الخميس، يناير 10، 2008

مكربنه:P~

فستان أحمر مشيّر
موديله قرظه العافيه
عباءة فوق الراس
وطبقات من الملابس المتتاليه على جسدها
تنتظرني متململه منذ صباحها الباكر وما وصلت لها الا في ذاك الضحى العود على قولتها
لطيفه ظريفه ماما عايشة.. هي جدتي أم أمي خفيفة الظل والطباع
تغار من جدتي أم أبي،تلك المثقفه الحافظة لكتاب الله الهادئه الطباع وأنا اول حفيداتها
أتمنى ان اجمع بينهما فأخذ حكمة أم أبي وسرعه بديهه وظرافة أم أمي
!!
كنت قد واعدتها بأخذها للمكان الذي تريده في احدى هذه الصباحات البارده الجميله
صدمت..بأنها تريد الذهاب لسوق السمج ومن ثم الجبره
تقول تبي توسع صدرها
!!
ولأاني غير مستعده لأن اوسع صدري في سوق السمج والجبره قررت ان اقنعها بالذهاب للكوت خاصه انها لم تقوم بزيارته من قبل
.
.
.
.
قضينا الطريق في قصص من الخيال العلمي قهقهت لي قلت بس
يقولج اول في مرة وعليه ما رزقها ربي ذرية،راحت الطبيب وعطاها أدوا
اخذي الأدوا وحطيه على الكومدينه
وتعال يا المليقيف يا ريلها واشرب الأدوا تدرين شنو صار؟
شصار؟
حمل الريال
!!
وتوهقت المرة،ابونا حامل..خزياااااااااه خزيااااااه شتسوي؟
الناس تسئل،وينه أبوكم؟ علامه بو فلان ماطلع؟اشفيه ابوكم؟
تقولهم والله مو طيب تعيبين ابونا
خشته بالبيت مسيجينه
وتالي يا محفوظه السلامه ولد الريال وياب
ياب
!!قرعه
قرعه تركض على كبر الحوش تغسل المواعين،وتخم الحوش سنع الدنيا بقريعوه
الام تنادي قريعوه:يا قريعه غسلتي الحوش؟
قريعه:نعم
قالت اعطيج غدا ابوج تعطينه الصبيان
راحت قريعو وردت تغني:
كليت الخبز ولبانه
كليت ابوي وصبيانه
كليت الحمار وأذانه
!!
تصدقين بنيتي،.كنت اصدق وطول النهار افكر اشلون كلت الحمار وأذانه
اشهق من الضحك:
يمه اشلوووون الريال ايييييييييييييب أقرعه
!!
.
.
.
.
وصلنا للكوت الساعه العاشره والنصف صباحا،الجو اروع من رائع
استراحت على مقعدها المتحرك تحلطم على نفسها:
محروله انا تركبيني عربانه؟
جدتي منبهره بالجو..بالمكان ...بالمنظر الجميل والمكان الهادئ
دخلنا سوق الخضار في البداية:
بجم هذا؟
دينارين ونص حجيه
يالله عاد يلله،حدك دينار ونص
يشرح ويشتط البائع ويحاول ويحاول وتصدمه جدتي:
يالله ماكو غير دينار ونص ماني معطيتك
عندما يرضخ ويستسلم تهمس لي جدتي :
!!أمشي عنه بس امشي عيونه تتبازر بسم الله
@@
نذهب لآخر ومن البدايه يعطينا بدينار ونص
توقعت انها ستفرح ولكن اكتشفت انها ما زالت تمارس متعتها:
يالله عاد يالله،غير دينار ماني معطيتك
وان ناشبتني ربع بربع باخذه
قضينا وقت طويل نفتر بين الخضار شرينا للكويت كلها
انتقلنا لسوق السمج
قطط تتزحلق بين ارجلنا بحماس وتمكن
اتماسك وامثل الشجاعه
ثم استسلم بصرخة مدوية:
يممممممممممممممممممممه قطوة
تقف جدتي على رجليها بحركة مسرحيه جميله تاركة كرسها المتحرك راكضة خطوتين لمحل مجاور
اغشي من الضحك:
واي يمه اشفيج قمتي؟
تنظر لي بعين مخترعه:وين راحت القطوة؟
استكانه: انحاااشت هااا يمه طلعتي خوافه ماني ببعيده عنج عيل
عندما لاحظت بعض الأعين التفتتت علينا،وبعض الباعه يكتمون ضحكتهم افحمتني برد مبهر عجيب :
جبي جبيج الله
!!
أنا اخاف؟
انا قايمة اكشها عنج اصلا
بعد المشهد الكوميدي مع قطط سوق السمج استمرينا بالتمشي،جدتي تحرص على السؤال:
هذا سمج كويتي ولا ايراني؟
اي مبين من خشته كويتي هذا
لا هذا مبين ايراني شوفي السمجة لا اله الا الله يبين
هههههههههههههه
اشلون يبين من خشته مادري
.
.
.
تركتها تنتظر في قهوة جميله بجانب سوق السمج ونقلت الأغراض للسياره
رجعت وجدت جدتي تغني بصوت خافت جميييييييييييييل:
كل البناااااات نجوووووووووووووم،واستكانه قمممممرهم
كل البناااااااااااااااااااااا نيوووووم ،واستكانه قمرهم
.
.
.
لم اتصور انها ستستمع هكذا ،ولم اتخيل ان الهدؤ الطاغي في الكوت قد يحول هذا المكان لجنة
ادخلتها للمحلات،استمعت بتقليب الملابس والسؤال عن اسعارها وبين الحين والآخر تكتشف شئ يضحكني:
وأنا اقوووول وين يروحون ما يبون الزواره اثاري جذي الكويت حلوة؟
وانا اقوووول من وين يشرون هالهدوم؟عمار يا الكويت كل شي عندنا
شدعوة هالكثر بلوزه قرظة العافيه؟ليش خيووطها ذهب؟
والله هالحريم كلهم بالمطاعم؟ومنو ينجب حق الريايل بالبيت؟
اشلون هالأواددم مجابلين بعض؟اشلون ياكلون وكل من مبقق عيونه على الثاني؟
.
.
.
.
دخلنا محل لاصحاب القياسات الكبيرة،الله يحفظها متعافية شوي
انبهرت بالمحل وفرحت:
ماخلو شي اهل فيلجا
شكو اهل فيلجا مادري؟
نادت البائعه الفلبينيه بالمحل:
عندج جاكيته لونها صتي مشيره؟؟
انا نفسي ما ادري شنو يعني صتي فما بالكم بالفلبينيه المسكينة
الصتي..لون رمادي مرعب
!!
اختارت 3 جاكيتات :
خضر وحمر وبنفسجي،انا من أواني احب الحمر لا تشترين شي يقمت قلبي
بس نادي هذي ام ويه ودر قولي لها الحين اذا صوبنتهم ما يدخلون
@@
حلفت عليها ان لا تدفع شئ وتعتبر تلك الجاكيتات هدية مني اليها
رغم اني انا التي سأدفع وجدتها تسحب الفلبينيه من طرف بلوزتها:
يالله عاد ماخذين ثلاثه جم اخر شي؟
تخيلو جدتي تكاسر في إيفانز
hahahahahahah
.
.
.
.
أثناء مشينا متوجهين لاحد تلك القهاوي نشرب جاي الضحى،مر بجانبنا شاب دايخ قال شئ ومضى
ارتجفت جدتي وسحبت عبائتها على نفسها:
قايله انا ماني لابسه هالمشير،شفتي شفتي كله جذي انا وانتي ما تفطنيني
خزياه بس
!!
في القهوة اسئلها:
تتدللي يا جميله انتي،شنو تشربين؟
شوفي...قولي لها تيب لنا قهوة تركيه مثل اللي يشربها خالج بس ابي شكر فيها
وتيب لنا بيالة جاي قطيرة
وجان في بسكوته ولا شي ابي حبيبة
!!
بس قولي لها كل شي تبينه مو تغربلين بنت الناس رايحة راده
hahahahaha
كانت تشكي لي عن بعض الامور وعن خدامتها المخديه كالعاده
انصحها بذكر الله والتعوذ من ابليس
تسمعني وانا اشتط واعطي محاضره دينيه ثم تبهرني برد مفحم:
شوفي انتي ياالشعراوي،اعرف انا هالحجي
تبارك حافظتها،معوذات اعرف،سبحان الله الحمدلله كل شي اعرف
مير البارحة ما تدرين تعسرت تعسرت بليل،لقيت كتاب اسمه الكرب
قريه وربي شرح صدري مرة واحده
قلت لااااااااااا اله الا الله طلعت مكربنه
!!
.
.
.
لا اعرف كيف طار الوقت
استمتعت بخفة طينتها
بغنائها الهامس بين الحين والآخر
بدعائها الصادق لي في كل خطوة
بعفويتها وهي تعظ طرف عبائتها
وهي تزفني جدام الناس ثم تسئلني بعد مرور وقت:
عسى ما زعلتي
!!
ببساطة تفكيرها وهي تسئلني:
يقولون الأولين الميتين يحجون
علامهم سكتو؟
استمتعت ونامت نوم عميق بعد تلك الطلعه الصباحية الجميله
رغم مرور وقت على ذاك اليوم ما زالت تتنطع بفرحتها وتذكرها في كل سالفة
ربي يرزقني جنة رضاج ويحميج يارب
الاسبوع الماضي كان لها..والقادم موعدي بالمباركية مع ام ابي
!!
هكذا تستمتع استكانه ببطالتها
:Pp~