الاثنين، يونيو 30، 2008

أستاذه استكانة

منذ خمس سنوات واكثر ...وانا هنا في مدونتي
أخاطب نفسي من خلالكم
تكتبني حياتي وعفويه تفكيري
دون تخطيط مسبق او ترتيب
اكتب تفاصيل حياتي
وكل شئ يخطر في بالي وقلبي
أوثق أجمل الأحداث في حياتي
وأنثر فرحتي ودمعي بين كلماتي
.
.
كتابتي لاي فكرة كانت حاجة
هواية
اكتبها كمن يكتب لذاته
!!
اعترف...بأني في الفتره الاخيرة اشعر بأني افتقدت نفسي في مدونتي
اصبحت افكر الف مرة قبل كتابه اي كلمه
وافكر مليون مرة قبل ان ادون اي شئ خاص فيني في مدونتي
!!
وهذا كله بفضل بعض المتطفلين وعديمين الاحساس الذين افقدونا متعه التدوين
:(
اليوم شعرت برغبه كبيرة بأن ادون احساسي
واوثق مرحله وتجربه مهمه من اهم التجارب التي مرت في حياتي
اريد توثيق هذه التجربه وانا في اياامي الاخيره فيها
وانا اودعها بكل سلبياتها وايجابياتها
فاسمحو لي ان تجاوز هذا البوست الحد المطلوب
ووصل بكم لحدود الملل
يسعدني قرائتكم لهذا البوست
واعذركم ان لم تضيعو اوقاتكم فيه
!
.
.
.
.
أقسم بلله العظيم أن أودي أعمالي بالأمانة والشرف
....وانا احافظ على سر المهنة


كنت ارتجف وانا اقسم ذاك القسم العظيم امام هيئة المحكمة
اشعر بأن كل كلمه من ذاك القسم ارتجفت معها روحي
ما ان انتهيت من ذاك القسم حتى وقف الجميع لتهنئتي
كانو حولي..وكانت عيني معلقه بعيني ابي التي رأيت فيهما بريق لدمعة اخفاها بابتسامة جميله وهو يحتضني:
مبروك يا احسن محامية بالكويت كلها
انتي فرحة قلبي وفخري بهالدنيا
خلي ميزانج رضا ربج واخلاق ربيتح عليها
وانا بكون دايما واثق فيج
.
.
.
وابتدأ المشوار بخطوات كبيرة خارج بيتي الزجاجي
وبعيدا عن احلامي الوردية
وحياتي الجميلة المثالية
لا زلت اتذكر دقات قلبي الخائفه واانا ارتدي الروب الاسود
وادخل من الباب الخاص بالمحامين
يرافقني محامي زميل لي في المكتب
يعلمني ابجديات الوقوف والتخاطب مع القاضي
وكيفيه تثبيت الحضور والطلبات
!!
منبهرة وخائفه..ذاك كان احساسي الاول
الذي تجاوزته بالصبر وطوله البال وانا اتعلم في كل يوم شئ جديد
.
.
.
لتحكم على اي تجربه في الحياة لابد ان تعيشها انت
تكتشفها بنفسك
تتذوق كل مافيها باحساسك
وتقيمها بتقيم شخصي خاص فيك
يختلف منك لي آخر حسب الظروف والمعطيات
!!
كانت تلك من اهم واجمل التجارب في حيااتي
فتحت لي آفاق جديده للتفكير
واضاءت لي مساحات كبيرة من شخصيتي لم اكن قد اكتشفتها بعد
تعرفت على ناس كثيرين...مختلفين عني تماما في كل شئ
التعايش مع الاشخاص المختلفين تحدي لقدرتك على الصبر والـتأقلم مع كل شئ جديد
تأكدت...بأن الحياة لم ولن تكون يوما حياة وردية
بل حياتنا تحمل كل الألوان والمشاعر
وبأننا مهما مررنا في تجارب صعبه وخبرات سلبيه
هناك دائما ماهو اسوأ واعظم واكبر
وان من اكبر النعم التي نتمتع فيها ...نعمة الستر
!!
ان يستر عليك الرحمن نعمه
ان تكون مع اهلك تملك ما يكفيك نعمة
بل تأكدت ان في ايامنا هذه...حتى الفقر نعمه
:)
.
.
.
.
على نياتكم ترزقون
!
رزقني الله بمكتب من ارقى واحسن مكاتب المحاماة المتمتعه بسمعه جيده جدا
في البداية..كنت متوتره في كيفية التعامل مع زملائي في المكتب
خاصه اني احتفظ بسمعة ليست جيده جدا عن وضع المحامين في المكاتب
تغلبت على توتري بافتراض حسن النية فيهم جميعا
وبالتعامل معهم باحساسي واخلاقي مع بعض الحدود التي كنت احرص على تواجدها رغم اني اقضي نصف نهاري في المكتب واحتاج دائما ان اسئل واتعلم واناقشهم
!!
مع الوقت شعرت براحة كبيرة
عامل الناس كما تحب ان يعاملوك
ومن يزرع الحب يحصد حبا
:)
انا اصغر محامية بالمكتب
يعاملني الجميع معامله الأخت المدللة
ممنوع ان تذهب استكانة لاي مخفر
او النزول في اي قضية
او حتى مقابله اي موكل
في الايام التي كان يعتفس فيها الجو استغرب اتصال اصحاب المكتب
والزملاء على المكتب فقط ليطمنو:
استكانة وصلت ولا لا؟
ويالله استكانة ردي البيت طولتي
!!
.
.
.
.
!!أنا أؤمن بالاشخاص
تلك كانت كلمه لشخصيه مؤثرة في حياتي كانت تريد ايصال فكره لي
بأن كل الانسان قادر على تعليم نفسه وتثقيفها ايا كانت ظروفه
وان الانسان الفاشل هو من يعلق اخطائه وعثراته على شماعه الحياه والظروف وسوء التعليم
تذكرتها وانا اجلس مع المستشارين كل يوم
اتعلم كيفيه تحليل القضايا والافكار وكتابة المذكرات والمرافعات
حضور الاجتماعات مع وفود اجنبية
التعلم في القسم الاجنبي للقضايا
مع الوقت...وجدت ان اصحاب المكتب يبديان اعجابهما بعملي
بوجودي
ويسندون لي بعض الاعمال المهمة
احساس الناس بالثقه بك احساس مهم ومسؤلية كبيرة جدا
.
.
.
.
مهنة المحاماة مهنة جميله...ممتعه
لا ملل فيها ولا روتين
دائما المحامي حر نفسه، لاقيد عليه ولا مسؤل الا نفسه
رغم كل ايجابياتها وتمتعي فيها.....كان لابد ان ارحل
وان انهي تلك المرحله في حياتي باسرع وقت ممكن
حفاظا على استكانة قبل اي شئ آخر
!!
.
.
.
نعم..انا خفت على نفسي
مهنة المحاماة تناسب الرجال ونوعيه من النساء لست منها ابدا
لا اريد ان اذوب وافقد نفسي
!!
الاحتكاك مع كل انواع البشر والتعامل المباشر مع نوعيات من الرجال الغريبين كان بالنسبه لي سلبيه كبيرة
اتعبتني نفسيا
:(
فكنت طوال هذه الفتره اشعر بأني متعبه تماما من تلك النوعيات التي اراها كل يوم
اضف الى ذلك بعض المحاميات التي كنت اظطر للتعامل معهن وقضاء وقت طويل بجاورهن
اتأمل شخصياتهن واخاف على نفسي من ان اصل ليوم افتقد فيه حيائي
وشخصيتي
وحتى طريقه تعاملي مع الناس
نعم مهم ان تثبت المرأه وجودها في الحياة ولكن
لست مظطرة ان اثبت وجودي وافقد الكثير من نفسي
.
.
.
من تلك السلبياات التي كانت توترني كثيرا
!!الخوف من الحلال والحرام
كنت عندما احضرعن اي شركة في قضيه ضد احد العمال فيها
اشعر بالالم في داخلي وانا ارى منظر العامل وهو يحلف
ويبكي
ويترجاني بملابسه الرثه ان اخذ حقه
وارد بصوت ليس صوتي:
عفوا انا محاميه الشركة
!!
واحيان..كنت احضر في ملفات منابة عن بعض البنوك وافكر:
هل سيحاسبني ربي عن الحضور عن اي بنك قد يكون بنك ربوي؟
احيانا..كان يحضر بعض الموكلين فأرى في عينه نظرة غير مريحة
اشعر بأنه كذاب
استئذن واخرج واتركه مع غيري
احساسي كان تعبان معاي
!!
اضف لكل ذلك ان خلال فتره عملي وحضوري في بعض قضايا الاحوال الشخصيه
وسماعي لتلك التفاصيل المبكية..شعرت بالشك في كل شئ
والرغبه بأن اظل تحت جناح والداي طول العمر
كنت احيانا اخرج من بعض الجلسات التي احضر فيها برفقه شهود وانا منبهره من كل شئ
اتصل على ابوي في منتصف النهار:
يبه تدري اني ذهبه؟
والله انته تعبان علي

!!
يضحك وهو يرد علي:
يعجبني اكتشافج المتأخر جدا
:pP~
.
.
.
بعد استخاره وتفكير
وبعد انتهاء الموسم القضائي
ارتب اوراقي واموري...وانسحب من هذا العالم تاركة المجال لغيري
من هو أكفأ واقدر مني على تحمل هذا المجال
اليوم ارحل وانا اعلم بأني في داخلي احمل حزن لفراق اول تجربه عمل في حياتي
انا التي ترتبط بكل التفاصيل ...بالاشخاص ..بل حتى بالجمادات
لا اعلم كيف ساودع صاحب المكتب الذي استضافني كبنت له
يرقبها
يعلمها
وحتى العصير يتنقصه لها
لا اعلم كيف سأودع اخواني
واودع كل من كان معاي في المكتب
هل سيفتقدوني؟
وهل سأترك ورائي اثر جميل في ذاكرتهم جميعا؟
!!هذا اقصى شئ اتمناه

هناك 82 تعليقًا:

الزين يقول...

آنا فخورة فيج

فخورة باستكانة البنت
فخورة باستكانة الطالبة المتفوقه
فخورة باستكانة المحامية

بس اكثر شي واللي مخليني الحين عيوني تدمع فرح

فخورة باستكانه الإنسانة
احبها
واعشق طريقة تفكيرها
وعقلها
وقلبها
ونقاءها
وقربها مني لدرجة تخوفني ساعات

انتي احلى شي صار لي من سنين
بدون مبالغة

:*

طائر بلا وطن يقول...

منذ ساعات الفجر الأولى و لأني لم أنم
و أنا أعاود المجيء إلى هذا المكان
و كأني أترقب قدوم أو حدوث أمر ما

و لا أدري لِم



استكانة .. و أنا أيضا كـ الزين

فخور بك .. بطريقة تفكريك .. أولوياتك
في الحياة و التي لن تكون إلا لمرة واحدة
و لكل واحد منا


ما زلتِ في مقتبل العمر .. و الخيارات
و المسارات متعددة و كثيرة و ربما كنتِ
أقدر مني على معرفتها بحكم قربك من مجالك
و الأهم قربك من نفسك

في هذه الحياة
كل شيء يا استكانة معرض لإحتمالات الربح
و الخسارة مهما اجتهدنا و حاولنا

إلا شيء واحد
هو
"نفسك"

و إلا لما كان الله شديد العقاب و هو العادل الرحيم


ابحثي عن بدائل من الآن .. أنتِ قادرة
و متميزة .. و ايجابية

و سنساعدك .. لا تستهينين
يضع سره في أضعف خلقه
:)


كوني بخير

الوتين يقول...

مهم ان تثبت المرأة وجدها بالحياة و لكن لست مضطرة ان اثبت وجودي و افقد الكثير من نفسي
كلام منطقي الى ابعد الحدود ، في رأيي قد يتخلى الانسان عن اشياء كثيرة في حياته و فرص عديدة في المقابل يحتفظ بنفسه و شخصيته و كيانه لان الانسان هو من يخلق محيطه و يشكله و ليس العكس
مع الشكر

غير معرف يقول...

ليش دمعت عيوني وانا اقرا؟
مادري.. بس حتى انا فخورة فيج
:")
اهم من كل شي
الراحة من داخلج
احساسج بإنج تصعدين بنفسج
كل شي بالدنيا يتعوض
الا نفسج يااستكانة
الحياة تجارب
وانا واثقه انج تقدرين تختارين المكان والتجربة اللي ترضيج وتضيف لج الراحة والاستقرار :)
ربي ييسر امورج
ويوفقج بكل خطوة
:*

نجمة

Lonsome يقول...

صراحه ممكن البعض يعتبر هروبك من المجال القانوني و المحاماه ضعف و عدم قدرة على المواجهه
بس انا اايدج تماما
في الكويت خصوصها و بالعالم عموما المحاماه للبنت غير مناسبة تماما و مثل ما قلتي بتثبتين نفسج بوايد أشياء بس بتفقدينها !!

عالم شائك مريب متعب

الله يوفقج وين ما رحتي و ثقي دائما بأن الخيره فيما يختاره الله

ARTFUL يقول...

وهذا كله بفضل بعض المتطفلين وعديمين الاحساس الذين افقدونا متعه التدوين

شعلييييييج منهم بطقاق
دفعة مردي والهوا شرجي

مالج شغل بالناس استااانسي وفرحي وعيشي حياتج من غير تكلف وانا اخوج

فكرة حلوه وتجربة طيبه وحلوه

عادي لا تضيقين خلقج
انا الحين صارلي 4 سنين أشتغل
اشتغلت بثلاث أماكن وكل واحد أحسن من الثاني والرابع ياي بالطريج
ماشاءالله لا اله الله
حشى حمل مو شغل
;p

وصج كل دوام أحلى من الثاني واستانس فيه وارتاح

بس لازم ايي يوم أغير

اول شي لأني ما أحب الروتين أحب أغير

يعني قلبي ما يطاوعني أقعد بمكان 5 او 10 سنين

ثاني شي فرص يديده لعلها تكون أفضل وأحسن

وعلى فكره المكان الرابع هذا أول مكان قدمت له لما تخرجت

يعني اربع سنين علىا ما اقبلوني

شرايكم بكفاحي

لووول
;D
ولاااا كل مكان شديت حيلي فيه وشغلت الواسطات ما انقبل فيه والا ماأدري عن هوا داره ولا شغلت واسطه أنقبل فيه

رحمة المولى قريبه والمطر والسيل قد جاك

كنتي استاذه أكيييد الحين بتصيرين أبببببله

;p

بس حلوه يببببه تدري اني ذهبببه
هاهاهاهاهاهاها
;D

عاش بومحضار هااا

;D

أدري البوست فيه ضقت خلق وحزن بس قلنا نطلعج من المود

السموحه

7osen يقول...

تصدقين إستكانة
أنا بعد أعتقد مثل هالمهنة ما تصلحلج
لأنها مهنة تتطلب إنسان من نوع خاص
يكون عقلة فقط إللي معاه بوقت العمل بعيد عن الأحساس

وإنتي دائماً إحساسج معاج
لذلك أعتقد قرارج كان سليم أمية بالأمية

أتمنى إنج تتوفقين في مجال ثاني
وتحققين كل لإللي تتمنينه

----
طريقتج بالكتابة
فعلاً شفافة

أهنيج على هذي القدرة

bin3li يقول...

و أنا أقول بعد جذه
أنتي ما تنفعين حق المشاكل
:)

أنتي مال تقعدين في الطبيعة تتاملين
مال سفر و هذه حزة سفر
شغلي شريط الحنة
:P

تجربة عملية مفيدة
لكن لازلت تحتاجين لخبرة أوسع عشان تنظرين للأمور بصورة أعمق

بقولج شغلة
لا يمكن لشخص أن يقطع سبل الحياة على أي شخص ثاني إلا برغبة من الشخص الثاني

بمعنى و أعطيج مثال العامل الفقير
بما إنج محامية الشركة فبينج و بينهم عقد لابد أحترامه، أنتي مب قاضية ، انتي تتابعين مصلحة الشركة

ممكن الشركة تبغي تقلل عدد العمال عشان تقلل التكاليف و لا راح تضطر تعلن افلاسها
العامل إذا أقيل من الشركة ما يعني أن ما في أمل في وظيفة ثانية أو سبيل رزق ثاني
إلا إذا العامل قرر أن ما يبحث

كاهي أنتي طلعتي من شغلج هذا ، هل ضمتي الشغل في مكان ثاني ؟

مافي شخص يموت من اليوع إلا برغبة و قرار من الشخص نفسه
مافي مرة ترضى زوجها يسفل فيها و يلعن خيرها إلا برغبة منها

المشكلة أن وايد ناس ما يعرفون هالحقيقة ،أن بايدهم قرار تغيير أوضاعهم للأفضل ،و ينطرون يد خارجية هي إللي تشيلهم و تدير بالها عليهم
و هذا إللي ما راح يصير أبداً

كل إنسان مكلف بنفسه
ممكن يساعد غيره بحدود الاستطاعة لكن ما يخلي الناس يعتمدون عليه اعتماد كلي

صدقيني الناس تقدر تدبر روحها
:)

الشغلة الثانية، الجهل
الجهل بجوانب أخرى مخفية من كل قصة
معرفتها ممكن تقلب الصورة أو الانطباع إللي في بالج رأساً على عقب

أعرف أن صعب ، لكن إللي يتقن التعامل مع هالأمور كلها، يؤتى الحكمة
و من يؤتى الحكمة فقد أوتي خيراً كثيراً
:)


أهم شي أنج قعدتي مع وفد أجنبي
ما أدري ليش حسيت جنج مع حسين و سعد في مسرحية بني صامت
:P

darkness يقول...

مساج الله بالخير يا استكانة الخير

:)

اخذتي قرار

و انتي من سيتحمل نتائجه

لا اعرف ابعاد القرار

انتي عطيتينا الامور من وجهة نظرج انتي

هناك زوايه كثير للامور الحياتيه

استكانه يمكن قرارج صح

بس ما سالتي ليش الباجين بالدوام ما اخذو هالقرار؟

انتي بنفسج تمدحينهم

يعني اهم لهم خلفيه اخلاقيه عاليه

استكانه ما ابي احبطج

بس ما ابي اشجعج بعد

الحياة فيها امور كثيره

تدرين حبيت شجاعتج على اتخاذ هذا القرار

و الله يوفقج باللي اخترتيه

:)

2cool2care يقول...

لو انا مكانج الحين
الحين
الحين

اسجد لله شكر ان وفقني لترك هذا المكان
............

قبل سنتين اتصل سألني صديق لي خريج شريعة توظف بالعدل كاتب سر مع القاضي
قالي شرايك ادش دوره 6 أشهر وصير محامي قلتله لا قالي ليش قلتله مسئوليه كبيره وصعبه انك تعرف اللي جدامك صادق او مو صادق وأمور كثيره
قالي تعرفني انا ما آخذ اموري بالمنطق اقنعني اكثر

عطيته ارقام المشايخ في المملكة وقلتله دق عليهم وشوف الرد


الحمد لله ابعدوه عن هالمكان

انا ما اقول لكل محامي لا تصير محامي لا
بس في نوعيه من البشر ما احب ان يكونون في هالمجال وصديقي هذا واحد منهم

وأنتي يا ستكانه ربي الحافظ طلعتي من هالحفره بخير

الحمد لله

والله لو انا مكانج اسجد لله شكر

الحمد لله

هالخطوه بروحها تسوه الدنيا وما فيها

الله يوفجج

lawyer يقول...

دمعت عيوني وايد هالمرا

مابي اقول بجيت

بس دمعت ليششششششش

:/

قولي امين الله يرزقج بنت مثلج
عشااااان تشوووووفين فرحه ابوج فيج يارب


انتي نيتجججججج صادقه

الخيلاء يقول...

لاحاجه لنا بعمل يجعلنا نرى اشباها لا اضرتنا الضروف ان نكون عليها

متى ما فقدنا انفسنا بمجال العمل فقدنا المتعه بالانجاز و الفخر باي خطه نخطوها

نحتاج دائما الى صحبه انفسنا معنا
:)

الله يوفقج و يرزقج الوظيفه الي اتمنينها


و هذا خبر حلو الانه يعني المزيد من البوستات بسبب انضمامج لعالم البطاليه مره اخرى
;p

Fahad Al Askr يقول...

وأنا ما أدري ليش كله حاط في بالي إنج مدرسة وبيتكم بالأحمدي

صج ما أدري ليش

jooj يقول...

استانس على كتاباتج..:)
زين اتسوين اشتري راحتج لأنا جد هل مهنة يبيلها انسان اكون قلبة قوي
عاد يحافظ انا يديدة علساحة كتبولي

فارس هوى الكويت يقول...

السلام عليكم
اختي الاستاذه :)

الله يوفقج ويعطيج على قد نيتج
لأنج تستاهلين كل خير الصراحه
وبالتوفيق ان شاء الله

الله يسر امرج وينور لج طريجج

ودامت لنا استكانتج :)

JooJ o MaJooJ يقول...

salam stekanah...it's jooj wallah elle saweteeh 3ein el 3agel lannah hal mehnaah te7tach galb qewee o thamer bel thalajah..yallah el
7emdellah 3al aqal sawetay shay entay et7ebenah 7atan law ma6awalty feh bas 3al aqal shay jarabteh o alah ywafgech...wayed astanes 3alla ketabatech :)

محـــــارة يقول...

مادري ليش أنا عاطفيه بزياده ولا قربج لقلبي يحسسني بأي كلمه وبأي شعور ينطبع بكلماتج

تضايقت حيل وعشت الشعور الي ممكن يشوفه البعض بسيط وتافه من خلال كلماتج

يالغاليه طبيعتنا متعبه أحياناً لأنا نرتبط ونعيش ونحمل مشاعر جميله حتى للجماد

لا تحزنين ولا تتضايقين الي سويته أهوه الصح 100% وجودج بهذا العالم راح يغيب روحج راح ينسيج أحساسج بأمور عشقتيها ومقتنعه فيها

الي سويته هذا المطلوب لإستكانه لأنها صادقه ومخلصه وحابه ربها ونفسها ماتقدرين تواصلين بمكان يخليج دوم مو متوازنه مع إعتقاداتج وتغافل وتطبيق قناعتج راح يكون ضد إخلاصج بعملج

الله يوفقج وصدقيني دامج تركتي لمكان لرضى الرحمن راح تلقين مكان أروع وأنقى وأفضل راح تشعرين فيه بالراحه من الجانبين

جميل لج ولمهنتج وجودج بهذك المكتب تعلمتي منه كثير صقلتي دراستج بمكان مميز راح يخدمج بأمور ابعد من تصورج سواء بحياتج أو بمهنتج بموقع أخر

ربنا يوفقج يالغاليه أحبج :)

~FaHaD iN MiND~ يقول...

ana b3d a7es hal mehna ma tesla7lch awal shay a7esha mehnat reyayel thany shay .. shay waid ykhare3 ena tet7amlen mas'oliyat ena eli jedamch saaj wela chathaab takhayelay edaf3en 3an wa7ed thaleem !!!


a7san qarar saweteh walah .. bel 3ax laytheeg khelgch waid amaken tetmana shaksh nafsch :) o dont worry im sure about it ena ra7 yathkronch bel khair o byafgdonch :)

esTeKaNa يقول...

الزين
~~~~~~~~~
يا مسا الزين كله
:**
احساسج فيني
وعيونج اللي دمعت فرح لي
وكلماتج اللي كلها صدق
طيرتني فووووووق فووووق
ياربي ما يصير اطلع من الشاشة واييج
:**
الله لا يحرمني منج

esTeKaNa يقول...

طائربلاوطن
~~~~~~~~~~~~
هل انا في حلم؟
طائر
افتقدت تعليقاتك
وافكارك التي تخاطب عقلي وتفهم مابين سطوري
:)
فعلا
كنت احتاج ان أقرأ كلماتك في هذا الصباح المهم في حياتي
كلماتك الجميلة في هذا الصباح اكدت لي على صحة قراري
!
شكرا لوجودك
ولا تقاطعنا
:)

esTeKaNa يقول...

الوتين
~~~~~~~
الانسان من يخلق محيطة
وليس العكس
!!
قمة الحكمة منك يا الوتين
شكرا لمرورك الجميل
:)

esTeKaNa يقول...

نجمة
~~~~~~
يا بعد قلبي هالعيون ودميعاتها والله
:**
فعلا كلامج عين العقل
كل شي ممكن نخسره ونعوضه
الا خسارتنا لأنفسنا
احس اني مرتاحة
وراضيه عن نفسي
وهذا اهم شي
الحمدلله
:)
اجمعييين يارب

esTeKaNa يقول...

lonsome
~~~~~~~~~
أنا لم ولن اهرب من المجال القانوني
بل هو شرطي للعمل في اي مكان
:)
الضعف ان نستمر بشئ دون اقتناعنا الكامل فيه خوفا من اتخاذ قرار جرئ بالتغير

المحاماة مهنه جميله
ولكن لي بعض التحفظات عليها
:)
شكرا لمرورك من هنا
شكرا لنظرتك الايجابيه التي اسعدتني

esTeKaNa يقول...

artful
~~~~~~~~~
ياهلا وأمية هلا
ياربي الله يحفظ اخوي ارتفل
يبرد قلبي بالتعليق
اي والله انا شكو فيهم
:Pp~
ومااااا شاء ااالله عليك
الله يحفظك ياربي ويوفقك وين ما تروح
استانست وانا اقرا قصة كفاحك
مسيرة شاب طموح
وصراحة يت بوقتها
وتعليقك عطاني امل بكل شي
يكفي اقول مشكور؟
روح يا ارتفل عسى ربي ييسعدك دنيا وآخره ويرقك احلى من كل ما تتمنى
:)

esTeKaNa يقول...

7osen
~~~~~~~~~~
يا مسا الورد
:)
فعلا يتطلب انسان من نوع
ليس نوعي
انا لست ضد المهنة
تعلمت الكثير
ولكني شعرت بتعب نفسي من داخلي
لم اكن بوضع يسمح لي بالفضفضه ولكن الان بعد ما اتضحت لي بعض الامور اعتقد اني قادره على الفضفضه بشكل افضل
:)
اما عن طريقتي بالكتابه فهي قليل مما عندكم يا حسين
شكرا لمرورك

6MASHAH يقول...

كن كالنخيل عن الأحقاد مرتفعاً يُرمى بصخرٍ فيعطي أطيب الثمر

بتشوفين الناس بتتعبين والمتطفلين بيزيدون خليهم
اذن من طين واذن من عجين
______________

استكانه مثل ماقلت بكومنت اتابعج من زمان
وكنتي قدوه لي بابسط الكلمات والحروف
وانا واثقه ان كل خطوه جديده بتبدعين فيها
لا تكونين غير انتي في اي مكان

ومو معنى انج تركتي المكتب ماتقدرين تواصلين بوظيفه لها علاقه بدراستج

والواحد حلو يجرب شي جديد
ويتعلم شي جديد ينضاف لرصيد تجاربه وخبرته

ومهما وصلتي لاعلى المراتب ايقني ان هناك ماهو مجهول ويستحق البحث والانتظار واتخاذ الخطوات

محد يعرف نفسج كثرج

لاتحسين بالندم على قرار اتخذتيه
بل اقبلي عليه باندفاع

_________
يعني الحين صرتي ضمن البطاله المؤقته لوووول

شرايج نفتح لج مكتب تدافعين عن حقوق المدونين :)

enjoy UR timE

esTeKaNa يقول...

bin3Li
~~~~~~~~~~
معقوله متفق معاي؟
لا انا خايفه انضل نفسي
:Pp~
اي مشغله شريط االحنة
صج بخاطري اسافر
بس ما يندرا
!!
تجربة جميلة
كل يوم اتعلم فيها شئ جديد
وبناء على هذا اعتقد اني لم اعطي التجربه حقها كان يفضل ان امارسها اكثر بس كافي
:)
عدل كلامك
بس في نقطة تحتاج توضيح
القانون لا يتفق مع العدل دائما
أحيانا يكون قانونيا الشخص بالسليم
ولكن بمعاير الحق والعداله والضمير
يكون ظالم لشخص اخر
ولهذا امثله كثيرة ليس هذا مجال حصرها
هذا كان من الاشيا المتعبه بالنسبه لي
:))
الله يرزقنا الحكمة يارب
والسالفه الوفد الاجنبي سالفه
اقولها تالي
هههههه
ضحكتني

Mamloo7a Q8ia يقول...

يا بخت اهلج فيج يالغاليه
وفعلا ابنه مثلج الواحد يفتخر فيها

من تلك السلبياات التي كانت توترني "
"!!الخوف من الحلال والحرام
صاجه يا استكانه
الواحد هذا اللي يخاف منه
ورانا حساب وعقاب
الله يكملج بعقلج

عسى الله يوفقج في عملج اليديد
ويكتب لج الخير في كل خطوه تخطينها

:**

ShLaLaT يقول...

استكانه

احنا اهلي ما يرضون وحده من البنات تصير محاميه


بس الشباب كيفهم

كل واحد له نظرته
بس صح كلامج البنت اذا صارت محاميه
و صارت تدافع عن اي كان
تفقد حياها
وخاصه ان هالمجال وانا اقصد طبعا بالمحكمه وجدام القاضي
يتطلب هالشغل جرأه

غير ان اغلب المحامين ولنكن صريحين اغلب مكاتب المحاماة يدافعون عن الشخص حتى ولو كان ظالم

!!


استغرب شلون ضميرهم ما يأنبهم




الله يوفقج بشغلج اليديد
ويسهل لج امورج وييسر لج دربج وين ما رحتي

صقر قريش يقول...

استكانه:

يحق لوالدك أن يفخر بكِ والله شيء يفرح القلب افرحتني يا أختاه وأنا مهموم ادخل الله على قلبك الفرح فكما ادخلتيه علي وأنا أدعوا لك بالتوفيق في كل وظيفة تروحين لها المهم تريحج وتريح ضميرج المحاماة يا أختي مسؤولية كبيرة وايد آنا بقولج شي آنا أعرف ناس وايد بوزارة العدل وبالمحاكم يشتغلون لا وخطيب اختي وكيل نيابة بعد مادري ليش يمكن لأني نجري ياخوج وعشان هالشي مستقبلا يمكن يجروني للمحاكم فقاعد اظبط واسطات:) آنا عمتي قالت لي لي رحت مصر تدرس لاتتناجر عشان مايقطونك ورى الشمس هناك مو الكويت :) قتلها آنا خليني أروح وأصير سايلنت مولية :) المهم قالي خطيب إختي لما سألته قتله ها ناوي إنك تكون قاضي جان يقولي تصدق الحين آنا خايف من مواضيع الحلال والحرام وآنا وكيل شلون وآنا قاضي والمحاماة التدليس فيها أكثر خصوصا الشركات وطبعا محامي الشركة لازم مايكون عنده قلب وهذي قالها واحد من محامين شركة كبيرة سمعتها منه في ديوانية وزين سويتي محامية شخصية ويالله تسلمين فما بالج بمحامية شركات عموما آنا قرقت وايد وما احب ازعجج وايد بقرقتي وأقول أنتي وحده كلنا كمدونين نفتخر بوجودها معانا الله يوفقج دنيا وآخرة ويسعدج ويرزقج ذرية صالحة تسعدج مثل ماتسعدين أبوج الله يخليج له ويخليه لج

Nescafé يقول...

وااايد اتأثر بكلماتج
وواااايد يأثر فيني اسلوبج
وهم واايد ارتاح لما ازور بلوقج
:-)

اكيد ماقدمتي على هالخطوه الا وانتي دارستها وماكو انسان بهالدنيا عارف مصلحتج وراحتج اكثر من نفسج
وانا مؤمنه بهالشي.. ودايما تذكري ان القادم احلى.. والله يوفقج

Expatriate يقول...

كل ميسر لما خلق له

وفي السماء رزقكم وما توعدون

مبروك واحييج على هالخطوة الذكية

ARTFUL يقول...

ما يحتاي تقولينها

دعواتج كافيه

وسلميلي على اليده وبوسيلي راسها

;p
مادري ليش بس جذي طقة براسي

;D

بوتشخيص يقول...

تجربة جميلة و قصة لشابة تستحق القراءة و الإستفادة من تجربتها ..

وفقك الله في حلك و ترحالك يا أستاذة إستكانة :)

أما عن المتطفلين الله يجازيهم انشالله لأنهم يقتحمون جدار الخصوصية دونما استئذان

DanDash يقول...

الغالية استكانة

نادر جدا نلاقي في الزمن ناس من بأخلاقج
و فعلا المهنة رغم حلاوتها لكنها في بعض المجالات صعبة
لكن اثبتي وجودج في المكتب
و القرار الي اخذتيه مو من السهولة انه اي احد يتخذه
و ربي يكتبج ماكان الصالح فيه لانج تستاهلين كل خير
دام انج مرتاحة بقرارج هذا توكلي على الله و ان شاء الله تلاقين المكان الي ترتاحين فيه

عزيزتي الغالية
احبك في الله
و سعيدة جدا فيج
و ربي يسعدج و يوفقج دائما

Kuw_Son يقول...

ان شاء الله ما خسرتي شي ..
من ترك شيئا لله .. عوضه الله خيرا منه ..

و على نياتكم ترزقون .. كما ذكرتِ

عسى الله يوفقج في اختيارج القادم ..

استمتعت جدا بقراءة خلاصة تجربة قد تكون قصيرة لكن لها الأثر العظيم في النفس :)

قلب طفله يقول...

استكانه

اسم الله عليج انتي روعه و ذهبه

عسى ربي يحفظج و يوفقج

و يخليج لكل عينن ترجيج

جد شفايدة نجاحي بمجال يفقدني جزء

من نفسي و انام و اقوم و صميري

يحاسبني على شي ممكن يكون مقبول

عند العامه بس ترفضه نفسي و تربيتي

موفقه يا الغاليه :)

و عسى الله يكتب لج اللي فيه الخير

mtfa2el يقول...

افاا
هديتي المحاماة عاد عندي قضية الحين منو يترافع لي :P
ما عليج الله يعوضج باللي خير من هالمكان و أحسن و سبحانه ما يضيع عبده
و صدقيني أهم شي بمكان الشغل اللي تكونين فيه انج تكونين مرتاحة منه و كل يوم تروحين له و انتي حاسة إنه مكان يصلح لج
و لو حسيتي بانه مأذيج و مضايقج ..راحتج و ضميرج أهم و أبدى مهما كان

esTeKaNa يقول...

darkness
~~~~~~~~~~
مساج الله بالنور والسرور دراكنس الحبيبة



صديقتي العزيزه
اكيد اني لم اتخذ هذا القرار دون سابق تفكير وبعد نظرة
ثقي باستكانة
:)
وفعلا انا سألت نفسي ليش الباجين ما خذو هالقرار والاجابه كانت ان الامور نسبية تختلف من شخص لآخر حسب امور كثيرة
شكرا يا صديقتي

esTeKaNa يقول...

2cool2care
~~~~~~~~~~~~~
اللهم لك الحمد والشكر على كل شي
:)
كل مهنة فيها سلبيات وايجابيات
المحاماة فيها ايجابيات كثيرة
وشي طبيعي فيها سلبيات
وتحديات
ويبيلها قوة عشان تعرف متى تقول لا
ومتى تجدم ومتى تتراجع
مرات احساسك انك تقتضي حقوق ناس وتحل مشاكل ناس يريح وايد
اللي ابي اوصله ان اهي مو حفره
بالعكس
اهي فيها ايجابيات كثيرة
والنظرة لها تختلف من شخص الى شخص
:)
بس بالعموم
انا ارتحت
نفسيتي حيل مرتاحة وهذا اهم شي
شكرا على المرور والدعاء
يزاك الله كل خير

esTeKaNa يقول...

Lawyer
~~~~~~~~
يا بعد قلبي عيون لوير ودميعاتها
حبيبتي انتي
:*
الله يحسن نيتي قولي آمين
ويرزقج كل شي يسعدج يارب

esTeKaNa يقول...

الخيلاء
~~~~~~~
ياربي انلام بهالبنت؟
:*
كلمة نحتاج صحبة أنفسنا معنا
اثرت فيني كثير
وفعلا كنت احتاج اسمع هالكلمة
:)
ويا بعد قلبي انتي
يزاج الله كل خير
وبشري بقرقتي افا عليج

esTeKaNa يقول...

fahad alaskr
~~~~~~~~~~~~~~
مادري ليش
:Pp~

esTeKaNa يقول...

jooj
~~~~~~~
يا عساج دوم مستانسة
وحياج الله اختي العزيزه
وبشري بالخير نكتب لج افا عليج
:)

esTeKaNa يقول...

فارس هوى الكويت
~~~~~~~~~~~~~~~~~~
وعليكم السلام ورحمة الله وبركاتة
والله الاخوان نعمه
وانته اخوي
يزاك الله كل خير
واجمعين
:)

esTeKaNa يقول...

jooj o Majooj
~~~~~~~~~~~~~~~
وعليكم السلام
يا هلا ويا مرحبا بجوج والله
هذي الساعه المباركة حياج الله
:)
وفعلا على اني ما طولت في هذه التجربه بس صراحة مو متحسفه عليها ابدا
احس كل يوم تعلمت فيه اشيا وايد يديده
وشكرا من قلب على مرورج وكلماتج
ويا علج دوم مستانسه

esTeKaNa يقول...

محارة
~~~~~~
ياهلا بانعكاس روحي وافكاري
:)
انتي ممن يفهم مابين السطور
ويعرف شي من كل شي
انا فعلا استمتع بمرورج وسماعك لصدى روحي وافكاري
وفعلا انا من داخلي مقتنعه بكلامج
وكلش مو متحسفه على هالتجربه الممتعه
الف الحمدلله
أحبك الذي احببتني فيه
ووفقج للخير واسعدج دوم يامن تستحقين السعادة
:**

esTeKaNa يقول...

fahad in my mind
~~~~~~~~~~~~~~~~~~~
ياهلا ويا مرحبا
:)
المهنه فيها نساء مبدعات
حابين المهنة ومقتنعين فيها
احساس الانسان بالمسؤليه احساس عظيم وكبير وكل مهنه فيها سلبيات وايجابيات
اي قضيه تنعرض في
بمجال تنرفض وتنرد
انتي بالنهايه تجتهدين
وشي طبيعي تخطئين او تكونين على صواب هذا وارد بكل مهنه
!!
انا مو متسحفه على هالتجربه الحلوة
كل اللي بفقده المكتب والناس الطيبه اللي عشت وياهم ومعرفتهم مكسب
بس هذي حال الدنيا
والحمدلله
:))

esTeKaNa يقول...

6mashah
~~~~~~~~~
مهما سويتي اذن من طين واذن من عجين
تحترين من المتطفلين بلا سبب صراحة
!!
تدرين شكثر اثر فيني تعليقج؟
وكلمة انتي قدوة لي بابسط الكلمات والحروف حسستني بالمسؤليه
ان شاء الله اكون قد هالكلمه ياصديقتي العزيزه
:))
تعليقج وايد شجعني
وعطاني دفعه معنويه
وعشان ماحس بالبطاله
راح اعلن افتتاح هالمكتب ضروري
لول

esTeKaNa يقول...

mamloo7a Q8ia
~~~~~~~~~~~~~~~~~
هلا بملح الجزيره كلها وملح الخليج
:**
ولهان ولهان
ويحق لي اوله يا الغاليه
مادري ليش مو قاعده القى اوقات نتصادف فيها
:(
الله لا يحرمني منج يارب
ويسعدج دنيا وآخره يارب

esTeKaNa يقول...

shaLaT
~~~~~~~~
شلالات
@@
واي واااااااااي
بس شفت اسمج حسيت بلمج
للحين كل ما دشيتي تذكرت البوست اللي كتبتيه عني وضحكت من قلبي
:**
نرد حق موضوعنا
اهلج لهم وجهة نظر
بس للعلم ارد واقول كل مهنه فيها سلبيات وايجابيات
وكل بنت ممكن تفقد حيائها اذا اهي ارادت هذا مع ملاحظة ان الوضع بالمحاماة يكون اسهل لفقد اشياء كثيرة
!!
وعجبتيني انج ما عممتي ان الكل يدافعون عن الظالمين بس عشان تكونين دقيقة
قولي البعض
مو الاغلب
:)
ويوفقج يا الغاليه
ما قصرتي يا شلالات الخير

esTeKaNa يقول...

صقرقريش
~~~~~~~~~
ياهلا وأمية هلا باخوي صقر
حياك الله وهذي الساعه المباركة
كلماتك تفرح قلبي يزاك الله كل خير
وعسى ربي يوفقك يارب ويبلغ اهلك فيك يارب
ويحفظ لكم النسيب اليديد ويوفقه للخير
انته طيب واكيد اختك طيبه وتستاهل الطيب
:)

esTeKaNa يقول...

Nescafe
~~~~~~~~~~~
@@
حلم ولا علم؟
يا زين النسكافيه والله
انتي وينج من غير شر
عسى كل امورج تمام
:)
عساج دوم مرتاحة يارب
واكيد بيكون القادم لي ولج احلى

نورتي البلوق
:*

esTeKaNa يقول...

expatriate
~~~~~~~~~~~~~~
مبروك؟
اول من قالي مبروك على هالقرار
:)
تشجيعك مهم
اثق برايك
الله يحفظك ويوفقك بكل شي يارب

esTeKaNa يقول...

artful
~~~~~~~~~
يدتي؟
والله ياربي شاكة فيك
ولد عمتي
ولد خالتي
هالصوب هالصوب
ما يندرا
:pP~

esTeKaNa يقول...

بو تشخيص
~~~~~~~~~~~
ياهلا ويا مرحبا باخوي بو تشخيص
شكرا على مرورك وتعليقك
والله يوفقك يارب لكل شئ يسعدك
:)
اما عن المتطفلين فهم بازدياد
يغثونك بكلمه من غير سابق انذار ولا سبب مقنع
!!

esTeKaNa يقول...

DanDash
~~~~~~~~~
يا هلا بدندوشتي والله
:)
ترا انا الحجي الحلو يخوفني
لا تخوفيني لو سمحتي
Pp~
اللهم اجعلني خير مما يظنون واغفر لي ما يعلمون وما لا يعلمون
!!
ياربي يوفقج ويسعدج مثل ما انتي دايما تسعدين قلب استكانة بكلماتج
أحبك الذي احببتني فيه
وجمعني وإياج على منابر من نور خوات متحابين في الله يا دندوشه
:)

esTeKaNa يقول...

Kuw-son
~~~~~~~~~~~
ياهلا باخوي العزيز
ويوفقك يارب العالمين
:)
اسعدني استمتاعك
كنت احاتي يكون موضوع ممل وطويل
شكراا طمنتني

esTeKaNa يقول...

قلب طفلة
~~~~~~~~~~~
ياهلا بقلب الطفلة الجميلة والله
:)
كلماتج تسعد قلب استكانة
ويارب يجعلني خير مما تظنون ما قصرتي يا صديقتي العزيزة
!!
واجمعين يارب

esTeKaNa يقول...

متفائل
~~~~~~~~~~~
هلا باخوي متفائل والله
عاش من شافك
!!
افا عليك
انته بس قولي وابشر بالخير
للحين ما خلصنا كل شغلنا
يبيلنا فتره بسيطة بس نضبط باجي الامور
فاذا عندك شي لا يردك الا لسانك
:)
وشكرا على المرور وهالكلام الطيب
واللله يشهد انك من الناس اللي اثق برايهم وتفكيرهم ويسعدني رايك ومرورك دايما

لؤلؤة يقول...

بالتوفيق يا نجمة وين ما كنت
وعسى كل قراراتج في صالحج ان شاء الله
:)

حسام بن ضرار يقول...

استاذه استكانه

:)

و هل غابت عنج كل متاعب و هموم المهنه و طبيعتها لما قرتي تدخلين كلية الحقوق؟

هذي مهنة القلب الميت

كل بلاوي الناس تصير تحت عين القانوني

Barrak يقول...

شرفتينا


وهذي الحياة ياوخيتي
اسف ياسيدتي القانونيه

هذي الحياة اليوم هني باجر هناك
واهم شي نقدر نطبع ذكرى حلوه

وان شاء الله بكل مكان
تتركين ذكرى جميله



الله يوفقك

ARTFUL يقول...

;D

حسافتج يا كويت يقول...

استكانة


موفقة يا رب


وروحي وين ما تروحين انت مثل الجيكر بالجنجفة وين ما ينحط يكون ورقة رابحة


سوري على التشبية هذا اللي طرى على بالي

بس فعلا افكر جديا بإستنساخ إستكانات وايدة

او بإصدار فتوى تبيح بأن يكون لك اكثر من اب وام وزوج وابناء لان الجميع فخور بك فلماذا يقتصر الامر على اناس معينة


ابدا لا اقول كلامي هذا من باب الحسد استغفر اللة فانا اتمنى لك كل السعادة ولمن حولك


ولكن ساعات الواحد يقول هالزين يبيلة ناس وايدة تحتك فية عشان تستفيد منة واتهنا فية




واخيرا موفقة

someone_q8 يقول...

السلام عليكم
اختي استكانه , يمكن ردي راح يكون عملي ومباشر لج و بدون عواطف هالمره فقط مثل ما تعودتي علي

اختي مدام ضميرج موجود احساسج موجود وانتي موجودة فا ليش الخوف من نفسج ؟؟
مدام عندج العقل الواعي اللي يخليج تتخذين اي قرار مو عاجبج بنظرج , اذا انتي قادرة على هذه المهنة وبنجاح ايضا لان بإمكانج اختيار القضايا اللي اتحسين انج راح توقفين مع المظلوم ايضا من ناحية الحلال والحرام اي شيء اتشوفينه انه حرام او انها شبه بعد ان تتأكدين منها مو غصب تمسكين هالقضية وايضا تقدرين تتفاهمين مع المكتب اللي تشتغلين فيه ان مو اي قضية تمسكينها اذا حسيتي انها فيها شبه او انها حرام واذا ما وافق المكتب على نظرتج للأمور في الف مكتب بالكويت

اختي استكانة ما احب اشوفج منهزمة بقراراتج , يمكن تستغربين ليش اقول منهزمه وانتي بقرار نفسج اتقولين لأ , لكن اللي حسيته من طريقة الكلام اللي تكتبين فيه في انهزامية
اختي مدام انتي فيج كل هالمواصفات اللي ربج يحبها والكل يحبها وتاخافين ربج بكل خطوة عيل كوني محامية واسمج استكانه اللي ما تخاف تتغير من خلال اي قضية لان الروح وحده مو ثنتين
و آسف اني طولت عليج واعلى اسلوبي الجاف لكن لانج اخت عزيزة ابي لج الافضل

لج مني كل تحية واحترام

charisma يقول...

حبيبتى انتى
اليوم بس قدرت اخصص وقت حق هالبوست الى ما ابى ابخص حقه بقراءه سريعه

اختى محاميه
ودايما كنت اسالها هالسؤال شلون تقدرون اترافعون عن ظالم ضد مظلوم
شلون قلبج يطاوعج
:/

بالفعل اهى مهنه صعبه

يكفى انج اكتسبتى خبره ومارستى هالمهنه مع ناس اتحبج واتخاف عليج

اهم شى تشتغلين فى مكان مرتاحه فيه مع نفسج هذا اهم شى

:**

حبيبتى انتى
الله يعطييج على نياتج يالغاليه
ويوفقج دنيا واخره يا استكانه با بنت امج وابوج

غريب يقول...

ستكانه انا احترم قرارك بس انتي مادرستي عشان تقعدين بالبيت في اماكن وايد عندها دائره قانونيه تقدرين تشتقلين فيها والعمل عباده والله اوفقك تحياتي لك

esTeKaNa يقول...

لؤلؤة
~~~~~~~
ياهلا باللولو
:)
يزاج الله خير واجمعين يارب
بس انا مو نجمة
انا استكانة
:pP~












حسام بن ضرار
~~~~~~~~~~~~~~~
ياهلا ومرحبا باخوي حسام
:)
للعلم
كنت في كليه ادبية اخري
وقررت التحويل من تلك الكلية للحقوق بكامل ارادتي رغم تأخري سنة كاملة نتيجة هذا القرار
نعم كنت اعلم بمتاعب المهنه
ولكن..هل هناك شئ في الدنيا صافي من كل المتاعب
!!
الفرص كثيرة
والمستقبل في هذا المجال جميل
ادعي لي يا حسام
:)













barrak
~~~~~~~~~~
الشرف وجودكم حولي يا براك
:)
فعلا هذه الحياة
ولكن ...أخييتك يا براك ترتبط نفسيا بكل شئ حولها
حتى الجمادات
فلك ان تتخيل انسانه ترتبط بالجماد كيف لها ان تودع الطيبين من الناس
!!
الحمدلله
ان شاء الله القادم اجمل
:)













artful
~~~~~~~~~
:)

esTeKaNa يقول...

حسافتج يا كويت
~~~~~~~~~~~~~~~~~~~
هسافتج
!!
بققت عيوني وانا اقرا انتي مثل الجيكر بالجنجفة
لك ان تتخيل بنت في مقتبل العمر تقرا انتي مثل الجيكر
هههههههههههههههههههه
بس عقب ما قريت الشرح استوعبت
والله يا حسافتج انك خجلت استكانة
شقولك؟
اقولك اني فرحت كلامك وخفت من مديحك وقلت يا عسى ربي يحفظك ويهني قلبك
ويسعدك
ويرزقك الذريه الصالحة
ويطيب خاطرك بكل شي
تستاهل الخير
ونظرتك لي من طيبك واخلاقك يا حسافتج
:)

esTeKaNa يقول...

someone-q8
~~~~~~~~~~~~~
وعليكم السلام ورحمة الله وبركاته
:)
ردك يحمل من الصدق الكثير
انا بحاجة من يصدق معي وليس من يجاملني يا اخي العزيز
فهنيئا لي بوجودك وتعليقك
وردا عليه:
انا ولله الحمد في مكتب ممتاز
نوعيه الناس والقضايا اللي تنوخذ فيه ما اشك فيها ان شاء الله
!!
المشكله ليس في هذا الموضوع فقط
الاحتكاك المباشر مع نوعيات مختلفه في المحاكم والمخافر والتحقيق
التعرض للمواقف اعتقد ان يفضل ان ابتعد واترفع عنها
الحضور بملفات بعض الزملا المحامين كالتزام ادبي دون ان تعرف حقيقه تلك القضايا
والكثير من الامور المتشابهه يا اخي العزيز والمتشابكة
!!
انا لم اندم على تلك التجربه
ولو يعود بي الوقت لاعدتها واخذت وقت اطول
ولكن اعتقد ان لي فرصه اجمل
والقادم باذن الرحمن افضل
:)

esTeKaNa يقول...

charissma
~~~~~~~~~~~~
ياهلا ويا مرحبا بالغالية
يا بخت قلبي بوجودج
بدعائج
وبطيبج
:*
الله يحفظ اختج ويوفقها
مكانها زين وشغلهم وايد ارقى من الاشيا اللي انا شفتها
:))
بس على قولتج
تجربه
وكانت تجربه ممتعة جدا الحمدلله











غريب
~~~~~~~
يا هلا بالغريب
:)
اكيد ما درست عشان اقعد بالبيت
وصدقني...القادم اجمل باذن الله
وراح ابشركم باخباري الجميلة قريبا
شكرا لك

Flowera يقول...

هالبوست عجييييييييييب
اخنقتلي العبره لما قريت القسم

الله يوفقج دنيا وآخره

tasty_as_berry يقول...

السلام عليكم ورحمة الله وبركاته ،،،

شلونج ؟

أولا مبروك على التخرج ما ادري يمكن آنا قديمة بس كنت خابرتج بآخر سنة

ردت فعلج طبيعية خصوصا إذا كنتي من محبي تقديم العون والمساعدة حتى لو لم يطلب منج فراح تتأزمين نفسيا

موفقة حبيبتي
والله يسهل دربج

mantovani يقول...

موفقة انشالله

و الله يجعل لج في كل خطوة سلامة
و نجاح و توفيج من الله

اتوقع تعرفين مكانتج عند الناس
عدل عقب هالبوست

و انا ماراح اضيف شي

انا مو احسن منهم

اضم صوتي لهم و ابدي لج اعجابي


مانتوفاني

بنت الشامية يقول...

استاذتى المحاميه الرقيقه استكانه
========
رغم كل ايجابياتها وتمتعي فيها.....كان لابد ان ارحل
وان انهي تلك المرحله في حياتي باسرع وقت ممكن
حفاظا على استكانة قبل اي شئ آخر
!!
========
تبين الصج مااا اتخيلج محاميه تترافعين عن شركه سرقت تعب عامل.....تروالى بتصيحين قبل ما تترافعين ضده ...وبعدين بتعوضينه من مالج الخاص.....وبيتعب قلبج من هالمجال
لانج صج انسانه ....وهذا مهنه متعبه للانسان الحساس الصادق مع ضميره
و اكيد بتتركين بصمات قويه بين زملائك ورئيسج بالعمل.....لانك مثابره ومجتهده
واينما تذهبين فلك بصماتك المميزره
الله يوفقج اينما كنت وفى اى مجال تعملين به......يااااا استاذتنا
والله يحفظج

`~MnO YeNSa! ~` يقول...

استكانة
وااااااي
شسويتي
فيني
بهالبوست
ترى من اول ما نزلتيه ولنا اقرا فيه
مشالله
مشالله
و انا اقرا البوست دمعت
عيوني صج
صج
حلو شعور الانسان بالرضا
على الشي اللي نسويه
بحد ذاته هالشعور
يخليج تبدعين و يعطيح دفعة كبيرة
انج تنجزين و تدورين
بداخلج شنو
كل مكامن الابداع
ودعتي مرحلة
ادري انها وايد عزيزة
عليج
بس الانسان يفكر انا
شنو سويت !.؟
طعت ربي ؟

شنو ضفت حقهم (المكتب ) ؟
شنو ضفت حق المجتمع والكويت
امي ؟ ابوي ؟
فخورين فيني ؟
حققت ولو جزء من حلمهم وحلمي
استاهل دمعتهم يوم تخرجي من الروضة ولمـــــــــــا الجامعة ؟

و اولا و اخيرا شنو ضفت حق نفسي !؟

بعد الرضا بانجازي و لحظاتي
بعد دموع الفرح و عبراتي
اشـــــــــوفك يا طموحي من بعيد
اشـــــــــوف احساسي بالفخر لك يزيد

انا على بعد خطوة من طموح
والامل لو غايتي له ابوح

....
حبيبتي
امضي
فالكل
محتاج
لصدفك :*
لقلبك
الصافي

esTeKaNa يقول...

flowera
~~~~~~~~~~
وايد استانست ان ياز لج البوست
الله يحفظج ويوفقج بكل شي يارب
:)




tasty as berry
~~~~~~~~~~~~~~~~~
ياهلا ويا مرحبا
عاش من شافج
!!
انا بخير الله يسلمح من كل شر
انتي بشريني عنج؟
وايد استانست بمرورج
واتمنى من كل قلبي انج تكونين بخير
:)














مانتوفاني
~~~~~~~~~~~~~~
كل كلمة تنكتب في بلوقي من قلب صادق يكون لها مكان بقلبي اكثر من ما تتخيل
!!
الله لا يحرمني منكم جميعا
وشكرا على المرور الجميل
:)

esTeKaNa يقول...

بنت الشامية
~~~~~~~~~~~~~
ياهلا وامية هلا بشيخة الشامية كلها
:*
تصدقين ما كنت اصيح
!!
بس اتقطع من داخلي
:(
يابخت قلبي دام هذي نظرتج لي
يزاج الله كل خير يا سيدتي الجميلة
الله يحفظج ويبلغج بعيالج كلهم

esTeKaNa يقول...

mno yensa
~~~~~~~~~~~~
أنا بجيت
وانا نادر ما ابجي هني ترا
!!
انتي المسك اللي انختم في هذا البوست
وكلماتج اجمل واروع كلمات قريتها اليوم
شكرا من اعماق روحي
شكرا لانج موجوده
شكرا لان هذي نظرتج لي
شكرا على كل شي قلته وما اقدر اقوله
ماني قادره ارد عليج من كثر تأثري
لازم اشوفج قريب واقولج شكثر اثرت فيني هالكلمات
:***
الله يحففظج ويفرح قلبج دوم

العائِشَة يقول...

استكانه

انتي جَميله وَحسب

لَيتني كُنت خَمس سَنوات أقرأك

:(

جَميله هالاستكانه

تراب الكويت يقول...

عندما تأمرنا النفس لا المنطق فقط
اعتقد ان الطاعة اجمل

دعائي هو كل ما املكه
كوني انسانة ما استطعتِ

:)