الخميس، أكتوبر 02، 2008

سوالف عيد

...ورحل عنا سريعا
مضت ايامه كالبرق
وانطوت لياليه بسرعة
سأشتاقه...اشتاق للياليه وقيامة
وصفاء انفسنا في صيامه
نسئل الرحمن ان يتقبل منا رمضان
ويثبتنا على طاعاته
ولنتذكر....رب رمضان هو ربنا طول العام
عيدكم مبارك ولو انها متأخرة شوي
:)
.
.
.
.
.
اخر يوم برمضان ...قرأن خبر بالوطن هيئة الرؤيه الشرعيه تجتمع لرؤيه هلال العيد
في الوقت ذاته التي اعلنت فيه السعودية ان يوم الثلاثاء اول ايام العيد
!!
ضحكت على هذا التأخير
يعني على ما تفطرو هيئه الرؤيه
وتمغطو
وكلو لقيمات اخر رمضان
وتقهوو
وتالي فكرو يشوفون الهلال؟
!!
.
.
.
تطبيقا للسنة النبويه الشريفه...ناكل تميرات قبل ان نتوجه لصلاه العيد
بعد الصلاة نتوجه لبيت جدتي لنفطر جميعا حولها
رغم اننا صمنا شهر نسينا فيه الفطور والغدا
الا اننا في يوم واحد نغير كل عاداتنا في الاكل والنوم
!!
أحيانا اتخيل معدتي مستغربه
مبتهره
اشفيها استكانة اليوم استهبلت؟
:Pp~
اضافه لذلك عيني المخيطة
فبعد عشر ايام كنا نصلي فيها الفجر وننام
في يوم واحد نصلي الفجر ونستيقظ
حكمة....لتتعدل نومتنا وحياتنا بعد سهر ولخبطة نوم رمضان
:)
.
.
.
.
.
جمعات الأهل ممتعة
!!
تكتشف أطفال جدد
وبنات ازددن جمالا
والشباب الذين لا نراهم الا بالسنة حسنة
من المواقف التي احرجتني دخول احد اقارب امي
بصحبه ابنائه الدقدق
الاب سلم على خوالي وجدتي واكتفى بالسلام علينا من بعيد
ابنائه اكملو السلام بحماس
سلمت عليهم الى ان وصل لي اكبرهم:
عيدج مبارك
!!
فتوقفت
الولد صوته صوت رجل مخنوق
وشواربه خاطة
@@
ومقبل علي بكل طفولة يبي يسلم
توهقت شسوي؟
صافحته رغم اني ما اصافح ..ولكنه كمل وحبني
!!!!!!
هو جلس بجانب ابوه
وانا انقلب ويهي من الفشله
قهقهات اختي وبنات خالتي احرجتني بزود
ليش ما يعلمون عيالهم؟
اتذكر ان امي في عمر مبكر نبهتني لعدم تقبيل زوج خالتي
او احد ابناء خوالي الكبار
ومن يومها ونحن نكتفي بسلامنا من بعيد ..ولا نصافحهم حتى
مشكله عائلتي والعديد من العوائل سالفه خالج بالرضاعه
اخو يدتج بالرضاعه
بس باقي يقولون لي يدج بالرضاعه
:Pp~
اضافه الى اخو امج من ابوها
واخو ابوج من امه
وخذ عاد من هالسوالف اللي تدوده
فانا فكيت روحي ...حتى مصافحة ما اصافح
:)
.
.
.
.
.
كشخة الأطفال ....تزوق قلبي
بنات طول صبعي وماسكة جنطة
وولد لي ركبك....كاشخ بغتره
هناك اطفال يملكون خفة طينه تجعلني انسى نفسي معاهم
وهناك اطفال دعاله الدنيا كلها فيهم
احدى قريباتي دخلت معها ابنتها....اول مرة اشوف ياهل تشبهني
!!
شئ مضحك
وجهها وطريقتها ذكرتني بنفسي
حسبت اني اتوهم ولكن عندما اكدت تلك الملاحظة امي وخالتي ضحكت
تدرون شلي ذكرني بنفسي؟
البنت عمرها اربع سنوات من دخلت من الباب وهي تضحك ضحكة شقاقيه
ضحكة من يستعد لصورة
cheeeeeeeeeesضحكة
من هني لي الخفجي
وتمشي وتسلم
وما ان تسئلها عن كشختها حتى
تريك حقيبتها ...وشعرها...وتشرح لك حتى من اين شاريه حذائها
هذا بالضبط كان استهبالي
!!
اشرح للجميع امي من وين شاريه لي وشنو سوينا حق العيد
رغم اننا عند الباب امي موصيتني اني ما اتكلم
:pP~
تمنيت ان ارجع طفلة ...العيد عيد اطفال
:)
.
.
.
.
اخي الكبير
ابناء خالاتي الشباب
من هم فوق 24 الى الثلاثينات من العزابيه
لا نراهم الا في المناسبات
!!
لا يتلزم بالزواره الا اذا تزوج
واحيانا في المناسبات يكونون في الشاليه او مسافرين
لذا فتراهم لا يعرفون الجيل الجديد من الاطفال
ولم يرو النسايب الجدد او العرائس الجدد
!!
اخي بدع
طول الوقت ساكت هو وابن خالتي
دخلت زوجة ابن خالي ..عروس جديده
ولكنها بتيته
صغيرونه
وتشبه احدى بنات خالاتي
فكشخ أخوي وقالها:
مبروووك التخرج
اي كليه رحتي؟
البنت دخلت بحقيبتها من الفشله
ودخلت بالموضوع ترقيعا لاخي السنع بالوقت غير المناسب
:PpP~
.
.
.
سأحاول بقدر المستطاع التمتع بهذه الاجازه
بالاسترخاء والنوم
فبعد هذه الاجازه تنتظرني امور كثيرة
اسئل الله ان يسهلها
enjoy ur Eid
:)

هناك 36 تعليقًا:

حسام بن ضرار يقول...

:(

على سالفة الموقف المحرج مع هالغلام، احسن شي مقعد الرياييل بروح و مقعد الحريم بروح

و اذا احد بيعايد العجوز، تقوم تروح له بالليوان او عند الباب

و على قولتج: هالسنين الناس مالها خلق تعلم عيالها الاصول

التربية انفقدت

--------------

عيدج مبارك و تقبل الله طاعتج و كل عام و انتي بخير اخت استكانه

esTeKaNa يقول...

حسام بن ضرار
~~~~~~~~~~~~~~
والله زين تسون
!!
احنا الله يسلمك عندنا نوعين بالاهل
نوع فري كويت والكل مع بعض
ونوع ممنوع الاختلاط
:)
ايامك سعيده
وومنا منك صالح الأعمال

Blog 3amty يقول...

الله لا يحرمنا من هالأيام
ويتقبلها منا في كل عام
:)

وعيدج مبارك

bin3li يقول...

و أخيراً عيدج مبارك :)

terkwaz يقول...

سالفه اليهال اليدد
انا اضيع بينهم
ماقمت اثبت
اللي كان نتفه طال واللي يحبي قام يمشي..

من كل باب يطلع واحد يديد؟!

بالعيد هذا
قلت لواحد شسمك قال طلال
طلع من الصاله
ورد دخل
ناديته تعال طلال
جان يقولي لا انا مشعل @@

طلعوا توم
لووول

الله يحفظهم

وعيدج مبارك :)

ابو لطيف يقول...

تقبل الله طاعتكم

وعيدج مبارك

وعساج من عواده

7osen يقول...

اي والله استكانة رحل بلياليه الحلوة وبأيامه الخفيفة اللي كلها ايمان وراحة

انا من اليوم خلاص ضاق خلقي
ما احب هالايام اللى بعد رمضان ممله

ضحكت على سالفة السلام
والله احسن شي اللى تسوينه لا صغير ولا كبير سلام من بعيد وخلاص
احسن

في صبيان يكبرون وعلى بالهم للحين يهال
:)

التعود على الحياة بعد رمضان يبيله جم يوم على الاقل اسبوع من العساره

يعطيج العافية

وعيدج مبارك

Najmah يقول...

مساء الفرح
شلونج استكانة
عسى كل ايامج اعياد وافراح
:*
بشري تسنعت نومتج؟
انا هالنومة اللي معاندتني
يننتني والله
صايره انام باليوم 3 او 4 ساعات
شكلها بتودرني
:\
ابيييه ياحلاة اليهال والله
ياخذون قلبي
ويلعبون فيني
ويطيرون عيديتي كلها
: )
ياربي ما اتحمل اشوفهم
طول الوقت اصورهم واصور معاهم
وبعدين اعطيهم عيادي
بس اللي احبهم ويحبوني طبعا
الدعاله ما اعطيهم
تحبني اعطيك ماتحبني خلك عند امك
: P

Purplecious يقول...

عيــــــدج مبارك

وكل عام و انت بخيــــــر

:**

AbWaBy يقول...

لوووووووول خوش مواقف والله تضحك ...وعلى الولد الرجل اللي سلم عليج كنتي تقدرين تقولين له كبرت ما يصير تسلم إنت رايال أو جا سلمتي عليه وقلتي له آخر مرة ترى إنت كبرت :)

Om MoD يقول...

العيد عليج مبارك حبيبتي ...

على موقف أخوج مع العروس اليديدة ..نخيلي أنا صار شي يشبه هالموقف بيوم العيد وأنا كان عندي مودو بعد يعني مو عروس يديدة خال زوجي شافني جان يقول منو هالحلوة أنا بغيت الأرض تنشق وتبلعني جان يقولون له زوجة فلان وجدام كل اللي قاعدين يقول حق زوجي زوجتك حلوة ...تخيلي حتى اللي ما يبي يشوفني أو مو شايفني قام يشوفني وأحس بناتهم ودهم ينتفوني من الغيرة ....واللة فشلة واحراج :)

THE BOSS يقول...

اهم شي حصلتي عيادي وبعدين في ناس مهما بلغ من العمر يبقى يتميز بالبراءة و الطفوله ويحس نفسه للحين طفل
وعطني ولعه و ليمون

أتيت متاخرة يقول...

ل عيد وانتي بخير وصحة وسلامة
وعساج من عواده

اييييييييييه احلى شي في العيد اليهال ايننوووووووووون
وخاصة المبلتعين >> الي رحنا وشرينا وسوينا
اموت عليهم


عسى ايامج كلها اعياد

PaLoMiNo يقول...

3eeeeeeedich embarak estekana:)

الخيلاء يقول...

عيدج مبارك
:)

ياحلو اليهال زووغه
المنفوش و النيديه
شي شي
الله يحفظهم

احنا عيالنا مايعترفون بالانواط
يختج طقت ال 4 و تحت
بس يبون اخرده لو تنقزين ما يعطونج اياها و ال 20 يحذفونها ترس الارض
لول

واحد منهم اسم الله عليه قمنا نحدق له بالخرده عشان يحبنا و يلمنا لمه العيد

على قوله امه هالمخباه بتنشق
اليوم ماراح نكمل فيها العيد

الله يحفظهم

ويسر كل امورج
و يعينا على سمتته الدوام و الدراسه
لي عيد الضحيه جانه من الحيين

:)

على نفسها جنت براقش يقول...

عيدك مبارك

:)

تراب الكويت يقول...

اذكر قعدت اول يوم اسالهم
متى يأذن ابي قهوة

ما حسيت إلاّ واحنا بالعشر الاواخر
لا مو صج خلص رمضان !!

صج رمضان غير غير

الله يعيده علينا ونعيش ايامه يارب
ويشافي كل مريض ويرد كل غايب

تقبل الله طاعتج

عيدج مبارك
عساج من عواده

:)

اسفه للتأخير

ZooZ "3grbgr" يقول...

انا اول يوم العيد صليت الفجر وحسيت بالعطش رحت شربت ماي وانا اشرب جان اقول استغفر الله اذن خلااااااااص
لووووووول

كل عام وانتي بالف خير
وعساج من عواده
سويت هوليدي

على فكرة
ابتسامتي ما تفارقني لما اقرى اي بوست منج

Makintosh يقول...

جنج قاعده تتكلمين عنا
نفس الشي مانشوف الصبيان الي فوق 18
الا بالمناسبات

عيدج مبارك

فريج سعود يقول...

كل عام وانتي بالف خير

.
.
أحيانا اتخيل معدتي مستغربه
مبتهره
اشفيها استكانة اليوم استهبلت؟


هههههههههههههههههههه

حلوة

صلاح الأنصاري يقول...

لله در الأعياد التي جمعت الفرقاء وصفت النفوس فزرعت الحب والابتسام رغم عن الجميع الا من الذي جُعلت على قلوبهم أقفالها ..ال (( صم بكم عمي فهم لا يعقلون))
وماشدّتني في البوست أخت استكانه هي "شبيهتك " الملائكية أم الأربع سنوات لأن العيد لهؤلاء الأطفال شيء آخر ...فيقول مصطفى صادق الرافعي رحمه الله :
هؤلاء الأطفال الذين هم السهولة قبل أن تتعقد
والذين يرون العالم في أول ما يمنو الخيال ويتجاوز ويمتد
يفتشون الأقدار من ظاهرها ولا يستنبطون كيلا يتألموا بلا طائل
ويأخذون من الأشياء لأنفسهم فيفرحون بها ولا يأخذون من أنفسهم للأشياء كيلا يوجدوا لها الهمّ
قانعون يكتفون بالتمرة ولا يحاولون اقتلاع الشجرة التي تحملها
ايتها الرياض المنورة بأزهارها
ايتها الطيور المغردة بألحانها
أيتها الأشجار المصفقة بأغصانها
أيتها النجوم المتلألئة بالنور الدائم
أنتِ شتىّ ، ولكنكِ جميعا في هؤلاء الأطفال يوم العيد

أختي الكريمة
تقبل الله طاعتكم وعيدكم مبارك وعساكم من عواده

that's iT يقول...

هيا هكذا أيامنا الجميله تسرع الخطى و ماإن نذق حلاوتها و نستمتع بطعمها حتى نراها قد أعلنت الرحيل (اللهم إجعلنا من عتقاائه )..

و أخيراً حدي كنت أنطر بوستج مال العيادي:)

دشيت أول يوم كنت متوقعه إنج نزلتي بوست العيد:p

عيدج مبارك و ترى بجيك على إحسابي وصلت العيديه ولا لأ:p

ur sis

Selezya يقول...

اخييه
والله للحين سوالفج تهبل صج اشتقتلها :)
حبيبتي ترا ادري متاخره وايد بس هم كل عام وانتي بخير
:)
سالفة البنت اللي تشبهج موتتني من الضحك
لان انا بعد كل ما شفت بنت بس شرط تكون ملييييقه علطول اتذكر نفسي
لوول والله قبل شايفه نفسي مدري على شنو

:))

اسفه على القصور :*

. . . ساخر كويتي يقول...

هههههههههههههه
هههههههههههههه

موواقف العيد لا تنسى ( ضمة فوق التاء)

اذكر ايام الطفولة كان يزورونا الاهل وكان اكو واحد معاهم بوتمبه

من وناسته قعد يطامر على مقاعد مثل الغنفات
شوية والا بوووووم

باط وحدة ومخربها قعدنا نضحك عليه
ضحك لدرجة ان كل سنة نتذكر هالموقف

سالفة الشباب اللي توهم بالغين فمتعودين على التبوس هههههههههه
يحتاجون شوية تنبيه بس

اذكر صالي موقف نفس هذا مع مرت اخوي الكبير متعود اسلم عليها وانا صغير فعادي الموضوع بس وانا على بداية البلوغ وفي يوم العيد عطيتها بوسة فقعدت تضحك وتقول عادي انا مربيتك

ومن يومها ،، ما اقرب من احد خخخخخخخخ

تحياتي

Sn3a يقول...

لول عيدج مبارك
ضحكتني الياهل اللي مثلج
عيل انا كنت نحيسه
كل ما احد يقولي وانا صغيره من وين هالشي
يتغشمر وياي
اقوله ليش تبي تغلدني؟
وما ارد
لووول


انا مثل شباب عايلتكم
ماشوف اهلي الا بالمناسبات
واطالع يهالو صغار
وبنات ورياييل يدد
معاريس يونسون

بس اهم شي اخوج لووول



بس استكانه قلبي انا قريت هالجمله احس فيها شي غلط
وهناك اطفال دعاله رب العالمين فيهم

لؤلؤة يقول...

عيدج مبارك استكانةوتقبل الله طاعتج
يا حلاتهم اليهال يسوون جو
ايه والله كنا نحس بالعيد أكثر يوم كنا يهال
:)

مُحَسّدْ يقول...

الأيام تفعل فعلها بنا

سبحان من يغير ولا يتغير

someone_q8 يقول...

السلام عليكم
عيدج مبارك اختي استكانه وتقبل الله طاعتج

لين يقول...

كل ما قريت سطر إكتشفت إن عيدج مثل عيدي و حتى الأغلاط و الصيدات متشابهه واايد .. عجبتني الحياة في الموضوع كأني معاج بالزواره ;)

تقبل الله طاعتج و عيدج مبارك :)


ليـــــــن

بنت أحمد يقول...

تهبل سوالفك خاصه عن الأطفال وحركاتهم

تسلم يدينك

تقبلي مروري الأول ولن يكون الاخير بإذن الله

(((كل عام وانت بخير)))

عيد مبارك

esTeKaNa يقول...

blog 3mty
~~~~~~~~~~~~~~
اللهم امين
صاير شاعر
:pp~
ايامك سعيده
:)









BIN3lI
~~~~~~~~~~
وأخيرا
ايامك سعيدة
:))














Terkwaz
~~~~~~~~~~~~
لوووول
يا حلاتهم
عاد انا اموت على التوأم
الله يحفظهم يارب
وأيامج سعيدة
:)












أبو لطيف
~~~~~~~~~~~~~
منا ومنك صالح الأعمال
واياك سعيده ما قصرت يا ابو لطيف
:))











7osen
~~~~~~~~
ممكن نحي قلوبنا برمضان طوال العام
تلك الامور التي اعتدت عليها برمضان
حاول احياءها ولو بشكل بسيط
ولو بركعتين قبل النوم
وان شاء الله ستكون بخير
ما نرضى لك بالضيقه يا حسين
:))
الله يعافيك
وأيامك سعيده











najmah
~~~~~~~~
يا مسا السعادة كلها
:**
والله النومه معتفسه
ووراي دوام
بس عادي يوم واحد نفزع فيه وتتسنع النومة ان شاء الله
:)
واي يا حلاة اليهال ويا زينهم
حطي لنا صورهم خلينا نتحلى عليهم
عسى ربي يرزقج ونتحلى على عيالج وعيادي عيالج كلهم عندي
:***

esTeKaNa يقول...

purp.
~~~~~~
وأنتي بخير وصحة وسلامة
:))








abwaby
~~~~~~~~~
ياهلا ويا مرحبا
صح
كنت اقدر اقوله
بس تدودهت وسلمت
:))
حياكم الله



















om mood
~~~~~~~~~~~
ياهلا وامية هلا
أيامج سعيده يارب
:)
واي زوقه خال ريلج
صج احراج
بس احراج يونس ولا شرايج
:Pp~
والحجي ريلج شنو ردة فعله؟
ذكرتيني بمرت عمي
عم ابوي خلانا كلنا وعايدها
عباله بنت من بناتنا
:))))















The boss
~~~~~~~~~~~~~
سلامات سلامات
:)
هالعيد اول عيد ما احصل عيادي
خلاص توظفت
:(









أتيت متأخرة
~~~~~~~~~~~~~~~
ياهلا ويا مرحبا
اي والله يا زين اليهال اللي يسولفون ياخذون القلب
:))
يا عسى ايامج كلها اعياد










palmiono
~~~~~~~~~~~
ايامج سعيده
ياهلا ويا مرحبا
:))












الخيلاء
~~~~~~~~~
هلا بالخيلاء الي ماخذه قلبي هلا
:))
ايامج سعيده يارب
وااااي يا زين اليهال
صاجين ترا الخرده تونس
حطي عشرين بالبوك تخلص بسرعه
خرديها دنانير وناسه
البوك ينترس
وما تخلص بسرعه
:pP~
اي والله الله يعينا على سمتة الدوام
اشلون دراستج؟












على نفسها جنت براقش
~~~~~~~~~~~~~~~~~~~~~~~
ايامج سعيده يارب
:)))










تراب الكويت
~~~~~~~~~~~~~~
اي والله
رمضان اسرع شهر بالسنه
الله يعوده علينا ويتقبل منا يارب
:)
ايامج سعيده
وما من تأخير يا الغاليه

esTeKaNa يقول...

zooz
~~~~~~~~
وي يا بعد قلبي قلبج
عسى ربي يرويج من ماي الجنه قولي آمين
ويدوم ابتسامة وفرحته على قلبج
:))
وانتي بخير وصحة وسلامة
حياج الله
















makntosh
~~~~~~~~~~~~~
الظاهر هذا اسلوب كل عيالنا
:)
ايامج سعيده











فريج سعود
~~~~~~~~~~~~
وانته بخير وصحة وسلامة

اشوفك تكركر ها؟
الظاهر معدتك تعاني من ذات الانبهار
هههههههههههه
















صلاح الانصاري
~~~~~~~~~~~~~~~~
تقبل الله منا ومنك صالح الأعمال
ويا هلا ويا مرحبا بصلاح
كل تعليق منك يمثل اضافه كبيرة لمدونتي
شكرا لتواجدك
شكرا لتعليقاتك الجميله دائما
:))












that's it
~~~~~~~~~~~~~
اللهم امين
عسى ربي يتقبل منا ويصلح حالنا بعد رمضان
ويا هلا ويا مرحبا باختي العزيزه
واي انا مفتر راسي
كل البوستات والتعليقات متأخرة
سامحيني
بس ميخالف شي احسن من ولا شي
:))

esTeKaNa يقول...

selezya
~~~~~~~~~~~
ياهلا يا هلا
تو ما نور البلوق
من وين طالعه الشمس اليوم؟
صج وحشتينا
:))
وانتي بخير وصحة وسلامة
عاد ما اتخيلج ياهل مليقه
حرام عليج
!!
وكل عام وانتي بخير















ساخر كويتي
~~~~~~~~~~~~
اثاريك ساخر من كنت صغير؟
:Pp~
وهذا الياهل البوتمبه زاركم بعدين؟
انا لو منه اقاطع زوارتكم ابد الدهر
:))))
وصاج على سالفه مرت اخوك
انا ريايل خالاتي مربيني وعيالهم كبري واكبر فاول ما تنتبه يكون شي غريب عليك انك ما تسلم بعدين يصير عادي
!!
حياااك الله

















Sn3a
~~~~~~~~
ياهلا بالسنعه
نحيسه عاد؟
لووول
اي ذكرتيني انا اقول كل شي
بس خليني اشوف شي لي عند واحده من بنات خالتي
اكرهه
!!
ماحب البس مثل احد من كنت ياهل
من العساره اللي فيني
:))
ويا بعد قلبي قلبج شكرا لانج نبهتيني على الكلمه وغيرتها
الله لا يحرمني منج يارب
وزوري اهلج
البنت تنفقد ترا

















لؤلؤة
~~~~~~~~
أيامج سعيده يا اللولو
ويا زين اليهال والله
:)












محسد
~~~~~
سبحانه
:)









someone-q8
~~~~~~~~~~~~~~~
وعليكم السلام
ايامك سعيده
ومنا ومنك صالح الأعمال
:)









لين
~~~~~
ياهلا باللين كله
اللين ما كان في شي الا زانه
:))
نورتي بلوقي
وحياج الله
ايامج سعيده يارب












بنت أحمد
~~~~~~~~~~
ياهلا ويا مرحبا ببنت احمد
بلوقك ومكانك
حياك الله دوم
:)

عــائــــشـــــة يقول...

السلام عليكم ورحمة الله وبركاته

مباركن عيدج وعساج من العايدين

أدري قاطعه ولا لي حجه .. بس تدرين كيف مشغوله

تولهت عليج وايد

تقبل الله صيامج وطاعتج وكتبك من المقبولين ومن عتقاء النار

دمتي لنا بود

feelingstalk يقول...

وايد حبيت وصفج ليوم العيد حسيت اني وياكم
بس كان ودي اشوف ويه اخوج لما عرف انها زوجه ولد خالج
:p