الثلاثاء، أبريل 21، 2009

...قمر جنها

شنو الحل اذا علقت أغنيه في بالك؟
الحل تتربع في بلوقك وتغنيها من الصبح
~~~~~~~~~~~~~~~~~~~
و
قمر جنها...يا محلا ذيك البنية
سألت عنها...قالو لي خليجية
يا وردة ومعنى الحب بسماتك
أنا أتحدى إذا في الدنيا مثلاتك
رعاك الله يا بنية
يا سمرة يا خليجية
زري والثوب وفصوصه تلق بالموق
زري والثوب يا شمعة في ليلة شوق
يا بنت الفريج أنتي
يا ريم الخليح أنتي
رعاك الله يا بنيه ...يا سمرة يا خليجية
يا بنت الفريج أنتي يا ريم الخليج أنتي
رعاك الله يا بنية يا سمرة يا خليجية
زري منثور على ثوبك يا حورية
وأشم عطور كل ما أقرب شوية
يا بنت الفريج انتي..يا ريم الخليج انتي
رعاك الله يا بنية ...يا سمرة يا خليجية
.......................................
يا بساطة ذاك الحب
ويا زين عيونه
يتحلى على زري
!!
واشلون اشلون تلق ذيج الفصوص بموق
يا سلام عليك
يوم ياز له ذاك الزري راح سئل عنها يالله من فضلك
شوفو السنع بس
رايح سائل من وراها يوم يازت له
حسيته طينة ينه، لابس جريمبه،كاشخ كشخة كويتي بالسبعينات
ياربي
هذيله الناس السنعين وين راحو ليش انقرضوا؟
:(
....
في زمن كانت كل الكلمات تحمل ريحة الكويت
الفريج...البساطة...الحب النقي
وكلمات رغم بساطتها الا انها تدخل القلب
....
وجان يبي يعرف..جان يبي يعرف عن الشوق اللي فينا
يسئل عيونه..يسئل عيونه اذا التفت علينا
والغدير اللي اللي بعيونه...من زلاله ما روينا
.......
تورية الحب والشوق
جانه يبي يعرف عن الشوق اللي فينا لا ينطر حجي مصفصف
ولا مشاعر مستهلكه وكلام معيود
ولا يراعه وابتذال بمشاعر لا لا لا
انزين اشلون يعرف واعليه؟
يسئل عيونه
:)
.......
وما أغبي وأقول أهواج ما غبي
.
.
في أحد يقول كلمه أغبي؟
تحس من كلمه يغبي واحد خاش شي بقلبه صج
بس قرر لما غنى انا رديت لعيونج انا رديت
ان يبط الجربه وما يغبي ويقولها اهواج
بعد الغيبه والتغبي ويقولها اهواج
تهقون طعمها نفس طعم الحب الحين؟
.
.
كلمات طعمها الرهش، والدرابيل
تشم فيها ريحة البحر وتشوف الكويت
ليش كل الكلمات اعتفست؟
ليش صارت الأغاني لابوك لابو الحب
ليش :(
.............................
وعلى طاري الكلمات والأغاني،رغم كل التطور التقني الحالي ما زلت أحب الراديو
أحب عنصر المفاجأه وأحب يكون معاي حس يسولف معاي بالطريج
توقيت خروجي في عملي السابق كان يتزامن مع برنامج عايشة اليحي وعالم الأسره
من اركب السياره:
ليش يا بنيتي ما تسنعين اغراضج وراج دنيا وبلا بلا
ويا بنات الناس هذا ريلج حوفيه ،جابليه،بس انتي طلعتي من بيت امج
!!
وكلام من هذا النوع طول الطريج
عايشه لها نفس كويتي عجيب،واحسها تهوس على كلمه تقولها ،فتحسسني كل حرف اين تقع مخارج حروفه
مذيعه ناجحة ما عليها خلاف،إلا اني قمت ماسمعها لاني احس اني مركزه طول الطريج وهي تزفني
:Pp~
مع عملي الجديد انا اطلع في وقت مبكر جدا،وارجع ايضا في وقت الذروة
صباحا:
اذاعه القرآن الكريم تابعه للكويت مافيها اي جديد وتباشير الصباح معلوماته مكرره وما زالو في نفس الإطار
اذاعه القرآن الكريم في السعودية اذاعه ثريه كلها معلومات بس الصبح برنامجهم كله عصافير تصوصو ماحب اسمعه
.......
نرجع حق الإذاعات الثانيه:
مرينا:
مذيعين الصباح نوف وعبدالرضا احس كل منهم بوادي ،البدليات كثيره ومافي تفاعل صحيح
كويت أف أم:
احس من شروط القبول في هذه الإذاعه ان تكون شخص مليق جدا
ياربي بحياتي ما شفت مذيعين بسؤ مذيعين كويت اف ام
:(
ظهرا:
استغرب من المتصلين على الإذاعه وخاصه البنات
تسولف وتكركر مع المذيع وتتدلع جنها قايمة قاعده وياه
ترا عييييييييييييييييييييييييييب
!!
والشباب:
مافي انتقائيه في اختيار الكلمات في أحيان كثيرة،انت يا اخي داق على الراديو،مو داق على رفيجك
وأنا قاعده اسمعك
:(
أما بالنسيه للصوت:
فكثيرين منهم يفتقرون للصوت المناسب للإذاعه،ومخارج الحروف غير صحيحة
وبدليات كثيرة،وجمل غير متراكبه
وامام هذا الحال المزري انا اصبحت مستمعه جيدا لقناه شعبيه
94.4
ومحطة الغناء الكويتي القديم
أحس احيانا اني لابسه ثوب تور،اني قاعده اتمشى بيوم البحار
اني نورا ناطرة مساعد بس يا بحر
بس بكل الأحوال انا بعالم جميل كافي اني اوصل دوامي وأنا قلبي يغني:
يا وردتي يا ندية...روحي لخلي هديه
والورد راسم ودادي ..راسم ودادي
ويا شوق لو مر صوبي..لا سوي من ظله ثوبي
.
.
.
بالنهايه:
أنا اعتقد ان بقلبي كلام بقوله،وصوتي واضح نوعا معا ومخارج حروفي تدل مكانها
so
انا بخاطري اصير مذيعه في برنامج صباحي
ما اعتقد الموضوع يحتاج إعداد،حالي حال منى طالب وغناوي الشوق
ما يبقى سالفه ما تقولها ،ما يبقى درس ديني،ومرات أحاديث
بعدين تحط أغنيه مالها شغل
:pP~
عموما راح استقبل اتصالاتكم
اي واحده تتدلع من الصبح وغصب فيها لدغه راح اقطع معاها الاتصال
وأي شاب يقهقه بالراديو بصوت عالي ولا ينتقي الفاظة،.ايضا راح نقطع الاتصال
:)
........
صباح الرهش
ومسا الدرابيل
:Pp~

هناك 67 تعليقًا:

SHAHAD يقول...

ما ودج تصيرين مذيعة في إذاعتنا المدرسية ؟ ترى نعجبج : )

وصبااحج شهد : )

أستاذ حمام يقول...

"يا وردتي يا ندية...روحي لخلي هديه
والورد راسم ودادي ..راسم ودادي"

روعة.. ذكرتينا فيها..

بالمناسبة هذا اللي قاعد يصير بالاذاعة، بكل وسائل الاعلام اللي هبت بالاخير.. هو بسبب عدم الاحترافية في تأدية الرسالة الاعلامية.. ولا نحمل القنوات التجارية، او الاذاعات المستحدثة.. لازم نحمل وزارة الاعلام هذا الاسفاف في استخدام مجال بثها.. ان عرض اناس ليسوا على قدر من الكفاءة، بوجهة نظري مضر كما لو تم مادة سيئة.. لان ايماءاتهم الفاشلة.. هي بذاتها رسالة فاشلة..

وزارة الاعلام لازم تشرف على التعيين وتشترط حصول المذيعين على شهادة، ويا حبذا لو تكون هناك اختبارات حتى يقبل المذيع او المقدم الفلاني في اي اذاعة.. خاصة او عامة..

اسعدتي صباحا

Broke يقول...

أبيج تسمعين مذيعة

103.7

اللي يحطونها بعد الساعة 7 مساءً

شيء لا يوصف .. خليط من حليمة بولند و أمل العوضي

أول مرة تمر علي مذيعة مزعجة جذي

::

بس اذا صج تبين شي مفيد و يونس عليج بالبرنامج الثاني

97.5

عندهم برامج سنعة على كل حزة و مذيعينهم ما عليهم كلام

::

آنا هالأيام هابة بـ د.عفاف الرومي ..أسمعها كل يوم الصبح ..صحتك و طفله .. مع إن ما عندنا يهال ..بس والله أحسها قاعد تهيئني للمستقبل

:P

::

أما المحطة الشعبية .. هبة أبوي اليديدة ... تخلي الواحد يستنزل على كل حزة مع طيرانهم ... صج يونسون

Sweet Revenge يقول...

يا صباح المزاج الرايق
اشاركج حب الرادو واحب برنامج ولو ان قديم بس له نكه خاصة عندي
"اخبار جهينة" احب موسيقي المقدمة
احب صوت احمد سالم
وقبل كانت ناعسة الجندي"شوفي الاسامي
بس روعة
اما عايشة اليحي ياربي عليها عسل الله يحفظها تينن اموت علي اسلوبها
بس شكو تزفج انت شمسوي ولا علي وزن الي علي راسة بطحة ;)

الصبح انا مع محطة القران وتباشير الصباح مو كله مكرر والله عندهم شغلات حلوه وسوالفهم مع بعض حلوه

واهديج بهذة المناسبة اغنية ياناسينا;)

ARTFUL يقول...

صباح الخييييييييييير

تصدقين لما اشوف مذيعين امريكا بالتلفزيون اقول ودي اصير مذيع احس وناسه

شغلتك تقرق على الناس

;D

ايي والله صيري مذيعه بدال العلل اللي قاعد نسمعهم

انا أأيدج بموضوع الكويت اف أم
اييبوون اليهد

أكثر شي يغثني
لما يحطون برنامج يكون اسمه

همس المشاعر

والا

عديل الروح

اسمع اللي يدقون سمعي البنات سمعي الرياييل موووووت

طبعا صوت المذيع لازم يكون هادي جدددددددااا

ومسا الاحساس
ومسا الطيبة

وييييييييييييييييييع

;D

أحلى قناة
87.9
و
94.4

تسمع فنن

تسمع كلمات

تسمع الحان

اهنيج على ذوقج

عندي واحد من ربعي يتابع برامج اذاعة الكويت
يشوقني بس للاسف ما يصادف اكون بالسيارة

يمكن المذيعين الله بالخير بس الظاهر المواضيع حلوه

الليلة الساعه 10
في برنامج عن فن الصوت على قناة
87.9

لا تخللييين

;D

يسلم البوست اللي يرسم البسمة

;D

الزين يقول...

صباح الصداقة الناطعة

والبوستات الأنطع

ليش حسيت مع بوستج ان اليوم يداية الويك اند

@@


بعرفش بس هذا احساسي

وبالفعل اذاعاتنا اييبون اليهد

والأغاني المختارة شي يوتر الأعصاب ويلوث النفوس الصافية

مايدور عندهم شي اسمه فيروز على الصبح
كله من نمونة الجعجعة على الفاضي





وعلى طاري حب اول وحب الحين

حب اول فيه خصوصية اكثر يختج يحبون بعض ويخلصون ويتزوجون وما تدرين ان اصلا اساس زواجهم هو قصة الحب اللي ودرتهم


الحب الحين فيه فهاره ويشترطون فيه الجهر مثل الزواج

@@

يعني انقلبت الآية




وتبين شنو باط جبدي على الأخير

جماعة الديوانية ومارينا اف ام

سخافة ما بعدها سخافة
وتربط عصاعص بين الحريم والرياييل

واللي يدقون ويشاركون العن




وجني قلبت التعليق تحلطم وطلعت من مود يا وردتي يا ندية

:)

سويتي استخارة على ماكي لو بعد

:)))))))))))



على الهامش مدري من وين يبت كلمة جعجعة الله يستر من ديللي وطنازتها


صباحج طرواه

:**

curlz يقول...

9aba7eech 3asal

Wala il3atheeem enech 5afefat 6eenaa ;) fashaltiini gbal elawadim ili bil maktab wana ateboosam broo7ee chene habla ;)

chandal/danchal!! يقول...

LOOOOOOOOOOOOOOOOOOOOOL

صباح التحلطم والتقرطم من اعلاميتنا اللي ناطرينها

:p


شكلج رايحة عرس البارحة

:p

تبين تنطربين؟؟؟؟ طرب اصلي!!!... عليج بجوني روكيتس الصالحية... في فلبينية اشك بفلبينيتها!!!... غنتلنا البارحة من ابو قذيله الين انا فلبينية انا قول وفعل وعزومي قوية!!!

لووووووووووووووووووووووول

والله غشينا من الضحك عليها... وتقولي حياكم الله كل يوم تعالوا لووووووووووووول
.
.
.

لتصحيح خطأ مطبعي المذيعة اسمها عايشة اليحيى مو الابراهيم

الله يرحمها عايشة لبراهيم سكرتيرة عتاوية الفريج... ترجية ويا ترجية صاروا تراجي شعبية... سكرتيرة نظاميه

لوووووووووووووووووووووول... ذكرتيني فيها يا سوسو
:(

عندها دور بمسرحية قديمة تمثل دور صبيك

تقول حق حسين عبدالرضا: اقووووول صبي... عطني حبة لووووووووووووووووووووووووووووووول

تعرفين شنو اتشقق عليها... كثر ما اتشقق على بوستاتك الصباحية

:))))
.
.
.

يختج اوجه التشابه بينا مو طبيعية!!

استوقف دم ال اف ام... واذاعة القرآن الكويتية!!

ومن عشاق اذاعة السعودية

يوم شريم ويوم سديس... يا زينهم ويا زين ائمتهم... ما تقطين واحد منهم... ان ييتي حق با جابر والا الثبيتي والا الخياط والا محمد ايوب و و و و ...... الله يباركلهم ويزيدهم من فضله...

عندهم شيخ يديد اسمه عبدالله الجهني... ماشاءالله عليه... اوتي مزمارا من مزامير داوود عليه السلام

ويالله ارزقني وارزق غيري!
.
.
.

وبالنهاية حابة اهدي اغنيتي لكل مدونينا الكرام... بس عفية لا ترقعينه بويهي!

:p

المزاج ياي على رويشد وبو بكر

ويا ناسين الحبايب ليه القسوة... يا ناس ما تذكرون ايامنا الحلوة... وبين القلوب السلية اللي بها (مادري شنو)... ردوا على خلي محروم اللقى محروم

يا ريت تلعلع بوه بصوتك العذب

:p

Barrak يقول...

يقولون ترى مو انا اللي قايل اللي يسمع الراديو وايد بدا يشيّب


استكانه

انتي غلطانه

قمر جنها ماقالوها جذيه

لانه الكورال كانوا يقولون

قمر شنها

رجاءا خلك واضحه


ههههههههههههه

mellow يقول...

زري والثوب وفصوصه تلق بالموق

خوش نفنوف
عندي اليوم استقبال ممكن أستلفه
:)

الإذاعة ما تصدقين لا قلت لج نادر نادر يمكن مرتين في السنة إلي أفتح فيها الراديو
أحب الصخة لا صرت بروحي

أو أسبح و أستغفر طول الطريج
و إذا أبي أتسلى
أغني حق نفسي
:))

بيني و بيييييييينه
شبك
و رمش عيييييييينه
شبك
و إن كان لجرحي دوا يبئى حبيب رووووحي

إشرايج؟
:))

دروازة يقول...

أخيتي الأصيلة

استكانه

أقرا كلماتج بعدين فجأة يرجع فيني الزمن ورا

لما كنت اروح المدرسة مع أبوي

كنت أنا اللي اسخن السيارة

وعلى ما الوالد اييني كنت اسمع القرآن بصوت الشيخ عبدالباسط عبالدالصمد

تالي الوالد موقت مع الاذاعة ..أول ما يركب السيارة ... يطلع لنا النشيد الوطني

تالي تتحفنا أم كلثوم بأغنية" يا صباح الخير ياللي معانا"

وصوت المذيع علي حسن وهو يتحفنا بالمعلومات من الصبح


آه... ياحلوها من أيام

مافيها شي عسر

كل من ماشي بدربه... صح
...

ما عليه فصلة ربطت موضوعج هذا في بوستج السابق

...

جأتي على موضوع وايد ينرفزني

ضياع المفردة الكويتية الأصيلة من حياتنا

في كل أوجهها

ومن بينها الأغاني ..

مع كل احترامي لكل الاجتهادات الموجودة حاليا على الساحة الغنائية الكويتية

ماكو احد هامه موضوع اصالة الأغنية الكويتية من حيث اللحن والكلمة

الموضوع اصبح تجاري بحت

وهذا بسبب واضح .. شركات الانتاج الرئيسية ماهي كويتية

وهذا الشركات ماشية على مبدأ

اللي تغلب به العب به

الطامة الكبرى أن هذه الاغاني تعتبر موروثنا الثقافي للاجيال القادمة

فياحلاة هذا الموروث اللي تقول فيه مرام عساك بهالحال و أردى ... او فيصل راشد اللي يقول والله لا أوريكم فيه!!
والفنانة الكويتية شمس... العن ابو الحب لا بو جده!!


الله يرحم ذيج الأيام اللي كانوا يتغنون في:

يا بوفهد مني غدا الشوق ويلاه يابوفهد

والشوق لا منه غدا من يجيبه يا بوفهد



آه ياذاك الزمان النقي

راحت أيامك

لهذا الزمن

وبلاوي هذا الزمن

أهديك هذه الاغنية

أقضي الليل في حسبه و هقاوي
كل ساعه تروح و تجيني هقوه
ألا يا روحي روحي ماني قاوي
و أطلع كاذب إن قلت أقوى

ألا يا سراج طول الليل ضاوي
و عقب هاليوم ما ظنيته يضوى
تجيني و تشتكي عندي شكاوي
تستكثر علي اليوم شكوى

أنا اللي لي انجرح غيري أداويه
و حق نفسي أنا ما عندي إدوى
مشيت بدربهم ياما خطاوي
و هم ما مشوا في دربي خطوه


شكرا شكرا شكرا

اختي الكريمة

ما زلتي تهيجين الشجون

وبوست رائع بمعنى الكلمة :)

`~MnO YeNSa! ~` يقول...

بسرعة قبل لا اكمل فيــــه انقرضو
بدون الا
الالف مالت واو الجماعة

انقرضوا


استكانة ما تغلط بالاملاء عدليها و لا تنزلين تعليقي

:**

esTeKaNa يقول...

صباح الخير
شكرا لكل المتصلين على البرنامج
ما شاء الله في ضغط على الخطوط
بس راح نحاول نستقبل الجميع
والقضايا اللي جدامي نخليها تستريح
انتو اهم
:pP~


SHAHAD
~~~~~~~~~~
يا صباح العسل كله
:)
انا استنفذت مرحله اذاعه المدرسه ماقصرت بيضت الويه فيها
فلحين اطمح للعالمية
LOL

esTeKaNa يقول...

أستاذ حمام
~~~~~~~~~~~~
صباح الورده الندية
:)
قريت اسمك قلت الحين استاذ حمام بيقولي ليش تسولفين يا استكانة
كتبي مقال ذكي احسن
PP~
اوافقك الراي يا استاذي جملة وتفصيلا
وبانتظارك تكتب لنا مقال في عدم الاحترافيه في تأدية الرساله الإعلامية وأثارها
:)

اسعدت الله صباحك وممساك

حسام بن ضرار يقول...

على طاري : علقت اغنية في بالك

بثالثه ثانوي شكلت اغنية باباي كان ينعرض بتلفزيون الكويت على مخي

اسمه : البؤساء

اذكر دخلت امتحان من الامتحانات و كلما ابي اجاوب سوأل، انسى الاجابه و تطري على بالي الاغنية تسوي
over-write
على الذاكره

كرهت عمري يومها و حرمت اسمعها مره ثانيه

---------

انصحج تسمعين مونتوكارلو على الاف أم

حدها ونيسه

:)

esTeKaNa يقول...

Broke
~~~~~~~
إتصال آخر مع سيدة الذوق والرقي:
.
.
.
ليش وانتي صديقتي تتنقصين لي انسانه مزعجه؟
لا يكون اللي اسمها حبيبه؟
وفي واحده ثانيه مقدمة البرنامج ذاك اليوم وهي فيها كحة أزمتني
:(
عفاف الرومي؟
والله واااايد يمدحونها
خبرج انا اشتغل مع امهات
فصرت خبرة بهالسوالف
:Pp~
وطيران ذيج المحطة شي غير نمونه
مرات اقول فشله على هالسمته احد يدري انا شنو قاعده اسمع
:)
.
.
اي سؤال طبي لأطفالي مستقبلا راح يحال لج
:PP~

esTeKaNa يقول...

Sweet Revenge
~~~~~~~~~~~~~~~~~
ياهلا وامية هلا
اتصال آخر:
يا صاحبة الذوق الرفيع
انا بعد احب اخبار جهينه
بس تدرين شنو مشكلتي ويا جهينه؟
ويهي طول الطريج مبتهر
مادري ليش
lol
انا مشكلتي اذا سمعت شي ويهي كله يتعبر فجهينه عسى عمرها طويل ما زال برنامج يحوز على انصاتي
:)
وعايشه حرام انا احبها
مرات اتبوسم بروحي ودي ادق واسولف وياها
:pP~
وبهالمناسبه اهديج:
ما ينساك ابد قلبي
وهو يا حبيبي بيتك
ترا من حب احد مثلك
على فرقاه ما يقدر
:))

esTeKaNa يقول...

ARTFUL
~~~~~~~~
صباح الورد
يا هلا بالمستمع الدائم ارتفل:

:)
ممممم انا فهمتك فهمتك
انت بخاطرك تشاركني تقديم البرنامج؟
مو مشكله انت بس حط سيرتك الذاتيه عند المخرج ونشوف ان شاء الله
:pp~
اما بالنسبه للبرنامج
فهذا برنامج:
فحيح الحيايا
:pP~
لازم يساسرونا وصوت هادي
ولا كيف بتكون المشاعر
:)

حيااااك الله

nanonano يقول...

مساء المانجـــــــــــا

توها طايحه بالسوق

أذا علقت الأغنيه بمخّج غنيها بصوت علي

عشان اللي يمّج يبتلش معاج

ما أغبّي و أقول أهواج

أتينّنّنّنّنّ

عجيبه

عموما الأغاني اللي حاطتهم كلها

أول كلمه تطري على بالي أهيه


أيّــــــــــــــــــام

أما بخصوص أنتقاداتج حق محطات ال أف أم

أتفق معاج عليهم كلهم

esTeKaNa يقول...

الزين
~~~~~~~
إتصال آخر:
الوووو
يا مسا الزين كله
ياربي هالبنت رقتها تحسسني اني رياله
بس بكل الرقه اللي انتي فيها
اشياب طاري جعجعه؟
ممممم انا قلت راجعي صداقاتج وصحبتج
الصاحب ساحب
:pp~
.
.
يا بعد قلبي شخباري فيروز؟
اصلا ما يصير تسمعين فيروز تغني عن الشجر والعصافير والجبل وانتي ماسكه الخط وزحمه
عشان جذي ما قامو يحطونها
:pP~
ومرينا ..الدوانية اول كانت تونس
الحين شي يلوع الجبد
!!
قبل يومين واحده داقه بكل دلع الدنيا:
وين خالد
يا بعد راسي
@@
طلعت عيني صج ما تستحي
.
.
.
عموما
قبل نهايه هذا الاتصال اهديج فيروز:
وشايف البحر شو كبير

والإهداء موصول لصديقتنا الحاضره الغائبه ددللي
:Pp~

esTeKaNa يقول...

curlz
~~~~~~~
يا صباح الابتسامات الخفية
:)
الله يا أنا تشققت وانا اقرا تعليقج
واي صايره احب معسول الكلام
قلتي خفيفه طينه
تشرقدت بكرسيي من الوناسه
:PP~
يا عسى الابتسامه ما تفارقج قولي امين

ARTFUL يقول...

جندلة
-------

عقب شتقول الله يرحمه

نااااااااااطعه

;D


في قصيدة حق فهد بورسلي تضحكني لما اسمع اغنيتها

يقولون اول شي

طاق طاق طقطرباق طقطرباق على الباب
طاق طاق طقطرباق طقطرباق وين نولي يا مولاي

شايبنا يمش ويطيح نوبة يصوت نوبة يصيح
شازيج من هذا التصريح
صوت ولا له حماي

طاق طاق طقطرباق طقطرباق على الباب
طاق طاق طقطرباق طقطرباق وين نولي يا مولاي

وعجيزنا مثل البطه تشيل القوطي وتحطه
بذمه من دبر هالخطه
خلا العالم رايح جاي

طاق طاق طقطرباق طقطرباق على الباب
طاق طاق طقطرباق طقطرباق وين نولي يا مولاي


وهذي قصيدة ثانية لفهد بورسلي الله يرحمه
غنوها معانيها حلوه وغزل أحلا

سلّموا لي على اللي سمّ حالي فـراقه،،
حسبي الله على اللي حال بيني وبينـه

قايد الريـم تاخذنـي عليـه الشفـاقه،،
ليتني دب دهري حايستـةٍ في يمينـه

آه واقلبـي اللي راح منـي سـراقه،،
تلّ عرج المودّه وانقطـع في يدينـه

بالهوى طاح ما بالراس عقب الحماقه،،
أتشهَّد وسمّـي لي خزرنـي بعينـه

والردايف تشيل الثوب عن حجل ساقه،،
مثل برقٍ تكاشف لي كشف عن جبينه

زاميات نهوده يـوم زرَّر اشبـاقه،،
مثل خـوخٍ مخـدّد توهـم قاطفينـه

لا ذكرت الليالي اللي مضت والصداقه،،
عوّد القلب يرجف مثل رجف المكينه

عقب ما هو نديمي صار شوفه شفاقه،،
الله اقوى على اللي عشر واربع سنينه

اشتهى عشـرتي وانا عشقته عشـاقه،،
في زمانٍ مضى واليوم وينـي و وينه

----------
والله العظيم عليه وصف يهد الحيل
الله يرحمك ويرحم كلماتك الطيبة اللي ترد الررررووووح


تحياتي

:)

esTeKaNa يقول...

chandal/danchal!!
~~~~~~~~~~~~~~~~~~~
واتصال آخر
ألووووو
ألووووو
لو سمحتي اختي تقصرين صوت الراديو اللي عندج وتسمعيني من البلوق
.
.
واي استانست وانا اقولها
من زمان بخاطري اقولها
loooooooooooooooooool
هاو صج الفلبينيه تغني جذي؟
هذي كانت تشتغل بالحسين بمصر
اهم اللي كل شي يغنون
لا يبيلي روحه
ويمكن اسوي نقل حي ومباشر من موقع الحدث
LOOOOOOL
واي انا كله اسميها عايشه الابراهيم
قلبي ويا ذيج تضحكني بعد
وكلهم عايشات عادي
واي غشيت على المشاهد ذكرتها
مت وانا اتكعكع بروحي
:PP~
.
.
والجهني عجيب
كنت احب احفظ قرآان معاه
ويالله ياربي تهديني وتفتح علي
من زمان ما حفظت للاسف
:((
سمعي في السعوديه :
نور على الدرب ،برنامج يجيب به اصحاب الفضيله العلماء على اسئله المستمعين
اعداد وتقديم :
مادري شنو القرني
هذا البرنامج انا كبرت وياه
حافظته
:Pp~
.
.
.
تفضلي اهدائج:
شفتي كلمه (بوه) اللي اخر شي
يا ليت تلعلع بوه بصوتك العذب
عشانها
بحط الأغنيه
بس جنه تلعلع يعني بيصك راسي؟
عموما انا المذيع والمخرج والمعد
اي شي يصك راسي بسكره
ذكرت يدتي بكل عرس تقول ليش ما يقصرون الدي جي بنسولف شوي
LOOOOOL

esTeKaNa يقول...

Barrak
~~~~~~~~~
إتصال آخر ومداخله من الشاعر الكبير ومدون الكلمات الكويتيه الجميله براك:
وألووو
ألووو
الشاعر براك يقهقه
looooooooooool

.
.
فعلا الكورال يقول شنها
وعشانك راح اغير عنوان البوست
hahahahahaha
ووعفوا اخوي لا تيب طاري الكبر
باقي على عيدميلادي جم يوم
وداشه بمود كآبه موسميه
:pp~
>>>>نشكر لك اتصالك الجميل ،ونهديك اغنيه يا وردتي يا نديه انت واسرتك الجميلة وخاصه خشيم الفار

lawyer يقول...

سبحااااااااانك يارب

سبحانك امس قاعده اقوووول بكتب بوووست عن مذيعين مارينا اف ام

و الاف ام الكويتيه



قولي ليش لانهم ملوعين اقصى جبدي



الله يهادهم نوف و الثاني بس يظغط فيها و اهي عندها ملعومات بس ما يعطيها ويه


والناس الي تدق تعالي شوفاي الحجي ساايح واحرفهم من طقه صوووووووووفر و واي واي هذولا الرياييال ما يتحملووووووون شي مالت عليهم قلبي متروسه انا !!



هذا حوااااار بالراديو اكثر من الاف المستمعين يسمعونج عيب والله !!



والثانيه الي مطيحه الميانه ويا الدوانيه


كله عاهات الي يدقون



تكفين سمعاي الاف ام الساعه 2 الظهر واحد صووووووووووته ظيم و جنه قااص في لقمه و اهي يتكلم


مافيه اي معيار من معايير المذيع الناجح





وبعدين احنا في الكويت و هذي بلد كويتيه ملزوم المذيعين كويتين و يتحجون كويتي

ابدا ماله داعي اهوازيه و ايرانيين يكسرون في الحجي و السين تصير صااد على ابونا ماكو غيرهم







يازين رياييل اول و حب اول بعد قلبي

حب نااااااااااااطع

esTeKaNa يقول...

mellow
~~~~~~~~~~
ياهلا يا هلا
مداخله جميله من صاحبه المطبخ العامر والنفس الجميل ميلو
تفضلي
....
وافا عليج تبين هالنفنوف؟
ترا هذا مو شي عادي
هذا الزري يلق بموق
انا اسلفه لج وصدقيني ما يدور عليج هالاسبوع الا مبشرتنا بخطوبتج على واحد من البقيه المنقرضه من الجيل الجميل
:p~
ما شاء الله زين تسوين
انا اقوم مبجر اخلص اذكاري وانطلق
ومرات وايده اقول حق روحي يالله من هني لي هني استغفار
من هني لي هني تسبيح
بس اليوم مادري اشفيي يالله صباح خير
.
.
.
صوت جميل
بس حبيبتي برامج المواهب تعقب هذا البرنامج
اتمنى لك الفوز صوتك جميل جدااا
:PP~

lawyer يقول...

جندل
توووووووووووووووووووووج تعرفين الفليبينيه

تغشى من الضحك اصلااااااااا اعرف شبااااااااااب من يروحون ينادونها اهي حتى لو مو طاولتهم تستهبل عليهم

ههههههههههههههههههههه



ترا حدها معروفه

esTeKaNa يقول...

دروازة
~~~~~~~~
اتصال جديد من خارج الكويت:
ويا صباح الخير ياللي معانا
:pP
هاليومين آله الزمن مفتره فينا كلنا
يا زينها من ايام يا دروازه
سبحانك ربي اشلون يرتبط الصوت بالذكرى والاشخاص وكل تفاصيل الزمان
تصدق؟
انا مرات احس انا مو ماله هالجيل
انا قديمه ،قطتني آله الزمن مع هالجيل
:p~
......
وعدل عدل كلامك
وأخييه شكثر احب يا بو فهد مني غدا الشوق
وشكثر اغيب مع غاب بدري انا يا من يجيبه
اخيه بس اخيه
:)

تدري يا دروازه؟
انا صار لي فتره كل مسا اغني:

ألا يا سراج طول الليل ضاوي
و عقب هاليوم ما ظنيته يضوى

وفعلا تعور قلبي هالكلمه
.
.
.
شكرا لتواصلك معي برنامجي
مشاركة جميلة
وبهالمناسبه اهدي لك أغنيه جميله تحرك كل المشاعر:
احسب الجيات كم مره أجي
و احسب النظرات لي ضاع الحكي
روحاتي و جياتي
و نظراتي الحزينه
تحكي لك مدى حبي و انتا ما دريت
:)

esTeKaNa يقول...

`~MnO YeNSa! ~`
~~~~~~~~~~~~~~~~
اتصال آخر
وتصحيح جميل
شكرا شكرا
نزلته خل الناس تدري انا بعد كله اغلط
:PP~
لا خلا ولا عدم
.
.
نهدي جميع اغاني البرنامج لعيونج الجميلة

الزين يقول...

الوووو

الوووو اختي ممكن اشارك

ترى انا من الصبح ادق وما يعلق معاي الخط

قلت يا حيل الله بستمع لرودج على المكالمات

تصدقين من نويت جان يعلق الخط معاي



عاااااد اقول لج جنه السالفه صارت فصلة الخميس والشمعة

هههههههههههههه



اقول اختي انا عندي مداخلة حق الإخت لوير اللي دقت قبل شوي


اخت لوير لو سمحتي

"اعربي كلمة معايير"


@@



شكرا وعطونا فاصل اعلاني لو سمحتوا

ويه نسيت لازم انتي تقولين هالحجوة


:))

سلام

esTeKaNa يقول...

حسام بن ضرار
~~~~~~~~~~~~~~
ياهلا ويا مرحبا بأبو ضرار
أغنيه البؤساء؟
!!
واي يا بو ضرار
تذكرت ذاك اليوم قاعده الصبح شنو في بالي؟
كل ما عدلت واحد يميل الثاني
بس حلو يصير في بالك راوند حق مشاهد حياتنا
:pP~
ومونت كارلو اسمعها والله
اهيا ويا سوااااا
:)

Fankooshy يقول...

من تركت نادية صقر الاذاعة وبرنامجها الصباحي
وانا حولت على اذاعة بي بي سي الانجليزية

ولا تعليق على اذاعة وزارة الاعلام

esTeKaNa يقول...

nanonano
~~~~~~~~~~~
ياهلا وأمية هلا
ياربي شنو هالاتصالات الجميلة من متصلين ذوق؟
في احد سمع عن مسا المانجا
قمه اللذه
:p~
وشكرا شكرا على النصايح
هذا انا اغني بالبلوق
واخليكم كلكم تبتلشون
.
.
.
وشنو تبين اغنيه نهدي لج بعد المليق اللي غاثج بالدوام؟
:pP~

kuwaitawy يقول...

94.4
ومحطة الغناء الكويتي القديم




احلا مزاج والله




-------


صباحج ورد وياسمين

esTeKaNa يقول...

lawyer
~~~~~~~~~~
اتصال جديد
ألووووو
لو سمحتي اختي قصري صوت الراديو
سمعينا من البلوق
looooool
ليش ما قلتي لي عن الفلبينيه من قبل؟
تدرين نفسيتي تعبانه واحتاج هاليومين شي يونسني
:pP~
.
.
.
اوافقك في كل كلامك
مافي حرف صحيح يا صديقتي
!!
فامام كل هذه الانتقادات
تشجعيني امسك برنامج صباحي؟
:Pp~

esTeKaNa يقول...

الزين
ّ~~~~~~~
الو
اهلا معانا المذيعه الزميله
برنامجك هذا الصباح كمش قلبي
اشلون كمش قلبي مادري
بس كلمات برنامج اليوم عندك عور قلب قلبي
:(
.
.
بالنسبه للضغط على المكالمات
فسامحينا تدرين ماشاء الله مستمعينا من الكويت وبره الكويت وصاير في ضغط
حتى ما يمدي احد فاصل اعلاني مليق حق زين ولا فيفا
:pP~

والفصله مالها وقت
حلاتها بكل وقت
:)

nanonano يقول...

esTeKaNa :

هاهاهاها
هاهاهاها

ما يبيله

يا عوازل فلفلوااااااا

ikhalifa.com يقول...

عقبال ما تصيرين بوخرشيد
:P

ReLaaaX يقول...

صباح / مساء الحليبة المهيلة
صباح / مساء عتيج الصوف
صباح / مساء الغبره ;p




فدييييييييييييييت المذيعة والله

~ هند ~ يقول...

نجمه من الكنترول:
استكانه عندنا مكالمه خارجيه .. استقبلي قبل ما تطير

مذيعتنا التكانه:
صباح الخير.. الاسم الكريم؟

المتصل: صباح الورد.. معاج هند


>> بس حبيت أسمع صوتي في الراديو :p

`~MnO YeNSa! ~` يقول...

الو الو
الو

:(
الظاهر محد يسمعني

الو
هلا بالمذيعة التألقة
( سن سن )
لزووم الدلع لاستكانة
:p~

خووووش موضوع ودي اضيف
ليش احسنا متعلقين بالماضي اللي يمكن اصلا ما عشنا فيه
بس غيرنا .. معلق على
"واوا و... باب اوبح "

ولا
شفت اتصالك .. صحيتني من النوم ..شفت اتصالك
!!!!!
اشكرة
سوالف ..وين الشعر الحلو
الوزن
والبساطة

و المعنى اللي يدش داخل القلب

يا متلف الروح
اخيـــــــــــه
بس


ابي اهداء على ذوقج و مع لسلامة
:*

chandal/danchal!! يقول...

لوير

طايحو على خبالها... بس توني ادري انها ملججعه جذي

غنت فوق ال 15 اغنية من التراث!!

بس مزاجها كله نقازي

ابي سامري وعان علي يا عين ماليا!!!

بدت تحفظها بس يبيلها اروحلها حزة الغدا عشان اتفرغ عليها!!

ترا اذا بدت بالسامري عرفي ان بمجهود جندل!

.
.
.
ARTFUL

LOOOOOOOOOOOOOOOOOOL

صاج كانت تقول ناطعة عقب ويا مسباحها الله يرحمها ويحللها



وفهد بورسلي عل راس الطاقة بشعراء الاغاني بالكويت

الله يرحمه
.
.
.

استكانة

كنت بكتب بتعليقي عن كتاب وملحنين الكويت... بس عشان ما اطول مسحته


راحوا وانشغلوا وراحت الهوية من اغنيتنا


لا من كلمات ولا من لحن!

اكتفي بطاق وطرباق

وفرقة التلفزيون ما تقصر

:)

Najmah يقول...

لوووووووووووووول
اهاااا يعني كل هالمقدمة
عشان تقولين لنا ترى
بتصيرين مذيعة
:Pp
شي جميييييل
ترى انا من زمان مو سامعة الراديو
يالله يالله متى تفتح اذاعتج
:**

مسائج ورد
والله غيرتي مودي عقب صداع الزحمة
:))

I7na 3shagnaha يقول...

تصدقين كل اللي قلتيهم يقثوني

و اتفق وياج

100%

الوحيد اللي استانس على برنامجه
دغيشم
:))

مادري ليش كل ما اسمع الاجابات
اقول يبيله استكانة تجاوبهم
:)

Purplecious يقول...

الووووووووووووو

فضائيه مصريه


اليوم شفتها بفنون كانوا حاطينها لما تقلدها انتصار الشراح بفضائيات

لوووووووووووووول

و لا لما تقول

ربنا يخليييييييك

مع السلامة

ألف سلامه

مع السلامة

ألف سلامه





لي باجر

هههههههههههههههههههههه

fatto يقول...

هلا ابمذيعتنه ياهلا :)
اي والله صدقتي حب واغاني اول ( غير )مادري ليش .. حب هالايام مومن قلب وبوطقه بعض المرات .

عيل انا دم ضروسي ( الدغيشم ) برنامجه المزعج الي يقول هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هالا

بس خلاااااااااااااااص عورت راسي

سمعته بس مره وحده وكرهته .. واحس ان يتدلع مادري ليش .

Sn3a يقول...

والغدير اللي اللي بعيونه...من زلاله ما روينا

اهم شي اني كنت اقول شي ثاااااني لووول


صيري مذيعه عالاقل نسمع احد عارف شقاعد يقول

قواج الله ياوردتنا النديه

كبرياء انثى يقول...

عيل سمعي كويت اف ام الساعة 8م ودج تكسرين الراديو فوق راسها
بس ما قول الا هذا النصيب انكتب احب انا صغيرون

Yin مدام يقول...

ألو:
الأخت إستكانة؟
ممكن أشارك؟
"بالله ليش داقة يعني"


هلا بالمذيعة إستكانة
والله لاعبة الدور عدل وضابطته
:PpP

يا مسا أحلى رهش ودرابيل

رايحة الجمعية بسبتج !!

رحت المطبخ ولا خالص الرهش وخالصة الدرابيل
!!
درابيل وشاي بالهيل

حياج يا بنية
:))

الحمدلله أغنية اليوم ما أعرفها عدل ولا جان شيطلعها من راسي وشيفكج مني
:))))


خلف الله علينا لا من مذيعين راديو ولا تلفزيون الحمدلله والشكر " مو مفروض اللغة والنطق السليم من شروط العمل؟؟"
ليش عندنا العكس؟

ومع إني ما أحب الراديو راح أسمع لج بكل أريحية ومزاج عال العال
إنتي بس صيري مذيعة وأول إتصال مني
كل يوم الصبح
:))

إستكانة على الهوا
دمت بخير وصحة ونطاعة
:))

Yin مدام يقول...

لوووووووووووول
إستكانة ما صدتيني بلأغنية بس يانغ علقت بمخه طول اليوم

لووول
يقول ذبحتني أمشي وببالي قمر جنها




ذيج المرة قال لي شلون علقت بمخج الأغنية
فثانك يو
:))

أبو الدســتور يقول...

أوقف عند باب البلوق
ولا أعلق
:))

Q80 Blogger يقول...

:S

حتى انا معلقه براسيييي


المشكله ماقدر ارددها بمدونتي .. مدونتي تسد النفس !!!

شكلي بقعد اهني عندج لين تروح عن بالي .. يمكن بعد اسبوع !!!

ريــــــانــه الـعـــــود يقول...

لوووووووووووووول

يا حلاتج والله

بوستج عسل نفسج

تدرين سمعي هالاغنية اهداء لج ;)

هلا باللي لفاني يا هلا به
عدد دقات قلبي في غيابه
هلا باللي بعد والشوق يابه
عليم الله قلبي ما صخى به
ضوى خلي علي في الليل ساري
ينيره جاي لي منه سرابه
رجع لي من بعد غيبة حبيبي
وقلبي كم تحمل في غيابه
هلا بنور الصبح ليمن تبسم
لقاني مقبل يمشي هبابه
هلا بريح الصفا ليمن تنسم
يا حلوه ربي يحفظ له شبابه
تعال عيني ولهت وانت كحلها
لو أقدر والله خليتك محلها
عزيزة الروح وانت مثلها
أحلفك بالله ما تقطع وصلها
هلا باللي ربى في وسط جوفي
يواعدني وكل لا وعد يوفي
أحبه بس من حبه يا خوفي
يخليني وهو عمري وشوفي

Nikon 8 يقول...

مسا ريحة كل شي كويتي
أضم صوتي لك ... فأنا من عشاق محطة الغناء الكويتي القديم
ويا حلو رجعتي للبيت ظهرا على أصوات المراويس والنهمة
:)
أسمع لهم وأترحم عليهم

qesat_5ayal يقول...

إيه، حبهم غير
كل شي غير
:)



المذيعين
بايخيين
جدا


مرات نوف وعبدالرضا يقولون شي يديد ولا خبر يديد

ويغثون لما يقولون للحين ما نزل السوق
عيل ليش قلتوا عنه
:P


أنا تحوشني حالة يظل الراديو يسوي سكان وما يستقر لين اوصل
:D



تصبحين على خير
وصباح سعيد لك

مي يقول...

انتي عسل

:)

ميمة السبيت يقول...

على هالأغاني الظاهر عاديناج انا و بنت الشامية

بس تدرين شنو املق شي سمعته بحياتي لما افتح الرادو وفجأة واحد يصرخ رشرشها مادري مشمشها ياوليدان

من كل قلبي تطلع كلمة وييييييييييييييييييييييييييييييييييييييييييييييييييييييييييييييييييييييييع

ShLaLaT يقول...

لوووووووول

شياااايج على الاغاني يا بنيه

;p

بقولج عن وحده باذاعه كويت اف ام
103.7
اهي تطلع بليل اتوقع من 8 لي ل10 او 9 اذا ماني غلطانه

اسمها حبيبه
وحجيها بين حليمه وبين امل العوضي
لوول
شي ما يتسماااش بالبدليات

;p

وعن مرينا اف ام
تلوع جبدي وانا اسمعهم الصبح
اما البنت كل حجيها بدليااااات
!!
وبعدين تضحك على روحها
يالله لا تبلينا

;p

بس بس حشيت وايد

صباحج سكر
:**

U know WHO يقول...

صباح الخير.. أو مساء الخير
هذي محطة إستكانة ؟؟
ممكن أشارك ؟

أقترح إحطووون محطة أغاني
بدون مذيعين وبرامج
وايد أحسن

حق إللي مثلنا يتنرفزووون من الهلاقة :)

أنا حولت على الـ
BBC

أقوول إستكانتنا..
فتحي محطة.. وخلي مشاركينها
نقوة.. ماكو غيرهم.. وأهم
شي خف طينة
ملينا من الملاقة

U know WHO يقول...

إستكانة.. ماودي لج بالمغثة
ولا القهر.. بس تكفين سمعي
محطة مشعل الشايع

اسم الله علينا وعليج.. بس عادي
وممكن تركبين رصيف من تسمعينها

esTeKaNa يقول...

Fankooshy
~~~~~~~~~~~~
شكلي انا بعد بحول عليها
:)






kuwaitawy
~~~~~~~~~~~
صباح المزاج الرايق
ومسا الورد كله
:)








nanonano
~~~~~~~~~~~
أهلا بصديقه البرنامج نانو
وإهداء من البرنامج وكل الطاقم
يا عوازل فلفلو


مع العلم انا بروحي كل الطاقم
:PP~






ikhalifa.com
~~~~~~~~~~~~~~~
اسم الله علي
فالك ما قبلناه
:Pp~








ReLaaaX
ّّ~~~~~~~~~
احم احم
اشرايج بصوتي
عسى حسيتيه اذاعي؟
HEHEHEHE





هند
~~~~~
وبعد اتصالج على برنامجنا الناجح
الكل اتصل عليج يسئلج عن هذي الشهره
:PP~











`~MnO YeNSa!
~~~~~~~~~~~~~~
يا هلا بالاحساس كله
ألو
ألو
قصري صوت الراديو من عندج سمعيني من البلوق
:Pp~
نرتبط بالماضي لأن كان اجمل
وإهداء خاص للغاليه منو ينسى:
يا متلف الروح
:*

esTeKaNa يقول...

chandal/danchal
~~~~~~~~~~~~~~~~~~
هاو تمسحين تعليقج عشان ما تطولين
@@
هذا بلوقج
انتي اللي داشه واحنا اللي طالعين
يتبارك ويتشرف يوم انج فيه تكتبين

حبيبه قلبي انتي
حياج الله
:))








Najmah
~~~~~~~~
انا قايله لج من زمان ابي اصير مذيعه
ديري بالج علي
صايره احلامي وطموحاتي تتغير من دقيقه لي دقيقه
:)))

افا عليج نقلب لج المود كله
جم نجمه عندنا
:*







I7na 3shagnaha
~~~~~~~~~~~~~~~~~
LOOOOOOOOOL
انا ماحبه
بس من يقول جمع ومفرد ومفرد وجمع تعالي شوفي ويهي بالسياره طول الطريج منشدهه بس أجاوب
:PP~





Purplecious
~~~~~~~~~~~~~~~~~
الووووووووووووه
الووووووووووه


لاحظي الهاء اللي قاعده على الطرف
هذي المذيعه المصريه كانت جذي
هاء اخر الألو
وكاريه
وتليفون احمر
loooooooooooooool

واي صج ولهانين عليج
:**










fatto
~~~~~~~
هلا هلاهلا هلا هلا هلا
بس ترا بصوتي غير
:pp~
حيالله فاتو والله







SN3A
~~~~~~
يا بعد قلبي قلبج
اي تغزلي فيني
ترا صايره احب معسول الكلام
:pP~
وكل اغاني البرنامج اليوم مهداة لج
:)











كبرياء أنثى
~~~~~~~~~~~~
عرفتها
مأساه
هههههههههههه
صح نفس احساسي لمااسمعها
احسها واحده مزنوطه

esTeKaNa يقول...

Yin مدام
~~~~~~~~~~~~
ومكالمه خارجية مع أسره أل ين الكريمه
سفراءنا في الخارج
.
.
.
إحم أحم
يا زين الصبح اللي ابديه بصوتج واتصالج
اهداء خاص لج ولاسرتج الغاليه


شرايج فيني وانا مذيعه ذربه
:p~

عيل علقت عند يانغ
ههههههههههههههههههه
زين زين
خوش اغنيه
هذي اهداء منه لج بس مستحي يقول
انا اقول بداله
:PP~












ابو الدستور
~~~~~~~~~~~~~
متغيره اشابيه بو الدستور
:pp~
تقدر تعلق بموضوع من هالنوع
البوست الرومانسي توقف عند الباب
:)





Q80 Blogger
~~~~~~~~~~~~~~
لا تقول جذي على مدونتك لو سمحت
ماأرضى
!!
غن بكل مكان وانا اخيتك
وحياك الله بلوقك ومكانك
اصب لك جويهه وانت غن على راحتك
:)










ريانة العود
~~~~~~~~~~~~~
هلا بللي لفاني يا هلا به
:)
شنو هالإهداء العجيب
لا تشوفين ويهي
الكشره من هني لي هني
لا خلا ولا عدم يا ريانه العود

كل اغاني برنامجنا مهداة لج
:)











NIKON 8
~~~~~~~~~~~
يا مسا المروايس والنهمه
:)
اييييه تحسين النهمه فيها حزن
فيها اختصار حق تاريخ شعب
تاريخ الا يبونه ننساه مادري ليش
!!
حيالله نيكون







qesat_5ayal
~~~~~~~~~~~~~
ياهلا ويا مرحبا
انتي نفس حالتي
افتر كل مكان لي اوصل ولا استقريت على شي
بس ان شاء الله بس اسوي برنامجي الصباحي راح تتعدل الامور
:p~










مي
~~~~
ميرسي
حبيبتي انتي
:*









ميمة السبت
~~~~~~~~~~~~~
looooooooooooooool
مشمشها
رش رشها
ههههههههههههههههههه
اي هذا الريال يبدع من الملاقه
ومشكلته يتدلع مرات
:pp~
اي شفتي هذي اخرتها انتي وبنت الشامية عاديتوني
:)






ShLaLaT
~~~~~~~~~
يا مسا الورد كله
:)
اي عرفت حبيبه
الله يسامح اللي قالها صيري مذيعه
صوتها مزنوط تعور اذوني حيل
:(
استغفر الله هالبوست وايد خذيت فيه اثام
مادري شفيني
اغني واحش
الله يهديني
:p~












U know WHO
~~~~~~~~~~~~~
اي نعم محطة استكانة تحييكم
:pp~
اي والله ملينا من الملاقه
الحين انا بفهم ليش كل البنات صار فيهم دلع
انا مو دلوعه شسوي
انتحر؟
:))
راح نسوي محطة لنا بروحنا
بس الصبح برنامجي بعد اذنج عن خاطري مشتهيه برنامج صباحي
ووتالي صخة
ما نبي احد
HEHEHEHE

وحياالله الغاليه

esTeKaNa يقول...

U know WHO
~~~~~~~~~~~~~~
وي وي
انا ماحب اشوفه
بعد اسمعه
!!
عاد بنت خالتي تعرف اخته
لابد اقولها تنقل لها الملاحظة
:))
مو خوش نقصه وانا اخيتج
بس اهم شي انج ما تبين لي المغثه
حبيبتي انتي
.
.
.
وبهذه المناسبه اهدي لج اغنية الويك اند

نوى القلب نية ..ما نواها لأحد غيرك
نوى القلب يمشي لك..على السمع والطاعة

DiLLi O MiLLi يقول...

حااااشييين فيني من وراااي
هااا!!؟؟
ولاااا الصاحب سااااحب ... هاااا؟؟؟
ممكن أعرف سحبتها على شنو ؟؟
يوبى "جعجعة" هذي مووو مااالتي

وبعدين رقعتيها بالأهداء ..هااااا؟؟

:)





الــــــــــــــــزين !!!ء

شنوووو جعجعة !!؟؟
أنتي اللي مولودة بلبنان لووو أنا ؟؟
أنتي مال تقولين جنجال ههههههههههه
شغل ربع الماديتيشن والسفرة أياها
لوووووول

:)

esTeKaNa يقول...

Dilli o milli
~~~~~~~~~~~~~~~~
أنا حشيت
@@
حشا علي
انا مذيعه ما احش باحد
:Pp~
يمكن تحت الهوا بالفواصل الاعلانيه وماحد يسمعني احش
يمكن يمكن
Hehehehehe
.
.
وبمناسبه انج يايتني معصبه اهديج:
لك حق تزعل ثم لي حق ارضيك
ما اقدر على زعل حبيب قلبي وعيني
:**

Abadi يقول...

ويه شخباري هالاغاني وذكريات اول
والله قلبي صار يدق بسرعه يوم قريت قمر جنها وانا رديت
شسويتي فينا
والله كل كلمه كتبتيها بهالموضوع صح
الله يعطيج العافيه
وااااااه ياقلبي على ذيج الايام
وقمرجنها يامحلا ذيج البنيه.....