السبت، مارس 14، 2009

صباحي

(1)
...أنا وبيدي بابونج هذا الصباح
ورائحة غبار تمتزج بالماء
وإشاره مرور تزدحم بالناس
.
.
.
يهتز هاتفي في غير موعده
يأتيني اتصاله ضاحكا..مستبشرا..مبتدئا معي هذا الصباح:
يا عاقد النونة يا ثقيل
ما فز قلبج وقلتي اشوف عمي صار له ساعه واقف يمي؟
التفت للسياره الواقفه يمي فأراه هو وسجارته وابتسامته الحبيبة لقلبي
فابتسم:
ترا ما انتبهت انك واقف يمي
ولو سمحت لا تقعد تتضحك لي انا مرتبطه بعامود بيتنا
:pp~
تتداخل ضحكته مع حركاتي المستهبله في هذا الصباح
تفتح الاشاره وتسبق سيارته سيارتي:
استكانة شنو هالنظاره؟انتي متنكره؟ وين عيونج؟
رفعي النظاره ماكو شمس ..غبار
!!
(2)
أحيان اقوم بأشياء اتوماتيكيا:
امشي كل يوم في ذات الشارع
ارتدي نظاره في كل صباح
اشرب ذات الشئ كل صباح
دون ان افكر هل هناك طريق اقصر؟
وهل هناك سبب لارتداء هذه النظاره؟
ولما لا اجرب شئ آخر أبتدأ فيه الصباح؟
أنا اقوم بالكثير من الأشياء لأني اعتدت عليها دون ان افكر فيها فعلا
!!
ضحك عمي وانا اجاوبه بكل منطقيه:
انا ادري ان غبار ،بس البس النظاره اتخيل ان غيم وجو حلو،مابي اشوف حقيقة الأشياء
سكت برهه وهو يقف أمامي بالاشاره الاخرى:
لا يا استكانة لا،تعلمي تشوفين الاشياء على حقيقتها
بدون نظاره ،وبدون خيال
.
.
.
(3)
بعد تلك الاشاره،.تفرقنا كل في طريقه
ظللت اناظر سيارته وهي تبتعد،تماما كأشياء كثيره في حياتنا نقترب
وتباعدنا الدروب رغما عنا
!!
أحب عمي...وأحب حبه لي
احيان افكر،هل سيقرأ عمي يوما مدونتي؟
ما زال شاب في نهاية الثلاثينات،يعرف للانترنت واحيان كثيرة يسولف لي عن امور قرأها
رغم قربه مني،وحبي له
إلا إني فعلا اخجل ان يقرأني،ولو كنت سأٍسمح لأحد فلما لا اسمح لأبي؟
لا أشعر أني اخاف من عيونهم بقدر ما انا اخجل منهم
شئ غريب
!!
.
.
.
(4)
صباح اخر...احاكي فيه نفسي:
انظري للأشياء على حقيقتها...غبار كان او غيم
تظل حقيقة ثابته،لا جدوى من تمويه الحقائق
تحسسي على ذرات الغبار تتطاير في وجه الصباح
واستنشقي...رائحة الغبار المخضب بمطر البارحة
وان كنت لا احب الغبار
تظل مشاعري مشاعر لا تغير من ثبات الحقائق
......
(5)
بداية اسبوع جميل..جميل رغم الغبار وتغيرات الجو وكل ما نمر فيه
جميل،لأني انا اردته جميلا
......
(6)
غدا سأقف امام مجموعه كبيرة من الناس وأعرض امر معين
اشعر بارتباك عظيم
!!
حين قال لي انا أؤمن فيك ،شعرت بمسؤليه كبيرة
كيف لنا ان نصل لمرحله الايمان بالاشخاص الا اذا كنا نثق فيهم فعليا؟
اتمنى ان لا ارتبك من كم العيون التي تناظرني وتسمع كلامي
البارحة...جربت وجهي في كل الاتجاهات،اعتقد اني اجمل على جنب
يصير اعرض كل الموضوع على جنب؟
:Pp~
سمعت يوما من دكتور كان يدرسني بالجامعه لنتخلص من المشاعر السلبيه امام الناس
علينا ان نعترف فيها ببساطة وبكلمات قليله لتخرج منا
ويقدرها سامعنا
اذن لا بأس ان ابتدأ موضوعي بالتعبير عن مقدار خجلي وارتباكي الذي اتمنى ان اكون قادره على تخطيه بعد الابتداء بدقائق فقط
........
(6)
كان بخاطري ان اكتب عن موضوع معين في هذا المساء
ولكن ....نظارتي ،واحاديث الصباح مع عمي
ومشاعر بداية الاسبوع
غلبتني لأكتب هذا البوست الصباحي
افطر به...قبل شرب قهوتي والابتداء بزحمة أعمالي
........
بداية اسبوع جميلة

هناك 50 تعليقًا:

الزين يقول...

صباحج مشرق باشراقة روحج

رغم الغبار

رغم توتر بداية الأسبوع

بس اكيد صباحج طيب

:**

nanonano يقول...

صباح الورد

سبمبوت يقول...

صباح الخير يا أحلى استكانة بالدنيا ..

ولو أني ما أحب الشاي بس حبيت الاستكانات من بديت اقرأ في مدونتج ..

كلماتك تضفي شيئا من الألفة على أيامي
شكرا على كل شيء

chandal/danchal!! يقول...

يا صباح النظارة الشمسية المكتسحة وشديدة السواد!!!!

هذي نظارتي لا تخافين

:)))


والله ان قلبج على قلبي... يوم وصلت موقف سيارتي... استنكرت الظلمة وفصخت نظارتي وما وعيت الا غبار دخل بعيوني عومسني!!! اشوني ما أحط كحل!

:))

اما عن المشاعر السلبية!!! ما احب مجلسها لاني بسرعة اتنرفز وأتأثر وممكن تحوشني رقعة!!!

الكبر شين!

:)))


موضوع الخصوصية والمدونة... ممكن في المستقبل, قريب كان او بعيد, ودك تشاركين احد فيها وممكن تخلينها لنفسك


بالنسبة لي... ودي اشارك عيالي وعيال عيالي فيها, انشاءالله!!! بس بالمستقبل البعيد!!! توهم فرافير



صباح توارد الخواطر

:)))

Najmah يقول...

صباح الخير والاحساس الطيبة
:*

صباحج ورد وفرح

ربي يسر كل امورج
ويكتب لج التوفيق بكل خطوة يارب

يوم موفق صديقتي
:)

esTeKaNa يقول...

الزين
نانو
سبمبوت
جندل
نجمة


صديقاتي الجميلات
صبحكم الله بالفرح والسرور
والطيب الذي يشرق من قلوبكم لاحساسي
:))

عسى الرحمن يحفظكن ويكتب لكن في كل خطوة خير وفرح وتباشير خير يارب


عندي ملف كبر المخده
بس قلت لازم ارد واصبح
:PP~

I7na 3shagnaha يقول...

صباحك ورد :)

احلى شيء النظارة بالغبار .. تحسسج بالجو اللندني.. حتى لو مو صج.. تخفف من الإكتئاب المصاحب للغبار

ساعات احب اشوف الاشياء على غير حقيقتها.. تخفف من حدة الصدمة..و تسهل قبول الواقع تدريجيا

Good luck in ur presentation :)
حاولي تقدمينة جدام صديقاتج و اهلج اليوم.. ماكو الا العافية.. انا أردى منج 100 مرة من هالناحية

Someday يقول...

7oby you'll do just great
the way I do it is
اوقف جدام الناس و اسولف
انتي لما تسولفين مو الكلام يطلع فلوينج
و على الراحه
و حياتي مو كله على الجنب بليز
only when they are taking pic's ;)

allah eywafgich

p.s.
yes embarcement, the feeling of exposure to a level infornt of those who should look us though

ميرامار يقول...

أنا وبيدي بابونج هذا الصباح
ورائحة غبار تمتزج بالماء
وإشاره مرور تزدحم بالناس


أثرت فيني لأن افعل المثل
واشرب البابونج صباحا


صاج عم استكانة.. نظارات الموضة هالايام وحدة اكبر من الثانية ما ينلام :)


بوست يبعث على التفائل لبداية اسبوع جديد

abu eldestor يقول...

بداية اسبوع مولية
اولها غبار
ثانيها حل مجلس
ثالثا وهو الخوف التعليقه
:)

ARTFUL يقول...

صباح الخيييييييير

تعليقي على ردج بالبوست اللي طاف
----
مشكورة على النطره الله لا يهينج احرجتيني

;D

وبعدين احنا ما نكتب

أقصد بالوريقات
مرات بالصف بتقول حق رفيجك شوي
قبل أيام الموبايلات

تكتب وريقة وتعفسها

ولازم ما تعطيه باحترام حتى لو بتسلف منه لابجين حق حصة الألعاب

لازم تهفه فيها ،، ليش ما أدري

فأنا كنت أحتفظ بهالسوالف

مره أيام البطاله طلعنا من الفير لييي آخر الليل تريقنا طلعنا البحر ردينا سبحنا خذينا غدانا ورحنا البر تالي ردينا ورحنا شربنا جاي

ورحنا تعيشينا واحنا ناطرين العشا قعدنا نكتب على ورقة المطعم شوينا اليوم وطنازة على الاشخاص اللي تلاقينا معاهم

محد اهتم بالورقة انا خذيتها وقطيتها بالدرج

عندي من اوراق العبط والتطنز والرسومات حق شخص تزوج وعنده عيال وما بقى شي ويصير دكتور بجامعة الكويت

يا ويله اذا وصيته على واحد وما عطاه A

راح أفضحه

;p

------------

بوست اليوم
-------
صباح الخير او قايلة الخير

لا لازم نشوف الامور نفس ما اهي على قولة عمج

مايصير ننحاش من الواقع

على طاري الشي اللي تسوينه وما تدرين ليش!!

اول ما اركب السيارة مع أم العيال ونطلع بنتغدى او نتعشى وبنختار واحنا بالدرب

على طول السيارة تتجه الى الديرة ((مدينة الكويت))
بشكل لا ارادي
!!! متري تقولي شفيك وين رايح أي مطعم

اقولها مادري وين ودج!! تقولي عيل ليش رايح الديرة

مادري جذي اجبها نحوس بفرجانها على ما نقرر

;p

على فكرة

عندج ستتين بالموضوع ،، اهم سبع فقرات

والله يعينج على الكلام اما الجموع الغفيرة

انا جربتها والحمدالله عدت على خير

تحياتي لج

دمتي بخير وصحه وامان وصوت ماهو مبحوح

;)

----------------
بغيت أكره اختصار الكوبي
Ctrl+C
لاني من العيله طقيت shift

وانمسح كل شي بس الله يخلي ال
undo

جان ما علقت

;p

mtfa2el يقول...

تخيلي و انتي واقفة جدام الناس و تشرحين الموضوع
يطلعولج اثنين ورا الحضور يبون يشتتون انتباهج بهالطريقة :P

أحمد الحيدر يقول...

صباح الخير ..

تسلسل جميل أهنئك عليه :)

وبالنسبة لعمك حفظكما الله فلا تخجلي من أن يقرأ ما تكتبين .. فمن الواضح انه يعتبرك صديقة .. ويهمه أمرك جدا .. وإلا لما نصحك بؤية الأشياء على حقيقتها ..

أما موضوع عدم التغيير فهو نابع من الخوف من نتائجه .. وهو ينطبق علينا جميعا ولست وحدك في هذا المجال .. فالتغيير دائما يحتاج إلى الجرأة ..

بداية أسبوع مشرقة ..

إلى الأمام دائما ..

ikhalifa.com يقول...

good luck in your presentation :)

مركبنا يقول...

مسااااااااااااااااااااااء
الخيرات
والطاعات
والمسرات
والضحكات
واحلى الخوات

اهم شئ شوفي الدنيا بالشكل الي تبينه وتذكري احنا الي نرسم واقعنا

New Bride يقول...

صباح الخير احلى استكانه :)

Safeed يقول...

مجتمعنا بطبعه سلبي ، و خوفنا هو سلبية مكتسبة منه
لذلك مدونتي لا يعرفها أحد ، و لا أظن بأني راح أعلم عنها أحد
فسحة من الخصوصية تكفل للإنسان أن يعبر عن ذاته فيها ، بعيدا عن لوم المقربين و تساؤلاتهم و محاسبتهم لكل كلمة تقال او تكتب او نغزاتهم عن كل تعقيب و ما فيه
احيانا يتعودون علينا بشخصية ، مغايرة للشخصية التي ترسمها الكتابة و خوفا من احساسهم بهذا التغير نحجل من قراءتهم لها

اسباب عديدة اخرى .. لكنها كلها تصب نبفس المصب .. الخجل من شيء لا نتعب من ايجاد المبررات له

.
.
.

رهبة الوقوف امام الجماهير و التعلثم تصيب كل انسان ، مرة قال لي احد الاساتذة : اعتبر المستعمين كالبطيخ
اعتبرهم بطيخ ، و انطلق بالتعبير عن نفسك و ما تريد قوله بأسلوبك و لا تحط في بالك مقدار قدرتك على توصيل المعلومة او مراعاة العقول و غيرها ، بالنهاية الكلام الصادر بعفوية من الانسان سيصل بكامل العفوية للآخرين

الذين يتنصعون وحدهم الذين لن يُفهم كلامهم

.
.
.

الغبار رحمة إلهية ، حتى يرينا أن التراب ليس مصيرنا فقط ، بل هو حياتنا و هواؤنا .. فلأي الأمور يُصاب الإنسان بالعلو و التكبر ؟

~ هند ~ يقول...

سؤال وجيه ,, ويمكن لي عوده


ليش ؟؟

1
2
3
4
5
6
6

؟؟


:pp~





ترا أمزح ..


ربي يوفقج في كل أمورج غاليتي..

:)

Fahad Al Askr يقول...

موفقة برقم ستة بكرة يا رب، بس تكفين ما نبي حل غير دستوري، حرصي على إنه يكون دستوري، وخلج مع الراي اللي يقول حق بو صباح فالك المنصة طال عمرك

هذا طبعا إذا صدقت توقعاتي وحضرتي جلسة مجلس الوزراء بكرة

الخيلاء يقول...

صباح الرقه و الاحساس
:)

استوقفتني هالعباره كثيرا
واعدت قرائتها اكثر من مره

:
:

بعد تلك الاشاره،.تفرقنا كل في طريقه
ظللت اناظر سيارته وهي تبتعد،تماما كأشياء كثيره في حياتنا نقترب
وتباعدنا الدروب رغما عنا

:

و ضيعت اي تعليق بكتبه بحق هالبوست

اسبوع سعيد لج
:*

ReLaaaX يقول...

صبااااااااااحج الصباحي والورد والتفاحي ;*

مع ان ليل بس ممكن يصير صبح لو قلت حق نفسي ان صبح وصدقت ان صبح ;p
خيالي اجيد من خيالج



استكانه الوضع طبيعي جداً ومثل ماقلتي كلها دقايق وتندمجين بالحجي وماراح تحسين بنفسج الا عقب ماتخلصين وتقولين يحليلي والله يطلع مني ويوم قلت الشغله الفلانيه وناقشت الشغله العلانيه وهاكزا :p


استكاااااااانه تمنياتي القلبيه لج بالنجاح المستمر

Sn3a يقول...

امس مطر
واليوم غبار!
صج الكويت ديره الفصول الاربعه


انا مادري عن الجو صباحا لاني انام صباحا;p

استكانه الواحد يخلي بلوقه مكان خاصه فيه
والغريب بهالمكان الخاص
ان نتشاركه فيه ويا وايد ناس
لكن مو من عالمنا الخارجي
انا جايز اتقبل نقد بلوقر
لكن ماتقبل نقد احد اعرفه عن شي بالبلوق
وهذا مخليني استغرب لما وايد ناس يعرفوني ويعرفون اني صاحبه هالبلوق
فماحب سالفه ليش كتبتي جذيه
وليش ماقلتي جذيه
هالشي يخلي الخصوصيه مختلفه بالبلوقر وورد


ولاترتبكين
لانج بداخلج تعرفين انج الانسب للمكان اللي فيه
ولوما كنتي مناسبه جدا جان ماوثقو فيج وخلوج تعرضين هالمسئله باجر
الله يوفقج ان شاءالله

وانا وايد سمعت ان انسب شي تفتيح فيه اي برزنتيشن او اي ندوه انج تستغلين وقت قصير بالبدايه تتكلمين عن شي ثاني سواء مشاعرج او موقف صارلج
هالشي يخفف الربكه ويخلي الكلام ينساب بسهوله

SHAHAD يقول...

يااا صباااح الأنواار
ومساااء الريااحيين : )

أحلى شي لما تصبحين بويه إنسان تحبينه
الله يخلي لج عمج ياارب : )

وعسى أيامج كلها سعييدة
بس بدون غبار : )

shahad يقول...

بموت من الاندماج و انا اقرا


---
لووول ضحكتني النظارة بس صاجة اونس اتوهمج إنه الجو مغيم مو امقبر
---

لا تبداين بالسلبية كوني واثقة و تكلمي على جنب
;p


لا خوش موضوع قواج الله و قللي من الاعشاب الحليب أفيد

فراوله يقول...

مساالورد والجوري
غاليتي الحبيبه
اغلا استكاااانه
الجميل هو ان نبدأ صباحنا
بوجه جميل من الوجوه التي
نعشق النظر اليها
امثال اهلنا واقاربنا
:)
عسي هالضحكه ماتفارق محياج
بكل صباح ومسا
رغم التغلباااات الجويه
:********

أستاذ حمام يقول...

.. ورجعت خواطر نفسج الشقية، مهم ان الشخص يعبر عن نفسه..

صباحك سكر.. على قولتج ..:)

shakshaka يقول...

صباااااح البراد



وانا مشتطه من ال ٧:٣٠ وانا مرتزه قبل الفراشييين يالله سترك هذا مؤشر مو وايد زييين


مع نهاية البوست خلصت قهوتييي وفصخت النظاره والحين اقدر اصبح علييييج يااا صبااح الفل
;*

shakshaka يقول...

بشري يا استكانتنااا ؟

شكله كلامج اليوم كله ميييااالي على كتر هااا؟ دام ان احلى بس بعد اعتمدي اللوك الميالي لوووول

والله والله والله ولهانه عليج

;*

Kuw_Son يقول...

هههه .. ضحكني موضوع الوجه اللي على جنب ..

صباحج خير :)

بس يقول...

صبحج الله بالخير و الكرامة
و راحة البال

تعلمي تشوفين الاشياء على حقيقتها
بدون نظاره ،وبدون خيال

انتهى الاقتباس


اتمنى اني اتعلم هالشي
ياكثر ما نعرف حقيقته
بس نسكر عيونا عنه :))

صباحك سكر

:: بـوح الصمـت :: يقول...

يا حلااااتج والله :) ..

ونـااسه دايماً خـلي نظرتج حـق الأشياء تفاؤلية .. كن جميلاً ترى الوجود جميلاً =)

من زماااااان أتابع كتاباتج بس من بعيد لـي بعيد .. وللتو أبحرت فـي عالم التدوين :)

لا عدمناج عزيزتـي =)

ربـي يسعد صباحاتج بالخير والمسرات
..
عسى الله يحفظج
:*

ikhalifa.com يقول...

هاه بشرينا
عطيتي المحاضرة على جنب؟
:P

esTeKaNa يقول...

I7na 3shagnaha
~~~~~~~~~~~~~~~~~
صباح الورد
جنه اليوم صج جو لندني؟
ترا شفت الجو من غير نظاره
كل شوي ارفعها اتأكد
حسيت الجو حلو
:))
وعدل كلامج
مرات رؤيتنا للأمور بطريقه معينه تخفف علينا من وقع الصدمه بحقيقتها
!!
شكرا على نصيحتج الجميلة
أموري تيسرت وكل شي كان تمام
الحمدلله

esTeKaNa يقول...

Someday
~~~~~~~~~
بالضبط هذا اللي كنت مسويته
سولفت
وسولفت
وتسهلت الأمور لاني حاولت بقدر الامكان اكون عفوية وطبيعيه بكل الاتجاهات مو بس على جنب
:))
صديقتي
شكرا على مرورج

esTeKaNa يقول...

ميرامار
~~~~~~~~
صباح التفاؤل
تهقين السر بالبابونج؟
شرب البابونج الصبح يفتح شهيتي لكتابة والتفاؤل
:)
اتمنى لك يوم سعيد

esTeKaNa يقول...

abu eldestor
~~~~~~~~~~~~~~
أنا قلت اسبوعي بيكون جميل
لأني اردته كذلك
فمالي شغل بعالمكم
انا عالمي غير
:Pp~

esTeKaNa يقول...

ARTFUL
~~~~~~~~~~
صباح النور
وحياك الله ما سوينا شي
الله يحفظك ويحفظ ام العيال
صج ونسني تعليقك
الله لا يحرمنا من تواصلك الصباحي الجميل
:)

esTeKaNa يقول...

mtfa2el
~~~~~~~~~
واي مت من الضحك
هههههههه
واي اشوة ما طلعو لي
:)

esTeKaNa يقول...

أحمد الحيدر
~~~~~~~~~~~
صباح الورد
شكرا لمرورك وتعليقك العذب
اتمنى لك اسبوع جميل
:)

esTeKaNa يقول...

ikhalifa.com
~~~~~~~~~~~~~~~~
شكرا
كان ناجح
:)

esTeKaNa يقول...

مركبنا
~~~~~~~~
صباحك سكر
يا مرحبا بهالصبااااح الحلو
:)

esTeKaNa يقول...

New Bride
~~~~~~~~~~~
صباح الورد
حياج الله من زمان ما شفناج
:)







Safeed
~~~~~~~~~
صباح الخير
استمتع دائما بقراءة تعليقاتك الذكية
شكرا لتشريفك مدونتي
:)

esTeKaNa يقول...

هند
~~~~~
ياهلا بهند وبمزاحها الجميل
:)
اجمعين يارب
دمتي بخير








Fahad Al Askr
~~~~~~~~~~~~~~~
اشرايك فيني؟
أنا اللي اقنعت
اقنعت الحكومه تستقيل
:pp~





الخيلاء
~~~~~~~
صباح ما يليق الا بخيلائي
:)
تلك العبارات التي تستوقفك
عادة ما يكتبها قلبي
ويراها احساسي
دمتي صديقة رقيقه تفهم مابين الاسطر وتسمع نبضات الاحساس
:**

esTeKaNa يقول...

ReLaaaX
~~~~~~~~~~~~
يا بعد قلبي قلبج انتي
:*
الف الحمدلله
الوضع كان جميل
والنجاح مبهر
الله لا يحرمني من دعواتكم
:)









Sn3a
~~~~~~
ياهلا بالسنع كله
نوم العوافي
استمتعي استمتعي
ولا في اجمل من كسل الصباح ونومه
:))
انا اوافقج الراي كالعاده بخصوصيه المدونة،اما بالنسبه للبرزنيشن فكان جميل
شكرا

esTeKaNa يقول...

SHAHAD
~~~~~~~~~
تلك الوجوه التي نبدأ فيها صباحاتنا
يظل تأثيرها على كل اليوم
:)
دمتي بخير وسعاده يا الشهد





shahad
~~~~~~~~~
يا بختي
!!
شهد وشهد ورا بعض
شهد وشهد ما ياكلهم الذيب
:pP~
يا زين الاندماج والله
:)
وانا احب الحليييييب
توني باديه ابي اخفف منه
وايد اشرب حليب ومو زين حقي تصدقين
انا يسمني الحليب
:pp~
اتمنى لج يوم كله سعاده وفرح

esTeKaNa يقول...

فراوله
~~~~~~~~
يا صباح الفراولة الجميلة
ادام الله عليك ايامك الفراوليه
وغمرك بسعاده غامرة تنير قلبك واحساسه
:))





أستاذ حمام
~~~~~~~~~~~~
ماكو فايدة بنفسي الشقيه
:)
صباحك خير وورد ونوير













shakshaka
~~~~~~~~~~~~
وااااختي واااازين الي كاشخ من السبع ونص ومرتز
:**
ولهانه عليج كبر الدنيا
ولا توصين حريص
ميالي ميالي
:)))
ترا قلبي كله سوالف
ان شاء الله اشوفج قريب
:*

esTeKaNa يقول...

Kuw_Son
~~~~~~~~~
عاش من شافك
:)
وعسى الضحكة دوم يارب








بس
~~~~
اذا ما تعلمنا
مصير هالدنيا وتجاربها تجبرنا نتعلم
:)
صباحج خير وورد ونوير

esTeKaNa يقول...

بـوح الصمـت
~~~~~~~~~~~~~
ما أعذب ما اخترتيه اسما لك
بوح الصمت
!!
يا سلام
انا الاسم مجرد الاسم دخل قلبي
:))
اما متابعتج لأختج استكانة فهذا الشئ يسعدني اكثر من ما تتصورين
نورتي عالم التدوين
استمتعي بالبوح
فالبوح هنا له احساس اخر
ولذه مميزة
دمتي بخير








ikhalifa.com
~~~~~~~~~~~~~~
الحمدلله
كل شي تمام التمام
شكرا شكرا على السؤال
:)

والموت يعشق فجأة مثلي..والموت مثلي لا يحب الإنتظار يقول...

العزيزة استكانة

صباحكِ جمال سيدتي


رغم الغبار ..و الحرارة

ورغم فيزياء البعد والاقتراب

فالحياة جميلة دائماً بنا

دمت سيدتي بخير وسلام

كبرياء وردة يقول...

لا أعلم لم أنا متأخرة الحضور هذه الأيام :s

وأنا مثلك أخجل أن يقرأ أقرب الناس لي كلماتي

صباحج مسك وعنبر عزيزتي