الجمعة، ديسمبر 19، 2008

swalf....

(1)
~~~~~~~
سمعت أحد زملائي يقول انه في فترة كان سبع وربع بالكثير هو على مكتبه
وكان يسمع صوت أوراق تتصفح وصوت أقلام
وعندما يمشي في الإدارة مافي أحد
وأنه بعد ما قام احدهم بوضع سورة البقرة
انقطع الصوت الحمدلله
!!
زميلي بو شطة...انا ما صدقته وخمرت
لكن لا أنكر ان السالفه تخزنت في بالي
الشاهد،البارحة قاعده اكتب واسوي برنت على الأوراق
واطبع بعض الأمور
ما وعيت الا البرنتر صرخت من قمه راسها ذيج الصرخة
وصخة بالإداره
فزي يا استكانة من مكتبج وشهقي وايدي على قلبي:
يمة بسم الله الرحمممممممممممممن الرحيم
بسم الله
موظفه أخرى سئلتني اشفيج استكانة؟
قلت:انا سمعت أصوات عالية
!!
مسكت ايدي:
استكانة انتي طابعه مليون حكم
خلصت الأوراق
واستخفت البرنتر عادي
:pP~
واخزييااااااه حسيت بلحظتها بخاطري أختفي من الفشلة
:Pp~
~~~~~~~~~~~~~~~~~~~~~~
(2)
كان اسبوع ثجيل طينة ومخدي
حاولت أعطية فرصه وأحبه
بس ما حسن موقفه تم مخدي وثجيل طينه
انت يا الاسبوع اللي طاف
!!
يوم الأحد بعد صلاة الفجر حطيت راسي ونمت
اسمع ابوي يناديني يقعدني،يا بعد قلبي قلبه
وانا خامرة مندعسه بفراشي وساكتة
قلت ماني راده عشان ما يخرب النومه
بعدين كسر خاطري:
شنو يبه اشفيك؟
قالي:
اشفيني ؟دواام يبه يالله
تخيلو اني نسيت اني ادوام واني موظفة
وقمت البس ودموعي تصبصب:
أنا ابي اصير ربة منزل
مابي دوام،انا متى اتقاعد اصلا
:(
اضافه لعساره كل هذا ،انا فاقده الذاكرة
يسئلني مديري وين الاوراق؟
اي اوراق
!!
عطاج فلان
منو فلان؟
استكانة الموضوع كذا
اي اوكي....واحقره
أخرتها اتصل تعالي عندي المكتب،متصل الساعه ثمان
وانا لي عشر ونص اغطط بسكوت وحليب وحاقرته
فجأة لقيته فوق راسي
اول شي طرا على بالي:
تبي بسكوت؟
مع ابتسامة عريضة
اشوة يشفع لي ماضي زين قبل العطلة
......................................................
(3)
نهاية الإسبوع كانت مضحكة
!!
انا ما احب ادخل بمواضيع خطبه وزواج مابين اشخاص قريبين مني بدرجة كبيرة
وعندي في ذلك وجهة نظر:
كلاهما اتمنى له الخير واي مشكله ممكن تحصل بينهم راح اتأثر بشكل كبير
وثانيا...انا اعرف سلبيات وايجابيات كل طرف وصعب علي كشفها كلها للطرفين
فالموضوع يخوفني
!!
رغم ذلك اربعة من شباب العائله ارتبطو بصديقاتي دون تخطيط مني
يعني انا خوش صديقه اللي تبي ترافجني زود
Pp~:
هو قريب لي،شاب محترم اكثر مما يجب ،عمله دوانيته بر وحداق وسلامتكم وتعيشون
ما عنده كيري ميري ولا سوالف خربوطية
وهي إحدى صديقاتي القريبات مني بشكل كبير تعمل في مكان آخر ولكننا صديقات من عمر
البنت انذكرت له من طرف غيري،واقنعته اخته ان يراها في مكان عام نظرة شرعيه ومن ثم اذا عجبته تقدم رسمي
ويفترض اني انا ارتب هذا الموضوع بحكم انها صديقتي
وصار لهم شهرين وانا استكانة المشغوله كل يوم باجر ومو قاعده تضبط معاي السالفة
وماأدري ليش ما كنت متحمسه حق السالفه وايد
.
.
يوم الخميس بعد الدوام عندنا دورة مشتركة انا وهي
، قررنا نتغدا برا بعد الدوام وتالي نروح الدورة
ضبطت الموضوع من صوبهم...استذن اهو من الدوام ومسكين يانا طاير
البنت من السبع الا ربع بدوامها ما طلعت الا ثلاث فلكم ان تتخيلو حالتها
وانا قلت ميخالف يشوفها طبيعيه احسن
!!
وتذكرت امه وهي تدعي لي ان ربي يبني لي بيت بالجنه ويسخر لي عبيده
قلت يالله كان بها
قريبي كان بصحبة ولد خالتي...ولد خالتي كومبارس مجابل الطوفة وهو مجابلنا
الحين اهو يشوف البنت،انا ليش ويهي احمر وما عرفت آكل؟
مع اني المفروض كومبارس
:Pp~
صديقتي معصبه من مديرها ومشتطة وتاكل بسرعه عشان نلحق على الدورة
ومكياجها سايح
وانا متسنده واكل شوي شوي
كل شوي اقولها :
شوي شوي على رااااحتج كيفها الدورة
شوي بس كحلج جنه سايح مادري شوفيه
وطول السالفه ...ردة فعلي اي صح اي صح
فجأة قالت لي:
استكانة اشفيج؟ريل على ريل ورازه الظهر وما تاكلين
قلت لها لا والله شبعانه مو مشتهيه..وانا كنت ميته من اليوع
اللي حرني...يفترض يطالعها ويروح ما وعيت الا هالصحون اللي تروح لهم
اهو وولد خالتي طالبين ابتيزر وغدا
وهو داز لي مسج:
عيونها صجية؟
ضحكني....البنت عيونها فاتحة وواسعه ما شاء الله بس وين شافها من بعيد
هذا ان دل انما يدل على انه ما خلا شي
بعد فتره
دزيت له مسج:
اوكي؟
رد علي:
حد الاوكي
استانست وحسيت بالانجاز واهي تسولف وانا افكر يبيلي بدلة وبلابلابلا
المهم...قمنا بنطلع من المطعم اهو طلع معانا ويمشي صوبها
فجأة
فجأة
وفجأة
.
.
.
.
لفت ويها وحواجبها واصله لي منبت شعر راسها
قالت له:
وبعدييييييييييييييييييييييييييييييييييييين يعني؟
انت ما تستحي؟
أنا تبريدت بمكاني....وهو ويهه علامة تعجب
looooooooooooooooooooooooooooooooooooool
اهو من التوهق قالها:
نعم نعم؟
اهي بكل عصبيه ومبققه عويناتها:
اخوي ما يصير ريال شكبرك يعني وبعدين وياك
مادري شقالت له،انا كان ويهي ويه مااااروكووووووو...تعرفون ماروكو؟
اهو يطالعني ويطالعها والويه قلب حمررر
مسكت ايدها واقولها:
لا لا لا.....شششششششش لا لا
وأوطي صوتي
تغلغص الحجي شقولها؟
اقولها سكتي لا تهدمين مستقبلج؟
شسلطها؟
عمرنا والله العظيم ما ردينا على احد ولا انحطينا بموقف جذي اشفيها؟
looooool
وانا اقولها لا لا لا،لفت ويها قالت:
لا استكانة....عيب جذي منتهى قله الأدب
منتهى قلة الأدب.....وي يا حسرة قلبي اشششششش
اهو فجأة ا ختفى
وانا بس راح يتني هستريا من الضحك بس مو قادرة اضحك
قمت ادزز مسجات حق اخته مضمون المسج:
hahahhahha
hehehehehe
وبالسياره رافعه طرف شيلتي على حلجي لاني مو قادره ابي اضحك
:).
.
.
.
اهي لاحظت اني خامرة
تقولي :
استكانة اشفيح ساكته؟
ما يحر؟
من قعدنا وهو يخز يعني عيب وأخرتها يه صوبي كلش ما حسيتي؟
قلت لها
اي بس ما نرد عليه ،عمرج حياتج ما رديتي على احد
خليه يطالع كيفه اخرتها بيمل
بعدين مو عادتج مادري اشفيج اليوم
!!
فجأة:
استكانة جنج مستانسه يعني؟
بلعت الضحكة:
شوفي يا صديقتي جربنا السنع 24 سنه وداخلين على 25 ما يفيد راحت موضته
جربي شي ثاني
:Pp~
ردت علي:
عاد من زينه ؟شييييييييفه اجلح
بعد قلبي ولد خالتي تذكرت ويهه
LOOOOOOOOOOOOOOOOOOOOOOOOOOOOL
قلت لها وي عشتو احلى شي الاجلح هذا ان دل يدل على ان كويتي بطن وظهر وارتداد
بعدين انتي شكو بشكله؟
اهم شي اخلاقه وسنعه ودينه
قالت :
من زين ا خلاقه؟مجابل بنات خلق الله بالظهاري ويخز
LOOOOOOOOOOOOOOOOOL
ياالله كسر خاطري وحاسة بتأنيب الضمير
يعني مسكين انحط بموقف
لا وطلع جدامها شيفه وماكو اخلاق واعليه
:pP~
.
.
.
.
.
اخوي ينطرني...ها بشري
انا بس قلته ،انهار من الضحك
:Pp~
الحين الولد معصب علي
انا شكو؟
انا قلت له تعال تغدا ،قلت له مر شوف وبس
ما قلت له جابلنا هالمجابل
انا ادري البنت كانت دااخله قلبه ...بس شكلها طلعت من الباب الخلفي حق قلبه ورقعت الباب
hehehehe
بعدين ما محبة الا من بعد عداوه،هذا ان دل انما يدل على اخلاقها
البنت جميلة،عيونها حيل وساع وفاتحة،فإذا عصبت وخزت تحس ان عيونها جاحظة
واهي ماقصرت طلعت عيونها لي عنده
hehehehe
ماذا لو.....كنت انت مكان هالولد؟
وكنتتي انتي مكان هالبنت؟
يا ربي....كثر ما اهو معصب انا ميته من الضحك
:pP~
بروح اييييب لي جاي وحليب وارد بخاطري اسولف ويا الكل
تهقون اقولها؟
ولا اسكت
:Pp~

هناك 66 تعليقًا:

mtfa2el يقول...

ماذا لو.....كنت انت مكان هالولد؟

جان اقولها و الله قاعد أطالع نظرة شرعية بس طلعتي مو كفو
عفيه يراعة و ملاسن

بعدين اهو الله يهداه دامه كان يخز و ماخذ راحته شكو مرتز و طالع وياكم
اقضب أرضك شوي
يالله ما عليه تصير بأحسن العوايل

esTeKaNa يقول...

متفائل
~~~~~~~~~
تخيل لو انا بنت خالتك
وتقول حق رفيجتي جذي
جان يتني سكته قلبيه
:Pp~
المشكله اول مرة اهي ا تعصب جذي
هاو صديقتي اعرفها من عمر
مادري ليش عصبت فجأة
:))))
وصح...اهو ما ضبط توقيت القومة
يعني اشماله ياي تركض انطر شوي
طبعا انا الحين لو اقول جذي
بيسوي فيني وأد البنات
بروحه محتر
:p~

THE BOSS يقول...

كسر خاطري

اهو المفروض ما يطول

وما شاء الله عليج انتي حاضرة بالخير و طايحتله ضحك عليهم
طلعتي حرت الدوام

وعطني ولعه

Shaima'a Alkandari يقول...

صج صج ضجكتيني وقلت السالفه حق اختى توني


امبيه حده موقف فضييييييع وقوي بنفس الوقت


يبه روحي قوليلها الصج جود تغير رايها


ترى الصبي نظرته كانت نظيفه وعليه عليه

واهى كلته بقشوووره بس ماتنلام لانها ماتعرغ السالفه

هنوفي يقول...

ابيييي واي مت من الضحك :))))
عفيا ابي اعرف شقال هون ؟؟
بعدين بالعكس لازم يعجب فيها اكثر لانها عن 10 رياييييييل
LoL:))))
""هنوفي"

ReLaaaX يقول...

شوفي يااستكانه انحطيت بموقف مشابه بس تبين الصج اضطريت اني اقول حق البنيه بنفس اليوم بس الحلو فيها انها اكمخه


قلت لها يعني عقب ماتمت المهمة الصعبة فكنت اقولها مقتطفات عشان تستوعب الفكره عقب فهمتها كل شي



وكاهي اسمالله عليها والله يتمم عليها ياربي كل ماتذكرت تضحك على روحها :))

|:| DUBAI |:| يقول...

Akber LOOOOOOOOOOOOOOOOOOOOOOOL b3d!!

Dam3t mn il'67k,, Sb7an allah amSaat aSoolf wya rbee3ty ef Nafs ilSalfa..baSs Mastwt 5ab9tkm LOL

Wa 3lay 3la ur Cousin, a7Ss mool gf6 ..Mskeen : ( !!

Allah yhnee S3eed eb S3eeda..Shra ma agool DoOM..

o Kel 3am o enty eb5ir...

o 7amdla 3la Salama !!

o 3gbaaalCh ya rab !!

esTeKaNa يقول...

THe Boss
~~~~~~~~~~~~
أنا اسم الله علي دايم حاضره بالخير
الله لا يحرم الأمة العربيه والاسلامية مني
:Pp~
تصدق انا بعد اقول ليش طول
المفروض يشوف شوي ويقوم
اهو الاخ طالب غدا وسلطات
:)

esTeKaNa يقول...

Shaima
~~~~~~~~~
حيالله شيما وأخيتها
اصب لج استكانة جاي؟
:)
اشلون اقولها اخاف تزعل علي تقولي ليش ما قلتي لي من البداية
انا ما قلت لها عشان ما احرجها
عجبته اقولها تالي
ما عجبته ما تنحرج
يعني يكون طالعه فيها
طلعت خطابة فااااشله
:)))

esTeKaNa يقول...

هنوفي
~~~~~~
هلا بالهنوفي
:*
اهو معصب علي
!!
يقول ليش تحطيني بهالموقف؟
انزين انا شكو انا قلت لك اطلب سلطة ومازرولا ستكس وستيك
قلت لك بيبسي وجابلنا
تلفزيون احنا
loooool
اهو متعسسسسسسر
استحيت اسئله شنو قرر
خليه يروح الشاليه جود يطخ
اهم شي اخواني الشماته ما يتحرشون فيه
:)))

esTeKaNa يقول...

Dubai
~~~~~~~
ياهلا وأمية هلا
وانتي بخير وصحة وسلامة
وكل العمر وانتي بخير وسعادة
:)
واي يا حلاتج انتي وربيعتج
بعد مسولفين بهالسالفه
!!
اهم شصار عليهم؟
انا شكلها خطبتنا بتتفركش
انا افشل خطابه بالعالم
:Pp~

bin3li يقول...

ههههههه
لا كملي كملي
لو داز صورته حقها وايد أحسن

لو كنت مكانه؟
اممممم
يعتمد على المزاج
كل الاحتمالات واردة
يا أكون عاقل و ذرب و ألم الموضوع
يا أكون في حالة سطلان بعد الغدا و أقعد أضحك
يا أحط حرة الدوام فيها

bin3li يقول...

ههههههه
لا كملي كملي
لو داز صورته حقها وايد أحسن

لو كنت مكانه؟
اممممم
يعتمد على المزاج
كل الاحتمالات واردة
يا أكون عاقل و ذرب و ألم الموضوع
يا أكون في حالة سطلان بعد الغدا و أقعد أضحك
يا أحط حرة الدوام فيها

Tekana يقول...

امبيه حدها حدها سالفة عجيبه

اهم شي انج تقولين لها جربنا الثقل والتكانه 24 سنة وداشين على 25 وما شفنا شي HEHEHEHEHEHE

بس بالعكس المفروض يجلب فيها اكثر الحين لانها طلعت ثقيله

الله يسهل امورهم ان شاء الله وعئبال ما تنحطين بنفس الموقف بس عاد ديري بالج مو تسوين مثلها LOOOL

Najmah يقول...

لوووووووووووووووووووووووووووووووووووووووووووووووووووووووووووووووول

استكاااااااانة

صارلي ربع ساعة اضحك
صج موقف ابداااااااعي

كسر خاطري حده مشتط
بس ميخالف اكشن من اكشنات الحياة
:))

الله يكتب لهم اللي فيه الخير يارب

darkness يقول...

امبيه كسرت خاطري

لو تقولين لها يمكن تبجي لانها غلطت فيه و اهو كان جاد مو راعي خرابيط

ما ادري

بس اتوقع لازم تقولين لها

انتي تضحكين و انا كاسره خاطري اهي

و اهو ترى غلطان

قالو نظره مو مخوزر؟؟

violinist_q8 يقول...

7 الصبح
لو مو اسمع صوت الاوراق والاقلام
لو اشوف حبال تطير ماراح اخاف
منو يخاف الصبح ب2008
:P

Fahad Al Askr يقول...

قتلتني سالفة تبي بسكوت

LonDonY يقول...

دمعت عيني والله.. موووقف
عشرة على عشررة

اهي شسلطها عليه بذاك اليوم
يعني هالمسكين تسسبه ونسى عمرره
شيسوى بعد ..

ردا على سؤالج

.. عقب هالبهدلة؟
اتلثم واروح اتقدم
:p

الاهم ان اذا في نصيب يتقدم

اولا: لازم احد يمهد لها انه
نفس الشخص اللي انزف .. لان عادي
تنصدددم ان شافته وبتكون لها ردة
فعل .. في غرفة استقبالهم

وثانيا: محد اييب طاري للولد
برايها.. اجلح املح

بسس

ويابخت من وفق راسين بالحلال

Kaadi يقول...

حرااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااممممممممممم


مو هو اللي كسر خاطري

اهيه لان خربت على نفسها لووول

لا ليش يهون عاد ؟؟
ماعنده سالفة بالعكس بينت انها ما تحب اللي يتحرش

مافيها شي !

ياكره هالمواقف ! انا اتمرضني :(

Kuwait يقول...

لووووووووووووووول
انا اكره شي عندي ان فلان بيشوف فلانه وتعالي انتي طلعي معاها عشان يشوفها ..
على طووووول الرد عندي مزهب وع ماحب آكل واكو ناس يخزونا ;p

انتوا موقفكم لا تحسدون عليه لا انتي ولا ولد خالتج :\
عاد شصارررررررررر بعدين ؟

انونيمس بالعربي يقول...

وانا اقرا شاقة الحلج من الاذن لين الاذن

امبييييييييييههههههههههههههههههههه من صجها؟؟؟؟؟؟؟؟؟؟؟؟؟؟؟؟
مسكيييييييييييييييييييييييييييييييييينة ههههههههههههههههههههههههههههههههههه!!!!!!ـ


استكانة واللي يعافيج لايدري لاااااااااااايدرررررررري انها سبته هههههههههههههه
وبعدين اشحقه يعصب؟ ياحافظ دامها تنرفزت هذا دليل حكارة وسنع يتكتكت منها هههههههههه
ماني قادرة اسكت وايييييييييييييي

`~MnO YeNSa! ~` يقول...

واااااااااااي
استكانه
مت
من الضحك

لا لا لا
عساني ما اجرب الموقف
و لا اصير
part
منه
:P
زين سويتي قلبتيها
ضحك
:Pp

اهوا شصار عليه
:Pp

كبرياء وردة يقول...

ههههههههههههههههههههههههه، اخ بطني
استكانة انتي نادرة الوجود
انا برايي انها ما غلطت، لأن اهي ما تدري شسالفة
اهي بس صدته ودافعت عن نفسها
وهذي ميزة
ورايي انج تخبرينها عشان لا ينطر الولد وايد
والله يوفقهم ويتمم اللي فيه الخير
بس ديري بالج تلعبين دور الخطابة،
ترى ما تصلحين:P

Sn3a يقول...

انا مت من الضحك

بس تصدقين يمكن ان ماتم الموضوع يكون خيره من الله
خصوصا ان اهيا طبعها ماتزف الناس وترد على تحرش الشباب
بس سبحان الله هالمره ردت

بس كسر خااااطري ولد خالتج فقير

Sn3a يقول...

وبقولج شي
فشله بس خل اقولج

انا حتى لو الشاب كان عادي وويهه مقبول
من اشوفه يتحرش فيني او بغيري اقول شفيه الاجلح الاملح اللي ماحلاه ربي


يعني يمكن اهيا مثلي تشوفه اجلح من حركته مو من ويهه مسكين

صبا يقول...

واااي يا لون الغروب

استكانه

اول البوست خفت وتصروعت عاد انا خواااافه حدي
:((
والجزء الثاني من البوست ضحكني

ههههههههههاي

صج ضحكت

امبي مو صج
الله يهديه من قال يقوم من مكانه


يا زينج يا استكانه
انزين جان لمحتيلها عنه شوي
جان قلتيلها قبل لا يقومون انه هذا يصير لج
وجنه ما يدري يسلم عليج
:))

مسكييين


اتصدقين عاد انه صارلي موقف نفس موقفها وانا ما ادري
عاد اتهقين وييييييييين

؟؟

تخيلي رفيجتي ,خالها يبي يتزوج ومرشحتني حقه وانا ما ادري ,قالها بشوفها من غير ما تدري ,راحت وقالت له روح شوفها بالممشى !!! اهي كله تمشي هناك
وتخيلي شكلي بالممشي وبالصيف ويييع ولا والي يبط الجبد شافني آخر شي يعني

بخيستي قطيعه ,ويييييع

ولامه شعري والعرق يتصبصب من ويهي
بغيت اذبحها

امبي موقف باااايخ

مو خوش خطابه انتي ورفيجتي
انزين قولو تحجو علشان الوحده تتسنع تكشخ
;)

بعد قلبي عسل والله عسل
:***

nikon 8 يقول...

البنت أصلا كانت معصبة من مديرها والخز زاد توترها ولحقة الولد للبنت فجر كل غضبها وطلعها من طورها ... كان المفروض أول ما شفتيها متضايقة من المدير تغيرين دفة الحديث لموضوع آخر ومثلج ما ينقصه حسن التصرف ... على الأقل حتى ما تطلع التعابير الغاضبةعلى وجهها في النظرة الشرعية..مو حلوة للذكرى ...عاد تصدقين على طاري الخز مريت بحادث شبيه وبعد مارتبت للولد شوفة البنت بدون علمها...وقتها كانت تلبس خذاء مشربك قال ما أبيها والسبب مثل ما قالمع إني أعرفها من زمان ولا لاحظت إن أصابع ريولها طالعين من الجوتي كثر ما هم طوال وحاكين القاع

ابو لطيف يقول...

احسن المواقف لما تكون طبيعية

هو ما غلط لما طلع وياكم

الظاهر كان يبي يتأكد من طولها :)

لا تعتقدين ان في الموضوع شي من الصدفه

عمرها ما ارفعت صوتها الا بذاك اليوم

لامر سيقضيه الله سبحانه وتعالى

وستكشف لك الايام الحكمة في ذلك

سواء تم الموضوع ام لا

اسأل الله سبحانه وتعالى ان يقضي بما هو خير لهما ولك

......

الضحك مو الحين

الضححك ... اذا قدر الله لهم الارتباط وفتن عليج وقال لها انج مدبرة الامر

:)

جزاك الله خير

حفظك الله ورعاك

Fskra يقول...

loooooooooool walah b6etay b6ni mn el th7k ;p

ya 7lwch o ya zen sewalifch ;p

walah ana lo mkanhaa askt ;p ma azf el awadm bs le2nhom 5zoni !
b3d 7lwa ma ynLamoon ;p

O la tgolin laha sktay a7sn a7s ra7 t39b 3lich 7eta lo tgolich 3ade mn da5l wedha tkf5ch :P

kazmawy يقول...

لوووووووووووووول
استكانة موتينى من الضحك
ههههههههههه
الصراحة زين تسوى فيه
كل هذا نظرة شرعية
قالوا نظرة شرعية بس مو فلم هندى ثلاث ساعات يخز على ابو نظرة شرعية
لوووووووووووووووول
لا والحبيب رايح صوبببهاا
كااااااااااااك
الله يهيديه ما تترقع سالفته اشوه ماقط بوكه ولا تعرجب جدامها بعد
لوووووووووووووووووووووول

المهم تزوجوا بعدين والا شصار بينهم :)

طائر بلا وطن يقول...

هاهاهاها

يعني هذا لو كان يبيها تكرهه ما كان ضبطت
معاه جذي
:)

بس أحسن .. عشان تصير أكشن كوميديا
له و لها و لفريق العمل

و بكل الأحوال بتذكرون الموقف و تضحكون

الله يتمم على اللي فيه الخير



بس تدرين .. مسألة انك تدخل طرف في زواج
أحدهم بحد ذاتها تخوف مع العلم ان أي مشروع
قابل لعدم الإستمرار بوجودك أو عدمه

لكن الناس ما تفهم كل هذا و ساعة ما تصير
المصيبة لا قدر الله بتتذكرك على طول كونك
سبب في قيام المشروع

أنا ضد التلميع ، و المديح الزايد و اللي
مو بمكانه .. و لازم توضحين لهم من البداية

انك مالك شغل

الواحد ما قام يضمن عمره عشان هالمرة يقدم
ضمانات للناس و على الناس
:)


أنا دايما أشجع الفكرةو من حيث المبدأ
يمكن مرة أو مرتين و لظروف خاصة اضطريت
اتدخل .. و التوفيق من ربك

بس ما أنكر أن غيري تدخل .. و لغاية اليوم
يلوم نفسه .. خاصة لما يُلقى باللوم
عليه و كأنه هو السبب .. مع انه و في الحقيقة
هو ما سوى إلا أن يسر العملية


الأجر عند ربك .. و التوفيق منه
:)

.
.
.

على طاري الجني و الطابعة

من كم شهر جذي .. كنت أبقى بالدوام ليما
الغروب و أحيانا لي بعد العشا أخلص شغل

صخة و لا أكو أحد

مرة من المرات و كانت حزة مغرب

اسمع ذاك اللي يترنم

و أنا الحين ما أقول من وين .. أبي أعرف
اشقاعد يقول .. كلام مو مفهوم

كأنه غناء ايحائي

عقب لا والله .. شنو اللي قاعد يصير

و أطلع حافي أدوّر على المصدر

ولا شنو؟

زميلي الدكتور الصيني قاعد بمكتبه

و يغني ههههه

و لا .. كان لابس شورت

مدري من وين طلعه


يسعد مساك يا استكانة

|:| DUBAI |:| يقول...

LOOOL

ya mar7baabCh..

Ely 3dna EtwfgOo,, o 3rSehm Shaher Jan..!!

Kant ilBnet et5ylay fel Ma7el etgaaySs en3l o Jwaaty

o Ho yalSs yb7lg...

o Hee mSkeena mendmja fel n3l..o Etnaagz o Et2fef kekekek

o 9ar ilne9eeb : ) !!

ZooZ ZaibG يقول...

ويلوموني يوم اني احبج وربي عسسسسسسل
ههههههههههههههههههه

بعد ولد خالتج عيار
يعني ما تشوفها وتمشي
تقعد تتمقل غدا كامل

وبعدين هالبنت عادي اتوقعلهم مستقبل حلو لوووول

لان نفس السالفة صارت لاخوي لما قالوله روح شوف اللي صارت مرته الحين راح شافها بدوامها بالمستشفى ولما قال خل اتجرأ واسأل سؤال ما قدر يقرب لأنها كانت معصبه قاعده تزف واحد تحرش فيها لووووووووووووول

وكاهو عندهم اثنين ماشاالله
عادي تحصل

نصيبج لج لو شنو يصير
متى نفرح فيج
:**

terkwaz يقول...

لووووووول

موقف لا يحسدون عليه


ولهت اكون منيه :*

الخيلاء يقول...

لووووووول
مت من الضحك على تبي بسكوت
و كملت علي سالفه رفيجتج
:)

الله يكتب لهم الي فيه الخير

ولد خالتج يعيش و ياكل غيرها
عشان اذا بغى يشوف نظره شرعيه مره ثانيه ما يطول و يخوزر من قلب
يخلي المخوزر حق البيت لي راح لهم


و رفيجتج الله يهداها تسلطت هالمره
بس شكله ولد خالتج مزود العيار الي البنت انفجرت فيه

و ترى فاااااااااقدتج واايد
و عني سوالف وايد

:)

esTeKaNa يقول...

بن علي
~~~~~~~~~
الصور هاليومين ما تنقل حقيقة
!!
الله يعافي الاستديو اللي يغير حتى الملامح
وبعدين في ناس مو حلوة بالتصوير
مثلي
:))
يا سلام
تخيل تقعد تضحك
ههههههههه
الله لا يحطك بهالموقف
:Pp~

esTeKaNa يقول...

Tekana
~~~~~~~~~
LOOOOOOL:)
لا تخافين علي انا صرت خبره بهالمجال
hehehehe

وعسى ربي يفرحنا فيكم جميعا ان شاء الله

esTeKaNa يقول...

Najmah
~~~~~~~~~
انا ويك اند كامل وانا اضحك
لوووووول
بعد قلبي قلبه
عسى ربي يسخر له ويوفقه
ويهدي صديقتي اللي فجأة صارت أم لسان
:)

esTeKaNa يقول...

darkness
~~~~~~~~~~
واي حسيت اني شريرة
!!
للأمانة اهي ما صارخت
بس هوّست على الحجي وزمت الحلج معصبه
:pP~
انا بشوف شنو بيصير
وتالي اقرر اقول ولا ما اقول اخاف تنحرج ومابي اضايقها
:)

esTeKaNa يقول...

vilonist-q8
~~~~~~~~~~~~~
أنا
:D~
أنا خوفي ما يهمه التوقيت ولا الظروف
:Pp~

esTeKaNa يقول...

Fahad al-asker
~~~~~~~~~~~~~~~~~
sn3a sn3a:pP~








LonDoNy
~~~~~~~~~
عسى عينك يا لندني ما تدمع الا من فرح قول آمين
:)
تتلثم؟
looooooool
وايد عجبتني ردة فعلك
كلمة اتلثم ضحكتني
وزين زين انك راح تتقدم هذي بشاره خير لان ولدنا متعسر راح الشاليه وما رد علينا يقول بيستخير
وبهالسوالف انا مااقنع احد
نصيب نصيب
:)
شكرا على التعليق والمرور
حياك الله اخوي

esTeKaNa يقول...

kadi
~~~~~
اقولج لما قالت وبعدين وياك
حسيت ودي ادخلها بكبرها بجنطتي ابيهها تسكت
لووووول
الله يكتب اللي فيه الخير يارب
:)

esTeKaNa يقول...

kuwait
~~~~~~~~~~~
لا خلاااااص
توبه من دي النوبه
:D~
ولد خالتي راح الشاليه متعسر
ويقول بيستخير
قلنا له على راحتك
بعد مابي نزيد عليه عقب الزفه
لوول

esTeKaNa يقول...

أنومنيس عربي
~~~~~~~~~~~~~~~~~
hahahahhahahahha
واي رديت اضحك مع ضحكتج
يا عساج دوم منشرح بالج وتضحكين
!!
لا ماني قايله له شي
اقوله قالت اجلج وماكو اخلاق
ينتحر
لوووووول
عاد بعد قلبي اهو اجلح صح بس الغمازه والملح شي غير نمونه
بس ما شافت شي اهي من عسارتها ام راس فشلتني
هههههههههههههههه
والله اهي خوش بنت وسنعه
بس كلنا مرات السنع يخونا ببعض المواقف
:pp~

esTeKaNa يقول...

Mno Yensa
~~~~~~~~~~~
واي يا زينها هاللي تتتكركر وتضحك
:)
اذا ما قلبتها ضحك
راح تصير مأساه
هذي سالفه من سوالف هالدنيا
نضحك اليوم وباجر تصير ذكرى
ياااااربي متى افرح فيييج
:**

esTeKaNa يقول...

كبرياء وردة
~~~~~~~~~~~~
ربج ارحم بعباده وخلاني نادره على قولتج،لأن لو في من استكانة وايد جان انعفست الديرة
:))
انا مابي اقولها شي لما اهو يقرر
اذا اوكي بقولها
اذا لا...ليش اضيق خلقها
صح؟
بعدين انا اعترفت:
أنا أفشل خطابة بالكويت
:(

esTeKaNa يقول...

sn3a
~~~~~~~
هلا بالسنع كله
:*
فاقدتج من غير شر
:)
اي والله كل شي خيرة
امس جذي كنت قاعده افكر
اقول شلي خلاها فجأة ترد عليه؟
هذا شي من رب العالمين
نصيب
:)

esTeKaNa يقول...

sn3a 2
~~~~~~~~~~
يعني تهقين مو قصدها؟
انا يوم قالت من حلاته
يتني هستريا من الضحك
اهو صج فيه سمار بس لسمار الحلو
كافي ذيج الغمازه اللي تزوق القلب
مادري اهي تزوق القلب مادري انا اتحلى على ولد خالتي
:)))
بس شكرا للاضافه
بردتي قلبي شوي
:Pp~

esTeKaNa يقول...

صبا
~~~~~~
ياهلا ويا مرحبا بالصبا والجمال كله
:*
انتي خوافه؟
انا صايره خربوطية
ذاك اليوم افكر شنو الشي اللي ما اخاف منه؟
اكتشفت اني اخاف من كل شي
:(
ونرجع على سالفه رفيجتج
لوووووووووووووووول
صج صج لقيت واحده تنافسني بالفشل
اكو واحده تذكر بنت ويشوفونها بالممشى؟
صج مو خوش مكان
مرة ثانيه اذا بغيتي تروحين الممشى لبسي كعب وسوي تسريحة
سبحان الله
الواحد ما يدري وين نصيبه
:pP~
صج هالسوالف تضحك

esTeKaNa يقول...

nikon 8
~~~~~~~~~~~
والله عدل كلامج
انتي تخيلي ان اهو ولد خالتي
والبنت رفيجتي
وانا ميته من الحيا والويه حمر
انا شكو؟
حزتها كثر التوتر والارتباك خلاني ما افكر شنو اسوي واتصرف
:))
صج سالفه رفيجتج غريبه
صج الريايل كل شي يشوفون
اشلون طال باصابع ريلها مادري
:Pp~

esTeKaNa يقول...

أبو لطيف
~~~~~~~~~~~
حيالله بو لطيف والله
سبحان الله كل شي له حكمة
كنت افكر بهذا الكلام البارحة
شلي خلاه يقوم بهالوقت؟
ليش ما سلم علي؟
وليش اهي فجأة تكلمت؟
كل شي له سبب رب العالمين ابصر
:)
اما اذا فتنو علي
فانا اسحب كل سفاراتي واقطع علاقاتي
ما اغشمر
:pP~
حياك الله يا ابو لطيف
تنورنا دايم

esTeKaNa يقول...

faskara
~~~~~~~~~
حيالله الفسكرة والله
اشلونج يا الغاليه؟
اشلون الاهل والوالده؟
عساج دوم تضحكين ومستانسه
:)
اهي يا بعد روحي مو عادتها
مادري من صجي اشفيها ذاك اليوم
اذا اهو قرر بقولها بعدين
بس الحين
مستحيل اتكلم
اخاف يحوشني شي
لوول

esTeKaNa يقول...

kazmawy
~~~~~~~~~~~
اي والله
نظرة نظرة
مو غدا وستيك وسلطات
انا بكبري تدودهت
لوووووول
اقولك كان مستعسر عقب السالفه
راح الشاليه
ويقول بيستخير
الله يسهل عليهم
:)))

Enter-Q8 يقول...

عاااااااو
اللحين انتي بدارك و صاكه الليت
و فاتحة مدونتي
شوفي شنو اكو بالزاوية
راح تلاقين حاكي عقالي واقف و معطيك ظهره نفس الصورة
يلتفت عليك
ماكو معالم بوجهه
بس شماغ فاضي
يقط على لاب توبك مسباح و يطلع بره الدار
تتعوذين من الشيطان بعد ذيك الصرخة
و يطلع ماكوا شي
وراها تبين تصكين الاب توب
وترجعينه على المكتب
و الا شك بوووم
مسباح حاكي عقالي




لا تقرين هالكومنت الا الساعة عشر الصبح

esTeKaNa يقول...

طائر بلا وطن
~~~~~~~~~~~~~
@@
من وين طالعه شمس هذا النهار؟
معقوله طاااائر؟
عليك غياب وانذار
شخبارك؟
يارب تكون بخير انت وكل من تحب
:)

وانا اوافقك الراي
التوفيق من عند رب العالمين
والموضوع بوجودنا وعدمه يتم او لا يتم ولكن البعض مشكلته لا يفهم هذه الجزئيه
الله يوفق الجميع
:)



اما سالفه الصيني
لو كنت مكانك
يمكن قبل لا اشوفه يصير فيني سكته قلبيه من الخوف
:))
يسعد لي صباحك وممساك اخي الغالي

esTeKaNa يقول...

Dubai
~~~~~~~
سبحانك ربي
لا قالو النصيب
شوفي بس النظرة الاولى وين شايفها
ربج كاتبها من نصيبه
عسى ربي يوفقهم يارب
اقول دبي
كثري من محلات النعل يسلمج
:Pp~

esTeKaNa يقول...

zooz
~~~~~~~
منو يلومج في حبي؟
لا لا يا زوووز مو قبول
انا اللي غنا لي أصيل:
ما ينلام من حبك
ما يصير احد يلومج فيني
:pP

عاد تصدقين اهو مو عيار
!!
من اهل الله مو راعي سوالف
بس مادري اشفيه ذاك اليوم
اكو احد ياي يشوف بنت يطلب غدا؟
واي عليهم بالعافيه عيزت وانا اتحطلن على الغدا جني انا اللي طابخته
لووووووول
ما شاءالله
ما شاء الله
الله يوفق اخوج ومرته ويتمم عليهم
ويفرحنا فيج
يعني الظاهر السر انج تزفين احد
هذي نصيحة من زوز اي موقف فيه نظرة شرعيه تلفتي اقرب واحد يمج زفيه
لوووووول
:))
يابعد قلبي
عسى ربي يسعدج ويفرحنا فيج دوم
:*

esTeKaNa يقول...

Terkwaz
~~~~~~~~~~~
وانا ولهت عليج
:*








الخيلاء
~~~~~~~~~
حبيييييبة قلب استكانة
هلا وغلا
يا عساج دوم تضحكين وفرحانه
طمنيني...عساج مرتاحة وكل امورج بخير؟
يارب اشوفج بأقرب وقت لاني صج ولهانه عليج كثر ماكو بعد
:)

esTeKaNa يقول...

enter-q8
~~~~~~~~~~~
تدري جم الساعه ؟
تدري باجر دوام؟
تدري انك مرات تصير شرير؟
ليش صرت شرير ؟
مادري ليش صرت شرير حسافتي عليك
:(((
والسؤال الاهم:
اشلون انام الحين؟
بعد مدونتك انا ماني داشتها موليه
:(

Sweet Revenge يقول...

ياحلوج يا استكانه وياحلو سوالفج
اما سالفة رفيجتج يحليلها ,الصراحة اعجبتني اي والله اقعد ويجابلني وماتبيني اعلق بس زودته شووووويه الله يهداها
بعد ,اي حقريه اش بيصير يعني

ما ادري احس الله راح يجمع بينهم
بس عفية لاتقولين له عن المدح الي امدحته اياه:P
لايتعقد وعليه ويهون عن العرس موليه
ذيك الساعة ذنبه برقبتج

ARTFUL يقول...

تبي بسكوووت

لوووووووووووووول

اقوول اكليني

;D

------

مرتي ولله الحمد الوحيده اللي ما شفتها بره

طقيت الباب ودخلت وشفتها واهي في بيتهم

بس لي يومج واهي تضحك علي ليش مادري

;p

قوليلها .. اهي صج بتزفج زففف
ويمكن ما تطلع معاج مره ثانيه

بس قوليلها علشان تضحكين عليها

;D

وعؤبال ما يصير فيج نفس الموقف واتزوجين ونفتك منج
;p

بس حلوه 24 سنه نجرب السنع

;D

حسافتج يا كويت يقول...

انا لو من الولد

اجدم واللة لان مو شرط يكون هذا طبعها

وايد ساعات الواحد مايكون يمثل طبعة في بعض الاحيان

وينظلم

بس السالفة تضحك

Kuw_Son يقول...

1

خوافة

2


توني قاري موضوع النصيب عند كاريزما و قالت في آخر الموضوع ان الأسبوع اللي طاف ثجيل طينة !!! شسالفة !!

قصة البسكوت و المسئول فيلم !!
ما أظن ان الاسبوع صار خداي مني و الطريج
:P

3

لو أنا مكانه أطق اللطمة و أقب !!

|:| DUBAI |:| يقول...

Hzrch Ba79el 3ReeS il '3Fla ehNaaK?! LOOL

Low rbee3tch Kant ehnaK 3aDee Fal3a ur Cousin !! LOOL

Nescafé يقول...

ان شالله يرد الوالد بالسلامه
واتمنى يكون تعدل موودج

وانا اقول حطيلج
nespresso machine
عندج بالمكتب اريح واحلى ;P