الثلاثاء، أبريل 29، 2008

HapPY BairthDay

.
.
.

.

.
.
.
.
30/4/2008
سنين تمر
وبالفرح دنيتنا تزهر
وكل عام واستكانة تكبر
والحب في روحها يزين ويظهر
.
.
.
عشرين..ومعاها اربع سنين
غريب..كيف هي ترحل السنين
!!
.
.
.
في شارع العمر
على تقاطع الألم والأمل
وفي بداية مسيرة الانجاز
وبالقرب من الفرح
اقف هنا
!!
التفت لماضي سنيني وابتسم
وامد يدي لروحي وأصالحها
احتضن كل مشاعرها
وأقدر كل نبضات قلبها
واعتذر لها مني
من قسوتي عليها
ومن جفائي المتكرر نحوها
نعم...أعتذر لنفسي مني
أنا التي كثيرا ما عذبتها بقسوتي عليها
بتدليل الجميع سواها
وبتحمليها مالا تحتمل وتطيق
فهل تقبلين يا روحي الجميلة اعتذاري لنبدأ معا عمر جديد؟
.
.
.
أجمل احساس هو ان تتصالح مع روحك
ان تصافح جروحك
وان تبتسم وتتأمل بغد مشرق وجميل
!!
غد يحمل معه احساس آخر
وتفاؤل جديد
غد يحمل معه تغيرلكل ماهو جميل
.
.
.
أحيانا..نحن نحتاج ان نتأمل حياتنا من بعيد
ان نتصفح احداثها،ونتحسس على اهم ما فيها
وهذا ما اقوم به في كل عيد
!!
كانت سنة انجاز
حصدت فيها الفرح بتخرجي من الجامعة بنجاح مميز
وحققت فيها جزء من احلامي بعملي الجديد
وما زلت في حياتي العملية أطمح للمزيد
كانت سنة حب
!!
حب ينبض في قلبي في كل حين
يجذب نحوي اطيب البشر
ويعرفني على اجمل الناس الطيبين
أولئك الذين وجودهم يزين وقتي
ويشغل حياتي بالفرح
.
.
ولكل اسم جديد في حياة استكانة
وكل اسم زين بالحب مدونتي دون حصر او تعديد
شكرا من اعماق روحي لكم
شكرا لكل من فرحني بكلمه
وتفاعل مع احساسي يوما
شكرا ....للمدونة التي جمعتني اربع سنوات معكم
انتم ثروة من صدق..رزقني الله بها
.
.
.
أنا سعيدة
!!
بنفسي...بانجازاتي البسيطة..وبأسرتي الطيبة
أنا راضية..عن كل ما املكة وما لا أملكة
وقنوعه بكل تلك النعم التي رزقني اللهم بها
اللهم بما أنزلت علي من خير فقير
!!
...طموحي
أن يتم قبولي في الماجستير شهر ستة القادم
أن استقر بوظيفة جيده
وان استقر مع روح تخاطب روحي وتحفظها
وأحلامي
لا حد لها ولا حصر
.
.
.
.
لا ما انتهيت
توي معك يا أجمل العمر ابتديت

هناك 118 تعليقًا:

Q8i Blogger يقول...

عؤبال مليون سنه :)

وانا الأول

عليج الهديه .. مو علي انا

esTeKaNa يقول...

q8i blogger
~~~~~~~~~~~~~

يا فرحتنا فيك
عساك دوم اول بكل شي
:Pp~
ويقولك الهديه اللي تي من اول واحد شي غير نمونه
SO
أنا ناطرة هديتك
:)

esTeKaNa يقول...

ملاحظة
~~~~~~~
لقراءة البوست القديم
كلك على التواريخ في بداية البوست

وشكرا
:)

someone_q8 يقول...

السلام عليكم
كل عام وانتي بخير ان شاء الله
وفالج الجنه ان شاء الله
واتمنى لج حياة سعيدة اختي بكل وقت وربي يحفظج من كل شر

سالفة قلب يقول...

يــاعيــد قلبي .. صاحبي عيد ميلادك
"العمـــركله" لــك .. فرحه وشرحه ..
عساني حي .. وأحضر كـــل أعيادك
واهديك وردات الـــغلا فوق صرحه
ازداد عمــــرك .. صح!.. لكنه ازدادكفي خافقي لك بالـــغلا ألف صفحــــه

:*

Purgatory يقول...

كل عام و انتي بخير :)

الزين يقول...

ليش خنقتني العبرة

هاااو شفيني وايد صايرة عاطفية
تحسيني وانا لامتج الحين

تحسين شكثر قلبي يحبج ويغليج
تسمعينه شيقول

هذا مو عيدج انتي بس
بعد عيدي انا
وجودنا في حياتج هو مكسب لنا
اللحظة والدقيقه والساعه اللي اقضيها هنيه او معاج في مكان ثاني تعني لي عمر
بس عمر جديد مو مثل اللي طاف
شي ثاني
شي تارس قلبي ومعبيه احساس بالرضا
شي يقول لي ايه عندي استكانه اقول لها
شوي بشوفها
شوي بسولف معاها

الضحكه اللي اضحكها معاج
الكلمه
السالفه
البوح
الذكريات
الأمل
الإنكسار
حتى الحزن والصدمات

كلهم لهم وقع آخر بنفسى وأنا وياج

سولفنا اذا فصلنا
ضحكنا على اشياء محد ممكن يضحك عليها الا انا وانتي

خواطرنا اللي تلتقي من غير موعد
وقلوبنا اللي دايما تتلاقى على الوعد

وكلام وايد
وايد
يمكن لو اقعد اسولف فيج ما اخلص

حكاية غرام
:))))

يمكن
بس الأكيد الأكيد
ارواحنا تآلفت وتحابت بالله

ربي لا يحرمني منج يارب

:****

ARTFUL يقول...

ماشالله تبارك الرحمن

عيزت بنيتنا عيزت
;p

كل سنه وانتي الى الثلاثسن أقرب
;p

الله يطول بعمرج ويرزقج الصحه والعافيه والسعاده والرضى

أهم ما على الواحد يكون راضي عن نفسه سعيد وقنوع وبنفس الوقت طموح

ولا تخقين العمر جدامج وتوج بأول الطريج ركبتي أو دريه

يمكن توجهج بعض الصعوبات بس صدقي اخييج كل شي بالهمه والعزيمه يتغير وكل شي تحصلين له بديل

وانشالله تنقبلين ببرنامج الماجستير ونشوفج دكتوره أد الدنيا تدرسين عيالنا

والشي الحلو اللي عجبني بعيد ميلادج انج ذاكره شسويتي من انجازات وتفتخرين فيها وهذا بحد ذاته انجاز

واذا تبين هديه مني روحي مجمع جاليري 2000
اللي يم بلازا السالميه فيه محل يبيع جاي غير نمونه
كل اللي يخطر على بالج،، الجاي عنده أشكال وأرناق

بس لا تيربين كل شي ترا الجاي مهو مسؤولية
;p

ثلاثة وعشرين ونص سلام وحتتته=24

=)

New Bride يقول...

الف مبروك و انشالله نشوفج محققه كل احلامج و كل اللي تبينه

charisma يقول...

يسلم قلبها والله
:**

كل عاام وانت بالف الف خيير وصحه وعاافيه

وان شااءالله اتحققين كل اهدافج وتوصليين للى تبيينه

والله لا يحرمنا منج على مر هالسنين يا استكانه

وسنه حلوه يا جمييييل

:**

MnO YeNSa يقول...

كل عـــــــــــــــــام و انتي بخير يا رب

:***
لا لا لا ... استكانتنا كبــــــــــــرت
:p
ياحلونا لما نكبر
و انتي فاهمتني عدل
:p


WHAT WAS YOUR WISH ?

tadreen 7a6ait alarm mobile o
ga3dni :Ppp

سنة حلوة يا جميـــــــــل
:P
يا رب كل اللي تتمنينه و فيه صالح لج ينكتب لج :**

يوم(ن) جديد
يوم(ن)لاستكانة بالفرحة يزيد
هو لج عيــد
ولنا و اصحابج عيد سعيد

نحتفل ويـــاج بامل
نلقاج بوصل
وياج نشوف احلام(ن) تكتمل
وانظـــل بيومج احتفل


استكانه ..
نورتي بحروفج سوالف هالديرة

انتخابات و خداي و مشاعر قلب بالوصف كبيرة

وتراج بالعمر توج صغـــــيرة

عيشي حياتج و انجزي والامل فيج بعد هالانتخابات بمنصب وزيرة

و يعل تنور حياتج فيج و لنا
و تظلين بويوه البشر و احبابج المنيرة

Najmah يقول...

استكاااااانة
الله حتى انتي شهر 4
ونااااسه :))
كل عام وانتي بخييير
كل عام وانتي فرحانة وسعيدة
كل عام وتزيد نجاحاتج
كل عام وتكبر انجازاتج
كل عام وانتي صديقتنا الغاليه الحبيبة
الله يوفقج بكل خطوة
ويكتب لج التوفيق والفرح بكل لحظة
استانست انا بهالبوست
تفاءلت خير بامتحاني اللي بعد شوي :)
دعواتج
وعسى كل ايامج حب وسعادة
:**

Purplecious يقول...

كل عام و انتي بخييييييييييير

:*******

واو استكانه خوش فكره البوست لنك حق كل سنه
:))

بس عاد شوفي

حدج لمّا السنه اليايه و بسسسسسسس

يوقف العداد عند هالرقم

هههههههههههه

يا رب يوفقج في كل خطوه بحياتج و يسعدج و لا يحرمنا منج و نحتفل فيج كل سنه بخير و صحه و عافيه

على فكره

رشحتج وزيرة للتربيه عند تويتي

بس اخذي الماستر أول بعدين نعينج بالمنصب
ههههههههه

:**

Expatriate يقول...

:)
يا ابن آدم إنما انت أيام
فإذا ذهب يومك ذهب بعضك

وفي كل سنة يذهب بعض عمرنا
جعل الله اعمارنا وايامنا طاعة له وسبلا للقرب من الجنة والبعد من النار

والواحد مايدري وين الخير له بهالدنيا
فاللهم ان كان في امانينا خير لنا في دنيانا وآخرتنا فسخرها لنا وان كان في امانينا شر لنا في دنيانا وآخرتنا فجنبنا اياها واصرفنا عنها

ShLaLaT يقول...

تنطفأ الأضواء وينورنا وجه استكانه

يتبدد الحزن وتنرسم في الوجه ابتسامه




كل عام وانتي بخير يا الغاليه
مهما تنوعت الاستكانات تبقين استكانه مميزه
سواء بطعم كلامج الناطع او بريحه النعناع بمرحج


رويتينا 4 سنين من جويهتج وما شبعنا
ومنو يشبع منج ؟؟


اليوم يومج
استانسي وونسي اللي معاج .. سوي شي ما سويتيه من قبل .. حسسي روحج ان هاليوم غير


يا عسى احلامج كلها تتحقق
وطموحاتج توصلينها


الله يحفظج ويطول بعمرج

وهديتج مطارة جاي .. شتبين بعد ؟؟
آمري وتدللي

عقبال ال100 سنه ان شاءالله

Barrak يقول...

الف مبروك

ليش فرحان انا

التفت لماضي سنيني وابتسم
وامد يدي لروحي وأصالحها

عساج دوم على هالحال
متفقه مع نفسك

وعسى امالك البسيطه تتحقق

قولي امين

سدرة العشـــاق يقول...

كل عام و انتي بخير و صحة و سلامة و عسى الفرح و السعد فالج ان شاء الله

و الفال لما تفرحين بأعياد ميلاد عيالج ان شاء الله

حافظج الرحمن

: )

DanDash يقول...

أربع سنين انتطالع بالعيووون تم تم
تم
أربع سنيييين معاج بالقلب اقرأ
كلماتج و اتردد بالمشاركة
أربع سنين و أتابعج و اشجعج و أفرح لفرحج و أفخر فيج
أربع سنين و أتمنى من قلبي أنه ربي يحفظج و يخليج لأهلج

أربع سنين تعرفت فيها على نموذج لفتاة يشرفني انه فيه وحدة كويتية مثلي تكتب بهل الأسلوب و ينشر عن بلوجها بالجرايد

أربع سنين تشرفت فيها بمعرفتج و بكل سنة حسيت أني أعرفج صج

استكانة اقول لك مثل ما كان الغالي يقولها لي في عيد ميلادي
واقولها لج بعيد ميلاد البلوج و عيدج بعد
عساها هدد مو عدد

وعسى ربي يرزقج كل الي تتمنيه

الخيلاء يقول...

كل عام و انتي بخير
كل عام و استكانه اجمل و ارق
كل عام و احلامج اتحقق
كل عام و ربي معاج و يوفقج بكل الي اتمنينه

كل عام و انتي تتحفينا بهالابداعات

و ان شاء الله السنه اليايه نحتفل مع استكانه الكبيره و الصغيرونه
:Pp

5roofa يقول...

واااااااااي كلللللل عااااااااااااام وانتي بخيييير

وناااااااسه

حلاته استكانه لول طلعتي اكبر مني
:P

يارب ايامج كلها فرح و سعاده و حب
و تحقق كل امنيااتج يااااااارب

و نفرح فيج عروسه
:D

salamz sweet sis...

دلال يقول...

كل عام وانتي بألف خير يا أنطع استكانة جاي شربنا سواليفها

=)

joy يقول...

حادي بادي يويو
حادي بادي يويو
حادي بادي استكانة
حادي بادي يويو




الله لا يحرمنا منج ولامن جويهتج المخدرة
يا أحلى استكانة

محـــــارة يقول...

كل عان وأنتي الحب هلاااااااااا مشتاقتلج حدي ابيه ياني ولهانه عليكم وله مو طبيعي وولهانه عليج بشكل مينون درجة ينون المرشحين ومفاتيحهم

وربي صدقتي بكل كلمه عن المرشحين اقول مري مقري الانتخابي ماغيره خبرج وعلمج الي داخل البحر وشوفي أخر تحلطمي وبرامجي الانتخابيه

والمرشح الي مات من البجي إذا ماخانتني الذاكره خيو لطلال السعيد ولفجر السعيد صاحبة القناة إياها .. الفصله صج لما قال الكرسي مابيه ايبهم للورعان بدوار الجهراء يتمرجحون عليه

أنا اهني مت ضحك .. الأخ طيب وحبيب بس كلش مافيش نظره سياسيه خلك بعيد على أن غيرك مو احسن منك تدرون ليته يوصول خل نشوف شراح يصير خو كلها فرحه لهم

U-Turn يقول...

كـــــــل سنه وانــتي واستــكانه بخيــر

كــل سنــه واستكـــانه منــبع خيــر:)

كــل سنـــه واستكــانه مفــروشه بوردونــوير

كـــل ســنه وحنــا فيهــا متيمعيــن ان شــاء الله

وما ننحـــرمش منكـــوو

وســلامتج :D

جارة القمر يقول...

تمر سنين
و تبقين انتي الاميره
تنتصر الابتسامه
بعد ما كانت اسيره

استكانه

امنيتي لج مختلفه عن اللي تبينا ندعيه لج

امنيتي لج اهي الفرحه الكبيره

و مو بس اليوم ادعي لج

مر علي فتره و انا ادعي هالدعوه لج

و ان شاء الله ربي يتقبل دعوتي

استكانه

جد

انا احبج

:)

7osen يقول...

كل عام وإستكانة بخير

وكل سنه وإنتي راقية وشفافة ومحبة وعفوية

إستكانه بكل صراحة أي واحد مر بلوقج وتعلق فيه وقرا كلامج
أكيد بالتأكيد حسج مثل أخته

أي والله

هذا أحساسي أنا

إنتي إنسانة حيييل مميزة
وطيبة وأخلاقج عالية

الله يوفقج بحياتج إن شاءالله ويرزقج ببن الحلال إللى يسعدج

وكل عام وإنتي بألف الف خيييير

ولد الديرة يقول...

سبحان الله
!!

توني كاتب لج رد في صفحتي السوداوية عن ضرورة انج تقعدين مع نفسج
!

هممممم

يا انا ساحر يا انتي ساحرة

او حلم ساحر

وحدة فيهم

المهم

كل عام وانتي بألف خير وصحة وعافية

عئبال ما تصيرين قوري و اتيبين لنا بيالات صغار منقطين :P

حلم جميل بوطن أفضل يقول...

الحين عيد ميلادك و لا ميلاد المدونة؟

و إن شاء الله تنقبلين بالماجستير و تسكرين مدونتك. مضايقتني نفسياً وايد

و على طاري الماجستير ،، ما قلتيلي شلون يسوون الشاي المغربي؟

لازم تحطين حد لهالتساؤل. يا تجاوبين يا تزفيني

:)

كل عام و أنت بخير

Eng_Q8 يقول...

كل عام وانتي بخير

ولج طولة العمر انشالله

آمار يقول...

كل عام وانتي بخير
:)))))))))))))

Shather يقول...

كل عام و انتي بخيير :}}

و ان شاء الله عمر مديد في طاعه الرحمن

3eZZoW يقول...

Happy BirTHday estekana :) ya a6yab galb o a7la qalam .. 3asaha senat afra7 .. tartheen feeha rabech o roo7ech o ghairech ...

wenshalla kel elly tabeena to9leenlah .. o allah ywafgech enshalla .. testahlain kel khair :D


Kel 3am wentay eb khair

حسافتج يا كويت يقول...

يا حلوج واللة ويا حلو عمرج

وربي يخليج يا رب وكل سنة وانتي بخير وتحققين كل امالج

وتكبرين وتصيرين بدال الأستكانة مق

باغي الشهادة يقول...

بداية التدوينة قلت: مشاعر فتاة تتكرر مع كل وحدة بكل يوم ميلاد ولن أقرأ جديد، لكن بأسلوبك الأخاذ واسترسالك بفيض عواطفك.. لا أجامل بمدى تأثير كلماتك فيني


أبارك لك بتلك المشاعر والحس الوجداني بالرضا والإنجاز والتفاؤل

mtfa2el يقول...

يه يه
كل عام و انتي بخير ..و منها للأعلى
قصدي العمر كله و صح همن منها للأعلى بشغلج
صدفة اني اكل كيكة و فجأة ادش بلوقج و القاه عيد ميلاد همن
يالله دام جذي مسامحج بالكيكة مو لزوم بس اذا اصريتي ما عندي مانع و همن مو لازم تكون كيكة يعني لو كرتون سينابون ككاو همن راضي
لحظة الحين انا اللي اييب ولا انتي ؟
لا لازم نسوي شي استثنائي يعني بمناسبة عيد ميلادج تييبيلي سينابون ..نقدر نقول فكرة يديدة
و وين اتفاقنا انج تمسحين تعليق
Q8i Blogger
:(

violinist_q8 يقول...

كل عام وانتوا بخير
وعقبال ماتكتمل الفرحه بالماستر والدكتورا

عبدالرحمن يقول...

كل ماكتبت تعليقي ينمسح :(

الف مليون ورده لج في هل يوم مناسبه الجميله

واتمنى من الله ان لا يحرم كل عام قادمن من استكانه

فانتي التي تثرين السنوات
فيابختها فيج

كل عام وانتي بخير

والله يحققلج كل ماتتمنين واللي ماتمنيتيه بعد من خير

اميره التدوين

واميره التعبير


قاعد احاول اوصل حق مستوى رقي تعابيرج بس ماقدر

كل عام وانتي بخير

والله يحفظج

qesat_5ayal يقول...

كل عام وأنت بخير

فرحانة لأجلك

غصة يقول...

:)

حلو شلون تكلمين نفسج و تراضينها
كل عام و إنتي بخير

قلب طفله يقول...

HapPY BairThDaY

(( esteKana ))

كل عام و انتي بخير و سعاده

و عسى عمرج طويل على طاعة الله

ربي يوفقج و يسعدج بكل سنه

تدخلينهاو كل خطوه تخطينها بحياتج

و تمين استكانه المحبوبه من الجميع

دمتي بسعاده

غير معرف يقول...

صبا الخير
صباح الورد
صباح الحب
صباح العاد اليديد الي اتمنى انه يكون اسعد من العام الي قلبه


كل عام وانتي بخير وكل عام والعمر يمر باحلى ايامه وذكرياته

سعيده حيل انه هالسنه مرت بمعرفتي فيج
وسعيده اكثر اني متاكده انه هالسنه بتزيد معرفتي فيج وبحبج اكثر بالله لانه معرفتج من ذهب

اتمنى انه الله يوفقج ويعطيج على قد نيتج
وتستاهلين كل خير يالغاليه

happy birthday
:***

magnoonah

ARTFUL يقول...

حلم جميل بوطن أفضل

كلفتني استكانة جاي حاجم اني أجاوبك

تصدق البارحه عرفت شلون يسوونه

طبعا على حسب القوري،، بس على مقياس قورينا بالبيت ويفضل يكون قوري صيني ((فخار ملوت الدوّه عرفتهم؟؟))

يكون متوسط الحجم
قفشتين جاي أخضر أصلي
مع خمطت نعناع فريييييش
الخمطه تقريبا على قد جف الايد
كثر شوي يعطي طعم أحلى

وخله يخدر واستمتع

شكرايا

=)

بنت الشامية يقول...

كل سنه وانت طيبه

والله يوفقج ويحقق لج كل امنياتج
وبرضى والدينج ومحبة اخوانج وخواتج
اللهم امين

فريج سعود يقول...

كل عام وانتي بخير
وعقبال ما تكبر الاستكانة وتصير مطارة
بس مطارة حلوة
مخصرة
ام نقطة حمرة

غير معرف يقول...

:")
كل عام وانتي بخير وانتي الى الله أقرب
اسمحيلي لو انها متأخره اليوم
خلصت امتحانات المد تيرم -_- !
الله يوفقج يااااااااااارب ..
ويحقق لج كل اللي تمنينه ..
مثل ما أنتي سعيده بانجازاتج انا سعيده لأنج انسانه راضيه بحياتج
وفخوره بانجازاتج .. عسى الله
يزين حياتج قولي آمين ويرزقج كل خير
:"D
فديت الناس الطيبه والله
* Simple

SHAHAD يقول...

كل عام وانت بخيير
وعسى أعوامج كلها سعادة وحب
وعؤبااال مليوون سنة
أهم شي إنج راضية عن نفسج وعن إنجازاتج وحياتج
ربي يبارك لج بكل خطوة تمشينها
وربي يحقق لج كل أمانيج وأحلامج : )

Sn3a يقول...

كل عام
واستكانه بالف خير
ومدونتها بالف خير

حروفج متنفس لنا
تشمل كل شي
باساليبها البسيطه
وكلماتها الخفيفه
وقيمها الثقيله

حبينا كل بوست
وراح نحب كل بوست قادم

يعطيج الف عافيه
والى مزيد من التوفيق
والنجاح
والرضى

حلم جميل بوطن أفضل يقول...

آرتفل

طلعت أحسن من بعض الناس. بس مو هذي الخلطة يا حلو. هذا خلطة الشاي الأخضر بالنعناع العادية. و نصيحة لا تغلي النعناع لكن ضيفه على الشاي الأخضر في الغوري بعد ما تخلص غلي

الشاي المغربي في دارسين. و يطول على ما يسوونه. مادري شلون يخدرونه

بس إستكانتكم طلعت إستكانة أم نقط زرق. مو شي

:)

على العموم شكراً على المحاولة

شباب الكويت يقول...

ماهي دعايه ..

ولاهو تصريح ..

اهي .. كلمة حق

بقلم / شباب الكويت

عطها من وقتك دقايق ..

وجانها عجبتك ..

انشر ولك الاجر .. ان شاء الله

http://binghayir.blogspot.com

صقر قريش يقول...

أربع وعشرين سنة في طاعة الرحمن إن شاء الله الله يعطيج على قد نيتج إن شاء الله ويوفقج ويرزقج ولد الحلال وإن شاء الله الماجستير والدكتوراه بحيل الله كل عام وأنتِ إلى الله أقرب .

على نفسها جنت براقش يقول...

كل عام و انتى بخير

ترى الكوب اللى خرعك كسرناه

:P

esTeKaNa يقول...

someone-q8
~~~~~~~~~~~~
وعليكم السلام ورحمة الله وبركاتة
:)
وأنته بخير وصحة وسلامة
وفالي وفالك الجنة يارب وكل سعادة
شكرا لمرورك العاقل دائما
الناصح بصدق
فعلا..مرورك جميل اخي العزيز

esTeKaNa يقول...

سالفة قلب
~~~~~~~~~~~~
سالفة قلبي
وصديقة روحي
يا من اتخاطب معها باحساسي
واستلذ معها بالكلماتي
شكرا لوجودك الارق في حياتي
شكرا لهذا العمر الذي ازاداد جمالا بووجودك فيه
صديقتي العزيزه
واختي القريبه
..بصراحة
مفاجأة معرفتك كانت من اجمل ما مر في سنتي
:**

esTeKaNa يقول...

purg.
~~~~~~~
اخي العزيز
صديق مدونتي القديم والمتجدد دائما
وانته بخير وصحة وسلامة
على فكرة
!!
انته ممن كنت متواجد دائما بالقرب من استكانة من سنوات
شكرا لوجودك الجميل
:)

esTeKaNa يقول...

الزين
~~~~~~
الزين خنقتها العبرة
واستكانة استسلمت لعبره فرح
وفتحت ايدها
وقلبها
للحبيبة القلب الزين
:**
زيون
يا صاحبة القلب الارق
والمشاعر الاصدق
يا اروع واجمل من عرفت
السوالف طعمها وياك غير
أنا لي شفتك أحس إني بخير
:)
فعلا احس اني بخيروانا ارتشف معك الامل
الحب
الاحساس
اشعر بالراحة وانا انطلق معك بكل حديث دون تفكير مسبق
دون مونتااج لما يقال وما لا يقال
ودون اي خوف مما قد يتكون في نفسك علي

!!
..زيون
اثق بنظرتك
اثق برايك
واحب وقتي الذي اقضيه معك


الله لا يحرمني منك
ولا يحرمني من وجودك الجميل في حياتي
ويحفظك لكل قلب يحبك
ويرزقك كل السعادة في الدنيا والآخرة يارب
:***

esTeKaNa يقول...

artful
~~~~~~~~~
ياهلا ويا مرحبا باخوي العزيز
لا تقوووول عيزت لو سمحت
!!
البارحة تسئلني بنت عمي الصغيره تقولي جم عمرج
قلت لها 24
حطت ايدها فوق راسها تقولي:
اوللللللللله
!!!
تخيل احساسي
:Pp~
وانته بخير وصحة وسلامة
وشكرا على الهدية واصله واصله
عاد تصدق؟
صج اسمي استكانة
بس انا مدمنه قهوة
!!
اخوي العزيز
وصديق مدونتي الغالي
الله يحفظك،ويحفظ ام الليل
ويدوم عليك السعادة دنيا وآخره
ويرزقك اجمل واكثر من كل ما تتمنى
:)

ManalQ8 يقول...

كل عام وانتي بخير


:)

صقر قريش يقول...
أزال المؤلف هذا التعليق.
فراوله يقول...

مساالورد والجوري
غاليتي الحبيبه
كل سنة وانت احلا
وكل عمر وانت اسعد
وكل عام وانت بفرح مستمر
لانج تستاهلين
بالنسبه لي انا عرفت اخت
وصديقه
وانسانه بكل ماتعنيه الكلمه
من معني
فامنياتي لك بالعمر المديد
باذن الله تعالي
:***

|:| DUBAI |:| يقول...

Happppyyyyyyyyyyyyyyy Birthday

o Kel 3am o Enty eb5air ya 7elwa

: )

!!

esTeKaNa يقول...

وانتم بخير وصحة وسلامة جميعا
تعليقاتكم الجميلة كانت اروع ما حصل في يوم عيدميلادي
!!
يوم العواصف والغبار
وصراحة...كنت قد توجست من ان يكون هذا الغبار والعواصف كناية عن بداية عمر مغبر بعواصف وزوابع
:Pp~
نظرا لبطئ اشتراك الانترنت عندي فانا غير قادرة على الرد بشكل شخصي على كل تعليق
فكل ما اكتب تعليق ينمسح بمجرد ان ابعثه
!!
ساحاول ان ارجع في اقرب وقت للرد على الجميع
ومرة اخرى
الله لا يحرمني منكم جميعاااا
:))

مُحَسّدْ يقول...

كل عام وانت بخير
سنين الشباب جميلة .. لكنها عصية على العودة

وعاد في طلب المتروك تاركه
إنا لنغفل والأيام في الطلب

3ateeja يقول...

كل عام وانتي بخير
وهالله هالله بمرشحاتنا
ما اوصيج عليهم
ولا مالت الصالات الرياضه
:P

hamdool يقول...

Happy Belated birthday ..
وإنشالله العمر كله

KeChie-ChaN يقول...

كل عام و إنتي بخير ;*
: )

esTeKaNa يقول...

chrissma
~~~~~~~~~~
يا بعد روحي انتي يا جسر المحبة
وانتي بخير وصحة وسلامة يارب
:**
والله لا يحرمني منكم العمر كله
ياصديقتي الجميلة انتي








new bride
~~~~~~~~~~~~
الله يبارك بحياتج
امين واجمعين يارب
:)

esTeKaNa يقول...

mno yensa
~~~~~~~~~~
يا الله شنو هالكلام الحلو
!!
فاجئتيني برقه احساسج
وملكتي احساس استكانة بذوقج واخلاقج
يصير اطلع من هالشاشه والمج؟
:))
والله والله
ماني لاقيه كلمة مناسبه تعبر عن احساسي وفرحتي بكلماتج
واحساسج
الله لا يحرمني منج
ومن رقه وجودج الصادق بحياتي
:**

esTeKaNa يقول...

najmah
~~~~~~~~
نجمة الاحساس والمشاعر
وانتي بخير وصحة وسلامة
امييين واجمعين يا اطيب نجمة
وبشريني اشلون كان امتحانج؟
دعيت لج من قلبي بس قريت هالكومنت
!!
والله احس بالتقصير اتجاهكم
اتجاه حبكم الجميل اللي غمرني ورد روحي
:)

esTeKaNa يقول...

purplecious
~~~~~~~~~~~~~
ياهلا ويا مرحبا بالصديقتي البنفسجية
:***
تصدقين قريت اللنكات واكركر
جنه مو انا اللي كتبت
ابيه ترا انا كبرت
:(
بس بس
راح نوقف العداد
انا كانت عاجبتني 22
بس مشالله طارت وعديتها بسنتين مو سنه بعد
!!
اووووه يا بختي شهالمنصب
بس يختج انا ماحب هالمناصب باجر استجواب واشق وحدة الصف ناس وياي وناس ضدي
:pP~
يا بعد قلبي انتي
شكرا على وجودج اللي يخليني ابتسم دايم
انتي من اطيب الناس اللي مرو علي وافرح بوجودهم
:)

esTeKaNa يقول...

expat.
~~~~~~~~
انته تدري اني فرحت يوم شفت تعليقك؟
ياهلاااااا ويا مرحبا اخوي العزيز
اشلونك؟
بشرني عنك؟
ترا قلوبنا كلها عندك ندعي لك ونتمنى انك تطمنا على صحتك وحياتك
عساك انته واسرتك السعيده بخير ان شاء اللله
:)
شكرا على مرورك العاقل
المذكر بالخير دائما
من اقدم من مر على مدونتي
ومن الناس الذين افرح بالتواصل معهم
واستفي من تفكيرهم ورقيهم دائما
الله يحفظك ويوفقك يارب

esTeKaNa يقول...

shalalat
~~~~~~~~~~~
يا هلا بشلالات الاحساس كلها
يا هلا بطيبة اختي العزيزه
يا هلا بهالتعليق وصاحبته
:*
كنت ناويه اسوي كل شي
بس العواصف والغبار صدمني
بس يالله الحمدلله ان شاء الله الياي دائما اجمل
:)
انا سعيده بك اختي الصغيره
والمدلله عندي
ترا انا اختي ادللها
وانتي بمنزله الاخت عندي
:*

esTeKaNa يقول...

barrak
~~~~~~~~
ياهلا ببراك
هلا بالمبدع
بالشاعر
بصاحب الكلمة الابسط والاسرع في الدخول للقلب
!!
امين واجمعين يارب

esTeKaNa يقول...

سدرة العشاق
~~~~~~~~~~~~~
يا بعد قلبي يا سديرة
فرحني وجودج والله
امين واجمعين ما قصرتي والله
الله يحفظ لج فتى الجبل ويتمم عليكم فرحته دوم
:)
















dandash
~~~~~~~~~~
يا مسا الفرح
يامسا الاحساس الجميل
!!
اربع سنين يا دندش؟
خلاص الحين ..انتي تعرفيني اكثر من نفسي
:)
اربع سنين يا دندش؟
واللله عمر ويا زينه من عمر
عمر جميل قضيته هنا
اكتب احساسي
انكساراتي
فرحتي
واشاركم كل مشاعري
انا سعيده بوجودك
سعيده بكلماتك
سعيده بوجود انطباع جميل لاستكانة في قلبك
دندش
كلماتك ادمعت عيني
شكرا من روحي
الله لا يحرمني من وجودكم الصادق حولي
:*

esTeKaNa يقول...

الخيلاء
~~~~~~~
ياهلا بالخيلاء والله
هلا بالاسود المزورق
هلا بخفة الطينة
هلا بالعقل والسنع كله
:)
وانتي بخير وصحة وسلامة
تخيلي استكانة صغيره؟
اول شي بعلمه استكانة االصغيره انها تكتب
!!
تخيلي عاد
يصير بلوقي كله شخاااابيط
وتبربس
:Pp~
حياج الله يا الخيلا

esTeKaNa يقول...

5roofa
~~~~~~~~
يا بعد قلبي امين واجمعين
واي لا تقولين اكبر مني
لا تقولين ولا تيبين طاري الكبر
ترا اتعسر
لوووول









دلال
~~~~~
ياهلا بدلال واللله
يا بختي بهالحجي الحلو
وانتي بخير وصحة وسلامة
:)










joy
~~~~~
واي اقرا حادي بادي
والابتسامة من هني لي هني
:)
ولا يحرمنا من وجودكم الجميييل

esTeKaNa يقول...

محارة
~~~~~~
ياهلا ويا مرحبا بمحارة والله
:*
انتي ويييييييييييييينج؟
وين هالغيبه؟
صج صج فاقدتج من غير شر
!!
عاش من شافج
وكل العمر وانتي بخير وصحة وسلامة
وصج بدع السعيد
لوووووول
لا يبليلي مقرج الانتخابي
فاقدته وفاقده صاحبته وايد
:*

Najmah يقول...

بعد قلبي والله
مشكوورة على الدعوة الطيبة الله لا يخليني
الحمدلله الامتحان سهل :))
وان شاء الله ابشرج بالدرجة السنعة
;)
مامنج قصور يا استكانتنا :*

esTeKaNa يقول...

u-tairn
~~~~~~~~~~
ياهلا وأمية هلا
الله الله
شنو هالكلام الحلو
احرجتي كل كلماتي
:)
وانتي بخير وصحة وسلامة
شكرا على مرورج الجميل
وتهنئتج المميزة جدا
:*

esTeKaNa يقول...

جارة القمر
~~~~~~~~~~~~
ياهلا بالقمر وجارته
:)
ليش دمعت عيني وانا اقرا كلامج؟
!!
يمكن لانه في صدق من نوع آخر
ويمكن لانة مصدره قلبج؟
ولا يمكن لانه في نوع مميز من التواصل بينا؟
بين كل هاليمكن
في شي اكيد
اني احبج صج
احبك الذي احببتني فيه
وجمعنا على منابر من نور
قولي آمين
:***
افرح بوجودج
وافرح بتعليقاتج
وامنيتي انج تكونين دايما بخير
ودايما يارب سعيده
:)

esTeKaNa يقول...

7osen
~~~~~~~
كل العمر وحسين بخير
حسين الاخ الغالي
اللي لما اقرا فيض احساسه
ومشاعره
اقول الحمدلله
لسه الدنيا بخير
واشوة في ناس مثل حسين
برومانسيتها وبرقي مشاعرها
:)
كلماتك هزتني من الداخل
واحساسك بان هذي البنت اللي تكتب بعفويه اهي اختك احساس كبير
اشعر امامة بالمسؤليه
شكرا من قلبي
وعسى الفرح ما يفارق دنياك
:)

esTeKaNa يقول...

ولدالديرة
~~~~~~~~~~
ما يبيله
انته الساحر
:Pp~
اهم شي البيالات الصغار
يمة يا زين بيالاتي
:)

esTeKaNa يقول...

حلم جميل بوطن افضل
~~~~~~~~~~~~~~~~~~~~
عيدميلادي في اليوم المغبر ابو العواصف
ويارب انقبل والله يستجيب دعائك
مممم
تبيني اسكر مدونتي؟
مشكله الغيره
:pP~
أنا ازف؟
يا ليتني اعرف
علمني بس علمني
:)
في جواب من ارتفل في هالبوست
وفي جواب من احلى انجنير في بوست سابق
ومع هذا
مصمم تكرر السؤال على استكانة
:Pp~

esTeKaNa يقول...

ENG-Q8
~~~~~~~~~
ياهلا بمهندسنا
وانته بخير وصحة وسلامة
:)







آمار
~~~~~~~
وانتي بخير وصحة وسلامة
شكرا
:)










Shather
~~~~~~~~~~
وانتي بخير يا الشذر
واجمعين يارب
:)










3ezzow
~~~~~~~~
يا الله
!!
شنو هالكلام الحلو؟
:)
يا بختي
وانته بخير وصحة وسلامة
وعسى ربي يكتب لك كل السعاده قول امين

esTeKaNa يقول...

حسافتج يا كويت
~~~~~~~~~~~~~~~~
ويا حلو تعليقك اخوي العزيز
وانته بخير وصحة وسلامة
وعسى ربي يحفظك ويحفظ لك الغاليه ويرزقكم السعاده دوم
:)













باغي الشهادة
~~~~~~~~~~~~~~
كلماتك من اصدق الكلمات التي افرحتني
اطراء
واحساس
افتخر به وافرح فيه
شكرا لمرورك
وهنيئا لي بشهادتك الجميله فيما كتبت
:)

esTeKaNa يقول...

متفائل
~~~~~~~~~
يا هلا بالتفاؤل كله والله
مداخيل العافيه يارب
والله مشكلة
!!
عيدميلادي وانا ايب الكيك
يا حافظ دللوني انا اختكم
:Pp~
بس والله انك اخو عزيز
وتستاهل السينابون كله
وما اقدر على كيو ايت بلوقر
قاعد يحقق اكبر هدف عنده بممارسه هوايه اول تعليق
:)
شكرا على مرورك
شكرا على عقلك
شكرا على رقيك وتواصلك الجميل دائما

esTeKaNa يقول...

VIOLINIST-Q8
~~~~~~~~~~~~~~~
وانته بخير وصحة وسلامة
حياك الله
وامين يزاك الله كل الخير
:)













عبدالرحمن
~~~~~~~~~~~~
افا يا بو بدر
وكل ما كتبت شي ينمسح؟
مالي بالطيب نصيب
!!
شكرا من روحي
انته تجاوزت مستوى كل تعابيري واحساسي بصدق كلماتك
وانته بخير وصحة وسلامة
وربي يحقق لك كل احلامك
ويسعدك دوم
:)

esTeKaNa يقول...

QESAT-5AYAL
~~~~~~~~~~~~~~~~
هلا بمطول الغيبات
:*
وانتي بخير وصحة وسلامة
فرحتكم بي تسوا الكثير وتعني لي شي جميل ورائع
:)












غصة
~~~~~
الاحلى مرورج الجميل
وانتي بخير وصحة وسلامة
:)









قلب طفلة
~~~~~~~~~~
يا قلب الطفله الطيبة
يا صديقتي الجديده
ويا اختي الغاليه
وانتي بخير وصحةوسلامة
ودمتي بسعاده ابديه يارب
:)

esTeKaNa يقول...

MAGNOONAH
~~~~~~~~~~~~
يا بعد قلبي قلبها هالمجنونه
يقولون مجنونه
واشوفها اعقل العاقلين
:**
وانتي بخير وصحة وسلامة
وانا سعيده ان لك وجود بحياتي
اتعلم منك
واستلذ بوجودك
وافرح وابكي معاكم
شكرا يا الغاليه
:)

esTeKaNa يقول...

أرتفل
~~~~~~~
لا خلا ولا عدم
:)











بنت الشامية
~~~~~~~~~~~~~
وانتي طيبة يا طيبة
ويحفظج ويحفظ لج اسرتج الجميله ويبلغج بعيالج يارب
:)










فريج سعود
~~~~~~~~~~~
HEHEHEHE
:)
وأنته بخيروصحة وسلامة
شكرا اخوي العزيز

esTeKaNa يقول...

Simple
~~~~~~~
ياهلا ويا مرحبا
الحمدلله خلصتي
وبشرينا عسى التقديم اوكي؟
يا بعد قلبي
دايما تبهريني بطيبة قلبج وتعليقاتج الجميلة
كوني قريبه من استكانة
استكانة تتحرى دائما وجودج
:)

esTeKaNa يقول...

shahad
~~~~~~~~
يا هلا بالشهد
وانتي بخير
وصحة
وسلامة
وشكرا من الروح يا شهد
:)












سنعه
~~~~~~
ياهلا بالسنع كله
:)
ممكن اصافحج واسلم عليج؟
ممكن احبج على راسج على احساسج الجميل؟
ممكن اقولج لوما وجودكم
وصدق مشاعركم
ما كانت استكانة سعيده؟
انتم من اهم انجازاتي
شكرا لمرورك السنع دائما
:**

esTeKaNa يقول...

حلم جميل بوطن أفضل
~~~~
اشوف صار بلوقي فتافيت؟
:Pp~
ما قصر ارتفل
محل النفس
يطلع احس مني مو مشكله
:Pp~





شباب الكويت
~~~~~~~~~~~~~~
يعطيكم العافية
:)

esTeKaNa يقول...

صقر قريش
~~~~~~~~~~
امين واجمعين يزاك الله كل خير
:)







برقوشه
~~~~~~~~
يا هلا يا هلا
وانتي بخير وصحة وسلامة
هههههههه
مقصرين والله مقصرين
بس لابد من زياره باقرب وقت
صايره اقرا وما اعلق حمدلله والشكر
وعباالي تدرين اني مسيرة عليج
بس المرة اليايه لابد من اثبات وجود
:**

esTeKaNa يقول...

MANAL-Q8
~~~~~~~~~~
وانتي بخير وصحة وسلامة
:)










فراولة
~~~~~~~~~
ياهلا باختي العزيزه
يا هلا بالفراوله اللذيذه
امنياتج افرحت قلبي
واحساسك اسعدني
شكرا من روحي يا الفراوله الغاليه
:*









دبي
~~~~~
وانتي بخير يا دبي
:)

esTeKaNa يقول...

محسد
~~~~
زايرتنا البركة اليوم
:)
عندما قرأت كلمة عصيه على العوده
شعرت بقيمة كل يوم ولحظة
شكرا لمرورك






عتيجة
~~~~~~~~
معقوله؟
من وين طالعه الشمس
وحشتينا
ولهنا عليج
صج صج فاقدتج
شخبارج؟
وبشري
انا ام الصالات الرياضيه بصير لها مفتاح وباب
:)

esTeKaNa يقول...

HAMDOOL
~~~~~~~~~
يا بختي بهالبوست اللي طلع الناس الغايبه
وينك من غير شر؟
وكل العمر وانته بخير يارب
:)








Kechie-chan
~~~~~~~~~~~
وانتي بخير شكرا
:)

esTeKaNa يقول...

najmah
~~~~~~~~~~
الله يوفقج للدرجات العليا بالجنة والآخرة يارب
:*

ARTFUL يقول...

تبين الصج أحسدج على محبينج

;p

بس مهو الحسد اللي أتمنى زوالهم منج

الليله عندي مناسبه وبشوف من ذاكرني ومن ناسيني

;D

lawyer يقول...
أزال أحد مشرفي المدونة هذا التعليق.
DiLLi O MiLLi يقول...

أعذب تهنئة لأعذب احساس
ياللي غلاك مالة قياس
كل عام وانت أسعد الناس

كــــــل عـــــااااام وأنـــت بألـــف صحــــة وســـلامة
يـــااااا حبيبــــتي يـااااا أستـــــكانة


:*******************

mantovani يقول...

مساء الخير

كل عام و انتي بخير

اتمنى لج حياة سعيدة

مانتوفاني

bin3li يقول...

نبغي نتائج الاستبيان إللي وزعتيه من 2005 و وعدتي أنج بتنشرينه
:P
يالله صبرنا وايد

و كل عام و أنتي بخير
:)

محـــــارة يقول...

العمر كله حياتي ... ترى هذك اليوم كتبت رد شطوله ومثل مو قاعد ألطم بمدنتي أن البلوقات هالفتره اطلع روحي عشان ارد واكتب فيها

لكن السموحه وأنا خيتج مشتاقتلج مووووت وترى سلمت عليج جم مره وانتي بسبات عميق شكلج على الماسنجر

نتلقى بأقرب وقت إن شاء الله فينا حكي كتير كتير وزيون انضمت لشلة الأنس :)

وتعقيبا على بوستج كلام انتخابات مري على بس ولي عافيج بمطارتج ترى فقر عندي وشوفي أخر التحلطم كيف صار

سلام حبي

esTeKaNa يقول...

artful
~~~~~~~~
وي يزاك الله خير
الله لا يخليني يارب من حبايب قلبي
ولا يخليك من اللي يحبونك ويعزونك
ارتفل
!!
لا ادري فيك ما تحسدني
بس خلنا اثر من جويهتك شوي
سبحان الله يقلبون علي
يكرهوني
الا عندي من أثر جويهتك
:pP~

esTeKaNa يقول...

lawyer
~~~~~~~~
حبيبة القلب انتي
وكل العمر وانتي بخير
فرحني جدا تعليقج
بس اضظريت امسحة
واقولج بعدين ليش
:**

esTeKaNa يقول...

محارة
~~~~~~
أنا منزله لج انذار غياب
واحتاج تسبيب وينج؟
وايد ولهانه عليج
:)
وواعتذر لج عن المسنجر
يشبك بروحه
ومرات كثيرة من التعب اكون غافيه وبعدين اوعي اشوف منو اللي مكلمني
:(
باقرب وقت ضروري امرج
نورتي البلوق كله يا محارة قلبي
:*

esTeKaNa يقول...

ديلللي وملللي
~~~~~~~~~~~~~~~~
انلام اذا حبيتها؟
يختي يا زين هاللي لسانها ينقط عسل
وانتي بخير وصحة وسلامة
:)











مانتوفاني
~~~~~~~~~~~
وانته بخير وصحة وسلامة
:)




















بن علي
~~~~~~~~~
صج ضحكتني
!!
لووووول
تصدق نسيته
لازم احوس ادور باوراقي
وانته بخير وصحة وسلامة
:)

عثماني يقول...

كل عام و اخيتي الصغيرونة استكانة بالف مليون خير

حافظج الرحمن طول لعمر

:)

sologa-bologa يقول...

أنا دايما متأخر ما ادري ليش
:)

كل عام وانتي بخير
والمدونة صادحة بأجمل وأعذب الكلمات
:)

ودمتم بحب وود

عتيج الصوف يقول...

أحيانا..نحن نحتاج ان نتأمل حياتنا من بعيد
ان نتصفح احداثها،ونتحسس على اهم ما فيها
وهذا ما اقوم به في كل عيد
!!



------------

و أضيف على ذلك اللي يشوف مصائب غيره تهون عليه مصيبته

حياتنا مليئة بالإنجازات و النعم و لكن من يعتبر و يتعلم ؟


أشكرك يا إستكانة على هذه الكلمات التكانه :)

Shaima'a Alkandari يقول...

كل عااااااااام وانتى بخير

وكل الكلماااااات قليله واتمناااااااااالج التوفييييييييييييج

ClOuDs يقول...

كل عام و أنتِ أصفى..

كل عام و أنتِ أنقى..

كل عام و أنتِ أنتِ .. :)

يالله ان شاء الله نشوفج عروسه حلوه بالكوشه و يمج عريس الغفله :) بس هااااااااااااااااااا تعزميني على عرسج :D

و ان شا الله يا رب تاخذين الماجستير و الدكتوراه و تشتغلين عندنا قانونيه.. عشان أطفرج و كل ساعه و الثانيه أدق عليج :) الله يخليج اشتغلي وياي يبون قانونيين و معاشاتكم حلوه :D
الله يخليج الله يخليج :(

نشوفج على خير :)

esTeKaNa يقول...

عثماني
~~~~~~~~
الله يا كلمة أختي الصغيرونه ونستني
:D~
وانته بخير وصحة يا شيخ عثماني
:)

esTeKaNa يقول...

sologa-bologa
~~~~~~~~~~~~~~~
أن تصل بخير ومتأخر
خير من ان لا تأتي
:)
وأنته بخير وصحة وسلامة
زيارتك افرحتني اكثر من ما تتصور
:)









عتيج الصوف
~~~~~~~~~~~~
إضافه في محلها
:)
وأنا اشكرك اكثر على مرورك الجميل والراقي
مالنا خبر فيك من زمان
نورت البوست
:)

esTeKaNa يقول...

شيما الكندري
~~~~~~~~~~~~~~
وانتي بخير وصحة وسلامة
شكرا من القلب على مرورج
:)

esTeKaNa يقول...

cloudes
~~~~~~~~~~
هلا برفيقه العمر التدويني الجميل
هلا بلي صدى كلماتها في مدونتي دائما يفرحني
:)
وانتي بخير وصحة وسلامة
عاد ليش عريس الغفله؟
دامه دعاء وحلم خلينا نحلم على شي على مستوى
:Pp~
ترا انا حاليا بوظيفه مؤقته
اذا دوامج في مكان وبتدقين علي كل يوم
هذي ميزه تخليني اتشجع اقدم عندكم
:pP~

Noor يقول...

كل سنه و كل شهر وكل يوم و كل ساعه وكل دقيقه اتمني لج الخير

وسنين حلوه اتمر بحياتج
أرتوينا من استكانة الجاي بالنعناع و هم نبي بعد
تعطرنا بهالكلمات
تأثرنا فيها
و الله مايحرمنا منها (استكانه الأموره)والله يوفقج و يحقق لج امنياتج
:***

ClOuDs يقول...

LOOOL

عريس الغفله مو يعني شي مو زين.. انا أقصد انه عريس بس إيي على غفله :P
أنا كنت أسمي خطيبي سابقاً و زوجي حالياً عريس الغفله هع هع :P

بس طبعاً ما قلت له هالمعلومه :D

ن شاء الله اييج واحد على كيف ما تبين يا رب و ما يكون عريس غفله عشان ما تزعلين :D

أنا أشتغل في مؤسسه حكوميه مستقله يعني اهيا حكوميه بس جنها قطاع خاص يعني تمام حده و المعاشات اوكي و عندج 4 تقييمات بالسنه بس كراف
نطري الاعلان بالجريده و قدمي
نبي ناس شطار و حليوين :D
أدري انج تتسائلين وين تشتغل هالبنت يا ربي وين وين ؟؟
ما راح أقولج الحين
أخاف يطردوني :P
أدز لج اياه ايميل أو اكتبه بتعليق و مسحيه

شدعوه.. اللي يسمع يقول أشتغل بال أف بي آي :P