السبت، يونيو 07، 2008

:(

أحيانا..تجمعنا أقدارنا مع ناس
!!دون رغبه منا
وجودهم واقع لا مهرب منه
واقع يحتم علينا التعايش معهم بأي شكل من الأشكال
قدرتنا على التعايش مع الشخصيات الغريبه فن
لا يقدر عليه الجميع
!!
كانت زميله لي في الجامعه
مختلفه عني بكل شئ...لست افضل منها وليست افضل
ولكننا باختصار متوازيات لا نلتقي عند اي نقطة اتفاق
رغم ذاك الاختلاف المتوازي كنت اشعر برغبتها للتقرب مني
واستغرب...تخصيصها لي باهتمام مبالغ فيه
وكلمات المدح والحب التي تنهال علي منها
لست وحدي من كانت تستغرب...بل هن كثيرات حولي اللاتي كن يسئلني عن سر صداقه فلانه لاستكانة
وكل واحده منكم بوادي غير الثانيه
!!
لم يطل استغرابي فقد عرفت الجواب مبكرا
عندما كانت تسئلني عن تفاصيل كل ما قد اخطط للقيام به
تسئلني عن كمية دراستي
عن طول فترة سهري
عن وقت استيقاظي
بل حتى عن كل كلمة سمعتها من اي دكتور كان قد خصني بها
واكتشفت مع الوقت انها تعاني....من عقده ان يكون هناك من هو افضل منها
ايا كانت هذه الافضليه
!!
حذرني منها الجميع...بل وصل الأمر ان حتى بعض دكاترتي ممن يحملون لي ودا خاص كان يهمسون لي بصدق
ديري بالج من فلانه..ابد قلبها مو عليج
!
عندما تكون بصحبة شخص يتكلم بحقد عن غيرك
كن على يقين ...بأنك بمجرد ما تعطيه ظهرك سيتكلم فيك
عندما تستشعر بأن محدثك يرى الناس بفوقيه وترفع
اعلم انك دون ان تعلم احد اولئك الذين ينظر لهم من فوق برجة العاجي دون ان يشعر
وعندما تشعر ببعض الانقباض في قلبك
صدق قلبك...فهو حتما عليك لا يكذب
.
.
.
كنت اشعر أحيانا بخوف منها...واستغرب انها لا تفرح لي
رغم اني كنت اهتم لها
!!
استغرب انها تسئلني عن سر محبه فلانه لي
واهتمام دكاترنا فيني
وكنت اضحك بهبل طفله:
تصدقين مادري؟يختج المحبه من الله
ولم اكن انتبه لنظرة حقد في عينها تحيطني بها في كل لحظة
لست انا من يمدح نفسي
ولست انا من أمن على أحد بفضل لي
كانت هي وغيرها كثيرات...على الله وعلى تدويناتي في كل محاضره
تفوقي
علاقاتي الجيده مع الجميع
كانت سبب لقربها مني دون ان اسئ ظني فيها وقتها
.
.
.
.
مضت الأيام سريعا.....وكل يوم اكتشف خصله استغربها منها
استغرب..ان اقول لها كل ما خططت له ببساطة
وان تكذب علي ببساطة اكبر
استغرب حين تسئلني عن درجاتي
وتخفي عني درجاتها
ولكن كانت قمة صدمتي حين اكتشفت انها
كانت قد اشتكت عند دكتور لمعاملته المميزة لي دون غيري
!!
وأنها دون علمي كانت تتكلم بقمة السؤ عني
لا زلت اتذكر كلمتها لي في صباح يوم باكر:
استكانة وانتي كل يوم مبتسمة
ماكو شي يضيق خلقج؟
كله مزاجج رايق
وبعدها...اسبوع كامل وانا اشعر بانقباض قلبي ولم تجف لي دمعة من مصايب تلاحقت علي في سنة تخرجي
!!
عندها....شعرت بشئ في قلبي صد عنها
وشعرت بأننا غير ملزمين أبد بمجامله اصحاب القلوب الغير نظيفه معنا
كثيرين من قالو لي ردي لها بالمثل
واجهيها
كلميها
ما يصير الكلام اللي تقوله عنج
!!
ولكن كنت على يقين بأن علاقتي فيها مؤقته
ستنتهي على ابواب تلك الجامعه
وبأني شيخة بأخلاقي وبرقي تعاملي وأدبي ..لن انزل لمستوى تفاهتها
وبأني اكبر من مستوى طفوله تفكيرها التي تعاني منه
كان يكفيني....احساسي بمحبة ناس لم يرضو علي بكلمه
وكان يفرحني وقوف العديد من دكاترتي بجنبي دون اي منه
مضت الايام سريعا
وافرحنا الله بتخرجنا
.
.
.
.
من بعد علاقه اربع سنوات ...تجمعنا هم الدراسه وفاينل امتحانات
ومن بعد سنة كامله من التخرج صادفتها في اكثر من مناسبه
تنظر لي كغريبه
تشيح بوجهها عني بشكل غريب
!!
تسئلني بشفقه:
استكانة للحين ما اشتغلتي؟
ابتسمت لها:
اشتغلت مؤقت على ما اتوفق في المكان اللي ابيه
وانتي؟
كالعاده تتهرب من اسئلتي بذكاء وتجاوب بكبر:
وين قدمتي؟
بغباء متكرر جاوبتها:
المكان الفلاني
ترد بثقه:
شوفي لج واسطة...انا قدمت بكل مكان وانقبلت
بس انا مابي ولا مكان من هذيله
انا تدرين فلان من جماعتنا ماسك هالمكان
وفلان الفلاني من الاهل
وتدرين فلان بعد ما يقصر يموت فيني
وهي تتكلم وانا اسئل نفسي:
من سئلها منو واسطتج؟
ابتسمت لها:
للله يوفقج ان شاء الله
انا واسطتي رب العالمين
.
.
.
.
تصادفنا مرة أخرى في مناسبه احتفاليه خاصه بالكليه
كانت بمناسبه الاحتفاء بخريجين الكلية...كان يفترض ان يكون المتكلم اعلانا تقديرا
وطبيعي ...لم تكن هي صاحبة التقدير الأعلى
ولكن بسابقه تاريخية من نوعها
تسلقت على اكتافنا جميعا
وبواسطة كبيرة
كانت هي المتكلمة باسمنا جميعا
!!
لم يكن الموضوع موضوع كلمه وتقرأ
كان الموضوع بالنسبه لنا موضوع تقدير
موضوع صدق وتقدير لمن تعبت وسهرت لتكون هي الاسبق والاولى بكل تقدير
ولأول مرة لم تنقسم الكلية لقسمين وتختلف على شخص
الكل كان يرفضها
وكنت اقف مع الحق...فرفضت ان تكون هي المتحدثه بتصويت كنا قد اجريناه حينها
نعم....لم يصوت لها احد،وكنت مع الجميع مع الحق
ورغم ذلك،اخذت كل ما تريد دون اي اهتمام لاي رفض منا
هل تستوعب هي كيف لا يحبها احد؟
احساس صعب
!!
.
.
.
.
.
قبل يومين كنا بلقاء لطلبة الدفعه التي تخرجت منذ عام
دخلت فاوقفت لها بحركة عفويه جدا
سلمت على اول من وقفت
ومن ثم البنت على يميني
ومن ثم نظرت لي بنظرة غريبه من تحت لي فوق
وطوفتني...لتسلم على من هي واقفه بيساري
!!
انا مصدومه
.
.
.
.
جلست واشعر بشئ في روحي يختنق
وشعرت بضيق يجعلني ارغب بالخروج باسرع وقت ممكن
انتهى اللقاء وكنت استعد للخروج لاجد كل الموجودات حولي وهي وحدها تناظرنا من بعيد
شعرت برغبه بالابتعاد ...سئلتني صديقتي انتي متضايقه؟
فجاوبتها بعلو غريب:
شفتي هذا الهواء اللي ما ينشاف؟
اهي بالنسبه لي هوا
ما تهمني ابد
!!
.
.
.
عندما رجعت البيت كانت امي بانتظاري تسئلني عن تفاصيل يومي
وكانت هي اول سوالفي
كنت متضايقه لحد كبير
شنو الشي اللي بينا للي يسوا انها تعاملني بهالطريقه؟
وانا اتكلم باغتتني دمعه من عيني لم اكن اريدها ان تخرج
انا محترة فعلا
!!
ضمتني امي وضحكت:
يا بنيتي مو شرط كل الناس تحبج
ليش تترفعين عن احساسج وتقولين ما تهمج؟
قولي تهمني
وضايقتني
وعبري عن مشاعرج بطريقه عاديه
لا تجاملين باي لحظة على حساب نفسج
ليش تبين تكونين طيبه منتي ملزومه باحد؟
ولا انتي اللي ناقصج شي وطالبته منها
كوني انتي
ولا تشيخين بنفسج على احساس راحتج
!!
.
.
.
.
اشعر بأني بحاجة لاعاده ترتيب بعض الامور في علاقاتي
وهي بالذات...اريد الغاؤها من اي وجود في حياتي
.
.
.
بوست ماله معنى
ورغم سخافه موضوعه
الا انها ضايقتني
!!

هناك 57 تعليقًا:

Zabo0o6a يقول...

هذول الناس اللي يخلونج تحسين بقيمة نفسج ، انه عندج شي اهما ناقصينه وقاعد يحاولون يوصلونه بشتى الطرق بس مو قادرين يعوضون نقصهم بانتقادج جنه لي انتقدوج راح يركبون فوقج ويغطون على نقايصهم واهما مايدرون انه قاعد يورون الناس اهما شنو ومعدنهم شنو بالضبط !
ولا يهمونج ولا تزعلين حالج انتي شيختهم ولي تضايقتي ولا زعلتي هذا دليل انج انسانة اكبر برقي احساسج وقلبج اكبر لانه يحس ويتضايق :)

darkness يقول...

مساج الله بالخير يا استكانة الخير

شوفي اللي صار مو سهل و لا حلو

صعب و بايخ هالموقف

يعني في طالبات اكون على خلاف معاهم ايام الجامعه لما اشوفهم هالايام بعضهم نسلم و نسال عن بعض

و اللي يصد احسهم غريبين بالتصرف؟

و اكو المتسلقين

هذولي يوصلون للي يبونه

شفتي هذي اللي صدت عنج

لو تبي منج شي

بتصير لج مداس

للاسف ان اخلاقج ما راح تسمح لج انج تدوسينها

و بتظهر استكانه الراقيه و بتساعدين

لانج اكبر من كل هالتوافهه

اهي مريضه


الله يعينها على عمرها

بس اللي اتمناه انج تعرفين شلون تتعاملين مع هالاشكال

ما اقول لج دوسيهم

بس لا تعبرينهم

و كانهم لم يوجودو على هذا الكون


البوست مو ماله لازمه

البوست شي يعيشه بعضنا بشكل او باخر

و لا تحرين نفسج

الشي صار و خلص

esTeKaNa يقول...

zaboOo6a
~~~~~~~~~~
يا مسا الزبوطة الجميله والله
:)
يا بعد قلبي يا زبوطة
انا انصدمت
اراجع نفسي مليون مرة
ماني لاقيه شي يسوا انها تصد عني هالصده
وبعدين
لو كان موقف رفضي لها موقف شخصي مني كنت اقول من حقها
بس الكل كان رافض
اشمعنه استكانة اللي بهالطريقه ينرد عليها
!!
تدرين اليوم اقول حق امي
انا غلطت بحقها؟
بعدين كسرت خاطر نفسي وانا احاسبها اكثر وانا ادري ما غلطت بحقها بشي

esTeKaNa يقول...

darkness
~~~~~~~~~~~
مساج الله بالنور صديقتي
فعلا شي مو سهل
أنا أول مرة انحط بهالموقف
وكان ناس وايد بالمكان
!!
تدرين داركنس من غير مبالغه
والله العظيم من دخلت المدرسه لي تخرجت ما كان لي خلاف مع اي انسانه
واهي لي هاللحظة اقولج
ماكو بينا اي خلاف
اهو موقف تصويت
وانا صوت ضدها
لانها ما تستحق براي الجميييع
مو برايي انا بس
واساسا مافي احد صوت لصالحها
مع هذا تقبلت من الجميع بس انا انقلبت علي
!!
واللي يحر اكثر
فعلا انقرص منها اكثر من مرة
وقت مصلتحها تييني احسن منها ماكو
ولي قظت وخذت كل المعلومات اللي تحتاجها
صدت
انا ماعرف اتعامل مع هذي النوعيه من البشر
كل مرة اقول بصدها
وكل مرة اقول بتغير
بس ماني عارفه
:(
وعدل كلامج
انا احتاج اسوي فلتره حق كل علاقاتي
واعرف اتصرف معاها ومع غيرها
!!
شكرا من روحي انج موجوده
وانج رديتي على هالبوست اللي كان بعينج له قيمة
لما تكونين متضايقه ولو على شي بسيط
كل كلمة تكونين محتاجتها
:**

الخيلاء يقول...

عزيزتي استكانه
احس بالضيقه بكلماتج

ترى هذيل ناس مايسون اتضيقين خلقج عليهم

تعلموا يصعدون على اكتاف الغير
يعيشون على نجاحات الغير
يتالقون ببريق الغير
يصادقون لمصلحه في نفسهم

عزيزتي لا اتضايقين
عاملتيها باخلاقج و تربيتج
مو ملزومه اتحملين اخلاقها و تربيتها

ترى الدنيا فيها وايد ناس غيوره و قلبها اسود

لازم اتحطين في بالج
مو الكل راح يحبج
موالكل يشوفج استكانه الراقيه الي احنا نشوفها

و هالشي بتشوفينه اكثر بمجال شغلج
خاصه انه مجالكم مجال اثبات الذات

دايمن و ابدا عاملي الناس باخلاقج ولا تندمين على شي سويتيه بطيب خاطر و حسن نيه

الانه ربي سبحانه بيجازيج على نياتج
" انما الاعمال بالنيات و لكل امرء مانوى "

معاملتها اتضايق صح
بس بعد اتخليج اتحسرين عليها
و انها بتتعب بحياتها

مو كل الناس بطيبه قلب استكانه
لابد بيطلعون لها ناس يعلمونها
درس بالحياه و يورونها مكانتها عدل بين الناس

:)

esTeKaNa يقول...

الخيلاء
~~~~~~~~
ياهلا وأمية هلا
واي عطيني حلاو
ترا مستعسره
:)
تدرين اني فكرت بيني وبين نفسي
هل انا متحسفه على طيبتي وياها؟
او..هل انا باي تصرف انطر كلمة حب وتقدير من الناس وعشان جذي ردها مضايقني؟

عشان يكون ردي واقعي
لابد ان التقدير يهمني
واحبه
بس ما يكون اهو اساس علاقتي مع اي شخص
لابد تكون نيتي لله
واتعامل مع الناس مثل ما انا احب اتعامل معاهم

عمري ما قلت انا الطيبه الساذجة اللي اتصرف بحسن نيه وانصدم من الناس
!!
لا
طيبتي ما كانت سذاجه
وانا ما كنت ارتجي منها شي
بس
انا عازه علي نفسي
تعرفين هذا الاحساس؟
حيييل عازه علي نفسي
حطتني بموقف جدا محرج
وانا ما استاهل هالتعامل الواطي منها
:(((
الله لا يخليني من مرورج
انتي اختي الله اعلم
بس تحملوني شوي
توها السالفه ما بردت بقلبي

Najmah يقول...

بجييييت :"((

قاعدة احس بكل اللي قلتيه

قلبي مليااان

بروح شوي ورادتلج

:"((
:"((

Mamloo7a Q8ia يقول...

حبيبة قلبي انتي
(غب)
ماني مكمله انتي تعرفينها؟؟!!؟؟

ادري واعرف احساسج
لكن ولا تخلين هالموضوع يضايقج ولا يؤثر فيج
هذي النوعيه من الناس المرضى والحقودين الله يصلحها ويهداها

وفي النهايه المجموعه كانت مع منو؟؟؟
معاج انتي يا اطيب وارق قلب

وياما راح تشوفين من هالنوعيات وااايد
لكن انتي اكبر منهم بأخلاقج وتربيتج العاليه

لا يضيق خلقج ولا تحطين اللوم على نفسج
ولا تعز عليج نفسج من انسانه مريضه
ولا تتحسفين على اي طيب سويتيه صدقيني بتلاقينه وبتشوفينه وهي ما تشوف شر والله يسامحها

اييب لج كندر سبرايز يعدل مزااااجج؟؟؟

esTeKaNa يقول...

Najmah
~~~~~~~~
يا أم القلب المليان
تععالي فضفضي لاستكانة
ومسحي دموعج الزعلانه
والله ولا تسوا هالضيقه دمعتج
!!
انا فعلا متضايقه
بس متضايقه بحزتها
بلحظتها
بس الاكيد في مشاكل بالدنيا اكبر
ومصايب عليها دموعنا بتنزل
فلا تتضايقين ابد
ويالله تعالي طمنيني
:*

صقر قريش يقول...

بيوم فرحتج بتخرجج خليتي هذي كدرج اختي استكانه حمدي ربج إنها وخرت عنج امثال هالعقليات ماتستاهل إنه واحد يزعل عليهم هي وحده مريضه نفسيا بصراحة ريحي روحج منها ومبروكيين على الإحتفال بالتخرج وعئبالي :).

غير معرف يقول...

Ignore'em.

I faced alot of people like this person. You should let your mind control you, not your heart to deal with those people.

Live your life.

Najmah يقول...

باك

استكاااانة :"(

اول مادخلت الكلية
بأول كورس تعرفت على وحدة
لان كنا مستجدات فكلنا نفس المواد
وكانت معاي بكل المحاضرات
المهم تعرفنا على بعض
وكانت تقول لي انها ماتعرف احد
وان ماعندها رفيجات
فحسستها اني دايما يمها
وعرفتها على كل رفيجاتي
وخليتها تحس ان كلهم رفيجاتها

ابيه تعرفين لما تكونين ماخذة كل شي على نياتج

المهم مرت الايام
وفعلا كل ماتحتاج مني شي اعطيها قبل لا تطلب
انا نوعي ماعرف ادرس الا لما اكتب والخص
فكنت على طول الخص واصور لها
ومع اني ماعرف ادرس مع احد
احب ادرس بروحي
الا اني كنت ادرس معاها عشانها
مابي اقول سويت وسويت
لكن انصدمت
بالنهاية
تجذب عليي
تلف وتدور
تكره لي الخير

والله اول مرة بحياتي اصادف انسانه تكره لي الخير
:"(

تخيلي اذا شافتني اكتب مع الدكتور بالمحاضرة
تقول لي لا تكتبين
وانا احقرها واكمل
وكل شوي تشغلني
وتطلع سالفه تقول لي اياها
ولا تاخذ مني الدفتر المهم اني ما اكتب
!!

مرة كنت غايبه كنت حدي مريضة وكان باجر امتحاننا
ولا الدكتور يوزع عليهم اوراق ندرس منها حق الامتحان
والبنت اللي وزعت الاوراق تعرفني فعطتها حقي بحكم انها رفيجتي
!
تخيلي ماقالت لي ولا عطتني اياها
انصدمت لما اسئلتني البنت وقالت لي
!!
ومع هذاا
كانت علامتي بالامتحان اكثر منها

وتخيلي قالت لي انتي مو قلتيلي انج مريضة ومادرستي؟
شلون يبتي جذي
!!

انا لما انصدم واتضايق
اضحك وآخذ السالفة غشمره
بس والله من داخلي اتضاااااايق

ليش ليييييش
!!

تخيلي كانت كل يومين تدق عليي
تسألني جم معدلج
اقولها مادري مو لأن مابي اقولها
لأني والله كنت ماادري
وتحن عليي الا تشوفين جم
واقولها

عاد الكورس اللي طاف لما اسئلتني وقتلها جان تقول شلوون
انا احس ان احد طاقني عين
!!
قتلها ليش؟
جان تقول شلون انتي 3.82 وانا 3.8
جان اقولها اقري على نفسج ومحد يضرج
!
ولما الحين كل يوم تزيد
بس تدري ان عندي امتحان باجر
تدق عليي
والله تدق يمكن 10 مرات باليوم
توترني وتلعب بأعصابي
تخيلي لي درجة اني صرت اسكر موبايلي
:"(

ابيه قامت تتدخل بكل شي بحياتي
فجاة تاخذ تلفوني وتقرا مسجاتي
وتسئلني
ابوج ليش داز لج جذي؟
فلانة شفيها متضايقه؟ وليش تبيج ضروي
نعععععععم
انتي شكووو

اذا اعرفت اني بطلع اليوم مع رفيجتي
اتقول لي بمرج اليوم ابي منج شي ضروري
واذا اعتذرت منها تحن عليي وتخليني انحرج وارضى
وبعدين ما اتيي
!!
ومرة بعد اعرفت ان رفيجتي بترد معاي
جان تدق على سايقهم تقول له لا اييها
وتقول لي ابي ارد معاج
والمكان اللي بنروح له شرق
وبيتهم غرب
!!

والله تعبت تعببببت
لو اقول المواقف ماراح اخلص

انتي متخيلة ان مرت 3 سنين وانا اجامل وابلع الصدمات

كل مرة اقول خلاص بقطع علاقتي فيها
وبعدين ألين
كل ما تسويلي موقف اقول خلاص يانجمة وقفيها عند حدها
واحقرها يومين ثلاث
بعدين اضعف جدام اتصالاتها ومسجاتها
ماعرف اقطع علاقتي بانسان
ماعرف شلووووون
:"((

والله حدي تعباااانة تعبااانة
:"""(

Noor يقول...

حبيبتي والله

ابيه استكانه احس انج تكلمين عني و عن مشاعري مرات
تدرين فيج اشياء اتشابهني
:)

شوفي يا حبيبتي انا مثلج مااحب احد يزعل مني او ياخذ بخاطره عني حتى لو غيره ماأرتاح و لو كنت مبكان وفيه نوعية من هالانسانه ماأرتاح كلش ولا اخذ راحتي
بس تعلمت اني اكشت و ياليت اعرف اكشت عدل
الكل يقولي انتي
طيبه وايدو ينقص عليج بسرعه
تدرين مرات وايد مااحب ولا اعرف اقول لا
بس تبين الصج
بتغير
بتعلم اقول لا و اني ماأجامل علي حساب نفسي
بس امي كله اتقولي
)وعلي نيتاتكم ترزقون(
وفعلا هالشي صج يصير كل انسان الله يرزقه علي نيته
:)
و صدقيني لو انتي مو ناجحه بحياتج و حاره قلبها ماسوت لج جذي
إهي تغار منج
لانج إنسانه ناحجه و عجيبه بحياتج
:)
الله يهديها و يعينها علي نفسها

`~MnO YeNSa! ~` يقول...

حبيــــــــــبتي :*

تدرين شنو وصالني الشعور
والله انا ابجي من صجج
ما اقدر ..

سؤال واحد
اهيه تسوى تكدرين خاطرج
عشانها ؟!!؟

صدقيني

لأ

لما تتكدرين
و تتضايقين
و تنقهرين
من وحدة
جذي
لازم
على طول تفكرين
انا منو و اهيه منو!!؟
علاقتها فيني
ما راح تفيدني
كثر ما ضرتني
اهم شي
وجود الناس اللي تحبج
وياج و بشهادة من الكل
انتي منو ما يحبج !!! ؟
الكل يحبج و يستانس بمقعدج و سوالفج و اهيه لو تحس غير عن جذي لانها محتره و مقهورة
و ادعيلها بالهداية
والاانتي منتي خسرانه شي
اهيه المسكينه
الخسرانه
كفايه ما يحبها احد ..
ترى مو سهله
وايد
وايد
صعبة
ان
الكل يعدها ثقيله
و هذا الشعور اللي يقهر
ترى

بس انتي صرتي اكبر منها
و دايما خلي قلبج
دليلج
لان
دايما تاخذنا الطيبة
و نحسن الظن بالناس
بس الحمدالله
ابد ما يضيع
عند
رب العالمين


والله متى ما حب عبد
حبب كل الخلق فيه
و
ترى احنا كلنا نحبج
:***

و اهيه الله الغني عنها
و الله يسامحهاو يهديها

بنت الشامية يقول...

استكانه لانج طيبه وحبيبه
كشفتيها على حقيقتها
هالنوعيه من الناس الله قاردهم
وعندهم عقد نفسيه مستفحله
لانهم اصلا ما يحبون انفسهم ولايعرفون يحبون الاخرين الحسد والحقد عامى قلوبهم وعيونهم.....حمدى ربج ان الله فكج منها
هذول هم على القلب
والله يدم محبه الناس لج لانج تستاهلين
و الله يخليج اميمتج لانها بلسم ينحط على القلب وكلامها كله حكم.

محـــــارة يقول...

حبيبتي انتي مو سخيف دامه مشاعرج إذا مهمه ومهم عندي أسمعها

يالغاليه هذي مشكله اعاني منها أقربها منساغ تصرف من ناس أكبر مني بس غبي لأن مافيه نضج وفهم ووقفه سنعه للموقف زعلني وعصبني وضايقني

شرحت لأمي غلط الكبار مايغتفر وشلون أهما يدات وأمهات وجذي تصرفاتهم بالأخر حمدت ربي أن هذي أمي الي منها ومن أمهاتنا تربينا أن البشر نجاهد نفسنا لكسبه محبه للصفاء محبه لأرواحنا محبه للحب نفسه

بس شتقولين ناس غريبه تفكر بتهور وتتعامل بدون نضج ومن دون ماتوزن تصرفاتها .. البلا ساعات لما نوقف مده طويله على أغلاط هالنوع

الله يعين وعسانا دوم كبار بتربية أهلنا .. ومشتاقتلج موت حبي

حسام بن ضرار يقول...

هالنوعيات الحقوده ياما صادفناهم بالدراسه الجامعية و عقبها

على قولت المثل: كل من يعامل الناس بأصله

و على طاري الواسطه بجامعة الكويت يا ليتها يت على كلمة حفل خريجين يا اخت استكانه

فيه شغلات شهدت عليها لو اقولها الواحد ما يصدق انها تصير بصرح اكاديمي راقي مثل جامعة الكويت

خليها مساتره

mantovani يقول...

سمعت ان صارت في كلية الحقوق

اللي تكلمت بأسم المتفوقين
لم تكن كذلك

===

عزيزتي استكانة

الانسان الحقير الحقود , يستنفر
كل طاقاته لتحقير من هو اعلى منه
عقلا , هؤلاء يتضايقون
عندمى يرون ان هناك
من هو انقى منهم

صدقيني البنت هذي عندها مشاكل
عويصة

===

لنأخذ هذا المثال

فتاة شريفة
و فتاة غير شريفة

عندما تضيق الدنيا بالغير شريفة

تقول لك بكل وقاحة

شنطتي ب 1000 د.ك

===

استكانه


الى ان نلتقي

كوني سعيدة



مانتوفاني



.

قلب طفله يقول...

استكانه

مايسوى تزعلين عمرج عشان وحده مريضه و معقده عمرها و اللي حواليها هذي تكسر الخاطر لانها ما تحس انها منبوذه من الكل و السبه تصرفاتها الحقوده

انتي روعه بتعاملج معاها و مع غيرها كافي انج تحملتي منها مع هذا ما صديتي عنها لما تحتاجج طلعتي بالزينه جدام الله و خلقه و هي تعور القلب سواياها فاضحتها :(

خليج مثل ما انتي و لا تهز فيج شعره و ربي يعطيج على قد نيتج الطيبه

وابتسمي انتي استكانه :))

QiYaDiYa يقول...

افا افا افا !!

ما عااااش الي يضايق استكانة !!

استغفر الله و مستانة على عمرها!!!!

يعني صوتوا كلهم ضدج بعد شماله مرتزه !


صدقيني اهي الخسرانة !

بالنسبة لي ..
صادفتني كثير من الامور ..
الي خلتني عقبها اعرف شلون اتعامل مع الناس !
و احط كل شخص بمكانه !!

وحدة مثل هذي الي تتكلمين عنها ما تهز فيني شعره !
و خاصة انها قاعدة تحرج نفسها جدام الناس !

بحكم ان علاقاتي واسعة اضطريت اني استخدم الفلتر ..
و مبجر !

و مع استخدام الفلتر ترا الناس الطيبة الله ما كثرها ..
ما تحتاجين تستخدمينه الا مع بعض الاشخاص و الي هذي منهم !!

انا طيبة و اعامل الناس بأخلاقي !
و ما اترفع عنهم !
لكن كل شي له حدود ..

و كل شخص له مكانه !
و اذا كل وحدة قالتلي كلمة بتأثر ما راح تمشي الحياة !

قبل فترة ..
كنا بالزوارة ..
بنت خالتي تدرس تحليل الشخصيات ..
جان تقول قعدوا بحلل شحصياتكم !
انا بالنسبة لي عارفة شنو انا !
و ادري ان انا جذي !

لكن قعدنا رسمنا مادري شسوينا !
جان تقولي بنت خالتي انتي دقيقة جدا في علاقاتج !
و مقسمتهم الى اقسام ..
و الدليل ان في رسمة من الرسمات ..
رسمت بيت و فيه حديقة و الحديقة فيها باب !

فتقولي اني في ناس برة باب الحديقة ما يدخلون !
و في ناس داخل الحديقة !
و في ناس داخل البيت !

قتلها اكيد !
و هذا الصح !
عندي علاقات كبيرة ..
الي تهمني منهم دخلتها داخل الحديقة !
و الي صج ما استغني عنهم دخلتهم داخل البيت !

اذا الكل دخلته البيت راح اتعب وايد !
و ما راح تمشي الحياة !


فهذي من النوع الي مو بس برة الحديقة !
برة الفريج بكبره ;p

و الي برة الحديقة اذا صادفناهم نعاملهم بكل احترام ..
و اذا شفناهم سلمنا و على الاقل ابتسمنا ..

نعاملهم بأخلاقنا الي تربينا عليها ..
و الانسان بالنهاية شنو يبي من هالدنيا غير ان الناس تذكره بالخير !

فباختصار اهي الخسرانة !!

و ما نبي استكانة تتضايق ..
لانها غالية علينا حيل ;*


و هذي تجربة من تجارب الحياة و مرت !
تعلمنا منها و استفدنا !


بس خلاص طاف ..
يالله بوست يديد ..
الي بعدووووااا ;p


انا عندي امتحان و قاعدة الفير عشان ادرس !
قلت استكانة متضايقة و اروح ادرس مستحييل ;p

فلا تنسينا من دعواتج ..
امتحاني الساعة 4 العصر ;p


ممكن اطلب بعد طلب ..
زفي نجمة ;p
لانها حرتني !
3 سنين
و مستحملة هالانسانة !

اقول نجمة ..
قوليلها فلاااي و بضمير بعد ;p

5roofa يقول...

الساعه ست الا ربع و انا مواصله و هذي حرتنييييييييييي و الحين بروح الدوام لوول

وااااااي امبي استغفر الله ليش هالاشكال منتشرة وايد

تصدقين كانت لي رفيجه جذي بس مشكلتها الي كانت رفيجتي تهاوش مع ذبان ويها

و يوم جك بوم بدون مقدمات سوت نفس الحركة طالعتني من تحت لي فوق و ما سلمت لول

و للحين مادري ليش

تنقهرين من هالناس حتى لو ماتهمج بس ياربي قهرررررر يعني اهي الغلطانة و اهم الي اطنقر

امبي حرتنييييييييييي

يالله استكانه الحلوة خل اروح ابدل عشان الدوام لوول اليوم توزيع شهادات و شكلي بثواب بويه كل اولياء الامور لوول

:D

فتك بعافيه ياستي لوول

salamz sis...

ARTFUL يقول...

عفوا استكانه ترا البلوق صفحه شخصية
مو شرط تكتبين اللي يعجبنا او اللي احنا نبيه

صفحه تكتبين فيها آرائج ومعتقداتج وكل شي انتي تبينه

يا زين كلام اميمتج الله يخليها لج وسمعي كلامها عدل وسلميلي عليها

وما أقول الا قل أعوذ برب الفلق

طفا طفا.. شهالنفس وشهالعين أعوذ بالله

أبيخ ما بالبلوق العنوان

قلبيه وضحكي واستانسي وانا اخوج

ترا وايد تقرقين اسم الله عليج
بس وناسه

;p

الزين يقول...

ّ=!@##$%&^

هذي يعني سبيتها

ّ!#%%&*^&÷)*)

وهذي مسبه ثانية

حااااااااااااارتني

شلون تعاملج جذيه

اكو احد ما يقدر يحبج

ويحطج في قلبه ويقفله قفلين

خساااااااارتها
خسااااااااارتها
خساااااااااااااارتها

اهوووو طاولبيني شعرها خل امجعه

يا استكانه هذي انتي ذابحتها من الغيره

خليها تسقط من حساباتج ولا تفكرين فيها ابد

وبعدين تعالي

كافي ان الزين تحبج
والزين تحبج
وهم الزين تحبج

ومشتطه حدي ومحتره حدي ان وحده مثل هذي تقثج

تعالي بس تعالي
وخليها تولي

ما تسوي تراب صندلج

هذول الناس مثل الغبار
وقته تتضايقين منه
وعقب ما يطيح تدوسين عليه
وتنسين اذاه

:**

2cool2care يقول...

ما تقدرين اتيين على آخر الأمر وتقولين بشيلها من حياتي

المشكلة او المشاكل اللي تكون بحياتنا احنا نختلقها خطوه خطوه ما تكون مشكلة بيوم وليلة

قصدي مشكلتج مع المريضة نفسيا هذه انج ما كنتي تتوقعين او للأسف كنتي تقصين على نفسج وتقولين مو معقوله انها تعني هالشي او تحتر مني

الآن لا بد ان تأخذي قرار مع نفسج ابي اشيلهى من حياتي تعني اني لا افكر فيها ولو للحظة

اما انج تشيلينها من حياتج ووقت النوم لمن مثل اي شخص يفكر وتيي على بالج وتقثش لا وألف لا


بالنسبة لي

ادري انها محترة منج وهذا دليل على انج على درجة اعلى منها بمواضيع كثيرا

ما اقول هذا لأريحج حشا لله

ولكن هالأشكال معروفة

ثمني من يتعاملون معاج وهم درجات

الأهل اللي يستاهلون كل خير وهذيل شيلي شي اسمة كرامة وهم الأم الأب الخوات والأخوان

الأصدقاء القرب علي القلب كذلك انسي شي اسمة كرامه لأنهم يستاهلون عيوني

الأصدقار والأهل اللي تربطج فيهم صحبة دنيا في كرامة وإذا لا قدر الله سوو شي غلط توقفينهم عند حدهم


والناس اللي ما يستاهلون

لا والله يكونون معاي بغرفة وحدة وعدهم طوفة

آسف على التطويل


لمت امج تسوه الدنيا وما فيها

الله لا يقير

DanDash يقول...

صبااح الفل يا ست الكل
صباحج ورد و فل و ياسمين و جوري و توليب

الحين شوي يعني سوري سكري اذونج لاني بصارخ
انتي من صججج

هل النمونه من الناس للأسف نسميهم ناس ما يسون و لا يستاهلون انج تتضايقين منهم

افا عليج بس المفروض انج من اللحظة الأولى تميزين الإنسان الي واقف جدامج لا تقولين الناس ما تبين معدنها من اول مرة ,, لا يبين سبحانه ربي تلاقينه في غفلة يزل و يبين

و هذي النوعية من الناس حقودين المفروض دامج انقرصتي منها مرة خلاص الغيها من حياتج لا تقولين بتغير

هذي النوعية همها تصعد على أكتاف الأخرين و بس

خليج قويه مثل ما اعرفج و لا يهمج صغار الأمور أدري الموضع يحر لأنه قلبج طيب و تحبين الخير لغيرج مثل ما تحبينه لنفسج لكن أصابع إيدج مو سوا

خل اقول لج سالفة صارت لي من سنة تقريبا او سنة نص شي جذي
كنت مسوية أوراقي عشان اكمل دراسات عليا و بالصدمة أكتشف باللقاء التنويري انه معاي بنات بدفعتي و وحدة منهم كانت معاي بالإبتدائي و المتوسط وحتى الثانوية تخيلي يعني عشرة عمر و بالجامعة ما قصرت وياها أعطيها النوت و عشتو اذا لقيت اسئلة ما يبقى احد بدفعتنا ما يدري عنهم ... المهم
خلص اللقاء التنويري بصدمة أنه الأمتحان بعد اسبوعين بكل مواد التخصص و انا متخرجة ب 2004
فحيل انصدمت وين يمديني ايمع المواد و انسق بين شغلي و الدراسة حيل صكت فيني الدنيا
اهي دوامها حيل سهل يعني ممكن بسهولة تسكر على عمرها الباب و تدرس من 8 لين 2 وممكن جدا تغيب
هي عندها الكتب و التلاخيص و اسئلة متوقعة
ماقالت لي عنهم الا و اهي متوهقة لانه رفيجتها تكلمت عنهم جدامي
و اثاري تدري عن الموضوع من زمان و قاريه اسمي عن السكرتارية و ساكته و ما تكلمت
طبعا قدمت الإمتحان سويت الي علي
و الحمد الله على كل حال ما نجحت و حيل انصدمت
و اهي ما شاء الله عليها نجحت
ردة فعلي بجيبت و انقهرت بس قلت خيرة سبحانه ربي كاتب لي خيرة بهل الشي

الله يوفقها ان شاء الله و يوفق الجميع

و بس خلاص ما تتعصبش يا جميل

Selezya يقول...

صدقيني هذي انسانه مريضه معقده الله يعينها علىنفسها ماتدرين شلون راح تعيش حياتها بعدين

خليها عنج وانسي اشكالها
انتي وين واهيا وين

:***
وحدي اشتقتلج والله سامحيني على القصور بس دراستي شاغلتني وايد

kazmawy يقول...

هلا باستكانة التكانة شلونج..
:(
شنو جم مرة اكتب تعليق وماالقاه عندج احد ياكل بوستاتى شسسسااالفة اطالب باستجواب سرييع..:(
شوفى هالنوعيات اكو منها وايد هي محترة منج والحسد ماكل قلبها وما تتمنى لج الخير
باختصار ماتواطنج بعد ليش انتى تعطينها ويه وتجاملينها..
احسن طريقة لبسييها مرة وحدة عطيها طاف اعتبريها مو هوا اعتبريهاذرة هوا وغبار بعد..
صدقينى دواهم هالاشكال بالحقران والاحتقاااررر..
والبادى اظلم؟؟ صح والا موصح..
مشكلةالى قلبهم طيب ويحبون الخير للناس

Najmah يقول...

استكانة باركيلي اخيرا خلصت امتحانات
:)
تكملة على ردي اللي فوق
اليوم صار موقف وايد حز بخاطري
كنت رايحه حق دكتور بشوف نتيجتي
واهيا معاي بهالمادة
ولقيتها بمكتبه تكلمه
وتدرين هالمادة كنت احاتيها ليش
لأني قبل الامتحان بيومين سئلتها شنو معانا بالامتحان
وقالت لي بس اللي ما امتحنا فيه بالمدتيرم
قتلها متاكدة ؟ لأن شويه
جان تقول ايي متأكدة الدكتور قال
وفعلا بس درست هالكمية
بليلة الامتحان .. نقزني قلبي مادري حسيت ان لاا مو معقولة
فدقيت على وحدة ثانية معانا وسئلتها ولا تقول لي
ان كله معاااانا من اول المنهج لما آخره
!!!
والله اني اول شي سويته اني دقيت عليها
مو عشان ازفها .. عشان اقولها لأني توقعت انها ماتدري
بس تعرفين لما الانسان بروحه يفضح نفسه
حبل الجذب قصييييييير
قتلها ابيييه انتي درستي الكمية اللي جدام؟
جان تقول ايي حده صعب ومادري شنو
قتلها يعني تدرين ان معانا؟؟
اسكتت وبعدين ضيعت السالفه
!!!
انصدمت
وقعدت ابجي ليش تسوي فيني جذي؟
والله اني اتمنالها الخير وعمري ماضريتها
ليش تكرهني؟؟
واللي ضايقني اكثر ان بس انااااا
البنات الباجي عادي ساعدهم وتعطيهم وجدامي يسئلونها
وتجاوبهم
بس اناا !! بس انا تجذب عليي
تدرين شنو قلبي عورني
أول مرة بحياتي احس ان احد يكرهني
:(
المهم درست اللي اقدر عليه
وقمت الفير كملت دراسة
وامتحنت وقدمت زين الحمدلله
وطول الامتحان كنت ادعي من كل قللللبي
ان الله يساعدني والدكتور مايدقق باجاباتي
لأني كنت بالغصب اكتب اللي فهمته
وشوي كلام خارجي وشوي اكتب آرائي .. مادري
حسيت اني صج قاعدة اكتب على كيفي
المهم
اليوم لما شفت النتيجة
كان حاط لي
A
واهيا
A-
عاد لما شافتني اطلعت ونادتني
جان تقول لي الدكتور رفعني
حطلي
A
انا ابتسمت قتلها وناسة عالبركة
جان تقول لي ايي بعد درجتي بالمدتيرم
نفس درجتج
!!
كان منزلني عشان الغيابات بس طلعت له اعذار
وخليته يشيلهم
تدرين شنو حز بخاااااطري
مو لأن الدكتور رفعها عليها بالعافيه
لأني أدري انها نايمة ببيتهم وماعندها عذر
ضاق خلقي لأن 3 سنين ماقدرت أأثر عليها
شفايدة الصداقة اذا مامنعت الغلط
شفايدة الصداقة اذا كانت سبب للضيقه
اصلا حرام اسميها صداقة
لأن الصداقة عمرها ماكانت جذب ونفاق
!!

ابيه حدي بدعت اهني
آسفه استكاااانة
:**

ARTFUL يقول...

ما سمعتي الشاعر الكبير يحيى عمر اليافعي الملقب ب بو معجب شقول

يالله يا رباه أنا سآلك بلم نشرح وتب
بالتين والزيتون والسجدة وعمَّ واقترب

يقول بو معجب صدفت اليوم سلطان العرب
لابس قبا عربي وشال أخضر مطرز بالذهب

قدمت باسلم فقال أنت من آيات العرب
قلت من يافع بني مالك مجلّين الكرب

أرجي وصالك يا حياة الروح قد لي من رجب
اليوم عيد الله ، حق الله وهب لي ما يجب

قبله على خدك خفيفه دين ما فيها طلب
المستعان يا ناس أنا قلبي تكمل واغتلب
في عشقة الفتان سيد الناس غالي في النسب

لما يوصل
الصاحب المنان يضحك لك وفي قلبه لهب
ويعاهدك بالله يحلف لك ساعه وانقلب

فانتي وخري عن الصاحب المنان وانا اخوج

والحافظ الله يا كويت

=)

فريج سعود يقول...

عطيني رقم تليفونها خل ادز لها مسج ببوستج هذا خل تقراه يمكن تستحي على دمها
---------
بعدي انت ليش مقاطعتني وخصوصا البوست ما ودي انه يطوفج

Ra-1 يقول...

عندما رجعت البيت كانت ،مي بانتظاري تسئلني عن تفاصيل يومي

!!!??
حتى وانا صغيرة ماسويها :p


سؤال
kazmawy
إلي أهني أهو نفسه القديم؟؟؟

بس يقول...

أول مرة أنوي أعلق و أحتريت :((

بس في مثل كويتي قديم ينقال حق هالأشكال


ألي ما يعدك راس مال لا أتعدة فايدة


وفي الاخر أهية الخسرانة

Kuw_Son يقول...

لو أنا منها أروح أموت أحسن لي !

بصمة منـــارية (: يقول...

السلام عليكم ورحمة الله وبركاته .. مرحبا استكانه على الرغم من الوعكة الصحية التي امر بها في الوقت الحالي و ((انعفاس ))بشكل كامل الا انني أبيت الا ان اشاركك ما تشعرين به فعل لكلماتي وقع و لو بسيط ..

حياتنا مليئة بمثل هذه الشخصيات المريضة و هذا الامر ليس بالجديد و لا بالغريب أبدا .. هل تذكرين الني صلى الله عليه وسلم و الاذى النفسي الذي تعرض له من الاقارب قبل الاباعد و كيف نعته الكثير بالجنون و السحر وكيف تعرضوا لحياته الخاصة ولزوجته و اذوه حتى في عقر داره .. و مع كل هذا كان يحلم و يغفر ويصفح الصفح الجميل لله عز وجل و ابتغاء ثوابه ..

(( ادفع بالتي هي أحسن فاذا الذي بينك وبينه عداوة كأنه ولي حميم و ما يلقاها الا الذين صبروا و ما يلقاها الا ذو حظ عظيم (( اسألي الله لها الهداية .. عامليها برقي اخلاقك لا بدناءه أخلاقها ومع هذا لا تجعلي من تصرفاتها ما يعكر صفو وجمال ورعة يومك ..

و دائما الزمي الدعاء اللهم اني اعوذ بك من الهم و الحزن و العجز و الكسل و الجبن و البخل و غلبة الدين و قهر الرجال ..

عافاك الله و حفظك ورعاك وحماك ..

|:| DUBAI |:| يقول...

واي استكانة يا كثرهم عند ربي


و أنتي تدرين كيف عقليات

البنات

لا تحرين نفسج و لا تضايقين

و خذي أجر الاحسان و امشي

: )

esTeKaNa يقول...

maml007a-q8tya
~~~~~~~~~~~~~~~~
حبيبة قلبي انتي
اي اي ابي كندر يرد روحي شويه
:Pp~
انا حيل كنت متضايقه
بس لما فضفضت ارتحت شوي
لازم مااقمت اي مشاعر احس فيها
صح ولا لا؟
:)
الله لا يحرمني منج يا احن قلب بالدنيا
:*

esTeKaNa يقول...

صقر قريش
~~~~~~~~~
عدل كلامك
نركز على احساسنا بالفرح
اهم من تشتيت مشاعرنا باشيا ما تسوا
موفق يارب تبشرنا بنجاحك الدايم
:)









ANON.
~~~~~~~~
شكرا على النصيحة العاقله جدا
:)








Najmah
~~~~~~~~~
هلا بنجمة قلبي
:*
يا حبيبه قلبي انتي
يا اختي الصغيره
يا كوبي من استكانة ايام الدراسه
والله العظيم اقرا كل هالمواقف واتذكر نفسي بالضبط
!!
نجمه...بس تتخرجون الدنيا بتنخل لج كل اللي حولج وبتكتشفين ناس انتي مو بالج يصيرون ربع عمرج وناس تهقين انهم خوش ناس يطلعون مو يمج كلش

عشان خاطري لا تعيدين اغلاطي
اوكي صيري طيبه
اوكي ساعديها
بس بحدود ...بحديث انج ما توصلين مرحله الضغط على نفسج ومشاعرج عشانها
راح ترتاح
وراح تنجح
وتتعداج
وانتي بتتعبين
ليش كل هذا؟
عامليها بالمعقول لا اكثر ولا اقل
اقولج واقول حق نفسي هالكلام
وكاني جدامج وشفتي بالنهايه شنو صار
لا تعرضين النجمة الغاليه علينا وايد حق هالموقف عشان خاطر استكانة وعشان ما يصير فيج مثلي
:**














noor
~~~~~~
هلا بالنور كله
يا بختي جان فيني اشيا تشابهج
:)
الله يحفظ امج وامي
في امهات يشيشون بناتهم ويعلمونهم اشلون يشيلون بقلوبهم
بس من طيبه امهاتنا
يركزون على الطيبه دوم
ويذكرونا بالنيه الطيبة
اذا هذيله امهاتنا اشلون نتغير؟
:Pp~
يارب نتغير للاحسن
واذا صادفنا مثلها وايد
نعرف اشلون نتعامل وياهم
بس
ما نفقد طيبتنا
شكرا من قلبي يا النور اللي فرحت قلبي
:)








MNO Yensa
~~~~~~~~~~~
واي حبيبتي
تدرين وقفت عند هالسؤال
اهي تسوا تكدرين خاطرج عشانها؟
ولقيت اني مو متكدره عشانها
يمكن كنت شويه متكدره على نفسي
!!
الله يهديها ويرزقنا كل على قد نيتنا
ولا يحرمني من طيبه قلبج
ولا رقه كلامج
ولا سنعج انتي
والله خجلتيني بهالكلام
:**









بنت الشامية
~~~~~~~~~~~~~
تو ما تباركت استكانتي
انا
وبلوقي
واستكاناتي كلنا
ولهانين عليج
:)
اي والله الحمدلله يا بنت الشامية انها علاقه مؤقته ومصيرها بتنتهي
ويا بعد قلبي انتي ما تقصرين:**

esTeKaNa يقول...

محارة
~~~~~~
ياهلا بمحارة القلب والله
ما طمنتيني ترا قلبي عندج
دزي لي ايميل اذا ما حصلتيني قولي لي شخبارج
:)
وفعلا...وجود امهاتنا نعمه
وتربيتهم لنا سبب ثقتنا بنيتنا وطيب اخلاقنا
الله لا يحرمنا منهم يارب
ولا يحرمنا من القلوب الطيبه شرواج
:*












حسام بن ضرار
~~~~~~~~~~~~~~~
اي والله يا حسام
كل من يعامل الناس باصله
!!
مشكله نشوف هالصدمات واحنا على اعتاب حياتنا الواقعيه
ما مدانا ننصدم
:(










مانتوفاني
~~~~~~~~~~~~
معلومتك صحيحة
!!
توقفت عند كلمة انقى منهم
كلمه النقاء مست شئ في داخلي
اللهم ارزقني قلب نقي
انا وكل من احب
:)
احببتك ردك
وووضوح مثالك
الى ان نلتقي...سأكون فعلا سعيده
بوجود امثالك في سماء مدونتي











قلب طفلة
~~~~~~~~~~~
يا بعد قلبي يا قلب اجمل طفلة
والله اني مبتسمة من ردودكم اللي تشرح القلب وترفع المعنويات
الله لا يحرمني منكم
:)











قيادية
~~~~~~~~
تصدقين انا لو الكل يصوت ضدي
يمكن اهاجر بره الديرة
بس العين قويه يا قيادية
!!
والله انا فعلا مستغربه من نفسي
قد اكون طيبه بس عمري ما كنت ساذجه في علاقاتي
عندي نظام الفلتره والدوائر
بس مرات افتح في كل دائره مجال وتعتفس ترتيباتي
!!
تجربة يا قياديه ومنها استفيد لحياتي
يا بعد قلبي يا قياديه
يعلم الله دعيت لج من قلبي
عسى ربي يوفقج وتفتكين من لويه هالامتحانات وتبشروني يارب بالخير كله



الحين ازف نجمه؟
نجمة تنحط على الجرح يبرا
وانتي ونجمة تمثلون مثال احبه:
الطيب مع الطيب تجاره
:*

esTeKaNa يقول...

5roofa
~~~~~~~~~~
يا هلا وامية ةهلا بخروفتنا المواصله
اتوقع الحين بهالحزة تكونين بالفراش وشخري
:)
يالله يعطيج العافيه يارب
الله يحفظج يارب
وبس هانت خلصت المدرسه وبتريحون انشاالله














أرتفل
~~~~~~~~~
عفية على ارتفل
بالضبط...بلوقي ينسب لي
اكتب فيه اللي احسه واللي ابيه
:)
ما قصرت على المرور
ما اقرق الا من حر مافي قلبي وانا اخيتك
بس اشوة
الحين انا اوكي
:Pp~














الزين
~~~~~~~~~
وااااااااااااااااااااي
زوقه هالزين زوقه
يصير اطلع من الشاشه المج؟
ترا بردتي قلبي
وانتي تدرين
انا مافيني الا حجي
بس تكلمت
بس لميتيني وطب طبتي علي
خلاص انا الحين صرررت زينه
:****
والله من كثر ما كلامج فرح قلبي
مادري مو لاقيه رد
بس دمعت عيني
ترا صج ..محبتكم ثروة الله لا يحرمني منها يارب
:)
















2COOL2CARE
~~~~~~~~~~~~
كلامك منطقي
!!
فعلا انا كنت اقص على روحي
كنت اقول شدعوة تحتر مني
اشفيني زود
واستنكر على نفسي اي احساس سلبي من ناحيتها

بس بعد كلام فعلا
احتاج اعاده نظر بالعديد من الامور
الله لا يحرمني من لمة امي
ولا من صدق تواصلكم
:)














Dandash
~~~~~~~~~~~
يا مسا الدنادش
:)
واي دندش جنج تقولين اللي بقلبي
والله انا كان ناقزني قلبي
بس كل ما وخرت اقول شدعوة بتغار من شنو
وليش اتعامل وياها جذي
الوم نفسي ولا الومها
واراجع نفسي مليون مرة
وايد وايد انا ضغطت على نفسي وياها
!!
وياااا بعد قلبي قلبج
صج صج لو انا مكانج راح احتر
وفعلا...اليقين ان ربج ما يردنا عن شي الا خيرة لنا يقين يريح قلوبنا
رزقنا بيد الرحمن عمره ما كان بيد فلان او علان
الله يحفظج
ويجبر بخاطرج
ويرزقج القبول بالدنيا والاخرة بكل شي قولي آمين
:)
ما ننحرمش يا دندوشه

esTeKaNa يقول...

selezeya
~~~~~~~~~~
ياهلا وامية هلا
مامنج قصور
دراستج اهم منا كلنا
بشري ان شاء الله كل امورج تمام؟
مشكورة وايد على المرور والرد
:*













kazmawy
~~~~~~~~~
ياهلا ومرحبا بكظماوي
معقوله تعلق وما يوصلني؟
فعلا نحتاج استجواب
اكيد خطأ فني نعذر لسموكم من هذا الخلل
:(
تدري شنو المشكله؟
انا واضحة بمشاعري
احبها ...يبين علي
ما احبها...ابتعد
ماعرف اتعامل مع انسانه بطريقه وابطن بقلبي شي ثاني
عشان جذي ما تعرف اتعامل مع امثالها

المهم...عسى بس سامحتنا يا طويل العمر على الكومنتس؟
:)











najmah
~~~~~~~~~~~
مبروووووووك
مبروووووووووك
:)
واي يا حلو اخر يوم امتحانات
تلقين ايام الدراسه كلها تيني نومه وانا ادرس
بس اخلص امتحانات تتبقق عيوين طول الليل سهرانه
:)
نجمة...سمعي كلام اختج
والله العظيم انا لو اجابلج اقولج ترا نفس الشي بالضبط بالضبط
!!
شي مو طبيعي
انا معدلي ماكت اقارنه بمعدلها
وايد انا كنت اعلى منها
قدرة قادر البنت تسلقت على الجميع بواسطات وحجي حق هالدكتور وهالدكتور
وجدام عيونا واحنا ساكتين

لا تحرين قلبج
نصيبج ماحد ياخذه الا انتي
ولا تعطينها شي من قلبج
عامليها برسمية قد ما تقدرين عشان ترتاحين


ولا تتعذرين من شي
هذا بلوقج يا صديقتي
:*
خلج منها
واستمتعي بعطلتج

ray يقول...

:)

estekana i've gone through the same thing, just ingore them.

اللي ما يهمه سعادتي ما يهمني
في ناس جذي , يرافجون الناس لي لمى تنتهي مدة صلاحيتهم, و يركبون على ظهورهم. احنا اشنبي فيهم ؟

Najmah يقول...

ان شااء الله
انا احاول
وانتي ادعيلي :*

ابيه بدعت فيج
خليت البوست وفرغت قلبي
تدرين وانا اقرا كلامج
اكسرت خاطري
والله العظيم ان حدها اكسرت خاطري لأنها فرطت فيج واخسرتج
الايام بتعلمها ان القلوب الصافية ماراح تلقاها بكل مكان
وانها خسرت خسارة ماتتعوض
!!
المشكلة انها تسأل ليش يحبونج
يعني المفروض تحس انها عكس الناس لأنها ماتحبج
!
امج اتينن كلامها والله على راسي
:*

قيادية
رجااااااء
لا تشيشين استكانة عليي
:P
انا والله قلت فلااي
بس الفلاي مالي
made in china
:pP

esTeKaNa يقول...

أرتفل
~~~~~~
عشتو زايرنا المسيان
:)
صح لسان اليافعي
وكله ذوق اللي متنقص لنا هالكلمات
:)














فريج سعود
~~~~~~~~~~~
تهقه تستحي على دمها؟
:Pp~
ما نقدر على القطاعه
في احد يقاطع اخوه؟
بس مادري ليش كل ما دشيت تطلع لي صور الخرافي واطلع
ماكو بوست يديد
!!
الحين بس اخلص الكومنس بييكم
زهبو لي السجاد الحمر
:)









Ra_1
~~~~~~
ما تقولين حق امج شنو سويتي؟
احب اسولف ويا امي
:)
اي نفسه القديم










بس
~~~~~~
حيالله البس والله
هذي الساعه المباركة
كان ودي اشوفج ببوست انطع من هاالبوست المتعسر
اسم الله قلبج من الحرة
وعدل والله
خوش مثال ياي بوقته
:)











kuw-son
~~~~~~~~~
تصدق ولا همها
!!
كل الناس تصوت ضدي
وانظر لهم من فوق
واضحك ضحكة ثقه وغرور
لو تصوت الدنيا كلها بضدي
باخذ اللي ابيه
وااااي
:(











بصمة منارية
~~~~~~~~~~~~~~~
وعليكم السلام ورحمة اله وبركاتة
سلامات يا الغاليه سلامات
ما تشوفين شر ان شا ءالله
اسأل الله العظيم رب العرش الكريم ان يشفيك
:)
يزاج الله خير على هذا الرد
اله يجعله في مزيان اعمالج يارب
من قلبي...عسى ربي يحفظج يارب ماقصرتي














دبي
~~~~~~
هلا بدبي
هلا بالطش والرش
:)
اي والله
عقليات بنات
مو اي بنات
بنات مراهقات
!!
حيالله دبي

charisma يقول...

ما ادرى ليش احترييت وضاق خلقى من الى قريته
استكااانه !!

اتضااايقيين بيوم مثل هذااا حبييبتى انتى حبييبتى

واذا هاذا سلكها وطريقة تعاملها فما تشوف شر
فرقاها عيييييييييد

حااسه بكل كلمه والله حاسه
:(

اهى الخسرااااااااانه وخسرت قلب كبيير لو تلف الدنيا ما تلقى نفسج

استكانه ربى بعدها عنج لانها ما تستاهل قلبج الذهب

:***

ARTFUL يقول...

حبيبي جاني مسيان ولا سلم عليه..

أسير المسيان ليش لأ.. راعي محل عدل والا لا؟

بعد عندي بيت شعر ثاني

يقولج
اصبر على كيد الحسود فإن صبرك قاتله..النار تأكل بعضها إن لم تجد ما تأكله

سلامين وحته

=)

3ateeja يقول...

تصدقين مادري؟ يختج المحبه من الله

hhhhhhhhhh

والله يا اختي انا ما اعتقد انج تردين بغباء تردين بما ترينه طبيعي

خلج على سجيتج
ولا تعدين اي حسابات
ولاتعاملنها بالمثل
انت افضل وبتكونين افضل

ShLaLaT يقول...

استكانه الغاليه الناطعه ياللي عورتي قلبي وشبيتي فيني نار لاني عاااااانيت واحتريت وحتى بجي بجيت على هالسالفه اللي غثتني وافقعت مرارتي

اول شي انا توني يايه من امتحان وباجر عندي امتحان فلو سمحتي وتكرمتي دعواااااااتج لي بالصلاح والهدايه اولا
وبالنجاح والتساهيل ثانيا


اما بعد

غاليتي استكانه هذي انسانه مريضه نفسيا وفيها نقص !! واشك انها مضطربه عقليا
كل الطلبه يكرهونها وتلقي كلمه بعد !! قواة عين الصراحة

ثانيا فضفضي وانا اخيتج ما يريح القلب الا الفضفضه سواء لأمج ولا لربج ولا لبلوقج :)

وما اقولج لا تبجين .. بالعكس ابجي وابجي وطلعي الحره اللي بقلبج وتعلمي درس لج ان الطيبه الزايده ما تنفع بالعكس بتضرج وبتتعبج بحياتج
وتعلمي ايضا وضع الحدود فمصلحتج فوق مصلحة الجميع .. فكري بروحج وارضيها ولا تفكرين برضى الناس اذا انتي مو راضيه نفسج

تعلمي كلمه لأ
ما سمعتي عبدالكريم عبدالقادر لما قال كلمه المشهوره
وييييييينج يا كلمة لأ ؟؟

اي والله مرات نقول وينج يا كلمة لأ
قوليلها ما اقدر قوليلها مابي قوليلها لأ

ابوي مره قالي كلمة
اللي ما يستحي منج لا تستحين منه

وحده تشوف مصلحتها وتسوي اي شي وما تستحي تدقدق بانصاف الليالي عندها سؤال ولا تستحي تقولج ليش انتي دايما مستانسه
هذي ويه وحده تستحين منها ؟؟؟
بذمتج يعني ؟؟ اوكي لا تردين عليها اسهل شي حقريها وامشي
لا تسبين ولا تغلطين ولا تنزلين نفسج حق مستواها بس ما عجبج كلامها سكتي وامشي واهي اهني راح تعرف بقيمتها !!؟


واخيرا

لا يحرج وقاحه وتفاهة البعض
انتي اكبر منهم :)

5roofa يقول...

لول نمت نومة الهنية نومت الخرفان بالبريه لوول
:P

اي والله ثلاث تيام نعدهم عد

الله يسهل ياارب

مشكورة يالغاليه

salamz sis...

DiLLi O MiLLi يقول...
أزال المؤلف هذا التعليق.
DiLLi O MiLLi يقول...

وييييه يا أستكانة
أخلي وحده مثل هذي تضيق خلقي ولاااا تحرني !!؟ .. تهبه
وعلييه على هالنماين يايبين الشقى لنفسهم
عبالج بالهم مرتاح ؟
هذول حتى الليل ماينامونه .. شي يغلي فيهم
أعصابهم تاكل فيهم
حتى ربع ما عندهم
مســـاكيين

والله أنا أعرف وحده جذيه
تعالي شوفيها شلون دعت ألحين
الحمدالله والشكر الله
لونها صار مدودم
ويها ساح
صارت عصبية
كل شي ينرفزها
مساكيين

الوالد الله يحفظه كله يقول لنا : ترى الكلمة الطيبه ما تعّب

وبعدين أنتي من اليوم وصاعد لااا شفتيها .. صدي عنها ولاااا عليج منها
وأنا مع كلام والدتج الله يحفظها ميه بالميه
منتي ملزومه تكونيين طيبه !!! يه
كوني طيبه مع الطيب بس
بس أخالف الوالدة بأن أقولج قولي : ما تهمني وهالنماين ماااا لازم أتضايق منها


الإمام الشافعي يقول

يخاطبني السفيه بكل قبحِ
فأكره أن أكون له مجيباً
يزيد سفاهة فأزيد حلمـاً
كعودٍ زاده الإحراق طيباً



رديتي آخر البوست تقولين : ضايقتني !!؟؟
وأنااااا أقولــج لااااا تضايقج ولاااا تهمج
وبعدين البنت مليقه/شايفتها ;)/موو مال واحد يتضايق من أفعالها

عطيها بوو لاااابس أذا صادفتيها مرة ثانية

لوو الناس أطبق المثل العجيب اللي يقول
الحقـــران يقطــع المصـــران
جااان الدنيا بخير
هههههههههههههه

والله أنا مطبقتة ومريحة ملائكتي


:)

DiLLi O MiLLi يقول...

تصحيح : كلمة الوالد
اللســان الطيب ما يتعّــــب


:)

someone_q8 يقول...

السلام عليكم
اختي استكانه , اعتقد ان اللي صار معاج درس جيد عشان انعرف نعطي قلوبنا للي يستاهل , واعتقد انج الحين عرفتي اشلون تتعاملين من خلال هالموقف , انا ادري ان هالانسانة عطيتيها من كل قلبج ولانج انسانه خلوقه ما توقعتي انها اتسوي جذيه وعشان هالشيء انتي محتره وضايق خلقج وامعصبه لانها اجحدت كل شيء , الحين المفروض ترتاحين لان طريقج صار اوضح من قبل واعتبري ان اللي صار عتبة صغيرة من عتبات الخبرة في الحياة
طولي بالج اختي وهذه مو اول وحده ياما راح اتشوفين هالشيء سواء بالحياة الخاصة او من خلال زملاء وزميلات العمل

توكلي على الله و الله يوفقج

lawyer يقول...

اذا اهي بتوووووووت غيره منج و بتموووووووت قهر و بتمووووووت و تبط

كل الي قدرت تسويه تتجاهل وجووودح عبالها بتتجااااااهل مشاعر الغيره الي قاتلتها



ادعيلها بالشفاااااااااااء العاجل

و ياجبل ما يهززززززززززك ريح

~FaHaD iN MiND~ يقول...

tra fe waid men hal nemayen 3asallah la yeblana .. maret eb mawqef yeshabeh mawqefch bs il 7emdillah 3adeta 3ala khair .. il mafroth manthayeg khelgna 3ala hal naw3eya men il nas o ehya matsawe chethy ela le'anha me7tara mench o fey shay 3ndch ma 3endaha eyah khaleha te7tar len tgool bs .. aham shay il nas y7ebonch o il nas tadri entay shno o ehya shno .. ygolch fe nas 7eshmehom o fe nas 7eshmay nafsch menhom o hathy men hal nas entay a3la menha lat5alen hal nemayen ethaygich o et'ather 3alch :)

bin3li يقول...

ممكن نطوي الصفحة هذه و نفتح البلوق على بوست يديد مبتسم?

:)

esTeKaNa يقول...

charissma
artful
3ateeja
shalalat
dilli o milli
someone-q8
fahad in mind
lawyer
~~~~~~~~~~~~~~~~~~~~~~~~~~~~
آسفه جدا على التأخير
وشكرا من اعماق الروح على ردودكم اللي كل واحد منه قريته بقلبي وحسيت فيه
الله لا يحرمني منكم جميعا
:)

تراب الكويت يقول...

أحيانا..تجمعنا أقدارنا مع ناس
!!دون رغبه منا
وجودهم واقع لا مهرب منه
واقع يحتم علينا التعايش معهم بأي شكل من الأشكال
قدرتنا على التعايش مع الشخصيات الغريبه فن
لا يقدر عليه الجميع
.....

اتفق معاج بالسابق
تدرين وين المشكلة ؟
إذا كانوا هـ الاشخاص من المقربين لج
ومضطرة تتعاملين معاهم " رغم أنف طبيعتك "

والله مشكلة

:(