الجمعة، مارس 06، 2009

حللوني

احلى احساس يوم الجمعة
احساس التسكع في سريرك حتى ساعات الظهر الأولى
!!
كل ما فتحت عيني تذكرت الفزعه ،والشوارع الزحمةـوتوتر الطريق
فأغمض عيني ...وارجع انام
عندي مشكلة :
كل سبت أقرا سورة الكهف واذكر الجميع بساعه الاستجابة
ويطلع يوم السبت بدل الجمعه
!!
يوم انج خدايو،اشماله تنصحين؟
........
كنت اريد كتابة بوست من نوع آخر في بالي،
المشكلة ليس بالبوست وفكرته المشكله بأمر آخر يهددني ويؤرق الأمة العربيه والاسلاميه:
أنا قاعده أختفي
!!
اشلون؟
صار لي شهر كل ويك اند اروح الخياط اقصر ملابسي
طولي طبيعي،ما كنت يوما تلك الفتاة المنعوته بطولها،ولست بالقصيره ملفتة النظر
لكن من فتره لاحظت اني كل ما البس تنورة القاها طالت
بنطلون يمشي بالارض
عباتي ..تسحب بالارض
بجاماتي وملابس البيت طالو
وانا اكره ما علي اسوي جملة تنظيف الارض بملابسي
!!
بسكات رحت قصرت اللي اقدر عليه
الحين بروح المزرعه،كل الترينجات طالو
اوكي بقول الخام مو زين،معقوله كل ملابسي خامهم مو زين؟
ضعفت؟...ودي تيجي؟
طبعا لا
يعني معقوله ملابسي قاعده تكبر وتطول وانا لا؟
!!
.
.
.
الاسبوع اللي طاف سئلتني عجوز لا تعرف المجامله جدام الله وخلقه:
علامج يا بنيتي دعيتي نتيفة
هذي العجوز لم تراني منذ سنة،معناته ان فعلا في طور التضائل
واللي حارني...اكلم اخوي ومشتطه :
اختك العوده انا
!!
شالني وقطني الصوب الثاني ومشى
مافي احترام حتى حق كياني،ولو كان كياني قاعد يختفي
.......
كلمت صديقي الحبيب ابوي
قالي الحل وانتي نايمة بصبغ ريولج ابيض مثل الشجر
الأرضه يا بنيتي قاعده تاكلج؟
وطول الليل افكر:
هل فعلا الارضه قاعده تاكلني
:(
تخيلت اني سأستمر بالتضائل قد اصل لحجم صبع اليد الصغير
او اختفي
فسبحان الله الواحد يخاف يختفي وانا مو ضامنه اي وقت اختفي فيه
فسبحان الله..اي احد بخاطره شي
اي احد زعلته دون ما اقصد
حللوني
:Pp~
بروح المزرعه
ولي عوده مساء ان شاء الله على تعليقات البوست السابق ان شاء الله

هناك 48 تعليقًا:

ikhalifa.com يقول...

شكلج صج بتصيرين استكانة
:P
أنا اعتقد أنج ضعفتي و الخمس كيلوات راحوا
:)

enjoy your time :)

Enter-Q8 يقول...

شالني وقطني الصوب الثاني ومشى
مافي احترام حتى حق كياني،ولو كان كياني قاعد يختفي

جذي انتي مو اختفيتي جذي صرتي قوطي كلينيكس حشى
شوفي مالك الا تمارسين الطقوس الكويتية القديمة
توخرين عن الانترنت
تحتكين برفيجاتك القدامه و تقعدين تعزمينهم على مطاعم و بين فترة المطاعم تعزمين الاخرين على كافيهات
و طبعا و انتي تمارسين هواية الهذرة
لازم حلو و كيك و شاي و قهوة و هت شوكلت
و هاتك يا تفخ و كالوري يصعد
و بنهاية الشهر اضمن لك اخوك الصغير ما راح يقدر يحركك أنس و لا سنتي واحد

Manal يقول...

صباحج عسل
:)

تسكعي بالسرير لما تملين
:)

بس عاد لي قمتي اكلي عدل
:)

انتي ما تاكلين على الله وعلى استكانة الشاي

:)

يا حلوج

جمعة مباركة
ولا تنسينا من دعائكم
:)

nikon 8 يقول...

سلامتج إنشاء الله ... ما عليج إلا العافية... دامج ما تشكين من شي ...فالمشكلة في الفراولة لأنها
تنحف
!!!!
عليج بالجمعات مثل طلعة الشاليهات والمزارع... الحلج ما يوقف أكل
بالعافية
:))

Momentum يقول...

الله يحفظج انشالله :)

سبمبوت يقول...

استكانه ..
لا يكون قاعد تصيرين اسم على مسمّى وتتحولين استكانة ؟؟!! الله يهداج لو مسمية نفسج اباجورة مو أحسن؟؟

لوووووووووول .. على أي حال عادي حبيبتي .. والله أعلم المرجح إنج فعلا قاعد تضعفين، لإن الضعف يأثر بالطول .. ما كو شي يمسك ويرفع خبرج عارفة شنو اقصد.

أنا لمّا اضعف جواتيي وانتي بكرامة كلها تصير كبيرة وتطلع من ريولي واقعد اجابخ كأني (غدّونة ) لمّا تلبس احذيتي وتجابخ بالبيت!

على العموم لا تخافين .. آنا بعد في طور الإنقراض .. طولي قبل ست سنين كان 153 الحين قالتلي مدربة النادي طولي 151!!!

أمرنا لله .. هذي حال الدنيا

حلم جميل بوطن أفضل يقول...

الصراحة الحديث عن ملابسك و بجاماتك حديث شيق و ذو شجون

Dasmawee يقول...

و الله مشكلة كبيرة

أنا اقول استجوبي وزير الصحة
:)

مركبنا يقول...

استكانه
اخاف بتصيرين السيدة ملعقة اخر شئ


بدع اخوج
اخاف انج قاعد تضعفين
ترى المتن هيبه وطول

Sn3a يقول...

لووووول ضحكتييني استكانه
يمكن قاعده تضعفيين
ومن بختج اصلا;p

بس حركه اخوج قويه
have a nice time

ماكو آحد يقول...

مبدعه و متآلقه كالعاده .... بتلك التصاوير والاستعارات اللي تكتبينها وانتي ماتقصدين ادرجها في كتاباتك ولكن بعد خيالك و بلاغة لسانك ووسع اطلاعك جعلك اديبه وليست كاتبه ... الكل يكتب ويعبر و لكن القله منهم يسردون ويكتبون ببلاغه و جمال وحس ادبي مشبع بالثقافه الاطلاع... استكانه انتي عندج القدره انج تخلين اتقه موضوع الي اجمل موضوع .. مشالله عليييج .. مابي اكثر بالمدح ومابي اتكلم عن البوست الجديد واقول انه عجبني لانه هم هذا مو شي جديد فانا معجب بجمييع كتاباتج

TruTh يقول...

لووووووول قاعدة اقرا البوست و اضحك

دمج خفيف
:)

اهوا صج الواحد يصير يقصر لكن لما يعيّز ،مو في عمر الشباب

يمكن انتي ضعفانة عشان جذي هدومج صاروا اطول

و تحياتي لج يالمجكنمة
^_^

Kuwait يقول...

@@
ااستكانـه بعد قلبي شكلج بتردين مثل اليهالو تشربين حليب نيدو الي يطول العظام ;p

Fahad Al Askr يقول...

لا تتسبحين بماي بارد، لأن الماي البارد يخلي الأشياء تكش

تنقعي كل يوم يمعة بماي دافي، وحطي عليه قفشتين زيت زيتون حجم متوسطة، ورشة ملح بحر، مع حبة لومي سحاري، وعلب فلفل أخضر من الحجم المتوسط، بعد ما تقصينه نصين

chandal/danchal!! يقول...

لووووووووووووووووووول

اسم الله عليك من الانقراض... انشاءالله ما فيج الا العافية وتلقين سلامتج جدامج


قطيعة شوفي الامريكان شقاطين علينا بديرتنا... احنا بروحنا بنحب القاع هالدور يرشون علينا بلاوي توقف نمونا

وانا بغيضي من الله امشي وبنطلوني يخم القاع... على طول اكفه عند فريدوه


والله ثم والله يا استكانة اني قافظة 2سم من طولي

بكل ياهل اقل سم وأفقد ضرس!!!

مادري شبصفا عليه!!!

----------------


واذا يت على اخوج يشيل و يشدخ فيج... عيل شتقولين عن اللي يعك ابوه ليش انه مو راضي اييبله سيكل!!!!

عسى الله يخليكم حق بعض

:)

I7na 3shagnaha يقول...

اخاف تحبين ؟؟؟؟

kidding :)

الطول ماله حل عندي.. و الواحد كلما كبر يقصر له جم ملم

الوزن ... سهاله..تركي عنج الفراولة و خليج على الكاكاو و اللي أحسن من الكاكاو ...الرهششششششششششش

ويك اند سعيد بإذن الله

ToOoMaTa يقول...

عني بالكويتي كشيتي شوية
هههههههههههه
انكمشي بالبرودة وتمديي بالحرارة
ما بقا شي علا الصيف وتردين وضعج الطبيعي :P
ما قلت لج بتييتة ما صدقتي

جنون إحساس يقول...

لوووول تعالي أعطيج من طولي يكفي ثلاث غيرج بعد

ANGEL HEART يقول...

صدقيني من الضعف خصوصا صوب الجتوف تنزل الملابس

ياتلي فتره ضعفت وايد ملابسي صارت شطولها

ARTFUL يقول...

يا دافع البلا

يالله سترك


لا تنسين اطالبج فلوس رديهم لي


;p

أستاذ حمام يقول...

مواضيعج تميل للسوالف..

لا اعلم اذا كان هذا اسلوبك في الكتابه، لم اقرأ لك منذ زمن.. لكن لماذا لايكون لديك قضية تناقشينها؟ تملئين بها صفحات مدونتك الجميلة.. اليس افضل من الكتابة عن النفس ومشاكل الحياة اليومية؟

مجرد اقتراح.. وصدرج وسيع مثل مانعرفج..

Kuw_Son يقول...

انتي الظاهر شايفة قبل جم يوم فيلم براد بيت

Brad Pitt

الأخير
The Curious Case of Benjamin Button
:P

abu eldestor يقول...

طبعا من التفكير

Najmah يقول...

انا قريت العنوان
وقلبي طاح من الخرعة
!!
ابيه ترى انا صايرة على طريف
مادري شفيني
:)
ترى هذا
لأنج صايرة تنسين ننغدين
وماتبين تشربين حليب الصبح
:Pp

SheLLoO يقول...

أمر عجيب ومدهش في الوقت ذاته ;)

عسى أن يكون لنا من الاختفاء نصيب ;p

لكِ من الحب نصيب ومن الدعاء نصيبان فلا تقلقي نحن معكِ حتى لو كنتِ عقلة الاصبع ;p

عسى الله يحفظج يارب ;*

lawyer يقول...

الكلام الي بقوله ابدا لا يسمح بكتابته اماااااام الناس


و انا بالنسبه لي عادي ماعندي مشكله بسسسسسسسسسس ادري بتزفينيييي


فاحترم نفسي من الزفه
واقووووووووووولج سبب الاختفاااء بيني و بييييييينج

mellow يقول...

شلون يعني نحللج؟

تبينا نسويج لج تحليل؟

حبيبتي من الضعف هدومج تخق عليج و تطيح...ماله شغل بالطول

عيل إشحقه إخترعوا الكعب؟

آنا أصلاً ما أفكر أروح الخياط إلا لمن أول شي ألبس معاهم كعب تالي إذا ما فاد أرفعهم من فوق و أحط جلاليب..عاد بعدين إذا ظلوا يحوسون بالأرض و تعرجبت فيهم رسمي أو إذا المصيبة الأكبر إنفج الجلاب ساعتها احترم نفسي و أروح الخياط

|:| DUBAI |:| يقول...

خالو

شكلج تغارين من باريس هيلتون

عيني بعينج؟

!

لووول

that's iT يقول...

لا ماكو إلا أنج ضعفتي!

عاد الله يهديج ديري بالج على صحتج غذيها:)

و الله يحفظج


شلوون المزرعه؟

والله خوش جو ماشاالله رحنا اليوم القهوه الشعبيه:)

ur sis

QiYaDiYa يقول...

ايي والله حتى انا اخترعت من العنوان !!

;s


و اعجبتني سالفة تنظيف الارض بالهدوم ;p

شوفي انا مرة كنت مودية عبي المصبغة
ردوهم مقصملين
دقينا عليهم قالوا شوفوا جم سم اقصروا و نردهم لكم مثل اول !!

حتى هذه اللحظة ما وديتهم ;p
لكن احتمال ان الصابون الي عندكم يطول الهدوم ;p ;p

جربي غيري الصابون ;p




لا تصدقين ماله شغل الصابون ;p

و ان شاء الله تكونين استانستي بالمزرعة
الدنيا ربيع و الجو بديع الحمدلله ;D ;D ;D

شـقـــــران يقول...

الغالية استكانة

صباح الانوار وأجمل عطور الأزهار
صباحك هدى من الرحمن
صباحك محفوف برضى الوالدين
.
.


ذكرتيني بمسلسل كرتوني قديم اسمه

عقلة الإصبع
:)

لاتقولين شكو..ما ادري طرى على بالي



وبصراحة ياغاليتنا أتمني تشوفين حل لهالمشكلة فنحن نخاف عليكِ من الانفراض
:)


لكن دام السالفة صجية...فيبيلك تمارين آيروبيك للتمطط والتمصع
:p



أما التحليل
فلاتخافين فأنتي من غلاتك عندنا زلتك مدموحة من عرجها ولا لك عندنا إلآ الغلا
:)




تقبلي مني أجمل تحايا الصباح

صبا يقول...

اسم الله عليج

استكااانه
عادي
مو بس انتي

بعدين انتي طولج حلو
لعبي كرة سله
نطي الحبل
تعلقي بالباب
اطولييين
:****

واخوج جنه ولد اختي
كله يشيلني
بس وناسه
:***

اي نسيت اقولج انا رديت مريني
:***

kazmawy يقول...

اسم الله عليج يا الاستكانة :)
يا وخيتى هذة انتى من كثر مانتى طيبة صايرة خفيفة على قلوب الناس ووزنج وزن الريشة :)
مالج الا العافية لا توسوسين
صدقينى اسبوع واحد نغدين عيوش ولحوم ويرد طولج مثل ماكان:)

كبرياء وردة يقول...

اكلي اكلي اكلي :)

enjoy your time

3BeeDo ;) يقول...

لووووووول احلى شي انه الوالد يقولج صبغي ريلج ابيض نفس الشير :>
يمكن الملابس صار فيهم شي كبرو من الغسيل او شي
بس انا اعرف اذا الملابس دشو بالماي بعض الخامات تصغر اما يكبرون يمكن قامت تصير وياج

قانونى كويتي يقول...

سلام عليكم

العزيزة استكانه

يعطيج العافية

ما فيج الا العافية

وصج الواحد يتغير شكله

بس مو معناته انه يستسلم للموت بعيد الشر عنج

اتمنى لج رحلة موفقة للمزرعة

ومن المزرعة نبى نسمع اخبارج بالمزرعة

اشلون تلعبين مع الحيوانات اللى عندكم

وتحياتى لج

{~المباركية~} يقول...

انا كل يوم يتغير شكلي ليش ؟
مره اصير حلو ومزيون ومره جيكر

بنت الشامية يقول...

انت محلله دنيا واخره

نصيحه ثانيه بعد التسكع بالسرير
قومى تريقى وردى تسكعى مرة ثانيه
وااااي متعه وبعد تعسيلة ثانيه
تقومين نشيطه....وما تردين تنكمشين

يابعد عمري لا تحاتين كل هذا من العمل والوظيفه والمحاتات ورعوة قلب الموظفاااات اللى اكلوا قلبك من بدري بدري...لووووول


الحل وانتي نايمة بصبغ ريولج ابيض مثل
الشجر.....اول مرة ادرى انهم يصبغونها عن الارضه
كل حسبالى انه موديل وتزين للشارع
ههههههههههههههه

دروازة يقول...

شوفي

انتي شكلج استكانه عودة ... موديل لبنانب والا تركي

وودج تصيرين استكانة كويتية ... أم نقطة

مافيج الا كل خير

وحافظج الله اختي

وانتي محلله قبل لا تقولين :)

ReLaaaX يقول...

استكانه جيكي الله يعافيج والله صج إذا ملاحظه إنج قاعده تقصرين روحي راجعي شوفي شسالفه اسمالله عليج ان شالله ماكو شي

بس ديري بااااااااااالج



ردي مره ثانيه شوفي جم طولج بالضبط بهالميزان اللي عند الصيدليات اللي اهوا يقولج جم الطول .. وردي بعد فتره جيكي نفسه والا تغير



مابي اخرعج بس صج شوفي إذا فرق والا بس مع الضعف لأن تحصل وايد وياي خصوصا مع التنانير فأدري اني اسمالله علي ضاعفه والا ماتنه ;p

أحمد الحيدر يقول...

محللة أخيتي ..

ونصيحة لا تنقعين بالماي وايد ;p

أو يمكن عيزتي ترى .. الكبر شين ;p

esTeKaNa يقول...

ikhalifa.com
~~~~~~~~~~~~~~
تخيل اصير استكانة
hehehee
لا انا كلش مو ضعفانه للاسف
:Pp~








Enter-q8
~~~~~~~~~
انا قصرت
وهو اسم الله عليه طول بعرض
:)
هذا كله انا اسويه
بس ماحب الهوت شوكليت
الظاهر هني المشكله
:pP~








MaNal
~~~~~~~~
أنا صج مرات انسى ااتغدا
بس مبدعه بالخرابيط
:)
حبيبتي انتي
ما ننساج من طيب دعائنا ان شا ءالله









nikon 8
~~~~~~~~~~
hehehehe
صديقتي ..لا توصين حريص
امس جنه طاقين الطريج عشان ناكل
:Pp~









Momentum
~~~~~~~~~~~~
اجمعين يارب
:)

esTeKaNa يقول...

سبمبوت
~~~~~~~~~
لكل انسان من اسمه نصيب
فانا قلت اشلون اخذ نصيبي من اسمي
قلبت
وقريبا جدا بصير استكانه
LOOOOOOOL
عيل تبيني اصير اباجورة؟
اي يا سمبوسه تضحكين علي ها
باجر اذا اختفيت تفقدوني
:pP~
وي حتى انتي قاعده تنقرضين؟
اشوة عشان ما اكون بروحي لما اصير صغيرونه
:))
حبي لي غدونه الله يحفظها











حلم
~~~~~~
هذا اللي همك بالموضوع؟
!!
غريبه









Dasmawe
~~~~~~~~~~~
طبعا مشكله كبيرة
واعتقد هذا راح يكون سبب وجيه للحل الياي
:Pp~










مركبنا
~~~~~~~~~
لا لا كل شي ولا المتن
احنا عيب نضعف
علينا كفاله ما نضعف
:pP~
واي احب السيده ملعقه
:))











sn3a
~~~~~~
ودي اضعف
بس انا مو ضعفانه
بس اقصر اقصر
اخر شي بصير جني كاتشب صغير
hehehehe

esTeKaNa يقول...

ماكو أحد
~~~~~~~~~~
أخي العزيز ماكو أحد
:)
كلماتك الجميلة وتعليقك الرقيق انما هو انعكاس لتألق روحك ورقي نظرتك لكلماتي البسيطة
!!
رغم انطلاقي في الرد على كل التعليقات
الااني اجد صعوبه كبيرة تعقد لساني وخجل يربك كلماتي للرد على كلماتك الجميلة في حق أختك استكانة ومدونتها
شكرا من القلب
نورت المدونة بمرورك الجميل
وتواصلك الاجمل

esTeKaNa يقول...

Truth
~~~~~~~
واي ما شفتي ويهي يوم قريت المجكنمه
استانست
لووول
:))
بما اني مو قاعده اضعف
معناته اني عيزت
هذا واللله اعلم
:pp~










Kuwait
~~~~~~~
loool
الظاهر جذي







fahad alasker
~~~~~~~~~~~~~~~~~~
يمه
!!
يعني الحين انا كشيت؟
انا كنت مقتنعه بنصيحتك
بس متأكد هذي مو مرقه؟
أخاف اسويها اختفي بدقيقتها
;Pp~







chandal/dancha
~~~~~~~~~~~~~~~~~
لوووووووووووول
واي شكو الامريكان
ذكرتيني بيدتي
لي لحين لو تكرفس واحد بالغلط
قالت عمى بعين صدامو اهاو اللي عثرنا وعثر عيالنا
لووووول
تصدقين اخاف احد داعي علي :
وقدم
يا مال الدقم
!!
ومرت ملك
:((
يا حسرتي ..كل ياهل ضرس وسنتي؟
عيل انا باديه مبجر مادري شنو بيبقى لي على ما اصير ام
:))














I7na 3shagnaha
ّ~~~~~~~~~~~~~~~~~
الحب يخليني قزمه؟
وي وي
مو خوش بشاره عاد انا ناويه احب
:pP~









جنون احساس
~~~~~~~~~~~~~
اسم الله عليج الله يحفظج
الطول هيبه وجمال
:)









ANGEL HEART
~~~~~~~~~~~~~
انا ما ضعفت كللللش
بس الظاهر برجع على سالفه الكتافيات
:Pp~









ARTFUL
~~~~~~~~~
هاو فلوس شنهو؟
بدينا بدينا
انا فراوله ما شفت
;pP~










أستاذ حمام
~~~~~~~~~~~~~
شكرا اخي العزيز على الاقتراح
المدونه بالنسبه مساحة البوح والفضفضه والكتابه بأي امر يخطر في بالي
وليست موضع مقالات وامور جدية فقط
:)
حياك الله
وشكرا على النصيحة










kuw-son
~~~~~~~~~~~
لا لازم اشوفه
:)
عاش من شافك
!!










abu aldestor
~~~~~~~~~~~~~~
لو التفكير يقصر
جان انا من زمان طول هالقلم
:)







najmah
~~~~~~~~
انياهاهاهاها
شرايج فيني وانا شريره اخرعج
:PP~
اي صح انسى اتغدا
لازم ما انسى
:**








SheLLoO
~~~~~~~~~~
ضحكتني عقلة الاصبع
ههههههه
:)
الله لا يحرمني منك صديقتي الجميلة










Lawyer
~~~~~~~~
عفيه على الشاطرة
حتى اذا بتقولين لي ديري بالج مني ترا ازف
:Pp~









Mellow
~~~~~~~~~
تهقين ابيكم تسون لي تحليل؟
هههههه
اي انا جذي ما اروح على ابو بلبس كعب
بس المووضوع استفحل
حتى مع الكعب
وهاليومين غبار
:(
لازم اسوي لي صرفه












Dubai
~~~~~~~~
ياربي كله يخونج التعبير
قصدج اهي اهي تغار مني
:Pp~








That's it
~~~~~~~~~~~
ان شاء الله ادير بالي على نفسي
شكرا :)
المزرعه زينه
طالما الجو جذي حلو










شقران
~~~~~~~~~
ياهلا ويا مرحبا بأبو راكان
حلت علينا البركة بقدومك الجميل
:)
عاد تدري اني احب عقله الاصبع؟
كان الكرتو المفضل عندي
:Pp~
وانا اليوم بديت بكل المحاولات للمحافظة على نفسي من الانقراض
والله كريم
:))
عسى عمرك طويل يا شقران
لتعليقك وقع جميل في قلوبنا دائما










صبا
~~~~~~
واااااااااااااي
انتي وينج وقفتي قلوبنا يا شريره
@@
ان شاء الله يايتج يايتج
:**










Kazmawy
~~~~~~~~~~
الله
هذا التفسير الحلو والله
:)
ما تقصر يا كظماوي هذا من طيبك
بس نصيحتك
ممممممم
حرام عليكم كل يوم عيوش شنو يصير فيني
:Pp~










كبرياء وردة
~~~~~~~~~~~~~
واي من تعليقج حسيت اني سمنت
لول










3BEDO
~~~~~~~~
اي انا كل الامور عندي عكسيه
حتى الخام قام يطول
لوول
:)









قانوني كويتي
~~~~~~~~~~~~~~
وعليكم السلام ورحمة الله وبركاته
يزاك اله خير ما قصرت يا قانوني
وما استسلمت ولا شي
مجرد شي طرا في بالي وكتبته
:)
وانا العب مع الحيوانات؟
بلاك ما تعرف استكانة
:))









المباركية
~~~~~~~~~~~~
يمكن انت ثلاثي الابعاد
من كل بعد تكون بصورة
وهذا الفن
:pP~








بنت الشامية
~~~~~~~~~~~~~~~
ياهلا ويا مرحبا بشيخة الشامية كلها
:**
ترا ابوي يعطي معلومات
والله انا وايد مستفيده منه
يا زينه
ههههههههههه
بعدين على النصايح بصير عرض الباب
بصير يعني متينه وقصيره جني كاتشب صغير
:Pp~








دروازه
~~~~~~~~
خوش تفسير
:)
ماقصرت يا دروازه
عسى ربي يحفظك ويسعدك دنيا وآخره









Relaaax
~~~~~~~~~~~
واي يمه يمه
حسيت الموضوع خطير
بروح اقايس كل شوي واشوف شنو اخرتها وياي
:)))










أحمد الحيدر
~~~~~~~~~~~
عيزت؟
واي مو خوش شي
:))






متفائل
~~~~~~~~~~
عفوا صار غلط بالترتيب
بس هذي نصيحة؟
تبوني اصير عرض الباب
:)

ARTFUL يقول...

قلت يمكن نطلع منج بشي

;p

لا تخافين الفراولة لج من اللي يوصلي نقصة

;p

:: بـوح الصمـت :: يقول...

HeHeHe :O

وعليّـه كسرتي خاطري ;q


الله يعينج صراحـة .. وهنيالووو خياطج ربح لانج بتصغرين الكبت كله كااك

رحلة موفقة مؤخـراً :)

:: بـوح الصمـت :: يقول...
أزال المؤلف هذا التعليق.