الأربعاء، مارس 04، 2009

فراولة

بخاطري فراولة،رغم أننا لسنا بموسم الفراولة
ومنذ متى كان خاطري يرضخ للمواسم؟
.
.
.
ستكون لاذعه الحموضة وقولي ما قلت
!!
ابتسم لرده:
أنت بس تنقص لي فراولة وانساني
تسمعنا هي من بعيد ثم تدلي بدلوها:
الله يعينا،انتي اذا ربي بلغني فيج وتنسيتي
بتوقفين الكويت على ريل واحدة
اغمز لها بعيني واضحك:
وحاجيب الهبال دة منين يا يمه
:Pp~
.....................
فراولة تفتقر للرشاقة،اناظرها وافكر:
هل لانها حقنت بشئ غير طبيعي اصبح هذا منظرها؟
تماما ككل الاشياء غير الطبيعيه...لا احب منظرها
وطوال قرب (الغير طبيعي مني) مني اعلم بقرارة نفسي ان في لحظه واحده قد تسقط اقنعتها
!!
.......
استشعر فكرة اني اشتهيت شئ وهو أمام يدي
رغم بساطة ما تمنيت،الا اني مؤمنه ما هو أجمل من الاحلام هو تحقيقها فعلا
ولو كانت تلك الاحلام والأمنيات بسيطة جدا
.......
اغرس الفراولة بشوكتي باستمتاع،غرس الشوك في الأشياء اللينه ممتع
يرضي غريزه الشر فيني
هل انا شريرة؟
أحيانا
.
.
يصل عصير قلبها للساني اغمضت عيني بشدة
وأزم شفتي بحدة
واعتفست كل ملامحي
!!
هو،ضحك ضحكة انجاز:
مو قلنا حامضه؟
ارفع حاجبي باستنكار:
منو يقول؟
ابحث عن اقرب سكر،واغرقها بنعومة السكروابتسم رغم الألم
وهنا اعترف لنفسي مابين أروقه قلبي باعتراف:
اني اتحمل دوما مسؤليه اختياري وذنوبي وحدي
ويصعب علي الاعتراف لأحد بحقيقة خطئي،ولوكان اقرب من لي
أنا لا احب ان ابين ضعفي
ولا احب ان ابين حموضه الفراولة التي ادمعت في تلك اللحظة عيني
!!
.
.
أحيان اشعر بأني فعلا احتاج تلك الحموضه اللاذعه تذوب في لذه سكر ناعم
قمه..الى قمة مناقضة
تلك المذاقات الحدية ،تعطيني احساس بالدنيا
!!
تعطيني احساس بأني مهما اعتفست ملامحي،أكيد ستنفرد
مهما سحبني شئ لقاع الحزن،اكيد سأتمسك بخيط من الأمل
نحتاج ذاك الذي المذاق الذي يقرصنا،ومذاق للدنيا يذوبنا،وآخر يشعرنا بمرورتها
لا سكر يدوم
ولا مرورة تدوم
مزاج المتناقضات يعطيك حقيقة هذه الحياة
واصعب احساس بالكون....ان تعيش بمذاق واحد لو يوم
.
.
.
لما كنت اعتقد ان مذاق اول شي يصلني سيكون هو مذاق هذا اليوم؟
اليوم صحيت من النوم اريد عسل
!!
بمجرد ان فتحت امي نوافذ الغرفه واوقظتني
فتحت عيني :
يمه انا ابي عسل
جلست على حافه السرير وابتسمت:
استكانة انتي حلمانة؟ قولي يالله صباح خير؟
شربي حليب اول
اغمضت عيني مرة أخرى ونمت،فاذا كنت حلمانه بعسل شعرت برغبتي باكمال الحلم
وان كانت امي تعتقد اني بحاجة لشرب حليب واكل توست من الصبح
فلا طبنا ولا غدا الشر....هل انا بيبي عمره ربع قرن مثلا؟
.
.
.
عندما انسى ان اتغدا اربع ايام متواصلة،واكتفي بالكاكو طوال اليوم
عندما اصحو من نومي اريد عسل
اعرف اني متوترة،اني خائفه من شئ ،واعتقد ان تلك المذاقات السكريه تموه احساسي
!!
مهما كانو بقربك،مهما اعتقدو فهمك،لا أحد يفهمك سوى نفسك
لا أحد يعرف مذاقات الألم،اوالامل
الحب والصبر
وحتى مذاق الفرح في قلبك،مهما وصفته فلن يشعر به ويتذوقه الا قلبك
مهما تصنعو اهتمامهم وحبهم،فصدق مذاق ما تشعر به صعب ان يصلهم
......
هناك امور بسيطة،ابسط من ما نتخيل،تمر على غيري مرور عادي
اما انا
فتركيز احساسي بكل شئ بسيط حولي يسعدني احيان
ويخوفني من نفسي احيان
ويشعرني بجنوني احيان اخرى
تمنيت ان اكون يوما كرسي
فقط
لان الكرسي لا يشعر ولا يفكر
!!
.
.
.
صباح آخر مختلف
اصل فيه لعملي بوقت ابكر من المعتاد
استند فيه على مقعد وفي،.يحبني ويرافقني طوال النهار
اشرب قهوتي
واخفيت هنا مابين اغراضي فراولة
ربما...اشعر اني احتاج لمشهد أخر من حموضتها بعد وقت قصير من الآان
.
.
.
صباح الفراولة
والبوست اللي ماله سالفه
:)

هناك 50 تعليقًا:

حلم جميل بوطن أفضل يقول...

الفراولة ترس الجمعيات

بوستك عميق جداً

I7na 3shagnaha يقول...

صباحج فراولة..صباحج عسل .. اي ماكو سالفة .. أحلى سالفة :) بس انا أبي صباحي كاكاو :)

Good Morning ;p

lawyer يقول...

وااي ذكرتيني

توني من جم يوووووووم
شايله جيااااس و و اغراض و رفيجتي ساحبه جنطه و مستعيلييييين بنروووووح مريت يم محل جودايفا و الا الفترينه كلها فراوله كبيره مغلفه بالكاكاو

جني ياااااهل ابي فراوله
وادش داخل اخذ فراوله حقي و حق رفيجتي


كلش مو وقته و اوقف في نص الشاارع اعرم الفراوله
وااااااااااو لذيذه حدها و مايهاااااا يسيييييح و الكاكاو يعفسني و ماعندي كلنكس و ادبق بسسسسسسس المهمممممم كليتها
مو مهمممممممم ابدااااا النتايج و العفسه

ابيييييها باخذها
ياااااااااااربي اي شي صاير بخاطر عمري كلش ما اقووووووول حق روحي لألأ

شكلي بكتب بووووست في تدليل نفسي المفرط
ههههههههههه


صباحج فراوله لذيذه موووووووووحامضه

سبمبوت يقول...

صباح التوت والتفاح والكرز ومصاصة قلب الحب القديمة ..

صباح كل شي أحمر جميل ولذيذ بلذّة قلمك وخفّة روحج .. حتى لو كان ما عندج سالفة :)

Najmah يقول...

استكااااانة
هل اهو توارد خواطر
افكار
او توارد اشتهاءات؟
أمس طول اليوم أحن مشتهية فراولة
ويابولي اياها
وطلعت حامضة ايضا
بس استمتعت فيها
:)
لحظة شوي ورادة
:*

violinist_q8 يقول...

بالعافيه
الفراوله عرف عندي اول ما اوصل ماليزيا على مزارع الفراوله طوالي
=
http://i190.photobucket.com/albums/z160/umsamaa/DSC06589.jpg
=
وهذا المحل عند المزاع لقيت صورته بالنت
كل شي عنده بنكهة الفراولة

ARTFUL يقول...

البوست اللي ماله سالفة بس تعقيدات اللي فه والتناقضات سويتيها سااااالفة

الله يغربل ابليسج


قولي اشتهيت فراولة وابوي قالي حامضة
كليتها وغصبت نفسي عليها

ورحت الدوام امبجر وشربت قهوه
وخلاص

;p

راح يطلع مليييق لو كاتبته نفس ما انا كتبته!!!

بس كتابتج غير

;)

الله يحفظج

على طاري الفراولة

في فراولة تنزل بجمعية الفيحا

ما تنزل اهني الا خالصة الصوب الثاني

فراولة ما ذقت نفسها بكل الكويت ويمكن بره

شي محلي بس راااااقي

طبعا احنا توصلنا لي البيت ما يحتاي نروح الجمعية

انتوا الله يعينكم

;p

Q8EL5AIR يقول...

موقلنا حامضة !!


بس تصدقين احلى شي بالفراولة اذا يت حلوة بدون لا تغمسينها بالسكر :)

اممممممممممممممممممممممم :)



مع تمنياتي بدوام الفراولات :)



وتحياتي ..

ويسلموااااااااااااااااااااااا :)

QiYaDiYa يقول...

لا تشوفين شنو صار فيني لما قريت فراولة !!!!!

قلت هل شافت الصورة الي صورتها امس مثلا ;p

http://www.flickr.com/photos/qiyadiya/3328415293/


امس كنت رادة من الكلية الساعة 5
و ضايق خلقي على مادة الغوها و لازم اسجل بدالها و هذا اخر كورس لي ان شاء الله
ما فيني اقعد كورس على مادة ..

المهم ..
شلون اغير مزاجي ؟
قلت مالي غير الفراولة ;p

مريت الجمعية خذيت اللازم و قعدت اصور ;p




حبيت جملة
طفل عمره ربع قرن ;p ;p


صباح الفراولة اللذيذة
لاستكانة الجميلة ;*

دروازة يقول...

محد يقدر فرحك كثرك

ولا أحد يعرف عمق حزنك الا قلبك

بس ... ان الله رزقج الحب الحقيقي

راح تلقينه يقدر هالشيئين أكثر منج

...

على فكرة الفراولة عندنا طحيح


هذا موسمها

كل يوم نشتري منها ... فريش

وطعمها زي العسل

يعني خالطين الشيين اللي ودج فيهم

Najmah يقول...

back
استكانة
تلك الاحلام الصغيرة
الأمنيات التي نعلقها بأبسط
خاطر ممكن نطلبه
المشاعر المتضاربة التي نشكلها
في شيء مادي حتى نتلمسها
الاحساس الذي يتشكل في خطوط
معقدة لا يفهمها سوانا
ترسم خطواتنا الحقيقة رغم بساطتها
انا اؤمن أن الخطوة الاولى
ليس بالضرورة ان تكون اكبر الخطوات
يكفي ان تكون اشجعها
واقربها لأرواحنا
:)
استكانة
صباحج ورد احمر
وقلب ولهان
وفراااولة
:**

قانونى كويتي يقول...

مساء الخير

العزيزة استكانه

على طول الخط مبدعة

وبعدين احلى شى توصلين الدوام امبجر

وهذا يدل على الفكر الرايق

واتمنى الراحة لج على الدوام

والفراولة محبوبة بكل وقت صيف ولا شتا

تحياتى لج

lawyer يقول...

ARTFUL


شنو اسسسسسسسسم الفرواله او ماركتها


خوووووووو احنا مشششششفح


و السايق دامه 24 ساعه في جمعيه الفيحااااااا خييبها مره وحده

esTeKaNa يقول...

حلم جميل
~~~~~~~~~
ابي فراوله لذيذه
مو مهجنه جنها تفاحة من اللي يرشونه عليها
:(
سعيده انك شعرت بعمقه












I7na 3shagnaha
~~~~~~~~~~~~~~~~
يا صباح الكاكو الذايب
!!
ليش الكتكات يكون الذ اذا ذاب؟
بكتب بوست يوما ما عنه
:))








lawyer
~~~~~~~~~~
تدرين شنو كلمه اعرم الفراولة كلمة مؤثره؟
ياربي سمعت صوت العرام
ههههههههههههه
احد ياكل الفراولة يقوم اعرم؟
اذا كليتي قوزي شنو بتقولين؟
اذا كليتي خروف منسدح متشرقد على العيش شتقولين؟
يا امي هذي فراااااولة
شي ارق من العرام
ههههههههههههههه
عيزت ياربي ابي هالبنت تكون رقيقه
pP~
الحين اشلون انا ابي
!!
زين جذي
انا صايره احب اشياء بالايحاء
الحين ابي من هاللي عرمتيه
اشلووووون
:)))
هني هني وعافيه يا جميلة
وناطرة بوست كيف تدلل نفسك
:Pp~













سبمبوت
~~~~~~~~~
يا الله
شكثر كنت احب هذي المصاصه الحمرا بقلب احمر ...كانت لها استخدامات اخرى
في زمن كانت فيه الحمرة ممنوعه
:pP~
صباحك مشرق باشراق روحك وكلماتك التي تسعدني في كل صباح




Najmah
~~~~~~~~~
يا صباح نجمتي انا
:**
ياربي يا حبي لهلبنت
حتى بالفراولة؟
غمسيها بسكر بس ناعم
بتكون الذ
او ذوبي ككاو وبربسي
انا احب التبربس
:pp~












vilonist-q8
~~~~~~~~~~~~~~
وااااااو
كل شي بنكهة الفراولة
ليش تقولي ليش؟
الحين شسوي
ابي

:((
ترا الصورة مادري ليش ما طلعت لي

والله يعافيك اخوي العزيز












ARTFULL
~~~~~~~~~~
صباح الزفه
جنك زفيتني
:))
هههههههههههههههه
تمون تمون
يا اخي العزيز تقبلو فلسفه الفراولات
شسوي اذا انا كل شي اتأمل فيه واحس فيه
:(
صج بجمعيه الفيحا؟
خوش عز الطلب
بعدين شنو يعني توصلك ما توصلنا
ناس وناس؟
:Pp~







Q8EL5AIR
~~~~~~~~~~
ياهلا ويا مرحبا
:)
أوافقك الراي حلاتها اهي من روحها جميلة
بس اذا اهي حامضه شتسوي؟
يا تغمسها بسكر
يا تسويها عصير
:)












QiYaDiYa
~~~~~~~~~~~~~
يمه يمة
فديت الفراولة كلها
لا تشوفين ويهي واستمتاعي بالصورة
جني عمري ما شفت فراولة
:PP~
صباحج فرح وخير ونشاط
وشصار على المادة؟
لا تكدرين نفسج
وان شاء الله كل الامور بتتيسر
طمنيني عليج
:**










دروازه
~~~~~~~~~
أدام الله عليك الحب الذي يغنيك عن الدنيا ومافيها قول آمين
:)
جملة واحده
لكتها استوقفتني طويلا اخي العزيز
!!
والمهم من كل ذلك:
متى بتوصلني نقصه الفراولة؟
:Pp~
لان شاقني اللي عندكم
شسوي انا ترا احب الاشياء بالايحاء
فلما قلت لي تجمع الشين
قلت ابد عز الطلب
:)

ToOoMaTa يقول...

سالفتج سالفت بنتي امس
الساعة 10 بالليل ابوي يتصل
تبون شي ظروري من الجمعية؟؟
قلت لة لا سلامتك
تنط بنتي اي يبا انا ابي فراولة؟؟؟
اقولة لا يبا سلامتك
اهيا تقول شفيييج
قوليلة فراولة
قولة يبا خلاص انا باجر امر الجمعية ماكو شي ظروري
تقولي منو قالج الفراولة مو اشياء ضرورية؟؟

قريت بوستج
دقيت علا البيت
قلت لها رديتي من الروضة
قالت اي ومريت الجمعية شريت فراولة :):)
عليكم بالعافية انتي وياها

esTeKaNa يقول...

najmah
~~~~~~~~
لما بعد كل تعليق لك لابد من آه تخترق صدري مع ابتسامة تشرق بروحي
ويا حبي لهالبنت
:**
الله لا يحرمني من فهمج الذكي لما بين سطوري واحساسي
:))





قانوني كويتي
~~~~~~~~~~~~~~
ياهلا ويا مرحبا بالقانوني الكويتي
شكرا على رقي مرورك
وادام الله عليك راحة البال والسعادة قول امين
:)








lawyer
~~~~~~~~
ليش تسئلين؟
بتعرمين فيها
:pp~

ARTFUL يقول...

اهي بدايتها زف بس آخرها مدح يا حظيييي!!!

;D

أكيد توصل للبيت

يار المزرعه و يار البيت و صداقة قديمة بين الرجال والنساء وأهل

وهم ما توصل للبيت ما يصيير؟؟!!

من الراس المرفوع بعد

;p

حررره
----------
حاولت أتصل بس ما حصلت احد
و اللي اعرفه من غير اسم تكون بكراتين بيض

كبار شاترين وحمر

جمالهم يجذبك اليهم

نفس اللي صار بلوير

والطعم يستحق الجلوس بجو هادي وبراااد


والبال مرتاح

واحلى لو تكون بالشاليه وقمره ونسناس خفيييف

وتستمتع بكل قضمة

-------
خبر سيء

خلص انتاج السنه

نشوفكم السنه الياية وبس تنزل أخبركم او قبل لا تنزل

لاني سمعت ان اذا انزلت ما اتم اكثر من ساعتين

;)

عثماني يقول...

مادري ليش ؟؟

تذكرت اغنية الفراولة

الفراولة .. بتاع الفراولة

مرة غناها سمير بن غانم في مسرحية المتزوجون

:)

الفراولة يا استكانة انواع

اكو شي يسرسح على القلب .. شحلاته

و اكو نوع اعوذ بالله .. لوعة

الله يبعد عنا النوع الاخير

قولي امين

:)

ARTFUL يقول...

تحديث

وصف الكرتون

أبيض وعليه لزقه مكتوب عليها فراولة عنابة

ودمتم

;D

ShLaLaT يقول...

احب لما اشتهي شي اسويه

صاجه احلى شي تحقيق الاحلام

وحلمي الحين مخدتي

اطاوعها ولا احقرها ؟

;p

ReLaaaX يقول...

صباااااح الفراوله .. لا الحين صار مساء :p


بالعكس الفراوله الحين زين سعرها يعني موسمها --> صارت خبره الاخت


لا جد يعني البلاستك نلاقيه بربع آنا قبل جم شهر شاريته ب 900 فيعني قبل الجم شهر ماكان موسمها بس الحين اعتقد اعتقد موسمها ;p



نصيحة مهما كانت حموضتها تحمليها لأن يظل طعمها الحامض احلى من ان ينضاف له شكر .. كنت ازف اللي يحطون وياه شكر اقولهم عيل اكلو الشكر بروحه :p


وايد اقدس الفراوله وايد



--


العسل ولله الحمد مااحبه كلش ملش



واستمتعي بحياتج حامضه والا حلوه

لازم نتأقلم ;*

mtfa2el يقول...

على قولة صديقي الصدوق بو سانتوس

Excellent posting

و الله عاد صج اشتهيت الفروالة

جربيها مع كرنيشن و شكر
الشي الوحيد اللي اعرف اسويه بحياتي

محـــــارة يقول...

"تعطيني احساس بأني مهما اعتفست ملامحي،أكيد ستنفرد
مهما سحبني شئ لقاع الحزن،اكيد سأتمسك بخيط من الأمل"

تدرين استكانه شكثر مشتاقتلج شوق ماينوصف انتي والزين وعالم التدوين بكل فصوله

حبيبتي هالمقطع فعلا أهوه مايجعلنا نتحمل ونتأمل بخيوط البياض ستبان مهما طال الزمان

"
مهما كانو بقربك،مهما اعتقدو فهمك،لا أحد يفهمك سوى نفسك
لا أحد يعرف مذاقات الألم،اوالامل
الحب والصبر
وحتى مذاق الفرح في قلبك،مهما وصفته فلن يشعر به ويتذوقه الا قلبك
مهما تصنعو اهتمامهم وحبهم،فصدق مذاق ما تشعر به صعب ان يصلهم "

وهذا سر فهم الذات وصداقتها .. لن
يوجد لنفسك صديق أكثر من ذاتها

استكانه ولهانه عليج حدي اشوفج بأقرب وقت يالغاليه وسامحيني على التقصير

Sn3a يقول...

اختي الغاليه

احب لذه الانتصار
اهم يشوفونها فراوله
انتي تشوفينها امنيه وتحققت
سواء كانت امنيه بسيطه او كبيره .. المهم تحققت

تدرين لما اشتهي فراوله بغير موسمها وين القاها
بجوكليت بار
مو صج هالمكان بكل وقت الفراوله لها نفس الطعم;p

لوول شربي حليب اول
ضحكتني.. ليمتى احنا يهال بعيون اهلنا
تدرين السفره اللي سافرتها توه كانت اول مره اركب طياره بروحي واحوس بروحي
امي وابوه واخواني لازم كل شوي
يدقون
لحقي الناس
اقري الكلمات اللي عاللوحات
مو تحركين من مكانج
شدعوووة !


قواج الله استكانتنا

Q80 Blogger يقول...

مساء الخير

تره اطلعت فراوله برقبتي من هالسالفه


اقول حق الوالد .. دام قالو فراوله .. خلاص عطهم فراوله .. لازم اتشوه يعني !! !!

nikon 8 يقول...

يمة منج يا إستكانه
وهذا وإنتي ما عندج سالفة والبوست كله معاني بين السطور
عيل لو عندج سالفة شيصير....لوووول
ذكرتيني لما كنا بالمدرسة الأبله لي سألت وما عرفنا نجاوب قالت : يا كراسي... يا كرسي على كرسي
ههههههههههههه
بودي تغيرين الأمنية .. إشلج بالكرسي وحمل أثقال البشر
؟؟؟؟ !!!!
هذي مو فراولة حامضة تعالجينها
بالسكر
هذي أوزان
تهد الحيل والقلب
:))

فريج سعود يقول...

يوم الثلاثاء الي فات كنت معزم على العشا

كانت الفراولة حاضرة

وكانت حلوة لا حامضة ولا شي

SheLLoO يقول...

استكاتني المدهشة:

للتو في هذه اللحظة كنت أتلذذ بالفراولة وأغمسها بنافورة الشوكلاته مع صديقتي الحبيبة وطعمها مع الصحبة ألذ ;p

على العكس تمامًا "فراولتنا" لذيذة الطعم رائعة المذاق تجبركِ على اغماض عيناكِ بتلذذ لا أعلم من أين جلبها خالي ;p

الكل يعشق الفراولة هذا الموسم وأنا واحدةٌ من الركب أعشقها طوال السنة ولديّ كل شيء على فراولة أحس بالطفولة عندما أحملهم معي ;p

ومساؤكِ فرحٌ وفراولة تذوب في فمكِ الكرزي فيدهشكِ مذاقها ;)

حلم جميل بوطن أفضل يقول...

هذا موسم الفراولة المصرية شحلاتها ناطعة و العلبة بربع دينار

بعدين آنا مو قايلك يوزي عن شغل التنقز و سيرة الأحلام ؟

أنا مرتبط

بس ما زال البوست عميق و ما زلنا نبحث عن القاع

Mok يقول...

مساءج فراولة

خوش بوست
:)

why me يقول...

مساء الفراوله


بوست عجيب

`~MnO YeNSa! ~` يقول...

بوست مختلف

كنكهة الفراولة
الحامضة
:P

عاد اليوم
شارين
فراولة

شكلي بتنقصلج
:P


shshshsh
على طاري الدعاء
لما تكون وحدة
عزيزة على قلبي
تتوقعين تنسي
no
:*

chandal/danchal!! يقول...

شهالترويئة اللي ما عندك احلى منها

:)
مو قشور الموز اللي اصبح عليها!

جني بحول عالفراولة بدال الزيبرا!

:)


شهوت(ن) فيها العافية

:)

dalal يقول...

أحبها مع الكاكاو السايح :)

واللي تبينه وتشتهينه سويه ، بس مو تسوين بلاوي متلتله وتقولين من نصيحة دلال :)

حتى في بوستج اللي ما عنده سالفة :) على قولتج انا مالي شغل مبدعة

سلام

7osen يقول...

بوست روعة


عجبني وااااايد

:)

لما أحس إني متضايق بأكل فراولة حامضة
يمكن يكون لها مفعول إيجابي

:)

تحياتي لهذا القلم المبدع

كبرياء وردة يقول...

فراولة حامضة مع فوندو كاكاو من الصبح

يا سلااااااااااااااااام

شفيكم على الاكل انت ونجوم:)

مسائج رايق

وسوري لي فترة ما علقت هني

esTeKaNa يقول...

TaMoOTa
~~~~~~~~~~~
تدرين هذا احلى تعليق قريته؟
واي الكشرة من هني لي هني
حسيت اني بهذا البوست حققت أمنية بنت صغيره مشتهيه فراولة
ومو اي بنت
بنت فاهمتني،لانها تقول من قال الفراوله شي مو ضروري
:)))
عسى ربي يحفظها ويبلغج فيها عروس
ولا يحرمج من الوالد قولي امين

esTeKaNa يقول...

artfull
~~~~~~~~~
اشوف قمنا نتأثر
ويجذبك اليها ونقضمها
:pP~
عقب كل اللي قلته وتقول لنا مافي
اذن
نحن غير مسؤولين عن اي غصه اوكحة او شرقه بالفراولة
:Pp~






بس عشان بنيتك بطوفها هالمرة
وعليكم بالعافيه

esTeKaNa يقول...

عثماني
~~~~~~~~
شنو هالأغنيه اللي تعور القلب؟
واي ذكرتها
كلماتها من رقه احساسها تبجيني
:pP~
ايييي يا عثماني صاج
عسى ربي يحفظك ويسعدك ويبعد عنك اللوعه قول امين
:)

esTeKaNa يقول...

artful
~~~~~~~~~~
كرا للتحديث
:)






shalalat
~~~~~~~~~~~~~
إلا نداء المخده
هذا نداء الحياة طاوعيها وانا اخيتج
:)

esTeKaNa يقول...

reLaaax
~~~~~~~~~~
حيالله الغاليه والله
:**
اي والله لازم نتأقلم
ومو بس نتأقلم
لازم دايم ندور لنا حلول بديله
مثل الحل البديل اني حطيتها بالشكر
ولو انج ما ترضين
:pp~
حياج الله

esTeKaNa يقول...

متفائل
~~~~~~~~
ولوان الفراولة مالها علاقه بالكرنيشن
بس تامر امر
نجربه
:PP~

esTeKaNa يقول...

محارة
~~~~~~
واي والله والله فز قلبي يوم قريت اسمج
!!
فاقدتج من غير شر
وقلبي عندج
اتمنى تكونين يا الغاليه بخير وكل امورك متيسرة
ان شاء الله اشوفج بأقرب وقت
كلنا وله يامحاره
:**

esTeKaNa يقول...

sn3aa
~~~~~~~~
لذه الانتصار
!!
ياربي يبتيها ييب
ويلوموني انا فيج؟
:)))
جوكلت بار فتنه فتنه
هذا المكان اعتبره مستودع افكاري واحلامي وسعادتي
لا تشوفين ويهي وانا غارقه بالكاكو
ما يهمني احد
لحظة من اهم لحظات سعادتي
:Pp~
حياج الله

esTeKaNa يقول...

Q8I-BLOGGER
~~~~~~~~~~~~~~
من وين طالعه الشمس؟
عاش من شافك اخوي العزيز
فقدناك من غير شر
يارب تكون بخير
:)
اثاري متنسين فيك بفراولة
زين زين
في ناس متنسين فحم وخرابيط
:pP~

esTeKaNa يقول...

nikon 8
~~~~~~~~~~
اي في معاني بين السطور
بس ماحد يفهمها الا اللبيب
وعاشت صديقتي نيكون اللبيبه
:Pp~
واي ضحكتيني على الكرسي
ههههههههههههههههه
احتمال اغير حلمي واصير طوفه
هم الطوفه قاعده ومرتزه ولا لها شغل باحد ولا تحس ولا شي
:))

esTeKaNa يقول...

فريج سعود
~~~~~~~~~~~~
عليكم بالعافية
:pP~

esTeKaNa يقول...

shelloO
~~~~~~~~~~~
صديقتي اللذيذه
صاحبة الكلمات الكرزيه
والاحساس الفراولي
احب كلماتك وكيفية وصفك لمشاعرك الرقيقه الجميلة
دمتي بحب..انتي..وصحبتك ...وفراولتك اللذيذه
:)

esTeKaNa يقول...

حلم جميل
~~~~~~~~
:)






mok
~~~~~
ياهلا ويا مرحبا
مساء الستروبري كله
:)






why me
~~~~~~~~~
ياهلا يا هلا
مسائج وردي
:)

esTeKaNa يقول...

Mno Yensa
~~~~~~~~~~~~
هلا وغلا
هني وعافيه يا حبيبه قلبي
:**
اخيه يا الغاليه
اذا تعزين احد اغلى شي تهدينه الدعاء بالغيب
فما اوصيج
:))











chandal/danchal
~~~~~~~~~~~~~~~~~~
حولي وأنا اخيتج
راح تستمعين باليوم كله اذا افتتحتيه عدل
:)))
وحيالله من يانا









dalal
~~~~~~~~
يا زين الدلال والله
:)
يختج احلى شي بالدنيا الواحد يدلل نفسه
بالامور البسيطة
بالاشيا الصغيره
بكل شي حوله
:)
حياج الله












7osen
~~~~~~~
الأروع مرورك يا اخي العزيز
بس ها
ترا مو تاكل فراوله حامضه وتدعي علي
!!
فراولة حلوة
او مع سكر
:))
حياك الله










كبرياء وردة
~~~~~~~~~~~~~
ياهلا ويا مرحبا بالغاليه
واي انا اليوم بروح جوكلت بار منكم
:))
انا ونجمة
وجهين لعملة احساس واحده
!!
ولا تتعذرين هذا بلوقج ومكانج اي وقت لج مزاج رايق علقي