الخميس، يناير 15، 2009

سوالف ويك اند


كان صباحي ...كيكة
صحيت قبل الوقت المعتاد
ونزلت المطبخ جني حلمانه
اضع المقادير بدقة واحاول بقدر الامكان اتقان كيكتي
طحين...سكر...كاكو..حليب...باكينج بودر
فانيليا..ويا حلاة ريحة الفانيليا
اتركها بالفرن
ونذوب الجالكسي بصحبه الرهش
احب احساس الذوبان الذي يعيشه الكاكو في حضن الرهش الحنون
!!
يا سلاااام علي
خلصت كيكتي


وتأخرت على الدوام
ياربي يا اصير ربة منزل يا اصير موظفه
واليوم ....تمنيت اصير خدامه
ياربي الخدامه نايمة لي الضحى العوووود ولي شبعت قامت سوت لها قرص بيض وقعدت
بلا طموح بلا بطيخ بلا شهاده
ويا هالبرد ...ابي بس اعلق شهادتي بالبيت واتشرقد لي الضحى العود
:Pp~

~~~~~~~~~~~~
بعد رجوعي من الدوام لاحظت شي غريب
ايميل من انسانه مجهوله لطيفه جدا،تطبطب على جروحي بعد البوست السابق
!!
ابتسمت لرقتها واستئذنتها اني سأكتب بوست
يسئل جميع قراء هذا البلوق سؤال:
هل معقوله كل بوست اكتبه اكون انا صاحبته والبطله فيه؟
قبل فتره كتبت بوست ..خارج حدود الزمن وسئلتني احداهن:
منوقصدج؟
وقبلها بكم شهر كتبت بوست وتوالت الاسئلة:
انتي مخطوبه؟
وبعدين؟
نعم،.كل بوست اكتبه يكون فيه من احساسي الشئ الكثير
لكن،مستحيل ثم مستحيل ان اكون انا المقصوده بكل بوست
ووللاربع اللاتي نشفن ريجي اليوم.:
اذا انا مخطوبه والله والله بقوووووول
ليش ما اقول وأغبي؟
انا مشغوله فعلا ولكن بأمر آخر تماما
!!
شئ أخر:
صديقاتي الجميلات العزيزات الحبيبات وجميع من يقرأ إستكانتي
التدوين متعه كتابه كل شئ
في اي وقت ...وبمناسبه ومن غير مناسبه
لست في كل مرة اقصد شئ،ولست في كل مرة المح لشئ
اما من يجمع المعلومات هنا وهناك ليرسل لي نتائج التحريات ويسئلني:
انتي فلانه؟
فانا لااشعر بأن هذا شئ مهم جدا
!!
احيان اشعر لو اكتب عن المنتخب سيتم سؤالي:
انتي مساعد ندا؟
:PP~
~~~~~~~~~~~~~~
وعلى طاري المنتخب ...البارحة كان عندنا ضيوف بالبيت وقت المباراة
اول مرة اشعر باحساس اني ودي احذفهم بالاستكانات والاكواب
كل ما اندمجت طلبت مني احداهن ان اصب بياله جاي
ولا حلّيبه
يعني وقته يا يمة يزورونا؟
:(

التي اضحكتني فعلا،تلك العجوز اللي جابلت التلفزيون وتكلم المنتخب السعودي:
خلوهم يفوزون يا عوينتي ياينكم مدقورين شدعوة عليكم؟
اشفيها اخوانكم كلها كوره وعيالنا يبون يستانسون؟
مو اخوانكم؟
ابونا جابر ماااات.....بابا سعد ماااات....حكومه ما كان عندنا...مجلس امة يتكافخون
ميخالف بس خلونا كره نفوز
يسلمكم عن خاطرهم وخرو عن القوووول خلي يقولون عيالنا
ليش ما تحبونا؟

hahahahahahah
وايد ضحكتني

!!
امس مع صفاره المباراه وصلتني مسجات بعض الاهل والصديقات في السعوديه
حروني
ليش انا ماحب احرهم واهم يحروني
سويت روحي مو مهتمه
:Pp~
غيرت التلفزيون لأشاهد شي مريع:
حارس المرمى يمسك الشباك
وأجر الصوت من جرح برالي

!!

جان اصيح

:(

برفع قضيه على سكوب السخيفه
توها طالعه نتيجة المباراه ،معناته في اعداد مسبق لأغاني عبدالكريم الحزينه مع مشاهد المباراه
قمة التفاهه والسخافه
في احد شاف هالملاقه غيري؟
منو تحسب نفسها فجر وقناتها التافهه
ياربي تبرد قلبي فيهم
انا ما ابجي بسرعه
امس بجوني
:(
~~~~~~~~~~~~
بسي سوالف

ومزاج اليوم:
~~~~~~~~~~~

يا زينه ذكريني لي غيبتني بحور

وبشوق ناديني يمكن الدنيا تدور

وأرد ويا الصيف

ولا الشتا لي رد

ولا مع الأشواق...وقت الربيع والورد

:)

هناك 91 تعليقًا:

JooJ o MaJooJ يقول...

plzz mumken el magadeeer...?
shawagteeeny ye3t :(

Majoooj

Najmah يقول...

مسااااائج خير
استكاااانة
الكيكة شكلها يشووووق
بالعافيه بالعافيه
:**
لووووووووووووووول
ضحكتني مساعد ندا
اييييييه حدج يبتيها
على اللي بقلبي والله
:))
يعين الله ياصديقتي
احم احم
اوقات سعيدة
^_^

Kaadi يقول...

el kaika wow ...

o scope tafaha o sakhafaa ..oo MAKO WA6ANEYAA !! jellat 7ayaa wallah ..


o sij ams khoosh le3eb rabe3na :) magasaraw walaw enna kan wedna elfooz bss ham magasaraaw :)


o malich sheqel bel emails wel ta7aryaat ya7bhom 7ag ellegaaaaaaafa LOL

SHAHAD يقول...

حتى انا ابي المقااادير
شكلها يشهييي .. عليكم بالعااافية وتسلم ايييدج : )

وصح دايما يحسبون أي شي ينكتب بالبلوق هو شي شخصي وغصب طيب يتعلق بالكاتب :/

أما المنتخب .. فيعطيهم العافية ما قصروا .. بس الكرة فوز وخسارة : )

وسكوب هذي :@
ودي أمحيها من الوجود
وأمحي فجر السعيد معاها :/

سا حلاة سوالفج .. بس نبي المقادير مو تنسين : )

molok يقول...

لحظة ابي افهم ..
قاعدة الصبح عشان تسوين كيكة وبتودينها الدوام معاج ؟

سكوب محد عطاها صيت قوي غيرنا .. بس نتكلم عنها .. جنة مافي قناة غيرها ..

مشكورة .. وهابي ويك اند :)

Sn3a يقول...

الله يهداج مساعد ندا عاد
لووول

الكيكه شكلها يممم ممميييي

قواج الله

هالخدامه الفقيره تفكر تعطي معاشها حق ريلها ولا تيمعه حق عيالها ولا تخليه حق بيتها
مافي احد مرتااح


وبعدين الواحد لازم يحترم خصوصيه غيره
انا عرفت كذا بنت من البلوقرز
بس مارحت وقلتلهم ولا لي شغل

ابونا جابر ماااات.....بابا سعد ماااات....حكومه ما كان عندنا...مجلس امة يتكافخون


مت من الضحك على هالمقطع

حارس المرمى يمسك الشباك

وأجر الصوت من جرح برالي


كسر قلبي هالمشهد
عيب على سكوب
بس يتروالي سكوب ماتعرف العيب
اصلا كان ودي اروحلهم اقولهم رفعو روسكم انتو بيضتو ويوهنا
منزلين روسهم ويبجون ليش
مو منكم من الاتحاد واللي ماسكين الاتحاد ومايدرون شنو يعني كره
اخييه



جني هذرت عليج
يلا جاو

Kuwait يقول...

يمسيج بالخير والدفى يم الدفايه ;p
لوووووووول صحن الكيكه مثل صحنا بس احنا مدور ;D
انزين استكانه هالمره من تقصدين ؟
لوووووووووووول اتغشمر وياج بعد قلبي :*
قناة سكوب شفتها وغسلت جبدي فيها ببوست طول فجر السعيد وعرض بو عيده ;p
عليج بالعافيه بالكيكه طلعتي منتي هينه بالطباخ ومزاج بعد عسى ربي يحفظج ويخليج لأهلج :)

tweety يقول...

احيان اشعر لو اكتب عن المنتخب سيتم سؤالي:
انتي مساعد ندا؟

لووووووووووووووووووووووول
حلوة :pppp

يالزينة ذكريني هذي أغنيتي غنوها عشاني ترى لا اتحرشين :p

آآآآآآآآآآخ يا قلبي شفت وياليتني ما شفت وسمعت إتصالها ومنطقها السخيف اللي أقبح من فعلها حلاتها ساكتة ومسوية روحها ماتدري طلعت متعمدة الأخت اللي قبل يوم كانت اتطبل واتزمر الحين المنتخب صار وييييع وكخ وموزين ومحد يفهم بالرياضة غيرها صج للنجاح ألف رأس وللفشل رأس واحد بس عاد في فرق كبير بين النجاح وأتباعه والولاء وأتباعه بس شرهتج على من يفهم

جهل +مادة +جشع= إسفاف

Manal يقول...

مساء الخير يا احلى ستكانة شاي
بس عاد انا ترا ما يدور راسي بستكانة بس
انا ابي اكبر كوب
:)

حبيبتي يا حو سوالفج

طلعتي تطبخين من وراي ها
ما شاء الله
شكلها لذيذ
تسلم الايادي

ما عندكم توصيل للمنازل برة الديرة
؟
:)

بس انا ضحطتني العجوز
الي تبيالمنتخب يفوز

يحليلها

دمتي بخير حبيبتي
:)

7osen يقول...

خووش بوست

وخوش كيكة

خلينا نذوق شسالفة إستكانة
:)

بس صراحة قوليلي استكانة
صج إنتي مساعد ندا ؟؟

صج صج إنتي مساعد ندا ولا لأ ؟

هههههههههه

ههههههه
عاد مالقيتي الا مساعد
مع انه الصراحة خوووش لاعب

حسافة غلبونا السعودية
بس مبروك عليهم يستاهلون فريقهم قوي

:)

مشكلة اللي اي شي تكتبينه يفسرونه انه عليج

انا اعتقد الافضل إنا نقرا وخلاص بدون ما نفكر هذا الكلام كاتبه راعي المدونة عن نفسه ولا عن احد ثاني او حتى من الخيال

بوست حلو كالعادة من استكانة العزيزة

Q8EL5AIR يقول...

بالنسبة للحلو .. فياليت الكاكاو يكون اسنكرز :)

عند العيايز كل شي يايز !!

يحليلها عسى الله يحفظها .. مساكين العيايز على نياتهم :):):)


بالنسبة لسكوب فعن نفسي ولا مرة شفت الي ينقال عنه " بوعيده " .. اسمع عنه بس ولا مرة شفته !!



وتحياتي ..
ويسلموااااااااااااااااا :)

mtfa2el يقول...

عاد كله عبالي انج أحمد عجب
:p

Q8EL5AIR
تسمع بالمعيدي أحسن من انك تشوفه

violinist_q8 يقول...

قناة سكوب و حركتها السوقيه الي امس اقل مايقال عنها انها حركه واطيه مع احترامي للقرآء ..شنو الحكمه من هالاغاني ؟ انا ماشوف سكوب ولا اتابعها بس امس قاعد مع الشباب بين الشوطين نخلي عليها عشان نسمع اغاني المنتخب وبنهائية اللعب صدمونا

Sara يقول...

estekaaaaaaaaaaaaaaaaaanaaaaaaaa :D

LOOL adry eny m'3aaabra wayed wayed wayed bs ham walaht 3aleech o glt lazem agralaha shay bema eny ga63a 9arly malyoon sena :>

wala walaht 3aleech mooot :D bl 3afya 3aleech el kaikaa wel 3yoooza bada3t y7leelhaa :>

wel qanat ely geltay 3anha 3omry ma sheft'ha wala afaker eny atnazal washoofha dam enha ganat fajer el se3eed !!

5oosh kaika nby el magadeer plz :>

Sara يقول...

oO mino hatha bo 3eeDaaa wayed elnas ysolfoon 3ana wana madry 3anaa ?? heheh

a7es roo7y men kawkab thany lama ysolfon 3ana bl dawam >> who is he?

بنت أحمد يقول...

بوست لذيذ وسوالف حلوة

حتى انا اعجبتني العجوز

في كل مباراة خليها تزوركم

يسلموووووووووووو وما يسمنوو

that's iT يقول...

كااااااااك

اهم شي العيوز صج بدعت

أحس كلامها صج

والله كسرت خاطر عمرنا

ترى حالتنا إبدااع والله ضحكتيني:)

أهم شي إن خلوج مخطووبه!!

بالتوفيق

و هابي ويك إند

ur sis

Enter-Q8 يقول...

انا مزاجي اليوم
اهديه حق قناة سكوب

اغنية لمطرب اسمه حماده هلال يقول فيها

اه يابا و اه يابا
دي عايله واطية و نصابه

QiYaDiYa يقول...

عاااش التخاطر
انا بعد سويت كيكة اليوم ;p ;p


و ريحة الفانيييليااااا
احلى شي بالدنيااااا

;p ;p


و على المباراة و سكوب
ما شفت الصراحة
و اشوني ما شفت ;p

بس سمعت عن البلاوي!!!
و انتي احد الشهود العيان ;p


عطلة نهاية اسبوع سعيدة ;**

kAiKa-MGroMa يقول...

هيااا هذذي اناااا كيكتج مقرومه

ماشاءلله طلعتي شيف استكانه

:P


وسكووب المليقين اشكره شماته

بس محد معبرهم جبحهم

=D.

نهــــــــــار يقول...

السلام عليكم ...
أولا شكرا على الإستقبال الحلو...
والكيكه اللذيذه من شكلها ..
عليج بالعافيه..
.........
عزيزتي أغلبية المدونين يتوقعون أن تكون المدونه شخصيه لذلك يختلط عليهم الأمر..
فا عادي وبعد هالتوضيح ما أظن حد بيتجرأ يسألج مره ثانيه..
..........
وحليلها العيوز صراحه تغمض ...
بس ما عليه المنخب الكويتي
قدم أداء رائع بالرغم من الظروف إلي مر فيها
..........
دمتي بخير

حلم جميل بوطن أفضل يقول...

و حلفت يا زينة ما أفارق البحرين
في قلبي مزروعة و محفوظة وسط العين

المهم

أحلى ما في الكيكة الصحن

من وين شاريته؟

shakshaka يقول...

ضحكتييييني استكانه علي اللي مجابله التلفزيون و تسند عليييه هذي يدتي الله يرحمها تزف القولجي مالنا "ويه غربل الله ابليسك هدها هدها لا تمسكها شاغبتهم" لوووول واحنا نقولها يمااااا هذا قولنا مايصير ..... ابدا المرا معصبه و مقتنعه اللعبه كلها بالريييييل ايذ ماكو هاهاههاهها يا حلوهم...


اما الملاقيف الل يجمعون المعلومات ولا اللي تيي تقول انتي جنج فلانه بس كانج اخف طييييييينه منها بالصج!!!!!!!!!




عذااااااال يالدهن عداااااني.... واي انا صج محتره هاهاها

Yin يقول...

صباح الكيك والحليب الدافي والهيل يا استكانة


خوش كيكة قواج الله

بلاغة الشف هذي مشكلة عندنا وفي ناس جنهم المفتش وحيد .. يعني صايدين الحركة
سويلهم أكشن في حياتهم يا عزيزتي وكسبي فيهم أجر
:))))


مو وقته ضيوف وقت المباراة
يحليلها عيوزتكم
لووووووووووول
على النية


وناسة مو بس أنا اللي عندي أهل شماتة من السعودية
لوووول

مرت أخوي قبل لا يقطعون الإرسال دازة مسج لوول
معلش باركي لهم بكل طيبة خاطر .. راح ينحبطون
:))

سكوب؟
ليش يا استكانة ليش
ليش تظلمين بختج بهالقناة
!!


بوست ممتع يا سنفورة الأزرق
وإن شاءالله ويك أند راحة وخير وبركة
:)



:)

Yin يقول...

إي صج
أكثر شي ضحكت عليه نسيت أعلق عليه

ليش مساعد ندا بالذات !!!!!!

لوووووول

ikhalifa.com يقول...

الللللله
شو هالريحة هذه؟
لحظة لحظة
في أحد قارم الكيكة من فوق
شوفي فوق عاليسار شوي
اي..هناك
:P

عيل بجيتي هاه؟
البطولة هذه كلها خربانه و مالها طعم
دام الابيض و الأزرق طلعوا خلاص
أنا اعتبر البطولة منتهية
و ان شاء الله السعودية تفوز بالكاس

vancouver يقول...

ماشاء الله الكيكة تييييييينن

ليش ما طرشتيلي منها الله يهديج
ما تندرين اني نملللللله
ادبي صوب الحلو

ههههههه

تسلم ايدج
بس منو قارمها عالطرف
?

------

بلاغة الشششششششششششششف
ذابحة بعض الناااااس
يايييييييو
ههههه

--

اختار كلمات الخاتمه جمييييييييييييييل
وراقي مثل صاحبه البلوغ


:**

Mishari يقول...

صج صج نرفزتني حركة زفت الطين سكوب

قناة الهم والغم

وصوتج وصل يا استكانة:)

mo3ath يقول...

احيان اشعر لو اكتب عن المنتخب سيتم سؤالي:
انتي مساعد ندا؟

لوووووووووول بعض الناس ماكو شغل على بالهم كل موقف راح يصدف انه صار بفلان ولا علان من الي يعرفهم :D

ليش انت من بد الناس الي راح تطلع تعرف هالانسان او تعرف واحد صار فيه هالموقف ، فكري فيها وكتبي عن الموضوع واتوقع الناس راح تعقل شوي ، ان شالله :P

العيوزه عالم ثاني يحليلها الله يحفظها

انزين الي يبي من الكيكه اشلون ؟ :P

As YoU LiKE يقول...

انتي مساعد ندا ؟

انا عندي سؤال "مطبخجي"، وهو:
شلووووووون يكون اللي فوق ذهبي ؟

في شي اقدر اكله لونه ذهبي ؟

abu eldestor يقول...

شكل الكيكة يشوق
عليكم بالعافية

Fankooshy يقول...

حرام عليهم ليش ماسمعو كلام العيوز
اكيد كانت تتكلم بصوت واطي
يعطيج العافية :)

صبا يقول...

فديت البوست كله يا أحلى لون
يا لون الغروب
:*

استكانه مسائج كيك حلو يارب مثل الكيكه الي بالصوره
اتشوق
اشدعوه عليج...تنقصيلي اشويه
؛)

عنواني ما يضيع
صبا بلوق ....شارع الحب ...منزل 2009
ورا فريجكم بالضبط
؛)

ما شاالله عليج اتعرفين تسوين كيك
انا كلش مالي علاقه بالمطبخ
:(

ودي اطبخ ..اسوي اي شي
:(

انشالله الاسبوع الياي بدخل وبخترع لي شي اسويه
:))

.......


وعلى قولتج مو كل شي ينكتب في البوست يخص صاحب العلاقه
(المدون)
مرات تكون خيال او مشاعر الغير
أو ............الخ


...
وبوعيده
الله لا يعيده
لوع
جبدي
الله يلوع جبد فجر السعيد
وطاقم البرنامج كله
وييييييييييييع


والمنتخب ما قصرو كفو ووفو
والعبو باخلاص وسو الي عليهم
واليايات اكثر من الرايحات

:***********

الوتين يقول...

حدها الكيكة شوقتني ابي اطبخ
لازم تعطيني المقادير

القنوات هالايام حدهم اي شي لا مبادىء اعلامية و لا شي بس اثبات وجود

بوست لذيذ

|:| DUBAI |:| يقول...

Yumi Yummmmiii !!

7elwa Shratch

: )

Sh3oor il Laaaaaa 6moo7
yayny kel 9be7
3la Sa3ah 6am be'6b6

ya raby le6fk baSs !!

Shefty Bo 3eeDa bel New Style?!

9awrteH : D

O 7a6a wallpaper !!

Happy Face يقول...

أحلى شي مزاجج اليوم الله عليج تكملة الإغنية فيه طراي البحرين "نقطة ضعفي أهل أمي خوالي" فديت البحرين و أهلها.
أموووت على كتاباتج عسى الله لا يحرمنا منها..
أحيج في الله

nikon 8 يقول...

تسلم إيدك على الكيكة
ما فيها بيض
؟
واضح إن البوستات ما كانت عنك
ولكن إحساسك الصادق في نقل الأحاسيس
هو اللي يخلي الناس تعتقد إنه عنك
:)

Salah يقول...

كيكة الكاكاو تعتبر نقطة ضعفي... اذا كانت في المنيو من الصعب أن ينافسها شي ثاني

بالعافية

New Bride يقول...

مشالله استكانه شنو هالكيكه ؟؟؟ عليج بالعافيه تشوق


تصدقين قمت ما احب اني اكتب وايد بالبلوغ لأن كل ما اكتب شي توصلني مسجات فقمت ما اخذ راحتي كلش و احس راحت حلاوة البلوق


و قناة سكوب استغفر الله لا تعليق

{~المباركية~} يقول...

ماسوت عليينا خسارة المنتخب
ترى الكيكه تشووق ابي قطعه منها

SheLLoO يقول...

استكانتي الغالية:

تبعثين الفرح دومًا بقلبي :)

كلماتكِ سلسة معبّرة تغمرني بالأُنس والراحة :)

ودامت عافيتكِ بما صعنتهُ يداكِ ;*

--

كلماتكِ لها وقعٌ مختلف كُتبت عن أي شخصٍ كان لذلك هي محور سؤال واستفسار ;P

لكِ أشواقي ;*

SheLLoO يقول...

استكانتي:

دامت عافيتكِ بما صنعته يداكِ ;*

تتسلل حروفكِ لقلبي فتزيده فرحًا..

أتعلمين؟
عند إنكسار خاطري أحب المرور هنا لأتنفس :)

صدق حروفكِ هو من يدفعهم إلى البحث والتحري ;P

كوني دومًا مخلصة ترسمين إحساسي بكل مودة ;*

ZooZ "3grbgr" يقول...

استكنكن


ترى اقص عليج اذا قلتلج اني ركزت بالبوست

كل ما اقرا سطرين ارد فوق وابوس الكيكه

لووووووووووول

عليكم بالعافيه

اذا جذي كيكاتج ترى اضمنلج زباين

:")


على فكره

حق منو آخر اغنيه؟

اهي اغنيه صح؟

ميرامار يقول...

الصراحة

انا شفت الصورة
وما قدرت اقرا البوست بسبتها

تشوكوليت ويووز
ابي من الكيكة شلون؟

a7ibich yl KWT يقول...

ماشالله خووش موود من الصبح

عيني عليج باردة

لوو اموووت ما اسويها

بس خوووش كيكة اسمالله عليج

نبي نقصة ;p

الاغنية عجيبة
صارلي اسبوع ادندنها
مادري شالطاري

;)

رابطة هويتي اسلامية يقول...

شارك معنا في حوارنا
غزة في قلب مدون
مع المهندس : الحسيني لزومي
الحوار موجود علي الرابطة شارك معنا في الحوار
كن إيجابيا وحاول المشاركة في إنشاء بلوجر فعال
حوارنا مستمر مع المهندس
متي دخلت سجل تعليقك بسؤالك أو إستفسارك بالنسبة للمهندس
مع تحيات
رابطة هويتي إسلامية

esTeKaNa يقول...

jooj o Majooj
~~~~~~~~~~~~~~~~~
ياهلا ويا مرحبا
الطريقه لج ولكل من سئل

المقادير:
جوكلت سارالي كيك
كاكو نوتيلا
رهش
جوز

الطريقه:
تاخذين ماعون الجيس كيك وتصفين نص كمية االكيك

تخلطين النوتيلا مع الرهش وانا احب ازيد جالكسي ذايب شوي

تصبين الصوص فوق الكيك
بعدين تردين تصفين فوقه

وتحطين باقي كميه الصوص فوق الكيكه
لما تحسينها تشربت من كل صوب
تحطين فوقها الجوز
وتزينينها باي كاكو عندج سائل


هذي طريقه
الطريقه الثانيه اللي انا احبها
تعرفين الكيك اللي ينباع بالجمعيه بكرتون؟
عباره عن بودر وانتي بس تضيفين عليه بيضتين وشويه فانيليا وتحطينه بالفرن؟
انا هالمرة شريته وخلطته وحطيته بالفرن
طلعت الكيكة حااااااره وقصيتها بالنص
وتالي صبيت الصوص عشان تتشرب الكيكة من كل صوب
يعني بدل السرالي استبدلته بهذي الكيكة
:)
والجوز في طريقه ثانيه
طحنيييه وحمصيه يصير ذهبي
ونثري من فوق يصير كأنه كرسبي
لذييييييييييييييذ



وعاشت منال العالم
:PP~

esTeKaNa يقول...

Najmah
~~~~~~~~~
مسائج فراوله تارت يا صديقتي الجميله
اعتقد عليج الحين امتحان؟
عسى ربي يوفقج ويفتح عليج ويرزقج الدرجات العلا بالدنيا والآخره قولي امين
:***

esTeKaNa يقول...

kaDi
~~~~~~
هلا بالكادي هلا
صج بردتي قلبي يوم قلتي جليله الحيا
صاااجة والله سكوب جليله حيا ما تستحي مال من يسكرها ويفكنا منها
!!
وحياااج الله
:)

esTeKaNa يقول...

شهد
~~~~~~
ياهلا بالشهد كله
:)
المقادير شوفيها باول رد كتبت المقادير والطريقه افا عليج
:)

esTeKaNa يقول...

molok
~~~~~~~~
اي تصدق
!!
كان عندنا ريوق بالدوام
وطالبين مني الكيكة
خفت اسويها بليل تبطي وتصير مو حلوة
قلت اسويها الصبح احسن تصير فرش
:)

esTeKaNa يقول...

sn3a
~~~~~~
هلا بالسنع وسوالفها
:)
يعني خلاص ما اصير خدامه؟
جنج اقنعتيني
:Pp~
وصاجة المشهد كان يكسر القلب
خاصه وتوه مصفر الحكم
يعني تحسين اعداد مسبق
مادري علامها فجر السعيد استخفت
:(

esTeKaNa يقول...

KUWAIT
~~~~~~~~
ياهلا ويا مرحبا
ما تدرين منو اقصد؟
توقعتج اذكي
انا اقصدج انتي بالذات
:Pp~
واي البوست اللي انتي كاتبته يبرد اقصى القلب علقت وفصل النت حرررررني
كله يخون فيني
بس زيييين سويتي فيهم واللله
الله يخليج لنا ذخر تبردين قلبنا بكل شي يحر
:)

esTeKaNa يقول...

Tweety
~~~~~~~~~
الحين يا الزينه هذي اغنيتج؟
عشان جذي انا حاطتها
نبي نكسب رضاج
اهداء اهداء خاص لتويتي
:Pp~
وفعلا ...كلاامج عدل على فجر
اهي وين كانت كل هالسنين؟
علامها فجأة اشتطت علينا الله يهديها
:(

esTeKaNa يقول...

MaNal
~~~~~~~
ياهلا ويا مرحبا
افا عليييج
لو بيدي توصلكم الكيكة انتي واسرتج الجميله لي عندج
غاااليه والطلب رخيص
:D~
حبتج العافيه
واي كيكة عندي مزاج
متى ما اشتهيت شي حلو اتفنن
بس ما حلاتي تعبانه ولا مالي خلق
ماعرف اسوي شي
ذابحني الموود

esTeKaNa يقول...

7Osen
~~~~~~~~
ما اقدر اجاوب انا مساعد ندا ولا لا
لا تحرجني
مالي خلق المعجبات
ههههههههههههههه
:))
وبعدين الكيكة مقدمه يا اخوي
مد ايدك وانا اخيتك
انا اليوم حاطتها يم استكاناتكم افا عليك
حياك الله

esTeKaNa يقول...

Q8AL5air
~~~~~~~~~~~
تهقه نحط سنيكرز؟
لا في كيكة ثانيه مالت سنيكرز لذيذه
بس اسويها اصورها واحطها لك
:)
حياك الله

esTeKaNa يقول...

متفائل
~~~~~~~~~
انت الوحيد اللي صايدني
شدراك اني احمد عجب:Pp~

وبعدين شقصدك بالمعيدي؟
اشوف هاب بهالمثل
ترا يجيب الله مطر احلى
:)

esTeKaNa يقول...

violinist q8
~~~~~~~~~~~~~~
فعلا حركة واطية
!!
هذي الكلمه المعبره عن اللي سواه
صدمونا كلنا
الله يفكنا من شرهم بس

esTeKaNa يقول...

saRa
~~~~~~~
يا هلا ويا مرحباااااا
من وين طالعه الشمس اليوووم؟
انتي هاجرتي كوكبنا خلاااااص؟
هذي الساعه المباركة والله
!!
وزين تسوين عشان صحتج وسعادتج خلج بعيده عن قناة سكوب وبو عيده
:Pp~

شخبارج عساج بخير؟

esTeKaNa يقول...

بنت أحمد
~~~~~~~~~~~
هلا ببنت أحمد
يسلمو...الله يسلمج
بس لا يسمنو
ما اظن
هالشتا خطير الكل سمنان
:pP~

esTeKaNa يقول...

That's it
~~~~~~~~~~~~
اي والله كسرت خاطر عمرنا
:)
حياااج الله

esTeKaNa يقول...

enter-q8
~~~~~~~~~~~
Loooooooooooooool:))
انا اشهد
زين ما اخترت
:Pp~

esTeKaNa يقول...

QiYaDiya
~~~~~~~~~~
عاشو ربات البيت والله
:Pp~
علميني شنو كيكتج
ترا انا احب الكيك
:)

esTeKaNa يقول...

kaiKa MagrOoMa
~~~~~~~~~~~~~~~~
hahahahah
صح هذي صورتج
وييي الله يعينج على المعجبين الحين
:Pp~

esTeKaNa يقول...

نهار
~~~~~
يا مرحبا ببنت الامارات
وعليكم السلام ورحمه الله وبركاته
:)
شكرا لعذوبه مرورك
حياك الله ولا تقاطعينا
زيارتك فرحتنا

esTeKaNa يقول...

حلم جميل بوطن أفضل
~~~~~~~~~~~~~~~~~~~
الصحن ها؟
انزين
مو تقولون باجر نبي شوي
لو شوي
مااااااااااااكو
:pp

esTeKaNa يقول...

Shakshaka
~~~~~~~~~~~~~
hahahahhahahahahhaha
وااااي غشيت من الضحك علي يدتج عسى ربي يرحمها
اي والله عبالها كل اللعب بالريل
صح كلامها منطقي
ههههههههههههههههههه

واي يا شكشكة قلبي انتي اللي حاسه فيني
:))

esTeKaNa يقول...

Yin
~~~~~~~
صباح الفل والورد كله
:)
واي تعرفين المفتش وحيد؟
هههههههههههههههههههههههه
انا عبالي ماحد كان يتابعه الا انا
يضحكني ان غبي بس متوفق
وايد ناس مثله مرو علي بحياتي
:Pp~
وحتي انتي تشمتو فيج؟
مادري اشفيهم صايرين اشرار
مع اني انا اراعي مشاعرهم
بس هين هين
الايام بيننا
:))
وحياااج الله

esTeKaNa يقول...

Yin
~~~~
مساعد نداااا
اشهر واحد هاليومين
لوووول

esTeKaNa يقول...

ikhalifa.com
~~~~~~~~~~~~~
الله وصلتكم الريحة
:)
اي خلني اقولك
هذي بنيه مليقيفه
يابت قفشه وقرمت من فوق
وانا ماااحب جذي
بس شسوي
!!

وليش تضحكون اني بجيت؟
اي والله خنقتني العبره ودمعت منهم
لازم ارفع عليهم قضيه
:Pp~

esTeKaNa يقول...

vancouver
~~~~~~~~~~~~~~
هلا بفانوكفر كلها هلا
:*
واااي يا بعد قلبي
والله انتي ما تستاهلين بس هالكيكة
تستاهلين اكثر
ان شا ءالله على ردتج بالسلامة انتي والدكتور يا حرم الدكتور
:D~
واااااي خليني اقولج
انا اذا سويت شي احب انا اقصصه
واحتررررررررررر اذا احد تليقف وخربها
وفي بنت اله يهديها يابت قفشه وقصتها تخيلي
مو تضحكون بس انا دقيقه بهالسوالف
Pp~

esTeKaNa يقول...

Mishari
~~~~~~~~~~~
ياهلا ويا مرحبا
مشاري من وين طالع
فقدناك من غير شر

esTeKaNa يقول...

معاذ
~~~~~~~
يا هلا ويا مرحبا معاذ
اللي يبي من الكيكة ما يستحي
كاني رازتها بصاله البلوق
مد ايدك وسم
:)
حياك الله

esTeKaNa يقول...

As YoU Like
~~~~~~~~~~~~~~
انا مساعد ندا
انت اشلون طحت علي
:Pp~
بالنسبه لسؤالك احم احم
شكرا لانك حسستني اني فاطمة حسين
وبما اني بنت السلطان ومرات اصير جازروه فهذي نيرات ذهب
ناكلها فوق الكيك
:Pp~
هذا الله يسلمك جوز
الجوز اذا حمصته يصير ذهبي
والنتيجه:
تقدر تاكل شي ذهبي
لا تخلي شي بخاطرك
:))

esTeKaNa يقول...

abu ALdestor
~~~~~~~~~~~~~~~
مقدمه تفضل
:)
الله يعافيج

esTeKaNa يقول...

FankoShy
~~~~~~~~~~~
اي صوتها كان مشتط
:)
الله يعافيج

esTeKaNa يقول...

صبا
~~~~~~
ياهلا ويا مرحبا بالصبا
شارع الحب هااا
@@
اي البوستات الاخيرة بوستات شارع الحب ترا
:Pp~
تاااامرين امر يا الصبا
جم صبا انا عندي قولي لي؟
راح اسوي توصيل حق البلوقرز
وانا ماحب المطبخ
مزاج
وبس حلو
نمله اموت على الحلو
:))
حياااج الله

esTeKaNa يقول...

الوتين
~~~~~~~~
ياهلا بالوتين
مقادير الكيكة وطريقتها باول التعليقات
وحياااج الله
:)

esTeKaNa يقول...

dubai
~~~~~~
ياهلا ويا مرحبا
يالله دبي تعالي الكويت اسوي لج كيك
:)
واااي ول بيبر بو عيده
جان وقف قلبي
:(

esTeKaNa يقول...

HapPY face
~~~~~~~~~~~~~
ياهلا ويا مرحبا
احبك الذي احببتني فيه
ويا زين اهل البحرين وكل عيالهم
انا صج احب البحرين ترا
:)

esTeKaNa يقول...

NIKON 8
~~~~~~~~~~
الله يسلمج
اذا بتسوينها من كيكة كرتون تضيفين بيض اذا ما تبين استعملي سارالي كيك
:)
شكرا لتوضيح اجمل فكرة كنت احتاجها
:*

esTeKaNa يقول...

SALEH
~~~~~~~~
ما تنلام
احد يعاف هالكيك؟
كتبنا الطريقه
بتقراها حرمكم المصون وعليكم بالف وستمية عافيه
:)

esTeKaNa يقول...

NEW bRIDE
~~~~~~~~~~~~~
ياهلا ومرحبا باجمل عروس
الكيكة مكتوبه طريقتها باول تعليق شوفيه
:))
وصاجة
في ناس ما تخلي احد
بس كتبي وانتي فرضي اسلوبج مو كل شي يسئلون عنه ولا كل شي تجاوبينه


وحياج الله

esTeKaNa يقول...

SHeLLo
~~~~~~~~~
صديقتي الجميلة
حفظك الله ورعاك
وابعد عن قلبك كل انكساراته
وجودك يفرح قلبي وينور البوست
:)

esTeKaNa يقول...

zooz
~~~~~~~~
ياهلا ويا مرحبا بزوزه الجميلة
مو صح لذيذه؟
اييي ترا انا مزااج بالكيك اعجبج
:)
والكلمات الاخيرة اغنيه حق الجميري
تيننن
وااايد احبها

esTeKaNa يقول...

ميرامار
~~~~~~~~~
ياهلا ويا مرحبا ميرامار
الكيكة مقدمه افا عليج
كاني كتبت طريقتها باول تعليق
ولو علي
اسوي توصيل منازل
:Pp~







A7bICh Ya kuwait
~~~~~~~~~~~~~~~~~~
يا هلا ويا مرحبا
انا لو اموت ما اسويها
بس يايتني اوردر
استحيت ما اقوم واسويها
:))
والاغنيه صج عجيبه
اشوة مو بس انا الي هابه فيها









الرابطة
~~~~~~~~~~
شكرا وماقصرتو على المرور

مـــــي يقول...

احيان اشعر لو اكتب عن المنتخب سيتم سؤالي:
انتي مساعد ندا؟"

مت من الضحك احيانا الناس تحلل على كيفها ؟ واذا وضحتي فكرتك فكرنهم الصح

الخيلاء يقول...

على الطبخ
انا لي سويت شي اتقولي امي
شنو نازل عليج اللوحي اليوم

وهالمهاره ما تطلع الا برمضان
:)
و انا ابي اصير ربت بيت مايصير
خاصه اني مداومه اليوم
:"(

____

قط سمعتي مقوله الفاضي يعمل قاضي
هذا بضبع الي يتحرون و ايمعون المعلومات و يطرشونها يذكروني بمكاتب التحريات الخاصه

LoOoOoL

____

واي ياحلاتها هالعيوز
بعد قلبي مشتطه مع المنتخب
بس يالله يامعوده الدور قبل النهائي
ولا الدور الاول مثل اولت العام

وعلى سكوب مو بس اهي الي اتحر
انتي سمعتي تعليق الجزيره
واي يحر القلب و يذبح
حطينا تعليق الكويت
صج ينوم بس ميخالف
_____

واي ياهالاغنيه
تشلع قلبي

كلماتها فضيعه
خاصه هالمقطع
يكسر خاطري
كل الي يبيه انه احد يذكره

Sweet Revenge يقول...

شلونج استكانه ماشاء الله خوش كيكه


بس الصراحة
اعجبتني المرة الكبيرة تبي الفوز
مساحل
مايصير يما
اما قناه سكوب فالصراحة هذول مرفوع عنهم القلم والمساله بالنسبة لهم مسجات تزيد وارصدتهم تزيد علي احساب اي شي

مو كل بوست تكتبينه عنج اكيد بس
مرات الواحد يحس ان في الامر مكر
:P
ومرات مشاغبه وتحرش
يختي نحبج مايصير نتحرش
لووووووووول

ليله سعيدة ,وتصبحين علي خير وسعادة سويت

Sara يقول...

zoooreny ya estekana wentay t3arfeen a5baaary :>