الأربعاء، أكتوبر 15، 2008

حرب الشوارع

حرب الشوارع
!!
هي حرب نعيشها يوميا
في ساعات الصباح الأولى...وتتكرر بالظهر...وأحيانا في ساعات المسا الأولى
زحمة...تستهلك تركيزنا
وتوتر اعصابنا
وتعسر كل شئ فينا
تحاول ان تطول بالك
ان تحترم من يجاورك بالشارع ..فتمسك حارتك
تتشبث بالصبر وتنتظر
ليأتيك من بعيد شخص شااخط من حارة الأمان ويلف فجأة عليك
ليصبح أمامك واضعا اياك امام الامر الواقع
انا لا احترم من لا يحترم القانون
تأتيني نزعة النحاسة ..اضحي بسيارتي ولا يتجاوز وجودي ويعديني
وتبدأ رحله النحاسه مابين بريك وبنزين
.
.
.
.
اعترف اني نحيسه ان وقف الامر عند تجاوز قانون
لكن هذا لا يعني أني اعاني من عقده فرض الشخصيه التي يعاني منها البعض بالشوارع
!!
عقدة الذي لا يسمح لاي شخص بأن يتعدى عليه
فيرى شخص واقف عند لفه يوتيرن من مدة طويلة
فيدوس بنزين كانه مجنون دون ان يفكر ان يتأخر دقيقه ليسمح لآخر بالالتفاف امامه
.
.
.
.
كل يوم عندي معاناة الوصول لمقر عملي في وقت مبكر
!!
مهما استيقظت مبكرا ....لابد ان تواجهني زحمة
قبل يومين صحيت مبكرا جدا
ولكن تأخرت عشر دقائق عن موعد خروجي المعتاد لأواجه زحمه غير طبيعيه
ساعه وخمس دقائق قضيتها في الزحمه
في البداية...طولت بالي
تأملت السيارات حولي...كل سياره فيها سايق
وياهل طول صبعي
او بنت بعمر الجامعه
وشاب آخر شكله متوجه للدوام
فجأة احتريت....لو كل هاليهال النتف رايحين بباص مو احسن؟
لو كل بنت ركبت السياره مع صديقتها او اختها مو قللنا الزحمه؟
لو غيرنا مواعيد بداية العمل مابين المدارس واماكن العمل ما تقل الزحمة؟
ثم ما فائدة ان اتوتر واتنرفز واصل للعمل بمزاج متعكر...ويكون ما عندي في هذا اليوم شغل
او شغل ممكن انجازه بوقت قصير...لما الفزعه من فجر الله والذهاب بوقت مبكر؟
في قمة ذاك التحلطم...فتحت الراديو لينطلق صوت عبدالكريم:
يا حيالله ابو الوجه الصبوحي .....يا حيالله
جان اتبوسم
وعشت دور اني ابو الوجه الصبوحي
الكلمه بسيطة وجميلة
...ضحكت على نفسي اللي تضحك
الكورال يضحكوني لما يردون:
يا حيااااااااااااالله
أحس كل واحد ماسك مسباح وجافس ريله وقاعد قعده دوانيه
ويا حيالله
:pP
.
.
.
.
.
بعد فاصل يا حيالله ابو الوجه الصبوحي
وقف الشارع مرة واحده لم يتحرك لمده عشر دقائق
خنقتني العبره...في لحظة شعرت بأني اريد ان اكون ربه بيت
بلا طموح بلا بطيخ بلا عمل
!!
اتصلت علي امي ..ولأمي عادة جميلة
منذ كنت صغيره اذا اشتكيت من الحر
قالت حمدي الله عندك تكيف
اذا اشتكيت من التعب...ذكرتني بأن لي سرير
اذاآالمني شئ..ذكرتني بأن هناك من هو معاق لا يتحرك
المهم...عندما اتصلت كنت قد وقلت لمرحله ممكن اتهاوش مع نفسي
انطلقت اشكي لها توتري والشارع وكل شئ
وفجأة قلت لها:
يمة لا تقولين لي حمدي ربج عندج سياره
وانتي بنت وانتي بصحة
والدنيا كفاح وكلنا تعبنا وكافحنا
يمه ترا والله ابجي
لا تحسسيني بتفاهة مشاعري بليز
!
بعز تحلطمي....قالت امي:
الي ما يسمع كلام امه يضيع
لما اقولج نامي مبجر
قومي مبجر
خفي عمرج
الله يثبتج بالعقل الله يثبتج
!!
شعرت برغبه بالبكاء....تعبثت بالراديو لتنطلق اغنيه اخرى تتحرش فيني:
صباح الخير يا مدلل
صبااااااح الخيييييييييير..يا مدلل
:Pp~
هذي الأغنيه توحي لي بفتاة جميلة
بشعر ناعم منساب على كتفيها
فتحت عينيها للتو من نومه جميلة
تدلل على سريرها ولا تتحرك الا بعد ان اخذت قسط كافي من النوم
وكلش ما كان هذا وضعي في حينها
مع هذا عشت الدور
تبوسمت
:P~
.
.
.
.
وأخيرا....اقتربت من الدوام
انظر لمقر عملي من بعيد واحاول الوصول له باسرع وقت
مع تركيزي عليه لفيت دون ان اشعر على سياره بجانبي
اعتقد بان من فيها سبني من صباح امس الى اليوم
ابتسمت ابتسامة عريضه واعتذرت من قلبي ...ولكن دون فائدة
!!
المضحك بالمووضوع عندما وصلت لعمل ركب معاي في الاصنصير موظفين
فاحدهما يتكلم مع صاحبه عن واحده عميا لفت عليه لفه غبيه عند المواقف
ولو كانت قريبه لا كان نتفها
اكتشفت ان المتكلم هو ذاته الشخص الذي لفيت عليه
فسحبت شيلتي وعدلت من وضع نظارتي لاتخفى اكثر
:pP~
.
.
.
.
بعد نهار عصيب بالشارع
وصلت للدوام متأخرة جدا
افرفر بالراديو باللحظة الأخيرة تنطلق اغنيه باك راوند على مشاعري بلحظتها:
ابجي على البمبرة ابجي على التينه
وابجي على من ذبح قلبي بسجينة
قلت بس
كملنا والكامل الله
بمبره وتينه وسجينه من الصبح
:Pp~
.نص ساعه وانا جالسه على المكتب بصمت
انظر للفراغ
واتأمل النوافذ
كل من يمر بجانبي يسئلني:
اشفيج استكانة؟
!!
مادري اشفيني.....صج الزحمة قاعده توتر اعصابي
كل دول العالم فيها ساعات ذورة
الا الكويت....دايما احنا في وقت الذروة
:(
.
.
.
اليوم صحيت من النوم بوقت مبكر جدااا
الشارع مزدحم ولكن يمشي نوعا ما
شريت قهوة....وتوجهت لعملي
لاصل قبل الموعد الرسمي للعمل
شعرت باحساس بالانتصار
كنت سعيده
بعثت مسج لأمي:
هيّاااااااااااااااااااااااااااااااااااااااااااااااااااا
واصله قبل كل الناس
احس ابي اتكوكس يمه واصله مبجر
:pP~
توقعت امي نايمة
لكنها بعثت برد:
عاااااااشت بنيتي شيخة البنات
يا حلوها امي لما تقدر ينوني
ولا شنو علاقه الكوكسه بالوناسه؟
:))
.
.
.
بسي تحطلم على الزحمه
بروح انام
وهدفي لهذا الشهر...ان اصل كل يوم في الموعد الرسمي
حتى لو كلفني الامر اخذ سليب باق وانام بمكتبي
:Pp~
تدرون شنو احلى شي بالدنيا؟
باجر ويك اند
:)

هناك 79 تعليقًا:

vancouver يقول...

واااااااااااااااااااااااي ذكرتيني

بايام الدوااااام


وصفج عجييييييييييييب
صاجة
نووووصل دواماتنا متعكر مزاجنا
ومقلدمين والسبه هالزحمه بالشوااارع


ياحلاة قعدة البيييييييييييت
وانعدااام الطمووووووووح
والربااااادة
:pppp
لوووووول

esTeKaNa يقول...

vancouver
~~~~~~~~~~~~~~
ياهلا واميه هلا
واااي يا فانكوفر
انا لي صكت الزحمه
قلت بقلبي اي اشفيه البيت؟
ليش ما نقر في بيوتنا وبسنا من هالهيله
فرجاءا
لا تشيشيني
انا توني في بداية حياتي
ترا باجر اعلق شهادتي بصاله بيتنا
واقرر اصير ربه منزل
:Pp~

Selezya يقول...

لووول
ياحيااالله استكانه
:Pp

والله الزحمة تلوع الجبد تغغغثثثثث انا ابجي والله عند ابوي اقول مابي مابي اسوووق مابي اضغط بنزين شوي وبريك شوي لاعت جبدي ريلي تعورني :( ابي سايق حقي بروحي مو حق اخواني :((

سالفة الريال اللي بغى يروح فيها منج لوول اولله صدفه قويه انا لو منج اخليه يشوفني لوووول واعتذر بعد اخاف يدعي علي ويقبلها الله عالاقل تلحقين على عمرج احسن لوول

فديتج يالغاليه هونييها كلنا نعيش نفس الحاله
الله يعيين

esTeKaNa يقول...

Selezeya
~~~~~~~~~~~
يا حيــــــــــــــــالله
:Pp~
انا اللي حارني ابوي كان يقولي السايق يوديج مو الا ليسن
وقلت لا
الا ابي اسوق سياره
ياربي مرات نسوي اشيا غبيه
لو ما عندي ليسن جان السايق يوديني على الاقل ادهن ايدي بالسياره
اشرب حليبتي
اسوي اشيا مفيده
:pP~
يالله نتحمل يا سليزيه شنسوي
لابد من الكفاح هذي الدنيا على قوله امي
:)

bin3li يقول...

كلنا في الهم شرق

انصحج بهالاختراع

:P

صبا يقول...

الزحمه تسبب لي النعاس
:(((
امس واليوم وانا راده البيت بالليل

من الزحمه عيوني نعست
حسيت بخمول
جنه احد راش علي فليت
!!!!!

اي والله زهقت
وصلت.... بوزي شبرين
امي مسكينه من تشوفني تقولي زحمه صح؟؟

والي يحر زحمه من ولا شي ولين اوصل لنقطة بداية السير
ما شوف شي لا حادث ولا سياره ولا ميت ؟؟؟؟

تخيلي كل هالزحمه علي شان حظراتهم يتطمشون علي بقايا حادث مروري صاير العصر

أوووووووووووف قمه بالسخافه
مرااات افكر اخلي سيارتي بالشارع وأرد مشي البيت
اسرع والله

,,,

QiYaDiYa يقول...

heheheh ;p

وصفج للأحداث ممتع !!
و طبعا مو شي يديد عليج ;)


دوامي بين كيفان و شويخ
المفروض المحاضرة تكون الساعة 2
بس الدكتور مجدمها
اخلص من شويخ 12:15

و المفروض تبدي محاضرتي بكيفان 12:30

طبعا انا بسوي روحي شاطرة
اول ما قال الدكتور تفضلوا
طيرااان لي السيارة
شويخ زحمة زحمة زحمة !!
خاصة لما تكونين متعودة على عز
كيفان الوضع يختلف عندج ;p


حرب بالشارع مع الشاحنات الي اكبر من بيتنا !!

وصلت الكلية
اصفط
انزل
الدكتور معتذر !!

;p ;p



في احلى من هالدقرة ؟ ;p

وصلت مرحلة اقول حق عمري لا تتشيطرين !!

;p

المحاضرة الياية بدخل الساعة 1
و بشوف منو بكلمني ;p


اليوم
كنت باشارة دمشق
ولا السايد الثاني يصير حادث
3 سيارات

فجأة سمعت صوت
لفيت ويهي ولا الوضع يخرع ="(


حسيت فجأة مابي اسوق خلااااص
قعدت ابجي

الادهى و الامر
سيارتي مافيها ولا نقطططة باااانزييين
مصفررررة
لدرجة ان ما يطلعي ارقام يطلعي خط
يعني ما فيها شي

و ابي اقرب محطة بانزين
طيرااان

وصلت المحطة
ولا اتذكر اني عطيت اختي الفلوس
اطل ببوكي فيه دينار !! ;p

اقوله عندك كي نت يقول لأ !
قتله اترس دينار خل تمشي السيارة بس ;p ;p

ربي يكافيج شر حرب الشوارع
و توصلين دوامج كل يوم بسلام و امان و بالوقت المناااسب ;*

THE BOSS يقول...

استكانه
وانتي بعز الزحمه ما لاحظتي شي انه الزحمه مو عليج بروحج ترى كل اللي معاج بالشارع قاعدين يعانون مثلج و يمكن اكثر يعني شلون تبين يبطلون الشوارع جدامج
:)
هدي و تعدي يا عزيزتي بس وناسه لو صايدج اللي لفيتي عليه
وعطني ولعه

الخيلاء يقول...

وااااااااااااي
تدرين صارلي اسبوع بكتب عن الزحمه

عيل الله يرضى
كل يوم اقوم ابجر من اليوم الي قبله
و كل يوم اطلع دقيقه متاخره عن اليوم الي قبله

ليش ياربي
هدومي مضروبه و جاهزه
صلاه ربي و مصليتها
ولاني من ربع المكياج كلش

عيل ليش كل يوم اتاخر دقيقه عن اليوم الي قبله

و ليش اشوف دوامي جدام عيني و ماقدر اوصله الله يرضى يعني

قالتلي امي نامي مبجر و اتقومين مبجر
نامي بكير و اصحي بكير شوفي الصحه كيف بتصير
لول



يعني بالله لي رديت من دوامي لي البيت
اخذ 10 دقايق اذا كان في زحمه
و اذا بروح اخذ ساعه
:"(

وبعدين المارينا لازم و ضروري يغيرون مذيعهم ياربي صوته من الصبح ايب الاكتئاب فوق الزحمه

ترى انا قلبي متروسه
ولا الباصات ياويلتي ويلتاه منهم
مادري من قاص عليهم و قايل لهم
انهم ميني كوبر
بيتون و يتقلقص بين السيارات
كبير يا راجل
عيب عليج شكبرك بالشارع اتزاحمنا احنا بيبي كار

وبعد شنو بتحلطم عليه
امممممم

بس جنه هذا كل شي

:p

حياتي هدف مو عبث يقول...

بالزحمة شووفي ويوه اللي بالسيارات

وخاصة الأطفال

تعبر جداً

:)

وبالكويت كل وقت زحمة

خاصة ان كنتي في منطقة

مهمة نفس منطقتي الحبيبة

;p

mo3ath يقول...

بلوة وابتلينا فيها ، على كثر مااحاول اطول بالي واقعد مفوشح بالسياره ورافع ريل ومنزل الثانية ومشغل المسجل بس ماكو فايده يظل وضع الشارع ينرفز وماتقدر توصل مكان إلا وانت معصب او ساب واحد او شوي وترتكب جريمه :)

والمشكله لما تطول بالك غيرك باله قصير يعني جنك يابوزيد ماغزيت :\

على البركه واصله مبجر ، انا امس وصلت الكليه مع طلعةالدكتور من القاعه "(

kuwaitawy يقول...

الله يكون بعونج :)



------

have a nice weekend

Enter-Q8 يقول...

العزيزة استكانه
زحمة الكويت
كتبنا فيها الكتب كل اهل الكويت اكتبوا و تكلموا
و على قولة سعد زغلول ما فيش فايدة
عالطاري سعد زغلول
لما كنت بمصر و حاشتنا الزحمة
سالت راعي السايق
مصطفي
احمد عدوية كذاب و انسان صايع و فنجري بوق
رد علي و قالي
ليه يا باشا
قلت له
ابن اللي اهو ابنه لما غنى و قال
زحمة يا دنيا زحمة
كان اي سنة
صدقت دلوقتي ان كذاب

Yin يقول...

كالعادة بوستاتج ترسم على وجهي البسمة
أحب اسلوبج العفوي

القيادة تدل على أخلاق صاحبها
فكلما "غثج" سائق تأسفي على حاله
وحال أهله على الأخلاق التي ابتلي فيها
:)

اليوم ماشاءالله بديتيها بسنفور غضبان وحزين وختمتيها بسنفور يتكوكس ؟!؟!

وناسة
بس ما قلتي تكوكستي بالدوام ولا لأ؟

إقتباس "جان اتبوسم وعشت دور اني ابو الوجه الصبوحي "

خلتني ابتسم وياج
عيشي الدور ليش ما تعيشينه
من قالج مو قاعد يغني لج؟
:))
والزحمة شكلها مصير أبدي بهالديرة
صيري سنفور مبتكر وابتكري طريقة للقضاء عليها
:P

اما عاد موقف الأصنصير
حمدي ربج لابسة نظارة
لووول

وتسلمين يا استكانة
على بوست الزحمة
:))

Fahad Al Askr يقول...

دزي نسخة من البوست حق وزير الداخلية

الزين يقول...

الحمدلله

ولله المنه

ان دوامي عكس السير

الناس تروح شمال وانا اروح جنوب

اررررحم

بس عندنا مشكلة الشاحنات اللي تدخل معاج سباق

اما السير ماشي

طبعا انا هالسالفه سامعتها
بس رجعت اكركر مره ثانية

وخصوصا الفاصل الغنائي

يازينج ويااازين سوالفج

:**

Sweet Revenge يقول...

يحليلج يا استكانه
احلي شي الكوكسة
الصراحة الي يهدي اعصابي بعد الوصول للعمل البلوقات اقعد اخذ فرة عليهم قبل لا ابدي الشغل
وناسة
have a nice weekend :)

ARTFUL يقول...

كااااك
الحمدالله الحمدالله
ما اعاني وايد من الزحمه بس اعاني من الطلعة المتأخرة فلازم أكون دايس

ومسرع

تعالي انتي تصيرين لي من حيث النحاسة لمن يتعدى القانون

;p
ينرفزنيييييي


اهم شي انج قاعد تيشين الدور ان الغاني مغنينها عليج

;D

الله يثبتج بعقلج يا استكانه
لووووووووول
يحليلها الوالده

ولفه على الاوادم وعافسه الدنيا

ماسوت علينا هالطموح لا تعورينا

ولو سمحتي شيخة البنات وحدة ماكو غيرة بعد اذنج طبعا

;p

ايي والله ويييك اند هيااااااا

والله الدنيا مو شايلتني من الوناسه
والله ما يحس بالويك اند الا الموظف المجتهد اللي لازم ينام امبجر
ودوامه كرف

مادري شسوي انام اطلع اهيت وايد شغلات ودي اسويها

;D

سلامييين

terkwaz يقول...

ليش زعلانه جذيه شاللي حصه
مركبج طبعان ولا ما وصل (؛

ناشبتني ليش شعرج مو طويل
ليش يا بنيتي خدودج ناشفه لووول لا هاذي غلط


انا الكوكسه كيفت عليها
وناسه لووول

شوفي الزحمه فلم ويا امي العوده
اذا صار يمنا باص تقول يانا يانا طويل الظهر وخري عنه لوول

هابي ويك اند

`~MnO YeNSa! ~` يقول...

يا حيــــالله
يا حيــــالله

:Pp

صباح الخير و النوير
:*


والفلم اليهال
طماشة
اللي نايم
و اللي معصب

استانس اطفرهم
:P

واااااي على الزحمة
انا تلاقيني
ادق على كل الاوادم
و ما خلص الطريج


انتي دقي على و مالج شغل ما تحسين بالزحمة :Pp

عفية هذي
اي قناة
ماعندي
:Pp

يحلوها امج :*
سلمي عليها


:D

it`s a weekend
yehoOOooOOo
الحين بكوكس
:p

غير معرف يقول...

انا من زمان بصير ربه منزل

بس ماكو منزل :P

. . . ساخر كويتي يقول...

استكانة
خوش فواصل قاعدة تسمعين
بس انا شاك فيج قاعدة في دوانية شعراء النبط

انا ملاحظ ان الزحمة مأثرة بالكل هاليومين

انتي بوستك عن الزحمة وانا بوستي عن الزحمة وغيرنا من المدونين مو مقصرين

فعلا شئ يرفع الضغط

هالاسبوع مو ظابطة معاي اقعد مبجر
بظبط روحي الاسبوع الياي باذن الله

ملاحظة : اغانيج نقوة تكفة دلينا على هالموجة ودنا نسمع شئ من الماضي

وبالنهاية
الله يحفظلك الوالدة ويطول بعمرها فنصايحها وتفاعلها معاج دليل انها ام مثالية ماشاء الله تبارك الرحمن

اي صح تذكرين شنو كان يقول الدكتور عمر في بنك المعلومات ؟

"يسسسسسسسسلام عليكي" :)
وانا اوجها لكي للوصول باكرا

تحياتي

Broke يقول...

قلتي كل اللي في بالي بخصوص الزحمة

خاصة تلك الأفكار اللي تسيطر عليج و انتي بقمة توترك بالسيارة

آنا ودي يسووون لنا سكن موظفين بالبراحة اللي يم مقر عملي ..كل يوم آنا و البنات نطل عليها من الدريشة و نتحلم إنهم يبنون فيها مجمع سكني عشان تنحل مشكلتنا

خلي كل هذا

أمي من درت إنهم خافسين بتقييمي بسبب تأخيراتي ..قامت كل يوم تدق علي بالمكتب و تسألني متى وصلتي ؟

مأسااااة

بس الله ياجرنا .. جهاد

molok يقول...

نا من بعد رمضان قعد معاي مديري وقال لازم تيي مبجر لانك قاعد تتاخر عن الدوام .. ومن رمضان هم صارت تغيرات في حياتي وكان واحد من اهم التغيرات اني صرت انام مبجر عشان اقوم مبجر .. بس مثل ماقلتي اطلع من البيت مبجر اوقف بالزحمة .. واوصل حده حده او متأخر ..

أما بالنسبة حق النحاسه .. فماأدري من وين الناس يايبه هالناس .. انا كل أقول حط نفسك مكان هالشخص اللي ملطوع عاللفه وراح تقدر تقدره :)

مشكوره وايد ..

7osen يقول...

ههههههههه
اول شي ضحكة على الاشياء المضحكة اللى انكتبت في البوست
والله سوالفج حلوة


ثاني شي
على سالفة اللى يمشي على حارة الامان
ما اواطن اللى يمشون على حارة الامان ودي اروح اتهاوش معاهم

وعلى سالفة النحاسة
في اخر يوم من رمضان
كنت طالع من طريج فرعي حق طريج رئيسي
وكان زحمة شوي المهم السيارات موقاعد تمشي انا كان جدامي سيارة وانا بطوف وراها ولا السيارة اللى بعدها تدوس وماتبي تطوفني ، انا استغربت
اطالع ولا بنتين ، احاول اشر اني بطوف كاشته بطت جبدي جان اتنيحس عليها
عاد مسكينة ماتدري اني كنت مدرب حق مايكل شوماخر بطل الفورميلا ون
والف عليها لفة قشرة خليتها تمشي بالنص بشارع حارتين
مسكينة توهقت صج
حسيت اني شرير
هههههه


عموماً حاولي لاتتوترين في الشارع
على شان مايتعكر يومج كله

اتمنالج طريق بلا زحمة
:(

Najmah يقول...

ترى مو صج
لييييييش كل ما اكتب تعليق عندج
طوله مادري جم متر
ينمسح

:""""(

Najmah يقول...

عدنا

صج والله ليش كل الاوقات ذروة؟

الصبح زحمة آمنا بالله

انزين الساعة 11 شكو زحمة
!!

تصدقين انا زحمة الصبح اتقبلها
مادري اكون مشتطة ومستانسة ومتفائلة
ومزاجي ماخذ راحته
ومحاضرة الساعه 8 اصلا الدكتور يتأخر
فأكون عادي بالي طويل

بس الظهر خلااااص واصله حدي
حرر وتعب ومافيني حيل اسوق
اييني شعور ودي اكسر الاشارات كلهم
:\

لااااا واليووم والله بغيت ابجي
توني واصلة البيت
يتصل اخوي من المدرسة تعالي اخذيني
اقول له شكو انا خل السايق ياخذك
يقول لي لا انا قتله لا اتييني نجمة بتاخذني
ابيييه على كيفه يقرر
والله بغيت اذبحه بس عشان لا اكسر كلمته رحت اخذته
ودشي بزحمة كل المدارس عشان توصلين مدرسته
ويطلع لج بويهج واحد طاير يحك سيارتج ويمشي
!@@

الله كرييييم

Noor يقول...

:)

الله يعين بس انا كل ماتذكرت الزحمه اكنسل طلعتي

وعن طلعت الدوامات هذا عاد شي يبجي
عادي يتعسر يومي كله علي الزحمه
بس احاول اخفف علي عمري اسمع الدوانيه الظهر
..

بس عاد تدرين المود الصبح يكون غير تدرين انا وحده كل اغنيه اسمعها ترى من صجي اقول مقيوله فيني او إهداء لي
؛pP
ترى شعور حلو لمي تسمعين اغنيه اتقولين اي هذي لي
:)

اتصدقين كله اقول ليش مايسوون قطارت معلقه ينعني المدارس قطار بروح والدوامات قطار بروح والجامعات بعد
:D
فكره احاول اقدمها لمجلس الوزراء
واتوقع الفين واحطبه يوافقون عليها

يعطيج العافيه حبيبتي
وعفيه علي الشطوره الي تقعد كل يوم مبجر
:*

ShLaLaT يقول...

الحمدالله ماكو زحمه


:)

لا بالروحه ولا بالرده

يا زين الدوام اذا صار عكس السير

;p

violinist_q8 يقول...

اتمنى مع الوقت تكون لج سُلطه تشريعيه
عشان تطبقين حملتج - على وين -

عــائأــشــــة يقول...

يابنتي يا إستكانه
إحمدي ربج إنح مب في دبي

تدرين الموظفين الي عندي يصلون الفجر ويطلعون من المسيد على الدوام
والحين في الشتاء يطلعون ويصلون الفجر في الدرب أو في الشغل
كل هذا تفاديا للزحام

تخيلي زحام وضباب .. يعني الطامة الكبرى
العام صار عندنا حادث ل أكثر من 200 سيارة في منطقة غنتوت بين دبي وبوظبي والسبب الزحام والضباب

أنا خلاص شوي وبدخل مصحه أتعالج من توتر الشوارع

على نفسها جنت براقش يقول...

الله يكون بالعون

انا اشاركك بمشاعرى

لكن بالواقع دوامى يم بيتنا

ربع ساعه و اوصل ان كان الشارع زحمه

واذا فاضىخمس دقايق

اقول ذكرى ربك

لوووووووووووووووووووووووووووووووول

the.thinker يقول...

ايييييييييه يا استكانه والله حطيتي ايدج على الجرح .. الديره صايره زحمه بشكل مو طبيعي .. كل وقت زحمه !!
يبيلنا حل حق المشكله .. اسلوووبج روووعه .. صج أحس انج معصبه من هالناس بس مت من الضحك

تسلم ايدج ^_^ ويبعد عنا وعنج الزحمه

bin3li يقول...

عاشة
احمدي ربج إنج مب في الشارجة
يعني اليوم فوق الزحمة ضباب كثيف
يعني شلل شبه تااام
اعرف ناس اليوم خلوا سياييرهم و خوذها مشي!!
:)

Sn3a يقول...

لوووول
ياحيالله
لوووووووووووووووول
ضحكتيينيييي



يلا ماعليه
انا هالكورس دوامي يونسسسسس
11
ومرات 1
ويوم ماكو دوام
ويوم الساعه 2
بس مشكلتي مو الشارع
المسفاط:(


الله يخلي درويلنا عاش عاش
وبنات الكليه يردوني صايره اخليهم شفتات كل وحده يوم
لان مسافطنا مليانه عالاخر وتطفح والبيوت اللي حوالين الفرع ماكلينا
تخيلي انا اذا عندي ماده بالعلوم
لازم اسفط بعييد
اوصل محاضرتي بعد ساعه الا ربع مشي
اهو زين رياضه بس مو بعز الحررررر



وياحيالله

يحليلها امج تقوم من الصبح تآزرج

ana_sokkarah يقول...

مرحبا استكانه

دستي عالوتر

يختج الكل صارت فيه اعصاب والسبه الزحمة اوفيييييييه متى نخلص منها مادري كل مالها وتتفاقم الى ابعد الحدود

تصدقين...انا ضد فكرة ان احط لي سايق قطع ما احبهم لكن هذاك اليوم قلت حق امي بكسر القاعدة والفكرة اللي مايانا من وراها الا الاعصاب

صدقيني اريح ماتدرين عن الشارع موووليه تشربين قهوتج وانتي مرتاحه واذا بتريقين كل شي يصير عندج وقت والله

ياحليل امج اثاري كل امهاتنا حافظين نفس الاسطوانه ليش ياترى والله امي تقوللي نفس الحجي

لوووووووووووووووووول

تحياتي وسلامي واشواقي لها ولج يالغالية

Makintosh يقول...

انا اطلع من البيت 7 الا ربع عشان اوصل شويخ والحق على محاضره ساعه 8

بس الحمدلله انا من الناس لو كل السيارات يلفون علي ما اعصب

لكن شي واحد يخليني اعصب لما اكون واقفه بالدور عشان ندخل المدخل ايون سيارات من اخر الدنيا ويوقفون بالمقدمه هني صج ادعي عليهم من كل قلبي

Mishari يقول...

عندي اقتراح

يخلون الكويتين كلهم يداومون راكبين باصات

اللى قاعد يصير مو طبيعي:(

esTeKaNa يقول...

بن علي
~~~~~~~~
hahahahaha
عجييييب
خوش اختراع هذا
بس عاد تخيل تصير زحمه حتى بالسما
:Pp~

esTeKaNa يقول...

صبا
~~~~~~
ياهلا ويا مرحبا بالصبا
اييي الزحمه تسبب النعاس
عشان جذي اذا شبت الاشاره حمرا والسياره اللي جدامي واقفه ما اطق هرن
!!
اخاف خذته غفوه فما ابي اقعده
شوي بودقيقه وتالي اطق هرن
:pP~
اللله يصبر قلوبنا على هالزحمه بس

esTeKaNa يقول...

QiYaDiYa
~~~~~~~~~~~~
ياهلا ويا مرحبا بقيادية الفرح كله
:)
تعلميني بشويخ؟
مأساه الشاحانات تكمن في انها مو مقدرة حجمها ولا تحترم اصحاب السياير الصغيره اللي دار مدارها
فجأة يلفون
فجأة شاحنه ماسكه سايد اليسار
ويستهبلون
!!
يكون بعلمج اذا شفتي واحده تطق هرنات بالغزالي وتصارخ على السياير بوحها ترا هذي انا
:)))
الله يعين قلبج
وسالفه اعتذار الدكتور تحر
!!
ما جنه الطلبه عندهم شغل ولا عندهم شي
:(
بس يالله باجر تتخرجين وتنسين هاللويه كلها ان شاء الله
عسى ربي يفتح عليج ويوفقج يارب

esTeKaNa يقول...

The boss
~~~~~~~~~~~
صج مو علي بروحي؟
اول مرة ادري
:Pp~
بعدين استكانة تستاهل تنفج لها الشوارع ويفرشون لها سجاد احمر بعد
ولا شرايك
:pP~
لو صاديني
جان قدمت استقالتي
لانه يخررررع
:))

esTeKaNa يقول...

الخيلاء
~~~~~~~~
يا هلا ويا مرحبا بالخيلاء
:**
واااااااي جنج اياني
امس افكر
اقول انا راس مالي شخطة داخل عيوني واطمر..الله يعين لو انا بسوي شعري
وبرسم عيني
وبتبخر واتعطر
وييه جان وصلت لهم مع اذان الظهر
عيل ياربي ليش اتأخر؟
والباصات فعلا
مو مقدره احجامها
بس تدرين مرات ايني احساس ودي اطق بنزين القى روحي فوق الباص واقعد ساكته لي اوصل المكان اللي ابيه تنزل سيارتي
:Pp~
وعلى طارري مرينا
المذيع الصبح مأساه
يقرا
يعلق
يضحك
على نبرة صوت واحده
!!!
انا امارس هوايه العيايز وطول الطريج افرفر بالراديو
:))

الله يصبر قلوبنا على الزحمه

esTeKaNa يقول...

حياتي هدف مو عبث
~~~~~~~~~~~~~~~~~~~
صاجة
اللي مستعسر
اللي نايم وفاج حلجة
مناظر
:pP~
وصاجة والله كل وقت زحمه
وبكل وقت ذروه
الله يعينا يارب
:)

esTeKaNa يقول...

mo3ath
~~~~~~~~~
اصلا الزحمه تعتبر اختبار صبر وتحمل
!!
انا كل يوم ابجر عن اليوم اللي قبله
كل يوم ازهب اغراضي بليل
ومع هذا اوصل حده حده
:(
الله يعينك يارب
واي الجامعه والدكاتره حرق اعصاب الله يعينك يارب

esTeKaNa يقول...

kuwaitawy
~~~~~~~~~~~
اجمعين يارب
وشكرا
:)

esTeKaNa يقول...

enter-q8
~~~~~~~~~~~
ما فيش فايدة
!!
ليش تحبطني
:(
اذا مافي فايده
انا بتحطلم
امارس هوايه كل كويتي
:Pp~
HEHEHEHE
ضحكتني على سالفه مصر
تصدق ابوي اول يحب هالاغنيه مع ان ما فيها ذره احساس ولا مشاعر
:pP

esTeKaNa يقول...

yin
~~~~~~
يا عساج دوم مبتسمة ومنشرحة القلب ومرتاحة البال قولي آمين
:)
القيادة فن وذوق واخلاق
عيزنا واحنا نقول
انا بكتبها على سيارتي
:Pp~
بس تفقدين اعصابج غصبن عليج والله
يالله الله يعينا يارب
وتصدقين كان بخاطري اتكوكس
بس برستيجي
وانا موظفه يديده
خلاني اتراجع
بس يمكن بالايام اليايه ما تدرين
:pP~
ولابد ننتقل من مرحله التحطلم الا الابتكار
مع تحيات
سنفور مبتكر
:Pp~

esTeKaNa يقول...

FaHad aLakr
~~~~~~~~~~~~~
ما اسوي عليه مونتج اشيل الفواصل الغنائيه ولا شرايك؟
:Pp~

esTeKaNa يقول...

الزين
~~~~~~~
انتي بنعمه
عسى ربي يزيدج من فضله ويتمم عليج
:))
انتي لج السبق بكل السوالف
الله يعينج علي وعلى قرقتي
:***

esTeKaNa يقول...

SWeet Revenge
~~~~~~~~~~~~~~~
اي والله البلوقات الصبح تونس
انا الصبح عطيني نص ساعه مستعسره
بعدين ابدي امارس نشاطي
:pp~

esTeKaNa يقول...

artful
~~~~~~~~~~
يا هلا ويا مرحبا بالموظف المجتهد
:)
هابي ويك اند
ياربي تكون مستمتع ومتانس
ولو سمحت
لا تتحرش لا بطموحي
ولا بلقبي
كل من عنده شيخة بنات
وانا شخة البنات عند امي
بعد ليش تناشبوني
PPp~

esTeKaNa يقول...

Mno YeNsa!
ّّّّّّ~~~~~~~~~~~
يا صباح الورد كله
:*
اليهال زوقه
كل واحد ويهه يعبر عن احساسه
وانا الله يسلمج طول الطريج اتفرفر بالراديو
هذي محطة الغناء العربي القديم
87
بس الاغنيه الاخيره قناه اول مرة اسمعها
مادري شنو
!!!
بس صج انا بالزحمه قمت اسوي كل اتصالاتي لعل وعسى اول
:))
ماكو الا ادق عليج المرة اليايه
Pp~

esTeKaNa يقول...

ANoN
~~~~~~
LOOOOOOOOOOOOOOOOOL:))
عندي وعندج خير
بس دامج ناويه
ان شاء الله على النيه
بس صبري
:pP~

esTeKaNa يقول...

ساخر كويتي
~~~~~~~~~~~
هذي دوانية شعراء النبط؟
هذي يا ساخر محطة الغناء العربي القديم بمشاركة بعض القنوات اللي مادري وين تطلع لي تكون واضحة
واذا صرت تحت جسر تختفي
:Pp~
الله يسلمك ما قصرت
بقول حق امي شنو قلت لي
راح تستانس اكيد
:))
ويا حيااللله
:ppP~

الوتين يقول...

انا الحمدالله ما اعاني من الزحمة كلش كلش لان طريجي عكس الناس يعني الناس متجهة حق الديرة و انا طالعة منها و متجهة عكس الناس
صج هاذي نعمة بدوامي
صج واناسة ويك اند كان اسبوع صعب يلوع الجبد بالدوام شغل وايد و ناس ما تفهم و لا تقدر كنت بس ابي ايي الخميس
مابي اتذكر الاسبوع الي فات ابي انااااااااام
مع الشكر

esTeKaNa يقول...

Broke
~~~~~~~~~
اذا سو لكم سكن ترضين اصير روم ماتج؟
مو احنا بالهوا سوا
:Pp~
واااي يا زين الوالده
بالضبط نفس وضع امي
انا امي الصبح تتوتر
جنها اهي اللي بتروح الدوام
واي خبر يوصلها عن اي زحمه تدق علي بسرعه
مرات اهي توترني
:pP~
ايييه جهاد
الله يعينا
:)

esTeKaNa يقول...

molok
~~~~~~~
ياحيالله مولوك
:Pp~
زين مديرك ينصحك
في مدرا بسرعه يخفسون بالواحد
الله يتمم عليك
وتصدق النومه مبجر وايد زينه
كافي انك تقوم نفسيتك زينه
عسى ربي يفتح عليك ويوفقك يارب
:)

esTeKaNa يقول...

7OSEN
~~~~~~~~~
يا حيالله
pP~
يا عسى دوم فرحان وتبتسم
:)
شنو احساسك وانته شرير؟
hehehehe
لابد من فصلات الشر لابد منها
وفي ناس تستاهل
والله يا حسين انا مرات اضحك على نفسي
اي واحد متوهق بس يطق اشاره ااشر له
امش امش
وبعدين يعطيني هرن شكرا
احس اني سعيده
على قوله اختي لما تركب وياي تقولي كل اللي بالشارع تسولفين وياهم بروحج
:P
ان شاء الله ما اتوتر
نحاول والله المستعان
واتمنى لك ويك اند حلو
:)

esTeKaNa يقول...

Najmah
~~~~~~~~~
لأن مالي حظ
:(
كل وقت ذوره
مو اقولج طالعه 12 زحمه
تقولي رفيجتي اي طلعه الروضه
اقولها روضه تسكر الشارع كله
شدعوة
:Pp~
انتي عكسي
انا الظهر طول الطريج افكر شنو بتغدا والحين بنام واحس روحي اطخ شوي
بس الصبح متوتره
خاصه اذا وراي شغل
!!
الله يحفظ اخوج يا زينه
كل شي ولا كلمته تنكسر
:)

esTeKaNa يقول...

NOOR
~~~~~~
هلا بالنور كله
:)
تخيلي انا صرت اذا عندي مشوار عادي اتحمل اسويه عقب الدوام بس عشان اذا رديت البيت ما ارد اطلع مرة ثانيه لان الزحمه صايره كل وقت
وين بيروحون؟
مادري
!!
وزيين تسوين
اهدي حق نفسج الاغاني
ودلليها
ولا يضيع عمرج تنطرين منو يهديج ويفكر فيج
:)))
سوي الاقتراح
وانا معاج
حتى لو ما يطبقونه اسمنا سوينا شي
:))

esTeKaNa يقول...

ShLaLat
~~~~~~~~~~
الله يهنيج يارب
:)

esTeKaNa يقول...

violinist_q8
~~~~~~~~~~~~~
ما شاء الله
ذاكرها؟
:Pp~
يعني تشجعني انزل في مجلس الامة؟
:)

esTeKaNa يقول...

عائشة
~~~~~~~~~
ويييه ضباب وزحام؟
الله يعينكم يارب ويحفظكم
صج توتر الشوارع صاير مرض العصر
الله يعينكم يارب

esTeKaNa يقول...

على نفسها جنت براقش
~~~~~~~~~~~~~~~~~~~~
وواي برقوشه
اول مرة اييني احساس اني بزنطج
لووووووووووووووووووول
رحتي مو من عيني
من عيون كل اللي فوقج معلقين
:pP~

esTeKaNa يقول...

The. thinker
~~~~~~~~~~~~~~~~~~
الله يسلمك من كل شر
ويا عساك دوم مبتسم ومنشرح البال قول امين
:)

esTeKaNa يقول...

بن علي
~~~~~~~~
الله يعينكم يارب

esTeKaNa يقول...

sn3a
~~~~~~~~~
واي مسافط الخالدية
!!
انا اذا عندي مشوار حق الخالدية اكتئب
اترجا اي احد بس يوصلني
لان صاجة ..عمري ما لقيت موقف
الا اذا بتقطين سيارتج عند الدوار ولا الفرع وتركبين باص وما زلتي رغم كل هذا بعيده
ميزه شويخ الباصات توصلج لي مكانج

بس يالله جدولج حلو
ويوم الاوف يونس يجدد النشاط
استمتعي
هالايام اللي انتي تقررين شنو دوامج فيها اهي احلى ايام
بالدوام
يصير وضعج ودوامج شي مو بيدج
!!


وامي حبيبتي تقعد اختي حق المدرسه بالوقت لللي تصير لويتي مع الزحمه
فمضظطرة تقعد مسكينة
:(

esTeKaNa يقول...

ana_sokkarah
~~~~~~~~~~~~~~~~
يا حيالله السكر
:)
انا كنت ميته الا ابي اسوق
بعد ست سنوات
احس اني متحسفه
!!
يا زين السايق
جان حليبه تشربين
جان كريم تتدهنين
تليفون تسولفين
بس بشرط
سايق فطين مو سايق يطلع العين
:Pp
حتى امج تقول جذي؟
يمكن امي وامج موديل واحد الله يحفظهم لنا
لوووووووول
:))
وحياج الله يا الغاليه

esTeKaNa يقول...

Makntosh
~~~~~~~~~~~
اي هذي مشكله محاضرة الساعه ثمان
!!
لازم تطلعين مبجر حيل
لو ماخذه بوقت ثاني
ما تحتاجين هالوقت كله
بس لانه طلعه دوامات
:(
وفعلا لما تحترمين الدور وتوقفين
وايج واحد من اخر الدنيا ويلف
صج صج موقف يحر

esTeKaNa يقول...

Mishari
~~~~~~~~~
انا موافقه
!!
فعلا شي مو طبيعي
الله يعينا يا مشاري

esTeKaNa يقول...

الوتين
~~~~~~~~~
انتي بنعمه
الف الحمدلله عليها
!!
اليوم جمعه
وباجر سبت
تلذذي بالاجازه
شبعي نوم
وابتعدي عن الناس المزعجين
وان شاء الله الاسبوع الياي بيكون اسبوع حلو وايد
:)

ManalQ8 يقول...

:)))


يحليلج

والله مغامرات ها
:)

الله الحافظ من شر الطريق

الصراحة انا اليوم كنت بكتب موضوع عن الاخلاق القيادة

انا طبعا بعدي بانجلترا
والنظام نظام
والشارع ماكو احلى منه

الحمد لله

بس ساعات تصير اشياء غير متوقعة
كان يخرج سائق كبير بالسن وهنا اقصد كبار السن من اعمار ما فوق 65 و 70
ما شاء الله
ويلف اللفة دبل الوقت العادي
والازدحام وراه
مو طبيعي
والكل واقف
ومحترم السائق

اما ما ينرفزني
ان من عادة الانجليز الوقوف في الدور
الدور الي حتى ما يدرون وين واقفين وليش واقفين

يعني في مجال يوقف يسار
بس لان الناس صافين
بيوقف وراهم
ويسكر الطريج على الي يبي يعبر من الطابور الطويل


يالله

الكل مو مرتاح من وضعة
بس نقول الحمد لله
والله يحفظ لج الوالدة
:)

charisma يقول...

ههههههههههههههههههه
لووووووووووووووووووووووووول
عاادى صاااار صاارلى سنيييييييين اشتغل مانى قايله جم سنه :P
وليييييييييي يووومج استعسر واول ما داومت كانت الكويت بربييع مشاخط بالسيااره وكل ما يتقدم فييج العمر كل مااا الوضع يزدااد سوءاااا والزحمه تزييييييييييييد والاستعساار يزيييد طوووووووووول الطريق استغفر عشان احفظ السااانى لا اسبببببببب
تمر عليييج اجناااس مرييضه ناس مو طبيعيه سكنهم مسااكنهم

موتينى ضحك استكاانه على الوجه الصبوحىى الى طالعتلج مت فير الله
لووووووووول
بس بينى وبييينج اذا ما شغلتى شى يجرخ على راااسج واتركزين معاااى اتشنجيين لول

اااااااااخ لا اذكرينى بداوم اللاحد
:((((((((
ببجيييييييييييييييي
اجاازتى 40 يوم ااااخ يا قلبى

يالله تعودى على الفزعه عشان توصلين مرتاحه انا اطلع قبل ساعه من دوامى الرسمى ويالله الحق
:(

قلب طفله يقول...

لوووووووووووووول

استكانه يا حلوج و يا حلو وصفج الروعه و الله ضحكت ليما قلت بس
كانت هذي معاناتي و توقعت ما راح افتك منها بس الحمدلله الحين افتكيت مدرستي قريبه حيل من بيتنا اقوم قبل الجرس بساعه الاربع و اوصل و انطر الجرس يدق :P

اعانكي الله يا اختاه

:***

ولد الديرة يقول...

الحل بسيط

النومة في الدوام مثل سكن الجامعة

و ترجعين البيت من المغرب الى قبل النوم

تدرين

مصيبتنا اننا ما نشوف غيرنا شنو يسوون علشان يتفادون الزحمة

يعني مثلا

في بعض الدول الاوروبية يفتحون الطرق الخارجة من العاصمة في الصباح ويجعلونها داخلة للعاصمة

و يفتحون الطرق الداخلة للعاصمة بعد الظهر و يجعلونها خارجة من العاصمة

غصب نعيد اكتشاف العجلة

لا وعقب ما نعيد اكتشافها نخلي العجلة مربعة
!

حالة

حيا الله الوجه الصبوحي :p

ZooZ "3grbgr" يقول...

استكانه استكانه
اااااااه يا استكانه

المهم...عندما اتصلت كنت قد وقلت لمرحله ممكن اتهاوش مع نفسي
انطلقت اشكي لها توتري والشارع وكل شئ

وقلت = وصلت
لووووووول

تدرين
الحمدلله انا ما اعرف الزحمة
بيتنا يم الدوام
يعني لو اروح مشي ما اطول
اطلع 7.45
دوامي 8
هههههه
الله يعينج
بس عشان تعرفين انتي شنو استكانه سويت سكر زياده .. كل المحطات قاعده تصبح عليج
:)))))))))))

حدي حبيت امج
الله يخليها لج ويبلغها فيح

|:| DUBAI |:| يقول...

لا و خلص الويكيند

: (

أنا أستانس بالزحمة

تصدقين؟

حلاته اذا تسولفين في التيلفون

و مندمجة و ماتبين توصلين البيت و السالفة

توها فرش

يعني الحش فرش

لووول

أو تسمعين شيء على الاذاعة أو السي دي

من كم يوم أنش وقت حق الدوام

قبلها أخذلي كوفي من كوستا

و أحس بانتعاش

عاد

كل شيء بصوب

لو لفيتي

على بنت

سويت نفس الحركة

اقولج تمت تسبني

و منزلة الجامة

و تباني

أصد اشوفها

بس أنا حاقرتنها

و أسوي عمري ما شوف شيء

خووووووووو

خووووووووو


الواحد يسرح أحيانا

!!

صقر قريش يقول...

انا السياقه هي الي تحرق دمي اكثر شي بروحي عصبي بس الزحمة والبشر الي يسوقون يزيدون عصبيتي تخيلي اطلع من البيت مستانس والنفسية حلوه بسبتهم تقلب 180الف درجة مو 180 180الف واطلع معصب ومتحلطم واكثر ناس اتهاوش وياهم ملوت الباصات اشوفهم يدوسون تييني جسمي يحكني اكون جدامه واخفف وانزل الدريشة وأأشر له يخفف سرعته يم من الأيام شكلي بنزل وبطيح طق فيهم :)

لما أشتغل ان شاء الله الله يكون بعون الي اشتغل وياهم بفضي حرتي فيهم:)

مشكورة استكانة على مواضيعج والله يخليلج امج ويطول عمرها بالعمل الصالح:).