الثلاثاء، أغسطس 19، 2008

أيامي الأولى

( بصمة)
أمام ذاك الجهاز المتعسر أقف
اجرب الضغط بالابهام
بالسبابه
بكل الاصابع
وفي كل الاحوال...فشل في قبول بصمتي
!!
لم يتبق الا اصابع رجلي
تذكرت ان تكرار الفشل مرتين يثبت حضوري
فاكتفيت بتكرار الفشل دون مراجعة اي شخص
بعد اسبوعين انتبه بأني لم ابصم الا يومين او ثلاثه
اتجه للاداره المسؤله:
انا فلانه الفلاني
يبتسم الموظف:
اعرفج من فشل بصماتك على الجهاز
مجرد تكرار الفشل صباحا وظهرا اعرف انك وصلتي
فشل قادم
فشل ذاهب
!!
يمكن انتي بلا بصمة
كلمة انتي انسانة بلا بصمة وفشل قادم فشل ذاهب
جرحت شي فيني
انا انسانه بلا بصمة وأثر؟
هل انا الفشل القادم الذاهب؟
كنت سرحانه في عالم اخرماله شغل بالموضوع
لم يرجعني لواقعي الا اقتراحه:
دعينا نكرر اخذ بصمة يدك لعل وعسى
:)
.
.
.
.
(الاسبوع الأول)
كان اسبوع الانبهار الاول
!!
الموظفه اليديده؟
ابتسم ...اي نعم انا انا الموظفه اليديدة
وعلى ذات الابتسامة الشقاقيه من الساعه السابعه والنصف الى اخر الدواام
احفظ في عيني ذكريات اليوم الاول
ولحظات تعرفي على من حولي
احاول ان اكون حذره بقدر المستطاع
واسمع اكثر من ما اتكلم
!!
زميلاتي في العمل حليوات ..من كل قطر اغنية
من اول يوم داومت رغم وجود عمل الا ان مواضيع الرجيم والاكل والتجهيز للعيد والرمضان هي الشغل الشاغل
عموما بعد ثلاثه اسابيع اكتشفت ان هذه المواضيع افضل بكثير من تلك المواضيع التي تطرح بكل جرأه دون مونتاج
:(
.
.
.
.
(عندما يستملق الرجال)
هو مسؤل بعمر ابي
طيب ،سمح الوجه،طلق اللسان
استقبلني منذ يومي الاول وكان المسؤل عن تعريفي على الجميع
كثيرا ما ينكت على كل موقف وتصرف
ادخل الممر اسمعه :
اوووه استكانة يايه مبجر
ارد عليه:
اي والله مبجر
وابتسم
!!
اكتب بعض الامور في مكتبي يمر:
شعلينا شعلينا صار عندنا مكتب وكبرنا
ابتسمت:
اي والله شفت اشلون
:)
اسئله عن موضوع معين
يذكر لي مسلسل ماله علاقه بالموضوع
يعلق تعليقات سخيفه على كل شئ
بعد فتره بسيطة اكتشفت امر....انه مليق
واني مظطره على مجاملته
الملاقه لا علاقه لها بالشهاده والعمر ولا المنصب
واكبر مصيبه..عندما يستملق الرجال
!!
خف الطينة نعمه من الرحمن لابد ان يشكر ربه كل من يتمتع فيها
ومن لا يتمتع فيها....لابد ان يحترف الصمت
حاولت بقدر المستطاع مجاملته ،لكن المشكله ان ملامح وجهي تأبى المجامله
بعد احد التعليقات السخيفه من نوع:
اوووه استكانة مكتوب اسمها بالاوراق شي عدل
اوووووه استكانة تتمشى
اوووو استكانة تشرب قهوة
!!
هاو وبعدين؟
مو قادرة اتحرك
:(
جائني وسئلني:
أختي...تتضايقين لما اضحك وياج؟
اذا تتضايقين قولي لي انا طبعي جذي احب انكت واضحك
أنا أخته؟
ذلك اول سؤال تبادر لذهني وهو يتكلم
فجاوبته :
لا انته بحسبه الوالدما عليه
:))
بعد سؤاله انبني ضميري..احاول بقدر المستطاع مجاملة تعليقاته
.
.
.
.
(تليفوني كل دقيقة...بس يرن)
:Pp~
في فتره غياب اسرتي وسفرهم....تم تجهيز مكتب خاص فيني
كنت سعيده جدا رغم بساطة كل شئ
اعطيت خادمتي رقم هاتف مكتبي اذا رغبت بشئ تتصل علي
في يومي الثالث ...الساعه الثامنه صباحا
تكلمني المشرفه على تدريبي بموضوع مهم وانا مركزه بقدر المستطاع
...يرن هاتف المكتب
يالله من فضلك من داق علي؟
ارد على التليفون لاجد خااادمتنا متصله:
الووووووووو استكانووووو انتي داخل دوام؟
اوطي صوتي:
اي اشفيج؟
ترد برهاة:
لا بس يبي شوف كله تمام ان شاء الله؟
كله نفرات زين ماكو مشكل؟
شنو يبي غدا؟
!!
تحمل على عاتقها توزيع رقم هاتفي على باقي الاسره
الساعه عشر وعشر جدتي تتصل:
الوووووووووو استكانة
اسم الله عليج الرحمن الرحيم
الوووووو..هاو علامج تساسريني؟
نايمة انتي ليش تتكلمين شوي شوي يمة؟
ونظرا لوجود العديد من الناس حولي احاول ان اهمس واوطي صوتي
ولكن لا فائده..صراخ جدتي فضحني
:)
وتتوالي الاتصالات بشكل مضحك
عمي يتصل:
اقعد يا البنية ...مكتب جنه صج
بنيتنا كبرت والله،اييه دنيا
وقته بللله؟
اخر اتصال كان من خالتي تسئلني ان كنت احمل معي اي شئ اكله:
عن المستحا يمة وراج دوام طويل اخذي وياج كل يوم توست وعصير
أحيانا اشعر بأني طفله...عمرها اربعه وعشرين سنة
مابقى احد ما تصل حتى ازواج عمااتي
رغم ازعاجهم شعرت باحساس جميل
انا بنتهم كلهم
فرحتهم فيني فرحت قلبي
!!
.
.
.
.
.
(متأهلة؟)
جائت زائره لزميلتي من قسم اخر...عرفتني زميلتي عليها وتبادلنا بعض الاحاديث العادية
بعد شوية سوالف سئلتني:
انتي متأهله؟
جاوبتها:
لا والله انا تعيين جديد
!!
ابتسمت:
لا انتي متأهله اسم الله عليج؟
ما زلت اكرر الغباء واجاوب:
والله مادري
:)
تبتسم:
الكويتين قبل يقولون عن المخطوبه او المتزوجه متأهله
فهل انتي متأهله؟
ضحكتني....ليش تسوي لي اختبار لهجة كويتيه
اي سئليني السؤال مباشرة
!!
.
.
.
.
(استهبال استكانة مع المدير)
بعد ثلاثه اسابيع ...يستدعيني اكبر مدير بالاداره
استدعائه لي وقف قلبي
لا اعرف تكنك التعامل مع مسؤل
ولا اعرف لما استدعاني
!!
كنت خائفه لدرجة اني دخلت دون ان القي السلام
وجلست بصمت
فابتسم:
علامج يبه؟
حتى سلام ما سلمتي؟
فجاوبته:
الله يسلمك ماقصرت
!!
جواب ماله علاقه بالسؤال
الم اقل ذات مرة اني عندما اتوتر ما اسمع عدل؟
سئلني عن موضوع معين بدأت بالعمل به
تكلمت ثم انطلقت...وجدت نفسي اكرر كلمة:
انا حسيت ...وما احس ان كيت وكيت
فاجئتني:
استكانة من غير احساسات
قولي انا اعتقد ..انا ارى مو انا احس
!!
تحول وجهي لعلامة تعجب
ثم انقلبت لمخلوق متحقن الوجه مرتبك
يبقق عيونه...ويكتم ضحكته
هاو اضحك شدعوة ما يسوا المووضوع يفشلني
كيفي انا ابي احس مابي انا اعتقد
!!
كسرت خاطر نفسي ولكني استطردت وكملت بشرح رايي
رغم ملامح وجهه الصارمة الا انه ابتسم فجأة:
كنت قد استدعيتك لاني قرأت ما كتبتي ببعض المواضيع
وبصراحة انا منبهر باسلوب كتابتك وتسلسل افكارك بمنطقية
كل ماريده منك ان تتمسكي برايك اذا اقتنعتي فيه
واضافه لذلك...لا تبخسي من قدر نفسك ايا كان الشخص الذي امامك
ترددك وخوفك لا محل له من الاعراب
اريدك ان تكونين اقوى واكثر ثقه بنفسك وافكارك
قد تكونين اصغر من عين هنا،ولكن هذا لا يعني بأنك اقل مستوى تفكيرا منا
!!
شعرت بسعادة من نوع آخر ...اول مرة اشعر بهذي النوعيه من السعاده
وعدته ان اعيد النظر ببعض الامور واضاعف جهدي بالعمل والاحتكاك بالخبرات الموجوده
اوكل لي بعض الاعمال التي تشغلني طوال الوقت
.
.
.
لا تكفيني اربعه وعشرين ساعة
!!
عمل
وكتابة بحث
ونادي
استهلك كل ساعات يومي
واضع راسي على مخدتي في نهايه اليوم سعيده
لاني ببساطة احقق بعض الرضا عن نفسي
اشغل نفسي عن التفكير باي شي ممكن يعكر صفوي
.
.
اتمنى ان تكونو جميعا بخير

هناك 80 تعليقًا:

يعقووبوو يقول...

دوامي لما الحين كروت (:
و واذا مديرج ينكت. مديري ينكت وساعات يغني ويرقص ويدق صبع بعد (:
-
الكل موكافيته الـ24 ساعة

هنوفي يقول...

هاااي استكانة مساج الله بالخير ..وااي ضحكتيني يوم تقابلين المدير وانتي متوهقة ومت من الضحك على ردج اللي ماله علاقة !! بس حرام كسر خاطري مديرج المليق حسيت ان على نياته ..حراام جامليه لا تدقرينه ..الله يوفقج انشالله ويسر امورج انتي تستاهلين كل خير

مُحَسّدْ يقول...

يا حليلها الخادمة تشيك عليج :)

من الجميل ان يشعر المرء بإهتمام من حوله

DanDash يقول...

استكانة حسستيني اني انا الي مداومة وياج و قاعده مجابلتج بالمكتب

الله يوفقج ان شاء الله و يسخر لج جند من جنده و عبد من عبيده آمين يااا رب

ذكرتيني لما داومت اول يوم تدق علي امي و انا اقدم درسي و معصبة و تحاتي ليش ما تردين؟
يماا قاعده ادرس اليهال
تقول لي وسلم قلبها و الله بعد قمتي تدرسين لووول

و موفقة ان شاء الله

kuwaitawy يقول...

السلام عليكم


اول شي احب ابارك لج بالدوام اليديد


وبالتوفيق انشاءلله ومنها للأعلى يارب


هالامور دايم تصير يا استكانه

ضحك وسوالف


لا تنسين انهم بيكونون رفقة عمر وياج




اتمنى لج التوفيق من كل قلبي

Najmah يقول...

داشة اهني بكل تعبي وانفجاراتي

مشكورة لانج غيرتي المود عليي

خاصة متأهلة
اعجبتني
:Pp

انا عندي ساعات مادري شسوي فيها :(
تبادليييين؟

عسى ربي يوفقج بكل امورج
ويبارك بوقتج ويكتب لج النجاح والانجاز بكل لحظة

محـــــارة يقول...

حياتي عسى دوم سعيده والضحك من الخد لي الخد

مت ضحك على سوالفج وفصلاتج .. فعلا يكره ريال وماليق اااف ماينطاق ياحلاة التكانه يا ناس

وحلوه سالفة متأهله اول مره اسمعها كسبتي فيني أجر وعطيتني خوش معلومه قال شنو قال متأهله عيل أنا طولت وأنا مستجده ومقدمة اوراقي بس ماتعينت انطر ديوان الخدمه

قالت شنو قالت متأهله !!!!

انتبهي لنفسج يالغاليه وربي يحفظج مشتاقتلج موووووووووت والله يسعدج وينولج مرادج

QiYaDiYa يقول...

يقولج ما عندج بصمة !!

قوليله بلاك ما شفت بصامتي بقلوب البلوقرز بس !
هذا غير اهلج و الناس عموما !

;p

و الله يوفقج بوظيفتج ..
انتي انسانة مميزة ..
و قلبج ابيض ..
تستاهلين كل خير ..
و ربي راح يرزقج على قد نيتج ;*

فريج سعود يقول...

فرحان لج كما لو كنتي رضيعتي

الله يوفقج

ومنها للاعلى

لا تنسين شكر الله في كل لحظة

موفقة

MO3ATH يقول...

موشرط تتأثرين من كلمه قطها واحد مايعرفج ولايعرف انتي شنو ، مرات الواحد وده يمرر الكلام بدون مايركز فيه :)

اهم شي انت حسبه الوالد لووووول زين تسوين فيه :)

حلو ان العموم مهتم فيج ويسأل عنج حتى خدامتكم :) يدل على انج انسانه ناجحه اجتماعيا ولج ثقلح بالعايله والكل خايف عليج ، اهم شي لاتنسين الاكل لوووول عجبتي صراحه

عفيه عليه مدير الي قابلج وقدر كتاباتج عطاج الدافع الي تحتاجينه ، الربكه اول مره بس بعدين بتتعودين داشه طالعه عليه وان شالله يكون فاهم ويسمع لج عدل :)

المهم راحتج النفسيه بالمكان ، مبارك عليج الشهر مقدما

bin3li يقول...

هاههاهاهاها
متأهلة!!
هاهاهاها
أنا لو ماكانج بقولها
لا ، تصفيات
ههاهاهاها

ترى ما كملت البوست
متأخر على الدوام

باي باي

lawyer يقول...

مال البصمه عسسسررررررررني جليل الحيااااااا


بس برد قلبي المدير

هذا رفع و هذا حبط!!


اهم شي يقولج عل و عسى !!

مال طراااااااااااق




اما اسبوعج الاول
احسسسسسسسسسسسن مني بوااااااايد
قولي ليش
اناااااااااا وعليه يوم داومت وزني 46

من العصاااااالاه و البراءه الي انا فيها
يسألني وااااااااحد انتي بنت منووووو؟؟

عباله بنت واحد من الموظفييييييين !!!!





وفي اسبوعي الاول اسسسسسستملق مديري
و قاااااااااااام يتفلسف
جان اقوله اي ادري الكرسي الي انت عليه مثل كرسي الحلاق كل من يقعد عليه شوي و يقوووووووووووم


من يومها قام يحسبلي الف حساب






انتي زين اشووووووووووووووة خدامتكم داقه
انااااااااا الطبااااخ مطرشلي الريوق ويا الساااااااااايق

في تبروير !!!

بغييييييييييييييييييييييييت اذبحه
و قاموووووووو البنات يقولون لي فطييييييييم ياحلو بيضكم خلي طباخكم يسويلنا !!


يدتي الله يرحمها
كانت تدق علي عشر مرات
و تقولي وينج
اقولها بالدوام يما لولوة ويني بعد؟؟

تقولي لأ من ساعه دقيت عليج وينج
اقولها متأخره
تقوووووووووووووووولي وخزياه بس
عيال الكويت مو مال مسؤليه


هههههههههه
تحاسبني اكثر من مديري


اشفيني هذرت من الصبح


صبااااااااااااااااحج سعاده قولي امين

ARTFUL يقول...

دوامي القديم كان فيه بصمة بس عقب سنه من داومت

لما يوو ببصمونا

لا تشوفين المسخرة اللي صارت

تعال نق أي اصبع
;D

بس دوامي الحين ولله الحمد فيه بصمه بس المدير السنع اللي يفكر عدل

ما يهمه متى تيي بس المهم تخلص اللي عليك بالوقت المحدد

وبالنسبه لي هذا التفكير السنع

=)

وعلى الملاقة ترا ثبت علميا (بمختبر آرتفل)
إن الرياييل دمهم خفيف أكثر من الحريم

;p

بس هذي حلوه استكانه تمشي استكانه تاكل استكانه اتحرك استكانه قامت
ما شالله عليج عندج وايد انجازات
;p

وناسه لما يصير عندك رقم مباشر بمكتبك
;p

يحليلها اليده
سلمي عليها

......
اووووو هذي الخطابه أم السحور والدبور
وخري عنها
......
وأنــــا أحــس إن
المدير العود شكله خوش مدير عسى الله يوفقج وسعدج ويسهل أمرج ويوفقج دنيا وآخره

حافظج الله

والله يسلمج ما قصرتي
;p

نون النساء يقول...

اتذكرت اول ايامي دوامي

كان الإنترنت عندنا فيه مشكله
المهم ولا يوقف عندي بالمكتب وقاعد يشيك على الجهاز ولا يسألني اتعرفين رقم خدمة العملاء مال الإنترنت قلتله إي


من التوتر والمستحى كتبتله رقم كنتاكي


ألو مطاعم كنتاكي اتفضل حدرتك ؟



اتخيلي
الإحراج




يلا ما عليه باجر تتعودين
:P

بالتوفييييق تكّوون

ray يقول...

استكانة مت من الضحك على الاستهبال

:D

هذي أنا :P
مرة خالي داق علي يقول السلام عليكم
رديت عليه الحمدلله بخير

Happy Face يقول...

أول مره أدخل هذا البلوق العجيب لأنه مادحينه لي وااايد، عموما سمحيلي أشارك بالتعليق و مبرووك عليج الدوام الجديدماشاءالله لا قوة إلا بالله اسلوبج أكثر من رائع والله يتمم عليج، (الظاهر هذا عندكم وراثه بالعائله)
دعواتي لج بالتوفيق من كل قلبي
:)

Happy Face يقول...

سمحيلي إستكانه هاذي أول مره لي أعلق فيها، و مبرووك عليج الدوام الجديد ماشاءالله لا قوة إلا بالله اسلوبج أكثر من رائع والله يتمم عليج، الظاهر الإسلوب الحلو عندكم وراثه بالعائله:)
دعواتي لج بالتوفيق من كل قلبي في الدوام الجديد و مع المدير الجديد و العادة إن أول الأيام تكون بدليات مو طبيعيه كله الله يسلمك مشكور ما عليك زود :) أي حاجه في أي مكان مثل ما يقولون المصريين..

عثماني يقول...

موفقة ان شاء الله اخيتي استكانة

فقط .. كوني كما انتي

و ستكونين مبدعة في عملك

:)

Fahad Al Askr يقول...

واضحة تأثيرات الدوام اليديد يبة، يا خوفي كل كالتفاؤل والوناسة اللي انتي فيها، يقلبون تالي إحباط وطاقة سلبية

بالمبارك وناطرين العشا

Mashe-qe6ari يقول...

احلى شعور بالدنيا لما تكونين راضية عن انجازاتك اليومية

يعطيك شعور بالطمأنينة انك ستحظين بهالشعور بيوم من الايام تجاه فترة اطول من اليوم: شهور او حتى سنين طوال تشوفين فيه اللي بنيتيه خطوة خطوة وترضين وتفتخرين

احلى شعور! ـ
الله يثبتك ويسعدك ويسعدنا وياج
=))

غير معرف يقول...

الله يتمم عليك

. . . ساخر كويتي يقول...

بالتوفيق باذن الله
ومنه تنطلقين الى مستويات اعلى واعلى في الوظيفة باذن الله

بالنسبة لي كان معانا واحد من الشباب في الدوام على باله ان دمه خفيف

كان مسكين يحفظ مصطلحات المسلسلات من نكت ومجاملات وخلافه ويلقيها علينا

وازيدك من الشعر بيت
كان يقول نفس جمل الشايب اللي عندكم


المشكلة ان الجميع حاس بثقالة دمه
ومحد معطيه ويه

لدرجة ان في مرة حضر عندي المكتب وقعد يشكيلي ان محد معبره في موقع العمل

وهقني صراحة شقوله ،، دمك ثقيل
بس مسكين كان هاب ريح صراحة

وكان هذا يشفعله بعض الاحيان
تحياتي استكانة
ومبروك الوظيفة الجديدة

لؤلؤة يقول...

حلو استكانة
سوالفج ضحكتني
خصة يوم يدقون يتطمنون عليج

Shather يقول...

ههيهيه

ولا عمري سمعت متأهله بالقاموس الكويتي !!
خل اضيفها عندي



ذكرتيني بأيام
انا و بنات جدد متدربات داشين على مديره
اللي معاي طبعا كل وحده تدور ابعد كرسي عشان تقعد عليه
بس الاخت شذر سيده عالكرسي اللي يم كرسي المديره و طايحتله سوالف معاها و مطيحه الميانه
كأني قاعده مع خالتي مو وحده اول مره اشوفها
و تالي دخلت وحده مخضرمه عندها اسمعها تقولها شوفي هالبنيه يحليلها تونس
صج ان ويهي قلب فراوله بس قلت اشوه الحمدلله نوعها عادي ;p
و هذا اهم ما في الموضوع
لاني ما احب الرسميات

bin3li يقول...

بصمة
--------
أنتي كنز !!
لازم نستفيد منج حق السرقات
الوعد عند سوق الذهب 12 بالليل

و أوعدج بحول الله تكونين نجاح شاقح و نجاح منحاش

الأسبوع الأول
-------------
شفتي موظفات يبيعون دراعات
انا شفت
:P

عندما يستملق الريايل
--------------------
امممممم
عاد تصدقين فيني عرج ملاقة
ترى ما أرضى عليهم

:/

تلفونج كل دقيقة يرن
--------------------
ديزيلي رقم المكتب أو رقم خدامتكم عشان تكمل

:P

متأهلة
---------
هيهههههه

بعدني أضحك عليها

يعني الأوليين كانوا يسوون ألومبياد البنات و إللي تفوز تتزوج و لا شلون؟


استهبالج ويا المدير
------------------
انتي لما تتوترين ما تسمعين
انا ما أتحجى
ناقص واحد ويانا ما يشوف و نصير فرقة
:P

قلب طفله يقول...

استكانه

ويا كل بوست احبج اكثر

اسم الله عليج شخصيتج تنحب

و كلماتج تعكس اللي داخلج

الله يحفظج وخيتي و يوفقج :)

الزين يقول...

استكانه

:(

ماره بسلم

اكثر شي محزني اني ما شفتج

بس هااا

راجعة لج بطن سوالف اكيد

راح اوله عليج حد المدى


ايه والبوست شي

مت من الضحك

مع ان هالسوالف سمعتها منج على الهواء مباشرة

بس سردج لها بالمدونة راااااااائع
كالعادة

تاخذينا معاج بيومياتج
نعيشها ونحسها ونتفاعل معاج

كريمة معانا لهالدرجة

:)

ربي يكبر حظج ويحفظج ويوفقك يارب


الى اللقا

:**

ابو لطيف يقول...

الله يوفقج يا بنيتي :)

جني وياج في كل خطوة

اقرا وانا مستانس

ودام ان المسؤل الكبير خذا عنج فكرة طيبة من البداية

لازم تكوني عند حسن ظنه

عطي من نفسج .... ومع الوقت يمكن تطلع لج سوالف يمين او يسار

ركزي على شغلج ولا تهتمين لاحد طول ما انتي تسوين شغلج صح ... خلي همج رضى الله ... وخلي عندج ثقة كبيرة

وما تشوفين الا الخير

ربي يوفقج ويحفظج

Kuwait يقول...

الدوام عالم ثانيييي :)
موفقه بدوامج حبيبتي

charisma يقول...

:))))

ولو ان هذا الدوام ماخذج مناااا بس شنسوى ما باليد حيله

اتخيل شكلج اول يوم دوام
:))

انا اول يوم دوام جنى رايحه جامعتى
كل بنات الجامعه بالدوام
امشى واسلم اغلبهم زميلات جامعه
من اول يوم كونت لى حزب وتعرفت على الكل
:))))

والله يعيينج على ملاقه الرجال
://
بس خوش دقره دقرتييه مسكين

وارتباكج موتنى ضحك وذكرنى بنفسى
انا اذا ارتبكت ما اعرف اتكلم
;P

والله لا يخلييج من اهلج وحبايبج
ويوفقج بهالحياة اليديده
:*

ShLaLaT يقول...

الله يوفقج


عادي استكانه طوفي انتي
:)

مواقف وايد يايتج بالطريج لوول


شوقتيني على الدوام
وقعدة الصبح

:)

غير معرف يقول...

ههههههههههه ضحكت من الخاطر :)الله يضحك سنج شروات ما ضحكتي الكل

الله يحفظج والله إنج عجيبه وبريئه

أحبج في الله

أختج

ayoosh يقول...

خدامتكم حفلللللللللللله
واحليلاتها حسيتها سنعة وتحسب للمواجيب الف حساب
مستانسه فيج فخبرت كل الجماعه ان عندج مكتب
خخخخخخخخخخخخخخخخ

الله يسهل امرج
ودربج خضر

ووظيفه سعيده :D

Sweet Revenge يقول...

عسل يا ستكانه :)
اهم شي انج تحسين ماتعتقدين :P

صقر قريش يقول...

خوش خدامة ماشاء الله عليها تتطمن عليج :)
شهالبصمة!!هذي يمكن تقولج الشغل موسهل صعب ويبيله صبر وجلد(اصير مكان النهام:) )

الإسبوع الأول:
لازم في كل مكان جديد الإنبهار أولا وبعد ذلك يتعود الإنسان على هذه الحياه ومابي احبطج لكن البداية انبهار وابتسامة وبعدها ملل وضيقة خلق وهذي بكل شغل موبس شغلج معروف إن الإنسان ملول فلذلك نصيحتي لج سوي اكشن وايد وحطيل لج احداث عشان ماتملين:)

اصلا الريال كل ماكبر زاد استملاقه:)عاد الله يعين لازم المجامله انا اعرف واحد مليق وكبر ابوي وآنا مظطر إني أجامله واسوي نفسي أضحك هذي الدنيا لازم نتحمل:).

اما الإتصالات فالله يزيدهم ان شاء الله وشي جميل لما تحس ان الكل مهتم فيك الله يخليكم لبعض :)

ان شاء الله تكونين متأهلة مع المتأهل الصالح(حشى أولمبياد:)) الله يزرقج الرجل الصالح الي يسعدج وتسعدينه ان شاء الله تستاهلين كل خير اختي واسألتج هالسؤال إلا لأنها حبتج :).

اما مديرج فصدق ماشاء الله عليج وكان المفروض تكونين واثقة أكثر عموما الله يبارك لج ويفتح عليج ان شاء الله(ويوفقج
وين ماتشتغلين وسامحينا على القصور:).

Peace يقول...

الله يوفقج استكانه
وان شاء دوم مبسوطه

اهم شي انج تكونين راضيه عن نفسج

و ما عليج من احد
لانه راح ايي اليوم اللي ينتقدونج فيه وانتي ما سويتي شي غلط




بس جنج قاعده تتكلمين عن دوامنا
!

mtfa2el يقول...

او او استكانة صار عندها بلوق
او استكانة قامت تكتب بوست
اوو استكانة قامت ترد على الكومنت
:p
عادي ترى كل جذي المدرا عبالهم يضحكون و ينكتون مو لاقين المتسلقين يضحكون لهم فعايشين دور طارق العلي .. على المدرا اذكر رئيس قسمي كان يقولي تعرف حق الانترنت ؟ أقوله ايي اعرف خير
يقول حطلي عالم الحيوان !!!
من باجر أشوفه داش قوقل و كاتب بحث
" الصياد الذي أكله الأسد و امرأته و أطفاله ينظرون إليه و يبكون " !!!!
يوم دشيت ولا يحن عليي تكفه تكفه حطلي مقطع الأسد اللي ياكل الصياد ..يوم حطيتله عباله انا بيل غيتس الكويت اسبوع كامل يقولي انت فنان بالكمبيوتر ...
لسه وراكي مشوار طويل و ياما حتشوفي ملاقة رجالة :p

molok يقول...

بصراحة الله يهني وظيفتج فيج ..
واناقاعد اقرا حسيت اني معاج بالمكتب ..

تسلسل عجيب واتوقع ان اول الايام لو شنو يصير فيها تبقى ايام ممتعة ..

أحلى شعور انج تحطين راسج عالمخدة وانتي راضية عن نفسج ..

حافظج الرحمن

L. يقول...

عسى الله يوفقج بدوامج و يكتبلج فيه كل خير و يديم عليج فرحته مثل ما انتي مونستنا بكل بوست ينزل منج.. :)

esTeKaNa يقول...

يعقوبو
~~~~~~~~
يرقص ويدق صبع؟
!!
يمكن الملاقه طريق الوصول للمناصب
:pP~
الله يبارك لنا بالوقت قول امين
:)

esTeKaNa يقول...

هنوفي
~~~~~~
مساج الله بالنور والسرور
هلا بالهنوفي هلا
شفتيني حمدلله والشكر؟
لما اتوهق مادري شيصير فيني
:)
وفعلا مديري وايد وايد طيب
بس مشكلته هالتنكت كل شوي
مللني

اجمعين يا الهنوفي ماقصرتي
*

esTeKaNa يقول...

محسد
~~~~~~
خدامتنا مع طول الخبرة اصبحت معزبه
:)
واا اشهد اهتمام الناس يسعد القلب ويشعرك باهميتك

esTeKaNa يقول...

Dandash
~~~~~~~~~
هلا بالدنادش والله
هلا بالابله هلا
:)
الله يسلمج ويوفقج قولي امين
ماقصرتي
واي زوقه اميمتج
يعني الحين انتي ابله وخبه
واهي تقول جذي
عاد ديري بالج ترا الابله ددايما لها بصمة ما تنسي بقلوب طالباتها
خليهم لي يكبرون يذكرون ابله دندش
:)

esTeKaNa يقول...

kuwaitawy
~~~~~~~~~~~
وعليكم السلام ورحمة الله وبركاتة
الله يبارك بحياتك وعمرك ماقصرت
اي والله بيكونون رفقة عمر
يزاك الله خير ماقصرت
:)

esTeKaNa يقول...

Najmah
~~~~~~~~~
هلا هلا بنجمتي
:*
يمه يمه السالفه فيها انفجارات؟
لا انتي لازم يكون لج موعد خاص
تفجرين فيه كل شي مثل ما تبين
:)
وعسى مودج دايم حلو وورايق

esTeKaNa يقول...

محارة
~~~~~~~~
هلا هلا بالمحارة الجميله
:)
شرايج فيني وانا افيدكم؟
اي لازم تتعلمين اخاف باجر احد يسئلج وتعيدين اجوبتي الخربوطية
:Pp~
الله يحفظج يارب ويسعدج

esTeKaNa يقول...

QiYaDiya
~~~~~~~~~~~~~~
وااااااااااااااااي
زوووقه انتي
حبيبتي اللي فاهمتني
عرفتي بالضبط شنو كنت اقصد
:***
الله لا يحرمني منج قولي امين
والله ردج فرح قلبي اكثر من ما تتصورين
:)

esTeKaNa يقول...

فريج سعود
~~~~~~~~~~~
يا الله شنو هالتعليق الطيب؟
يزاك الله كل خير وماقصرت
فرحني تعليقك
:)
الله يحفظك ويسعد لك كل لحظاتك انته وكل من تحب حولك ويرزقك اجمل واكبر من كل ما تتمنى قول امين

esTeKaNa يقول...

M03ath
~~~~~~~~
ياهلا ويا مرحبا بمعاذ
فعلا لازم ما أتأثر بأي كلمه اسمعها
صج لازم اتغير شوي
!!
شكرا شكرا على تعليقك الجميل
وعلينا وعليك ماقصرت
:)

esTeKaNa يقول...

بن علي
~~~~~~~~
hahahahahha
ياهلا ويا مرحبا بلي متأخر عن الدوام
:)

esTeKaNa يقول...

Lawyer
~~~~~~~~~
هلاااااا بلوير هلا
واي مسكين مو لدرجة جليل حيا
قاعد يتكلم بحسن نية
:)
يقولج انتي بنت منو
واي تخيلت ويهج وانتي تطالعينه
هههههههههههههههههههه
حياتي والله
:*
والله قلتي حق المدير جذي؟
صراحة صراحة شجاعه
!!
واي زوقه يدتج عساها بجنات النعيم
ويا زين اللي تقرق وتحلي كل صباحي
:***

esTeKaNa يقول...

artfull
~~~~~~~~~
تقولي واحده ليش ما نقيتي الصبع اللي تلبسين فيه خاتم ولا دبله بالمستقبل
عشان تتشيحطين
تخيل
:Pp~
شكرا على مرورك وتعليقك
والله يحفظك ويوفقك بكل خطوة قول امين
:)

esTeKaNa يقول...

نون النساء
~~~~~~~~~~~~
كنتاكي مرة واحده؟
هههههههههههههههههه
هههههههههههههههههه
واي موتيني من الضحك
حدج متدوده
بعد مابي اضحك
انا عادي جدا اسويها

اشوة ريحيتي
استكانة لها ولايف
;pP~

esTeKaNa يقول...

ray
~~~~
lol!
اشوة مو انا بروحي اللي ما اركز لما اجاوب
طلعتي مثلي
:)

esTeKaNa يقول...

Happy face
~~~~~~~~~~~~~
ياهلا ويا مرحبا بالهابي فيس
وهذي الساعه المباركة اللي تعلقين فيها
تعليقج وايد فرح قلبي
يزاج الله كل خير
بس سؤال
شدراج ان الاسلوب هذا وراثه بالعائله؟
يالله اعترفي وقولي لي
لا يكون انتي بنت خالتي
:))))
وحيااااج الله

esTeKaNa يقول...

عثماني
~~~~~~~~~
شكرا عثماني
عندما كنت كما انا قلت للمدير:
انا احس
:)
لازم اتغير شوي
وبدل انا احس:
انا اعتقد
انا ارى
انا اجزم
:Ppp~
دعواتك معاي

esTeKaNa يقول...

Fahad alAsker
~~~~~~~~~~~~~~
تفاؤلو بالخير تجدوه
!!
منو يصفا له بالفرح دنيا؟
لابد من اشيا بتعكر صفوي
لكن في هاللحظة انا سعيده ومتفائله
فليش اسلب هاللحظه حقها بالقرح؟
:)
تامر امر
العشا قريش قبل رمضان

esTeKaNa يقول...

Mashe-qe6ari
~~~~~~~~~~~~~~
فعلا شعور الرضا سعادة
:)
تعليقك جميل جدا
اكثر ما تتصورين
اللهم امين واجمعين

حياج الله

esTeKaNa يقول...

anon.
~~~~~~~
يزاكم الله خير
واجمعين يارب
:)

esTeKaNa يقول...

ساخر كويتي
~~~~~~~~~~~~
شكرا من القلب اخي العزيز
وعسى ربي يوفقك ويبارك لك بكل خطوة
:)
وعليه عليه
!!
يعني حاس ماحد يعطيه ويه
بس مو فاهم ليش
:(
ترا فعلا هذي مصيبه
الله لا يبلينا فيها قول امين

وبعدين بالنسبه لي دايم بكل شخص في سلبيات وشي طبيعي يكون في ايجابيات تشفع له
!!
اشوة انه هاب ريح
ولا جان علوم
:)

حياك الله نورت البلوق

esTeKaNa يقول...

لؤلؤة
~~~~~~~~~
هلا باللولو هلا
عساج دوم تضحكين ومنسرح بالج قولي امين
:)

esTeKaNa يقول...

shather
~~~~~~~~~~~
اي ضيفيها حق مستقبلج
:Pp~
واي يا زينج شذر
جنج انا
اصلا انا لبقت معاهم امشي وسولف
ماعندي هذا مدير
هذي مسؤله
بس مو كل مرات هالشي زين
:)
بس الله يرزقنا على نيتنا ناس حليوين يستانسون علينا

esTeKaNa يقول...

بن علي
~~~~~~~~~~
LOOOOOOOOOOOOOOOOOL
:))
صاير فكرك اجرامي
!!
الموظفات اللي عندي رجيم واكل
ما شفت دراعات
:pP~
وكل الردود بصوب
ورد ما اتكلم ويبيلنا واحد بصوب
لووووووووووووووووووووووووووول
ابيه موتني من الضحك بن علي
:)

esTeKaNa يقول...

قلب طفلة
~~~~~~~~~~~~
ياهلا بقلب الطفله الجميلة والله
:)
وااايد فرحني تعليقج
يا بعد قلبي قلبج ماقصرتي
احبك الذي احببتني فيه
:***

esTeKaNa يقول...

الزين
~~~~~~~~
غيابج يحزن قلب استكانة
ورحيلج من غير لا اشوفج ماحبه
!!
يشفع لهذا كله احساسي بانك ستكونين سعيده في مكان ما ومحاطة بأحب القلوب الى قلبج
:**
اله يحفظج ويسعدج يارب
ويسح دربج ويردج لنا بالسلامة

esTeKaNa يقول...

أبو لطيف
~~~~~~~~~~~~
ياهلا ويا مرحبا في ابو لطيف
بنيتك مرة واحده؟
لا تكبر نفسك وانا اخيتك
:)
ما تتخيل شكثر كلماتك كان لها وقع في نفسي وقلبي
قرأت نصيحتك اكثر من مرة
وسعيده جدا بمرورك وتفاعلك مع احداث حياتي البسيطة
شكرا من قلبي
عسى ربي يحفظك يارب ويسعدك
:)

esTeKaNa يقول...

kuwait
~~~~~~~~~
اي والله عالم ثاني
اجمعين يارب
:)

esTeKaNa يقول...

charissma
ّّّ~~~~~~~~~~
والله يوم شفت كريزما فز قلبي
واي انا من صجي ولهانه عليج كثر ماكو بعد
:**
واي اونس لج جذي معاج احد
انا بروحي يا كريزما
وقاعده اتعرف على حزبين
واحاول اصير دول عدم الانحياز
:pP~
يا بعد قلبي انتي
الله يسلمج ولا يحرمني منج ابد

esTeKaNa يقول...

shaLaLat
~~~~~~~~~~
عاد كل شي يشوق الا قعده الصبح
بالنسبه لي
تضيق الخلق
:))
الله يحفظج ياربي ويسعدج

esTeKaNa يقول...

anon.
~~~~~~~~~
ياهلا ويا مرحبا
عساج دوم تضحكين ومستانسه
واحبك الذي احببتني فيه ماقصرتي
:))

esTeKaNa يقول...

aYoosh
~~~~~~~~
خدامتنا مع طول الخبرة صارت اهي مدير البيت والمعزبه
:))
حياج الله
عسى ربي يحفظج ويسعدج قولي امين

esTeKaNa يقول...

sweet Revenge
~~~~~~~~~~~~~~~
اي والله
مجابله المدير واحس واحس
وقته اطلع احساسي واخزياه
;Pp~
حياااج الله
ونورتي البلوق

esTeKaNa يقول...

صقر قريش
~~~~~~~~~~~
مامن قصور يا صقر بالعكس
دايما مرورك كافي ووافي لكل نقطة في البوست
الله لا يحرمنا من مرور اخونا العزيز ويوفقك ويسعدك بكل شي يارب
:)

esTeKaNa يقول...

Peace
~~~~~~~~
يا هلا ويا مرحبا
الله يسلمج ماقصرتي
وفعلا اهم شي الانسان يفكر فيه رضا رب العالمين ورضاه عن نفسه
!!
ليش دوامكم عندكم فشل قادم فشل ذاهب؟
:)
يجوز
!

esTeKaNa يقول...

متفائل
~~~~~~~~
واي اخترعت
عبالي مديري قرا البوست وقام يعلق
:Pp~
واي مديرك مو من صجة
لهدرجة عنده شغل
!!
بس ماعليه
اهم شي انك بعينه فنان كومبيتر
:)

esTeKaNa يقول...

molok
~~~~~~~
والله يهني استكانة بتعليقاتكم اللي تشرح القلب وتفرحني والله
:)
يزاك الله كل خير وما قصرت
عسى ربي يحفظك ويسعدك بكل خطوة

esTeKaNa يقول...

L.
~~~~
يا بعد قلبي قلبج
اللهم امين واجميعن ان شاء الله
:)

gawga3a يقول...

لووووول والله ضحكتيني .. مادري متى نوصل حق التبصيم .. شكله بالمشمش ..
ومبروك على الوظيفه والله يوفقج فيها والى الامام

AK-47 يقول...

فرحان وانشالله الله يوفقك زود و زود

ARTFUL يقول...

ما أقدر أكتب
COMMENT

بالبوست اليديد!!!

صباح الخير

=)