الخميس، أبريل 23، 2009

نوى القلب

إجهاد عقلي
=======
في حال شعرت بإجهاد جسدي،تشرقد في سريرك وسترتاح
وفي حال شعرت بإجهاد عقلي شتسوي؟
أنا مخي يعورني صج
:(
بلادة إحساس
======
تجمع هي اغراضها بعد خمس سنوات في ذات الإداره،امر من جانب مكتبها فأٍسئلها:
خلاص من حبكم يا زين عزلنا؟
فتزم شفتيها وتجاوبني:
إيه شلت اغراضي
استكانة يسلمج لا تبجين المهم اني اروح مكان ارتاح فيه،حتى لو انتقل
ابحث في قلبي عن شئ يريد ان يبكي وحزين،هالصوب بصاله قلبي،سرداب قلبي مني مني
فلا أجد شئ
أخرى على جانب هذا المكتب تنتقيني من بين كل الناس لتحكي لي عن مشكله زوجية كبيرة وخاصه
بعد عشرين سنه هي على أعتاب الطلاق،هي تخنقها الدموع وأنا ابحث في مكتبي عن سكر
هل اصبحت بليده احساس؟
اشعر احيانا من كثر ما اسمع الناس لم يعد فيني إحساس
تفاصيل
====
أنا منصته ولكن،في أحيان اشعر بأن قلبي يتفتفت وانا اسمع لتفاصيل طويله لا داعي لها ولاتغير في مجرى الحديث من نوع:
وسكرت الباب يا استكانه،وانطر انطر انطر،وصخخخخة وارد انطر انطر وبعدين جك فج الباب
ويه ويه ويه...نضى قلبي وبعديييييييين؟
تشره من نوع آخر
=========
في عملي السابق كان أغلبيه الموجودين شباب ،وعدد لا بأس منهم مصرين الجنسية
عندما خرجت من عملي استمرسؤالهم عني يصلني عبر اشخاص مشتركين بينا
أحيان اضطر للمرور للحاجه لبعض الأمور من هناك فاستغرب ان الكل يتشره علي
انتي وينج
!!
أقدر محبتهم الأخويه ،واقدر مشاعرهم النبيله ولكن السؤال الذي يتردد في بالي كل مرة كيف ممكن ان اتواصل معهم
أمر الدوانية مثلا؟
:Pp~
أنا بنت
من غير المنطقي ان اتصل مثلا لأسئل عنهم وعن العيال فشله
وهم يفترض يستوعبون هذه الحقيقه فلا يتشرهون زياده
بعض الشباب العمل معهم افضل مليون مرة من العمل مع بعض البنات
حقيقة لم اكن استوعبها،ولكنها للأسف واقع
إنفراد
=====
اليوم تلقيت اربع اتصالات من صديقتين وثلاثه من قريباتي كل منهن تنهي اتصالها بكلمه:
خشوفج استكانة
!!
حاولت تجميع مابين الصديقات المشتركات والقريبات اللاتي يعرفن بعضهم فاستغربت ان كل واحده تلوي صوتها بحقيقه
لا نصير بروحنا احسن
أنا هاليومين افضل الطلعات الجماعيه لأن الثنائيه تتطلب مني تركيز خاص،بالإضافه الى اني لو خرجت مع كل منهن على حدة معناته لن أريهن وأقعد بالبيت،وهذا يعني ،أبي سيعلقني رسميا بساحة الصفاه
افكر فعليا بوضع دوانيه اسبوعيه بالبيت،بدل التهيهي من جوكلت بار الى احد الكافيهات
رومانسيه
=====
بوست كلماته تتمخطر في قلبي وبالي،اتمنى كتابته بالغد او بعد أيام
احتاج مزاج صافي واحساس مجرد من اي ضغوطات لاكتب شئ جميل
من مده ما كتبت شئ برقه احساس
سلئتني احداهن عن سر تلك البوستات،
انا في مكتبي الآان بمجرد ان ارجع بالبيت سأبوح بذاك السر
وملاحظة:
عندما اكتب بوست رومانسي من نوع الدريشه ونور الشمس وربعه
يرجى من بعض الناس المتمللين منا ومن مشاعرنا الوقوف عند الباب
:p
إجازه
====
هذا آخر يوم في العمل،منذ يوم الأحد القادم انا بإجازه حتى إشعار آخر
Week eNd
========
قد أكون أسرفت في الايام السابقه في كثرت البوستات
واعلم أن كل ما اكتبه طويل
استحملو استكانة
فهنا مساحة بوحها لنفسها قبل كل شئ
وآسفه ان كنت مللت الكثيرين وشكى طول البوستات كثيرين
عطلة نهاية اسبوع سعيده
مع نوى القلب نية
ونوى القلب نية ..ما نواها لأحد غيرك
نوى القلب يمشي لك ..على السمع والطاعه

هناك 37 تعليقًا:

بس يقول...

مساء الورد و الفل

على التكانة كلها

:)

نهاية اسبوع سعيدة لج

ومن يعز عليج

وياحلو نوى القلب نية
عجيبة هالاغنية انا احبها

:)

mellow يقول...

يا مسا السامري

أول ما قريت عنوان البوست جان أغنيها
نوى القلب نية مانوى لأحد غيرك نوى القلب يمشي لك على السمع و الطاعة

آنا بعد جذي...هالأيام حاسة قلبي حجر و مشاعري ثلج

بس تعبنا من الإسراف العاطفي
ولا لا صاروا إلي معاج سوالفهم تكرف القلب

آنا هالأيام نفسي نفسي ...لو مؤقتاً ودي أفصل الكونيكشن ، تعبت و آنا أتعاطف

ANGEL HEART يقول...

ياحلوو اختياراتج وكلماتج

:)

بس في شي مادري بدليه ولا مقصوده

خلاص يا حبكم من زين عزلنا؟

مو جنه العكس طححت عليكم :P

ARTFUL يقول...

لي عوده انشالله

بس لو تزورينا

:)

chandal/danchal!! يقول...

@@

اعترفي يا سوسو

شكلج فتحتي محطة الاستكانة والسكينة برودكاستنج نيتورك

وما تبينا نشارك بالاهداءات!!

يبا مستعدين ندفع اشتراك شهري... انا مقاطعة اوربت واختي الشوتايم ومجابلينج انتي والأحبة... لا تحرمينا من بوستاتك وطلتك اللي تشرح القلب... وبانتظار البوست البيذاني بالشكر المحروق

:)
.
.
.

خنشوفج سوسو
لووووووووووول

الطلعة الجماعية وايد أونس من بو ثنتين... أنا مقسمتهم الى 4 اقسام

أهلي من صوب أبوي... من صوب أمي... كايروجروب... وكاريبو جروب!!!!

وكل ليلة عندي مناسبة!
.
.
.

يحليلهم الرياييل بالدوام يطلعون طلعات عجيبة!... مالج الا النيتورك حقتج تتواصلين مع زملاء المهنه والتدوين من خلالها

:p
.
.
.

اذا التفاصيل كانت عن طريق التلفون سوي مثلي وقولي عندي خط ثاني!

واذا وجها لوجه... اخذي شهيق وزفير بصورة صحيحة... بتحسين عقبها بتحسن ملحوظ... وممكن مع الشهيق والزفير راح تشنتحين خنيفراتك يا قبلة الله... وممكن يؤدي الى اسكات الطرف المتحدث!!
.
.
.

أمس كان عندنا حفل توديع مهندس سيكي والكل كان متأثر الا اختك... على قولتج أدور قلب منقبض... قشعريرة!



وأخيرا يا عزيزتي... علاج الجهد العقلي والجسدي هو... اني أسطر جدام أحد أمون عليه وأخليه يحك ظهري!

فيني هالطبع الخايس من عمر الدنيا... يذهب التعب والغم!
.
.
.
ابعاد كنتم والا والا قريبييين لمراد انكم دايم دايم سالميييين

وما قول غير اللللله..... (يا قلبي) هذي من المستمع وال ق تنقال مثل قوة لول


الله يكون بعون كل العاشقين


اجازة نهاية اسبوع سعيدة

:)

Sweet Revenge يقول...

نهاية اسبوع سعيدة
واجازة ان شاء الله تريحك من العمل والموظفين
عقل مشغول بالتفكير بطلي تفكير وروحي سوي شي بسيط مايحتاج تفكير
لو تعرفين شسوي اقولج بيني وبينج ;)
عن الفضايح مالي خلق اطنازة
ونشوفج علي خير :)

Nikon 8 يقول...

كل ما يطلع منج حلو يا الغالية
:)
إجازة سعيدة
ونهاية أسبوع أسعد
:))

`~MnO YeNSa! ~` يقول...

اسم البوست

يابني ركض

نوى القلب
:P
ناطرين بوستات اللي بالفرن
مو يحترقووووون ..اذبحج :P

yalla have a nice weekend :**

ikhalifa.com يقول...

ايه يا استكانة أنا بعد بشيل أغراضي
بس لا تزعلين لاني بحطهم اهني
ماكو مكان عندي
:P

امممم ماخذه اجازة؟
و أنا قاعد أباركلج على شنو!!

الحمدلله و الشكر
ما أدري شفيني ،الظاهر نايم على ريولي

Yin مدام يقول...

إستكانتنا المجهدة
الله يبعد عنج كل أنواع الإجهاد

بوستج يهبل وتساؤلاتك مشروعة جداً
ومشاكلج أشاركج فيها
ويا شين التشره

ماهي بلادة إحساس بس الواحد إذا معاه إجهاد عقلي يالله يلحق على نفسه وهمومها هالنوب هموم الغير شلون؟
وبعدين في ناس إذا تعودتي منهم على الشكوى ما تقدرين تتفاعلين معاهم خلاص تصيرين مبرمجة للإستماع فقط
!!!

فكرة الديوانية خوش فكرة أنصحج فيها ولا ساحة الصفاة
:PpP

لوووووووووول
كتبي تحذير للمتمللين ومحبي الإختصار وأعداء الرومانسية بعدم الدخول أو تحمل العواقب

:)))))


عساها إجازة سعيدة ومريحة ومنعنشة وناطعة كنطاعة إستكانة شاي بالنعناع

حافظج الرحمن من كل شر يا بنيتنا
خشوفج؟
:PpP

fatto يقول...

انتي لا ممله ولاشي وبوستاتج كلها اتينن نفسج :)



انا هم صايره نفسج بس عكس مواقفج انتي المواقف المحزنه مايتلج البجيه


..
وانه لمن املجت اختي الكل بجى بجي فرح .. الا انا .. وبنت خالتي اتقولي ليش انتي بارده !!!!
بس انا عندي هالشي مايبجي يفرح !!



ويوم العرس نفس الشي الكل اخنقته العبره ابدخلتها وخاصه على اغنيه
هب السعد .. هذي اتأثر حق دخله العروس .. بس هم مايتلي البجيه



لازم اتييلي البجيه ؟؟؟
هل انا طبيعيه ؟؟ ويلا لأ ؟؟؟
هل انا ماعندي مشاعر فرح ؟؟
قمت اخاف من روحي ؟؟



انا احس والله .. بس بالافراح افرح من قلب .. بس
ماتييني البجيه لوشصير .



وانشاءالله تستانسين بالويك اند وبإجازتج .. عشان اتريحين مخج عدل ..

وذا بتريحين مخج لاتفكرين ابوالا شي خليه فاضي :)


وشكرا :)

مـــــي يقول...

بالي كل مرة كيف ممكن ان اتواصل معهم"
أمر الدوانية مثلا"
مرره ضحكني

maha يقول...

لأ


لأ

لأ


لأ

لأ
قبل فترة كتبتها اللاآآت هذه في بوست الشوشو بسبة صور الأكل حزة الغدا

هالمرة لج استكانة لا للاجازة إذا حاسة إنج ثقلتي علينا
ممكن إذا انتي خاطرج فهالراحة شوي


أنا أكتب تدوينات لكن احتفظ فيها في اللاب حقي راح اسوي كت وباست لفقرة خاصة بمدونتج
+++++++++
كنت راح أنسى المدونة اللي كل ماقريتها أحس إني أقرى أفكاري لكن بطريقة تطرب النفس وتؤجج الخيال مدونة الغالية استكانة
بسببها صرت استمتع بشرب الشاي المنعنع

+++++++++
هذا اللي كتبته عن مدونتج
Have anice weekend dear cop of tee with mint

أبو الدســتور يقول...

بوست يشمل جميع الجوانب
:)

اجازة سعيدة

Sn3a يقول...

استكانه اخيتي
انا لما مخي يعورني
اسمع صوت صفاره باذوني
;p


ماتنلامين
لما تشوفين نقطه سوده بقميص ابيض ييديد
بتتأثرين
بتزعلين
لكن لو نفس القميص تكررت فيه النقط
خلاص ماعاد يهمج
صحيح ان المشاعر مو قميص
لكن نقدر نقول انها اللون الابيض مال القميص


ضحكتيني لما قلتي امر الديوانيه
لوووول


انا ماعندي الا رفيجات بعدد اصابع اليد
وحده منهم بنت عمي
والباجي رفيجاتها ملوت الثانويه انا رافجتهم وياها
والحمدلله تلاقينا نطلع جماعي يوم
لكن باجي الايام حسب الظروف


واحنا عمرنا ماراح نتملل من مشاعرج لانها اللي جذبتنا لج
وطول البوستات وقصرها هذا يعتمد على البوست وفكرته واللي يمل من كلامج معناته داش البلوق يوجب وبس

FANDI يقول...

مساج الله بالخير استكانه

خو موشرط الي يتشره يعني لازم يعنيها
اكثر شعب العالم يتشره
بالذات الرياييل والسبب انهم يعبرون عن ولهم بهالطريقه
سر هذا بيني وبينج :P
او انه يتجنبون التشره من الطرف الاخر وتدارك القطعه منهم

U-Turn يقول...

من زمااان أقول يا سلام علييج
حتى لو تقولين جمله عاديه
أحسها غير :]
والله ما أجامل
ما ادري ليش يمكن لاني أعزج :]

ناطريين البوست الرومانسي
أحسه بصير غيير ;p

ولهانه علييج

ARTFUL يقول...

طفي الميتر وراح ترتاحين انشالله

;p


انا الاحساس خف من زمان وخايف يختفي

انتي لو راح من الاحساس ما كتبتي عن الاحساس والمشاعر

!!!

الله يهداج مري!!!

اهي كلمه تنقال من كثر ماهم مشتاقين لج عادي

!!!

بس فكرة الدوانية حلوة

;p

طبعا الشغل مع الرياييل احسن بوايد

الشغل ورا الحريم ما وراه الا المشاكل

;p

صحح والله ليش ما اتيمعون ابيت وحده منكم احسن من الهياتي والتهيي لي انصاف الليول

!!!

;p

ايي كتبي بوست رومانسي وبدخل وبتحلطم

كييفييي

;p

فزّ الخفوق وقلت يالله عسى خير

أثر الليالي عاد غايب قمرها

مع شوفته نشوه و فزّه و تخدير

و عيون خلاّن(ن) تعانق نظرها

يفزّ له قلبي كما فزّة الطير

و الرجل كن اللي تحتها غدرها

يا صبح عمري يا صباح التباشير

نوره ملا قلبي و روحي غمرها

عقب الفراق اللي تعدّى المحاذير

يبّس غصون القلب جافي دهرها

ربّع بـروحي عقب ماهي معاسير

سحابة(ن) هلّت بقلبي مطرها

و اسقَى بها زرعة هوانا بتقدير

غرسة غرام(ن) بالمحبه بذرها

يا عاذلين العين والله مخاسير

و اللي درَى عن حال عيني عذرها

تشوم عيني عن جميع الغنادير

و إن ناظرت عيني فوادي نهرها

يا ناس احبه و المحبه مقادير

هذا هوَى نفسي و هذا قدرها

و الحب ماله يا اهل الحب تفسير

قلبين و الله بالمحبه امرها

لا جيت اصوّر حالة الحب تصوير

و أرد عن حالي لخلّي خبرها

لقيت وجدي فوق كل التعابير

كل الشعر قطره و شوقي بحرها


نشوفج على خير

ونهاية اسبوع سعيده

:)

صبا يقول...

مساء الدلال يا لون الغروب


لي الحين ما ياني هالشعور

ودي ..ودي ,,يا استكانه

اني اسمع من غير ما اتأثر

ومن غير لا أتعب

مصيبه اذا كانت الشكوى من صديقه

صج تكون مؤلمه ..

بقدر الالم الي فيها

هم ودي

بس لي الحين ما وصلت لهالمرحله


وقمر جنها

ما في غيرج
قمررررررررر


انا عكسج تماما

مالي علاقه بالشركه مع احد


يختي احسن من اللويه

مو لاني منطويه

بس افضل اني اكون بعيد عن العلاقات الوظيفيه ولويتها

يكفي الاهل وصديقات الطفوله والعايله

:***

بوستج وااايد حلو

فضفضه

اتصدقين ,,ودي افضفض مثلج

بس ما عرف

:)








اتمنالج اجازه جميله
حلوه تتمتعين فيها
سلامي للماما

:***

مي يقول...

سلامة قلبج ..
في حالة الاجهاد العقلي انا اطلع ع البحر .. واقعد ع الرمل..
اتأمل الموج..
البحر يحس بأعماقك..
***
اما من ينتقيك ليعطيك تفاصيل مشاكل تفتت القلب //
اليوم شكيت لصديقتي :: ليش الناس تختارني عشان تعطيني تفاصيل مشاكل تطير النوم من عيني >> قالت عشان ويهج مريح ... شنو ويهي فراش ..!!
وأنا أقول بعد يا استكانة أكيد انتي من الناس اللي ويههم مريح ..!!
***
سؤال الشباب عنك والتشره ..
كلامهم هذا من باب الاعتياد
تعودوا يقولون العبارة هذي لربوعهم الرياييل ، والرجال ما يفرقون في كلماتهم في خطاب الذكر عن الانثى..!!
***
أربع اتصالات ..
استكانة ، انا حطيت لي خط تليفون ثاني عشان اريح عقلي من المجاملات ومثل ما قلتي كل وحدة تبيني بروحها..!!
وانا ابيني بروحي ..!!
***
بانتظار البوست الطويل عن الشمس والقمر والدريشة والسحر..
***
أختج / مي

Q80 Blogger يقول...

أول شي التعامل بشكل عام مع الشباب افضل مليون مره مع البنات

والدليل .. تعليقاتنا اهني خفيفه لطيفه .. مو كل بنت كاتبه بوووووست تعليق !!
:P

وحمدي ربج ماكو دواوين حريم .. لأنها لو تصير راح تشتاقين لجوكليت بار والكافيهات .. خصوصا اذا صادف 3 دواوين بنفس اليوم

يعني راد من السفر ودي اشوف الديره .. لأ ما اقدر .. من دوانيه لي الثانيه
مشكله !

:: بـوح الصمـت :: يقول...

HapPy WeeK eNd :)
:**

~ هند ~ يقول...

إجازه سعيده ومريييييييييحه :)

~ هند ~ يقول...

لكل المدونين ..
من هناااااا

http://www.hadeelprize.org/


:)

New Bride يقول...

اصعب شي لما الواحد مخه يعوره :)

بس لا تحتين ريحي و استانسي بجازتج

esTeKaNa يقول...

بس
~~~~~~
يا مسا الخير يا وجة الخير
:)
عسى ربي يحفظج ويسعد كل ايامج
اييييه يا زينها من كلمات
شوفي بس النيه يا زينها من نيه
:)









mellow
~~~~~~~~~~
يا مسا الثوب الزري اللي يلق بموق
:)
ايييه سمعتج
حسج يا زينه واصل لي عندي
:Pp~
تهقين تعبنا من الإسراف العاطفي؟
تصدقين تفسير منطقي
شكرا لانج حسستيني اني انسانه طبيعيه
وزين تسوين
خلج ويا نفسج حبيها ودلليها ماحد يبق لج يا صديقتي الا نفسج
عسى ربي يحفظج ويسعدج قولي امين
:)








ANGEL HEART
~~~~~~~~~~~~~~
حلت دنياج قولي آمين
:)
الله يا أنا عافسه الدنيا
اشوة فطنتيني
امشي واصلح حق الناس
نضلت عمري
:pP~







ARTFUL
~~~~~~~~
سامحنا على القصور
:)

esTeKaNa يقول...

chandal/danchal!!
~~~~~~~~~~~~~~~~~~~~
ياااااربي هالمرة كله طايحة علي
شدراج عن مشروعي؟
انا قلت بسويه بسكات بعد الحين كل من يسوي شغله بسكات واقضو حوائجكم بالكتمان
بس لأنج خالتي وانا جنه محترمة
مرة ثانيه بعد مابي اخش عليج شي
looooool


بالنسبه لنصيحتج الذهبيه الأولى:
وممكن مع الشهيق والزفير راح تشنتحين خنيفراتك يا قبلة الله... وممكن يؤدي الى اسكات الطرف المتحدث

تصدقين وانا اقرا بالإيحاء جان تتشنتح خنيفيراتي
loooooooooooooooooooooooool
واي انتي لازم تديرين بالج على كل نصيحة تقولينها ،انا اللي اعزهم اسمع كلامهم ،بس هذا ما يعني اني اقعد اشنتح فيهم وتتشوه ملامحي وأنا آنسه وراي مستقبل
:Pp~

وشكرا يا صديقتي حسستيني اني طبيعيه مو بليده مشاعر
وانا بدور لي احد اليوم يحك ظهري
جود الله ورحمته
:))

يختي هالمرة نسمه هوا بارده على القلب
لا خلا ولا عدم
:*

esTeKaNa يقول...

Sweet Revenge
~~~~~~~~~~~~~~~
شكرا شكرا يا صديقتي
عاد تدرين انا احب نصايحج
SO
بكون بالانتظار
:)
وبعدين قولي اللي خاطرج فيه
انتي تحت حمايتي محد يقدر يقولج شي
:pP~









nikon 8
~~~~~~~~~~
حلت دنياج قولي آمين









MnO YeNSa! ~`
~~~~~~~~~~~~~~~~~
يا حبكم حق سوالف نوى القلب
:Pp~
افا عليج تامرين امر
بس هالمرة كيكتي طولت
نطرو شوي مادري اشفيه مو راضيه تضبط وياي
:pP~







ikhalifa.com
~~~~~~~~~~~~~~~
بلوقك ومكانك
:)
مادري اشفيك قمت تنسى
يمكن محسود
:Pp~

esTeKaNa يقول...

Yin مدام
ّ~~~~~~~~~~~
ياهلا وأمية هلا بالغاليه
ممممممم
تهقين افتح دوانية؟
تصدقين خاطري من زمان
وبيني وبينج انا محتله الدوانيه حاليا
بين فتره وفتره في عندي يمعه
بس البنات فيهم هياته
صايرين ما يحبون البيوت
:pP~
تفسيرج لبلاده احساسي جدا منطقي
ووايد اقنعني
فشكرا شكرا لج
الله لا يحرمني منج ويسعدج ويحفظج يا الغالية








fatto
~~~~~~~
ياهلا ويا مرحبا
يا بعد قلبي انتي شكرا شكرا
:)
الف مبروك زواج اختج عسى الله يوفقها ويسعدها يارب
عاد تصدقين انا عكسج
صايره هالمواقف تبجيني
!!
بس بالعكس انتي وضعج طبيعي وجميل
فرحتج اكبر من كل الدموع
عسى ربي يفرح قلبج دوم
:))








مـــــي
~~~~~~~~~~
عسى دوم الضحكة يارب
:)

esTeKaNa يقول...

Maha
~~~~~~
كنت اشتكي من بلاده مشاعري
والغريب
يوم قريت تعليقك وكلماتك دمعت عيني
تصدقين
!!
يا حبيبة قلب استكانة انتي
اجازتي بتكون من الدوام هالاسبوع
وتالي يمكن لظرف خاص تكون من البلوق
وبكل الأحوال القلوب يا صديقتي عند بعضها
:))
الله لا يحرمني من طيب وجودك
وطيبه روحك يارب
:*

esTeKaNa يقول...

أبو الدســتور
~~~~~~~~~~~~~~~~~
شكرا
:)








sn3a
~~~~~~
يا مسا السنع كله
:)
تصدقين انا بعد احس في سباق رالي في مخي
فكرة تشفط
وفكره داشه فوق تحت
والثالثه راكبه الرصيف
لويه لويه
:Pp~
انا تعجبني شخصيتج العاقله
تحفظج في الصديقات
وذكائج في تفسير مشاعري
:)
من قلبي:
الله لا يخليني من مرورج السنع دايم









FANDI
~~~~~~~~~
مساك الله بالنور والسرور
:)
اي والله احنا شعب يحب يتشره
ومو كل كلمه نقولها نعنيها
:pP~
خوش سر
ترا انا احب الاسرار
كل ما تميت قولي سر استفيد منه حق مستقبلي يا اخي العزيز
:)













u-tairn
~~~~~~~~~~
يا بعد قلبي قلبج انتي
هذا من طيبج ورقي روحج واحساسج
مشكورة ما قصرتي
:)









ARTFUL
~~~~~~~~~~~
تم إغلاق الميتر
:Pp~
وما تتخيل شكثر انا استمتعت بردك
وبالشعر
عجييييييييييييييب
شكرا شكرا
:)

esTeKaNa يقول...

صبا
~~~~~
هلا بصبا الجمال والذوق
:)
انتي انسانه طبيعيه
وشي طبيعي تتأثرين
!!
انا كل ما زاد قرب الانسانه مني كل ما تعبت اكثر،بس مادري ليش صايره جذي يمكن من كثر ما اسمع تصدقين
:pP~
فضفضي يا صبا
فتحي نوافذ قلبج
وقولي كل شي بخاطرج
هذا احسن طريقه تسولفين فيها مع قلبج وترتبين لويه تفكيرج واحساسج
:)

شكرا يا الغاليه
وسلامج لماما واصل
:*

esTeKaNa يقول...

مي
~~~~
مرحبا بمي الغاليه
:)
تهقين صرنا مخاد مريحة كل من يشكي لنا؟
:Pp~
تصدقين البارحة تسولف لي بنت عن فلسفه الاستماع لموج البحر كيف ان ذهاب الموج وإيابه ياخذ الهموم وياه
عجبتني الفكرة
ومع تعليقج تشجعت اكثر
يبيلي بحر
:))
الله يحفظج ويريح قلبج







Q80 Blogger
~~~~~~~~~~~~~
ياهلا ويا مرحبا
حمدلله على السلامة نورت الديرة
:)
وصج انا فاتحة البلوق لك تغني قمر جنها
بس ما ارضى تتحرش بصديقاتي
كل واحده تكتب بوست وتبجي وتضحك وياي حلالها
:pP~
وممممممممم
يعني جنك مو مشجعني افتح دوانية
:)









بوح الصمت
~~~~~~~~~~~~
شكرا
:)








هند
~~~~~
شكرا
:)









New Bride
~~~~~~~~~~~~
إي والله اصعب شي
:(
بس كاني مسترخيه وان شاء الله الامور تتعدل
شكرا
:)

Manal يقول...

يا سلام على هالبوست

والي قبلة
والي قبلة

هههه

يا حلوج

اذا بتسوين ديوانية يكون احسن

وغيرنا مسويها
:)

انا احب اجمع صديقاتي مع بعض
اللمة حلوة

:)

وعلي لوية اللسان بالكلام
:)
ضحكتيني على خشوفج

:)

اتمنى لك عطلة جميلة
رومانسية
هادئة

:)

المقوع الشرقي يقول...

هلا بالجاى وأهلة
لووووووول
على أمركم الدوانية
بوستاتج أتخلى الواحد يندمج
أفكارج ماشاللة متسلسلة
فتشدين القارئ
++
والله يا استكانة على زحمة الشوارع والمولز
وانا مع كراف الطبخ
صارت الطلعات كلا بيوت
نتجمع
أريح وأخف
++
زين سويتى عن الاجازة الواحد محتاج صدة وتجديد
وأمانة دلعى استكانة تستاهل
أجازة ممتعة
وبالانتظار

esTeKaNa يقول...

MaNal
~~~~~~~
هلا بالغاليه هلا
فاقدتج من غير شر
اسم الله علي هاليومين نازل علي وحي التدوين
فلحقو لا تلحقون
lol
:)
شكرا يا بعد قلبي استكانة انتي
انا بعد اتمنى لج عطله لذيذه
:Pp~










المقوع الشرقي
~~~~~~~~~~~~~~~
حيالله المقوع وأهله
:)
يا بعد قلبي قلبج
يعطيج العافيه يارب
يا زينهم ربات البيوت يالله من فضلك
اصلا الطلعه بالويك اند ما تنبغى
شوفيني انا مجابله البلوق وقاعده مسويه سياحة داخليه
:pP~
افا عليج لا توصيني على استكانة
بدللها بدللها
:)
تدرين تعليقج ونسني؟
لا خلا ولا عدم يا المقوع الشرقي
عسى ربي يحفظج ويسعدج دوم

جنون إحساس يقول...

إجازة سعيدة استكانة
:)