الثلاثاء، يناير 20، 2009

انقطع الارسال

عنما تكون وحيد تكون حواسك في أوجها
تشم كل شئ يمر حولك
وتبصر كل التفاصيل
وتسمع...حتى الهمس
هل هذه حاله طبيعيه؟
كانا يثرثران بقربي
حين اشتط احدهما وقال:
شوف،البنت ما ينذكر اسمها بدوانية الا لسببين
يا انها بنت رايحة فيها ماحد يخاف عليها
او بنت محترمه جدا،ايضا ماحد يخاف عليها
ثم اوطى صوته
وخانني سمعي
وانقطع الارسال
!!
عن ماذا كانا يتحدثان؟
عن البنت الاولى،او الثانية؟
وهل تلك حقيقه مطلقه ام نسبيه خاصه بشخص قائلها؟
ولما اصبح الرجال يثرثرون(وتعبانه على الكلمه)اكثر من النساء؟
ولما انقطع الارسال ولم يكمل بو شطة السالفه ؟
اي شخص منكم يعرف بو شطة يسئله عن تلك الكلمه التي علقها في بالي وذهب
!!
.
.
.
.
عندما تعلق في بالك كلمات شعر او اغنيه شنو الحل؟
الحل تكتبه بالبلوق وتسقطه من بالك:
وتصفح الصفحة
وشلي بقى في بالي غير ما سبق؟
باقي...المحبه بالقلوب
وبالتحديد
لحظة لو عنك أغيب..تنقص أحلامي سنة
دون حبك يا الحبيب..أنا ماعرف من أنا
وانت قدر كم أحبك..بعدها انساني بقلبك
تلقى اشواقي بكلمه...يا حبيبي يا هلا بك
!!
.
.
.
إياني وإياك يا مخي اقوم الصبح القى هالسالفه ويا المحبه بالقلوب للحين يلويون ويحوسون في بالي ويتداعمون مع باقي الخرابيط المقططة مني ومناك في بالي
زحمه زحمه زحمه
فنفضي اول باول اوكي؟
اوكي؟
اصبح على خير
:pP~

هناك 47 تعليقًا:

الخيلاء يقول...

كلمه عابره تعلق باذهانا
و توصلنا الاماكن بعيده
و تساؤلات يمكن صاحب الكلمه نفسه
ماطرت عليه


مسائج سكر :*

Sn3a يقول...

اهليين بالغاليه استكانتنا

شفتي شلون حتى احنا نظلم نفسنا

ليش بالبدايه فكرنا بالبنت
ليش مافكرنا شنو نظام هالرياييل
اللي يتيمعون بديوانيات عشان يسولفون عن بنات

وتلاقين واحد مو حاصلتله وحده وصدته وراح طلع عليها حجي

طبعا ناخذ بعين الاعتبار ان في بنات الله يهديهم عبالهم صارو سلبرتيز لما يشتهرون


اكيد سالفته سخيفه اشوه انج ماسمعتيها لول

esTeKaNa يقول...

يمه
!!
انتو وين لابدين يا صديقاتي الجميلات
:))
ترا انا مريضه من صج مو قادره انام
فقلت اكتب بوست واسولف
تمويه حق المرض
عشان انام
:Pp~
يالله ارد عليكم





الخيلاء
~~~~~~~~
مسائج عسل
:*
ترا ولهانه
بس انتي ادرا بهاللويه اللي انا فيها
وانا اكيده بو شطة ما فكر بكل اللي فكرت فيه
بس مادري ليش ماكمل السالفه
:pP~











sn3a
~~~~~~
هلا بالسنع كله
:)
يعني السؤال:
اهو في انظمه حق حش الريايل؟
انا عن نفسي ما اروح دواوين صراحة
فما ادري
:Pp~
بس مو الكل يطلع حجي
للامانه في ناس تخاف الله بهالسوالف اكثر من ما تتخيلين
وتهقين سالفته سخيفه
اهو كان مشتط
لول

ToOoMaTa يقول...

كلة بكوم
ولما تفكرين قبل النوم بافكار مو منطقية
وتحللين وتعطين الموضوع اكبر من حجمة
وتحسين ان مخج قام يعورج من الزحمة
تبين ورقة وقلم ترتبين فيهم افكارج
تقومين الصبح تحسين ان ما كان عندج سالفة
لكها كلمتين
مو مهمين خربو نومتج :(
وتقولين تتوبين
ما ايي بالليل الا لاقيتلج حجويتين قانيين يحسون بمخج لي الفير
:)
تصبحين على ألف خير

7osen يقول...

صباح الخير باليل

تصدقين هذي الجملة لايق حق هالوقت امية بالامية

هههه

شنو يعني ماينذكر اسمها إلا بهالحالتين
حسب رأيي هذا الكلام ماله معنى
لأنه مافيه اساس معين له

إستكانة
عجبتني كلمة الخرابيط المقططة مني ومناك
هههههه

انا دائما في فبالي خرابيط مقططة مني ومناك
خصوصاً لما اكون ماشي بسيارتي
بالي كله اشياء مقططة مني ومناك

هههههههههه

عجييييبة هالجملة

:)

ToOoMaTa يقول...

ما تحطين راسج علا المخدة ولا انتي فكرة رايحة وفكرة رادة
علا طرطوشة كلام مو عارفة لا البداية ولا النهاية
:)
تصير وايد
ومخج يزدحم افكار وتقومين مو مرتاحة ولا شبعانة من النوم
تحين ان الي فكرتي فية كلة مو مهم
وما ايي الليل الا وكلمتين يدد من طرطوشة سالفة يدية
يلعبون بمخج لي الصبح:)
احلام وردية يا استكانة

Kuwait يقول...

وانتي من أهله ;p
ممممممممممم
شوفي انا لو بهاللحظه وينقطه الإرسال عادي جداً الفضول يقتلني وأقوم وأطلع من المكان بكبره من الحره لووول
يازين مزاج عبدالمجيد فدديتج ;*

qesat_5ayal يقول...

LoL

حسيت انج قاعدة بمستوصف
:\

او بالبيت العود وفي اثنين ما تطيقينهم قاعدين يحشون على كتر
;p


احلام سعيدة
:)

بوفهد يقول...

استكانه

اجر وعافيه

للأسف في نماين من الريايل اذا بسطوا في بعض الدواوين مو يقرضون في بنات الناس
الله يسلمج يشتغلون نطنازه على حريمهم جدام ربعهم الي يسوى والي مايسوى!

والمصيبه انه يسولف ولا جنها ام عياله
وعادي عنده يضحكون ربعه على خيبته الله يخيب مثل هالأشكال!! وربي لك الحمد

someone_q8 يقول...

السلام عليكم
اشلونج اختي استكانه
للأسف البعض من الرجال اصبحت سوالفهم تافهه خصوصا اذا تكلموا عن اي بنت في الديوانية لان اللي يتكلم في هالسوالف انسان ما عنده لا غارية ولا اي حشمة , بالديوانيات صار البعض مثل بعض الحريم حش ونميمة , هذا بدل ما يتكلم عن الامور الهامة في البلد او ظاهرة منتشرة و يناقشونها
الله المعين ويهدي الجميع

وماتشوفين شر اختي اجر و عافية
لا بأس طهور ان شاء الله

ZooZ "3grbgr" يقول...

هذا اللي يبيني اييله بعجره

شفيها زووز هههههه

يعني شنو بنيه محترمه ومحد يخاف عليها

مو انتوا تييبون طاريها

تبون اهلها بالمكان يعني

من حفظ محارم الناس حفظ الله حرمته

يعني رب العالمين يحفظها مو الناس

لو انا جان شغلت السماعات كلها

:/



طبعاً غشيت من كويت عرفت انها اغنية عبدالمجيد

شسوي ما اسمع عربي

استكنكن

صباحج ورد بعسل

:**

:")

الزين يقول...

:)

يا صباح الضحكة الشرحة

والسالفه البرحه

والناس الطيبه


استكانه

ليش قاطه اذونج

انزين ويوم قطيتها باول السالفه ليش ما كملتي


شلون الحين منو يكمل لنا الموضوع

بلاغة الشف ذابحتني ابي اعرف شنو قال

تهقين بيرد عليج بغير معرف
@@

بس عاد تدرين اللي هذي سالفة

ترى كلش مو خوش واحد

ما عجبني

يعني خلصت السوالف وما بقى الا البنت شلون تقيمها

:$

esTeKaNa يقول...

TaMoOMaTa
~~~~~~~~~~~
وي يا بخت عيني
تعليقين
!!
وعدل والله كلامج يا كره هالحاله
والمشكله مرات وايده سوالف مالها سالفه مثل هالسالفه اللي كتبتها تقعد في بالج لي الصبح
بس والله بس تكتبينها تطلع من ذاكرتج وتدش بذاكره الحروف
:)
صبحج الله بالخير

esTeKaNa يقول...

7OSEN
~~~~~~~~
يا اهلا وسهلا
صباح الخير بهذا الصبح الجميل
:)
ومالها اساس؟
ممممم الظاهر صاير الحجي وايد
مو بس هالحالتين
:pP~
وصج حسين انا احس مخي مثل داري هاليومين معفوس
فقاعده البق وارتب
الله يعيني ويعينكم لان كل شي زايد بقطة هني
:))

esTeKaNa يقول...

TaMoOTa
~~~~~~~~~
يا بعد قلبي انتي
امس الظاهر سهرانه وياي
:))

esTeKaNa يقول...

kuwait
~~~~~~~~
صباح الخير
:)
اذا ذبحج الفضول تطلعين بره؟
اذا ذبحج الفضول روحي اخذي قهوتج وروحي بسطي يمهم كملي السالفه جنج ما تدرين
:Pp~

lawyer يقول...

هاوشتي رووحج عدل هااا


هههههههههههههههه




السؤاااااال اترك اجابته للشباااااااب

esTeKaNa يقول...

qesat 5aYal
~~~~~~~~~~~~~
ههههههه
ياربي انا من اصير بروحي وساكته
اسمع اللي يمي لا شعوري
يمكن اروح طبيب نفسي اذا تطورت هالحاله
:pp~

esTeKaNa يقول...

بو فهد
~~~~~~~~
الله يسلمك ما قصرت
:)
حريمهم؟
واخزياااه
عاد الا هذي
!!
الله يهديهم بس هذا موديل يديد ماخبرنا بعيالنا واهلنا



حياك الله يا بو فهد

esTeKaNa يقول...

someone-q8
~~~~~~~~~~~~
وعليكم السلام ورحمه الله وبركاته
انا بخير يزاك الله كل خير
وعدل كلامك والله
اللله يهدي الجميع

esTeKaNa يقول...

ZOOZ
~~~~~~~
تخيلي روحي ساكته
بطرف ذاك الممر
واسمع واطالع الصوب الثاني جني مو انا
وفجأة الف واقولهم:

يعني شنو بنيه محترمه ومحد يخاف عليها

مو انتوا تييبون طاريها

تبون اهلها بالمكان يعني

من حفظ محارم الناس حفظ الله حرمته

يعني رب العالمين يحفظها مو الناس


يعني فوق اني قاطة اذني
اشارك وازف
لوووول



سمعي عربي يا بنيه
الكلمات غير
تدش القلب سيده

وصباااحج ورد
:)

esTeKaNa يقول...

الزين
~~~~~~
من يقول الزين ما يكمل حلاه؟
كل شي في حبيبي اكتمل
الله اللي كمله والله عطاه
ما بقى للزين في خلي محل
:***
صباااحج سكر

اشلونج عقب سهره البارحة وقطارات الموت وخرابيطي؟
:))
انا منزله البوست انطره
اكيد بيرد علي
منو اهو
مادري
بس ليش ما سمعت الباجي
ابي اعرف وبعدين
:pP~
مو شرط ايوز لنا منطقه
بس نستفيد من خبرات الناس يا الزين

ZooZ "3grbgr" يقول...

عاد لقيتيني انا

انا بس هني عندي لسان

بالصج مبققة عنوني وساكته

ولا اذا لف علي وقالي اخاف مو عاجبج

راح اقوله حقك علي

عالم جبانات بششششششششكل

:/

ARTFUL يقول...

حلو الواحد يصفي

انا اصفي بس مو بالبلوق

لا بوريقه

اكتب فيها اللي اللي يدور في بالي

لان مرات الواحديحس راسه متروس

لما يكتب اللي في باله يقول

بسسسسسسسس

مو معقوله جنه شوية

;p

وعلى قاعدة الأخ الفاضل يمكن صح وهم تنطبق على الصبيان ما ينذكر بدوانية يا انه رايح فيها يا انه خوش ريال

فالخيارين متاحين لذكر الشخص

يا زين يا شين
يا زينة يا شينه


ودمتم برعايته وحفظه وبركاته


يا حجه
;p

Sweet Revenge يقول...

صباح الخير استكانه ,وماتشوفين شر اجر وعافية يارب
ما احب الرياييل الي يسولفون سوالف
حريم يطيحون من عيني
وانت لي صار وقت نومتج شربي بابونجج وحطي الراديو ونامي علشان افكارج تحترم نفسها وتركد شوي
شهالافكار الي مهيته ,بس انت الغلطانه دلعتيها

:)

بس يقول...

صباحج رضا من الرحمن

:)

عندما تعلق في
بالك كلمات
شعر او اغنية
شنو الحل ؟؟

صح نكتب بوست
يوم بوستي
كان نتيجة
اغنية :)

صباحك خير وراحة بال

esTeKaNa يقول...

Lawyer
~~~~~~~~
انا وروحي ما ننهد بروحنا
كل شوي متهاوشين
ههههههه
:)

esTeKaNa يقول...

zOOz
~~~~~
loooooool:)
ومن سمعك والله
يعني انفصام بالشخصيه
هني نحجي وانطلااق غير نمونه يالله من فضلك
وبالحقيقه والواقع
يا زينا ويا زين الحيا اللي فينا
:pp~

esTeKaNa يقول...

ARTFUL
~~~~~~~~
صباح الخير
:)
زين تسوي
انا كل شي اكتبه بورقه
بس صايره مع التقدم اكتب شويه من زحمه مخي بالبلوق والله يعينكم عاد


ممم خوش وجهة نظر واللله
شكرا ماقصرت يا حج
:PP~

abu eldestor يقول...

فضفضي
أخذي راحتج

esTeKaNa يقول...

Sweet Revenge
~~~~~~~~~~~~~~~
صباحج ورد
:)
دلعتها وكبر راسها
وماقت
اقولها يا افكار استحي
قعدي
انثبري
اريهني خليني انام
مااااااااافيش فايده
:pp~
صاجة يا كره الريال اللي يسولف سوالف حريم،قبل اذا واحد من اخواني سولف ولا نقل حجوة زفه ابوي:
حرمه انت حرمه
!!

حيااااج الله

esTeKaNa يقول...

بس
~~~~~
يا صباح الفرح والنور كله
:)
زين تسوين
هذا تطبيق عملي منج
ومنكم نستفيد
:PP~

esTeKaNa يقول...

abu aldestor
~~~~~~~~~~~~~~
ميرسي أوي
:)
وتستمر الفضفضه
:pp~

Enter-Q8 يقول...

قاطه الاذن

نون النساء يقول...

افكارج يبيلها قرصه
شرط
تكون قرصة مره عووده

:pP~~





الله لا ييب سيرة وحده بديوانية شباب
لا بشين ولا بزين

شكوووو

mtfa2el يقول...

ذكرتيني قبل أيام المتوسط يعني كل واحد حمش و ريال

لا تقول اسم أمي !!
عيب تقول اسم اختي !
هههه

و بعدين الريال ما اييب طاري بنات بالشينة إلا لأنه مو ريال

حسبة بسيطة

ARTFUL يقول...

جنهم مو مداومين اليوم؟؟!!


نسينا نبارك لج على اللوك الجديد يا حجه

=)

Najmah يقول...

استكانة
اول شي مساااائج غلا
:**
ثاني شي ترى انا تهاوشت امس مع بوستج
وصرخت عليه
صبري لا تطالعيني جذي خل اشرح
:P
انا امس حدي دايخة
وحدي ابي انام
قريت البوست وبسرعه وطلعت
وليش ماتحوس ببالي هالسالفة
وتعلللق فيني
وليش ما اقعد احط تفسيرات وتحليلات
وقصص عليها
:\
احاول اغمض عيوني خلاص بلييييز
واييني شعور بكتب رد واسولف فيه
واسويله بلوك بسرعه
تعرفين هالشعور
لما تقرين بوست
وتقولين بأجل التعليق بس يظل ببالج يلاحقج ويحوس فيج
!!
آخر شي
قطعت الارسال غصب
ونمت بعد عناء طويل
:PP
استكاااااانة
من ذاك اليوم وانا معلقة معاج
على هالكلمااات
بس حتى انا تعبت
يالله نعلق على شي ثاني
:Pp

Kaadi يقول...

واااي زحمة الافكار هذي تقتلني !! ماني قادرة اوقف تفكير بالكلام بالجمل بالحركات !!

تتوقعين طبيعيين ؟؟ لووول قمت اشك @! الوول

أسرار رجل يقول...

الحين أنا بوطي صوتي عشان ماحد يسمعني

جميل الانسان ان يترجم حالته النفسية
لكلمات طيبه

دمت بحب
وحفظ من الله

RoOra يقول...

LOL
shKlee bswee nfsech af'9e aWal b.2wal ;P
ashwa fe a7d nfse tt3lg 5rabe6 bm5a w tg3d t7os :S
m3lga 3ala SoNg
'"ma aw3dek ela bwfa oO glbn mrada ys3dek"
ale beleXam asm3ha in my mO5 ;S

a7b swalfech :D ensana 6be3eyh oO so simple :D

vancouver يقول...

استكااااااانه ويامالج بتسمعين
من ثرثره الرجال و سوالفهم العجيبه
اهم شيء لما يحطون لنفسهم قوانين وستيريو تايب لموضوع
ويصير الكلام فيه نهاااااائي
المشكله لما ياببوا طاري ذكر اسم البنت بالدوانيه
ما قالوا شنو هالنوع من الدواوين الخايسة الي ينزل فيها مستوى الحوار
الى هالحد
??

واااااااااايد تنبط جبدي من الرياييل اللي يحطون نظريات
للاخلاق والسمعة
بس ما يستوعبون انهم مشمولين فيها
!
---

حبيبتي بالنسبه للبوست اللي طاف
واااااااااااايد حسيت فيه
وبكل كلمه قلتيها
اهنييييييييج على حقدهم
معناته انتي الصح
ترى
ارجع اقولج كلمتي المشهوره
ديري بااااااالج الف مره
الله يوفقج حبيبتي
وصدقيني مو دايما المسؤولين يشوفون الصوره الحقيقيه
ليس داااائما
وانا عانيت من هالشغلة
لانه حتى الشخص اللي علبالج صارلج سنين كاسبته
وتتوقعين عااااارفج وعارف قدراتج
ممكن

تنصدمين فيه

ديري بالج والله يوفقج استكااااانه
الله يوفقج
:*****

vancouver يقول...

نسسسسيت اقولج
اللوك ماشاءالله عجيب

:D


وصار التصفح اسرع بوايد
ما ادري ليش
على اللوك القديم
مع انه زوقة بس من بد كل المدونات
الجهاز يطول وايد عشان يفتح الصفحة

that's iT يقول...

اهم شي إنج قاطه الإذن:)

عاد حسافه جان كملتي السالفه..


مساائج عسل:)

ur sis

Yin يقول...

استكانة العزيزة المزدحمة الأفكار

هذا أقصر بوست قريته لج وأكثر بوست مزدحم !!

الواحد يشوف أفكارج وتساؤلاتج تتناقز يدامه على الشاشة

حواس كلها نشطة
وأسئلة متناثرة
وتساؤلات منطقية
وبعدين أغنية داشة عرض
وفجأة حوار بينج وبين عقلج

بأمانة إزدحم عقلي معك
لووول

الشباب الله يسامحهم لو يدرون شنو صادقة مقولة كما تدين تدان لما تكلموا عن أحد أبدا

وهم الله يسامح ويهدي هالبنات اللي كل سرها ومسرورها تقوله حق شاب قص عليها بكلمتين
حتى سوالف بنت عمة خالة يدة رفيجة بنت جيران بيت خالها تقولها
!!

الله يصلح حال الجميع ويهدينا بهدايته

زين عندج بلوق تطلعين فيه عما في جعبتك وتسوين مكان حق أفكار يديدة وتمتعينا
:)))

كوني دوما بخير والله يحفظك بحفظه ورعايته

:))

|:| DUBAI |:| يقول...

صباح الخير يا استكانة

يالسة اشرب استكانة بعد

: )

شوفي

حتى يمعة البنات و الحريم

فيها هاي السوالف

متعادلين اعتقد

!!

ReLaaaX يقول...

شوفي المنطق ! لوووول والله فاصلين اثنينهم



نوووم العوافي يمه


وسالفة تعلق الاغنيه فكره تصدقين ! جود تروح


لا مرات الله يسلمج اغاني وطنيه ماشالله علي !!!! والا سامريه من صباح الله خير تكفين قوليلي شتسوين بهالحاله ؟ أكيد ترقصين شويه وتروح عنج ;p


لا ابشرج مرات اغاني بباي تلاقيني ادور باجي الكلمات بيوتيوب :p