الأحد، ديسمبر 14، 2008

شسوي؟

هل شعرت يوما بأنك من الغضب تود لو تنتف أحد بيديك الاثنين؟
او أنك لشده عصبيتك تشعر بنار بقلبك فتزم شفتيك؟
!!
أنا اريد ان اعض احد بأسناني
أول مرة أشعر بأني اريد ان أرى اثر الألم
انا غاضبه ...ونادر ما تفقد استكانة اعصابها وتغضب
.
.
.
مساء البارحة كنت بصحبه لاب توبي،مابين المدونات ومشاهده بعض الصور
انتبهت لمحفوظات محادثات المسنجر،لفت نظري ايميل غريب لم اره من قبل
وايميلات كثيره لا اعرفها
فتحت المحادثات لأجد حوار مراهقه جريئه مع ثلاث شباب مختلفين
كل حوار يقول الزود عندي من السخافه والواقحة وقله الأدب
شعرت بيدي كلها ترتجف منو هذي؟
هذا لاب توبي الخاص لا يستعمله احد سواي وأختي الصغيره وبرضاي
كنت أقراوأنا بحاله انبهار،مستحيل تكون هذي أختي الصغيره
!!
أختي الوحيده تصغرني بعشر سنوات،..هي قطعه من روحي وقلبي
هي صديقتي الصغيره التي أحاول دائما تعويضها عن اي شئ ممكن ان افتقده عندما كنت بعمرها
وعلاقتي معها استثنائيه وخاصه
كثيرا ما نتحدث مع بعض...وتقرأ مدونتي احيانا
ولا تخفي علي سرا
ثم المهم ....اختي لا تكتب عربي،والحوار كله عربي واسلوب مختلف
وانا أقرأ التقطت الاسم والمعلومات الواضحة وضووح النور
هي فلانة
!!
أشعر بالغليان
.
.
.
صغيره بالسن لم تتجاوز السادسه عشر من عمرها،احدى قريبتنا الصغيرات بالسن
البنت الوحيده الجعده المدلله مابين اربع شباب يعشقون التراب التي تسير عليه
اتذكر قبل صيف مضى..كانت والدتها مسافره وقررت المبيت عندنا
لفتت نظري حركاتها الواضحة وتليفونها اللي ما يطيح من يدها..وكان امر اكتشافها سهل بالنسبه لي
!!
اتذكر اني جلست معها،حضنتها وذكرتها بأني احبها كحبي لأختي
واني سأكون صديقتها بشرط ان تحكي لي كل الحكاية
كانت تتكلم بجرأه...لم تخجل مني
لم تقدر فارق العمر بيني وبينها
كانت تتكلم وانا خجلى اكثر منها
كيف بدأت العلاقه مع ذاك...وليس وحده هناك من هم سواه
وان هذا امر طبيعي تعيشه كل البنات
وانها وحيده ....تعاني من الفراغ العاطفي...وانها ترتاح كثيرا معهم
فراغ عاطفي؟
ودقم
!!
أنصت لها ،حاولت استحواذ ثقتها ناقشتها بكل شئ بطريقه سلسه
ضربت لها امثله وهميه وحقيقيه عن نفسي
من بدايه الفطرة في قلوب كل بنت بميلها نحو شاب يثير انتباها
الى الفرق بين الاحساس كاحساس مجرد وما بين التصرفات الخاطئة التي ممكن ان ننزلق فيها
مابين كل مرحله عمريه وحدودها
ما بين جدوى هذه العلاقات ومدى نجاحها في هذا العمر
سئلتها...ماهو احساسها لو يعلم بهذا الأمر ابوها؟
وهو الذي يرى الدنيا في عينيها
ماهو موقفها لو تفكر برب العالمين فوقها؟
كانت تهز راسها دون ان تنظر لعيني ثم قالت:
فلانة وفلانه لما كلمو تزوجو
وانتي؟
ما كلمتي وقاعده ما تزوجتي
!!
انصعقت
حتى كلمة كلمتي واسلوبها كان اوطي من ما اتخيل
........
عرفت حينها ان الامر مستفحل وان الموضوع يحتاج لمعالجه قويه البنت مفاهيمها معفوسه
يشهد علي الله....اني حاولت ان اقربها مني
ان اخذها معي
ان احاول لفت انتباه والدتها لبعض تصرفاتها
ان انبه والدها احيانا
ولكن دون جدوى... وتظل البنت بعيدة عن حدود بيتي
.
.
.
ذات يوم كنت امر بيتهم لأخذ بعض الأغراض
سئلت عنها فجاوبتني والدتها:
يا بعد قلبي متضايقه وراحت الجمعيه شوي
!!
تذكرت امي ومدى حرصها ودقتها
متضايقه تروح الجمعيه بروحها شكو؟
كنت استعد للخروج عندما شاهدتها،طفله بالخامسه عشر بمكياج مرأه
ولبس ضيق قادمه من الجمعيه
ليلتها شعرت بألم بقلبي،ربي سيحاسبني ان حصل بهالبنت شي وانا مو متكلمة
.
.
.
بعد يومين زرت والدتها صباحا في الوقت الذي كانت هي فيه بالمدرسه
ذاك كان من اصعب المواقف بحياتي
!!
سبحان من نطقني ورزقني كلمات جميلة وسهله اتكلم فيها دون ان اجرح احد
قلت لها كم أحبها وأحب ابنائها الذين هم اخوتي
وان لولا حرصي ومحبتي ما تكلمت
وصارحتها بكل ما سمعت ورأيت
الأم بكت امام عيني من صدمتها وألمها
وتغيرت معاملتهم لها بشكل كبير...غير مسموح لها بالخروج الا مع والدتها
وانسحب التليفون والانترنت من يدها
وتغيرت...او هكذا يبدو للجميع
شعرت بتأنيب الضمير وانا ارى قسوتهم عليها ،ولكن القسوة احيانا تكون مفيدة
.
.
.
.
.
انا متواصله مع اختي بشكل مميز ،هي مشروع حياتي التي احرص على نجاحه وتنميته
مشتركة بنادي للفتيات باعمارهن..قرآان ودروس وتنمية للحوار والذات
...وتلك اصرت ان تشترك مع اختي وصديقاتها وشئ طبيعي ان تفرح والدتها لذلك
!!
قبل فتره،وتحديدا وقت سفري، اختي طلبت من امي ان لا تسمح لفلانه بأن تذهب معها للنادي بأي طريقة
حتى لو تكلم والدتها
دون ان تتكلم عن السبب لأمي
اختي انسانه كتوم
تختلف عني اختلاف تام
المهم
اكتشفت من ما قرأت ان فلانه كانت تذهب للدرس ومن ثم تخرج من الباب الخلفي في مواعيد مع احدهم
!!
يا اللله...من اين لها كل هذه الجرأه؟
.
.
.
اليوم بمجرد ان رجعت من الدوام وجدت اختي نايمة في سريري تنتظرني
وكأنها تعلم ما حصل بي ليله البارحة من هول ما قرأت
قالت لي:
في سفرك كنت بالشاليه وفلانة استعملت لاب توبج واستحيت اقولها لا
!!
وانا شايفه عليها تصرفات مو عاجبتني وقلت قبل لا اقولج اتصرف
بعثت لها مسج..قرأت لي المسج فابتسمت،اختي احيانا تكون اشد صرامة مني
ولكن المسج قمه بالرقة والأدب..مضمونه انها قرأت ما تم تخزينه باللاب توب
ويعز عليها ان تكون قريبتها الجميلة بهذا المستوى
وانها تتمنى ان تتذكر ربها واسرتها
فردت عليها:
اوكي بس لا تقولين حق احد
!!
فلانه وصلت لها الجرأة انها تخرج من الباب الخلفي من النادي
تحرجها...وتنحرج امام صديقاتها
ثم ملأت عيني أختي دموع وهي تسئلني:
استكانة اهي ليش تسوي جذي؟
ما تحب نفسها
!!
اهلها زينين واهي صغيره
طمئنت اختي بأني سأتصرف،وعليها هي ان تكون بعيدة
وبأن أحيانا يكون هناك أخوين يتربيان بذات البيئه والظروف احدهم يكون طيب والآخر عكسه
وفي كل اسره ،وخلف كل باب مغلق هناك اسرار ومصائب كبيرة
هناك من يواجة اخطائه وهناك من يدفنها بالارض
وان داخل كل منا بذره طيبة....قد نخطأ
نتجاوز
نصل لحافه الهاويه
ولكن نرجع لطيب اصلنا ومنبتنا
لابد انها ستتغير يوما ما
.
.
.
اختي ذهبت لتنام قبل قليل
وانا اشعر بشئ في قلبي يغلي ويزيد
كلمتها
حفظت سرها
كلمت والدتها
شديت معاها
وارخيت شوي
ورغم كل شئ...لم اتخيل لحظة ان تصل بها الجرأة الى الحوار الذي رأيت
شسوي؟
قبل فتره اخوها كان يريد مني كتاب وصادف ان دار حوار بينا
اخوها الكبير بأواخر العشرينات
يحترمني كثيرا واكثر من مرة نتصادف في العمل
اكلمه؟
ام اكلم والدتها مرة اخرى؟
اتركها ...واهتم بأختي وكفى
!!
ام سيحاسبني ربي على تجاهلي لها
أشعر بحرقة بقلبي
وغضب
ونادر ما اشعر بهذا الغضب
......

هناك 37 تعليقًا:

صبا يقول...

استكانه


ماره اسلم عليج واقزلج كل عام وانت بخير

ولي رجعه للتعليق

:***

shakshaka يقول...

الحمدالله عالسلامه توني اقرا بوستج عن لبنان اييييييييه لبنان ماتالبييش المواجع...ايام مرت ليتها بتعود وااااي قمت اشعر ...يالله بستعيد هالايام بعد اسبوع انشالله

وردي علي موضوعج بالايميل

Enter-Q8 يقول...

استكانة روحي و سولفي و يا امها
بشكل غير مباشر
الام راح تعرف انك تقصدين بنتها
بس خلي كلامك عام

هذيان يقول...

هااااا هذا العمر يشيب الراس

أستكانه

بهذا العمر تكون البنت جاهله بالحياة جميعنا مرينا بهذا العمر بأختلاف تصرفنا قد نكون وقتها نميل إلي كتبنا أكثر لكن اليوم الأمور تختلف

عندما كانت دلول بهذا العمر هنا بدات أفضي حياتي كلها لها لكن يجب عليكي أن تنتبهي أن ما ترينه خطأ عقلهم يراه صحيح او عادي وهنا يجب عليك التصرف من أرضية صحيحة ؟؟

ليس صحيح أن تبلغي والدتها او أخيها فهي سترى بهذا الموضوع عمل لن تنساه وسيسبب كراهيه لكي

أستكانه صادقيها ولكن بشرط لا تتوقعي منها ان تصعد لعمرك وعقلك بل انزلي إلي مستوى فكرها وعمرها

تبقى النصيحة تحكمها مدى أرتباطها بك وتقبلها إياك

صادقيها حتى تقتنع هي بحديثك

joy يقول...

اسفة استكانة بس انتي بغيتي المشورة
وانا قلبي يغلي اكثر منج
للاسف ماشفتيه اهو الاف من البنات ابهالعمر يسوونه

ولكن ردة فعلج سويتي اللي عليج
ونادي القران لاتروحله وقفوها عنه
والباجي انا متأكد امهاواوبها يدرون بس مايقدروون يسوون شي
حديثج معها او مع الام او الاخوان لن يفيد بشي
بالعكس راح انتي اتاثرين اكثر بالموضوع
اخذيها من مجرب


خليج بعيدة والله الهادي ان شالله وعليج بالدعاء

Mnoyensa يقول...

عورني قلبي
:(

لي عودة

سمي بسمالله قبل لا تنامين
:*

هنوفي يقول...

مساء الخير ...استكانة طيعيني لازم تكلمين "ريااااال" . لانج كلمتي امها وما فاد وماراحح يفيد وخل نكون صريحين دايما احنا نخاف من الابو اكثر من الام !! ونحسب حساب حساب حق الابو اكثرمن الام وصدقيني راح تحس بجدية الموضوع اذا ابوها كلمها او اخوها لان فعلا الموضوع يعور القلب وحسافه عليها صج لازم تتلاحقين عليها لانها بعمر الورد .. ميخالف خل يقسون عليها شوي عشان تحس ان تصرفاتها محسوبة على الكل وان الكل يحبها ويخاف عليها ..ضيقتي خلقي حاسه جنها بنتي مادري خايفة عليها وقمت احاتي بنتي واحاتي هالجيل اللي صار مايهمه اي شي ولا حتى عنده رادع يردعه لا ام لا ابو لا رب !!! الله يهديها ويهدي عيالنا يا رب بس عفيا لاتخلينها ترى باجر راح تشكرج !!!!

"هنوفي "

Tekana يقول...

الله يستر عليها ان شاء الله... والله يعين كل من في بيتهم مراهق

كبرياء وردة يقول...

الحمد لله على السلامة
برايي انج تكلمين اخوها بس تحاولين تهدينه كثر ما تقدرين
لان بهالمواقف لازم الريال يتدخل
انا صار لي نفس الموقف تقريبا مع وحدة قريبتنا وياما حاولوا امها وخالاتها معاها بس ما تسنعت الا لما تدخلوا خوالها بالسالفة

mtfa2el يقول...

هذي وصلت حق مرحلة خطرة ما ينفع معاها الكلام السهل و اللين
علمي اخوها و لا ابوها
تييلها زفة تخليها تعرف ان الله حق

Manal يقول...

مساء الخير يا استكانة

والله يستر على بناتنا
دايما ادعي ان الله يرزقهم الحياء والعفة

هالشيئين صارو مفقودين عندنا ومسببين الفساد الحاصل على هالارض

:(

شي حزين
بس الاصح ان تصادقين تلك البنت
وان يكون بجانبها انسان يستطيع ان يقدم لها المشورة في الوقت المناسب

الزين يقول...

كلمي امها مره ثانية


وشيللي ايدج عقب

والأم لازم تعرف انها المفروض تصاحب بنتها دام البنت ما عندها اخت

وتعرف اللي يدور بحياتها

يعني تشد عليها بحر السالفة
تالي تلهى

اللي يبي لها توجيه الأم اكثر من البنت
والبنت ما ضاعت هالشكل الا لأن الأم مو واعية حق هالزمن وبلاويه

ضناك لين كبر خاويه


وانتي يا بعدهم كلهم واختج ما طلعتوا هالشكل الا من سنع اميمتكم ولأنها فطينة وعارفه شلون تحتويكم وترافجكم
وتوصل لكم المعلومة والسنع من غير ما تحسسكم انها قاعدة توجهكم

الله يخليها لكم ويديمها فوق راسكم


الأم الذكية يا استكانة تعرف متى تلعب دور الأم مع بنتها ومتى تلعب دور الصاحبة ومتى تلعب دور الأخت

هذا رايي


:**


وصباحج خير يارب

ARTFUL يقول...

ما يحر القلب واللي يحز بالخاطر

هالبنات اللي بعمر الزهور

اللي حتى ما بدت عليهم معالم الانوثه

يسبقون عمرهم بمراحل كثيرة
وتحط لك هالمكياج وتلبس لبس جنها بنت عمرها 27 سنه رايحة حفلة

!!!!

ومع غفلة الوالدين او عطفهم الزايد

ورفقة السووء

تبدي المشكلة

ولطفولتها وقصر تفكيرها
ممكن نوصل لما لا يحمد عقباه

فترة حرجة تحتاج من يسد الفراغ الي تعيش فيه

-----------
زين ما سويتي مع اختج سدي الفراغ
عسى الله بحفظها
-----------

انا اقول الكلمه حق عليج
وانتي ما عليج الا اتكلمين وبس
لان الي قاعد يصير ماهو طبيعي
!!!!

وبعدين وين النادي ما يدقون على اهلها يقولون لهم انها قاعد تطلع!!

مع احترامي شهالنادي اللي ما يدري عن البنات!!!

تصدقين علشان ما تكثر ملاحظاتج ويمكن الام اتضايق

قولي حق مشرفة النادي تعطيها خبر!!

------
الله يحفظ بناتنا ويستر عليهم ويكتب لهم الخير والسعاده

نون النساء يقول...

والله كل ما شوف بنات يسوون جذي اتحسف عليهم.. حرام يضيعون نفسهم ووقتهم على تفاهات ..

المراهقين مشكله
محتاجين صديق يثقون فيه

وانج تكسبينها كصديقة راح يسهل عليج الطريج يا تكووون
وعن سابق معرفة لأن مر علي مثل هالحاله

والأم نفسها اهيه اللي طلبت مني
لاني كنت قريبة من بنتها اللي تصغرني بثمان سنوات

خذت مني وقت
وحرقة اعصاب
وسوالف
واشهر ايلين ما خليتها اهيه نفسها تقتنع بأن حرااام تخسر نفسها في هالمنحدر



الله يوفقج
ويهديها للخير

ابو لطيف يقول...

اعانك الله

كل المشكلة تكمن في

........
وانها وحيده ....تعاني من الفراغ العاطفي...وانها ترتاح كثيرا معهم
فراغ عاطفي؟
.........

هي في بيئة منزلية متنافرة معها او الاقل غير متوافقة معها من وجهة نظرها هي

وبين صديقات - غالبا - يتوافقون مع ما تقوم به ويشجعون بعضهم البعض

لا الاب ولا الام والا الاخوة يستطيعون ان يمنعوها

يمكن لهم ان يستخدموا كل وسائل القوة الممكنة وذلك سيزيدها عنادا واصرارا وستقوم بفعل ما تريد بشتى الطرق

هذه طبعية هذه المرحلة العمرية من ناحية العناد ورد الفعل المعاكس على اسلوب الاجبار على ترك فعل او القيام بفعل

الوسيلة الوحيدة لانتشالها هي بالاقناع وعزلها عن محيط الصديقات اللاتي يسلكون نفس المسار

وكانت محاولة ادخالها نادي القران محاولة جيدة في هذا الطريق
لكن مع الاسف استغلته بطريقة معاكسة تتوافق مع رغابتها هي ...وذلك بسبب عدم وجود قناعة بترك ما تفعله

اول خطوة هي اقناعها بشكل فعلي بخطا ما تقوم به

قناعة وليس خوفا

هل يستطيع احد من اهلها ان يقوم بهذا الدور ؟

من منهم مستعد ان يصادقها ويظهر حبه لها ؟

جزاك الله خير

اللهم احفظ لنا بناتنا واولادنا واهدم الى سواء السبيل

والله المستعان

Sweet Revenge يقول...

تسكتين لا طبعا
انت كلمت الام بس الظاهر البنت مو راده علي امها مبين بالعربي بايعتها
البنت صغيرة مو عارفة مصلحتها وهالدرب ممكن يدمرها اقلها سمعتها
حاولي تكلمين الام مرة ثانية
اذا ما فاد كلمي اعقل واحد من اخوانها علشان يقدر يتصرف
البنت قاعده تلعب بالنار واحتمال ماراح تحرق روحها بس راح تحرق اهلها معاها بعد

ويارب الله يوفقج مهمه صعبة

Peace يقول...

خلج معاها و حاولي تصادقينها
اكيد الموضوع يبيله فتره
لانها كم سنه وهي وحيده
بس خلج صبوره معاها
و لا تنفعلين و تقدرين تطلعين معاها و مع اختج

الله الهادي

غير معرف يقول...

استكانة انتي تعانين وامها تعاني
بس تدرين منو اللي يعاني اكثر شي؟
هي
اكثر وحدة مسكينة هي


التعامل مع البشر للحصول على نتيجة فعلية امر دقيق دقيق دقيق يحتاج هندسة في الافعال والاقوال بالتوقيت الصح بالطريقة الصح

استكانة انا اصيح وانا اكلمج لاني كنت اصيح وانا بهالوضع احاول اقنع اختي انها تهد هالسوالف
ماكو فايدة

تدرين متى عقلت؟
لما كبرت وشافت ان اهلها ماكو مثلهم بهالدنيا
بعد ماشافت نماين
وعرفت ان مو كل الناس لهم اهل مثلها
وعرفت قيمة العيب
لما قدرت اهلها واقتنعت انهم ذهب، افتحت قلبها لهم وصادقتهم


استكانة
ترى هالبنت مسكينة
لانها مالها صاحب من اهلها
تعرفين اشكثر صعب ان الواحد يعيش بازدواجية جذيه؟ مو شرط الاهل يكونون فاسدين علشان بنتهم تحسبهم اغراب، بس اعتقد السبب سذاجة او جهل من طرفهم

البنت لازم تصادق احد
من اهلها اللي في البيت
لازم احد من اهلها يراها شفافة
مو شرط الام
يمكن الاخت
يمكن الاخو
بس لازم تكون شفافة لاهلها في بيتها
وهالشي مايصير الا باللين


استكانة انتي جربتي الكلام معاها
وجربتي الكلام مع امها
ومافاد
لاتعيدين الكرة مع محاولة اثبتت فشلها


لاتخاطبين عقلها
اصلا ليش تخاطبين عقلها؟
مشكلتها عاطفية
خاطبي عاطفتها


صادقيها
اذا تقدرين
او اي احد من العايلة
او الاصدقاء القريبين

تقربي منها بكل عفوية
وبكل صراحة
من غير تكلف
بدون ماتنتظرين شي منها بالمقابل
عديها وحدة منكم وفيكم
بقلوبكم لاتشيلون عليها
لانها اكيد ذكية وبتحس بنظرات الملامة

احتووها كانها ماغلطت
ذكروها ان لها اهل يحبونها
ذكروها انها تنتمي لكم

خلوها اهي اللي تتكلم معاكم
وتبين لكم شفافيتها
لما ترتاح لكم وترتاحون لها تكونون حصلتوا على مفتاح لقلبها وعقلها
وفقط في هالحال راح ترضى تاخذ منكم لتضيف على افكارها وتصرفاتها

صعب وايد
بس منو قال ان التربية سهلة؟

ترى ان نجحتوا تكون ازاحت معاناة جاثمة على صدرها

ماصارت جذيه الا لانها ماعرفت البديل
ماذاقت السكينة لانها طلعت على هالدنيا وحيدة بين اهلها




المسالة تاخذ وقت وتركيز وتكتيك
وحالها ماينصلح بين يوم وليلة


الله يفتح عيون اميمتها
وتتعامل معاها صح

انونيمس بالعربي يقول...

استكانة انتي تعانين وامها تعاني
بس تدرين منو اللي يعاني اكثر شي؟
هي
اكثر وحدة مسكينة هي


التعامل مع البشر للحصول على نتيجة فعلية امر دقيق دقيق دقيق يحتاج هندسة في الافعال والاقوال بالتوقيت الصح بالطريقة الصح

استكانة انا اصيح وانا اكلمج لاني كنت اصيح وانا بهالوضع احاول اقنع اختي انها تهد هالسوالف
ماكو فايدة

تدرين متى عقلت؟
لما كبرت وشافت ان اهلها ماكو مثلهم بهالدنيا
بعد ماشافت نماين
وعرفت ان مو كل الناس لهم اهل مثلها
وعرفت قيمة العيب
لما قدرت اهلها واقتنعت انهم ذهب، افتحت قلبها لهم وصادقتهم


استكانة
ترى هالبنت مسكينة
لانها مالها صاحب من اهلها
تعرفين اشكثر صعب ان الواحد يعيش بازدواجية جذيه؟ مو شرط الاهل يكونون فاسدين علشان بنتهم تحسبهم اغراب، بس اعتقد السبب سذاجة او جهل من طرفهم

البنت لازم تصادق احد
من اهلها اللي في البيت
لازم احد من اهلها يراها شفافة
مو شرط الام
يمكن الاخت
يمكن الاخو
بس لازم تكون شفافة لاهلها في بيتها
وهالشي مايصير الا باللين


استكانة انتي جربتي الكلام معاها
وجربتي الكلام مع امها
ومافاد
لاتعيدين الكرة مع محاولة اثبتت فشلها


لاتخاطبين عقلها
اصلا ليش تخاطبين عقلها؟
مشكلتها عاطفية
خاطبي عاطفتها


صادقيها
اذا تقدرين
او اي احد من العايلة
او الاصدقاء القريبين

تقربي منها بكل عفوية
وبكل صراحة
من غير تكلف
بدون ماتنتظرين شي منها بالمقابل
عديها وحدة منكم وفيكم
بقلوبكم لاتشيلون عليها
لانها اكيد ذكية وبتحس بنظرات الملامة

احتووها كانها ماغلطت
ذكروها ان لها اهل يحبونها
ذكروها انها تنتمي لكم

خلوها اهي اللي تتكلم معاكم
وتبين لكم شفافيتها
لما ترتاح لكم وترتاحون لها تكونون حصلتوا على مفتاح لقلبها وعقلها
وفقط في هالحال راح ترضى تاخذ منكم لتضيف على افكارها وتصرفاتها

صعب وايد
بس منو قال ان التربية سهلة؟

ترى ان نجحتوا تكون ازاحت معاناة جاثمة على صدرها

ماصارت جذيه الا لانها ماعرفت البديل




المسالة تاخذ وقت وتركيز وتكتيك
وحالها ماينصلح بين يوم وليلة


الله يفتح عيون اميمتها
وتتعامل معاها صح

kuwaitia_habla يقول...

انا عندي انتي سويتي اللي عليج اول مره وكافي لا اتدخلين زياده معاها لانه هالطقه من المراهقات مايهمهم ولسانها مبين يلوط اذانها واكيد امها اول مره كلمتها بس مبين ماكو فايده وماتخاف من امها هالطقه ماينفع معاها الا ريال يعلمها الادب ويعطيها جم طراق يمشيها على الصراط المستقيم لانه مريت بنفس هالموقف مع وحده اذا الام شخصيتها ضعيفه فما مامنها فايده وراح تستمر البنيه بالغلط مع العمر تزيد بلاويها مو بس جذي راح ترتقي بمستويات بعد وبعدين للي ماخذه حفظ القرأن عذر عشان تصيع شتوقعين منها انا عندي وخري عنها واذا كلمتي احد لا يبينون انه انتي اللي معلمتهم لانه هذي من اهلكم ويمكن تسوي لج انتي مشاكل
واسفه على الاطاله

nikon 8 يقول...

شاورت أمي عزيزة عن موضوع هالبنت وتقول لك : لا تهقين الأم ما تدري عن تصرفات بنتها ولا تنصدمين إذا عرفتي إن الأم معاونتها وتطلع لها الأعذار جادم إخوانها وأبوها وتقول لك بعد إللي ينصح هالأيام يطلع عدو وبالذات وإنتي لي لحد الحين ما تزوجتي وراح يعتبرونك إنك تغارين منها وإن طريقتك في التفكير قديمة ... خلك بعيد نبهتي أمها مرة وبس وخلي النادي يتصل على أمها ويعلمها بغيابها ... أما أختك فالله يديم عليها العقل والهداية وبعدوها عن هالبنت لا تأثر عليها ... أما البنت فدواها الزواج

`~MnO YeNSa! ~` يقول...

تدرين
قريت
و
من امس معورني قلبي

شوفي
احس السالفة
مو هينه يبيلها
تفكير لان اي خطوة ممكن تخطينها راح اتأثر سلبا و ايجابا بالبنت

يعني انا اللي معور قلبي
انه
she don care
حتى حق امها ما احسبت حساب
و الا نظرة البنات اللي معاها

تدرين انه احس انه لان اهيا ما لقت احد يفهمها .. يسولف معاها .. يقولها سويتي ..وين رحتي ..ويناقشها لو بأبسط الامور ..يحسسها انه رايها مهم ..و له وزن ..
والصديقات ..ساعات الصديقات يكونون اداة اصلاح اكثر من الام ..انا ما اهضم حق الام بس ..حسن اختيار الصديقة ..من اهم العلامات ..
..

كلمي احد غير الام
لان امها ما اثرت عليها
بصورة ..تخليها تهاب
والاهم انج تقنعين البنت
انه اللي قاعدة تسويه خطأ لان اذل ما اعرفت انه خطأ طول عمورها ..بترجع تسويه ..
وحتى لو مو انتي لو احد يقدر يأثر عليها ..


الله يعينج
يستر عليها ان شاء الله
و صج حبيــــــت
الاستكانة الصغيرة
حبيها
:**

Eng_Q8 يقول...

زمن اغبر

غير معرف يقول...

قوليلها الي جمع بينهم الشيطان وما يفرق بينهمالا الشيطان ؟؟
والي يكلم بنت يكلم 10 مو فارقه معاه بس جربي كلمي الاخ بس لازم اسلوب دقيييييييق "ذكي"عشان لا ينحرج ولايتهور
:(

جنون إحساس يقول...

أول شي جزاج الله خير وماقصرتي على حرصتج لج الأجر والثواب إن شاء الله احتسبي الأجر بكل عمل تسوينه وبتلاقينه بالمستقبل سواء القريب أم البعيد


هالعمر صعب حيل, وآنا مع أختي نفس الموضوع مسكينه تبي ايميل حالها حال البنات وآنا مو راضية اسوي لها الإيميل مو قسوة لكن حب وحرص عليها, الدنيا كل مالها وتورينا أكثر, البراءة يوم عن يوم قاعدة تموت, وهذا الخطأ تقع في حتى المتزوجات فما بالج بالصغيرات اللي في عمر المراهقة؟

المُلام الأول هي الأم وإهمالها إن كانت حقاً مهملة والملام الثاني هي البنت نفسها إن كانت حسنة التربيّة منذ الصغر لأن عمر 16 سنة مو ياهل وتقدر تميز الخطأ من الصواب بشكل جيّد وبطريقة عقلانيّة, موضوع محيّر
والله إني ما استطيع أن أخفي نظرة الإستحقار عن كل فتاة خاينة إذا مو جدامها من وراها, النظرة النظيفة للبنت تختفي بمجرد ما اعرف إنها باعت شرفها بشكل أو آخر

قولي لها هالكلام يمكن يأثر فيها دامها صغيرة , استوقفتي كلمتها لج بأنج ما كلمتي وماتزوجتي لي الحين, بدا لي من هذي الكلمة إنها تحتاج شحنات إيمانية كبيرة وأهمها الرضى والسعادة بالمكتوب والعمل للآخرة فقط دون السعي لملذات الدنيا لأنه بالرضى سيتوفر للعبد كل مفقود جزاء له على تسليمه امر لله


وبالنسبة لاقتراحج منو تكلمين, أقولج كلمي أمها مرة ثانية أفضل من الأخ, لأن الأخ قد يضايقها مستقبلاً ويشك فيها بشكل أو بآخر حتى بعد توبتها .. نظرة الرجال لهذا الموضوع نظرة مختلفة فلا تجازفين لأنه ممكن تتضرر البنت بشكل كبير, أما الأم فهي القلب الرحيم اللي تقيس هالمشكلة من الجانب العاطفي

شي آخر
اهي بهالعمر تحتاج للصحبة الصالحة وللأماكن الموثوق فيها وايضاً الأماكن اللي ما تقتصر فقط على الدروس الدينية بل اللعب والمسابقات والعمل الجماعي, إذا تبين أرشح لج بعض الأماكن راسليني ع الايميل الموجود بالبروفايل وان شالله ايمع الأفضل


ويزاج الله خير على حرصج
سامحينا ع الطوالة
^_^

THE BOSS يقول...

الله يستر علينا بستره
اعتقد الام هي الطرف المناسب للحديث معه

وفي صراحه انا احيج و اشكرك على جهودج ومحاولاتج بإصلاح البنت الله وفقج

ويجعلها في ميزان اعمالج

وعطني ولعه

THe SUn SHiNe .. يقول...

ربي يوصلكم لخير وياها ويهديها

أدري صعب أنج تكونين لينة بعد كل هالصدمات!! مشدودة .. ومعصبة ويمكن محتقرة سلوكها

ماظن أمها ماتدري .. سلوكها واضح وأولهم الأم تحس

اللي تقول دواها الزواج .. لاااه هاي الغلط بعينه
@@

.. في نظري ..
اهو حل من اثنين

(1)
باختصار تكلمين أحد من الرياييل (أخوها)
بس تهدئينه أول ..
تضمنين عالأقل إن في أحد يراقب بحزم
------------------------------

(2)

شالسبب انها تسوي جذي؟
الواحد بالفطرة مايحب هالدرب

بس الفراغ العاطفي و غياب الربع الزينين .. دايما ذلين أول سببين

انج ترافجينها ممكن بس اللي بتأثر أكثر وحدة أجرب لعمرها
وتأثر فيها بالقدوة بالفعل ..

ممكن انها تنشغل بشي يلهيها عن هالدروب؟ برنامج ترتبط فيه ..

سفرة لفترة برع الديرة .. مع ناس طيبة .. نادي
عندكم (مرتقى) خوش ناس على ما أظن شي مثيل له

هالفترة بتكون كفيلة انها تنمي فيها مبادئ يديدة وتربطها بصحبة زينة


و أييد القرار الثاني :)

فريج سعود يقول...

الله يستر على بنات هالوقت

احي فيج روح المسؤلية

ولا تتركينها خلج وراها عسى الله يصلحها على ايدج

وتاخذين فيها وفي اهلها اجر

charisma يقول...

تدرين وين المشكله

انج اتكلمين عن مراهقه
والرك على التربييه
صعب ترويض هالعمر صعب جدا

واصدقيين عاد يااما بيئاات دينه فيها اكثر من جذى وياامه بيئات فرى طلع فيها الصالح والمهتدى
سبحان الله
والله مرات يا استكانه اقول الله سبحانه الى يزرع البذره فى البنى ادم
لا التربيه ولا الدين يرد ولا يردع
وكلامى ماهو قاعده ترى بس فى الى اتكلم عنا وانا اعرف ناس وايد


اذا اهى سالكه سلك ومقتنعه فيه صعب اتغيرينا الا اذا اهى تضررت وانقرصت
بتكبر وتعرف
واذا اهلها زينين بترد لهم وحق سلكهم
الله يهديها ويستر عليها ان شاءالله ويحفظها من شر عملها


انت سويتى الى علييج لا تحتريين
شبتسوين اكثر؟؟

الله الهادى ان شاءالله تكبر وتركد
الله يحفظها

ZooZ ZaibG يقول...

استكانتنا
عسى صدرج ما يضيق يارب

ادري بتظلين تحاتين
الانسان اللي قلبه نظيف ما يقدر يغمض عن الغلط

رايي انج تكلمين امها
البنت صغيرة والابو والاخو ماراح يتفهمون عدل
وبتظل بقلوبهم لين تكبر
خصوصاً الاخو
والام لي بغت تشد بتعرف تشد

الموضوع كله بتفهمينه لي حطيتي نفسج بمكانها
تخيلي اهو قاعد يسويلي البحر طحينه
ويقولي انه يحبني وماراح يهدني
ويقولي انه معاي لو شنو صار
بس اخلص معهد وانتزوج
انتي احسن بنت بالدنيا
ماراح اتخلى عنج
وقطايحله قزززززز
تبينه يفل
تبينها تصدقكم
بتقاوم لي باجر
ولي منعتوها غصب
بتاخذ تلفون وخط من وراكم
بتمنعونها من المدرسة يعني

الموضوع هذا صعب ويبيله تروي
ولازم تلقين طريج
انتي اقرب وبتعرفين انشاالله
واثقة فيج بنيتنا

اجار الدين كشمش يقول...

الله يواريييج العافيه

كملي احسانج ..وكلميها انتي مباشره وهدديها ب اخوها بس انصحك
لاااتقولين للاخ ..لان يتصرف بما لايحمد عقباه
والفتنه اشد من القتل
وبعد مده قليله قولي لامها مره اخرى
وانسحبي بعد ذلك نهائيا

اللي سألك عنه رب العالمين عملتيه وزياده
وانتي اجرك كبير
فمالله

Ni3Na3aH يقول...

wallah flana mo hayna
wallah teyenee 7alat a39ab mofra6ah monkabah o mwajaha 7ag shakh9 mo3ayan.. bs mo lnafs el sebab ele m2atheech.. 3moman... you do what you think its right to do.. as long as you do it in a polite way.. best of luck;)

Ducati يقول...

انا احس اني اعجز في مثل هالمواقف دايما اخاف على شعور الطرف الآخر

بس هم ما يصير نخليهم جذي باجر يخربون على مستقبلهم وعمرهم

الله يهدي انشالله

الإعلامي أحمد الحيدر يقول...

لأول مرة يشدني موضوع بهذه القوة منذ فترة ..

فعلا القضية حساسة .. وقريبتك تمثل نموذجا أقولها بكل اسف واسعا في فتيات اليوم ..

التوجيه والتوضيح غائب .. القدوة غائبة .. قوى الشر ليس كما كن يشاهدنه في الرسوم المتحركة .. لأنها كثيرا ما تنتصر على الخير وفق منظورهن ..

الموضوع حساس ولا يتحمل التأخير .. أتمنى أن تضعي مصلحة الفتاة فوق مشاعرها المؤقتة أيا كان نوعها .. حتى لو كانت كرها لشخصك الكريم ..

وفقك الله دوما ..

غير معرف يقول...

دزي ايميل حق الشيخ الثويني

واستشيريه

ميرامار يقول...

ذكرتيني بقريبة تشبهها كان عمرها بس 12 سنة وانا كنت بالجامعة

اذكر اني طردتها من بيتنا بعد ما استخدمت تلفوننا وعملت فضيحة بجلاجل لأني كنت اساسا متشبعة من سوالفها

مشكلتي اني مجرمة ما اغشمر
لووول

نقطة خلافي مو اخلاقي بالاساس وبس
نقطة خلافي شلون بهالاعمار الصغيرة يفكرون بامور اكبر منهم؟



انا اقول كتبي لها رسالة مجهولة ودسيها بين هدومها كتبها في بيتها اي مكان تكون فيه واصلة لها بروحها

تنبهينها بدون احراج ومشاكل خجليها بدون تخويف يمكن اتسنع


شرايك فيني مو احسن من دكتور فيل؟
:P

esTeKaNa يقول...

لا خلا ولا عدم
!!
كل تعليق انكتب من قلبكم أثر فيني
وايد كنت معصبه حزتها مادري شسوي
هديت
وقريت تعليقاتكم
وتعوذت من ابليس

قررت اكلمها اهي شخصيا واشد عليها واقولها اني بوصل كل اللي صار حق اخوها بس عشان تخاف شوي

وتالي بكلم امها
واكون بريت ذمتي


الله يهدي ويهدي كل بنياتنا ويحظ لكم بناتكم ولا يحرمني منكم جميعا يارب
:))



يالله يايكم بوست يديد
:Pp