الجمعة، أبريل 03، 2009

على طاري المطر

كنت تتكلم ،وكنت اناظر مخباه دشداشتك العلوية
تمنيت...ان اكون شئ صغير بحجم القلم
يختبأ هنا قريب صدرك
بمبخباه دشداشتك
ويرحل معك الى حيث تسكن
اسمع سواليفك مع الناس
اضحك لخفه دمك،وانصت لعقلك،استنشق بخورك،واتغزل بعطرك
واذا ما خالفتك الراي ...سحبت طرف غترتك ذكرتك بوجودي
ترا ها ما ياز لي الحجي
!!
فترتبك.. تضحك..وتخفيني مرة اخرى في صدرك
.
.
هل قلت لك يوما؟
أني
أحب حميمية صداقتك مع فلان،وحوارات الليل في دوانية فلان
أحب برك بأمك،حرصك على زوارة تجمعك بأهلك
قلبك الحار على شغلك..و امممم
تصدق؟
حتى مع عقدة نونتك وعصبيتك ...أحبك
نحبهم كما هم
وأروع الحب ذاك الذي يجعلنا نحبهم من كل الجهات
.
.
سئلتك ذات صباح:
شنو أحلى شي بالدنيا
سكت برهه،تأملت الفضا،وتنهدت :
أحلى شي الكباب
!!
فصرخت:
انت وحش
ابعد ما يكون عن الرومانسيه
!!
قهقهت انت،فضحكت انا ...وضاع الجواب بجنون ضحكه

حفظت انت السؤال،خبئته في مكان ما في ذاكرتك،وفاجئتني فيه بلحظة جنون أخرى:
بسرعه بسرعه بسرعه قولي لي شنو احلى شي بالدنيا بهاللحظه؟
تأملت ملامح وجهك المرتقبه،وعيونك التي تنتظرني متلهفه، وروحك التي تلفني بحنانها متشفققه تنهدت باحساس كل الدنيا وجاوبتك:
جباتي صوت الهند أهو أحلى شي بالدنيا
بهاللحظة أصبت بخيبة أمل اضحكتني وعلمتك وعلمتني،أن أحلى شي بالدنيا:
تلك اللحظات التي نتقاسمها معا بجنون كلماتها وعفويه مشاعرها
.
.
.
مطر..ونهار مبلل بذكريات الشوق والحب والسهر
تتذكر؟
كان نهار ممطر،قلت لك فيه اني اعشق رائحة الطين المبلل بالمطر،احب احساس السكينه الذي يبعثه لي صوت الديمه...واحب المطر
كنت تتأملني بهدؤ،ورأيت في عينيك بريق دموع وهمست لي:
وأنا احبج انتي
لحظات سكون ضمت قلبينا بصمت،وقلب في حضرتك عجز حتى عن الهمس
ارتجف كل ما فيني،وخجل اجتاح كل تفاصيلي،ليتركني صامته اسند راسي على كتفيك
وابتسم...فتبتسم
...
ولو قلت لك
اني احبك اكثر من هموم البشروكثر الجفا وكثر السهر
وانك اقرب من عيوني للنظر
.
.

مطر،وشوق يتسلل لسريري يصحيني،يلعب بأرنبه أنفي ويسئلني بوله:
ما اشتقتي له؟
فأغمض عيني واهمس له:
أكثر من ما تتخيل....وأكثر مما يجب
تخيل:
أن قطرات المطر تذكرني بعيونه
صمت الماء...تذكرني بصمت مشاعره وخوفه من جنونه
ونسمات الهواء البارد التي تلفني كلي..تذكرني بحنان وجوده
هو
ساكن في كل الزوايا وفي الأماكن ،أذكره:
كل ما اقتربت من شاطئ الشويخ،كلما شربت جاي حليبي في الصباح،كلما سمعت عن مباراه تجمع القادسيه بفريق ما،وكل ما دار حولي نقاش سياسي ما،اذكره بفدوة لج عمري وكل اللي تبينه،وبصوت رويشد يغني لي:
مسحور وأنتي بعيونج لي وطن
سئلته يوما:
لما يذكرني بك تقاطع الشامية وكيفان؟
ولما يأتيني طيفك في كل يوم الساعه 12 وثمان؟
ولما انت انا
تذكرني بك عيوني...بسمتي...دموع حزني وفرحي؟
تدري؟
ماني بشاعر ينظم الحرف والقاف....أنا قصيده وأبدعتها الأماني
بس ليش ما صرت شاعره؟انظم لك اجمل قصايد حبي وشوقي؟
!!
ضميت طفوله مشاعري وابتسمت،كنت سعيدأو هكذا كنت اظن وجاوبتني :
أنتي بعيني أجمل شاعره،كلماتك شفافه تخترق شغاف قلبي تهز شئ في روحي وتسكني،ببساطتها،بدفئ مشاعرها
انا احتاجك انتي
ولا احتاج الف شاعره غيرك
احتاج مشاعرك العذبه تكسر جمود صمتي،وتسكن كل تفاصيل الزمن
اذكريني بكل شئ...لأني لا أنساك بأي شئ
ابتسمت ورجعت اناظر مخباة دشداشتك فضحكت:
وبعض الحجي الرومانسي ماحبه انا،ايب لي الحارج
.
.
.
.
عندما هممت بالابتعاد في ذاك اليوم وصيتني ان اتذكرك مع المطر
فسئلتك عيوني بخوف:
بتروح عني؟
فغنيت لي:
وين اروح دامك ساكن بي؟
عيل ليش اذكرك ..واحنا ما نذكر الا من يغيب
!!
دام بقلبي نفس ما اغيب،الا اذا خذاني الموت عنج بعيد
.
.
صدقت بوعدك،وما صدقت معانا الدنيا
وغبت انت ورجع المطر وانا وحيد
تبكي السما،وتبكي عيوني
واذكرك
ورغم الدموع ،ابتسم
يندفن بحبنا الأمل،وأخبيك بقلبي سرالعمر
واشوفك بعيوني بكل فجر
تعلمني
اكتب
وانثر مشاعر الحب والفرح
واذكرك..مع كل مطر



هناك 37 تعليقًا:

lawyer يقول...

فرنج وايد حار

المصيبه انه حرقني و المفروض ما احترق





تعبت

ikhalifa.com يقول...

الحي ما بقى له شي

I7na 3shagnaha يقول...

على طاري المطر




منو هذا؟؟؟؟

:))

esTeKaNa يقول...

lawyer
~~~~~~~~~
لا ما احترقتي
اسم الله عليج
انتي بس صرتي
well done:p~
وعشان الناس تفهم شنو قصدنا
انا اذا كنت قاعده كتب بوست اكتب للجميع:
بوست بالفرن
بمعنى انا قاعده اطبخ بوست

توقعت هالبوست يكون خنين
بس مادري شفيكم
:((






بن علي
~~~~~~~~
:(









I7na 3shagnaha
~~~~~~~~~~~~~~~~~~
هذا الهندي اللي يبيع بمحل الجباتي
:Pp~
انا عانه علي جباتي من الصبح
ياربي حتى اللي اشتهيه يفشل
الناس تشهي قهوة قليل من الكعك
:pP~


هذا شخص خيالي
نفكر فيه
عشان نكتب
:))




ويالله انتو الثلاثه طلعو
الجو عجييييييييب
:Pp~

I7na 3shagnaha يقول...

ana already bil shalaih

enjoying el rain

bas ma hagait hatha al answer

ضيقتي خلقي :)))

دروازة يقول...

على طاري المطر

بأسئلج سؤال؟

من وين هالاحاسيس العميقة هذي؟


...

باقولج مثل ما كانوا يقولون حق الست سومة من باب تشبيه بالابداع

عظمة على عظمة يا ست :)

...

أسف من كثر ما كان اللي كتبتيه سهل وقوي بنفس الوقت

تملك كل أفكاري وما خلالي مجال اعلق :)

Enter-Q8 يقول...

استكانة اعرف واحد ما يفصل مخباة دشداشة من فوق
صج و الله و اذا مو مصدقتني سألي و راح تصدقين
هالحزة مالك الا تكونيين غترة او عقال

why me يقول...

جيب المطر اشلون يهيج المشاعر


مو


:)

Najmah يقول...

استكانة
تدرين شنو احلى شي بالمطر؟
إنه يذكرنا بأجمل احساس مرينا فيه
واجمل احساس نعيشه
واجمل احساس نحلم فيه
أحلى شي فيه إنه يحضن قلوبنا
ويعبيها حنان
وتمطر دفا على كل اللي حولها
كل ما يطق مطر
أحس ان الوان الدنيا كلها تتغير
:)
الحب نحبهم من كل الجهات
مو بس نتقبل الجوانب البعيدة عنا
لكن نعرف شلون نحبها ونفرح فيها
نشاركهم اصغر اهتماماتهم
ويسمعون ابسط سوالفنا
احيانا يكون جنون اللحظة
اجمل من الف كلمة رومانسية
:**
تدرين شكثر طيرتي قلبي بهالبوست
صح؟
:)

كبرياء وردة يقول...

ياااااي
واحنا شلي ميننا غير المطر وطاريه واحاسيسه وذكرياته:p

حبيت فكرة المخبى وااااااااااااايد

واحنا نحب المطر لأنه يذكرنا بكل اللي نحبهم

انا من ينزل مطر اطلع واغمض عيني واسمع
تصدقين ودي احضن الكون كله بايديني

يا ليت كل يوم ينزل مطر عشان نقرا كلام حلو جذي

Yin يقول...

ذكريات
خواطر
أحاسيس
آمال
أحلام
ومطر
بوست رائع بكل كا فيه

يعطيج العافية إستكانتنا المسنفرة

:))

SHAHAD يقول...

اممم شسويتي فيني !
الذكريات خنقتني والله ..
احساسج وصل أعمق نقطة باحساسي

mellow يقول...

إستكانة

راح نخلي بوراكان يعطيج وسام الصعلكة الشرفي

أنت صعلوكة أصيلة و بنت بطنها

و أشوه هذا (إلّي المطر يَطْريه)ما طلع صجي

يختج قلوبنا على طريف ..على أقل شي تعورنا قلوبنا

Broke يقول...

وضاع الجواب بجنون ضحكه

الـلـه

chandal/danchal!! يقول...

يا مساء الديم والخير

:))

والله أنا ما طرا علي الا ام الغالية زووز.... عسى الله يشافيها ويردها بالسلامة
.
.
.
خوش بوست:)))))

الله لو تشوفين شكثر متشققة عليه
:))))))

مو قادرة اصك كشرتي... الحمدالله والشكر مادري شفيني صايرة مراهقة!.... والله ثلاثة ارباع هالحجي بتفقدينه عقب الزواج وقولي ما قالت جندل

:))

الخيلاء يقول...

حرام عليج

ليش جذي


" اتعلمين اي حزن يبعث المطر "

mellow يقول...

إي والله حتى آنا مثل جندل طرت علي أم زووز و قعدت أسولف حق أمي و خالتي و أختي عنها و يا سالفتها مع البردي

الله يشافيها و يشفي كل مريض

Kuwait يقول...

أبي جباااااااااااااااااااتي :(
تنحت لما شفت جباتي صوت الهند
ويح قلبييييييييييييي انقطع :\

حجر كريم يقول...

لطيفة

بكل حروفج

لطيفة

حسافتج يا كويت يقول...

شهالكلام الحلو اللي يدخل القلب يا إستكانتنا


والله يا إستكانة

راقية وراقية كلماتج اللي صارت مثل الديم اللي نزل اليوم

qesat_5ayal يقول...

المطر،، يا ريحة الحب فيه
:*



حبيت البوست
حبيت الكلمات
وحنية الحوارات


الله يديمه ويزيده ويرحم عبيده
:)

ShLaLaT يقول...

حراااااااااااام علييييييييج

لااااااا تبجيييييييني

بروحي صايره على طرييييف

Nikon 8 يقول...

شاعرية المطر تهيج المشاعر الحلوه والفرح
:)
يا صباح الجباتي الحار
إشهوة فيها العافية
:))

ReLaaaX يقول...

:/

|:| DUBAI |:| يقول...

استكانة

عورتي قلبي

كثر ما هو متعور

اوخيييييييييييه

بصيح

: (

Reem يقول...

كثيراً ما نسأل ، عند اللقاء تنهال علي الأسئله .. أود أن أسأله كل لحظه و كل حين ، عن كل شيء و أي شيء .. أحبه يعلمني أبجدية الحياة .. بمنظوره العميق

و سنرحل ذات يوم ..
و يبقى فيني الجواب ، معلقاً في خواطري

/

estkana
وإذا ما يازلنا السؤال ، نغني .. هروباً
لول مو ؟

فعلاً ، غريب جداً كيف تسكن ذواتنا .. بوح الآخرين

أخيراً تشجعت أعلق ..
المكان دافي ،
:*

Nora .. يقول...

aaaaaaaaaaaaaaaaah ..

laish ga3da abchi !!

shreera entaay :"(

Sn3a يقول...

استكانه

بعض النعم تكون نقم ان ماشاركتي فيها احد
واهمها المطر

البوست روعه من روائعج اللي تنافسين فيها نفسج بكل بوست ييديد

Happy Face يقول...

يعني لما نقرا هالبوستات العجيبه شنو نقدر نقول؟؟ و بشنو نعلق!!! ما نقدر عقب كلامج نقول كلام
تسلم إيديج عيشتينا جو عجييييب :)

عثماني يقول...

سالتيه ذات صباح .. شنو احلى شي في الدنيا ؟؟؟

قالج الكباب !!؟؟

كباب من الصبح ؟؟

استكانه .. الله يهديج .. ماني خابرج تعرفين كواوله

:)

اتغشمر وياج

:)

ممتع البوست

esTeKaNa يقول...

I7na 3shagnaha
~~~~~~~~~~~~~~~
يا صباح الهنا كله
لا كل شي ولا ضيقه خلقج
بوست بالفرن اهداء لج
:)))





دروازه
~~~~~~~~
أخجلتم تواضعنا يا اخي العزيز
:)
وجواب السؤال في بوست هذا الصباح:
بوست بالفرن
:Pp~









ENTER-Q8
~~~~~~~~~
ههههههه
يا بو وليد
حتى بأحلامي محبطني
هذا واحد من مليون
المليون يخيطون مخباه الا رفيجك
:pP~










why me
~~~~~~~
مو
:)







najmah
~~~~~~~~
يا نجمة قلبي وروحي
عسى قلبج طاير بالفرح دوم
:**
صباحج ورد










كبرياء وردة
~~~~~~~~~~~~~
وليش ما تحضنين الدنيا؟
حضني الدنيا
وعيشي اجمل لحظاتج
وكتبي بكل يوم شئ جميل
:)
صباحج ورد

esTeKaNa يقول...

yin
~~~~~
صباح العذوبة
:)
والله لا يحرمني من مرورج الجميل دائما









SHAHAD
~~~~~~~~~
صباح الذكريات
:)
اجعلي ذكرياتك مصدر لابتساماتك وفرح حياتك يا صديقتي الجميله













mellow
~~~~~~~~~
hahahahahahah:))
صباح الضحكة الصعلوكيه
:Pp~
ما تتخيلين شكثر ضحكت على تعليقج
لوما اني فاهمه قصدج
جان شكيت بروحي
:)
صباح الفرح والمزاج الرايق
ويالله ناطرين وسام ابو راكان الشرفي
ماحد يعوف هالوسام
:pP~
























broke
~~~~~~~
اذا قالت بروك الله
يعني صج الله
ونستيني
:)
صباح الضحكة العذبه

esTeKaNa يقول...

chandal/danchal!!
~~~~~~~~~~~~~~~~~~
يا صباح الجو الرايق الحلو
يا زين المتشققه والله
ليش تسكثرين على روحج الاحساس؟
تشققي
وتضحكي
ولو تصيرين يده،خلي قلبج قلب بنيه
:))
اللهم امين
الله يعلم شكثر دعينا لها عسى ربي يشافيها ويحفظها يارب

ولا تحبطيني لو سمحتي
:Pp~











الخيلاء
~~~~~~~
حبيبه قلبي انتي
اعتقد نا صلحت غلطتي امس بليل
وسولفنا احلى سوالف
:)















mellow
~~~~~~~
اللهم آميييين يارب
:)











Kuwait
~~~~~~~
ياربي انلام بحب هالبنت؟
رومانسيتها رومانسيه جباتي
:pP~
اذا رحتي يبي لي معاج
:)






qesat_5ayal
~~~~~~~~~~~~~
وأنا حبيت ريحة الحب فيه
:)
صباح الود والشوق كله















حجر كريم
~~~~~~~~~
من ذوقك
شكرا لك
:)











حسافتج يا كويت
~~~~~~~~~~~~~~~~
يا صباح الفرح كله
يا بخت عيني
حسافتج عندنا؟
والله يا حسافتج هذا انعكاس رقي قلبك وجماله ...فشكرا على مرورك وتعليقك العذب ،فرحت قلب استكانة
:)









ShLaLaT
~~~~~~~~~~
اسم الله عليج يا شلالات
عسى عينج ما تبجي الا من فرح
!!
بس اسفه اسفه
في بوست يديد بالمطبخ ما يبجي احد
:)

esTeKaNa يقول...

Nikon 8
~~~~~~~~
ويا زين المطر
:)
صباح دار عزيزه اللي تلمنا حولج
عسى ربي لا يحرمنا من مرورج









ReLaaaX
~~~~~~~~~~~~~~
لا بليز
الا انتي
ابي ابتسامة كبر الكويت
:)









DUBAI
~~~~~~
أوخيه يا دبي أوخيه
ترا انا ماا رضى اعور قلبج
اسم الله عليج
يالله بوست بالفرن ما يعور قلب احد
اقريه
:pp~










REEM
~~~~~~~
ياهلا بالريم
زارتنا البركة والفرح
:)
نعم ..غني
واضحكي
واكتبي
اعلني عن وجودك بشجاعه
فوجودك اجمل مافي عالمه
أكيده انا من هذا


سعدت بتعليقك
فلا تحرميني متعه التواصل مع ريم راقيه مثلك
:)









Nora ..
~~~~~~~~~
وانتي بس
يكون جوابي لج
.......

فيني طلعه
:pP~












sn3a
~~~~~
مرورج ينعش قلبي
!!
من غير مجاملة:
احب مرورج في عالمي
الله لا يحرمني منج
:)









Happy Face
~~~~~~~~~~~~
كافي مرورج الحلو
وجو عجيب عشتيه معاي
:)
صباح الفرح كله

esTeKaNa يقول...

عثماني
~~~~~~~
صباح الكباب
من قالك ان الكباب شي مو رومانسي؟
اذا كنت رايق
حتى القوزي يصير شي رومانسي
:Pp~

يسعدني مرورك

ARTFUL يقول...

اول شي كل مطره وانتي بخير

تصدقين مرتي تعاني مني بهذا الشي

كلا تقولي

انت وين والرومانسية وين

كل ما كلمتك برومنسية تضحك وتستعبط

;p

أقولها تحصلين واحد يضحك معاج جذي

;p

candle يقول...

(أنتي بعيني أجمل شاعره
كلماتك شفافه تخترق شغاف قلبي
تهز شئ في روحي
وتسكني ببساطتها
بدفئ مشاعرها)

صج وصفتي نفسج أجمل وأكثر وصف ممكن ينطبق عليج :)))