الاثنين، مايو 11، 2009

الذين لا نذكرهم

الوله:
=====
حنيني غصب يدفعني...وياخذني الوله يمك
وأبد ما أظن تمنعني...مسافات الظما عنك
مشتاقة للتربع في وسط مدونتي والثرثره معكم
مشتاقه للتجول في مدوناتكم
ولكن:
لا وقت لدي شئ،وإن كان هناك وقت للكتابه فلا وقت للرد والتعقيب
وأنا لا أحب أبدا تجاهل اي تعليق
أنا آسفه جدا
أنا اسفه كثرماكو بعد
:(
(حرم الجار المرشح وأنا)
=============
عندما سكن بجوار جدتي قبل سنه ،ارسلت لهم جدتي الغداء مع رساله بأنها ستزورهم للمباركة بالبيت،واثناء انتظارها لرد صاحبة البيت كانت تقنعني بضرورة الذهاب معها،دقائق وترجع لنا الخادمه بخبر:
المدام ما تستقبل أحد سوري
!!
لا أنسى دقرة جدتي ابدا
ولا أنسى ان صاحب ذاك البيت الكبير نادرا ما يتنزل من عرشه ويسلم على أحد
جارنا العزيز مرشح بدائره أخرى،لذا فقد تحول منذ فتره لشخص لطيف وحبيب رايح راد يسلم
قبل اسبوع وجدته يستند عند باب دوانيتنا ويكركر مع أبي،شعرت بالغضب ،ابي انسان طيب جدا ونساي،وعندما علقت على الموضوع وقلت له لا تعطيه ويه مصلحجي،خزني خزه ناريه وقالي:
عيب عيب هالحجي
:(
البارحة بمجرد توقفي في بيت جدتي جاءتني زوجته مع حجابها القوس قزحي تتبوسم وتمطخني عشرينتعش حبه
لم تعرف اسمي من قبل ورغم ذلك تناديني باسم الدلع وتسولف معي وتقرص كتفي:
شهالزين؟
أنا فيني طبع غير نمونه،ما احب اللي يطيح معاي الميانه بسرعة خاصه باسمي شوحي شوح عشتو
، ثم لاداعي لعشرينتعش حبه على كل خد،اشفيها المصافحة؟
وبالنهايه لا أحب أن انسانه غريبه عني تستخدم يدها وهي تسولف وياي وتقرص وكل شوي طاقه كتفي
المهم
سئلتني ان كانت جدتي موجوده لأنها تود زيارتها
ابتسامه صفراء،وسمته ظهر واجابه بارده:
اسفه جدتي ما تستقبل
!!
ما عطينها ويه،وتركتها ودخلت للبيت وأنا اشعر بإنياهاهاها
جدتي من أمس ما تكلمني ،واتفقت مع أبي اني احتاج اعاده تربيه ومراجعه لكل المتغيرات في حياتي
:(
(الذين لا تذكرهم)
==========
لا أحب أفلام الرعب
واذكر أني حضرت اسخف فلم رعب في دبي قبل فتره،وكان سكان الغابه في ذاك الفلم يتعرضون لهجوم مباغت من مخلوقات غريبه ،اذا ذكرو اسمهم حضرو ودمرو القريه في وسط الغابة
فكانو ينادونهم: بالذين لا نذكرهم
الذين لا نذكرهم اتذكرهم كل ما استمعت لندوة انتخابيه ،فالكل يدافع عن الوطن والدستور وبلا بلا بلا
اتلفت كل مكان وافكر:
اذن من الذي عفس ديرتنا؟
أكيد هم الذين لا نذكرهم
(انقطع الخط)
========
كنت في مرحلة استلقاء وتأمل لسقف غرفتي وفي قمه الهدؤ حين ادخلت لي أمي سماعه الهاتف فقريبتي تريد التحدث معي
شعرت بالغضب والعسارة ،انا اعلم ان بقلبها سالفه،وقد اتصلت على موبايلي ولم ارد،انا ببساطة لا يوجد لدي متسع في مخي ولا قلبي للانصات
وضعت السماعه على اذني وغمضت عيوني، وصوتها فجأة ذكرني بحنة التكييف في الشاليه القديم وكيف كانت حنة التكيف تنومني،تتحدث بكل التفاصيل وتشكي تشكي تشكي
يتني النومه
شسويت؟
سحبت الواير الرئيسي بتليفون البيت وتركته لمده خمس دقائق مقطوع
ثم بعثت لها رساله بأن هناك مشكله بالهواتف ،ونمت
!!
يا إلهي منهو هذي البنت؟
انا اتحول لمخلوق شرير مو هامني اي احد
أنا مو أنا
:(
أشعر بحرورة بعيوني
سأكمل وضع كمادات الماء،وإلى ان نلتقي
فتكم بعافيه
:Pp~

هناك 43 تعليقًا:

~ هند ~ يقول...

كان عندي احساااااااااااااااااس
انه راح يكون فيه بوست يديد اليوم ..

هيااااااااااااااااااا



أقرا وأرجع باذن الله :))

اجتماعي يقول...

عجبتني وايد حركتج مع يارتكم

:)
.. تستاهل

الله يعينج على مشاغلج
موضوع حلو

ويعطيج العافية :)

حياتي هدف مو عبث يقول...

أهلاً أهلاً

صحيح مصلحة اشكره وانتي لازم تعرفين هالنوع وأصلاً معروفين ماله داعي
بعدين في أحد مايحب أفلام رعب
غرامي أفلام الرعب أحتاج للخوف أحتاج الشعور فيه زيادة
وأكره شي عندي اللي يسولفون معاج وايدها تي على كتفج ولا ظهرج
ينرفزون
أحس كتفي وظهري أشياء خاصة
:P
ما يصير جذي عاد أعطيهم النظرة من وضع ايدها لي اتوخرها بعدين هلا ماسمعت شنو قلتي
مافهمت عاد من الصدمة طبعاً
وسلمي على يدتج وحبيها :***

Kuwait يقول...

@@
ما يشوف شر مرشح الغفله عساه ما يفوز :\

Fankooshy يقول...

ثرثرة حلوة
صج يبيلها استكانة شاي
ونستلم المرشح وسوالفه

يعطيج العافية :)

4 يقول...

lo0o0o0o0o0ol

la 7aram 3aleeech sh7alatech w 2ntay 6ayba...

bs zain saweetay byeran yadetech

fatto يقول...

الصراحه عجبتيني زين اتسووين فيها .. شالناس الي ماتستحي .. واشكره تمثييل حق مصلحت ريلها .. مات عليها اهي وريلها ..


سوري بس الصراحه حرتني


حبيبتي يدتج والله ماتستاهل هالدقره والله .

ولهنه عليج استكانتنه .. ادري انج ماتقدرين على فرقانه يالشريره لوووول

لاتحاتين بعض المرات الواحد اتسيرله نفس حالتج .. فهالشي طبيعي .. ساليني انا :)

sologa-bologa يقول...

هالمرشح بأي دائرة؟
لا يكون الأولى
!!!

kAiKa-MGroMa يقول...

LOOOOOL

9AYRA NEYAHAHA GIRL :p.

Yin مدام يقول...

إستكانة المتمردة

أنا خبري فيج من السنافر مو شرشبيل؟!؟


@@


1-

للأسف سويت نفسج بسالفة شوي مختلفة ووقتها بردت جبدي !! ومواهاهاها ..
بس عقبها تحسفت "شوووية" وافتشلت يوم جدتي الله يرحمها هزأتني
:))))


بيني وبينج "زين تسوين"

:P

2-
عرفت الفلم وصج سخيف
بس يبتيها رايت على سالفة الذين لا نذكرهم

:)))

3-
لووووول

استكانة اللطيفة ترى عادي هالحالات تصيب الواحد ويتمرد على نفسه وطبايعه
خاصة حين يكون مشغول بأمور خاصة ولاهي بعمره

خو ما يصير كله للغير لازم وقت لنفسه
إن لنفسك عليك حق !!
ويعني إذا ما رديت على الموبايل أكيد مشغولة..شماله تدقون على البيت
!!
أكيد لين صار عندي وقت بدق بنفسي

وهم قريبتج الله يسامحها اختارت وقت غير مناسب
:)


لا تطولين بالمزاج المتمرد
لأن صورة السنافر اللطيفة تطري على بالي من أشوف إسمج رجاءً لا تبدلينها بشرشبيل
:p

الله يوفقج يا استكانة بكل أمورج

:)

نهــــــــــار يقول...

السلام عليكم....
........
المصلحجيييين كثري منهم...
بس عزيزتي تدرين بشيابنا وعيايزنا ..
ما يرضون حتى لو الجار ماكل حقهم
بعد هم إلي يوصلونه...
..........
بالنسبه للمتصله ....
صراحه
بين الحين والآخر الشخص يحتاج لوقت خاص
ليريح نفسه ويشحن طاقه جديده ليستطيع الإستماع للغير .....
.........
الله يعافيج الغاليه وكثري من الكمادات
لا عزيزتي إنتي مب شرشيره(تصغير شريره)
بس حاله وبتعدي...
..........
في امان الله

QiYaDiYa يقول...

معذووورة يالغالية
سولفي مثل ما تبين
حتى احنا ولهنا عليج
كلنا اذان صاغية ;**


مابي اطول عليج
كل موقف يحتاج بوست تعليق ;p

بس اخر موقف
عفاااارم عليج

الي ما تحترم ان انتي ما تبين تتكلمين حزتها لا تعطينها ويه !

اذكر كنت حاضرة لقاء للفتيات تنظمه احدى الجهات
لكن اغلبهم معارف

فتم توزيع ورقة لتسجيل البيانات ..
و من ضمنهم العنوان و رقم البيت

قلت لهم اسفة ما اعطي عنوانا و رقم بيتنا حق اي احد
باجر تدوروني ما تلاقوني
و تدقون على بيتنا و ما تحصلوني
و فجأة القاكم عند باب بيتنا ;p



موفقة يا اغلى استكانة بالعالم ;**

Dakhtar Blue يقول...

إستكانة
عفارم عليج والله
طبعا موقف الوالد ويدتج الله يخليهم ويطولج بأعمارهم... موقف مفهوم
لكن موقفج هم موقف مفهوم وشجاع وقوي

ياشين هالويوه اللي مادري بشنو مغسوله وما تطلع تترزز إلا إذا عندها مصلحة

أما بخصوص الفيلم
أتوقع تقصدين فيلم
The Village
إللي أخير شي يطلعون مو عايشين بالماضي... لكن عايشين بالحاضر بس عندهم عقدة من التطور

عاد أقول لج سالفة... لما كان هالفيلم معروض عندنا
بنفس الوقت كان في مهرجان للضحك
مهرجان مدته إسبوع... تتحول فيها المدينة بكبرها لبرنامج كاميرا خفية ودقات... وصادوني أكثر من مرة، بس ساعات تكون الدقات بايخة شوي :-P

عاد خلال هالإسبوع رحت السينما أشوف نفس الفيلم... دفعت التذكرة أنا و واحد من ربعي ودشينا قعدنا
أول ما طفت الليتات
جان يقوم واحد من السطرة الأولى وبإيده مكبر صوت ويصارخ
الفيلم زبالة... وبنهاية الفيلم يطلعون عايشين بالزمن الحالي مو بالماضي
وعقبها طلع ركضه قبل لا ينطق من المشاهدين :o)
عاد أنا ورفيجي قررنا نكمل الفيلم... بس الحقير خربه علينا

عرفت بعدين إن لمدة إسبوع... كل واحد يدش الفيلم كانوا يخربونه عليه... وبأكثر من سينما!؟

أدري سالفتي مالها علاقة... لكن قلت أشاركج :o)

ikhalifa.com يقول...

شريرة!!
صايرة من جماعة الذين لا نذكرهم!!
:P

glomhilda يقول...

:** صباح الأنانية الحلوة غاليتي

على فكرة..ترى اقصد الانانية الايجابية=)

سأبدأ بالتعليق من آخر الموضوع

أحياناً يجب أن نتصرف على ذلك النحو وأن نكون أنانيين قليلاً
space نحتاج لأن نعطي أنفسنا

تأتيني هذه الحالات في أوقات أشعر فيها بأني أريد أن أعتلي ظهر غيمة تأخذني بعيداً في أعالي السماء وأجلس أصفي ذهني من كل شيء

a bad person صدقيني أنتِ لست
أنتِ فقط تحتاجين فسحة خاصة مع نفسك بعيداً عن الآخرين..فلا عيب في ذلك

إذا كنتِ مرهقة من الداخل فلن تستيطعي أن تعيري الآخرين حتى سمعكِ

=========
أعجبني ردكِ على جارتكم حرم المرشح ^_^ المصون
(بصراحة تستاهل)
أكره الاستغلاليين والمصلحجيين وأبغض مجاملتهم
=========

(الذين لا نذكرهك)
أعشق أفلام الرعب لكن هذا الفيلم كرهته لنهايته السخيفة
بس عجبني ربطك بينه وبين اللي يصير معكم بالمجلس
ومو بس كذه
(أعتقد (الذين لا نذكرهم
هم السبب لكل المصائب في العالم العربي

;p الحكومات مالها ذنب
===========

بس خلاص..يكفي فلسفة من الصبح
*_^



استكانة..إشتقنا :**

ولد الديرة يقول...

اكتشفت متأخراً جداً

أن اي طاقة سلبية ولو كانت في الظاهر مفيدة لنا

في الواقع هي مضرة جداً لنا

عيشي حياتك كما انتي ودعي الآخرين وسلبياتهم جانباً

:)

ميمة السبيت يقول...

عجيبه سالفة الفيشه هذي راح اجربها يازتلي صراحه

اشتقنالج يا استكانه و زين سويتي فيها مرت شين الحلايه و الله عجبتيني

صباحكي سكر

ARTFUL يقول...

شهالغيبة وانا اخوج؟؟

:)

والله هالناس جليلين حيا

حق المصالح ولا منهم

بس جار وله حق عليك شتسوي بعد

!!!

الي يسولف ويمد ايده ينرفزنييييييي

عندنا واحد من الشباب كلش ايده ماهي ثقيلة

يسولف واذا قلت له سالفه تضحك طقك على ظهرك

وكل ما زاد الضحك زاد الطق

!!! اناقاعد اسولف أضحك معاك وانت تغسل شراعي وتهد حيلي هد الله حيل اللي في بالي

;p

الا تحتاجين تربية

;D

لا عادي بعد ما شفتي الشر بعينه

الشر انج تقولين لها لو سمحتي بنام طرااااخ

ودمتم بخير وصحه وعافيه

:)

chandal/danchal!! يقول...

الله يوفقج ويخفف عنك التوتر اللي قالبج شريرة

:)))

الله يانا فرحت لما شفتلك بوست يديد على الريدر

:))


ما أقدر أقول زين سويتي فيها


مع انك ما سويتي شي غلط... بس استكانة كريمة ومن عايلة كريمة ... صدقيني هالجارة تدري بروحها وويها منجب ماراح يردعها صدج لها... شدعوة اذا ما دعيتوها ما راح تييكم ركض!
.
.
.

خبري بآخر فيلم رعب كان سنة 1981
اسمه ذا شاينينج.... يعني قبل لا تنولدين
:p
.
.
.

tsk tsk tsk

بدزلكم سنترال كيفان يشوف شسالفة الخطوط الأرضية

:p

I7na 3shagnaha يقول...

أهلا أهلا

ترى أحلا عليج التمرد

keep on :))

حاطب ليل يقول...

الذين لانذكرهم مار علي بس وين وين وين
ماره علي فكرة هالفيلم
....
ياقربه من هاري بورتر

Mamloo7a Q8ia يقول...

واحنا اكثر ولهانين للثرثره معاج
:***
الله يعطيج العافيه
ويوفقج ويسهل امورج يارب


لووووووووووووول
:)
كلش ماني مصدقه
غبرووووو تسوي جذي
كلش مو موديلج الشريره
بس الظاهر انتي طافحه منها

على العموم
اللي يطق الباب يسمع الجواب
اهيا بدت اهيا تحمل


افلام رعب ما اواطنها ولا اشوفها
انا ناقصه ؟؟
@@

لا لا لا لا
غبروووو صارت شريره رسمي
:P

اسم الله على عويناتج لا ترهقينهم وايد
ريحييهم بين فتره وفتره
وعليج بكمادات الشاي احسن
:******

الحــــٌر يقول...

هلا بإستكانه
عوده موفقه بإذن الله
الذين لا نذكرهم
!!!!
اعتقد انه ربط فيه ابداع يا أستكانه
دمتي بخير أختي العزيزه
:)

إمـرأة لا تُنسـى يقول...

ياكثرهم عندنا...





الله يكافينا ويكافيكم شر هالناس

q8cool يقول...

nice post wayed shadni ;)

anyways u r welcome to my blog

ma6goog يقول...

قوليلها لا تبوسين

اخاف من انفلونزا الخنازير

ikhalifa.com يقول...

حصلت الفيلم كامل على يوتيوووووووب
:P

طفوا الليت انيهاهاهاهاها

Mamloo7a Q8ia يقول...

على طاري فيلم الرعب
وبتأثير من الغاليه الزين
شوفي آخر افلام الرعب

فيلم رعب!

Nikon 8 يقول...

والله وتعرفين تريدين وحدة بوحدة
:)
أثاريج منتي سهلة
:))
طافج عندنا مرشح صار يمطخ بروس الحريم الكبار بمقره الإنتخابي
ويمدح فيهم وبتربيتهم لعيالهم وصبرهم على متاعب الحياة
!!!

سبمبوت يقول...

والله ولهنا عليج ..

بس والله فاهمة الحالة

شي غريب في الجو العام يناهض الإبداع والبوح والرغبة بمحاورة النفس والناس على حد سواء ..

إنشاء الله مرحلة وتعدي

دروازة يقول...

ولو اني متأخر

ومقيد علي تأخير 13 يوم

بس متأكد اني بالقى عندج السماح


كل عام وانتي بالف خير

يوبيل فضي جميل

عقبال ما نفرح باليوبيل الذهبي :)

دروازة يقول...

زين ما سويتي فيها

هالنوعية الرخيصة منهم وايد هالايام

مصلحجية

لو كنتي معطيتها ويه ...كانت راح تنساج ثاني يوم عقب الانتخابات

ومن الحين اقولج هذي بتصير شكل حياة الفهد في مسرحية حرم سعادة الوزير

بنت الشاميه يقول...

استكتنه لو سمحتى يدتج متى تستقبل
باخذ موعد بزوركم
بس ترا ريلي مو نازل الانتخابات

((((:
المهم انج بيناااااا
سلاااام يالغاليه

Sn3a يقول...

لاتحاتين بننطرج لين تفضين ونسهر عالسوالف بعد شتبي استكانتنا الغاليه


بالنسبه حق جارتكم هذي قليله ادب@@
وريلها قليل ادب اكثر منها لان ماعتذر عن تصرف مرته
والابهات عندنا وعندج خير ابوي مايرضى على ولا مرشح
مثلا لين حطو بالتلفزيون لقاء ويا مرشحين اقول وييه بدا الجذب يقول عيب مايصير تقولين جذيه
لو حطو دعايه اقول ياك الممثل
يعصب من صجه@@
مع ان اهو يدري بمعدن معظم هل الممثلين سوري اقصد المرشحين
بس مايرضى احد يتكلم


انتي سويتي الصح ويدتج زعلت لان حريم اول مايردون احد
بس انا لو بمكانج ماسوي غير اللي سويتيه
ماحب انافق خصوصا هالاشكال
وبروحي كارهه الانتخابات بكبرها
محد عفس الديره غير هالمرشحين باختلاف تياراتهم وطوايفهم مامنهم فود


والناس ترا زهقتنا ليمتى يدقون يتشكون
خو تشكو بينكم وبين نفسكم وعورو روسكم احنا شكو!!

ReLaaaX يقول...

looooooooooool

انتي تححححفه

Q80 Blogger يقول...

:0

شنو هذا !!


انتي مو انتي !!!!!!

esTeKaNa يقول...

هند
~~~~~~
حياج الله
:)





اجتماعي
~~~~~~~~~~
حلت دنياك وزارتنا البركة
:)











حياتج هدف
~~~~~~~~~~~~~
ياهلا وأمية هلا
الله يسلمج من الشر واصل سلامج
:)
وصاجة انا احس انا شئ خاص
بعدين ما اقدر اركز
يا اركز بالكلام يا بيدها اللي كل شوي كافختني
:pP~









kuwait
~~~~~~~~~
آمين
:Pp~








FANKOSHY
~~~~~~~~~~~
حلت دنياك
وحياك الله
:)






4
~~~~
منضوله
:pP~
قلبت صايره مو خوش بنيه
:(

esTeKaNa يقول...

fatto
~~~~~~~
شكرا حسستيني وضعي طبيعي
:Pp~







Sologa
~~~~~~~~~
شدراك؟
انت يا يارنا
:Pp~







KAIKA
~~~~~~~~
HAHAHA
خوش اسم عجبني
:pP~







مدام yin
~~~~~~~~~~~
ياهلا وأمية هلا بالغالية
شفتي شفتي؟
رحت عنكم سنفورة
غطيت جم يوم رديت شرشبيل
:Pp~
واي تذكرين حواجب شرشبيل؟
LOOOOOOL
يا بعد قلبي قلبج
عسى ربي يحفظج ويسعدج انتي واسرتج الجميلة
:*










نهار
~~~~~~
حالة وتعدي؟
الف الحمدلله طمنتيني على مستقبلي يا نهار
:)

esTeKaNa يقول...

قيادية
~~~~~~~~~
هلا بقيادية الفرح والنجاح
:**
صاجة زين تسوين
وصلت لج الامانة ما نجمه؟
:pP~










Dakhtar Blue
~~~~~~~~~~~~~~~~~~
يا هلا ويا مرحبا
زارتنا البركة يا دكتورنا
عيل تقول اسبوع للضحك؟
هذا الزين والله
اما سالفتكم عجيبه
lol
بس عليك الله الفلم مو سخيف؟
انا صج ماعمري استملقت فلم كثره
وزين منكم عارفين النهايه وقاعدين
:))
تعليقك ضحكني ووسع صدري
حياك الله نورت بلوق اختك استكانة














بن علي
~~~~~~~~~
اي دير بالك مني
:Pp~











glomhilda
~~~~~~~~~~~
يا صباح الغيوم وإعتلاء الأحلام الجميلة
هذا اجمل تعليق استمتعت بالتلذذ بكل كلمه فيه
:)
مرورك عطر هذا البوست
كوني قريبه
فالشوق متبادل
:*












ولد الديرة
~~~~~~~~~~~
شكرا استاذي ومعلمي ولد الديرة
ومنكم نستفيد
:)










ميمة السبت
~~~~~~~~~~~~
ياهلا وامية هلا
واخزياه صرت اعلم الناس تسحب فيش
:pP~
اهم شي يا ميمة السبت
انج تعطين روحج مساحة ترتاحين فيها
عسى ربي يحفظج ويسعدج دوم
:)








أرتفل
~~~~~~~~~
ياهلا ويا مرحبا بأخوي الغالي
هلا في ابو شيخة الجميلة
:)
اعذرني الله اعلم بظروفي
ورغم كل اللويه كاني بين فتره وفتره اكتب بوست
:Pp~
ورفيجك كل ما ضحك مد ايده؟
مو حاله هذي
LOOOOOL









chandal/danchal!!
~~~~~~~~~~~~~~~~~~~
آمين يا بعد قلبي قلبج انتي
شكلها احنا عشقناها وصلت السلام
عفيه عليها أمينة
:))
وشكرا شكرا
سنترال كيفان مشغولين حاليا
:Pp~









I7na 3shagnaha
~~~~~~~~~~~~~~~~~~~~
عجبني تعليقج
حسيتج جنج تقولين لي مثلا:
احلى عليج الضعف
احلى عليك التنورة
شي جذي
:pP~







حاطب ليل
~~~~~~~~~~~
ممممم انت ابصر
انا ما شفت هاري بورتر
:Pp~









مملوحة
~~~~~~~~
مو موديلي شريره؟
LOOOOOOOOOL
تعالي اقري علي
نفخي ببطني
سووو لي صرفه انا توني بنت بمقتبل حياتي مشكله اذا اقلب شريره من الحين
:pP~









الحر
~~~~~~
كيف حال اخي العزيز الحر؟
شكرا لمرورك
اما الابداع بالربط فهو ليس الا قليل مما عندكم
:)









إمرأه لا تنسى
~~~~~~~~~~~~~~
امين
:)







q8cool
~~~~~~~~~~
حياك الله وشكرا على الدعوة
:)








ma6goog
~~~~~~~~~~
عشان يدتي تقطع علاقاتها الدبلوماسيه معاي مرة واحده
:Pp~






بن علي
~~~~~~~~~
LOL
شوفه
بس ترا انا كلش ما احبه
:)

esTeKaNa يقول...

مملوحة
~~~~~~~
ما طلع لي
:(








Nikon 8
~~~~~~~~~~~~~
شرايج فيني وانا مو سهله؟
حركات
صايره شرشبيل
:pp~
المرشحين صاير مذهبهم وسيع
على ابو قواعد وما منهم فتنه وامطخ ولا تمطخ جود يحصل له دعوة على الماشي
:)









سبمبوت
~~~~~~~~~~
لك ولغدونه شوق خاص
:**
اجمل مافي مرورك اني واثقه دائما انك قادره على قراءه مابين السطور
الله لا يحرمني من طلتج









دروازه
~~~~~~~~~~
اخي العزيز دروازه:
هقوتك انا اقيد على اخواني الغالين تأخير؟
يكفيني مرورهم العذب
واحساسهم الراقي بأخيتهم استكانة
فرحتني جدا واكثر من ما تتخيل
عسى ربي يحفظك ويطول بعمرك ويحفظ لك اسرتك الجميله ويسعدك
:)
حياه الفهد؟
هههههه ضحكتني تذكرت ويه يارتنا
:pP~










بنت الشامية
~~~~~~~~~~~~~~~
ياهلا بشيخة الشامية كلها
:**
افا عليج
نفرش لج الورد والزل الحمر
حياج الله
:))










sn3a
~~~~~
يا بعد قلبي قلبج يا الغاليه
لا خلا ولا عدم ان شاء الله لله لا يحرمني منج
:**
ههههههه
اول مرة احس تعليقج معصب
فديت المعصبين انا
:**

مـي يقول...

اسمحي لي بطلع بره الموضوع..!!
الصورة الثالثة لفتت نظري حييل
هل هي من تصويرج؟
أتمنى أشوفها بحجم أكبر إذا عندج منها نسخة ثانية أوضح..



وتقبلي تحياتي
:)

SheLLoO يقول...

استكانتي..

لطيبة القلب حدود مشاغبة كهذه ;p

ومرورًا بحادثة الهاتف تذكرت خطة مشاكسة لإبنة خالتي حين لا تريد مهاتفة من تتصل خصوصًا إن كانت من ثقيلات الظل "وإلي ينامون عالسماعة" فتأخذ كيس البطاط وتجعله "يخروش" في أذنها ثم تغلق السماعة وكأن الخط انقطع فجأة ;p

جربيها تنفع وااايد ;p

موفقة يا الحبيبة ;*

مـي يقول...

!!
عذرا
انا كنت بحط الرد على موضوع ( شلتك بيوفي وطن )
بالغلط حطيته بهذي الصفحة..!!