الأحد، ديسمبر 21، 2008

شلي تغير؟

تذكرين؟
ذاك الباب الذي يقفل
وتلك الأحذيه المسروقة
ترتدين فلة سريرك..ليكون فستان فرحك
وأبحث عن اي شئ اكمل به جنونك
انتي عروس
انا كل المعازيم
انا دكتورة
وانتي كل المرضى
انتظر اربعاء كل اسبوع،لأكتب لأبي رساله طويلة
أطلب فيها المبيت خارج حدود البيت
اقصى ما اريده ...يومين في صحبتها
اكرر الكلمات...وأقبل امي واترجى
وقمة الفرح ان يرضى
!!
ونسهر كل خميس على ذات المسرحية:
الواوي وبنات الشاوي
نسمعها كما نسمع اسامينا
الى ان نصل لحزن لحظة تقطع فيها شمسه ضفايرها
وتبكي موت والدها وتغني:
أسمع صوته صوت الناي
وأصييييح
كم كنت طفلة مأساويه،اذن الحزن لم يكن هواية كان احتراف
.
.
.
تذكرين؟
أحنا بنات الشاوي أحنا
باجر نكبر...والدنيا تحلو
نغني فرحين
كاشخين بالشاوي
وأختك تصرخ....الشاوي مو تاجر تكشخون فيه سكتو
نسكت؟
من يقول نسكت ...احنا ما نسكت
.
.
.
.
تذكرين الشريط اللي كنت اتنقصه لج؟
كنت احبه
!!
ديايتي بيضي ذهب
وأصير غنيه بلا تعب
أبي لي بيضه تفرحني
من غير هموم تريحني
بيضج يخليني غنيا
وأعيش حياتي مهتنيا
ليش هدى حسين كانت جميلة؟
وليش كنا نقلد رقصتها بفدوة لج؟
وليش للحين انا ما لقيت ديايتي اللي تبيض ذهب؟
.
.
.
.
تذكرين؟
كتافيات وفرحة عيد
وشعر مفتل،ترا كان يوم عيد
أجرب بعيني احط كحل،وعلي تضحكين
فله الشعر ما تصير الا بالعيد
والمكياج ممنوع....مالج الا قلم من كحل الهنود
وتهمسين بأذني:
استكانة بنروح الشامية
وسكتي لا يدري سعود ويفضحنا
بسكات طلعي
وبالسياره نتلاقى
انا اعرف اطلع بسكات؟
لابد افضحكم...عند امي
عند سعود
وعند كل من تخافون منه وأسئلكم:
شنو بتسون بالجمعيه؟
ليش ما نقول وين بنروح
.......
سعود؟
تذكرين سعود...كان يحبني
يتنقص لي برد الصاروخ
ويسولف لي
وكنتي تضحكين:
تحبين سعود؟
وازعل،كان الحب تهمه انا برية منها
سعود اخوي...وعزيز اخوي....وحمني أخوي
وأنا دايم مرسول الغرام مابين المحبين
بس ما تذكرين؟
ليش كان اول رجل بحياه كل منكم ولد خالة
ولد عمه
ولد احد قريب
هل كان لازم تحبون وكان هذا اهو الموجود
والجود من الماجود
:Pp~
.
.
.
.
بنات الشاوي...فدوة لج...والعصابة
جمعية الشامية
مجلة ماجد
أغاني عبدالكريم
والبحر.....وكويت الحنين
تذكرين؟
ذاك التي شيرت الأسود....وعليه:
free kuwait
كنت أحبه
كنت اقدره
كان اجمل تي شيرت عندي
كان زمن تحرير....وكانت قلوبنا بحب الكويت تطير
تذكرين؟
شارع الخليج
بيتزا العالمية
ومبي النزهه
هارديز الشامية
بيت امي حصه
وزوارة خالتي غنيمة
تذكرين؟
احس كل شي تغير
ما عاد في شي مثل اول
شلي تغير؟
أنا فقدت قلبي اللي تغير
ولا في شي اكبر
.........................................








هناك 47 تعليقًا:

كبرياء وردة يقول...

كل شي تغير
القلوب تغيرت
المشاغل زادت
شوارع كنا نمرها كل يوم، بيوت كنا نلقى نفسنا فيها
واحلى لحظات حياتنا كانت فيها
اختفت
حتى احنا تغيرنا
ماعدنا مثل اول
بعد شنسوي يا استكانة اليوم معانا باجر لا
الله كريم
وعسى ربي يحفظج ويحفظ من بقى من احبابج
بس انتي هونيها

عائشة يقول...

أه ياقلبي يااستكانه

أنا محبوسه فالطيارة لأن المدرج غير صالح للاقلاع بسبب العاصفه الثلجية في بوسطن

فعلا أين بريق عيوننا
وين خدودنا إلي تورد من الفرح

ماعد لأي شئ معنى

`~MnO YeNSa! ~` يقول...

واااااااااااااااااااااي
استكانه

عورني قلبي
:(
نفس الذكريات
بالضبط
اذا مو
بفارق بسـيط



قولي شنواللي ما تغير
كل شي تغير

يحلو البساطة كل شي يونسنا
و تشوفين
الابتسامة ..
و ما تفارقنا

الحين ويين
ماكو براءة
at all
:*
تصبحين على خير

ميرامار يقول...

يا زينها من ذكريات

كل شي ولا ومبي النزهة
كنت زبونة مستديمة


انشالله اتشاركون اكثر في لحظات اجمل

Cr8ivia يقول...

قلبي عورني من هالبوست يا استكانه

vancouver يقول...

حمدلله والشكر وانا شفيني

اول ما فتحت عيوني عالدنيا
اسمع اغاني الكبار
واشوف مسرحيات الكبار

اتصدقين ولا مسرحيه من اللي قلتيهم شفتها
:((

اصلا ما اشوف مسرحيات يهالوووو هههههه
هذي كانت نظريتي وانا صغيره
لووووول

الحين ابي ارجع صغيره شلووون ?

ياحلو الذكريات والوناسه والنومه ببيت الخوال والعمام

واهم
شيء

التعاون عالشر وكسر القيود والممنوعات
لوووووووووووووووول

abu eldestor يقول...

شفيكم على هالحقية
الكـــل يبي يرد لها

مالنا خلق نرجع و ندرس
:)

Najmah يقول...

صباحج ورد
:*

استكانة
قريت البوست البارحة
ماقدرت اكمله
حسيت بالغصة
وتيمعت دموعي
ونمت عليها
اول ماصحيت الفجر
تذكرت بوستج
قريته مرة ثانية
ومادري ليش اول دعوة طلعت
يارب تفرحني فيها
:))
تصدقين
الايام تتغير بسرعة
كل شي يتغير
هذا حال الدنيا
بس الذكريات محفوظة
واللي بالقلب محفوظ
الظروف اهيا اللي تغيرت
بس انا عندي يقين ان مهما تفججت بعض الحبال اللي جمعتنا وقربتنا
اتيي غيرها وتربط بين احساسنا
واللي معدنه طيب ماتغيره الايام
:*
انتي بس طولي لي بااالج
:))
صباحج فرح يشرق على روحك وقلبك
صديقة قلبي
:*

حسام بن ضرار يقول...

قصة ليلى و الذيب

هذي تراث

صار لي فترة اقول بروح اشتري شريط مسرحية ليلى و الذيب لليهال

القصه صارت تبيكال من كثر ما اقولها لليهال

. . . ساخر كويتي يقول...

الناس تغيرت وغيرت معاها كل شئ
ولكن إذا نظرنا الى الجانب الملئ من الكوب

فاننا ايضا نعيش بذكريات حلوة سوف نذكرها بعد كم سنة وسوف نترحم عليها ايضا

فالنحمد الله على كل نعمة امامنا قبل ان تكون ذكرى في ذكرياتنا

فلكل زمن دولة ورجال
وتحياتي

esTeKaNa يقول...

كبرياء وردة
~~~~~~~~~~~~~~~
حتى أحنا تغيرنا
كبرنا
هذي الحقيقة يا صديقتي
كبرنا وتغيرت الامور اللي نحبها
والاشيا اللي تسعدنا
كل عمر له زمانه وذكرياته الحلوة
وصباااحج ورد
:)

الزين يقول...

:)

اكيد بتذكر

احنا نذكر الموقف مو عشان الموقف بحد ذاته


احنا نذكرة لجمال الصحبة اللي فيه


واهي اكيد تستاهل اللي كاتبة لها بوووووووست كامل تذكرينها


وحطيتي لها هالفيديو

لازم تذكر يا استكانه دامج انتي وياها


:**


صباحج حب وذكريات عطرة

esTeKaNa يقول...

عائشة
~~~~~~~~
خلج من بريق عيونها
وخدودنا الموردة
قولي لي شصار عليج؟
:))))
واي يا ربيعتي الجميلة
ما يصير تروحين بوسطن بروحج
قلبي عورني انا اخاف من الطيران بالمطر والعواصف
عسى ربي يحفظج ويوصلج بالسلامة
:**

om comment kuwait يقول...

الحمداه مو بس انا اللي فقدت كل هذا
العيد له معنى
بدلة العيد لها معنى
نلعب بروي بالحوش و هم له معنى
تدرين شنو فقدنه فقدنه طفولتنا اللي مع الكبر تروح
-----------------
امس طول اليوم و انا اب راسي منت رايق يا حلوها هالاغنية احس ما خذت حقها في حزتها اتذكرني ابمراهقتي
و الايام الحلوة و تدرين يا استكانه شنو احلى مقطع عندي
ودي اطفي اب شوفتك نار الحرايق
و مقطع ثاني
التفت لي شوي محتاج الدقايق
انا ما صدقت اشوفك و انتواجه
منت رايق
وااااااي قلبي عورني
---------------------------
و لدي دائما تعليق :)

esTeKaNa يقول...

Mno yensa
~~~~~~~~~~~~
يا صباح الورد
يا صباح الهنا
باقي بعض البراءة
بعيونا
بكلماتنا
بذاك الشي الحلو بقلوبنا
:)
اسم الله على قلبج
:*

esTeKaNa يقول...

ميرامار
~~~~~~~~
اخيه يا ومبي
كان عندهم جيس برجر سحريه
بس تاكلينها تذوب من تروفتها
:)

esTeKaNa يقول...

Cr8ivia
~~~~~~~~~~
يمة اسم الله على قليبج
!!
كله من الواوي وبنات الشاوي
:)

esTeKaNa يقول...

Vancouver
~~~~~~~~~~~~
يا صباح الورد كله
:*
يختج الكبير يطلع من بطن امة كبير
:pP~
على فكرة
هذي طفولتي المبكرة جدا
تالي قمت اسمع ام كلثوم
واقرا احسان عبدالقدوس وربعه
في ياهل بالمتوسط تقرا عبقريات العقاد وخرابيط احسان عبدالقدوس؟

تبين ترجعين صغيره؟
تلاحقي على عمرج اشتري الاشرطة ورقعيهم بولدج خوفج اييج بعدين على كبر مو زين
هههههههههههه
عيل انا حاسه اني ما عشت ينون مراهقه
كله شاطرة
كله ادرس
الحين متحسفه وشكله بيني على كبر
الله يستر
:pp~

esTeKaNa يقول...

abu alestor
~~~~~~~~~~~~~
مو بس تدرسون
انتو تلبسون بنطلون رمادي
جم سنه يقضيها الولد الكويتي لابس بنطلون رمادي
:pp~
هذا كله من وحي بوست
بعض الناث
احبهم ويحبوني
:)

esTeKaNa يقول...

Najmah
~~~~~~~~~
صباح الفرح
صباح الوله
صباح كل شي حلو بالهدنيا
:**
عسى ربي ينثر الفرح بقلبي
وقلبج
وقلب كل من يقرا كلامنا وسوالفنا
تعليقج كان سكر قهوتي
وبداية يومي
شكرا...لقربك يا صديقة قلبي
:**
بشريني اشصار على تسجيلج؟

esTeKaNa يقول...

حسام بن ضرار
~~~~~~~~~~~~~~~
اي عاد كل شي ولا ليلى والذيب
مع ان الوالد يقول اني كنت دايم اقوله ليلى غبيه
تدل الطريج بعدين تروح
يعني ما كانت مشكلتي انها ما سمعت الكلام
عبالي المشكلة انها ما تثبت وتسولف بالطريج
:Pp~

حسام...انا يدتي عندها قصص تراثيه غير ليلى،مر عليك يا سرور يا سرور
مافي البيت من عقبك نور؟
:))

esTeKaNa يقول...

ساخر كويتي
~~~~~~~~~~~~
ياهلا ويا مرحبا ساخر
فقدناك من غير شر
وكلامك عين العقل
حياك الله
:)

ARTFUL يقول...

لا لا انتي ما تغيرتي

هذي ذكريات حلوه

كلن له جيله

يفرح ويستانس فيه

احنا نشوف اخوانا الاصغار او عيالنا بنظرة رأفة

نقول مساكين ما عندهم اللي يونسهم

نفس ما كانوا اهلنا يشوفونا

الناس لهت بشغلات كثيرة

فتلاقيهم بعد ما اتوفى اليده اليد الكل يشوف طريجه

طبعا مهو الكل

بس صار شي مهو مستغرب

طريقة الطلعات اختلفت

انشالله بتزوجين
وايونج عيال وعيشيهم وناستج

خل تصير وناستهم حركية مهو قعده وافلام وسوني وانترنت وبلعة

وراح تشوفين ذكرياتج فيهم

يا زينها من أيام

وعلى طاري المسرحيات انا نفس فانكوفر

أستانس على مسرحيات الكبار

بذاكرتي درب الزلق

باي باي لندن

الا هذي ديايه بيضي ذهب شفت منها شوي

ايي عندي عجاج

وأنا اللي آكل الذهب أكااااال

ولا تنسين ومبي الخالدية

بس تبين الصج

انا مفتقد ضحك القهقه اللي تضحك لما تدمع عيونك وبطنك يلوييك

هذا من زمان عنه

الحمدالله مستانس بس هذا يدخل بكل السرور والانشراح

=)

SHAHAD يقول...

اشياء وايد تغيرت
سبحان الله .. بين ليلة وضحاها ممكن يتغير ألف شي وشي .. فمابالج سنين !

تبقى الذكرى جميلة
وتبعث في النفس الفرح والابتسامة : )

Najmah يقول...

:**
الحمدلله صار:)
آخر ربع ساعة من وقتي فتح
وسجلت
انا آآآآآسفه
كله داشة عرض
:\

Sweet Revenge يقول...

والله ما ادري يا استكانه
:( سؤال اساله لنفسي وما احصل اجابه
الله كريم

Kuw_Son يقول...

كل شي تغير ..

المعالم تغيرت ..

و النفوس .. الغالب تغيروا ..

والحياة بسيطة أول ..

أهم شي ما كان في موبايل .. والكل عايش ..

و الخبر ينسمع من مرسول ياي بالسيارة أو تلفون أرضي ..

كل اللي قلتيه ينطبق على الكثير منا و اللي عاش فترة لاباس فيها قبل الغزو ..

الله ياهي أيام يا استكانة ..

تذكرت الأيام الخوالي في بيت يدي الله يرحمه ..

Ra-1 يقول...

ليش كلنا نفس الذكريات؟
:)
الوضع تغير الحين وأتوقع إحنا آخر جيل كانت طفولتهم متشابهة

AK-47 يقول...

والله عفستيني بهالبوست
الكويت ما تغيرت الناس نسوها بس
يبيلي اسبوعين بالبر عقب هالبوست :)

صبا يقول...

كل شي تغير
يا استكانه

ذكريات جدا جميله ولها طعم حلو
وعلشان جذيه راسخ وما يمحي

الايام الحلوه ما تنسي

آآآآخ لو يردني الزمن سنوات قليله
راح اعيش البساطه ..والعب في منحى الطفوله ..

ونااااسه وناااسه يا لون الغروب
كنت احب انام بره البيت
بالرغم من رفض امي وموافقة ابوي
ومتعتي السهر مع اصدقاء الطفوله

الله شكلي بالويك اند برد انام بره البيت شوقتيني

يا زينج يا استكانه
بوست حلو مثلج
:****

TerKwaz يقول...

تذكرين
ذكرتها البارحه
ومانزلت بوست اجلاء لها..


ايييه استكانه
مادري جم مره قريت بوستج


هههههههه
تصدقين احس العابنا تتشارك مهما اختلفت الاجيال

يوم الخميس بنت خالتي قالت لي بلعبج لعبه !؟

وطلعت هاللعبه كنا نلعبها يوم صغار

يييه شلون تورثت لهم هههههههه


بس انا ماحس اني عشت طفوله ومراهقه ههههههههه وهالشي ماثر علي
قاعده اعيش طفوله متاخره :p

حبيت بوستج حيل

RoOra يقول...

كش شعر يمبي !

ليلي و الذيب
الخليجيه و المثنى
مطعم وندي "ام عجفتين"
و قوارينا بالفريج

:)))
ذكريات لن تعود !

أحمد الحيدر يقول...

يا عيني ..

صحيح البوست بعضنا يشوف فيه شخصانية ..
لكن فعلا حسينا ان ينطبق بجزء كبير علينا كلنا .. بصورة أو بأخرى ..

ويبقى السؤال الأهم : شللي تغير ؟

nikon 8 يقول...

أهم شي طلعتي بذكريات حلوة وثابته محد يغيرها
:)

Enter-Q8 يقول...

و انتي الصاجة
شنو اللي ما تغيير

mtfa2el يقول...

انا كله قبل ودي أصير نينجا منكابامارو
الحين أقدر أصير نينجا ولا راحت علي ؟؟

bin3li يقول...

شكلي الوحيد إللي ضحك من أول البوست لين آخره
خصوصاً طفلة مأساوية الحزن ما كان هواية كان احتراف
ههههههه

بوست فنان بنكهة الفيمتو
;)

ZooZ ZaibG يقول...

اخييييييه
هدى حسين غير
كبرت ويانا
وتوارثناها
بنت اختي
لا تشوفينها تغني
منهو يحازيني

:**

lawyer يقول...

وييييييييين هانجري باااااااني كيفااااااان


اهم شي هذاااااااااااا

وااااااااي

بووووووووستج وايد وايد ناقص لانج ما كتبتيه




اهم شي لازم تكتبين ان هنااااك شلليه في هانجري باني كيفان

يتكونوووووون من عيال كيفان بلوووك 1

شيكاغو

و عيال بلوووك 5
ميامي


و احناااااا البيفرلي هيلز عياااااال شويخ
الي كله منطقين وعليا عليناااااا

;Ppp

7osen يقول...

انا اعتقد مافي شي تغير


بس هذا حنين الذكريات


ذكرتيني
بالتي شيرت
مال فري كويت

الله


كان حلو

:)

بوست جميل

بس يقول...

كل شي تغير ؟

الناس تغيرت و هذا الاهم وخذتهم الدنيا بمشاغلها :(

بوست حزين يخليج تسالين نفسج طول اليوم شلي تغير ؟


الله يرحمنا برحمته

مـــــي يقول...

الله على ذكريات الزمن الجميل كنا انا واخواتي وبنات العيلة نروح ونرجع مع بعض من المدرسة وخطط يوم الاربعاء حدث ولا حرج ومسرحيات هدى حسين في الصدارة انا اتذكر اغنية

اقعدعلى الشط اقعد تمشط
جاها الواوي قالها قومي
قالت مالي مالي هذا مكاني
والباقي نسيت

++استكانه البلوج حقك لازم ادخله كل يوم كانه واجب++

Safeed يقول...

الإنسان هذا هو لم يتغير ..
و الزمن كما هو .. تحدثت وسائله و لكن ظل جوهره لم يتغير
ما تغير هو نظرة الانسان لحقيقة الحياة
و توسع درجة استيعابه لوقائعها
نخاف من المستقبل
و نخشى من الحاضر
لأنهما مجهولان
و نحب الماضي و نحن له لأنه مكشوف بكل ما فيه
و لكن دائما ننسى أننا في زمنٍ مضى كنا نحن فيه لماضيه .. كما نَحنّ الآن لهذا الماضي
.
.
أكثر ما يحبه الإنسان هو أن يصنع من كل شيء مأساة
ليش ؟
سؤال إلى اليوم ما لقيت اجابته :)

Fskra يقول...

globna o e7na ma tghyrna :) hatha e7naa o by the way i stiil buy cakes mn el 3almia eli bel sh3b ;p o e7naa still there ;) q8tyeen o
entay b3d tethkrena eb kil shay
7elo :**

and check my blog 3ndi bshara adre btfr7een m3 eni ma a3rfch bs adre eni a3zch wayed o bnltgy o bt9eren e5ty ;p methl el zain :*

بنت الشاميه يقول...

الحمدلله على الاقل عندنا ذكريااااات حلوه وااااايد وااااايد
نتذكرها ونفرح فيها ونعيش فيها
الله يحفظنا ويحفظ الكويت
وايامنا كلها سعيده باذن واحد احد

Fankooshy يقول...

رائع
ذكريات جميلة
شكرا

فراوله يقول...

مساالورد والجوري
غاليتي الحبيبه
فعلا كل شي تغير
الحياة تغيرت
الظروف اللي تمر علينا صارت غير
احنا كبرنا حيل
وصرنا مانعرف الا الهموم
صج شي يكدر
)::
ياحلات طفولتنا كانت تهبل
فيها شفافيه عجيبه
مالها حدود
الله كريم
ويعينا علي كل شي
...
تصبحين علي حب وتفاؤل
آمين
:**