الجمعة، ديسمبر 12، 2008

تربتك

تزيد المسؤليات والواجبات وليس لدي اي رصيد للاجازات
اشعر بأني اركض طوال الليل والنهار
أنا انسانه مستهلكه
كان اقصى ما اتمنى في لحظتها ان اسافر
وكان فرصتي وجود اقاربي في لبنان لقضاء اجازه العيد
لم اجد حجز برفقتهم...لم اجد الا تذكره واحده على طيران الجزيرة
استخدمت كل اسلحتي وعدتي وما لدي لاقناع حكومه البيت
التي كان ردها قاطع ومانع :
ما عندنا بنت تسافر بالطيارة بروحها

وتعلمي...مو كل ما تشتهينه نفسج تسوينه
:(

كدت ان افقد الامل الى ان اتصل بي عمي:
فيج سفره سياره لي لبنان؟
كان الامر بالنسبه لي في البداية امر غير جدي ولن افكر فيه
قارنت مابين قضاء العيد في الكويت واجازه طويلة
ومابين تحمل يومين في السياره والاستمتاع بحب بيروت
استخرت،وتضبطت كل الامور وتسهلت
مشينا يوم الثلاثاء الثاني من ديسمبر متوجهه للبنان ورجعت امس الجمعة الثاني عشر من ديسمبر للكويت
وكانت رحلتي رحلة ممتعه بكل ما فيها
وهذي بعض من تفاصيل الرحلة



المحطة الأولى :السعودية
~~~~~~~~~~~~~~~~
مشينا من الكويت على الساعه العاشره صباحا يوم الثلاثاء
ما تصادفنا مع حجاج فكنا بعيدين عن الزحمة نوعا ما
أول يوم مشينا وصلنا على المغربيات لمنطقة عرعر وهي عاصمه المنطقة الشمالية



طوال طريقك لابد ان تقرأ كلمه ...عرعر عروس الشمال..واعليه
عرعر يا حافظ؟
تذكرت احد اقاربي رحمة الله عليه كان في طريقه في الحج وتحديدا بمنطقه عفيف عندما بشر بولاده ك
طفلة له فسماها عفيف وتسنع الاسم بالنهايه ليصبح عفاف
ماذا لو كان مارا هنا بعرعر؟
الله حفظها ما صار اسمهاا عرعر
كملنا الى ان وصلنا لمنطقة طريف،تلك المنطقة التي اشعرتني بأني رجعت ثلاثين سنة للوراء
توقفنا عند فندق المدوح فتحة على الواو
،وجهي كان علامة تعجب:
راح نسكن هني؟
ضحك عمي وهو يجاوبني:
اي ماكو الا هذا
عن الدلع...اخشوشنو فإن النعمه لا تدوم
!!
بعدين انتي لازم تصيرين مرنة

افترضي باجر ربي كتب نصيبج مع واحد من عيال عرعر وساكن بطريف اشلون شنو بتسوين؟
بمجرد ان افترضت...كسرت خاطر روحي

:(
بلعت العافية وقلت اصير سنعه واخشوشن،حلاه السفر سهالات ومابي اعسر على الجماعة

ركبنا الغرفه فرشت اغراضي



صوت التكييف يشعرني باني فوق شاحنة
وليش تكييف ودرجة الحراره وصلت لدرجة واحده فقط؟
اتصلت على الروم سيرفس لاغلاقه.
.مشغول
!!
حياتي ما شفت روم سيرفس مشغول طول الليل من يكلمون
وما ادري ليش تعسرت كل شوي ادق بشوف متى يرد الروم سيرفس
قبل لا انام .قررت اتيدد واصلي
اوصل باب الحمام وانتو بكرامه لقيته مسكر وجدامه:

يا إلهي نعال نيدية
لوهله تخيلت احد داخل الحمام
طقيت الباب ...ما رد علي صاحب النيدية
اكتشفت ان هذي اهي نعال الحمام وانتو بكرامه

هذي الفناتق ولا بلاش
:pP~

تقيم الفندق:
عشره تحت الصفر...السكن فيه يجرح اقصى الفؤاد والروح
ولكن الحياة تفرض عليك احيانا الكثير من الامور التي عليها تقبلها كما هي
تقبلت الفندق العجيب ونمنا فيه وحركنا من الصبح باتجاه الاردن





المحطة الثانية:
الأردن

~~~~~~~~~~~~~~~~


من اول ما دخلنا الاردن وانا في حالة انبهار من الصور


تخيل ان يستقبلك عند اول المركزصورة لملك الاردن وزوجته وابنائه في لقطة عائليه جميلة وتحتها ترحيب لك بالاردن
كل الصور لرانيا..يا حافظ ماكو صوره حق نور يا حرة قلبها؟
رانيا ملكة راقيه ..طولها ابتسامتها وصورها رائعه جدا
بس مو غريب تنحط صورتها عن اول الحدود؟
كانت تسولف لي زوجه عمي عن التحول في حياتها من بنت بسيطة الى ملكة
زوجة عمي انسانة طيبة جدا،ورزقها الله حلاوة بللسان ،لا تنهي اي حوار الا بدعاء او كلمه جميلة
كنت مندمجه معها حين قالت لي:
يا عل فالج يا استكانة فال رانيا يوم خذت ملك
!!
بغض النظر عن الدعوة الا اني شعرت بها تجبر بخاطري بعد افتراض عمي باني ممكن ان اعيش في عرعر
وقلت لعمي اذا كانت هناك حاجة لاي صورة من صوري لمنفذ نويصيب انا ما عندي مشكلة
:Pp~
طوال الطريق صور لملك الاردن واسرته واجداده وشعر بالاردن وجمالها
رغم اني لم ار فيها الا صحاري وجوووول
واعلانات لمهرجان الاردن الغنائي


المحطة الثالثه:سوريا
~~~~~~~~~~~~~~~~~

اصعب مركز حدودي وقفنا عنده
اكره ما علي بالدنيا...دناءة النفس في طلب البقشيش
اكيد ليس كل السورين بنفس المستوى
ولكن للاسف....الاشخاص الذين صادفناهم عند المركز كانو بمستوى اقل من المطلوب
ضعنا في دمشق ..دخلنا حارات قديمه
شعرت باني جزء من باب الحاره
وتذكرت كل مدرسات الفيزيا والاحياء الذين مرو علي في حياتي
الحمدلله...بعد ان تذكر عمي الطريق كملنا باتجاه لبنان




المحطة الرابعة:لبنان
~~~~~~~~~~~~~~~~~

انا عندي حنين ..ما بعرف لمين


بيروت في عيني ..انثى عاشقه تتلون في كل فصل بلون حب جديد

ما يسوا هالمنظر اللي يرد الروح هالعنوة؟

لبنان يشبهنا...يجمع في قلبه كل متناقضات الدنيا

ناس تكبر في صباح العيد


وبجانب المسجدناس تعد شجره الكرسمس وعيد المسيح



كل شئ مزين للفرح

ولبنان رغم الفرح لا ينسى تعليق صور الحريري
جبران التويني
ويعتقد ان الموت هو قدر الاحرار
وفي كل زوايه هناك نبضة قلب للبنان
الحقيقة من أجل لبنان
!!

رغم اني كنت هناك في الصيف
الا اني اراها اجمل في الشتاء

أروق وأشهى

استمتعت...البرد،المطر،التسكع دون هدف
بأكل مناقيش في ذوق مكايل
ومساءات السوليدر
والتصوير في الجبيل
ومرافقه مجموعه سهله ووننيسه بالسفر
واحتفالنا هنا بالعيد...وعلى طاري العيد
كنت اقضي مساء العيد في السوليدر
بينما تتمشى قريباتي في السوق..كنت استمتع بنسمات البرد
والتأمل بالماره
على طاولة تجمعني انا وقهوتي
يصلني مسج:
قاعدين نسمع يا غالي الأثمان....العيد كله لج
ابتسم وارد على ذاك المسج بحب ما كدت ان اصحى من نشوته حتى جاء اتصال ابي:
عيدج مباااارك..
البيت كله لج
بعد سفر بروحج ماكو
البيت صخة ماكو احد يزعجنا
!!
اظلمت الكويت اظلمت

ابحث عن صوتي للرد على ابي،اجده مختنقا

ايامك سعيدة..ودمووووع

ليش داق علي؟

يدري انا اذا سافرت ابعث مسجات وبس ماحد اكلم احد احبه بالتليفون

:(

صمت..,عيوني تخر دموع

ومناديل ستاربكس تشمخ الويه والعيون

ينتقل التليفون من ابي لامي..اتعبر واصيييح
حاولت تمالك نفسي وانا في مكان عام والناس تراقبني ..بس ما قدرت

:(
أنا بالعيد طفلة...ما زلت ارى العيد كله في عينيهم ومعهم

الله لا يحرمني من كل غالي احبه

ولا يحرمكم من حبايب قلبكم يارب




ماأدري منو الأم الفقيرة واعليه بس تنقصت الصورة حق امي
hehehe
يا بعد قلب قلبي هالميمه...كتبت لها رؤوس اقلام شنو بسولف لها عشان ما انسى
:Pp~

رجعت البارحة..اشعر بتكسر ورغبه بالتمدد والراحة
هذي السفره علمتني حقيقة:
ان السعادة لا تملك مقاييس محدده
ممكن ان نستمتع بكل التفاصيل وابسطها
ان رغبنا نحن فعلا في ذلك
.
.
اتمنى انكم قضيتكم عطله سعيدة
اعتذر عن غيابي المفاجئ وعن التأخر بالرد على البوست السابق سارد بأقرب وقت
غدا بداية اسبوع جديده
اتمنى انها تكون بداية سعيدة للجميع


هناك 60 تعليقًا:

هنوفي يقول...

هلا والله يالغالية ...
ليش هالغطة عيزت وانا كل يوم ما غير فاتحة اللاب توب ومسكرة اللاتوب ناطرة طلتج :) وعقب هالنطرة حرااام عليج تبجيني والله نزلت دموعي وانا اقره بوستج لما ابوج كلمج ادري واعرف هالمشاعر والاحاسيس اللي ماتقدرين بلحظتها تمسكينهم على العموم الحمدالله على السلامة وعساج من عواده انشالله وشوقتيني على بيروت كنت بروح بس مااااكو حجز عليج بالف عافية

"هنوفي"

حسام بن ضرار يقول...

الحمدلله على السلامه و عيدج مبارك



ضعنا في دمشق ..دخلنا حارات قديمه
شعرت باني جزء من باب الحاره
وتذكرت كل مدرسات الفيزيا والاحياء الذين مرو علي في حياتي
الحمدلله...بعد ان تذكر عمي الطريق كملنا باتجاه لبنان
===========================

لو ماخذين معاكم جي بي إس جان ارتحتوا من عوار الراس

ma6goog يقول...

حمدالله عالسلامة

نتمنى يكون لنا نصيب في رؤية سوريا و الاردن

mtfa2el يقول...

الحمد لله على السلامة
عاد روم سيرفس و بعرعر
من شاف المنطقة اللي جنها ساحة كاوبوي
ويهم ويه روم سيرفس
عاد الله يهداه اللي سمى بنته عفيف ..لو مار على منطقة أم الجماجم جان سمى بنته جمجمة !!

اهم شي بيروت الكرامة..دام وناسة و كله تمام يا افندم فالحمد لله
تكرم عاينيك :p

Enter-Q8 يقول...

الله عرعر
و فنادقها الخمس نجوم
لو منك كان كملت فيها باقي العطلة


الحمدلله على السلامة

qesat_5ayal يقول...

الحمدلله على السلامة

أفضل شي أن الواحد يتسهل ولا يتعسر في السفر
وسفرة ممتعة ومحطات متنوعة
وصحبة طيبة وهذا اهم شي
:)

nikon 8 يقول...

الحمد الله على السلامة
وايد عجبتني فكرة النعال النجدية عند باب الحمام ( وإنتو بكرامة ) تصلح فكرة لبرنامج الكاميرا الخفية
:)
وغرفةالفندق عجيبة من شاف سطرة السراير... أكيد عشتوا جو ستار أكاديمي فيها
:)

منطلقة بطموحي يقول...

خوش تدوينة :)
عيشتينا الجو
قواج الله
:)

Fankooshy يقول...

موضوع ممتع للغاية
تسلم ايدج وكاميرتج
لبنان جميلة ولكن الكويت اجمل
شكرا :)

هذيان يقول...

الله بالج طويل ؟؟



الحمد لله على السلامة

أسرار رجل يقول...

الله يسعدك دنيا وآخره

كم سعدنا معاج في رحلتك كان يالسنا وياك في السياره


وحمدلله على سلامتججججججج


دمت بحب
وحفظ من الله

Najmah يقول...

استكاااااااااااانة

الحمدلله على السلاااامة

شنو هالرحلة الخطيرة :)

بس ترى صج صج

رايي من راي عمي شنو تروحين وتخلينا
:)
والله انا خنقتني العبرة

عساج دوم سالمة ومرتاحة وفرحانة يارب

:**

بنت الشامية يقول...

كل عام وانت بخير

شنووووو صوغتنا من سوريا...بس من سوريا...ههههههههه
جمدالله على سلامتج وسف طريق الرحله ممتع
صج السفر بالسياره وااايد اونس من كل وسائل الموصلات الحديثه
قرت عينا فيج وفى بوستج
تستااااهلين يا استكانتنا

bin3li يقول...

راعي النيدية مخلي نعاله و ماخذ شفت الروم سيرفس و شاغل الخط
و لا شغلته الأصلية يقعد بالحمام يمسك كوز الماي
:P
الحمدلله على السلامة :)

lawyer يقول...

الف حمدلله على سلااااااااامتج

واي يافررررررررحتي في البوووووووووووست


استكااااااااااااااااااااانه


ببجي ببجي ببجي
من اليوووووووووووووووووووووووووووووووووووع


قلت والله لووووووووووو يايبه طاري زعتر او منااااااااقيششششششششش

جااااااااااااااان ييتلج اركضضضضضضضضضضض


ببببببببببببببببببببببببببببببججي


خسسسسسسسسسسسسسسسست من البيض و الستيك واللحم


قمت اتريق جبده

و اتغدا لللللللللللللحم



انا الفك المفترسسسسسسسسسسسسسس














واااااااااااااااااااااااااااااااااااااي
ولهت عليج




:**

بنت أحمد يقول...

مراحب استكانتنا

وااااو خطير البوست

والصور الأخطر

استمتعت برفقتك

:)

charisma يقول...

خووش رحله زيين سويتى رحتى ولا قعدتج بالكويت بهالاجازه الحلوه
علييج بالعاافيه
والحمدالله على سلامتكم
اما النعال النبديه لوووووووووول بدعو فيهااا ليش نيديه عااد
قطييعه حق الخموره وع
:/

والسوريين لا تعلييق يا استكانه خلينى ساكته

ولبنان حبيتها منكم مع انى ما شفتها محد سولفلى عن هالديره ذم شى فيهاا
حدى مشتهيا اروح
ان شاءالله تنكتب لى سفره لها

وولكم باك :*

abu eldestor يقول...

الحمدلله على السلامة
أهم مافي السفرة
فندق عرعر
عيل تقولين تلفون الروم سيرفس مشغول
لاتسيئين الظن
:)

Sweet Revenge يقول...

الحمد لله علي السلامه

اخاف عمج موديج بالسياره في باله احد بعرعر
ديري بالج اخاف كان يهيأج نفسيا
لا لا كلامه ماريحني :P

vancouver يقول...

اللفف الحمدلله عالسلامة يا استكانه

وعيييييييدج مبااااااارك

وخوووووش صور

بالذات لبنااااان

---


لو انا منج انام بالسياااااااره
ولا انام بالفندق العجيب
ههههه

بالذمة شنو حلمتي وانتي نايمه بغرفتهم

حلتيييييت مثلا
لووووول
:D



يعل بختج احسن واحلى من بخت رانيا
قولي امين
:))

Kuwait يقول...

الحمممممدلله على السلاااااامه :*
للحين العداد شغال يحسب حق وفاة الحريري ؟؟؟؟

THE BOSS يقول...

الحمدلله على السلامه

والله يخليلج الوالد والوالدة و يخليج لهم

وعطني ولعه

Zabo0o6a يقول...

الحمدلله عالسلامة يالغالية وعيدج مبارك ولو انها متاخرة :*

عثماني يقول...

اولا الحمد لله على السلامة

ثانيا مازلت مقتنعا بانك قمة الذوق .. الست من عشاق بيروت ؟؟

دمت رائعة اخيتي

الزين يقول...

احححم


عطوني مايك

بغني ... بغني


الحمدالله على السلامة يا جاي من السفر

وحشانا الإبتسامه وشك ولا القمر


يا قمر سماي انتي


وقرت عين الكويت كلها بطلة استكانتنا


:**


ولبيروت من قلبي سلام


وعلى فكرة الأم الفقيرة هذي قديسة عندهم

ولها كنيسة

ويقولون لها كرامات

عند المسايحه طبعا

والله اعلم

تعالي بس تعالي خل المج

:**

ARTFUL يقول...

ان حنينا ترا من زود ما احنا مشتاقين حق كتاباتج

الظاهر ثقلنا السموحه

عطله موفقه وعسى الله يسعدج

العيد مع البنوته عيدين

بس للاسف ماكو احد

الكل مسافر ما شفتي اهلي بلبنان

;p

kazmawy يقول...

حمدالله على السلامة يا استكانة التكانة ونورتى الديرة وعليج بالف عافية ياالغالية
يا حلاة لبنان وجوها والجبل والسوليدير..:)
الله يهنيج ويخليج لامج وابوج :)*)

Safeed يقول...

الحمد لله على السلامة
.
.
لفتت نظري صورة الفندق بعرعر .. 3 أسرة بغرفة وحدة ! المنظر يذكرني بعنبر محظوظة و مبروكة

`~MnO YeNSa! ~` يقول...

نورتي :*
يحلوج
و حلو سوالفج

كل شي بصوب
و هالفندق مادري
شلون !!!

استكانه

لا و الا
النيدية
مو صج



و قولي امين الله يكبر حظج
شنو ..رانيا
تستاهلين
موور

قاعدة اقول يا
ربي هالبنت من و خطفها
خفت عليج
:P

بس مكانج
فاضي
هالكثثثثثثثثثثثثثثثثر

esTeKaNa يقول...

هنوفي
~~~~~~~
حيالله الهنوفي
اشلونها الغاليه؟
عساج بخير؟
يا بعد قلبي قلبج وقلب دميعاتج ما كان قصدي اضيق خلقج
!!
مير انتي ما شفتيني
دموع والكحل واصل لي الحنج
ويوم سئلتني واحده من البنات اشفيج؟
قلت منتشله
:Pp~
الله يسلمج من كل شر وحياج الله

esTeKaNa يقول...

حسام بن ضرار
~~~~~~~~~~~~~~~
الله يسلمك من كل شر
احنا سيارتين قاعدين نتماشى ودالين الدرب تقريبا
والجي بي اس استعسر علينا بسوريا تصدق
!!
مو راضي يشتغل
:(

esTeKaNa يقول...

MA6GOOG
~~~~~~~~~
ياهلا ويا مرحبا
الله يسلمك من كل شر
وعسى يكون لك نصيب برؤيه ماهو احسن ان شاء الله
:)

esTeKaNa يقول...

mtfa2el
~~~~~~~~~~
ياهلا ويا مرحبا بالمتفائل
:)
قبل يا اخيي الكويتين بسرعه يسمون
على المنطقه
على الحدث
على اي شي
!!
شرايك ان في واحده انولدت بعيد الاضحى ابوها سماها ضحيه
بشده على الياء
يعني مو ضحى
لا ضحّيه
:))
وتكرم عينيك؟
بعد بعد
طلع اللبناني
:Pp~

esTeKaNa يقول...

enter-q8
~~~~~~~~~~
ترا عندي كرت الفندق مال طريف
اسمها المدوح
اذا تبي تحجز فيه حق عطلة الربيع مثلا
:Pp~
الله يسلمك من كل شر

esTeKaNa يقول...

qesat 5aYal
~~~~~~~~~~~~~
حيالله قصه خيال
اي والله اهم شي السهاله وعدم العساره
وعسى ربي يسلمج من كل شر
:)

esTeKaNa يقول...

nikon8
~~~~~~~~
hehehehehe:)
بالضبط جو ستاراكاديمي
بس خفت اكتب اني عشت هالجو بهالفندق وننضل
:Pp~

esTeKaNa يقول...

منطلقة بطموحي
~~~~~~~~~~~~~~~~~
حياج الله
:)









Fankoshy
~~~~~~~~~~~
هذا من ذوقك اخي العزيز
استمتاعك بالبوست اسعدني
وحياك الله دائما
:)








هذيان
~~~~~~~~
اي اسم الله علي
بالي طويل
:Pp~

esTeKaNa يقول...

أسرار رجل
~~~~~~~~~~~~~
حياك الله وهذي الساعه المباركة
الله يحفظك
نورت البوست
:)





Najmah
~~~~~~~~
يا بعد قلبي قلبج يا النجمه
:***
سامحيني على القصور
سافرت بسرعه ما مداني اقول حق احد
وقلت فرصه اجرب غلاتي
:))
الله يسلمج من كل شر

esTeKaNa يقول...

بنت الشامية
~~~~~~~~~~~~~~
ياهلا وأمية هلا
بشيخة الشامية كلها
:**
صوغه سوريه
أبلات فيزيا
هذيله اللي شفتهم صراحة
:Pp~
وتصدقين السفر بالسياره متعه بس ما ادري ليش انا كنت حيل متخوفه منه
!!
حياج الله يا الشيخة
:**

esTeKaNa يقول...

بن علي
~~~~~~~
HAHAHAHA
تفسير منطقي
:pP~
الله يسلمك من كل شر











lawyer
~~~~~~~~~
هههههههههههههه
ههههههههههههههه
ههههههههههههههههههه

واي غشيت غشيت من الضحك
شخباري لحوم
حاولت حاولت قد ما اقدر هناك بس ما قدرت
يعني شنو اتريق؟
شنو اكل بالسياره؟
ما اقص عليج حاولت بس اخر شي خرتها وبعدين يعني اشلون اروح لبنان ما اكل مناقيش ما يصير
:)))
بس عفيه عليج انا متأكده الحين صرتي دق العوووود
:**
يا بعد قلبي قلبج توله عليج العافية يارب

esTeKaNa يقول...

بنت أحمد
~~~~~~~~~
حياج الله يا بنت أحمد
:)












charissma
~~~~~~~~~~~~
هلا وغلا
حيالله من يانا
:**
واي موتيني من الضحك على النيديه
بس تصدقين تحسينها انتيك
الله ياهي عتجية وملبوسه
ظيم ظيم
:Pp~
وصج صج انتي على مزاجج
ورمانسيتج
لابد يبيلج لبنان بالشتا راح تحبينها
:))

esTeKaNa يقول...

abu aldesator
~~~~~~~~~~~~~~
الله يسلمك من الشر
ياربي صايره شريره كله اسئ الظن
:Pp~
عاد تصدق انا بالرسبشن شفت موديلات من الشباب ذكروني بأول ما هبو القنوات اللبنانيه والأي ار تي
واللي يدقون عليهم من مناطق نائيه وساحيني على عمرهم
:pP~
وموديلات لا تبع شاعر المليون
:))
وبظل ما اسئ الظن

esTeKaNa يقول...

Sweet Revenge
~~~~~~~~~~~~~~~~
الله يسلمج من الشر
!!
تهقين؟
يمه يمه اسم الله على قلبي
لالازم اصير حريصه بعد خوفج يتم نفيي لذاك المكان
وتفقدون استكانة وبلوقها
:Pp~

esTeKaNa يقول...

Vancouver
~~~~~~~~~~~
ياهلا وأمية هلا
عاد شوفي
مو يعني قاعده بفانوكفر تعيبين على عرعر
!!
كافي انها عرعر
وبعدين واي ما نسيتي الحلتيت
هههههههههههههههههههه
هههههههههههههههههههه
وااااي كسرت خاطر عمري
يسلمج خليني ناسبه الحلتيت
لا نيب طاريه خوفج احلم فيه
:Pp~

وايامج سعيده والله يسلمج يا الغاليه من كل شر
:**

esTeKaNa يقول...

KUWAIT
~~~~~~~~
الله يسلمج
اي للحين
ومصورته بس حسافه الصورة مو واضحه
:(










The Boss
~~~~~~~~~~~
الله يسلمك
وامين ما قصرت
:)

esTeKaNa يقول...

ZabOoOo6a
~~~~~~~~~~~~
الله يسلمج يا الغاليه
وعسى ايامج كلها سعيده يارب
:)






عثماني
~~~~~~~~~
الله يسلمك من كل شر
وقمة بالذوق مرة واحده؟
يا بختنا
:)
قليل مما عندكم اخي العزيز

esTeKaNa يقول...

الزين
~~~~~~~~~
وي وي
يا زين الصوت وراعيته
فديت هالصوت انا
واي ما شفتي ويهي ما شفتيييييه
الكشرة من هنييييييي لي عندج والله
:***
الله يسلمج من كل شر يا الغاليه
اشلونج؟
شخبارج؟
الله يا بقلبي كلام يا زيوووون
بس نطري خنلاقيج
:)))
ولهانه كبر الدنيا
وهالأم الفقيره مو هينه كرامات بعد؟
:Pp~

esTeKaNa يقول...

ARtful
~~~~~~~~~~
لا افا عليك يا اخوي
حشا ما ثقلت علينا
انا بس حبيت اشرح لك الاوضاع
:)
يا زين العيد ويا البنوته والله
يقولون افتريتو بس عشان بدلتها
:Pp~
عسى ربي يبلغك فيها عروس
قول امين

وحسافه ما شفنا اهلك
جان نقلنا لهم سلامنا الخاص
:pp~

esTeKaNa يقول...

kazmawy
~~~~~~~~~~
ياهلا ويا مرحبا بالكظماوي
عسى ربي يحفظك ويسعد لي ايامك
ويبيلك روحه لبنان ولا شرايك؟
:)










safeed
~~~~~~~~~
looool!
صاج الوضع كان وضع عنابر
:Pp~
الله يسلمك من كل شر











MNO YENSA
~~~~~~~~~~~
ياهلا وأمية هلا
حلت دنياج دوم يا للي لسانج يقطر عسل
:)
يا بعد قلبي قلبج
انا ما كان قصدي اغط فجأة
بس اهي الظروف يت بهالطريقه
!!
وقولي امين
عسى ربي يكبر حظج ويسعدج ويرزقج اجمل من كل ما تتمنين قولي امين
:**

ZooZ ZaibG يقول...

بمجرد ان افترضت...كسرت خاطر روحي

لووووووووووووووووووول

اما موضوع النيديه
امبيه بغيت اموت من الضحك
دمعت عيني اله يقطع ابليسج
ههههههههههههههههه


تدرين
عمري ما رحت لبنان
بس وربي حبيت اني ازورها من بوستج
ياربي شنو رقيقه سنفورتنا

روحي يا استكانه
يارب مرت عمج تفاول عليج بخير
ويصير فالج من فال رانيا

ما تلاحظين اغلب المشاهير بدوا بالكويت؟؟

ZooZ ZaibG يقول...

على فكره
نبي بوست درب الرده
ماكو؟

esTeKaNa يقول...

Zooz
~~~~~~
ياهلاو أمية هلا
:**
اخيييه يا زوز لو شايفه ذيج النيديه
مو عاديه
متعقه
تحسينها أنتيك
لوووول
يا عساج دوم تضحكين وفرحانه

وصاجة انا بعد ملاحظة وايد مشاهيير بدو من الكويت
الله يعافي حولي والسالميه
اشرايج نروح نسكن هناك؟
:pP~
ويااا بعد قلبي قلبج
تبين بوست الرده؟
قعدنا في فندق اكشح من هذا بنص نجمه
الله لا يوريج
حفاظا على مشاعركم ما كتبته
:))
ولبنان حلوة
روحي لها بالشتا
وما راح تندمين
بس تبين نصيحة؟
اساسرج بيني وبينج
روحي معه يور هازبند وايد احسن لج
الديرة رومانسية
:pP~

ZooZ ZaibG يقول...

الحين انتي تروحين مع عمج
وتبين ادورلي هزبند
ماميش هههههههه

رحت روما بروحي
وهناك ام الرومانتيك
اخييييييه يم النافوره
وتقطين فلوس وتتمنين
والاوادم كلهم كبلز
كلهم ييجوا بالجوز كده

وتبيني ما اروح لبنان
ياوخيتج اخذج واخذ اميمتي واميمتج
ونطيحله مناقيش
لوووووووووووول

وبعدين سمعتي عن زينب العسكري؟

esTeKaNa يقول...

zooz
~~~~~~
لا انا عمي عقب ما قالي افترضيه بعرعر
وانا مجروحه منه
ماني رايحة معاه مرة ثانيه
:Pp~
ويااا بعد قلبي قلبج
شموديج هالنوافير؟
جان حذفتيهم بالخرده
:)))

بس مالج شغل يا زين يمعه البنات والوناسه
:pP~
اشفيها زينب العسكري؟
عسى قصت شعرها
:)

ZooZ ZaibG يقول...

وي لااااااااااا
ما دريتي
لوووووول
سوالف بنات وحش

اعتزلت وفلت شركتها
بنت المملكة للانتاج الفني
واعطت الحرية لكل اللي محتكرتهم

ليش؟
تزوجت وااااحد بيق شوت اماراتي
وقالت ماراح تقول منو
خاشته للعرس
وبتسوي عرسين
بالبحرين والامارات
ومع العروس بنعرف منو

وخلاااااااااص
الله استجاب دعوتي برمضان
اني ما اشوفها برمضان الياي
لووووووووووووول

esTeKaNa يقول...

zoooz
~~~~~~~~
من قريت ما دريتي
رحت يبت حب وفستق وييت
:Pp~
ماااااشاء الله
الحين دام دعائج مستجاب
واقصى امانيج انج ما تشوفينها
جان سكرتي التلفزيون ودعيتي دعاء اهم
لووووووووووووووول
بعدين تصدقين
انا من زمان قايله
اللي تبي تضعف
اللي تبي تحلو
اللي تبي بج شوت تصير فنانه
ياربي تثبتني ياربي
المغريات وايد يا زوز
:pP~

ZooZ ZaibG يقول...

اي ياخيتج
انا ذاك اليوم حسيت بفراغ
قمت رحت الجمعيه ماكو فايده
رديت طالعت موفي ماكو فايده
دشيت خذتلي شاور ماكو فايده

عاد كنت ها على طريف بصير فنانه
لوما اني كنت نعسانه
قلت ما تسوى عيزانه
لووووووول

الله الحافظ
ياختج ما نبي البيق شوت دامه من ورا الفن بو نص هذا

Manal يقول...

مساء الخيرات يا احلى استكانة
:)

عليج بالعافية

وان شاء الله دوم مستانسة
:)

بس ما مريتي علينا ؟
!
:))

دام طالعة من الديرة ومريتي سوريا والاردن
انجلترا تكون حذفة حصى منهم
:))

مـــــي يقول...

اسكتانه موضوع لطيف
بس حبيت اعلق على سالفة عرعر وعفيف
الحمدلله مابشروه بالبنت وهو في منطقه في الشمال اسمها "سكاكا"هذا لو اختاره غير قابل للتعديل
:P

ولد الديرة يقول...

حمد الله على السلامة

والله انج مغامرة نمرة واحد
!

السفر بالسيارة متعة ما بعدها متعة خاصة عندما تكون الرفقة طيبة مثل ما حصل معك

عرعر ترى تصير بودابست على ظُلم و حنيذ وغيرها من محطات التوقف بطريق الحج

الله لا يخليك من الغاليين
:)

على الطاري

انا مرة وقفت بريتز كالرلتون من طقة الفندق اللي قعدتي فيه

بنص الليل طلعت كملت الليلة بسيارتي

ما اذكر ليش غير اني شيء دبى علي
!