الخميس، فبراير 12، 2009

back

أراك..في زحمة الدنيا مشغول،منهمك في ما يجب وما يكون
مشاوير،مواعيد ،وأشياء أخرى،تلهي بها نفسك وتهرب بها من إحساس في داخلك
إحساس...مشتاق،يرقب الباب،يتحرى صوت هاتف،وينتظر استلام رسالة أشواق
تتعب،وفي لحظة انهكك بها الصبر،تركت هاتفك بعيدا،وأعطيت ظهرك ذاك الباب
متعب احساس الانتظار..متى بتردين؟
!!
وبرد...دون موعد لتعيش معي لذة احساس المفاجأت
===========
حسيت فيها؟
تقترب،تمارس طفولة احساسها على قلبك
تتسلل لحياتك على اطراف اصابعها بهدؤ
تضع يديها على عينيك التي تحب وتسئلك
منووووووووووووووأنا؟
اخفي نظر عيونك ودع قلبك وحده يعرفني.
.
.
وتعرفني.
يفرح قلبك وتشع بالسعادة عيونك
ويشرق في سما قلبي احساس جنونك
================
وحمدلله على سلامتج...تو ما نورت الدنيا بعيني
وشلون كانت سفرتج؟
كانت ممتعه رغم بساطة كل شئ ،ربما لرغبتي انا بالاستمتاع بكل شئ
تدري؟
أحيان تكون محتاج ان تسند راسك على نافذة تسرح في الطريق الطويل،يحتويك الليل،وتنير دربك النجوم
ومتى ما تعتبت تحتضن نفسك وتغمض عينيك وتنام نومة الربيانه
نومه الربيانه؟
إي،إي هذي نومتي اللذيذه بالسيارة
مثل ما تنام الربيانه
ولاتسئلني اشلون شفت الربيانه نايمة
================
ووين رحتي؟
في البداية كنت هناك في بيت غارق بدفئ الحفاوة السعودية،قضيت ليلتين معهم
أشاركهن السهر...السمر..وأحاديث بددت تعب السفر
كنت اسولف واقارن حياتي بحياتهم وهن في نفس عمري فشعرت بأننا من عالمين مختلفين
اشلون؟
مممم...اول ما لفت نظري جمال بشرتهن
من الغطوة؟من الراحة والنوم؟ لا اعرف ولكن هناك شئ فيهن مرتاح
يتكلمن بهدؤ..بدلع..ببطئ،بينما كنت اشعر بأني ادابج مدابج حتى بالسوالف
سولفت لي هناء عن عدم حبها لفزعه الصبح،الامر الذي جعل فيصل زوجها يقول لها:
فداج الدنيا المهم راحتج ...لا تشتغلين
!!
وما اشتغلت،مستمتعه هي بحياتها براحتها باهتمامها بزوجها وطفلتيها وامور الحياه الاخرى تركتها لفيصل
كانت تتكلم حين سمعنا صوت فيصل الجهوري يناديها:
يا هنا
وتفز تركض له:
يا هنا قلبي انا
يا رقتها
!!
راحت وتركني بحاله تفكير باشياء كثيرة
شنو فكرتي فيه؟
أحيان كنا نعتقد ان قمة القوة والحرية ان نقوم بكل شئ لوحدنا دون حاجة رجل بجانبنا
قوتنا وحريتنا جعلت الرجال حولنا يشعرون بالتخاذل ناحيتنا فطالما اننا قادرين على العمل والسفر واداء كل شئ من غيره
فلا داعي حتى ليتعب نفسه
وهذا خطأ مشترك منا ومنه
وجود الرجل في حياه المرأه يفترض ان يكون عز لها
بس انتي تقدرين تعيشين حياتها من غير شغل ولا سياره ولا شي؟
ما اقدر اعيش حياتها ولا راح تقدر اهي تعيش حياتي صعبه
خليني من كل هالكلام....تغطيتي ولا مثل كل مرة عاندتي؟
استحيت من عيالهم وعلومني احط طرف شيلتي على ويهي واسوي لثام
مادري ليش لما اغطي خشمي وحلجي ما اشوف
!!
وكملت الخداي وشربت الجاي فوق اللثام
هههههه
=================
وتالي؟
وتالي رحت البحرين
!!
وحلفت يا الزينة ما افارق البحرين ..في قلبي مزروعه ومحفوظه وسط العين
أشتاق اشم العود...واوله على الطيبين
والحنة لي خطوه..خطوه على الكفين
احبها؟
احم احم منو؟
الاغنيه طبعا
============
البحرين..حلوى شويطر،السيف،المحرق،خالد الشيخ،وعبدالرحمن رفيع
أنا احب البحرين
وأنا احبج انتي
!!
سكوت.......انظر لسقف الغرفه
نسيت شنو كنت بقول؟
تضحك:
كنتي تقولين عن البحرين كملي
اي صح نكمل
البحرين
شرحه..تضمك بمجرد وصولك لترابها
تغيرت،وحلوت وايد
استانستي؟
وايد،زرنا شيخوني صديقه العائله،كنت افرح وانا صغيره العب بحوش بيتها لانه يطل على البحر
هالسنة...البحر صار بعيد بعد الدفان،تهقه ما يصير يرفعون قضيه عشان حق المطل؟
وانتي على طول بترفعين قضايا؟
مادري ليش صاير تفكيري جذي
!!
.
.
.
من بيت في السعودية....الى فندق جميل بالبحرين...ورجوعا عبر منيفه ومخيم انعزمنا عليه
انا استمتعت
وولهت
وكلي شوق..لمدونتي ولعيون قرأتني وانتظرتني
غبار..واجواء متوترة واخبار.. مدونات متحلطمة وأخرى مكتئبه وكل شئ يدعو للعساره
وفي عز كل هذا
هل فكر احدكم في هذه اللحظة ان يقول الحمدلله
!!
الحمدلله على كل شئ
بيروح الغبار،وبتتعدل الاوضاع
بيجيب الله مطر
والخير بقبال

هناك 51 تعليقًا:

كبرياء وردة يقول...

الف الحمدلله على السلامة
تو ما نورت المدونة
فقدناج عساج ما تفقدين غالي

ادري انج بالبحرين شفتج بسيتي سنتر:p

شفتي شصار فينا ماعندنا بحر:(

بوست خفيف ورقيق كالعادة

SHAHAD يقول...

الف الف الف الحمدلله على السلااامة
والله استاانست يووم شفتج
عسى ايااامج كلها فرح وونااسة : )
والحمدلله إنج استمتعتي بالسفره
مرات سفرة بسيطة مثل هذي تفرحنااا فرحة ما بعدها فرحة : )

تصدقين مي تو اعرف بنات سعوديات
ماادري ليش أحس إني دفشه بينهم لوول
ماشاء الله عليهم رقيقات بالسواالف
وانا جنه أحد لااحقني لوووول
مع إن بين الكويتيات احس اني رقيقة لوول

وصح كلاامج للأسف احنا علمنا الرجل التخااذل
لأنه عودنا نفسنا وعودناهم إن احنا عن عشر رجاال :/
فـ ماصدقوا على الله وتركوا الخيط والمخيط لنا لووول

بووستج يشرح القلب
نور البلووق ونورت الدييرة فييج بعد

ومثل ما قلتي الحمدلله على كل شي : )

بنت أحمد يقول...

الف الحمدلله على السلامة

نورتي عالم التدوين

:)

QiYaDiYa يقول...

الحمدلله على السلامة ;D
نورت الكويت ;D
فقدنااج ;*


و على السعودية
مثل ما قلتي
لا احنا نقدر نعيش حياتهم
ولا اهو يقدرون يعيشون حياتنا !

بس هم نمسك العصاة بالنص !
يعني حلو الوحدة تتدلع شوي
و بنفس الوقت قادرة انها تسوي كل شي


ضحكتيني على المدابج !!
;p

و البحرين
ذكرتيني بسالفة
ابوي يقول متصل عليه واحد من ربعه بحريني
يقوله من صجكم تقولون ان الكويت صغيرة !

قاله ايي صغيرة !
ليش !

قاله البحريني
ييت الكويت بالسيارة
دخلت من النويصيب ابي اروح الجهرا !
نمنا بنص الطريج !!
و كملنا الصبح !
;p


و الحمدلله على كل حال
بما ان الانسان بصحته و عافيته اهو و اهله و الي يعز عليه
فالحمدلله

;D

Najmah يقول...

وااااااااااي أخييييييراااااااا
طار قلبي يوم قصة خيال
قالتلي استكانة ردت
تدرين شكثر ولهت عليج؟
اكبر من الدنيااااااا كلها
والله والله مكانج فاضي
والكويت كلها ماتسوى بدونج
:*

Eng_Q8 يقول...

الحمدلله على السلامه يا استكانه الربيانه :p

Manal يقول...

يا هلا
وعشرتعش هلا ومرحب بالغالية
:)

الله يفرجها على اهل الديرة
ويخف الغبار
ويتعدل الجو

فريج سعود يقول...

الحمدلله على السلامة

ضيقتي خلقنا على نفسنا

مركبنا يقول...

السلام
يا هلالالالالالالالالالالالا
ويا غلالالالالالالالالالالالا

نورت الديرة
ونور عالم التدوين

ممممممممممممممممم

السعودية
نعم كاننا بعالمين منفصلين
بانتهم عيشتهم غير
ممكن اسميها عيشه بلا حياة

اما متزوجاتهم فهن ربات بيوت سنعات
والاهم مرتاحات

عموما
تقولين احيانا لنفسك والله المرة بالكويت بالشه نفسها
وخصوصا لما تشوفين الرجال عندهم رجال كل اعتماد البيت عليه من المقاضي الى المدارس

-------
اما عن منيفة فذكرتيني بالذي مضى
من زمااااااااااااان مارحت هناك

والله ايام كان الفقع عجيب واحنا نتفق هناك


--------
الحمد لله على السلامة اخيرا

ikhalifa.com يقول...

أووووه الحمدلله على السلامة!!
:D
هههههه
ما تشوفين إذا غطيتي حلجج و خشمك
ما تنفعين تصيرين ننجا
كله مخربة الخطة

الحمدلله على السلامة مرة ثانية
:D

قانونى كويتي يقول...

الحمد الله على السلامة

وعسى كانت رحلة موفقة

ومثل ما قرينا امبين انها كانت ممتعة

بالعافية عليكم يا رب

وتحياتى لكم

دروازة يقول...

الف الحمدلله على السلامة يالشيخة

وياحلو ما كتبتي

حسيت بفرحتج في كل لحظة من لحظات الرحلة والعودة


بالنسبة للسعوديات
اعتقد انتوا تحسدونهم على الراحة وهم يحسدونكم على الحرية

المشكلة مافي اعتدال في الحالتين

أما البحرين
فحلاتها من حلاوة أهلها وطيبتهم

ودامج سمعتي وقريتي التحلطم ... معناته انتي دشيتي حدود الكويت :)

اللهم لك الحمد حتى ترضى
ولك الحمد اذا رضيت
ولك الحمد بعد رضاك

أنا ما تحلطمت وايد

على الخفيف :)

مرة ثانية
الحمدلله على السلامة

charisma يقول...

هههههههههههه
علييج بالعاافيه ولكم باك يالغاليه
والحمدالله على سلالامتكم

الالا تقوليين قاال فيصل حق هناا

فداج الدنيا المهم راحتج ...لا تشتغلين

ااخ يا قلببيي اااخ
ههههههههههههههه
وانا منو يقوليييييييي منوووو
ههههههههههههههههههههههه
انا استعسر الصبححححح شسوى ولا احد سال فينى
:)))

شوفى بوستج كله بكووم وهالعباره بكوم
لوووووووووووووول الله يهنييهم ويسعدهم ويتمم عليهم ان شاءالله
:))))))))))

والبحرين تدخل القلب فعلا
دايما الى يرد منها ما يبى يهدها

ولهناا علييج
:***

~ هند ~ يقول...

حمد الله ع السلامه ياااااااااا جاي من السفر ,,



..


فقدتج فوووووووق ما تتصورين ومكانج ما ملاه أحد,,

..


حلو السفر والتغيير

بس

لا تعيدينها :)

Sweet Revenge يقول...

تو مانورت الكويت ميخالف وصلتي واستقبلج الغبار شدة وتزول
تصدقين نفس ملاحظتي علي بنات السعودية
لنا اهل هناك لما اروح احس عايشين ومدلعين نفسهم علي الاخر
حتي الجمعية ماتروح الا ريالها معاها
اهو الي يشيل ويحط
موحريم الكويت وعليا
شايله الدنيا وما فيها
ما ادري يمكن ابي اعيش جذي بس تالي همن راح امل
صح السانج
الف الحمد لله
وحياج بين اخوانج المدونين والمدونات
المتحلطمين منهم والمتحلطمات
:)

حسام بن ضرار يقول...

الحمدلله على السلامه

عاد حلوى شويطر وحده بوحده قدوع مع دلة قهوة

واللي اطعم منها ... مروج المحرق

آخر حلاوة

عوافي و عودة محموده

سبمبوت يقول...

وهووووووو استكانة از باك

وايد ولهت عليج ..

Salah يقول...

الحمد لله على السلامة

الحمد لله على كل شي

بس اذا ما تحلطمنا ما نصير كويتيين

وهالايام قاعد يسحبون جناسي

:)

صبا يقول...

نورتي مكانج

والمدونات بكبرها

الف الحمدلله على السلامه يالغاليه

وانشالله استمتعتي باجازتج

:)

وصاجه يا لون الغروب أحلى شي بالدنيا

اذا حست البنت انه الريال يدلعها ويبي راحتها
وعليه على حريم الكويت
حتى فرع الغاز يروحون
:(

وأمووووووت في البحرين
وفيج
:****

lawyer يقول...

روحه حاضره هنااااااا

حوار عجيييييب

بوووووووووووست الذ من الكب كيك الي تسويييينه


اكثر شي سرحت انا بعييد


بعيد ابعد مما تتخيلييييين









الف حمدلله على سلامتج

:**********

|:| DUBAI |:| يقول...

شو استكانة
كبر راسج
دبي و الامارات
صاروا دقة قديمة؟
وينكم؟
بلادنا مطر
و غبار
و ثلج
!!

:P

اذا على بشرتهن
أنا أشهد
مادري يرقدون في الروب
مادري
حليب
مادري موكا
مول ما صكيناهم عين
حبايبنا والله

!!

و اذا على البحرين
نكتفي بهاي الدندنة


ياللي رايح للبحرين
........
من بطلنا أغاني
نسينا الكلمات

يالسة أعصر مخي بس ما أذكر


الأهم


و هو الأهم

عودة مشرقة لج عزيزتي

!!

|:| DUBAI |:| يقول...

وي نسيت شيء
ستايل بلوقج الاولي
أحلى وأرتب
عن تزعلين
سيستر
حسيت شوي مب مضبوط !!

nikon 8 يقول...

الحمدالله على السلامة
:)
الله عشنا جو السفرة وحسينا بالأشخاص
والله تعب ثلاث أماكن بوقت قصير وكل مكان فيه أشخاص مختلفين وكل ناس ومكان يبيلهم مزاج غير عن اللي قبلهم
كان الله في العون ... المهم وناستكم
:)

AK-47 يقول...

الحمدلله على السلامة
عليج بالعافية

abu eldestor يقول...

ذوقج عجبني بالباك راوند
المهم حمدلله على السلامة

bsma يقول...

الحمد لله على السلامة :))

واحلى شيء في السفر ان يكون لك احباب واصحاب في البلد الذي تقوم بزيارته .. فالتعرف على الأطباع ومخالطة الآخرين متعة ما بعدها متعة

بوفهد يقول...

ياهلا باستكانات الكريستال

اختي

عجيب الي سطرتيه ومشغول بذاك الاحساس

وينطر رسالة شوق ... مسكين

احنا بس ندبج ونهرول!!؟احنا ضيعنا

الجادة

وماندري درب الراحة والقناعة وين

اي والله هذا سعر بيته ينزل الحين على اعتبار قبل يطل عالبحر والحين اشلون ؟؟؟

يبيله صحيفة دعوى

حمدالله على سلامتك

qesat_5ayal يقول...

الحمدلله على السلامة

بعدين لا يغرج
ترى الكويتيات اذرب
سألي اللي مجرب وشايف
:\

ولو انهم اهلنا
بس الصدق يقال
;)




ونورتي الكويت اقين

Enter-Q8 يقول...

غبار..واجواء متوترة واخبار.. مدونات متحلطمة وأخرى مكتئبه وكل شئ يدعو للعساره
وفي عز كل هذا
هل فكر احدكم في هذه اللحظة ان يقول الحمدلله

الحمدلله على كل حال
بعد صيري احمد الفهد و قولي الله لا يغيير علينا



الحمدلله على السلامة

mtfa2el يقول...

لي رحتي البحرين مرة ثانية
اشتري من حلوى الخلود و ادعيلي

الحمد لله على السلامة

فراوله يقول...

مساالورد والجوري
غاليتي الحبيبه
الف الحمدلله علي سلامتج
وان شاءالله ارتحتي
وغيرتي جو
:)
لج وحشه كبر الدنيا
حبيبتي انتي
:**

الخيلاء يقول...

ويح قلبي
:

استكانه اقرا و الضحكه شاقه الويه
:
:

الحمد الله على السلامه
ولهت عليج
:*

:
:

كنت بالبحرين
ودج تلاقينا صدفه
:
:

و ترى هالمره بعد سحت و تدودهت
اشفيني صايره خواره
:)

:

ضحكتيني على شرب الجاي فوق اللثام
ترى اتصير باحسن العايلات
ماره علي حالات جذي

:

نورت الكويت بوجودج
و المدونه بكلماتج

ZooZ "3grbgr" يقول...

الف الحمدلله على سلامتج

سا حلو وصفج لاشياء نمر عليها ولا نحس لها طعم

لكن معاج انتي حتى نومة السيارة اللي تكسر لها احلى طعم

وحشتيني واستقت لقلمج الرائع

تو ما نورت البلوقات

عجبتيني تشربين الجاي فوق الغطوه ههههههههه

اييييييه يا استكانه

الحمدلله على كل شي

كل شي خير من رب العالمين

بس نبي جرعات تفاؤل

وانتي خير من يعطينا اياها

:")

esTeKaNa يقول...

كبرياء وردة
~~~~~~~~~~~~~
الله يسلمج يا الغاليه
منوره بوجود كبرياء الورده
:)
شفتيني بسيتي سنتر؟
وليييييييييييش ما سلمتي علي؟
:Pp~
ياحلاة سيتي سنتر وايد حبيته وشريت منه
ولا تقولين ما عندكم بحر
الناس عندها بحر
وانتو بحرين
:))
الله يحفظكم يارب

esTeKaNa يقول...

SHAHAD
~~~~~~~~~~
الله يسلمج من كل شر يا الشهد
يا عساج دوم مستانسه قولي امين
الظاهر الرقه نسبيه
تختلف من مكان لي مكان
انا هني محسوبه رقيقه
هناك حسيت روحي ريال دفش
لول
:pP~
يا بعد قلبي انتي
حيااااج الله
:)

esTeKaNa يقول...

بنت أحمد
~~~~~~~~~~
الله يسلمج يا الغاليه
منور بوجودكم
:)

esTeKaNa يقول...

قياديه
~~~~~~~~~
هلا بالقياديه الغاليه
:**
واي ولهانه عليج من صجي
شخبارج؟
!!
واي ضحكتيني على البحريني
تهقين وين نامو؟
لوووووول
عجبه
!!
حياج الله يا الغاليه

esTeKaNa يقول...

Najmah
~~~~~~~~~
انلام انا بهالبنت؟
:**
وانا ولهت عليج كثر ماكو بعد يا الغاليه







eng-q8
~~~~~~~~~
الله يسلمك مهندسنا
جنه يازت لكم الربيانه
:Pp~










Manal
~~~~~~~~~
هلا بالطيبه هلا
:)
امييين الله يسمع منج








فريج سعود
~~~~~~~~~~~~~
الله يسلمك يا فريح سعود
بس ليش ضيقت خلقك افا عليك بس
:(












مركبنا
~~~~~~~~~
ياهلا وامية هلا بمركبنا
الله يسلمج من كل شر
ومنوره بوجودكم
:)
وااااي يا زين التفقع
ترا انا كله اكشخ اروح وياهم
ولا مرة طلعت فقع
!!
يوم كشخت وحفرت بالقفشه
اثاريني احفر بجحر حيه
بغى يوقف قلبي
:pp~

esTeKaNa يقول...

ikhalifa.com
~~~~~~~~~~~~~~~~
ياهلا ويا مرحبا
انا ننيجا؟
ما انفع
عيل احد يشرب جاي فوق لثام
:PP~
الله يسلمك ماقصرت
















قانوني كويتي
~~~~~~~~~~~~~~
الله يسلمك ماقصرت
:)











دروازه
~~~~~~~~
ياهلا ويا مرحبا بأخوي دروازه
:)
الله يسلمك ما قصرت
ويا زين الاعتدال بكل شي
صاج وانا اخيتك
!!
واللهم لك الحمد شفت راح الغبار؟
وبعد كل شي بيكون احلى
بس يبيلنا صبر
:)
حياك الله

esTeKaNa يقول...

charissma
~~~~~~~~~~~~~
ترا هنا بيصير فيها شي منا
ههههههههههههههه
اصلا انا عيزت احورف باسمي
مو راضي يركب على الجمله
!!
قلت بسمي روحي هنا
بس خفت اغير الاسم ولا القى احد اقوله يا هنا قلبي انا واعفسكم
ههههههههههههههههههههه
:Pp~
حبيبتي انتي ولهت عليح العافيه
وصج
صج
صج
انتي بالذات ولهانه عليج
:**

esTeKaNa يقول...

هند
~~~~~~
هلا بالغاليه هلا
عساج ما تفقدين عزيز ولا غالي
!!
ودي اودعج ما عيدها
بس مشكلتي انا قلبي يحب السفر
والسفر مفيد عشان تولهون علي
:))
حياااج اللله













SWEET REVENGE
~~~~~~~~~~~~~~~~~~~~
ياهلا ويا مرحبا بصديقتي واستاذتي بالمشي
:)
شفتي الغبار اللي استقبلني؟
هذا من عفره المعجبين عرفتي
:pP~
يالله الحمدلله الجو رد حلو
عسى ربي لا يغير علينا الا للاحسن
ويهدي ريايل الكويت
ويدللونا مثل حريم السعوديه
:)

esTeKaNa يقول...

حسام بن ضرار
~~~~~~~~~~~~~~~~
الله يسلمك من الشر ما قصرت
:)
عاد بهالسوالف لا توصي حريص
نعجبك
جنه ما عندنا حلوى بالكويت
:Pp~

esTeKaNa يقول...

سبمبوت
~~~~~~~~~
ياااابعد قلبي انتي
:**
عساج بخير انتي ووكل من تعزين
قولي امين
:)










Salah
~~~~~~~~~
فعلا الانسان لازم يخاف على جنسيته
ويستمر يتحطلم
:)















صبا
~~~~~
أنتي تدرين انا شكثر ولهانه عليج؟
كبر الدنيا والله
!!
شخبارج؟
عاش من شافج
ياربي تكونين بخير
:*
وعدل والله احنا مكروفين
حتى كراجات نروح
مو حاله يعني
:(
بس الله كريم
عسى ربي يرزقنا باللي يعزنا
قولي امين

esTeKaNa يقول...

Lawyer
~~~~~~~~~~~
ترا مافي الذ من كيكاتي
:Pp~
بس اذا البوست الذ من كيك
وانا الفاعل بهالشين
ارضى
:)))
الله يسلمج يا الغاليه انتي
:*

esTeKaNa يقول...

DUBAI
~~~~~~~~~
لا عاد
كل شي ولا دبي
صج صج بخاطري ازور الامارات
يمكن صار لي ست سنين او اكثر من اخر مره زرتها تخيلي
!!
بزوركم وابي استقبال رسمي

وبشرتهم راحت فيها من عيونا
لوووول
:)))
وشكرا على ملاحظتج على البلوق
الله لا يحرمني من صراحتج اللي احبها
:*

esTeKaNa يقول...

Nikon-8
~~~~~~~~~~
تصدقين ما حسيت بتعب
!!
يمكن انا حابه التغير
يالله الحمدلله
:))
والله يسلمج ما قصرتي













ak-47
~~~~~~~
الله يسلمك ما قصرت
:)









abo aldestor
~~~~~~~~~~~~~~~
الله يسلمك من كل شر
:)

esTeKaNa يقول...

basma
~~~~~~~~
الله يسلمك
وفعلا..هي اجمل متعه بالنسبه لي
:)









بو فهد
~~~~~~~~
ياهلا ويا مرحبا بابو فهد
:)
الله يسلمك من كل شر
وفعلا احنا في امور كثيره ضيعنا الجاده
الله المستعان
!!














qesat 5aYal
~~~~~~~~~~~~~~
هلا بصديقتي وصديقه صديقتي
:)
الله يسلمج من كل شر
يعني تهقين احنا اذرب؟
والله نتمنى
:)


















enter q8
~~~~~~~~~~
الله يسلمك
وعسى ربي لا يغير علينا الا للأحسن قول امين
:)













متفائل
~~~~~~~~~~
الخلود؟
ولا خلود شويطر؟
!!
وترا بدعي لك بكل الحالات
الله يسلمك
:))

esTeKaNa يقول...

فراولة
~~~~~~~~~
يا مسا الفراولات كلها
:)
انتي وينج ؟
من غير شر فاااقدتج وايد
يارب تكونين بخير

















الخيلاء
~~~~~~~~
يمه يا زين قلبج اللي احبه
:)
يا ليتنا تلاقينا
جان كتبت بوست احلى من هذا بعد
:Pp~
والله يسلمج من كل شر
منوره بوجودكم حولي والله
:**




















ZOOOZ
~~~~~~~~~
هلا هلا
حيالله زوز صديقتي مصورة وموثقه الغبار بالكويت
:)))
شخبارج؟
ياربي تكونين بخير
ويا بعد قلبي انتي
التفاؤل كله بقلوبنا
بس محتاجين نحركه شوي
وانا متأكده مثل ما راح الغبار والجو صار احلى
كل امورنا بتكون احلى باذن الله
:*

`~MnO YeNSa! ~` يقول...

انا ياية
تالي الليل
اسلم عليج و اقول
نورررررت هالديرة
:*


البوست
شي مو عادي

SheLLoO يقول...

الحمدلله على السلامة يا الغالية ;*

وأنا أيضًا عدت في الواحدة صباحًا إلى حبيبتي الكويت قادمة من مكة المكرّمة..

اشتقت لمساحاتكِ الرقيقة وأطلقت من قلبي لك دعاءًا خالصًا وأنا أطوف بالكعبة :")

دمتي بود ;*

ARTFUL يقول...

اول شي الحمدالله على السلامه

وشكلها السفرة آتت ثمارها واستانسنا وغيرنا جو

;D

لووووووووووووول
وانا ادااابج بالسوالف

;D

وترا حتى شباب الكويت ما عندهم مشكلة ما يشتغلن زوجاتهم

بسسسس

لا تطلبون منهم أكثر من استطاعتهم ابي اسافر واطلع واروح وايي وكل عشا بره وكل يوم سينما وبيت

وهم مابي اشتغل مالي خلق!!!

اذا خذيتي مليونير ، الله يهنيج سوي كل هذا

ولا اتزوجين واحد مهو مليونير واتحلطمييين

لا خلج لما اييج اللي يترس عينج

;D

((الكلام مهو لج استكانه))

ايي ولا لغيرج كلام عام يخص الكل

;p

لا الريال يستانس لما المره تستغني عنه

ولا المره تستانس لما الريال يستغني عنها

حل لما كل واحد يكمل الثاني

وكل يستغل مساحة ادوارة في جلب السعاده للعائلة

تحياتي لج

=)