشقح بعض التعليقات والعوده لها تالي
.
.
.
مادري ليش حسيت كلمه تشقح مافيها رقه
عموما المهم المضمون
:pP~

esTeKaNa يقول...

إحنا عشقناها
~~~~~~~~~~~~~~
يا بعد قلبي قلبها المتدوده
اسم الله عليج الرحمن الرحيم
:)
ما كان الهدف من البوست ابدا ان اقول ان هالشي مستحيل
الكل فيه بركة والكل فيه خير
ولافي شخص كامل اكيد
بس انتي تحري من داخلج واستخيري وشوفي الانسب بوجهة نظرج وقناعاتج انتي
وسمي بسم الله
وما اوصيج
:)

SheLLoO يقول...

استكانتي..

لا أعلم ما الذي أعادني إلى هنا اليوم بالذات ومع هذه المشاعر الصافية التي اخترقت روحي..

عدت هنا بعد غياب استمر أيامًا كثيرة أرى فيها عداد "القوقل ريدر" يزداد أغلقه بمزاجية وبعد الرغبة في القراءة إلا بعد أن أجد المزاج المناسب حتى أشعر بكل كلمة وكل همسة هنا..

كلماتكِ أعادت فيني الحنين وحب الكويت القديم..
الحب الصافي الجميل العذب..
كالماء كالهواء النقي..

كفرحتنا بالإنجاز حين نرسم علم الكويت في حصة "الرسم"..
كما نفرح بترديد النشيد الوطني في طابور الصباح..

كما نغني الهومال ونرقص ونلبس وزار جدي وعدّة الغوص ونراه وهو يصنع سفينة البوم صغيرة الحجم للذكرى..

نحب الكويت ونحب من يعزز فينا حب الكويت مثل حبك يا استكانة ;*

Expatriate يقول...

كلام غامض جدا
شنو المقصود اني اصوت للكويت ؟

كل شخص يعتقد ان المرشح اللي يختاره هو الافضل للكويت

الافضل للكويت في رأيي هو الاسوأ للكويت في رأي شخص آخر والعكس تمام

Blog 3amty يقول...

السؤال بوستين شطولهم مافيهم ولا بدلية !!


بل !

esTeKaNa يقول...

moodart.net said...
بخصوص الطائفية والقبلية والحزبية والتصويت لها
اعتقد ان الكل يبحث عن تمثيل له في مجلس الامه وهذا حق مشروع
لهذه الطائفة او تلك
لكن ان تقبل بوجود عصبية قبلية وحزبية وآثار طائفية في بلدك ولا تنبذها اولا .. وتطالبها بعدم البحث عن تمثيل لها في المجلس ..!

المشكله تبدأ من الصفر ومن التربية لآنشاء جيل جديد .. اما الجيل الحالي فقد نضج على عصبيته
واما الجيل القادم فجميعنا نراه ونتحسر عليه .. لكننا بنفس الوقت نجاملة ونقول انه سيرفع علم الكويت

لذا ارى ان هذه المشكلة لا تحل بالشعارات والاماني .. اما ان تكون هناك قرارات صارمة واما ان نجلس ونتحسر على الجيل القادم
ويأتي احدهم ويقول لا تيأس من وطنك وتفائلوا
والكويت بخير
/ping kuwait




اخي العزيز أو اختي العزيزه
يشرفني مرورك في مدونتي وتعقيبك الجميل
وسؤالي:
كيف تود ان تكون تلك القرارات الصارمة؟
هل هي بقانون يمنع القبليه كقانون منع الفرعيات مثلا؟
هذا قانون واجب التطبيق ورغم ذلك تم التحايل عليه وعند تفعيله انقسم الناس مابين معارض وموافق رغم انه قانون احترامه واجب بغض النظر عن قناعاتنا،ليس بالقرارات والقوانين تمنع لابد يكون هناك قناعات داخليه فينا

اخي العزيز:
لو كان لك الخيار مابين التصويت لمرشح ليس كفؤ ولكنه من القبيله التي تنتمي اليها ومابين مرشح اخر كفؤ ولكنه من قبيله اخرى
نحن مع التصويت للكفؤ بغض النظر عن القبيله
أما اذا اجتمعت الكفاءه والقربي فأين المشكلة؟
اما موضوع هناك من يمثلنا بالمجلس
فنائب الامة يفترض ان يمثل الجميع
وتلك الفكرة المغروسه في اذهان الكثيرين ليست ذنبنا،ذنب من وصل وتوسط لاهله سواء استحقو ام لا فأوقر في قلوبنا قناعه بأن لن نصل لشئ الا اذا وصلنا ابن عائلتنا وقبيلتنا
ممارساتنا الخاطئه وفكره التمثيل الخاطئ هي من زرعت هذه العصبيه غير المبرره فينا

أخيرا:
انا وكل من يعلق عندي من الجيل الحالي
ان كان بعضنا به عصبية ولا نبرئ انفسنا
فالكثير منا فيه الخير يا اخي العزيز
والجيل القادم هو حصاد تربيتنا وعطائنا وغرسنا
فلما التشاؤم؟
فينا الخير
ولنا قدرة على تربية اجيال ترفع اسم الكويت



وحياك الله

esTeKaNa يقول...

ikhalifa.com
~~~~~~~~~~~~~~~~~~
hehehehe:)
خلاص من تشوفون واحده تتمخطر بيدها استكانة،نعناعه اي شي جذي ترا هذي انا
:)






عرزالة
~~~~~~~~~
تو ما تبارك البلوق
حياك الله
:)





SheLLoO
~~~~~~~~~~~~~
يا مرحبا يا مرحبا
نورت المدونة بعودتك العطرة
.
.
إي يا صديقتي نحب الكويت ونحب كل ذره فيها،لا تنسون الكويت من دعائكم هذه الليله
:)











Expatriate
~~~~~~~~~~~~
كلام منطقي وصحيح
الأمور نسبية
ولا مرشح يتفق عليه الجميع
المهم ان يكون المعيار باختيارك واضحك ومرضي لربك وضميرك لشخص تحسبه والله حسيبه انه كفؤ هذا ما نريده لا اكثر
:)
عندما نقول صوت للكويت
اي صوت لقناعتك با هذا الشخص هو الأكفأ بقناعتك انت لا قناعه تجمع ولا قبيله ولا عائله ولا شيئ آخر









blog 3amty
~~~~~~~~~~~~~
أشوة اني مدربحة لي بدليتين بين الحجي عن العين
:pp~
لا تقول بل مرة ثانيه
ترا وراي مستقبل
مابي امشي واقط بدليات
:pp~

Enter-Q8 يقول...

العزيزة استكانه راح تقوليين يبالغ راح تقولين يجامل قولي اللي تقوليه
قريت البوست اربع مرات ثلاث مرات يقطعها اتصال او رساله او طلب من البيت او دوخة انتخابات
او أبني المره الرابعه اهي اليوم الظهر
و ابني يجلس بحضني و قررت ان اعطيه الماوس بعد ما فصلته عن الكمبيوتر
السؤال ليش اعيد قرائته مع اني قرائتي سريعه
لأني قاعد اشوف شريط ذكريات اوقف معاه بكل فقرة، اتكلم عن الربع الاخير من السبعينات مرحلة الابتدائي
استكانه انا ماني مكثر كلام
لأني راح استرسل و استرسالي لأن الواحد اذا احب شي ما يمل من ترديده
وطني وطني وطني

الحــــٌر يقول...

السلام
اليوم الكلمة بيد الشعب
وان شاء الله الشعب يقول كلمة حق ويختارمن هم أحق بالأختيار

خلوووونا نتفائل

:)

:: بـوح الصمـت :: يقول...

بوست روعة ولا شـك أن ما قبله من بوستات أروع .. قرأتها ولم أتمكن من الرد لضيق الوقت ..


أحس وأنا قاعدة أقرى البوست أتخيل كل شي قديم .. أتذكر يدي الله يرحمه .. إحساس الحنين زارنـي !
قاعدة أتخيل الكويت قبل شلون كانوا أيام الغوص وتعبهم ومعاناتهم وفرحتهم إذا ردوا ..

للأسف إن في ناس تعبت واهيا تبني وفي ناس على البراد تهدم :(


شكراً لج يا أروع إستكانة :*

الله يحفظ الكويت يارب ويحفظج لج أهلج ويرحم يدج ويجمعكم بالفردوس الأعلى يـارب :)

that's iT يقول...

حسيت البيت الكبير أهوا الكويت

على كثر ما نختلف نتفق على حب هالوطن:)

الله يحفظ ديرتنا,,

أبكاني البوست حسيته من القلب:)
ur sis