الأحد، أبريل 26، 2009

يا رضاها

أنتي عيونك والعتيم سبحان رب (ن) خالقه
قصيده لشاعر قديم عاشق وماحد صدقه
ومن كثر ما غبتي عليه جمع قصيده وشققه


عقدت على جبين الفضة حاجبها،وزينت براءة الدنيا ملامح حيرتها وسألتني
ليش شققه؟
ابتسمت
من كثر ما غابت عليه ما عاد لاحساسه صوت ولا لقصيده معنى
..
سرحت بعيد،فلت ظفاير ليلها على كتفي ،وأرخت راسها هنا على صدري،داعبت نبضات قلبي وتنهدت
..
ولي غبت أنا ،بتفقدني؟
ناظرت ليل عيونها واجتاحني صمت رهيب ،ما اعتدت انا البوح
سكت
غمضت هي عينها وانا اللي عيني دمعت
................................
أنهي اتصالاتي لربع الشاليه،وانطلق،انا وكنافه وبضعه اغراض مطلوبه من سهارى الليل
طريق بنيدر،وليل،واخر نسمات الشتا تدخل هنا بيني أنا وأنا
واذكرها
(لي غازلتك نسمات الهواء ،ودخلت بكم ملابسك ...اذكرني)
ضحكت بلحظتها على جنونها وقلت لها
:
بس انا اخاف من الهوى يمرض قليبي،مابي نسمات الهوى تدخل بكمي
!!
تأملت رجولة قلب خايف من احساسه وقربت ،فكت قيود الخوف وتحسست على موطن الشوق واستنطقت بوحي
واشفيها اذا مرضت؟مصير الزمن يشفي كل مريض
لا تخلي خوفك يمنعك تحيا،تحب وتعيش،
عيش هاللحظة،ولي غبت أنا شفيها اذا تمتعت بالذكرى؟
ما خبرتك تخاف
......................
تختلط أنفاسي بأنفاس الطريق،ويرميني شوقي على أطراف هذا الليل وحيد إلا من عيونها وبقايا ذكرى خبتها هنا
وصوت عبدالكريم يسامر هالليل :
تصدق حبيبي...تاخذني الأشواق نصايف الليل ويمك توديني
تصدق حبيبي...تجبرني الخطوة غصبن على روحي صوبك تمشيني
تصدق حبيبي؟
.................
في مكان آخر،على ربوه عرزاله تحاكي الليل،صوت الموج يخلتط بضحكات يوسف خالد وبدر
هناك،حيث يخبو الصوت فجأة،وتعلو الضحكة لوهله،وتحلو سوالف منتصف الليل
أتوسط المكان مستندا على مسند أحمر يشاركني فيه (كوع) بدر،اضحك مع السوالف محاولا تشتيت تركيز الوله
..
واحساس قلب ذايب من شي يسكنه
!
يسئلني بدر:فيك شي؟
ابتسم:لا ليش؟
حدرت الديرة بتنام بالبيت ورجعت بنص الليل،منت على بعضك
.......
استغل مقاطعه يوسف،واهرب من البدر
...
أحيان عندما نكون محملين بهم وأرق نخاف من تلك العيون القريبه منا،من قدرتها على سبر أغوارنا بكلمه،ومن افتضاح أمرنا بنظرة
.......................
وعلى أطراف ذاك الفجر،يخلو بنا المكان انا وبدر،مستلقين نناظر اخر بقايا الليل واشراق الفجر
شلونها؟
مادري عنها
يتربع ويطل في وجهي ويضحك
:
شدعوة عاقد النونه؟ليش معصب؟
لا عادي ما تهمني
!
ينظر لي بطرف عينه:
إي عدل ما تهمك
!!
صمت يتخلله صوت الموج وطيور تحلق في سما ذكرى جرح لبدر،وشوق عزيز
..
بدير،انا مادري اشفيني
أنت بكل بساطة ذايب،انت تحبها
واذا حبيتها تكسرني؟البنات اكثر من الهم على القلب وان راحت بدالها في عشر
..
يتنهد بحجم الحب والعشره التي تجمعنا،يربت على كتفي
:
عزيز هالمرة غيرواللي مربك حياتك انك تدري هالمرة غير،شوف عينك،صمتك،شوف نفسك ،كلك
انت فاقدها
تدري؟
في حياة كل واحد منا بنت تفقده احساسه بكل من يأتي من بعدها،يعشقها وتغيب،ويظل عمر يبحث عن ملامحها بكل الوجوه،عن صوتها وعن كل احساس يشبه حبها،ولا يلقى لها
شبيه
..
اناظر بوحه الضمني واسئله
:
وليش فارقها دامه كان يحبها؟
يمد ساقه ويناظر البحر
:
ظروف وواقع مر،تعددت الاسباب والفراق واحد

وفي حياة كل رجل إمرأه افقدته نكهة كل النساء
طفله لعبت على أوتار قلبه،فاثارت كل احساسه ورغبته بإحتوائها ،إمرأه ينام بعد انهاك التعب في أحضان روحها،وصديقه ،لا يحلو البوح والسوالف الا بحضورها
إمرأه واحده تختزل كل النساء،وتحبها حب ثلاثي الأبعاد
..
أغمض عيني
:
شسوي؟
يبتسم،ويضرب كتفي بحماس ويغمز بعينه
:
انت فيها،ظروفكم مناسبه والبنت زينة،اخطفها من عالمها لدنيتك وخلنا نفرح فيك
...........
مع اشراق شمس ذاك النهار أرسلت لها:
أبيك تدري صوتك العذب لي غاب... أحس روحي تنكسر في غيابه
كذا غيابك للحزن يفتح أبواب...غصبن علي البس شقاه وثيابه
أدمنت صوتك وان تثيقلت كذاب...من يعشقك لي غبت يفقد صوابه


انتظرت ردها،وتحريت تضوي شاشتي
وما ردت
أدري..تبسمت ،واخفت شوقها تحت وسادتها
وحقرتني
!!
..
ويا رضاها وقف وناظر شوي
شف " غـلاها " إيش سوى بـ شخص حي

ولقيت نفسي بذاك الصبح على كرسي الضيف بمكتبها
تعض طرف شفتها وغضب كل هالدنيا بعينها وسئلتني
:
نعم أخوي تامر على شي؟
أحتاج رقم الوالده
ليش؟
بتحرش فيها
تتوتر بسمتها،اتأمل عينها،وترجف نبرتها
امي مرتبطه
أضحك،وتضحك
وترد روحي بضحكتها
.
.
وبسمتك منهو قراها
وضحكتك منهو كتبها
ما تعرف من السوالف
عشقها ولا عتبها

هناك 37 تعليقًا:

Najmah يقول...

احببت رائحة السطور
وبراءة مشاعرها رغم شقاوتها
:)
وتذكرت
كل القلوب اطفال
:*
استكانة
هذا كله من الفيونكة
:Pp
ومساااا الشوق كله

كبرياء انثى يقول...

أخ على الاحساس فديت الاحساس وراعيته :)
بس طمنيني تحرش بأمها ولا لأ؟

esTeKaNa يقول...

Najmah
~~~~~~~~~~
يا زين من زينت البوست بأول تعليق
ويا حبني لك يا نجمه
:*
تذكرين بوست كل القلوب أطفال؟
:)
اي الفينوكه عامله عمايلها
افا علج بس
:Pp~

esTeKaNa يقول...

في واحده ذكيه قالت لي شمقعدج ويا بدر الفجر على العرزاله؟

LOOOOOOOOOOOOOOOOOOOOOL
حبيت اقول اني بهالبوست عزيز
مو استكانة
:pP~

`~MnO YeNSa! ~` يقول...

ما اقدر اقول الا
هالمرة
استكانة الهمتني


http://mnoyensa.blogspot.com/2009/04/blog-post_26.html

قوليلي رايج؟

البوووووووووووست قريب
حيـــــــــــــــــل

الخيلاء يقول...

:/

انا من غير شي اعيش فوضى مشاعر
هالايام مادري شنو ابي ولا شنو فيني

كملت علي يا رضاها

فقدتج و لهانه عليج
:*

ARTFUL يقول...

الله يحفظ الفيونكا ويخليها لنا

ولا يظيعها

;p

انتي شدراج بسوالف الراياييل

يماا منج

;p

الوله والشوق ويازين الوله والشوق
وضحكات ونسمات البحر العليل والسهر على اليال

الللله والله فقدت هالايام

ايام السهر على اليال مع ربعي

الحين كل اسهر على اليال مع اهلي

كلن له حلاته

;D

دمتي بحب وخير وصحه وعافيه انتي والفيونكا

;p

Kuwait يقول...

استكاااااااااااااانه
لقيتج بهالقصه ..
حسيتج موجوده بكل زاويه فيها اسلوبج امتعني :)

chandal/danchal!! يقول...

هالبوست بألوانه يبيلهم تفرغ علمي لمدة سنتين

:p



تهقين العقال يسد مكان الفيونكة اللي مو راضية تسلفيني اياها!

مي يقول...

قمة الرومانسية الراقية

اسمحي لي اوقف مع اقتباسات من كلماتج الحلوة

]]في حياة كل واحد منا بنت تفقده احساسه بكل من يأتي من بعدها،يعشقها وتغيب،ويظل عمر يبحث عن ملامحها بكل الوجوه،عن صوتها وعن كل احساس يشبه حبها،ولا يلقى لها شبيه]]
الشخصيات المميزة تفرض نفسها بحجز مساحة من الذاكرة يستحيل استبدالها أو نسيانها .. وتستدعي كل الحواس لكي تبحث عن ذاك الوجه..


[[
وفي حياة كل رجل إمرأه افقدته نكهة كل النساء طفله لعبت على أوتار قلبه،فاثارت كل احساسه ورغبته بإحتوائها ،إمرأه ينام بعد انهاك التعب في أحضان روحها،وصديقه ،لا يحلو البوح والسوالف الا بحضورها
إمرأه واحده تختزل كل النساء،وتحبها حب ثلاثي الأبعاد]]


كيف تكون تلك المرأة طفلة تلعب على الأوتار بإتقان .. هل لأن الطفولة تتمتع بالبراءة والعفوية والحب
المطلق..
ليكون في النهاية >> حب ثلاثي الابعاد ..وثنائي الابداع...


أحب دقتك في اختيار الالفاظ عزيزتي استكانة

شـقـــــران يقول...

الغالية استكانة

مساء النرجس المتثائب
:)

خلصنا من الغافي..جانا المتثائب
;)

.
.


قصة جميلة وهو أمر ليس بغريب على المشاخيط اللي خبرك..كما أن كلمة (حدرت) افرحتني كثيرا لأنها تذكرني بالماضي الجميل حينما يقول والدي نبي نحدر الديرة..طبعا ذاك الوقت حدرت الديرة ماتجي إلآ في الأعياد ووقت بداية الدراسة

مازالنا نستخدم هذه الكلمة إلى الآن رغم اضمحلالها

.
.

الفقرة التالية
في حياة كل واحد منا بنت تفقده احساسه بكل من بعدها،يعشقها وتغيب،ويظل عمر بعدها يبحث عن ملامحها بكل الوجوه،عن صوتها وعن كل احساس يشبه حبها،ولا يلقى لها شبيه

في بيت شعر للشاعر الراحل ومرهف الاحساس عبدالله الفيصل...يقول فيه

عمري رحله في طريقك..((والأمل)) أوصل حدودك
حتى في حبي لغيرك..كنت ((ببحث)) عن وجودك!!؟

يالروعة هذا البيت الذي لم انساه يوما



تقبلي مني أجمل تحايا المساء المتثائب
:)

:: بـوح الصمـت :: يقول...

:*

الفيونكة بعدها فوق راسج ;p;p !

كوني بـخير ;*

qesat_5ayal يقول...

اسمه عزيز ولا خالد
:P

يا عيني على الثقل
:Dعيل تقوله نعم أخوي


استكانة
دخلتيني بمود فرح شوي
كنت متضايقة شوي .. بس شوي




تصبحين على خير

Sn3a يقول...

ماتخيل شباب قاعدين بشاليه
واحدهم يقول للثاني احبها وابيها ومادري شنو

احس كويتيين مايلوق لووول


اني ويز
كل شي جايز يا استكانه

fatto يقول...

ياسلام عليج ياستكانتنا .. دايما وابدا كتاباتج حلوه .. والحب الي فيها احلا
ونتي طبعا احلا واحلا

مساء الرضا والحب والشوق :)

احلا شي بالدنيا ان الواحد عنده شخص يموووت فيه :) انتحسين انج دايما طايره فوووق :)


الدنيا من غير حب مالها طعم ابدا

kuwaitawy يقول...

.
وبسمتك منهو قراها
وضحكتك منهو كتبها
ما تعرف من السوالف
عشقها ولا عتبها





يا سلام يا سلام

Sweet Revenge يقول...

لا تخلي خوفك يمنعك تحيا،تحب وتعيش،
عيش هاللحظة،ولي غبت أنا شفيها اذا تمتعت بالذكرى؟


اااي هالخوف الي رادنا لي ورا


إمرأه واحده تختزل كل النساء،وتحبها
حب ثلاثي الأبعاد

فعلا في بشر من هالنوع بس همن الخوف يبعدهم
بشر من هالنوع شخصياتهم تكون طاغية اذا منت ند ماتقدر تكون معاهم تضيع

صباح القصص الجميله و والنهايات السعيدة واشوة ان امها مرتبطة ;)

U know WHO يقول...

استكانة..
عاشت الفيونكاااااات كلها والله :)

هذا وهي سودة لو بنفسجية جان شصيرررر ؟

أقوووول .. كلة بسبب الأزمة الإقتصادية
ماكو زواج ولا ارتباط..
بس من بعيد لي بعيد

عزيز ما يبي سلف
ترى حاضريين

مادري ليش أحس إنها طارت من إيده
وخذت غيره

هذا الموديل الكويتي
ولا أنا غلطانة
؛)

سبمبوت يقول...

شيء ما داخل ثنايا القصة يجعلنا نلهث وراء الكلمات فنسبقها قبل ان تسبقنا ..

حلمنا كلنا أن نجد شخصا يجدنا، يبحث عنّا وعندما يجدنا لا يهرب منّا ..

جميلة كلماتك .. احسست أنني اشاهد مسلسل تلفزيوني جميل جدا وراقي جدا ..

متى الحلقة الثانية ...

بليز بليز بليز عزميني على العرس واولى خطوات الحياة

lawyer يقول...

القصه حلوووووه

بس عورتني عيوني باللون الفصفووووووري


وايد مشتهيه تلونيييين

حسيت ان صج ورااااااج دراسه و كتب وشغل وهربتي منه تكتبين بووووووووست مشير




خووووش ربع هذيل يستهالووون الطيباوي كله

من صحن كنافه قالوله يالله تزوجهااااااااا


عطيني عنوان شاليهم ان ما خليييييييت كنفاني يسوي اشتراك لهم ما اطلع لوير هههههههههههههههههههه

I7na 3shagnaha يقول...

في حياة كل رجل امراة افقدته نكهة كل النساء..يحبها حب ثلاثي

:))

والعكس صحيح آز ول
________________
صباح الثري دي

:)*

Corpse Bride يقول...

وفي حياة كل رجل إمرأه افقدته نكهة كل النساء
طفله لعبت على أوتار قلبه،فاثارت كل احساسه ورغبته بإحتوائها ،إمرأه ينام بعد انهاك التعب في أحضان روحها،وصديقه ،لا يحلو البوح والسوالف الا بحضورها
إمرأه واحده تختزل كل النساء،وتحبها حب ثلاثي الأبعاد


تمنيت وبشده ان اكون انا تلك المرأه..

رائع هو ما سطرته استكانه..

صبا يقول...

يا حلو لون الغروب
:**

استكانه
حبيت هالبوست وااايد

وهالفقره قريتها اكثر من مره
.
.
.


تدري؟
في حياة كل واحد منا بنت تفقده احساسه بكل من يأتي من بعدها،يعشقها وتغيب،ويظل عمر يبحث عن ملامحها بكل الوجوه،عن صوتها وعن كل احساس يشبه حبها،ولا يلقى لها شبيه..

الله يعين المسكين الي يعيش هالشعور بكل لحظه ...احس انه يتالم
لانه بعيد عن محبوبته
وحياته
وروحه

روعه
:**

مو منج من الفيونكه
:**

ikhalifa.com يقول...

ها عزوز؟
ماشاء الله ، كل كلمة بلون كل حرف بلون
شاري مقلمة يديدة شكلك؟
:P
هيييييه
عيل حقروك هاه!!؟
يا حليلك

صدق غوار الطوشي يوم قال يضرب الحب شو بيذل

نهــــــــــار يقول...

السلام عليكم....
جميله سطورج يا إستكانه ..
ومحليها روح الشقاوه ...
..
دمتِ بخير

kumarine يقول...

العزيزة استكانه:
من اين يحضر وحيك؟
اعجبتني كثيرا
و لكن
رحمة بامثالي
نظاره قاعة بطل و العين يالله تشوف
ضاعت متعتي بقراءتها بمجرد عصر العين للتركيز
شكرا لك على لحظات جميله

Nikon 8 يقول...

يا سلام .... إي جذيه الحب يتراضون بكلمة بسيطة وضحكة مشتركة
:)
على فكرة وايد حبيت هذا الوصف وتمنيت إني أكون المقصودة
:
إمرأه واحده تختزل كل النساء،وتحبها حب ثلاثي الأبعاد
:))
الله يسمع مني آمين

lawyer يقول...

قريت البوست مرا ثانيه

لان الكل يشوف ان في جزء ثاني

انا ليش شفت انهااا انتهت ؟؟؟

esTeKaNa يقول...

كبرياء أنثى
~~~~~~~~~~~~
هلا باجمل كبرياء للأنثى
ايييه اكيد تحرش بالأم
ولدنا طاير فيها
:)









Mno YeNSa
~~~~~~~~~~~~~
ياهلا يا مرحبا
وانتي اجمل ما حصلي
احلى بوست من صاحبه الاحساس الراقي دائما
:)













الخيلاء
~~~~~~
نغيب يومين
ارجع القاج بفوضى مشاعر
!!
اشفيها صديقتي اشفيها؟
:)
حبيبتي انتي توله عليج العافيه












artfull
~~~~~~~~~~~
ان ضاعت الفينوكا
بينقلب البلوق سياسه ورياضه
:Pp~
ايييه يا ارتفل
كل شي له حلاته
عسى ربي لا يخليك من حبايب قلبك
:)









Kuwait
~~~~~~~~~~~~
يا بختي يا بختي
:)
انا دايم انخش بين السطور
صاحب الاحساس الراقي بس اهو اللي يحس بوجودي
:)

esTeKaNa يقول...

chandal/danchal!!
~~~~~~~~~~~~~~~~~~~~
أعترف لج:
مو انا اللي لونته
:Pp~
انا بوست واطمر
مالي مقاقه حتى ارتبه
الله يعافي نجمه
:)
ممممم
جربي لبسي عقال وخنشوف
التجربه خير برهان
عاد يا حسرة قلبي اذا لبستي عقال شنو بتكتبين
Hehehehe










مي
~~~~
وأنا احب مرورك وتعليقاتك التي تضيف بعد وجمال آخر على كلماتي
دمتي بخير
:)

esTeKaNa يقول...

شقران
~~~~~~~~
يا مسا النرجس الشاتر
ولا اعرف ان كانت شاتر اضمحلت او لا ولكنها بكل الأحوال تعني قمه النشاط
:)
ما زلنا نستعمل كلمه حدرت اذا نزلنا من الشاليه ولم تضمحل عندنا
بل نستعملها في كل مكان يكون بعيد عن الديرة
:)
الله يحفظ لك الوالد يا شقران
تبقى تلك الذكريات لها طعم خاص
.
.
.
ومثل هذا البيت ينسى؟
شعر اختصر ما كنت اريد التعبير عنه

شكرا لرقه ذوقك في هذا الانتقاء
دمت بخير

esTeKaNa يقول...

بوح الصمت
~~~~~~~~~~~~
طبعا
اهي مصدر الإيحاء
:Pp~







qesat_5aYal
~~~~~~~~~~~~~~
عزيز عزيز
:)
كل ما ثقلت البنت
كل ما ذاب قلبه اكثر وانا اخيتج
:Pp~
الله يحفظج ويشرح قلبج يا الغاليه
وانتي من اهل الخير







SN3A
~~~~~
سنعه ما لاحظتي شي؟
انا تعمدت اكتب اهو كان ساكت
يتهرب
ما يجاوبها على سؤالها بتفقدني
وما يجاوب صاحبه الا بكلمات بسيطة
عشان اثبت ان هذا شاب كويتي بسيط يخاف من مشاعره ويخاف على قلبه مو شخص خيالي حالم يمشي ويصرح بحبه
:)
بالمقابل:
لاحظي صاحبه
قاله روح لها تدرين ليش؟
لان قلبه مجروج بس ما كتبت ان عبر عن مشكلته او حبه
مجرد حوارات ضمنيه
عشان تحسين فيها واقع
وصدقيني اللي قاعد يصير مو بس جذي
اكثر من جذي
:)

esTeKaNa يقول...

fatto
~~~~~~~~
يا مسا الحب والرضا كله
:)
فعلا احلى شي الاحساس انج طايره بالسما
وحلت دنياج
ونسني تعليقج










kuwaitawy
~~~~~~~~~~~~~
:)
حياك الله






sweet revenge
~~~~~~~~~~~~~~~~
يا مسا الاحساس كله
:)
فعلا
الخوف ردنا عن امور كثيره
في خوف مفيد
وفي خوف سلبي يوقفج بنص كل طريج

الله يحفظج ويسعد قلبج يارب









U know WHO
~~~~~~~~~~~~~
ياربي هالفينوكه فضحتني بالمحافل الرسميه
الكل نسى البوست ويفكر بالفينوكه
lol
لو بنفسجيه
ويييه جان علوم
:Pp~
ليش تطير من ايده؟
ليش نموت على النهايات الحزينه؟
لا ما تطير
!!
تريهن بمكانها ومالها الا عزيز
وانا بسوي حطة عشانه
:)






سبمبموت
~~~~~~~~~~
وعندما يجدنا،لا يهرب منا
!!
كثيرا ما ماتسائلت يا صديقتي
عن سر ذاك الهروب المدمر لكل حب
فتمنيت بهذه الكلمات البسيطة ان اثبت هناك طريق اخر
وهناك سعادده ما بعيد عن الهروب عن قلوبنا
:)
شكرا لمرورك
مرورك ينعش بساتين قلبي ويفرحني دايما

اما العرس
فيفترض نسوي نقل حي ومباشر من موقع الحدث
:P~












lawyer
~~~~~~~~~~
يا مسا الكنافه كلها
:)
انا الون؟
انا مالي مقاقه اسنع البوست
هذي نجمه قلبي الله يعافيها كان عندها حصه تلوين خليتها تلون
:Pp~
شرايج بربعه؟
ترا بدر مو مرتبط
LOOOOOOOL
بعدين اهو ما قال للجماعه كلها
بس بدر السنع
:)
وعلى تعليقج الثاني
صح..مافي جزأ ثاني
كل واحد ممكن يتخيل شنو بيصير
:pP~

esTeKaNa يقول...

I7na 3shagnaha
~~~~~~~~~~~~~~~~~
يا صباح نكهة أجمل كل النساء
:)








Corpse Bride
~~~~~~~~~~~~~~~~
ستكونين
في عينه وروحه وقلبه
:)
الأروع هو مرورك يا صديقتي







صبا
~~~~~
يا مسا الصبا
:)
اييييه اللي يعيش الاحساس هذا شخص متعب،مثل بدر بهالقصه
ولان متعب شجع صاحبه يرجع حق انسانه اذا راحت منه بيتم طول عمره يدور في مدارها
....
شكرا لمرورج
وعاشت الفينوكه
:P









ikhalifa.com
ّّّ~~~~~~~~~~~~~~~
hahahahaha
:)
شكرا لمن لونت هذا البوست
:Pp~










نهار
~~~~
الشقاوة احلى مافي الحب يا نهار
:)
اسعد الله قليبك وروحك







kumarine
~~~~~~~~~~~~
ونأسف على عصره العين التي اضاعت متعة القراءه يا اخي
ونعدك بالاهتمام بالألوان والخط في المرة القادمه
:)











Nikon 8
~~~~~~~~
يا مسا الاحساس كله
وصدقيني
بعينه ،ممكن تكونين كل النساء
وانا اكيده اللي مثلج ممكن تكون اكثر من ذلك
:)
الله يحفظج يارب

ريــــــانــه الـعـــــود يقول...

وكيف حي وما لقاها

وان لقاها ما بقى بايدينه شي

غير انه يحتريها :)

بوست حلو

مثل صاحبته

دمت بخير

ShLaLaT يقول...

اييييييي اييييييي هذي البوستاااااااات الصعبه


يا حلووووووهم والله

:**

أبو الدســتور يقول...

خيــــــــــــــال

:))
بوست رائع