الخميس، سبتمبر 11، 2008

سنفور غضبان:P~

(1)

~~~

كل يوم قبل الفطور يلفت نظري زوار مدفع الافطار
يهال فرحانين يسون لنا باي باي
وكبار يسون روحهم ما يدرون عن الكاميرا وكل واحد تليفونه بيده
بعدين قبل الاذان يستهبلون كلهم يسون باي باي
ياربي حر ورطوبه
بس اهم مستانسين
ما تشوفونهم?
اذا وناسه انا ترا ناويه اروح هالويك اند
تحروني اسوي لكم باي باي في موقع مدفع الافطار
:pP~




(2)
~~~~
كلفت بعمل بحث منذ شهر سته على ان يكون تسليمة في منتصف شهر تسعه
هذا البحث بالنسبه لي مهم جدا
تعبت في تجميع مصادره والكتابه فيه...في البداية اشتطيت
مع الوقت بردت وبردت واجلت كل عمل اليوم لغد وبعد غد
باقي لي بعض الامور التي لابد من اضافتها للفصل الثاني
اضافه الى اني لم انتهي من طباعه البحث
لاختصار الوقت يفضل الكتابه بشكل مباشر في اللاب توب
ولكن استكانة البدائيه ما ينزل لها الوحي الا اذا مسكت القلم
شخطت
وكتبت
ومن ثم تطبعه
!!

كل ما قررت الاعتكاف بالبيت وهيئت لنفسي كل الاجواء للكتابه
تباغتني امي الحبيبه بخططها:
ياللله استكانة بنروح بيت خال ابوي حك ظهري نبارك له بالشهر
ويدة خاله ابوج تسئل عنج
ومرت رفيج ابوج بتمرنا
ومرت مدير اخوج تسئل عنج
ويدة يدتي بنمرها
!!
يا ربي يا حبيبي
اهلي يحبون الناس..والناس تحبهم...بس عاد بس
وبس البس
في احد من البلوقرز ما مرينا عليهم؟





(3)

~~~~
أول البارحة...تفطرت هريسه ونسيت اتسحر
سهرت..ونمت من غير سحور
!!
في صباحي الباكر شعرت بقرصات جوع



تضاعفت مع العطش ودوخه الدوام من بعد ليل السهر



لأصبر روحي قررت اني بمجرد ان انتهي من الدوام سأشتري شي لذيذ اكله على الفطور



خرجت من الدوام احمل احلامي الجائعه



وخططي البسيطة



وتذكرت...بأن لا يوجد في بوكي الا دينارين



!!



مريت بيت التمويل في احد محطات البنزين...ما سحب هناك عطل



مريت كيفان...الشامية ...ونفس النتيجة



قررت ان اذهب مباشره لمخبز الدنماركي باليرموك واشتري بالكي نت مو الا اسحب



!!



ساعه وانا اتفرفر بين الرفوف واختار



سعيده جدا وانا اشتري وانقي وما بقى شي ما خذيته



كان المحل زحمه....لبقت روحي بين الزحمه وخذيت دور



وجهي وجه طفل سعيد وابتسامه عريضه وشقاقيه



لما وصل دوري انصدمت:



الكي نت ما يشتغل



!!



تفشششششلت



ولان شهوة القلب عونة



تركت الاغراض وتوجهت بهذا الحر لبنك الشرق الاوسط..ما يسحب



توجهت لجمعيه اليرموك...ما يسحب



صادفت نساء خارجات من الجمعيه...الكل يتحطلم:



هناك عطل وما يسحب



:(






كسرت خاطر نفسي



اتصلت على امي على الساعه الثانيه والنصف ظهرا وشكيت لها الحال



لتفاجئني الغاليه:



انا جم مرة قايله لج لا تطلعين من غير فلوس



زين جذي زين؟



لا شعوري رديت عليها:



يمة يسلمج تكفييين ترا انا متعسره



!!



انهيت المكالمه ورجعت البيت بخفي حنين



رجعت احمل خيبه امي وعساره وجوع ونوم



اول ما دخلت لمتني امي وسئلتني امي:



شبتسوين الحين؟



زامة الحلج وعاقده النونه:



شبسوي؟



باكل الهوا وبحط راسي وانام



يا ويله اللي يفج علي الباب



ويا ويله اللي اسمع حسه



يا ويله اللي يقرب من داري



وطراااااااااااااااخ...رقعت الباب ويا نومه كوني نومه لي الفطور



!!



على الفطور نازله مع الاذان



البوز واصل لي الخفجي



والوجه مخده فيها عيون



اول ما خذيت وضعي على الطاوله،اشعر بنقزات اخواني وكتمهم لضحكتهم



اخوي الكبير يتأملني ساعه ثم يكلمني:



اشفيه سنفور غضبان؟



ترا شاري لج خوش حلو انا



:Pp~



بصوت نايم غريب خفت منه لما طلع مني رديت:






انزين شكرا



!!



شوي ولا اخوي الثاني يطقني ذيج الطقه على ظهري:



بيعنا بالسوق يا الحبييب



@@



الى متى يعتقد اخي اني واحد من ربعه بالدوانية؟



انا جم مرة قايله ايده ثقيله تكسر ظهري؟



جم مرة قايله ماحب احد يجرب مني؟



اختي الصغيره تقرب مني كل الصحون



وامي تنظر لي بطرف عينها



والكل كاتم ضحكته التي فجرها اخي عندما قال:



استكانة ...خدج فيه ورده



!!



بققت عيوني:



نعم؟



قمت من الفطور توجهت للمنظرة لاكتشف ان دانتيل المخده معلم على وجهي المنتفخ وكأني ماكله بيكنج بودر



يا زيني وانا ويهي منقش



الورده على طرف المخده ....انا شلون نايمة؟



شعرت برغبة بالضحك



ولكن...ضحك اخواني قتل رغبتي وجعلني اصارع دمعة مالها سالفه تريد ان تنزل



!!



تضحكني امي عندما تشعر بتأنيب الضمير:



استكانة بااااااجر بعطيج فلوس وروحي الدنماركية اشتري كل اللي تبين



زييييييييييين؟



ياربي انا ياهل كبير؟



في ياهل عمره اربع وعشرين سنه؟



!!



لما قعدت مع روحي بالمسا اكتشفت شي



باني متوتره من امر



وحزينه لامر ما



وتداخل هذا على هذا،وتراكم...حتى انفجر على شي تافه وبسيط



عدم عمل الكي نت وجوعي كانت القشه التي قصمت ظهر البعير



منو البعير مادري



:pP~





















(4)



~~~~



العسر الله يعسر عليه



!!



كتبت البوست وانمسح



حسيت ابي ازنط احد لما ما لقيته



اسم الله علي الرحمن الرحيم اشفيني



تعوذت من ابليس ورديت كتبه



وان ما لقيته الحين



ممممممممم



ممممممممممممم



برقع الباب وبروح داري ومحاربه الكل



:pP