الأربعاء، أبريل 23، 2008

خدايو:Pp

عندما تكون مشتت الذهن
مشغول البال
!!تفقد قدرتك على التركيز
انا افتقد قدرتي على التركيز دون سبب مقنع لذلك
.
.
.
كانت امي بجواري تشرب شاي العصر
وأختي على مقعد ليس ببعيد تكتب واجبها المدرسي
تتكلم أمي عن جدي رحمه الله باستفاضه..دون تعليق او ردة فعل مني غير هزة الراس
فجأة أتنهد واعقب على كلامها في مدح جدي رحمه الله:
إيييييييييه
صلى الله عليه وسلم
!!
استغربت أمي كلمتي:
اسم الله عليج الرحمن الرحيم
تخديتي وقعدتي
اكلمج عن يدج الله يرحمه
تقولين ..صلى الله عليه وسلم
:(
.
.
.
.
كنت السياره الأولى على لفه الفوق تحت
وورائي خمس سيارات تقريبا
انظر ليمين وارقب الشارع منتظرة ان تخف السيارات لألف واكمل طريقي
كان جيب مسرع لا تقل سرعته عن 120
فجأة...افقد قدرتي على تقدير المسافات
واودس بنزين لالف امامه
لا يفصلني عن سيارته والموت ....إالا شعره
!!
اسمع صوت هرنات السياير
واشعر بقلبي يصل لبلاعيمي
وبرجفه في يدي اليمين
تخيلو شنو سويت؟
اكملت طريقي وكأن من قامت بذاك العمل الانتحاري ليست انا
.
.
.
موقف آخر في السيارة
كنت اقف عند اشاره حمراء وابحث عن نقود اختي الضايعه في سيارتي
مع الحوسه...ظغطت على زر لتنفتح (دبة السيارة)انفتحت بالبدايه بخجل
قررت اني لن اقف لاغلاقها طالما اني قريبه من البيت
مع مروري العنيف على مطبة في الشارع..فتحت السياره فمها بمواجهة المجتمع
مرة أم عيال استذبحت وهي تطق هرن تقولي السياره مفتوحه
وأطفالها يأشروون لي بحماس على السيارة
وانا ابتسم بغباء...وأقولها :
أدري
أدري
!!
.
.
.
سئلتني أختي الصغيره أمس:
اي لون فرشه اسنانج؟
جاوببتها:
أزرق
!!
سئلتني باستغراب:
انتي ليش عندج اربع فرش اسنان لونهم زرق
اكتشاف آخر....انا استعمل اربع فرش اسنان
دون ان انتبه لذلك
ليش؟
.
.
.
أبعث لصديقتي برساله
وأظل انتظر ردها واتحراها
ولكن ..طال انتظاري ولم ترد
!!
انتظر رد قريبتي بمسج....لم ترد
واكسر خاطر نفسي:
علامهم الناس حاقريني؟
لاكتشف بالنهاية اني اكتب المسجات ومن ثم اغلقها دون ارسال
فتنحفظ في صندوق الحفظ في تليفوني
:(
.
.
.
كل هذا يهون....اليوم كان ابداعي غير نمونه:
نمت لاكسر نعاسي بعد صلاة العصر
العادة..افتح عيني مع صلاة المغرب او بعدها بدقايق واصلي
!!
اليوم وصلت البيت بوقت مبكر فنمت ....وطال النوم
فتحت عيني لأرى نور متسلل من نافذة غرفتي
صليت ركعتين
لبست ملابسي
واخذت ملفاتي ونزلت
وجدت اختي الصغيره متشرقده امام التلفزيون
سئلتها:
انتي ليش مو رايحة المدرسه؟
وقته تلفزيون من صباح الله خير
!!
ضحكت وهي تجاوبني:
قبل لا تزفين شوفي جم الساعه
الساعه ست المغرب مو الصبح
:((
.
.
.
.
شفيني؟
!!

هناك 100 من التعليقات:

حسافتج يا كويت يقول...

فيج عرج بحريني؟؟

esTeKaNa يقول...

حسافتج يا كويت
~~~~~~~~~~~~~~~
ابدا ما فيني
Hehehehehe
:))
ادعي لي بنص هالليل
حاسه ان تركيزي وذكائي تم استهلاكة بعمر مبكر
:Pp~

mtfa2el يقول...

عندنا و عندج خير
انا مرة كنت مستعيل باطلع ادور عقالي و اتحلطم ..يمه انتوا كل يوم تحطون العقال بمكان مهي حالة ..مستعيل و الله
تقوم تقول شلابس على راسك ؟؟
اقول اهااا اي لا بس كنت اتحرى شوي
لا من الخداي الزايد و النسيان المليق ..واحد صار له سنة كل ما يشوفني يقولي سلم على اخوك ..لي الحين ناسي اسمه ):

mtfa2el يقول...

قوليلي اني سبقت
Q8i Blogger
طلبتج كل ما اييله تعليق مسحيه
نبي نخليه اين شوي و يبطل من سالفة اول كومنت

الخيلاء يقول...

هههههه

استكانه اتصير باحس العائلات

لا اكون سرحانه بالاشاره و احد يطق هرن على طول ادوس بانزين
انزن الهرن مولي بس الاني ادري بخمالي و اني سرحانه



باللفه ما اسويها لو يموتون ينقزون ليما يخلا لي الشارع يالله اطلع و الاوادم تستذبح بالهرنات و انا طاف .. بعد ما أموت عشان اهما يطلعون :p


على سالفت التاشير
مره ويا اختي و هندي ياشرلي و انا اقول حق اختي قطع مابقى الا الهنود بعد مامداني اكمل سالفتي الا انا هابده بحفره بالشارع ماشفتها و الهندي و عليه بيفطني عليها
لووول


و الموقف الاخير ياكرهه لي صار دوام
وااااي كله انقوم مختبصين خاصه اذا كنتي اتحاتين شي مهم بيصير
اشرايج بلي ساكبه و الجنطه و الحاله و اطلع من الدار ياربي صخه مو العاده
و انزل تحت ياربي وين الخدم
و اطلع الحوش و اتحلطم هالصبي مو غاسل سيارتي اشفيهم الاوادم
و فجأه الا الساعه 5و نص و لا يوم يمعه

الله يخلف على عقلي

صقر قريش يقول...

أما سالفة صلى الله عليه وسلم وايد حلوة بصراحة عجبتني:).

موقفج بالسيارة أنا نفس الحالة لا وساعات أطلع متعمد بايعها :)آنا مرة كنت بالشامية منطقتي السابقة ومربع طفولتي (حلوة مربع طفولتي توني حافظها:) بعد صلاة الفير ركبت سيارتي أبي أطلع المهم كنت بالشارع الي يم بين الجمعية الرئيسية وبين المأمون القبلية الي كانت مدرستي ومدرسة الشايع الحين فشف ماكو أحد خذيت راحتي ودست والا الحبيب موزع الجرايد يطلع عليه عبالي بيوقف ماوقف وأعطي السيارة ذاك البريك وقلت بيني وبين نفسي (يا آنا الميت يا أهو) بس الحمدلله وقفت السيارة وبيني وبينه شعره سبحان الله :).

أما مالت الدبة آنا لوكان بيني وبين البيت شعره ودبة السيارة مفتوحة أوقف وأنزل أصكها وأكمل السياقة.

اما بالباجي أقول ترى عادي يا أختي وايد تصير فينا خصوصا إذا كثر الشغل وتشتت الذهن تخيلي آنا مرة نسيت إسم أبوي :) هذا صج المخدي :).

ولد الديرة يقول...

خلاص

بنت شويطر

هذا اسمج الحين :P

غير معرف يقول...

ههههههههههههههههههههههههههههههههاي
انتي هالايام مش فـ الفورمه أبددددددن شهالتفهي اللي صادج يا استكانه !!!!!!!!!!
والله صج ذحكتيني ومن قلب بعد..
ماتنلامين تفكرين بكل شي
أحسج شاغله عمرج بكل شي هدي بالج يابنت الحلال توووووووووووج في عمر الزهور اذا وصلتي خريف العمر شبتسوين
:pP
الله يعين شتاءه :ppP
عيل صل الله عليه وسلم ها -_-"
لاحول ولا قوة الا بالله البنت تخدت :P
تصدقين عاد :(
أمس الثلاثا انحس يوم
قبلها بيومين والله صاكه على عمري ادرس
حق الامتحان وليلة الامتحان تميت ادرس لين 6 ونص الصبح قلت بريح لي شوي لين 8 لانه امتحاني 9
مافتحت عيوني الا الساعه 8:59
x"""""""(
بغيت اموت الساعه 9 وثلث انا عند باب
الكلاس شلون مادري !!!!!!!
دكتور تكفى دخلني لالالا مش حدخلك
حعيد المد تيرم ليكي <_<
أشوى !! بعدين رحت دسكشن
يوم طلعت الا يقولون لي امشي بنروح نتعشى بفرايديز ويوم رحت
الا ينكككككككت علي البيبسي كله بالثلج على عبايتي قدام الأوااااااااادم وبدت المصااااخه :S
وتهاوشت وياي وحده وانا مالي خص

نرجع لمحور حديثنا :P
يااااااااا الله .. لو عندنا بقطر انتي
ماراح يهدونج الا لما يطلعون قلبج من مكانه من الخرعه :Pp
بيلزقون بسياررررتج وبيسوون لج رعب
احمدي ربج يابنت الحلال
جات سليمه والحمدلله ع السلامه
اما موقفج يوم تلبسين وتنزلين
بتروحين الدوام الساعه 6 المغرب
وووووووووااااي لو يصيدني هالموقف
بغيب عن الدوام اليوم الثاني
مافيني شده البس واكشخ مرتين :pP
صراحه انتي أنتييييييييييييييكه يا
إستكانه خليتيني اعور راسج بسوالفي
:Pp

* Simple

>> مادري شسالفة الباسورد مع أكاونتي
:(

Najmah يقول...

صباااح الفل والنوير
صباح الحب يغنيه الطير
صباح الخير ياويه الخيير

استكاااانة
منو شاااغل بااالج
اعترفي اعترفي
:Pp

امبيييه تدرين
انا الصبح مادري شفيني مااشوف عدل توني ياية الف اليوتيرن مااادري شلون ماشفت السيارة جان اتسبني سب بالهرنات :\
وانا من الفشله ماقدرت حتى اطالعها معطتها طااف وامشي واهيا لما آخر الشارع واهيا اتطق لي هرنات
مابقى احد ماطالعني
والآنسة نجمة ماجنها مسوية شي :\
تدرين
كنت على طريف وابجي
لولا اني قريت بوستج جان اضحك
اشوه مو بس انا :P

lawyer يقول...

بالج كلش مو معاج
تفكيرج في مكان و جسدج في مكان

ماتقدرين تركزين لان تعب مخج من التفكير في شي و ممارسه روتين ثاني غير الي تفكرين فيه

امي تقولي ييبيلي ماي باكل حبه السكر اروح الثلاجه اييب لبن اعطيه ابووي !! ليشششششششش مثلا

تصرخ فطييييييييييييم ويييييييين عقلج ماي حقي اناااااا

ابتسم ابتسااااااااااامه عبط!

Peace يقول...

عندما تكون مشتت الذهن
مشغول البال
!!تفقد قدرتك على التركيز
انا افتقد قدرتي على التركيز دون سبب مقنع لذلك


عندما نفقد التركيز
حتما هناك سببا ما

و قد نرفض هذا السبب
او نرفض الاعتراف به

ARTFUL يقول...

اسم الله عليج الرحمن الرحيم

بس على سالفة صلى الله عليه وسلم


مره كنت مع اخواني رادين من لعب كره بوقت متأخر أهلي نايمين

ونقعد بالمطبخ التحضيري اللي تحت نكرع بهالماي تقول عيول مو أوادم

المهم سالفه تير سالفه من أدب لي تاريخ لي سياسة لما قعدت وتنحت وقلت عن شخص ماله شغل بكلامي أبدا ((الفاروق أمين هذه الأمة صلى الله عليه وسلم)) فجأة صار هدوووووووء تالي انفجر الضحك وسالت أنهر من الدموع

مرات الواحد يصير مخدي دنبك وأثول وطبعا محشومه يا اوخيتي

انا أقولج شفيج يا خرفتي يا تحبين يا فيج نقص جاي بدمج

اذا خرفتي فمالج الا تقعدين ما حبايبج واهلج وخلانج ويذكرونج باسمج واسامي اللي حواليج ويقولون لج هذي استكانه هذا تلفون هذا تلفزيون هذي اهدومج وجذي شوي شوي لما تذكرين كل شي

وهالله هالله باليزر لأنه يقوي النظر شكووووو
;p

أما الحب ،، آآآه ياا لحب داء خطير قد يصبح داء ودواء اذا كان بشكل صحيح
بس اذا كان حب ماهو بشكله الصحيح فهو داء الله يعينج عليه
ميزته غير معدي بس
أعراضه : السهر،، التخدي ،، التخسبق ،، الوله ،، الشوق ،، ممكن يحوشج عقر بقر،، التنرفز ،، الهم ،، الحزن ،، السعاده وغيره
باختصار تشكيله متضاربه من الأحاسيس
ما أقول الا كلام الست أم كلثوم: أهل الحب صحييح مساكين صحيح مساكييين

أما اذا كان نقص جاي فهذا أمره سهل الحمدالله بس روحي المختبر الألماني أو أقولج مستوصف منطقتكم ((شماله المخاسير)) وسوي فحص دم واذا كان ناقص كثري الجرعات بالوييك اند واذا زايد خففي

نصيحه أخيره للويك اند
حاولي تروحين مكان هادي مافيه لويه لا تقعدين بروحج حاولي تكونين مع حبايبج واهلج لا تجهدين نفسج لا تهاوشين ولا تدشين بنقاشات حاده خلي سوالفج مع الغير كلها ونيسه عن ذكريات حلوه او تفاؤل بالمستقبل او قصه أي شي

اليوم قرقت واايد واايد واايد

بس كافي انا مليت وأنا أكتب

في أمان الله

=)

|:| DUBAI |:| يقول...

حامل

:$ :$ :$

LOL

حلم جميل بوطن أفضل يقول...

فرصة لا تتعوض لأقول لك

.
.
.
.
.
.
.

مخديه

.
.
.

الحين أقدرأموت و أنا مرتاح الضمير

حسافتج يا كويت يقول...

إستكانة


من غير لا تقولين


ههههه صرت كل يوك إند ادعيلج

واضحك مادري ليش و شمعنة بالويد اند

Mr_CHoCoLaTe يقول...

نحتاج نكون بحاله نفسيه زينه

و ذهنه صافي

خاصة عند اجتماعنا ويا الناس او قيادتنه للمركبات

و شكله في شي شاغلج مثل ما قالت اختي Peace

و ان شاءالله تكونين برعاية الله

مع السلامه

ShLaLaT يقول...

لوووووووووووووول استكانه
عادي عادي تصير

انا دايما اذا قلت يدي اقول وراه الله يرحمه لان اثنينهم متوفين
ومرات اذا قلت يدتي اقول الله يرحمها لوووووول استغفرالله مع انهم عايشين
بس لساني متعود استغفر الله الله يطول بأعمارهم


ومرات صج اضحك على روحي اذا كنت ادور موبايلي بالجنطه واهو بايدي اليسار
او اذا كنت ادور نظارتي وانا لابستها لوووووول


خوووووش بوست والله موتيني من الضحك
والله صايره خفيفة طينه على هالبوستات

U-Turn يقول...

LooooooooooooooooL

بعــد قلبي شفيــج ..,,!!
بس الصـــراحه كـــل مواقفــج خفت طيــنه ;D

نــاديـــت أمــي تيي تقــرا حدهــا إستـــانســت ..,, تقــولي خفيفت طينه هاذي ;)
تحســب هالبلــوق مجـــله تقــولي شسمــها هالمجــله تــوسع الصــدر ;p
لووووووووول يا حــلوها أمي ;p

أكيــد بـــالج مشــغول بشــي
أو حايشـــج النســيان المبــكر اسم الله عليــج ;p

يعطيـــج ألف عافيــه إستكــانه
وسعتــي صدورنــا بمواقــفج ;p

ايي صج ما قتــلج ..,, شهادتي مجروحه ببلوقــج :) ..,, كـــنت من متــابعينــه قبــل لا أدخل هالعــالم

عســاج على القــوه

someone_q8 يقول...

السلام عليكم
اسم الله عليج اختي استكانه , علامج ؟ همممم يبيلج راحة لمدة اسبوع بره الكويت ونوم لمدة يومين خلال الراحة وعقبها راح تتعدل الامور :)

انتي مرهقة من التفكير اختي سواء من الدوام او من المستقبل او من اللي حواليج
ماتشوفين شر اختي :)

غير معرف يقول...

ههههههههه ضحكتيني والله يالغالية
ياختج حتة قبل فترة مريت بحالة شديدة نفسج
ورحت العمرة ودعييت من قلب ربي يرد لي تركيزي

والله شوي وأصيح .. حسيتني صرت مهزلة شوي

=)

بس والله ساعات حلو هالتفهي

" كلي طموح "

bin3li يقول...

هذا شي مب طبيعي
هذه حوبة حد
أنتي شو مسوية?
:P

esTeKaNa يقول...

متفائل
~~~~~~~~~
يامساالتفاؤل كله
:)
اهو عادي نسوي جذي ونتحطلم اذا بروحنا المشكله اذا صار جدام احد
فشششله
!!
انزين ما فكرت تسئل احد يعرفه شسم الاخ اللي كل مرة يسلم على اخوي؟
:Pp~
تصدق عاد متفائل
قبل فتره شفت واحده كانت معاي بالجامعة لمتني وتناديني بدون تكلف
عطتني رقمها
تدري شنو مخزنته؟
صديقتي اللي ناسية اسمها
بينا مسجات
مع العلم ان ما صار لي سنه من تخرجت
:pP~

esTeKaNa يقول...

متفائل 2
~~~~~~~~~~~
هههههههه
هاو ليش حاظ دوبك دوبه؟
خله يمارس هواية اول تعليق
ولو انه خلاص طلافه اول تعليق
انا عبالي لاهي بالدراسه
اثاريه لاهي باول تعليق
:Pp~

esTeKaNa يقول...

الخيلاء
~~~~~~~~~~
هههههههههه
واي غشيت من الضحك
اثاري استكانة لها ولايف
:)
تصدقين انا مثلج
لو للي وراي بينتحر
ما اطلع من اللفه الا وانا مقتنعه ومفكرة بس اخر مرة والله الله حفظني ما صار فيني شي
!!
واي سالفه يوم اليمعه تعور القلب
تصدقين لو يوم دوام ما قعدتي
:pP~
تدرين اني احب كل تعليق منج؟
لا خلا ولا عدم يا الخيلاء
الله لا يحرمنا منج
:*

esTeKaNa يقول...

صقر قريش
~~~~~~~~~~
صج الله حفظك وحفظة
!!
عاد تنسى اسم ابوك؟
لا هذي ما مرت علي من قبل
:)
اشوة يعني وضعي طبيعي
:Pp~

esTeKaNa يقول...

ولدالديرة
~~~~~~~~~
بنت شويطر؟
اي نعم
ما يطلع من شويطر الا الحلوى اللذيذه
:pP~
بفكر بصورة ايجابيه
وبتجاوز قصدك الضمني
:)

esTeKaNa يقول...

simple
~~~~~~~~~
اخيييه والله
جنج تدرين
انا فعلا مشغولة بكل شي
!!
بس شنو هالموقف مال الامتحان؟
احس الخرعه بتنسيني كل المعلومات
اشوة انها يت على جذي وما تعسر عليج وقالج لا تعيدينه


عاد تدري حتى عندنا ما
يقصرون بالهرنات
بس لاني بغيت اموت يمكن
كسرت خاطرهم
:)
الله يسلمج من كل شر وحياج الله
ونستيني بسوالفج والله

كسرت خا

esTeKaNa يقول...

najmah
~~~~~~~~~
ياهلا وأمية هلا
:)
تصدقين مادري منو شاغل بالي
بس ادري شنو
وشنو غير منو
اشرايج فيني وانا اتفلسف؟
:Pp~
وي اسم الله عليج الرحمن الرحيم
!!
ديري بالج على نفسج وتركدي
اييي ذكرتيني بنفسي اذا سويت شي مينون
اسوي روحي مو متهمه وجنه مو انا
:)

esTeKaNa يقول...

Lawyer
~~~~~~~~
وييييي
!!
لاماهي بشاره
اقري على نفسج وبقرا على نفسي
الله يثبتنا بعقولنا
تخدينا وقعدنا
والله عدل كلامج
:(

esTeKaNa يقول...

peace
~~~~~~~
يجوز
:)
شكرا للمرور

esTeKaNa يقول...

artfuLL
~~~~~~~~
يا مسا الورد
يا مسا خفة الطينه
:)
سالفتك ذكرتي بسوالفي قبل جم بوست ،عن السهر وسوالف اخر الليل الللي كل ما قلت شي تفصل وتضحك
بس صراحة
صج صج صج ضحكتني
وبدعت
هههههههههههههههه
تهقه خرفت؟
توني بأوجي
وبربيع عمري
وآخر هالشهر بصير 24
!!
عيل تقول احب؟
مممممم
اشوف تعرف اعراض الحب عدل عدل
:pP~
نقص جاي؟
مممممممم
ماني من شريبه الجاي وايد تصدق
!!
بس صراحة
خوووووش تعليق
وسعت صدري
وافحمتني
وطمنتني على مستقبلي
شكو مادري
:Pp
وراح اعمل بنصيحتك ههالويك اند بقدر المستطاع....مليت من الكتابه
بس انا ابدا ما مليت من كلامك
:)تورت البلوق

esTeKaNa يقول...

Dubai
~~~~~~~~
LOOOOOOOOOOOOOOOOOOOOOOOOOOL:))
الله يغربل ابليسج
موتيني من الضحك

esTeKaNa يقول...

حلم جميل بوطن أفضل
~~~~~~~~~~~~~~~~~~
يا حبك للشماتة يا سعد
:pP~

esTeKaNa يقول...

حسافتج يا كويت
~~~~~~~~~~~~~~~~
لا خلا ولا عدم يا أخيي العزيز
:)
الله يحفظك ويحفظ لك المدام ويبلغك بكل الفرح يارب
صج ونستني
يزاك الله كل خير

esTeKaNa يقول...

mr-chocklate
~~~~~~~~~~~~~~
والله عدل كلامك
!
نحتاج ذهن صافي
:)
شكرا للمرور والتعقيب ماقصرت

esTeKaNa يقول...

shalalat
~~~~~~~~~~~
صايره خفيفة طينه؟
لا لا
لا يا استاذتي الفاضله
انا اساسا خفيفة طينة
بس ما تدرون
:Pp~
وي الله يطول بعمر يداتج
صاجة مرات الواحد يعلق
جنه انا كله بعيد الفطر اكون معلقه على مبارك عليكم الشهر
هههههههههههههه
:))
حياج الله
ونسني مرورج

esTeKaNa يقول...

U-turn
~~~~~~~
ياهلا وأمية هلا
هذي الساعه المباركة اللي تسيرين على بلوقي انتي والوالده العزيزه
صج استانست
:)
يا حلوها عبالها انا مجله؟
هههههههههههههههههههه
واي قولي حق الوالده تدعي لي
وانتي بعد ادعي لي ربي يثبتني بعقلي
حسافه علي
ترا انا توني صغيره
:Pp~
وشكرا على اطرائج الجميل
وحياج الله بينا اخت عزيزه وغاليه
:)
تم اضافة بلوقج للقائمة

esTeKaNa يقول...

SOme-oneq8
~~~~~~~~~~~~
ياهلا ويا مرحبا باخي العزيز
:)
اي والله جنك تدري
!!
فعلا انا مرهقه من التفكير بكل شئ وكل امر..يا ليت ااقدر اسافر هاليومين
!!
شكرا على النصيحة والمرور
:)

esTeKaNa يقول...

كلي طموح
~~~~~~~~~~
وي اثاري التفهي ظاهره ومنتشره
!!
يبيلي عمرة والله
:)
حياج الله اختي

esTeKaNa يقول...

بن علي
~~~~~~~~
يا هلا يا بن علي بورسلي
:p~
تهقه حوبه؟
يا حسرة قلبي
!!
والله ما سويت شي
ولا اذيت احد
امشي تحت الساس انا
:pP~

violinist_q8 يقول...

صراحه الله يحفظج من التقديرات الي ماتكون بمحلها بالسياره لان صج خطره

الحالات الي قلتيها اسميها حالات الloading

لما احس انها صارت لي اسكت وتشتغل معايloading لما ارجع للواقع
but i like it ! :)

take care plz

الخيلاء يقول...

هههه ستكانه انتي بتاولي فيها
والله اليوم اكل رز مع الملايكه
ماوعيت الا بصرخه من اختي انتي لي الحين نايمه..

كل الي اذكره عقب هالجمله اني بالسياره عند الاشاره اتفقد شلابسه شيايبه .. لوول

والله مادري شلون و صلت لي الاشاره و انا عيني على الساعه .. و يوم اليمعه طايره بروح الدوام

الظاهر هالشهر فايرس الخداي منتشر بالجو :p

5roofa يقول...

لووووووووووووووووووووول

وااي امبي على يدج الله يرحمه شرقت وانا اشرب مااي

قمت ابججي من الضحك لوول

امبي بدعتي على السيارة و الدبه وااي غشيت

و الله ستر عليج يا بنيه حطي بالج على نفسج سمله عليج الرحمن

حطي بااااااااالج

ايي استكانه الي ماخذ عقلج يتهنى فييييي
:P

salamz sis...

5roofa يقول...

انا رديت عليج صح؟؟؟

salamz sis...

قلب طفله يقول...

هههههههههههههههههههههه

يا كثر ما تصير هالمواقف يا استكانه

تمر علي هالحاله مره بالشهر

و مرات اكثر لوووول

حزتها اصير خداي مع مرتبة الشرف

يعني المرض مو نادر لا تخافين

مع هذا ما حصلت علاج

الا التطنز من اللي حواليج

حزتها بتصحين و تبئي زي الفل لووول

الله يوسع صدرج بالعافيه

^_^

هنوفي يقول...

مساء الخير
واااي ذكرتيني بموقف صارلي مرة كنت بالاشارة اللي عند الدوار اللي فيه مسجد اكيد عرفتيه اللي بالديرة !! المهم واقفة اول وحدة جان يأذن بس سمعت الله اكبر جان امشي !! ابيييي والله حسبالي لما يأذن نمشي وااااي مت من الضحك شكو الأذان الله ستر وانتبهت بسرعة الواحد ساعات يصي اي شي !!
المهم انتي شخبارج ولا تطولين علينا بالبلوق نبيج كل يوم موضوع
تحياتي لج وللخداي سلام مربع :)

esTeKaNa يقول...

violinist-q8
~~~~~~~~~~~~~~
اول مرة اسمع هالتسمية
!!
اي والله يبيلنا نتحرص شوي على روحنا
ما تسوا لحظة تفهي ونروح من جيس اهلنا
:)
حياك الله

esTeKaNa يقول...

الخيلاء
~~~~~~
looooooooool:)
اهم شي اللي تتفقد يا قلبي قلبها
اقولج شي؟
انا حاطة بسيارتي كريم
كحل
وكلكنسكات جونسون مالت المكياج
اللي يشوف يقول ذابحني المكياج كله كحل
!!
هذيله مفيدين
جان انا مستعيله اتدهن بالسياره
وانا راده عادي امسح عيوني بالسياره:)))

esTeKaNa يقول...

خروفه
~~~~~~~
Hahahahahaha
:)
وي اسم الله عليج خروفتنا
اذا تعرفين اللي ماخذ عقلي قولي له يرده لاني انا بكبري ما اعرفه
:Pp~

esTeKaNa يقول...

قلب طفلة
~~~~~~~~~~
ياهلا بقلب الطفلة والله
اييييييييييييه
لو ربي يفكنا من الشماتة احنا بخير
:)))
حياج الله
الله يوسع صدرج ويحفظج دوم

esTeKaNa يقول...

هنوفي
~~~~~
يا مسا الهنوفي والله
:)
ههههههههههههههههههه
هههههههههههههههههههه
واي هنوفه
موتيني من الضحك صج
!!
يا حلاتج والله
اثاري الحاله منتشره
اشوة تطمنت على وضعي
:)
حياج الله
وابشري بالخيروساميحني على القصور
هاليومين لاهيه شوي
!!
بس ان شاء الله ما اطول اكثر

بصمة منـــارية (: يقول...

LoOoOoOol..

اشوة تطنت على روحي ان في أحد مثلي ..

لان اخر الايام بديت اشك بقدراتي العقلية و الفكرية ..

اليوم مع رفيجاتي قاعدين نتكلم بالسيرة النبوية وفي قمة اندماجي و اشتطاطي قتلهم .. ابو طالب رضي الله عنه .. !!!

طبعا نقص ويهي و قمنا نضحك ..

(:

Najmah يقول...

صح شنو غير منو
ومنو غير شنو
بس المهم
شنو شاغل بالج؟
:PpP~

DanDash يقول...

إسم الله عليكي و حواليكي

مبرووك أنت الآن و بعد هذه الأعراض التي ذكرتيها موظفة كاادحة مكروووف كراااف
العلالالاج

اجازة مع الرااااااااااحة التامة و الإستراخاء

و من اخيتيج عااااادي تحصل في أحسن العاااائلالالالات يااما صارت معاي

لا تخافين مؤقتة و تروح لحالها

DanDash يقول...

استكانة تدرين مرة رايحةدوامي مع زقزقة العصافير :((
وقفت عند الإشارةو كلها دقيقتين الا انا نايمة و عيني مفتوحة ما حسيت الا ذاك الهرن الي يقعد فريج كامل و انا بكل سهال و لا كأني مسوية شي كملت طريجي و طول اليوم عيني نص تنتة

و سالفة دبة السيارة سويتها و بكل فخر و إعتزاز 3 مرات

غصة يقول...

أكيد في شي شاغل بالج
:)

غصة يقول...

أكيد في شي شاغل بالج
:)

shakshaka يقول...

estekanoo lat7ateeeen inshalla makoo ila il3afia haley feeech zhaimer mubaker:P

shakshaka يقول...

estekanoo lat7ateeeen inshalla makoo ila il3afia haley feeech zhaimer mubaker:P

حسافتج يا كويت يقول...

على وعدنا هالحزة من كل اسبوع



دعواتي لك بالتوفيق يا أختي

tweety يقول...

لوووووووول
اسم الله عليج عين ما صلت على النبي والا عاشقة ومفلسة ؟ :p

الظاهر البال وايد مشغول والذاكرة يبيلها تفريغ وشحن من يديد

مشتاقييييييين يا قمر
ياربي أنا ما أشرب جاي بس استكانتج تشوق

tweety يقول...

تذكرت سالفة صارت لي مرة
كنت توني مصلحة سيارتي طلعت من سوق شرق ورحت صوب سيارتي والا داعمينها ومخفسينها جان اتصك فيني الدنيا وأقعد اتحلطم وأنوح وأندب حظي العاثر وعلى هالتهول اللي سويته تيمع عدد قليل من الجماهير الغفيرة وانا كاسرة خاطرهم منو اللي داعمني ومنحاش شوي والا...تطلع مو سيارتي نفس الموديل واللون بس انا صافطة جبالها !!! اللي الاوادم شوي ويكوفنوني وانا رحت ركبت السيارة بدون ولا كلمة شقول عقب سواد ويهي بس سمعت الاوادم يقولون الحمدالله والشكر

يعقووبوو يقول...

اعرف واحد جذي بس ماقدر اقول منو
لان احتمال 99.9% ان يقرى مدونتج ×:

ويعرفني
مالي خلق يزفني d-;

violinist_q8 يقول...

أكيد ماسمعتي عنها لان انا سميتها :p :)

mantovani يقول...

تحياتي يا استكانة

كل اللي اقدر اقولة لج

انج تحمدين ربج على هالنعمة اللي انتي فيها

كل الاعراض اللي انتي فيها تدل على راحة البال

الف ماشالله عليج
و انشالله اشوفج باحسن حال

تحياتي

مانتوفاني

esTeKaNa يقول...

بصمة منارية
~~~~~~~~~~~~~
loL!
حسافه على بنات الكويت
شنو هالظاهره المنتشره؟
الله يثبتنا بعقولنا
:)
وحياج الله هذي الساعه المباركة

esTeKaNa يقول...

Najmah
~~~~~~~
شنو الموضوع اللي شاغلني
ومنو الشخص اللي شاغلني
!!
شنو قد يكون صج اكثر من موضوع مخليني منشغله هاليومين
بس منو اللي شاغلني
مادري
!!
اذا تعرفينه قولي له يالله عاد
ترا شغلت بال استكانة
:Pp~

esTeKaNa يقول...

Dandash
~~~~~~~~~
واي ما شفتي ويهي وانا اقرا تعليقج
!!
اقرا اسم الله عليكي وحواليكي بصوت عالي
واتبووسم
جنج جدامي وتقولين لي
:))
واي بس الا النومه
واي ديري بالج على نفسج
متعوب عليج واهلج يبونج
!!
بس سالفة الدبة ثلاث مرات؟
خلاص انا من اشوف واحده دبتها مفتوحة بسلم عليها ...عاد عرفيني على طول
:)))

esTeKaNa يقول...

غصة
~~~~~
يجوز
:)

esTeKaNa يقول...

shakshaka
~~~~~~~~~~~
شكشكوووووووووو
يا علج العافية
تغطين تغطين
ولما تين تبشريني بزهايمر مبكر؟
لو غاطة احسن عن هالبشارة
:Pp~

esTeKaNa يقول...

حسافتج يا كويت
~~~~~~~~~~~~~~~~
يا زين وعد الدعاء بكل ويك اند
:)
وعسى ربي يوفقك لكل ما تحبه يارب
ويرزقك احلى من كل ما تتمنى

esTeKaNa يقول...

TWeety
~~~~~~~~~
ياهلا وأمية هلا
من وين طالعه هالشمس علينا؟
صج صج صج انا ولهانة عليج
:***
تهقين جذي؟
هاااا تويتي
اشوفج تكركرين
لا يكون انتي عاشقه ومفلسه وسويتي اسقاط علي مثلا
:Pp~
بس سالفتج صج صج
ههههههههههههههههههههههه
موتيني من الضحك
يا بعد قلبي قلبج
احتريتي عبالج سيارتج؟
عيل اقولج انا اول امس طلعت ويا امي من سوق شرق وامشي واميتي وراي
لفينا كل المواقف نسيت وين صافطة
وامي عيزت تتحطلم
ياربي مادري شهالخداي
:(

esTeKaNa يقول...

يعقوبو
~~~~~~~
لا قول قول
انته في حمايتي
احتاج اعرفه واسوي معاه تعاون مشترك لحل هذه المشكله
:)

esTeKaNa يقول...

Violinist-q8
~~~~~~~~~~~~~~~
مشالله
يعني من بنات افكارك؟
شي جميل
!
ومنكم نستفيد
:)

esTeKaNa يقول...

مانتوفاني
~~~~~~~~~~~~
وي يزاك الله كل خير ما قصرت
انا اشهد اني بنعم كثيرة
الله يعيني على شكر النعمه
!
بس ما اخفي عليك
بالي مشغول بجم موضوع هاليومين
:)
الله يوفقك يارب ويحفظك

غير معرف يقول...

ههههههههههههههههه كله صوب والسلام على يدج بصوب

يا استكانة اشكرج شاركتيني السؤال :( انا لما اركب السيارة رادة الديرة اقعد اوسوس: سكرت الجولة؟ قفلت باب شقتي؟ ما استبعد اكتفي بردة الباب واسحب جنطتي واخلي بيتي مهيت

تهقين السبب المشاغل؟ :(

esTeKaNa يقول...

anon.
~~~~~~
ايوااا
استكانة لها ولايف
اثاري الحاله منتشره
:Pp~
وي اسم الله عليج الرحمن الرحيم
انا اقول مشاغل
وقلق مرات
وتوتر قد تكونين تحاتين شي
!!
الله يثبتنا
حسافه علينا والله
:)

Q8i Blogger يقول...

:O

اشفيج ؟؟؟؟؟


وتره معلق آخر واحد عشان متفائل مايزعل :)

5roofa يقول...

لوووووووووول اهم شي اني اسال انا راده ولا لا و انا ارده

اقول الي ماخذ عقلج خل ادور عقلي اول

والله شكله عقلي ضايع مع عقلج لوووول
:P

salamz sis...

DiLLi O MiLLi يقول...

يالله حســن الخاتمـــة

هههههههههههههههههههه

:)

ARTFUL يقول...

ما تحبين الجاي!!!
عيل انتي ناقصج شي بالدنيا

وشولن ما اعرف الحب عدل بس اعرفه بشكله الصحيح ،، شلون ما اعرف الحب وعندي مرتي حبيبتي أم الليييل.. ما تحب أناديها بهالاسم تقول أحس جني واحد من ربعك

لوووول يحليلها

لا تشربين استكانة جاي من ايدها ولا اذا قالت تبي اسويلك جاي كبس

يااااااااااااااه دنيا ثانيه اختراع خطير من مرتي بس عجييييب

موفقة خيتوو

=)

Fahad Al Askr يقول...

حبتين بنادول نايت، وتدهني بفكس ونامي بدون تكييف، هذه عوارض انفلونزا حادة

سؤال صج انتي مخدية مثل ما قال حلم جميل؟

جارة القمر يقول...

مساج الله بالخير

:)

و مات؟

:p

انا امي تقول لي مكود

يعني الخداي مكود فيني

طبعا تيني حالات خداي الله لا يوريج

بس ترى فترة و تعدي

و مو شرط يكون اكو سبب لهحالات

مرات من الهدوء و الفراغ المفاجا تيي هالحاله

:)

عموما سلامات سلامات

كبرنا بناخذ زمنا و زمن غيرنا

:p

Selezya يقول...

شفيج؟

فريج سعود يقول...

ازمة وتعدي واذا ما عدت عندي لج خوش دكتور يداوم باخر مستشفى في منطقة الصباح الصحية

charisma يقول...

يا صبااح الفل

هههههههههههههه
هههههههههههههههههه

مت ضحك
ااااخر ابدااع انتى
اهم شى صلى الله عليه وسلم
ههههههههههه

والله احفظج على هالفوق تحت
تثبتيييي يا روح ما بعدج روووح

:**

`~MnO YeNSa! ~` يقول...

سمالله عليج
سمالله عليح
....

أللي واخد عألك :P

اما لما قلتي
صلى الله عليه وسلم
فصلت من الضحك
:P
يا حلوج
:*

و اسفة على الـتأخير

هالبوست دمه خفيف مثل صاحبته :*

عثماني يقول...

التركيز يا استكانة التركيز و انا اخوج

بوست ممتع

باغي الشهادة يقول...

funny

:-)

Sn3a يقول...

امبيه انتي ماتدرين انا مليون مره سرحت اليوم
وارد على اشيا ما انسألت عليها
واقول اشيا بدون موضوع!

اثاري كلنا جذيه

صلى الله عليه وسلم ها
انتي وين كنتي حزتها لول

الله حفظج الحمدلله من الجيب
ديري بالج كلشي ولا تسرحين وانتي بالسياره اسأل مجرب


لول اتخيل شكل اليهال واهم يأشرون

المسجات مثلي بالضبط
والمشكله اعصب عالعالم
شفيكم ماتردون
ولا ابوز عليهم
واخرتها يوروني المسج بالدرافت


سالفه المدرسه
مقلب!


يعطيج العافيه استكانه

esTeKaNa يقول...

q8i-blogger
~~~~~~~~~~~~~~
مادري اشفيني
!!
ادعي لي يرجع لي تركيزي
محتاجة باقرب وقت ممكن
:)
ومتفائل ما يزعل
بس يخاف عليك احد ينضلك
عساك الاول بكل شي قول امين
:)

esTeKaNa يقول...

خروفه
~~~~~~~~~~
عاشو اللي مضيعين عقولهم عاشو
:Pp~









Dilli o milli
~~~~~~~~~~~~~
تتضحكين دلي هااا؟
ادعي لي بس ربي يثبتني بعقلي ترا الحالة كسيفه
:)

esTeKaNa يقول...

artfull
~~~~~~~~~~
تهقه ناقصني شي؟
انا معوضته بحب القهوة والتلذذ فيها
:)
يا زينها ام الليل يا زينها
عسى ربي يحقظ زوجتك الغاليه
ويسعدكم دوم ويتمم عليكم
واي انته تتحلى عليها وعلى جايها
وانا مستانسه والضحكة من هني لي هني
!!
حسيت اني سعيده لسعادتكم
الله يحفظكم يارب

esTeKaNa يقول...

فهد العسكر
~~~~~~~~~~~~
معقوله؟
فهد العسكر عندنا؟
شكرا لنصايح الشياب اللي ما اقدر اسويها ابد
وتسئلني انا مخديه؟
مادري
اسئل حلم
واسئل ضميرك
:pP~

esTeKaNa يقول...

جارة القمر
~~~~~~~~~~~~
ياهلا بالقمر وجارته
:)
مكود؟
عيل الوالده ما شافتني بالفتره المنصرمه
وترا تعبانه على كلمة منصرمه
:pP~
جان قالت لي خداي يمشي على الارض
:)
واي عليج الله لا تقولين كبرنا
عيدميلادي عقب باجر
ومتأزمه
اي شي له علاقه بالعمر
صاير يكدرني
ديري بالج تضيقين خلقي
:(

esTeKaNa يقول...

selezeya
~~~~~~~~~~~
:(
مادري







فريج سعود
~~~~~~~~~~~~
ان شاء الله تعدي
بس شدراك ان هالدكتور زين؟
مجربه؟
:Pp~

esTeKaNa يقول...

Charissma
~~~~~~~~~~
يا مسا الورد
يا صباح الهنا
:*
يا زينج ويا زين ضحكتج عندي
ادعي لي يا كريزما ادعي لي
ترا توني صغيره ما قمت اثبت حسافه علي
:Pp~

esTeKaNa يقول...

MNO yaNsa
~~~~~~~~~~~
ياهلا ويا مرحبا
:*
هااا صديقتي؟
ضحكتي علي؟
عيل عقب هالضحك ادعي يرد لي تركيزي وعقلي...ابي ارد ذكيه
:Pp~

esTeKaNa يقول...

عثماني
~~~~~~~~~
تو ما تبارك البلوق
!
اي والله التركيز
وصج محتاجته
:(
عاش من شافك
:)

esTeKaNa يقول...

باغي الشهاده
~~~~~~~~~~~~~~
شكرا
:)








سنعة
~~~~~~~~
لله يعافيج
ويثبتج بعقلج ويثبتني
حسافه علينا ياالسنعه
لازم نسوي فورمات باقرب وقت
:))