الجمعة، يونيو 27، 2008

أبعد الناس أنته...وأنته في عيني

يرقبها من بعيد
تزرع الحب وتحصد من كل شئ مزيد
يحوم حول حماها...عله في يوم يكون منها قريب
ينتقي لها من الكلمات اجملها
ويبهرها في كل يوم بشئ جديد قد يكون سبب في سعادتها
يعلم..ان لها في روحه احساس عميق
وأن قلبه لها في كل لحظة يطير
يخفي اشواقه في قلبه
وتنطق من الوله عينه
!
.
.
.

كم هي لطيفه
تغرقه بطيبها..تخصه بترحيبها
تستمتع بأحاديثه
وبه تهتم
رغم كل البريق الذي حولها
رغم هالة النور التي تزينها
كان هناك شئ ما خافت في عينيها
شئ تخفيه بقوة...ويفضحها بقسوة
!!
.
.
.
.
يتكأ على جدار الصبر
يبتعد عنها ...
عل الشوق يحركها
يحرقها
ويجعلها يوما ما تبادر وتمر
!!
ويطول الصبر
يذكرها في اعيادها
وتنساه في عيده
يذكرها بوجوده
فتخجل من نفسها
وتنسيه ألم نسيانه ...بوجودها
ويسئل نفسه:
لما لا تبادر؟
لما لا تجبر له خاطر؟
هل تتصنع احساسها به؟
ام هي لقلبه تجامل؟
حين نحب...نحن لا ننتظر دائما مقابل
كل ما نتحراه شئ بسيط
نظرة لعين
وكلمه تفرح خاطر
شئ صادق قلوبهم بها تبادر
شئ تعجز كلماتنا عن شرحة
ولكننا به نشعر ونحسه
.
.
.

اليوم...
كانت قريبه منه بمكانها
بعيده عنه بروحها
كانت تتكلم عن احداث يومها مع اخته
وكان الكل بحديثها يشارك
وحده..كان يناظر عينيها بشغف
وينصت لحديثها بلذه
حين انتبهت لعينه ارتبكت
ارخت رمشيها بخجل
واستئذنت منهم برقه
ورحلت قبل أوانها
لما رحلت؟
.
.
.
.
الساعه الواحده فجرا
يستسلم امام نفسه
يرسل لها رسالة:
عسى ماشر؟
طلعتج اليوم من الزواره مو طبيعيه
في احد ضايقج
؟
في ظلمة الغرفه يشع نور هاتفها
من في هذه اللحظة يتذكرها؟
تقرأ الرسالة
تغمض عينيها
وتتسلل منها دمعه خوف تمسحها في وسادتها
هي القلب الذي يعشق الدنيا
هي من تنثر الفرح والحب حولها
عاجزه عن حب من يستحق حبها
!!
يستحق كل دقة قلب فيها
يجتمع فيه كل ما تتمناه أنثى
لكن...شئ في قلبها صامت
يعاندها
يشاكسها
ويرفض ان يعترف لها بأحقيته بحبها
في عقلها صوت للمنطق يناديها
بجانبه ستكونين سعيده
كوني مع من حبه يفوق حبك له
كوني مع القلب الحنون الذي يحتضنك في كل وقت له تحتاجينه
لما تجرحين قلب يهدى لك الدنيا بيدينه؟
يرد قلبها بهمس:
ولما تجاملينه واحساس قلبك تجرحينه؟
واحد زائد واحد بالحب...لا يساوي اثنين
قد يساوي عشره..فالحب لم يخضع يوما لأي منطق تريدينه
لا تجاملينه
وانتي غير قادره على منحه شئ لا تملكينه

!!
تستحثين قلبك،تبحثين عن شئ في داخلك لا تجدينه
كوني انتي...ودعي الايام تكون كفيلة
برسم مستقبل لا هو ولا انتي تعرفينه

.
.
.
.
تفتح رساله جديده
تكتب له:
أنا بخير
نام ورتاح
وتصبح على خير
.
.
.
هل سيرتاح؟
وهل ستصبح هي على خير؟
تضع هاتفها تحت وسادتها
لا تريد ان تشعر بأي ارق انتظار رده
ولا تريد ان تحمل روحا فوق طاقتها
لا يوجد مشكله
!
كل مافي الامر فكره
وتعب قلب ارهقه حسه
ملاحظة:
اولا:اي احد يوصله ايميل مني يمحسه ترا فايروس
:(
والسموحه لكل من يبعث لي ايميل حاليا
اعاني من لويه شوي

هناك 67 تعليقًا:

2cool2care يقول...

كلمه ولا جبر خاطر ولا سلام من بعيد



كلش مو هذا الرد اللي يبيه الحبيب من اللي يحبها ومو قايلها

هل تعتقد راح ينام بعد ما ردت عليه بهالرد البارد

انا في انتظارك.... كملي اللغنيه انتي:)

esTeKaNa يقول...

2cool2care
~~~~~~~~~~~~
ولا رساله يا هاجر
من يد ساعي البريد
:Pp~
اكيد ما يبي هذا الرد
بس تتوقع يبي رد يطيره بالسما
بس ما يكون رد صادق؟

الزين يقول...

:(

ليش ما نقدر نحب اللي يحبنا ويبينا وميت على طارينا

ليش الحب ما يجينا باختيارنا

وليش لما نحب ما نعرف نختار

ليش؟

اكو وحده قالت لي من زمان

انحبي بس لا تحبين راح ترتاحين
يمكن كلامها فيه شي من الصحه

بس على غفلة وزحمة الحياة
توتعين على شعور انج تبين تملكين هالشعور

الحب والشغف والشوق والإنتظار

تبين تعيشينه
تبين الحب يلوعج
وتبين الإننتظار يشعلج
وتبين اللقاء يفقدج اتزانج

تبين تحسين مع مسجاته ان الحياة احلى
ومع مكالمته ان الحب موجود
ومع شوفته ان الدنيا كلها بين ايديه وبحضنه

وتيين بالليل وتحطين راسج على المخده وتبين تحلمين فيه
واليوم اللي يجمعج وياه
ودفاه شلون صاير
وقربه بنسيج اللحظة وكل شي بيوقف هناك حتى الزمن

اثرتي دثرتي يا استكانه
:)

حبيت البوست وعور قلبي

وينج؟

تعالي سولفي معاي

bin3li يقول...

باختصار...جنية
:P
أتفق معاج ،كل شخص يكون نفسه و الأيام كفيلة بكل شي

صاير أتفق معاج وايد هاليومين!!
شصاير؟؟
:)

Purplecious يقول...

في ظلمة الغرفه يشع نور هاتفها
من في هذه اللحظة يتذكرها؟
تقرأ الرسالة
تغمض عينيها
وتتسلل منها دمعه خوف تمسحها في وسادتها


مبدعه يا استكانه كالعاده
:*

7osen يقول...

جميلة فكرة البوست

في هذي الحالة

لما ترتبط فيه راح يحبها ويسعدها ويحقق لها كل ما تتمناه

لكن
المشكلة في الداخل

إذا ما كان الحب صادق من الطرفين ونابع من الأعماق بكل صدق
ماراح تكون سعيدة مهما سوى لها

الحب على قولتج ماينفهم ماهو واحد زائد واحد يساوي أثنين

الحب شي غريب وصعب تفسيرة

من الأفضل إنها ما تظلمه

lawyer يقول...

من قدره عندها
ما ودها تكسر قلبه

تتمناله بنت شفقااانه عليه

او يمكن هو هبه من الرحمن


من يرد هبه الرحمن؟؟


اعرف احساسها ادري في شي بداخلها يقوول
ديربالج ترا النعمه زواله
اليوم تلقينه باجر يرووووح..


شي غريب
احساااااس غريب


بس من عطاه الامل في حبها؟

Mamloo7a Q8ia يقول...

في عقلها صوت للمنطق يناديها
بجانبه ستكونين سعيده
كوني مع من حبه يفوق حبك له
كوني مع القلب الحنون الذي يحتضنك في كل وقت له تحتاجينه
لما تجرحين قلب يهدى لك الدنيا بيدينه؟
يرد قلبها بهمس:
ولما تجاملينه واحساس قلبك تجرحينه؟

مبدعه دايما يالغاليه
وايد عجبني البوست
وحسيت اني عشت معاهم من روعته

الله يعينها عقلها يقول شي وقلبها في يقول شي ثاني
والاختيار صعب

تسلم ايدياتج حبيبة قلبي
:**

غير معرف يقول...

estekana
توصلني رسائل غريبة من ايميلج
ديري بالج و غيري الباسوورد مال الايميل و اي مكان ثاني أنتي مشتركة فيه

لا تستلمين أي ملف من أي شخص عن طريق الماسنجر، لا تتعاملين مع اي وصلة تتطلب منج ايميلج و باسوورد ايميلج

الملفات المهمة في كومبيوترج و الخاصة احفظهم في سيديهات و امسحيهم من الكومبيوتر

ديري بالج
و الله يحفظج و يحفظ الجميع من أصحاب النفوس المريضة

Najmah يقول...

العنوان بروحه عالم
:(

اللي يبينا عيت النفس تبغيه
واللي نبيه عيا البخت لا يجيبه
!!

اذا كان الحب من طرف واحد
فلن تشفع المحاولات ولا المجاملات

عندما نعجز عن الاحساس بشعور شخص يتدفق لنا حبا فهل سنتمكن من مبادلته الشعور؟

الحب فقط
لا يخضع لأي قانون
لا يعترف بالحواجز
ولا يضعف امام المسوغات
:)

Sn3a يقول...

سويييت
تدرين استكانه, ام رفيجتي كانت تطفرنا لما نشوف مسلسلات رومانسيه او افلام ببيتهم
تقول
اخذو اللي يحبكم
مو اللي تحبونه

بس لما كبرنا
عرفنا ان ماكو شي سهل
واصعب شي تغشين شخص بمشاعرج
لان مجرد ما القلب يميل لشخص راح يبين جايز تكرهين الشخص نفسه اللي يحبج لان يبعدج عن شخص تبينه


عدل كلامج
واحد + واحد مايساوي رقم ثابت بهالمعادله

وردها كان مناسب

DanDash يقول...

بوست فضيع

بكل بساطة الي عليها تستمع لعقلها

المفروض نختار الي يحبنا مو الي احنه نحبه
صدقيني محبته اهي الي راح توصل اني احبه
يااا بنية يعني شلوون ما ادز لج ايميل
مااقدرشي

انقذناا يا حليب السعوديه

الخيلاء يقول...

ليش الحياه قاسيه

ليش الي يحبون ما يتلاقون

الي يبيها ماتبيه ولا تفكر فيه
و الي تبيه مايدري عنها ولا عن هوى دارها

" مخترت انا حبك .. محد يحب الي يبي "

مادري منو يغينها بس دايم يطري علي هالبيت كل ما شفت جذي قصص

الله يبعدنا عن هالشعور و يكون اليوم الي يدق فيه قلبنا يدق للانسان الصح بالوقت الصح

:)

محـــــارة يقول...

ابيه ياني أيميل منج وكأنه كرت استانست وقريته ورديت عليج وفعلا الانتي فايروس الي عندي قام يلولش وربنا يستر

غاليه ادزين فايروسات ادزين اوادم معاهم متفجرات شنسوي مكانج ومتربعه فيه ياسميت الغاليه

.............

بالنسبة للحكي الي انكتب الحب أمتع ما بهذه الدنيا وأمتع إحساس رنة موبايل وكلام بوقت مو بالخاطر ولا الحسبان حلو الإنسان يخضع للمنطق بس الأمتع إحساس الحب وينونه بس لما نشعر فيه فعلا

قصتج ذكرتني بوحده أعرفها عدل الولد مغرم فيها لحد الجنون يدزلها كلام المعسول مع أقرب طفل ومع أمه وأخته لما تيي بيتهم مايتحرك من مكانه على وعسى يلمحها ويشوف لو ابتسامتها

طلب أيدها مرات وعشر المرات لكن قلبها يعز ويحترم حبه لها بس مشاعرها مو قادره تلمس قلبه

راح بطريجه عقب ماتعب منها تزوج وربي ارزقه ابنت بس ماقدر يكمل انفصل وهي راحت بدربها وتزوجت من غيره والحمد لله سعيده

انفصاله ما أعتقد له علاقه بحبه بس يبقى قلبه حاجز مكان لمحبوبة الطفوله

ساعات أضحك على سوالف حب الطفوله بس بالواقع حب الطفوله عند نااااس فعلا بعده باقي مو لعب يهال

5roofa يقول...

:'(

ليش ما تحبه؟؟؟

ما بنامون و انا ما بناام بقعد احاتيييهم

و احااتيي

مت لمة قلتي انه عيونه تشوفه باليمعه و اهي تسووولف


قلبي بغا يوووقف

روعه استكاانه والله قمة بالروعه

بس ليش ما تحبه؟؟؟

:'(

الحب مشكلة

تسلم اييييدج

salamz sis...

فارس هوى الكويت يقول...

السلام عليكم اختي
هالمره 20\20
عيني عليج بارده تسلسل افكار ولا منه
وبوست جدا راقي تسلم يمينج
بس من قريته طرت علي هذي الزهريه
لعبدالله محمد الفرج


خاطبت وحي المحبـة والهـوى والـروح

والشـوق مني مـزّق مهجتـي والـروح

من يوم شميـت ورد محاسنـك والـروح

من هاجرك دوم صدري والضميـر حنـا

يا زيـن مـا شـوف أنـا بقلوبكـم حنـا

لا تنزعـج يـا تـرف من شوفنـا حنـا

خطار جينـا نشـوف وجيهكـم ونـروح

تحياتي ودامت لنا استكانتج :)

تراب الكويت يقول...

بعيدا عن روعة الفكرة وجمال الموقف
وقريبا من هذا الاحساس

ساكون
حيث تجد كلماتك صداها في نفسي

....

صباح الحب :)

فريج سعود يقول...

انا ماليش في الكلام الجامد ده
شسالفة الايميلات؟

عبدالرحمن يقول...

اللي يبينا عيت النفس تبغيه واللي نبيه عيا البخت لا يجيبة


هي المشكلةذاتها بين
المنطق الذي يقودة العقل
والحب الذي يقودة الجنون




طول عمرج حقانية واظهرتي هذه المره الرجل في الجانب الاجمل في البوست اللي اهو العاشق الصابر :)

شكرا

لطيفة الحاج يقول...

قصة جميلة يااستكانة
استسلمت لتفاصيلها جدا..

اسلوب شيق
تقلبي تحياتي =)

ShLaLaT يقول...

اكيد بالنهايه راح تحبه

اهي خلها تجرب اول بعدين تقرر


والله شي محير
بس اكيد اهي حاسه فيه


اهي تحب غيره ؟؟
مو معقوله



خليها تحبه
:)

مُحَسّدْ يقول...

يفضل المرء احيانا ان يبتعد عن الأحبة حتى لا يتقلب في جحيم الشوق !

قلب طفله يقول...

العنوان يتحجى :(

حب شخص مو قادر يحبنا عذاب

و هم الشفقه على من احبنا

و ما قدرنا نحبه الم و عقاب

الله يعين قلبها و قلبه

تسلمين يا الغاليه

6mashah يقول...

استكانه
غريب كيف يصف شعورك انسان اخر
اتعلمين انه سيحتفظ بهذه الرساله ويقرأها بكذا طريقه
ويحاول ان يفك ما بين الكلمات والحروف وهي بعد فتره طويله تعود لتقرأ رسالته ...

وصفتي تلك المشاعر


تتساءلون انتم لماذا من يمر بهذه الحاله يعمل على تعقيدها

بين صوت المنطق في داخلي وصوت القلب
اصبح تائه

اتعلمين مالذي حدث
ابتعد ولم يعد خير له وخير لي
نعم تمنيت ان يغيب لانني لا اقدر ان احبه
ابتعد ولم اراه
ولكنني اصبحت افكر به

هي تعقيدات النفس البشريه

شكرا لكي

darkness يقول...

مساج الله بالخير استكانه

الحب انواع كثيره

مممم

قبل سنين كنت اعتقد انه نوع من انواع التعود

يعني تقدرين تقولين عشره و هالسوالف

اليوم اقر اني كنت مخطاه

كما ان الحب هبه الايام

تهبها من تشاء لمن تشاء

لا احد يملك حق تغيير هذه الحقيقه

و لا نملك الا ان نتعايش مع الواقع

حب ايه اللي انت جاي تقول عليه؟

انت عارف معنى الحب ايه!!؟

مستحيل ترويض القلوب

!


ما وصلني شي

:p

esTeKaNa يقول...

الزين
~~~~~~~
يا مسا الزين كله
:*
تقولين ليش ما نقدر نحب اللي يبينا واللي ميت على طارينا؟
تهقين ما نحبه؟
نحبه
بس حب هادي
متمكن
عميق
ما نحس فيه الا اذا فقدناهم يمكن
او اذا حسينا بلحظة خوف من فرقاهم
!!
أمان وجودهم يعدم في قلوبنا الاحساس
يمكن
كل هذا يمكن يكون تفسير مقنع
ويمكن يكون لا


قالت لج حبي لي يحبج وترتاحين
وتهقين الحب بيدنا؟
ولا الراحة اهي بس غايه المنى بعينا؟



هذا رد مختصر
ودايما لحديثي مع الزين بقية
في مكان ما
وفي وقت آخر
:*

esTeKaNa يقول...

bin3Li
~~~~~~~~~
ربي راضي عني
بسجد شكر
الحمدلله اللي بلغني ربي بهاليوم اللي بن علي ما يناجرني ويتفق وياي
:Pp~

esTeKaNa يقول...

purpelecious
~~~~~~~~~~~~~~~
هلا وغلا
الله هذي الجمله يازت لج؟
يا بختي والله
:*
حياج الله

esTeKaNa يقول...

7osen
~~~~~~~~
ياهلا ويا مرحبا بحسين
:)
هل تؤمن بأن الحب كالورد؟
بذره
تسقيها
ترويها بالاهتمام
وبالعطاء
ومن ثم تزهر في حياتك وتكبر؟
كنت افكر هل اذا اعطته فرصه
واعطت قلبها فرصه
ستحبه من قلبها؟
ام ستظلمه اكثر؟
فعلا الاحساس لا يخضع لفكرة ولا لتفسير واحد مقنع
!!

esTeKaNa يقول...

Lawyer
~~~~~~~~
هلا بالمزيونه هلا
:*
تدرين من اللي عطاه الامل في حبها؟
خوفها
من واقع يحرمها من كل انسان ممكن يحبها
تطرف له الباب
وتناظره
ممكن الظروف تخليها تفتح له هالباب
ويمكن في يوم تسكره
قمة الانانيه
!
اشلونج انتي؟
:)

esTeKaNa يقول...

mamloo7a-q8ia
~~~~~~~~~~~~~~~
يا هلا بالملح كله
يا هلا وأمية هلا بالغاليه
:**
عندما يتفق العقل والقلب على حب
فهذا اهو الحب الابدي
ولكن متى يتم هذا الاتفاق
!!








anon.
~~~~~~
ايميلي فاضحني مستخف وقاعد
باجر او عقبه باقرب وقت بسوي له فورمات
شكرا على التنيبه
بس منو معاي؟

esTeKaNa يقول...

najmah
~~~~~~~
هلا بنجمة البلوقرز كلهم
:*
عندما نعجز عن الاحساس بشعور شخص يتدفق لنا حبا فهل سنتمكن من مبادلته الشعور؟
كيف عندما نعجز عن الاحساس
نتمكن من مبادلتهم الاحساس
!!
فاقد الشئ لا يعطيه
:)
اشاركك الراي يا النجمه

esTeKaNa يقول...

sn3a
~~~~~~
يا مسا السنع كله
:*
هذا بيت القصيد
اصعب شي تغشين شخص بمشاعرج
وبدل لا تطيبين خاطره
يمكن تكسرين خاطره بجرح ما تقصدينه
!!
الله يطيب خاطر الجميع
ويرزقنا من يحبنا ونحبه
:)

esTeKaNa يقول...

Dandash
~~~~~~~~~~
ياهلا بدندش والله
:*
تهقين تسمع عقلها؟
وقلبها وين توديه
وهو يعاندها وبكل موقف يفضحها
!!
عساني ما افقدج يا لغاليه
ترا ايميلي زين
يستقبل
ويدز
مافيه شي
بس مرات يخوره ويدز ايميلات فيها بطايق هذي لا تفتحنيها
غيره..الوضع سليم
شكا يا حليب السعودية
:D~

esTeKaNa يقول...

الخيلاء
~~~~~~~
تصدقي ما اخترت انا احبك
احبك
ماحد يحب اللي يبي
يا حبي المر العذب
سكنتي جروحي غصب
ليت الهوى
ليت الهوى وانتي كذب
كان اعتذر لك..عن هواااي
وما اقول انا كوني معااااااي
!!!
هذي من أغنيه ابعتذر لعبدو
شي مو صج كلماتها
عجيبه
:)
وفعلا الحياة مرات تكون قاسيه
لكن مو دايما
!!
للحياه فلسفه غريبه
ولكن من منا يفهم فلسفتها؟

اللهم امين
الله يرزقنا الشخص الصح
بالوقت الصح
قولي آمين
عادي قولي ماحد يسمع
:Pp~

esTeKaNa يقول...

محارة
~~~~~~
هلا بمحارتي هلا
والسموحه
ياربي هالايميل مفشلني جدام الناس
عيز يدزز ايميلات فضحني
:pP~
يا زين كلامج يا محاره
ويا زين احساسج
فعلا ...قد نعتقد ان حب الطفوله والمراهقه حب وقتي ويرحل
!!
ولكن عند البعض هذا حب العمر كله
:)
حياج الله

esTeKaNa يقول...

5roofa
~~~~~~~~
ليش ما تحبه؟
مافي سبب مقنع
!!
مو قلنا الحب ما يخضع لمنطق
ولا للعقل

اسم الله على قلبج
:*

esTeKaNa يقول...

فارس هوى الكويت
~~~~~~~~~~~~~~~~~
وعليكم السلام ورحمة الله وبركاته
ياهلا ويا مرحبا باخوي فارس
:)
فارس وجودك
وزهيرياتك التي تضيفها
تضفي بعد وجمال آخر للبوست
شكرا ما قصرت

esTeKaNa يقول...

تراب الكويت
~~~~~~~~~~~~~
ياهلا ويا مرحبا بتراب الكويت
نورتي بلوقي اليوم
:)
وهذي الساعه المباركة
حياج الله

esTeKaNa يقول...

فريج سعود
~~~~~~~~~~~
شدعوة يا حافظ
:Pp~
واصلني ايميل في كرت
دخلت الباس ورد وشفت الكرت
استخف الايميل وقام يدز حق اي شخص دز لي ايميل او اي شخص موجود في المسنجر
!!
وهذه كل القصه
:(

esTeKaNa يقول...

عبدالرحمن
~~~~~~~~~
أنا اشهد يا عبدالرحمن
اشهالنفس المزاجيه بس
:)
شكرا على مرورك
شهاده رجل
اعتز فيها طبعا
!

esTeKaNa يقول...

لطيفة الحاج
~~~~~~~~~~~~
ياهلا ويا مرحبا لطيفة
شكرا لمرورج
وحياج الله
هذي الساعه المباركة
:)

esTeKaNa يقول...

ShLaLat
~~~~~~~~~
يمكن تحبه
احد يدري باجر شنو يصير؟
:)

esTeKaNa يقول...

محسد
~~~~~~
فعلا
!
هو الحل الاسلم
رغم مرارته

esTeKaNa يقول...

قلب طفلة
~~~~~~~~~~
يا مسا الورد يا قلب الطفلة
:)
اختصرتي كل الالم بكلمات
مبدعه
!
الله يعين كل القلوب يارب

esTeKaNa يقول...

6amasha
~~~~~~~~~
يا مسا الاحساس كله
:)
ابهرني ردك
قرأتي مابين السطور
شرحتي الاحساس كله
واعطيتيني فكرة...مالذي ممكن ان يحدث بالغد
!!
شكرا لمرورك
نورتي البلوق

esTeKaNa يقول...

darkness
~~~~~~~~~~~
مساج الله بالنور والسرور داركنس
:**
كثير ما تتغير افكارنا ومعتقداتنا مع الزمن
ما كنا نعتقد انه حقيقه بالامس
يصبح اليوم وهم
!!
اشاركك الراي
وقفت كثيرا عند حقيقه
استحاله ترويض القلوب
خاصه تلك القلوب المشاكسه
:)
والحمدلله ما وصلج شي
الله حفظج
ايميلي مفشلني جدام الادوادم
:pP~

حسام بن ضرار يقول...

ما عندي تعليق، لأن مالي بهاالادبيات

فقط بغيت أسلم

:)

Lonsome يقول...

the greatest pleasure in this life is to be loved !

اخذي اللي يحبج لا تاخذين اللي تحبينه

غير معرف يقول...

اللي يبينا عيت النفس تبغيه و اللي نبيه عيا البخت لا يجيبه

: )

ARTFUL يقول...

سلامين وحته وصباح الخير

يعطيج ألف عااافيه

ما سمعتي المحضار شقول

سر حبي فيك غامض سر حبي ما انكشف .. إيش خلاني اعشق فيك و العشق كلف
أيش اوقعني في اشباكك وانا عيني تشوف ...

كل واحد مننا ماسك من السكه طرف .. لا هدف لي فيك يظهرلي ولا لك شي هدف
انتهى المشوار كله ماتلامسنا الكتوف..

بعد ذاك اليوم زاد الحب لي لك عندي و الشغف .. عنك اسأل كل شي حتى الشبابيك الخلف
و انت تغيبت عليا دورت في شمس الصيوف..


حبك استولى على قلبي وحملني كلف .. حب احرمني منامي ما اغمضت للعين دف
حب مهما لك وصفته عنه يقصرني الوصوف..

تسلمين

=)

charisma يقول...

صباح الورد

نصيحه لها اتسكر باب هالحب
خووووفج من حب الزواااره بعدى عنه
;P

روووح بعييد وتعال ساالم
:)))

ابدعتى بوصف المشاعر مثل عادتج

رغم هالة النور التي تزينها
كان هناك شئ ما خافت في عينيها
شئ تخفيه بقوة...ويفضحها بقسوة

يا سلام علييج
:*

بنت الشامية يقول...

بجانبه ستكونين سعيده
كوني مع من حبه يفوق حبك له
كوني مع القلب الحنون الذي يحتضنك في كل وقت له تحتاجينه

حرام عليها تفوت هالفرصه الذهبيه
تراها ما تعوض ابد اذا راحت منها
الحياة فرص ......فاغتنمها
الحب والحياة مو معادلة حساب
واحد+واحد= 2

خليها تعيش قصة حبها وتعيش ايامها
الحب ما يتعوض هالايام

دايما مبدعه بكتاباتج....واحنا نشطط وياها....لوووول

Barrak يقول...

كل مافي الامر فكره
وتعب قلب ارهقه حسه



القمنده كلها هني

Kuw_Son يقول...

مريت بجذي موقف :)

خوش قصة :)

|:| DUBAI |:| يقول...

تو الناس أمي

تو الناس

بطلنا ايميل

و استانسنا

كاتبة لنا

اي لاف يو

خخخخخخ


أنا قلت بلاها استكانة

استوت بنت مب زينة

خخخخخخ


!!

حسافتج يا كويت يقول...

شهادتي فيج مجروحة يا إستكانة


ومع هذا


كلامج حول وسوالفج احلى والطبيعة في كتاباتج هي اصل تواصلنا وحبنا لهذي المدونة

جنون إحساس يقول...

على كل ما الناس تتمنى تعيش حالة حب على كثر ما يصيبهم الحزن


ماندري شنسوي بالضبط

وتسلم ايدج

~FaHaD iN MiND~ يقول...

tra il dinya foraas wel forsa eli teyii mara ma ra7 tred o teyii marteen if she feel him khal t7awel tbayenla '3alata 3ndaha le'ana kethrat il 9ad wel la mobalat ra7 tahdem waid ashyaa2 feeh o ra7 ta3dem il e7saaas !!

etha ohwa waid perfect 7aram ethay3a men edhaaa wetha kanat seej t7es feh chan ma hamha shay ela ohwa

hatha rayii :)

لؤلؤة يقول...

حلو يا استكانة...
سالفة من سوالف الناس بها الدنيا
بدون زيادة أو نقصان

يعطيج العافية...وأتمنى حياتج تكون أسعد
:)

Blog 3amty يقول...

بإختصار ..

رائع

DiLLi O MiLLi يقول...

يمكن ما تبي أترسيه على بر
عشــــان خايفه لا تفقده ؟

:)

رائع البوست
وتحسين نهايته مافيها نقطه .. نهايه مفتوحه
تاركه للقارئ الفرصه بأن يبحر بأستنتاجاته



:*

someone_q8 يقول...

السلام عليكم
الشيء اذا زاد عن حده انقلب ضده
حتى الحب اذا زاد عن حده بدون وضع حد مباشر صدقيني راح يقلب حياة انسان فوق تحت
واللبيب بالاشارة يفهم
اللي يحب لا يطول في حبه , اعقلها وتوكل واخطب وتزوج وبعد الزواج هالحب يصير نور وضياء في حياة الزوجين يلفهم بضياءه ويحميهم من لهيب الحياة

esTeKaNa يقول...

حسام بن ضرار
~~~~~~~~~~~~~~
ياهلا ويا مرحبا
هذي الساعه المباركة
الله يسلمك من الشر يا حسام
:)












lonsome
~~~~~~~~~~~
خوش نصيحة
!!
بس اعتقد ان تطبيقها صعب
اذا اهو حبج
وانتي قلبج وين تودينه؟
راح تحسين بتأنيب الضمير طول الوقت
:)













anon.
~~~~~~~
انا اشهد
:)














artful
~~~~~~~~~
ياهلا ويا مرحبا
يا صباح النور والسرور
:)
عاش بو محضار والله
تصدق اعرف اول الكلمات ومو مثبتتها عدل يوم قريتها قلت اوخ
!
طلعت كلمات حلوة مو هينه
كلك ذوق يا ارتفل
:)

















charissma
~~~~~~~~~~~~
يا صباح الهنا
:*
انا اشاركج الراي
واميه بالامية
روح بعيد ورد سالم
!!
بس هذا نصيب
وماحد يخطط له
ما تدرين مرات وين الخيره
:)

esTeKaNa يقول...

بنت الشامية
~~~~~~~~~~~~~~
ياهلا ويا مرحبا
هذي الساعه المباركة يا بنت الشامية
انا مكتشفه فيج الجانب الرومانسي
تحبين سوالف حب الزواير ها
:Pp~
فعلا الحياة فرص
والحب النظيف الراقي هاليومين صار عملة نادرة جدا
:)
وي يا زين اللي يشتطون والله
زوقه
:*











Barrak
~~~~~~~~~
أنا اشهد
:)












kuw-son
~~~~~~~~~~~~
بحكم تجربتك
شنو تتوقع بيصير؟
:)










دبي
~~~~~~
looooooooooooooooooooool
:)
بعد فيها اي لاف يو
هذا الفايروس الرومانسي
:*














حسافتج يا كويت
~~~~~~~~~~~~~~~~~
ياهلا ويا مرحبا باخوي العزيز
:)
هذي مدونتك
تواصلكم
وكلماتكم
و تفاعلكم
اهي اساس وجودي وفرحتي
حياك الله
:)

esTeKaNa يقول...

جنون احساس
~~~~~~~~~~~~
اهليييييييييييييييين
!!
انتي من وين طالعة
:)
اي والله يا جنون
ما ندري شنسوي بروحنا
لا جذي راضين ولا جذي راضين
!!













fahadinmymind
~~~~~~~~~~~~~~~
انا اشاركج الراي
كثر الجفا يموت كل احساس ويعدمه
!!
واكيد يوم بيمل من هالصد
والجفا منها
ويروح
:)
انا اقول يا زينج ويا زين رايج
حياج الله















لؤلؤة
~~~~~~~~~
ياهلا باللولو والله
نورتي البلوق وهذي الساعه المباركة
ويا عسى حياتج بالفرح والسعاده دوم تزين
:)











blog 3mty
~~~~~~~~~~~~
حيالله عمتي الله
:*
باختصار
ونسني مرورج
:)










dilli o milli
~~~~~~~~~~~~~~~~
تبرير مقنع جدا يا دلي
مثل اللي مطرفه الباب وتنطر
خايفه ترد هالباب
وخايفه تفتحة
!!
الحب والاحساس مو فلم
ولا روايه
شي ما تدرين شنو نهايته
عشان جذي كانت هالنهايه مفتوحة
:)








someone-q8
~~~~~~~~~~~~
وعليكم السلام ورحمة الله وبركاته
:)
خوش راي
عين العقل
يزاك الله خير

غير معرف يقول...

estekana
شنو هذا كله تخلين عيوني تدمع :(
هذي قصتي استكانه جنج تعرفيني !!

ترا بالنهايه راح تحبه لانه " اللي نبيه عيا البخت ليجيبه" والمنطق اللي يفوز

" مو " حسافه :) اهوا يستاهل حبها وهذاك الله يوفقه