السبت، نوفمبر 22، 2008

حصيلة اليوم


أجمل إحساس بالكون..أن تكون أنته ونفسك أصدقاء
!!

لا تنتظر أن يأتي لك من يدللك

يحبك

ويرافقك للفرح

استغل الوقت..استمتع بكل اللحظات

.

.

.
اليوم السبت...يوم الكسل العالمي عندي

قررت مقاطعة كل المواجيب والمشاوير التي قد تسبب اي كلفة علي

والذهاب لمعرض الكتاب مساء السبت

!!

بدلت على رواق،فلا أحد ينتظرني وممكن ان ينعتني بالثلجة

خرجت وأنا اسمع تحطلم أمي:

اي نطري احد يروح معاج ليش بتروحين بروحج؟

بروح يا امي بروح

أنا انتظرت أزمان في ظل الوعد

أحسب الخفقات يا أغلى وعد

انتظرت والظاهر انك يا وعد ما جيت

عيا عليك الوقت ولا..يا وعد عييت


.

.

.

.

معرض الكتاب
!!

زحمة لم اكن اتوقعها،اعتقد ان الزواره اليوم كانت بالمعرض

أوقف سيارتي بعيدا وادخل من بوابه خمسه..خمسه.. خمسه

نعم عيزت وانا ااحفظ نفسي الرقم لأني معهوده بسالفه تضيع المصافط

تميت فتره وأنا اتأمل الكتب دون ان يجذبني أحدها

شعرت بالغضب من نفسي،فكان يفترض أن أقرأ الدليل قبل ان اشتري

بينما كنت في حاله هوشه مع نفسي مر من أمامي شخص يرتدي بدلة سبورت

ومعاج حقيبه صغيره يجرها بيد..ويده الأخرى فيها ورقه يقرأها ويبحث

!!

لبرهه من الوقت كنت اناظر تلك الحقيبة وافكر...ليش ما يبت معاي جنطة اسحبها؟

مشالله عليه بو قليب يايب جنطة وقاري الدليل

!!

قاطع تسلسل افكاري تعبيرات وجهه المتفاجئه:

استكانة!!مسااااااء الخير عاش من شافج


ابتسمت ابتسامة غبيه،فقد كنت اتأمل البدله والحقيبه دون ان المح من يرتديها

وكان ابن خالتي

!!

ابن خالتي مثقف جدا،ذو قلم لاذع وكاتب مميز

انا معه خطين متوازين في الافكار مختلفين اختلاف تام

ورغم ذلك احترمه جدا...ويحترمني اكثر

مصادقة المختلف تضيف لنا الكثير

استغرب تواجدي لوحدي في المعرض وفسرت له ذلك بأني اريد البحث عن أمور معينة ولا اريد حمل هم أي احد يتملل من بطئي وانا اتأمل وابحث في الكتب

عرض علي مرافقتي...وجدت بنفسي احساس غريب:

لا اريد طبعا

فأنا اخجل طبعا من مرافقته

!!

تعبيرات وجهي كانت واضحة،حملته سلام لخالتي

ونصحني ببعض دور النشر

وافترق كل واحد منا بطريق

.

.

.

.

كراسات ورسومات أطفال...كتب طبخ...كتب أبراج

تلك باعتقادي اكثر الكتب مبيعا

!!

أضف اليها كتب :

كيف تكون مقنع

كيف تكون سعيد

كيف تكون آدمي

كيف تاكل

كيف تتكوكس

!!

نعم احترم تلك الكتب جدا ولا انكر اني اشتريت احدها ،ولكن استغرب تواجد هذه الكتب بكثره وبيعها بطريقه اكثر

هل كل شئ في الدنيا يحتاج قواعد وافكار مقننع نسير عليها لنصل لها بالنهاية؟

قرأت عنوان كتاب:كيف تكسبين زوجك ؟

فكرت..هل كل الرجال ممكن ان نكسب حبهم بذات الطريقه والاسلوب

اعتقد الموضوع هنا نسبي...والنسبه الكبيرة فيها للاحساس

.....

.عجبتني مجموعه من الكتب الدينية..ولكني تخوفت من شراء اي كتاب من أي مكتبه

نحتاج عقيده قوية وعلم شرعي كافي يعطينا القدرة على قراءه كل كتاب وتنقيته قبل استيعابه

فهناك من يضع الخبيث مع الطيب لنقرأه كله دون أن نشعر

وطالما اني لم اصل لهذا العلم الشرعي المعقول...تخوفت من شراء اي كتاب ديني

.

.

.

كنت اقلب ببعض الكتب حين وقف بجانبي شايب من الذين اذا رأيتهم قلت:

يا حليلهم من هل الله

!!

جريمبه ودشداشه معفسه ويسئل صاحب المكتبه:

لو سمحت عندك نكت مصريه؟

ويضحك

!!

ضحكني ان يضحك وهو ما لقى كتاب النكت الله يعين لو لقاه

:Pp~

قضيت أكثر الوقت في جناح الكتب المصرية واللبنانية

وأخذت عناوين تلك المكتبات التي استمتعت فيها ووجدت فيها ما ابحث عنه

استمتع بروؤيه بعض المثقفين القله بأعمار كبيرة يسئلون عن بعض الكتب التي لم نسمع حتى فيها

!!

تشعر باهتمامهم الفعلي بالقراءه

انتقلت للصاله الثانيه التي تضم الجناح الكويتي، هيله وصيحه

وبنت على أعتاب المراهقه تقول لأمها:

احلى شي بمعرض الكتاب ايس كريم المكينه احبه

ضحكتني

:)

كنت اقرأ فهرس كتاب في ذات السلاسل

حين رفعت عيني لأكلم البائع وجدت شخص يقف بمواجهتي تماما ،يطالعني دون اي تعبيرات في وجهه

خرعني

:(

تركت الكتاب وتحركت سريعا لمكان آخر

اختفى..الحمدلله

في مكتبه أخرى اكثر هدؤا كنت ابحث عن كتاب آخر،ووجدت وجهه يطل علي بين الرفوف

لوهله..تذكرت أغنية رويشد قديمه...كان وما زال يضحكني تصويرها:

كلمتني قصدها لفت انتباهي

شاغلتني...قبلها مرتاح ولاهي

!!

التصوير كان في مركز سلطان السالمية،وكان رويشد يطلع بين الرفوف

وترني ،أفقدني استماعي وقدرتي على التركيز،وليس بسن صغير،يفترض انه تجاوز سنه المراهقه والشخاطة

شعرت بأن أطراف يدي ترتجف...اعترف بأني جبانه جدا

نصحني ابي مرارا ان كنت خائفه او متوتره ان احاول التحكم بتعابير وجهي وتصرفاتي

حتى لا يطمع بخوفك احد

اتصلت على ابوي:

السلام عليكم ورحمه الله وبركاته

يبه انا في معرض الكتاب وفي احد المشاركين في شاعر المليون يمشي وراي شسوي؟

صدر أمر أميري من صاحب السمو أبوي بترك المعرض والخروج من اقرب بوابه للبيت

بصراحة...احتريت :(

بينما امشي بخطوة سريعه متوجهه للباب،اكتشفت اني نسيت مكان الباب

عندما اكون وحدي امشي بخطوة سريعه جدا

والظاهر الاخ العزيز تعب،سئلني:

الحين اشلون تبين ولا ما تبين؟

اكملت مسيري وانا افكر:

ابي شنو؟

طالبه حلوم انا

!!

بعد اتباع سياسه بو حقور مع هذا المتطفل

اتصلت على ابوي للمرة المليون

وكان حينها قد رحل...فتم سحب الأمر وقررت اكمال المسير

اللهم لك الحمد

.

.

.

.

.

.

راسها كبير،تتلامع فيه حبات الستارس ...تقف بدلع على جنب واحد

وتشع كاميرات التصوير بفلاش قوي تلتقط ابتساماتها

يحاط بها المصورين...ويناظرها كل من يمر

وانا اللي مستحية مادري شكو

!!

تاخذني اللقافه لمكانها لاكتشف بأن تلك الشابه التي تصغرني عمرا هي كاتبه

كاتبه لروايه نسيت عنوانها قرأتها قبل سنه

موضوعها عن بنت في كليه العلوم تتعرف على شخص كويتي أثناء الصيف في لندن وتحبه وتدخل معه في علاقه تليفون

وتخرج معه في ربوع الاحمدي وتحبه بضمير وترفض من اجله الخطاب،وهي الجميلة بنت العائله الكبيرة والتي هي حلم كل شاب

يقنعها انه يدرس ماجستير في لندن و

تكلمه..وتكلم ولد خالته ورفيجه وما بقى احد ما عرفته

وتالي عقب ما استهلك مشاعرها

وخذا فلوسها

يحقرها

وما يرد عليها

تكتشف انه بدون ومتزوج ومقيم في لندن

وتفاصيل سوالف سخيفه

واثناء هذه السوالف تطلب منا الكاتبه الاستماع لأغاني جواد العلي لتخيل القصه وفهم احداثها

وتكتب بالأخيرملاحظة القصه حقيقية

!!!

اهديت القصه لأحلى انجنير ...واترك لها التعليق على تلك الاقصوصه الخربوطية

:pP~

عندما رأيتها توقع على روايتها والناس من حولها تخيلت نفسي

اجلس على كرسي وجدامي استكانات والناس من حولي

يا سلاااااام

.

.

.

.

مكتبة أخرى سوداء...اسمها دايموند للنشر

شكل المكتبه غريب،واغلبها كتب خيال علمي لكتاب كويتين وقصص اجتماعيه لكتاب آخرين

جذبني شكلها،وقفت اقلب بالكتب واستفسر من الشباب الموجودين عن احدث ما لديهم

احدهم كلمني عن كتاب معين وشرحه لي وأراني صوره الكاتب

الكاتب حواجبه دقاق وصورته أرق من صوري

!!

قلت هذا الكاتب؟

تعبيرات وجهي توقفت قبل ان اكمل التعليق عندما وجدته جالسا وراء البائع

ويسمعني وهو منتفخ وفرحان

قال لي البائع ببفرح:

اي موجود اذا تبين يوقع لج باسمج

شكرته بأدب وتركته هو وتوقيعاته ورحلت

انا اخر من يهتم بتوقيع كاتب فأنا حتى في مراهقتي لم اعجب بأحد

لا كاتب...لا شاعر...لا لاعب

اعجب بأفعاله..ولكن لا علاقه لي بشخصه

ربما لأني لم اكن أؤمن بحب المستحيل

فكنت افكر احب الكاتب ليش؟أ

هو بيعرفني ولا يحبني

!!

مممم شطحة أخرى في ربوع المعرض

.

.

.

كنت اريد ان اكمل،ولكني شعرت بأني لابد ان اتوقف

فالأكياس بيدي اصبحت ثقيله جدا

رجعت لسيارتي وانا سعيده.....إحساس اقتناء بعض الاشيا بالنسبه لي جميل

!!

مريت جمعيه مشرف...فأنا محتفله بوجود التوفي نت لاتيه هاليومين

قهوة

وشراء ماجلة المكتب للاسبوع الجديد

غدا يوم الأحد

اتمنى لكم اسبوع جميل


هناك 44 تعليقًا:

JuVeNTiNa يقول...

يحلييييلج يا استكانه
والله خوااااافه !!!

بس خوش روحه والله

حساااافه انا ماقدر اروح ليلحيين بالنفاس

انا افضل الكتب التاريخيه

او قصص لتجارب حقيقيه

مو روايات و حب


اما بالنسبه للكتب اللي كيف تعاملين زوجك و كبف و كبف
احس انها مو صج كلش

لان الانسان مو جهاز او آله ماله كتاب تعليمات
كل واحد غير عن الثاني


والمرة اليايه خلج قويه :)

ميرامار يقول...

احسن شي انج رايحة بروحج

وايد اريح واروق
على كيف كيفج

تقرينهم بالعافية

THe SUn SHiNe .. يقول...

:) يا حلو حظي والله
Comment 1 =P
-----------------

ضحكتيني بسوالفج استكانة
عاد لا الشايب اللي يبي كتاب نكت لووووووووول


أبي أشتري رواية .. شنو أحسن الروائيين اللي تنصحين فيهم ومروا عليج؟

لأني بصراحة دشيت المكتبة .. أوووب أشكاال من الأوادم كلمن هب ودب طلع كتاب ولا رواية

والمشكلة عقب ما شريت الرواية .. حسيتها سلسلة وسرد و الإنحطاط!!

ياليت تعطيني من الأسامي السنعة .. اللي ينشهد لها بالكتابة الزينة ..

كيكيكيكي .. استانست وآخر شي أغلبوني عالكومنت

الخيلاء يقول...

ابي اروح ..

ماعندي وقت

بس ضحكني الي تبين ولا ماتبين
حتى بمعرض الكتاب والله فراغه

صاجه اغلبه طبخ و ابراج
و كراسات التلوين الكبار

عفيه شسم القصه الخربوطيه
اول مره اسمع عنها

و بدايه اسبوع سعيده
و حافله و منجزه لج و لي ان شاء لله

:)

QiYaDiYa يقول...

السنة الي طافت
كان قراري حازم في شراء الكتب الي احتاجها فقط !!

و الي ما راح احصلها الا بالمعرض


هالسنة احتاج جم كتاب موجودين بالكويت بس مأجلتهم الى وقت المعرض مثل ما يقولون زلقة بطيحة ;p

و ان شاء الله اثبت على قراري هالسنة ;p


اما سالفة شاعر المليون !!
لو انا منج
اموت ضحك !!

شخباري واحد يلحق !!
و بعدين ما لقى مكان الا معرض الكتاب !!
صج فاضي !!

;p


عيل بقولج سالفة
السالفة طويلة بس بقولها ;p

قبل فترة قصيرة
اول ما تعدل الجو

عندي بريك الصبح و رحت سوق شرق
شريتلي قهوة و قعدت اقرا كتاب و بعدين قمت اصور !

طوووول ما انا اصووور
و واحد شكله هيليقي يلحقني !!

انا كنت بستاربكس
مشيت لي الجسر

و هذا يلحق

قلت مابي احط بذمتي
يمكن طريجه نفس طريجي

و انا رااايحة اصور ولا لي شغل فيه

بعدين رحت لي المواقف هم قاعد يلحق

تعوذت من ابليس و سويت روحي مو شايفته !!

و انا امشي دقت رفيجتي و قعدت اسولف معاها
وصلت السيارة جان اييني

يقولي لو سمحتي ممكن تسكرين التلفون !

انا مااا اغشمر بالسوالف هذي
انا متصروووعة حددددي ايي

بس سويت روحي قوية

قلت له لأ !
شتبي !!

قالي سكري التلفون !
قلت له ما راح اسكره و انا احوووس اغراضي باييدي و تلفون و جنطة و كاميرا
و السيارة الي يمي لازقة بسيارتي
تعرفين الي يالله اطووف
و هالمرة اغراض و واحد لاحقج!!
و يطالعج من فوووق لي تحت

انا متصروعة لو يخمط جنطتي ولا كامرتي اروح فيها !!

ولا الاخ قاعد يطر !!
يقولي ابي فلوس
و انا مريض و مادري شنو !!

اقول بقلبي مادري شاف الكاميرا و عباله مليونيرة !!

قلت له اسفه ما اقدر اساعدك !!

بس ركبت السيارة قفلت الباب
مادري شلون سقت بس ابي اطلع ;p ;p



اما التوفي نت لاتيه !!
هذا شي ثاني
خل اسكت لا اكتب فيه شعر ;p ;p


بصير ذربة و بقول
عذرا على الاطالة اختي الكريمة ;p ;p ;p

Manal يقول...

فن الاقناع
الكتاب الي على الطرف شكله خطير

:)

صبا يقول...

الله خوش رحله

فيها الاستفاده
عليج بالعافيه الكتب

زين سويتي رحتي بروحج

علشان تاخذين راحتج بالفراره بين الكتب ...ومحد يقولج طاحت ريولي ...تعبت ....متي انروح البيت

:)

abu eldestor يقول...

شاعر المليون ها
يلا أحسن من مشارك بقلطة الوطن

ARTFUL يقول...

آآآآآآخ يا الفرايه

والله اختربت ما قمت اقرا
والله ضايق خلقي من نفسي

يعني ما يصير اذا فضيت لازم اطلع ما افكر اقعد اقرا كتاب

ماني اعرف شنهو اللي ابي اقراه
ابطل روايه اقرا واصكها
ابطل مجله عن الاقتصاد شوي واسكرها

لازم الزم نفسي

وودي اروح حتى لو ما اشتري شي يمكن اتحمس ارد حق القرايه

يس على سالفة كيف تخلين ريلج يحبج وهالسوالف

انا اكرهم
لييييش خاصة الزوج والزوجه
ممكن تاخذ افكار بس تقعد تطبق على صغيره وجبيره
مصيييييبه
لان الكاتب ما يعرف مرتك اكثر منك
ولا يعرف شتحب وتكره
انت اكثر واحد تعرفها واهي اكثر وحده تعرفك

للاسف بدت تقل الكتب القيمه

الله يسعدج ويحفظج

bin3li يقول...

و أخيراً اشتريتي ذا سيكرت؟
:)

ابو لطيف يقول...

امتعتينا

متعك الله بالايمان والطاعة

دائما رائعة

حفظك الله

. . . ساخر كويتي يقول...

رحلة الى معرض الكتاب

وفي باطنها لفتة اجتماعية وحيرة اساسها الدين والعادات والتقاليد

ولكن بالنهاية عملتي ماهو صحيح
وبمايرضي جميع الاطراف :)

**معرض الكتاب مارحته لحد الحين خوفا من الزحمة ,,, وباذن الله هاليومين بزوره :)

**انواع الكتب العبيطة واللي تفسر الماء بالماء يا كثرها وعلينا الابتعاد عنها احتراما لعقولنا

** حلوة سالفة الشايب الله يديم عليه السعادة يا رب :)

** بس سالفة ""تبين والا ما تبين؟؟ شنو طالبة حلوم انا "" فطستني من الضحك هههههه
أو على قولتك واحد من جماعة شاعر المليون هههههههههااااي قوية

بوست جميل وممتع
تحياتي

Sweet Revenge يقول...

عليج بالعافية كتبج والتوفي نت لاتيه
بس ملاحظتج بمحلة الحين كل من حك راسة كتب كتاب ,استغرب شباب وبنات باعمار 17-18
اي شنو خبرتك بالحياة شنو انجازاتك ,الي راح تتكلم عنها

Ra-1 يقول...

أحلى شي روحة معرض الكتاب بروحج
بس خوفتيني على إلي يخز :p


ترا ذا سيكرت مو شي!
الكتاب خذا ضجة ودعاية أكبر من حجمه :/

Najmah يقول...

صباح الخير ياويه الخير
صباح الفل والنوير
صباح الشوق
ولحن الطير
صباحك غيير
سوالفك غير
استكانتك غير
لأنك غيييير
:**

شرايج فيني وانا مشتاقه من الصبح واشعر فيج
واشرب توفي نت لاتيه
وانا اقرا بوستج
:))

ترى رواية سقف الكفاية عجيييييبة
مو طبيعيه
وكتاب فن الاقناع شاريته قبل مادري جم سنة بس ماكملته
:))

ابيه سمعي
انامعرض الكتاب ماحب اتمشى فيه الا بروحي
حتى لو رحت مع احد امشي بروحي
لأني جدام الكتب ماحب اتقيد بأحد ولا احد يتقيد فيني
امس كنت مقررة بالليل اروح
بعدين تذكرت ان السبت زحمة
وانا ماعرف اشتري بالزحمة
وتذكرت سالفه المعرض اللي طاف
تخيلي
كنت رايحة بالويك اند
واتمشى على راحتي
وفجأة القى واحد يدخل بين الناس ويدعم فيني
!!
التفت عليه وكملت طريجي
ابتسم لي ابتسامة خبيثة
صرقعتني
وبعدها
والله كل ما امشي بممر يطلع بويهي
كل ماوقفت عند مكتبة وقف يمي
وكل مادخلت نفسي بين زحمة الناس
دخل نفسه غصب مني
مت من الخررررعه مت
والمشكله انه كبيييير
يمكن ساعه كامله على هالحال
اكلم بنت خالتي بالتلفون وخانقتني العبره
وطبعا لأني بهالمواقف افقد القدرة على التركيز
مادري شنو قال
ومادري شنو بنت خالتي تقول
ومادري وين البوابة
@@
وفجأة وانا ادور البوابه عشان اطلع
القى احس بإيد تمسك ايدي
انا وقف قلللبي
يوم لفيت ويهي
ولا خالي يسلم عليي
خليته يوصلني لما سيارتي
ورديت البيت بأمان
:))

استكانة
من زمان ماسولفت اهني
ييت لميت هالبوست
:))

يوم سعيد صديقتي\:*

الوتين يقول...

انا زرت معرض الكتاب بس قبلج السبت الصبح
زحمة و موت حر
أهم شي عندي جناح لبنان و مصر
رجعت البيت أفر بالريموت الا ليلى العثمان و تكتمل الثقافة
نتشارك انا وياج بسقف الكفاية

molok يقول...

اذا بتروحو المعرض فالافضل ان تكون بروحك .. بس فايدة ان يكون واحد معاك ، ان ينصحك بكتب قد تكون انت جاهلها من قبل ..

بالنسبة حق هالنوع من الكتب فان رايي مثل رايج .. وهو ان هالكتب ماتناسب الكل .. ولذلك انا مالي اي شغل فيها ..

المشكلة هالايام ان مثل ماقلتي صار الكل يكتب قصة او رواية .. ونبتلش ماندري منو الزين ومنو الهاردلك ..

زيارة موفقة .. ونتمنى لك قراءة كذلك :)

عثماني يقول...

ما ادري شعلق عليه استكانة

شدني الموضوع واخرتيني عن شغلي

على بساطة البوست الا انه ممتع

تونس سوالفج

و الحبيب مال شاعر المليون .. جان صبيتي له حولة .. و قلتي له انت وش تبغى ؟؟

:)

Fskra يقول...

alah i liked your post :D

cheni ga3da atmsha fe el m3rth i really miss it walah :(

bs walah 9j wanseteni eb your post o enshalah tkon e5tyaratch 7g el books tkon 3jeba ;)

mo shay etha shretay ktab o a5r shay ma tgdren tkmlina mn kthr ma ena sa5ef :/

mwafga :*

|:| DUBAI |:| يقول...

استكانوووو

من ورانا؟

أكيد كنتي مجحلة عيونج

اعترفي

خخخخخ

احساسي يقول راعي الشنطة

من نصيبج

لا تقولين لا

ترى يمون

: )

!!

Barrak يقول...

كيف تتكوكس

ههههههههههههههههههههههههههههههههههههههههههههههههههههههههههههههههههه

ههههههههههههههههههههههههه


بس عجبني الباركيه اللي بالصوره

7osen يقول...

خوووش بوست عجييب
سوالفج حلوة

انا رحت معرض الكتاب يوم الخميس اللي طاف يعني ثاني يوم من الافتتاح على طول

والله ما كان زحمة حيل كان الجو حلو والمعرض فاضي تمشيت على كيفي وشريت على كيفي
بس طبعاً روحة وحدة ما تكفي
لازم اروح ثاني مرة


رواية سقف الكفاية

قريتها قبل فترة قصيرة
عموماً حلووة
لكنها مثل ماقالت مس تنغل إللي بالرواية مجرد عاشق اخر

يعني الرواية يمكن 400 صفحة وشي
ممكن تختصر إلى النص
لأنها تدور في فلك واحد واحداثها جداً بطيئة

لكنها بشكل عام ممتعة وتبقى بالذاكرة

---
حلوة كتب القانون
اختصاصج لازم تكونين على دراية كاملة بكل تفاصيلة وخفاياه

---
تبين رواية حلوة تقرينها

مدن تاكل العشب
حق عبده خال

احسه مجنون هالكتاب
عجيييب

------
ضحكتيني على شاعر المليون
جان حاذفته بأي شي بيدج
ههههه

يعطيج العافية

mtfa2el يقول...

معرض الكتاب
و الله رحت له مرتين و يبيله بعد مرة عن الحسافة
انا نوعيتي اشقل كتب بعدين اتطمش عليهم بالبيت ..عن الحسافة لأن ساعات اشوف الكتاب اشتريه ما اشتريه اخر شي أأجل و ماالقاه مرة ثانية
فاشتري و كل كتاب في الغالب تحصلين منه فايدة مني ولا مناك
خل أعطيج عيل لستة كتب حلوة تحصلينها بالمعرض بس كل شي بحسابه
:p
سقف الكفاية قريت يمكن 40 صفحة بس ..كئيييبة و احس الكاتب وايد يتحلطم جنه عيوز بايقين عشاها
بغيت اعطيه افا اقول له
أصحى يا نايم !!
بس ما كان يمي حسافة
يمكن تعجبج بعد ما ادري
..
شاعر المليون ..ذكرتيني باللي لحقتني ذاك اليوم و تقولي ..لا صج ما اقدر اشلخ
:P

Sn3a يقول...

استكاانه احب بوستات الاحداث والسوالف

تدرين
اول مره اطلع من المعرض بروايه وكتابين شعر بس

مالقيت شي ويمكن انا مادورت عدل مادري
بس كنت ابي اشتري ذا سيكرت لما شفته عندج تذكررت!
وبغيت اشتري كتب تنميه الذات
وماكنت ادري شنو اخذ وشنو احسنهم
وشنو بغيت ممم؟

الا بغيت اسئلج
منو هالشمحوطه اللي مألفتلها هالروايه

انا رحت السبت الصبح المعرش
وكان في ريال كبير بالعمر ماشاءالله عليه مايحتاج اقولج جم ورقه فولسكاب ماسك عن اسماء كتب ومؤلفينهم
لا وعارف المؤلفين شسم ازواجهم او زوجاتهم وشنو جناسيهم وجم اعمارهم
وخذا جم كتاب لروائيين جدد
ودي اصير جذيه!!!!

اي تذكرت
نسيت اشتري كتاب برج الميزان 2009:P

charisma يقول...

بدلت على رواق،فلا أحد ينتظرني وممكن ان ينعتني بالثلجة

لووووووووووول موتينى ضحك طلعتى من ربعى
:)))

ما اذكر متى اخر مره طلعت بروحى واستانست
ما احب اطلع بروحى
:/

علييج بالعافيه خوش طلعه
عجبنى تعبيرج انت ونفسك اصدقاء
والله ودى اجرب اصادق نفسى

radarblog يقول...

" ولا اريد حمل هم أي احد يتملل من بطئي وانا اتأمل وابحث في الكتب ... "

أشاركك الرأي ، لا أحب مرافقة أحدهم أثناء شرائي للكتب ، لأني قد أستغرق ساعات في البحث و الاطلاع عليها ...

البوست طويل ، لكن مع ذلك هو جميل ، لا أخفيك نسيت معظم ماقرأت عند الوصول لنهايته ... :)

في آمان الله

رادار

esTeKaNa يقول...

JuVentina
~~~~~~~~~~~~
حمدلله على السلامة ومبروك ما ياج
اهم شي صحتج وصحة البيبي
وهالكتب لاحقه عليهم لا تتحسفين

واوافقج الراي
يعني هذي مشاعر وشخصيات مختلفه
مو كيكة ومقادير سوي جذي وحطي جذي
!!
ودي اصير قوية
:(

Kuwait يقول...

لوووووووووووووووووول
الحمدلله والشكر اشفينا من أحد يلحقنا من الخرعه ننثول :\
ننسى الباب ..
ننسى الطريج ..
أنا شخصيا حتى الحجي انساه ..
والسمع والشوف يصير لج عليه :\
والعقل يصير ترللي من الخرعه :\
عليج بالعافيه بالكتب :)
قراءه ممتعه ..

صقر قريش يقول...

عن نفسي انا الحمدلله ما احتاج دليل انا داش واعرف شنو ابي واعرف دور النشر والي يشتغلون فيها(بعضهم موكلهم) آنا صوب المكتبات الكويتية ما أشتري لكني اظطريت اشتري العود الهندي(وهو كتاب عن مجالس ديوان ابي الطيب المتنبي)من مكتبة كويتية لكني مطيح عند المكتبات اللبنانية والمصرية والسورية اكثر شي.

الي لاحقج قوليلها انا شغلتي قانون اودرك واوديك ورى الشمس:)

من زمان عن مدونتج اختي استكانة شنسوي بعد دنيا ولهينا فيها :)

مشكورة على موضوعج الممتع

esTeKaNa يقول...

ميرامار
~~~~~~~~
كنت خايفه اطلع بروحي
بس اكتشفت انها متعه
جربيها
:)












the sun shaine
ّّّّّّ~~~~~~~~~~~~~~~~
ياهلا وامية هلا
شوفي الروايات اللي توني شاريتهم ما اقدر اقيمهم
بس الروايات اللي قريتها وحبيتها وايد
شوفي روايات احلام مستغماني
غازي القصيبي مثلا
وان شاء الله باقرب وقت اكتب لج قائمة
:)

Enter-Q8 يقول...

انا يئست من معرض الكتاب

بستغل و اصير استغلالي عملي و اقرى من بره الكويت

kazmawy يقول...

ماشاء الله عليج يا استكانة كل هالسوالف ليلة وحدة بالمعرض
انتى لو تسافرين مصر شتسوين برووحج
لوووووووووووووووووووول

عليج بالعافية ويبيله اعادة مرة ثانية
والله يفكج من العقد وسوالفهم

غير معرف يقول...

:))))

أحبــك في الله يا أغلى إستكانه
:*


إختــك/ عاليــه

esTeKaNa يقول...

الخيلاء
~~~~~~~~
ياهلا ويا مرحبا بالغالية
:*
اي ولله فراغه
هذا الشخص يتبع سياسه تثقف وضبط حالك
:Pp~
نسيت اسمها
بس اخذها من احلى انجنير ذكريني اقولج اسمها
عشان يمديج اذا تبين توقيع
:)












قيادية
~~~~~~~~~
ياهلا بقيادية الفرح والحب والطموح
:**
زين تسوين والله
داري بتمشي من الكتب
مو لاقيه وقت اقرا مثل قبل
بس وجودهم وشرائهم صارت هوايه
هوايه مكلفه صراحة
:)
اي والله شخباري واحد يلحق
حسسني ان الكويت سنه تسعين
:pP~
اما سالفتج
لوووووووووووووووووووووووول
واي موتيني من الضحك
اي شاف الكاميرا قال هذاا اقل ما عندها
اكيد عندها خير من الله
:Pp~
وااااي ابي توفي نت لاتيه
هذا اخر يوم
ببدي رجيم
:)
















Manal
~~~~~~~~
اشرايج فيني؟
نطري البوستات اليايه كلها اقناع
:)

esTeKaNa يقول...

عندي خلل بالانترنت
:(
اسفه على التأخير بالرد
وشكرا لمشاركة الجميع
بس يتصلح الوضع ارد اسولف وياكم وارد على تعليقاتكم ان شاء الله

esTeKaNa يقول...

صبا
~~~~~~
ياهلا ويا مرحبا بالصبا
جربي الطلعات بروحج
تونس
:)








abu aldestor
~~~~~~~~~~~~~~
لا اللي يشارك بشاعر المليون يكون على مستوى ارقى دير بالك
:p~














ARTFUL
~~~~~~~~~
أحس الانترنت خذا من وقت القراية وايد
ومعاه
استغنينا عن مسكة الكتاب وقرايته
!!
ويسعدك يارب
:)

esTeKaNa يقول...

بن علي
~~~~~~~~~~
اي والله وأخيرا
:)











ابو لطيف
~~~~~~~~~~
أجمعين يارب
وجزاك الله خير على رقي مرورك وكلماتك
:)











ساخر كويتي
~~~~~~~~~~~~
ياهلا ويا مرحبا بالساخر الكويتي
افرح لما ايوز لك البوست
حياااك الله
:)

esTeKaNa يقول...

SWeet Revenge
~~~~~~~~~~~~~~~
مادري
!!
شرايج نصير كتاب انا وياج
على الاقل عدينا 18
:Pp~
والله يعافيج يا الغاليه
:)










RA_1
~~~~~~~~~
لا عادي
اتبعي سياسه بو حقور ويمشي
:pP~



















najmah
~~~~~~~~~
يا زين هالصباح يا زينه
هلا بنجمة قلبي وروحي
:**
يا حلاتج وانتي رايقه على الصبح
واااااااااااي
هذيله تخصص معرض الكتاب
سياستهم تثقف وضبط لك مثقفه تفيدك حق مستقبلك
:Pp~
مرات افكر ودي اروح مع رفقة تونسني
اخذ كتاب وهم كتاب ونتبادل
بدل لا انا اخذ كل الكتب
تيين معاي المعرض الياي؟
:))
الله يحفظج صديقتي

esTeKaNa يقول...

الوتين
~~~~~~~
عاشو المثقفات
!!
اي حسيت حر
مادري ليش
:(














MOLOK
~~~~~~~
أوافقك الراي
انا احب اقرا روايات الجدد
احب اشوف ابداعاتهم
بس في ناس يبهروني
افكر اشلون تجرأو يكتبون وينشرون بعد
!!
حياك الله

esTeKaNa يقول...

عثماني
~~~~~~~~~
لا لا
كل شي ولا تأخير عن شغلك
مصلحة الشغل اهم
:)
وش تبغى وحوله
مممممممممممم
مجربه من قبل؟
:pP~~
شكرا على النصيحة عيزت وانا اقهقه بروحي على وش تبغى
















fskara
~~~~~~~~~~
ياهلا ويا مرحبا
ولهت عليج
:*
اييي انا مراسلكم من قلب الحدث
اكتب واخليج تتمشين وياي
شرايج؟
:Pp~
تصدقين وايد عندي كتب ابدي فيها ما اكملها ،النت ماخذ وقتي وضيفي عليها احس اساسا ماكو وقت
:(
المهم انتي بشريني اشلونج
واشلون الوالده؟

esTeKaNa يقول...

DUBAI
~~~~~~~
افا عليج
لابد نجحل العيون وانا اخيتج
ولالالالا
الا هذا حرام عليج
يقولي تو الناس على الحجاب
انا بوادي وهو بوادي
وضيفي على كل هذا روح بعيد ورد سالم
انا ضد زواج الاقارب
:pP~











barrak
~~~~~~~~~~~
ليش حسيتك تعاني من مشكلة الكوكسة ولفت نظرك الكتاب؟
اذا يهمك الموضوع
اوفره لك افا عليك
ههههههههههه
:))
احم احم
هذا مو باركية هذا سيراميك غرفتي يالله من فضلك

















7osen
~~~~~~~~~
حسين تصدق طافتني
لو حاذفته بواحد من كتب القانون اللي متن مخدتي جان رايح فيها
ههههههه
:)
تصدق عندي روايه مدن تأكل العشب وما قريتها شجعتني
شكلي بطلعها من مكتبتي واقراها
:)

esTeKaNa يقول...

متفائل
~~~~~~~~~
ياهلا ويا مرحبا
للحين في اختلاف على سقف الكفاية
اسمها ملفت
اقراها واحكم
:pP~
وعندي وعندك خير
داري بتمشي من الكتب
كله اخاف ما اشتري واتحسف
عيل تقول لاحقتك ها
لووول
:)
















sn3a
~~~~~~~~~
حبتج العافية
وأنا أحب مرورج والله يشهد
:)
بتذكر اسمها الروايه عند رفيجتي
بس اخذها بصورها واحط اسمها
بعد دعايه ببلاش
:pP~
وتصدقين انا سنتين ما رحت المعرض
بس هالسنه كنت ناكرته محتاجه امور معينه
حلاته تروحين وفي بالج شنو تبين

وحيالله برج الميزان
:)











charissma
~~~~~~~~~~~~
شوفي هالجمله ما تلفت نظر الا الناس اللي يعانون من هالمشكلة
:)
ماحب اطلع بروحي
!!
بس مرات نحتاج هالشي اكثر من ما تتصورين


حياج الله



















radarblog
~~~~~~~~~~~
شكرا لمرورك
ونأسف على الاطاله
:)










صقر قريش
~~~~~~~~~~~
عاش من شافك
:)
وحياااك الله
فقدنا تعليقاتك













enter-q8
~~~~~~~~~~
لا يأس مع الحياه وانا اخيتك
علامك كله يائس ومتشائم
:Pp~












KAZmawy
~~~~~~~~~~
لوووووووول
الله يحفظني يارب
:Pp~
الله يعافيك وماقصرت










عالية
~~~~~~~~~
أحبك الذي احببتني فيه
يزاج الله خير
تعليقج مسك ختاك هالبوست
:**

najmah يقول...

ويييه يااااابختي
جان انا بصير هالرفقه
:**
بقولج شي
امس رحت معرض الكتاب
كل ما اتذكر تعليقاتج
افصل من الضحك
خاصة يوم وقفت عند كتب كيف تتكوكس
لووووووووووووووووووووول
كان زحمة عليها وانا ميتة من الضحك مو قادرة اسكت
:Pp

استكانة
البوست الاخير بجيت وانا اقراه
مادري ليش
لكن صدقج يخلي مشاعري تبجي وتخذلها الكلمات
:*

LonDonY يقول...

بووووست روووعه
حدده حدده رووعه
ويمكن استمتعت فيه بقدر
استمتاعك بزيارة المعرض


اهم شي
lool

اجلس على كرسي وجدامي استكانات والناس من حولي"
"يا سلاااااام

:)



اكثر ما لفت انتباهي ملاحظتك
حول مستوى ثقافة القارئ
مقارنة مع مستوى الكتاب
وهو فعلا سؤال يغيب عنا بال الكثير
بغض النظر عن مدى تمييزه لمن يخلط السم بالدسم من عدمه.. فعلا، هل نحن بالقدر المطلوب والمؤهل لان نستوعب مثل تلك المادة او ذاك الكتاب؟