الأحد، يناير 27، 2008

الى اللقاء

الساعة الخامسه وخمسين دقيقة صباحا
استلقي على ظهري باستسلام
أناظر غرفتي بشفقة
خزانات الملاببس مفتوحة
وملابس مبعثرة
وحقيبه سفر متربعة في الأرض تناظرني واناظرها
!!
مسكينة حقيبة سفري
تعاني من تخمة ملابس
غريبة..هالليلة مرت سريعا
قضيتها في عرض أزياء لكل ملابسي
وتدعس بهالحقيبه المسكينة
أرق طول الليل...البس للمطار تنورة ولا جينز؟
!!يا سخافته من أرق
اعشق البساطة في السفر
ارتداءشئ مريح وجميل
رغم ذاك العشق الجميل لبساطة السفر إلا إني أعاني من عقده بدله المطار
ليش نكشخ حق المطار والطيارة؟
وانا أدري احتمال كبير بعد سهرة اليوم أنام نومة الربيانه في مقعد الطيارة
:)
ليش سهرت اليوم؟
كنت انوي النوم بساعه مبكرة هذه الليله
ولكن نومتي صاحبة المزاج عاندتني كالعادة
تذكرت طفولتي..حين كانت نومتي تعاندني
واخاف من خيال كل شئ معلق في غرفتي
فاتسلل لغرفة اخواني واشكي لاخوي من عناد النومة
الكبير كان يحذفني بمخدته ويكمل نومته الشرير
والصغيريا بعد قلب أخته كان يعمل لي غسيل دماغ:
غمضي عينج
وشوفي النومه تيي لج
كاهي وصلت
واخذي نفسج
وتخيلي روحج تشخرين
اوخ اوخ
دشيتي بالنومه
اووووو...خلاص غرقتي بالنومه غرقتي
لا خلاص بدت الأحلام
!!
كان يغمض واغمض
ونخلص من فقرة غسيل الدماغ
اهو نايم وانا مبققه عيوني
!!
انا قلت لكم إني بسافرسفرة وفجأة؟
سفرة وفجأةهذي سفرة من غير تخطيط
الوالد الحبيب كان مقترح ماليزيا
واختي تبي لبنان
وامي بخاطرها عمره
وانا بو سميح ،راضية باي مكان المهم تختمون على جوازي عن خاطري
:Pp~
نمت البارحة متفقين على العمرة
صحيت من النوم ابوي حاجز اسكندريه
القاهره
الكويت
heheheheheh
الطيارة الساعه تسع وربع
والساعة الحين ست وربع وأنا قاعدة
وشكلي باجر بطق طوف
!!
هالاسبوغ بيكون من غير لاب توب ولا موبايل
بشوف..اشلون بتكون حياتي من غيرهم؟
كل اللي معاي رواية
ودفتر صغير وقلم
جود ارجع كاتبة بوست بالمصري
:)
اسبوع وراجعه
ديرو بالكم على البلوق
لاحد يكسر استكانه
ولا تصبون جاي ...الا وفي قفشه داخل
مابي استكانه تنبط من الحرارة
الزرع واللي يعافيكم اسقوه
والدرايش فتحوها...ابي تيار هوى على طول بهالمكان
:Pp~
يراودني الأمل في ليلة ألقاكم
وأطرز بالفرح أحزان فرقاكم
مع السلامة
استودعتكم الله الذي لا تضيع ودائعه