الاثنين، أبريل 14، 2008

تتذكرون؟

كان يوم الأربعاء
اليوم المنتظر طوال الاسبوع
ننهي معاه تعب المدرسه..ونبدأ به عطلة نهاية الاسبوع
.
.
.
نلتقي كلنا في بيت الجده
كل منا تحمل في قلبها سالفه وفكرة
احاديث المدرسه
وأحداث الاسبوع
نتكلم...لا يقطع استرسالنا الا سكوت احدانا
لسماعها سالفه مهمة من الخالات
!!
تصمت وتقط الاذن
ونصمت نحن ليكون هناك تعاون مشترك
فنجمع من تلك الكلمات الهامسه السالفه المخفية عنا
لما كانت تذبحنا بلاغة الشف؟
ولما كنا نستذبح لنعلم ماهي تلك الامور المخفية عنا
والي لا تتعدى ان تكون خطبة احد عيال خالتي الكبار
او مشكله...لا يجب ان تنشر وتقال
.
.
.
هل تضحك أحيانا على أمور كنت تقوم بها بالماضي دون سبب؟
اتسائل كثيراعن سبب تلك الايام التي كنت انام فيها عند بنت خالتي
نفتتح السهره بتشغيل شريط مسرحية الواوي وبنات الشاوي
نغني مع هدى حسين الى ان نصل لمشهد يموت فيه الشاوي
ويترك بناته وحيدات...هن يغنين ونحن ننوح:
أسمع صووووته صووووت الناي
!!
هل كان تصرف عاقل ان انام اسبوع وترك عندها فقط
لابكي
يا حبي للشقا
:Pp~
.
.
.
لتهرب أمي من قلق نومي في بيت احدى قريباتي
او زيارتي لأحد صديقاتي
رتبت امورها بأن يكون بيتي هو مستقر الجمعات
وهو البيت الداخلي لبنات الخالات
!!
لا تنقطع احاديثنا
يرتفع صوتنا وتتداخل معه الضحكات
تقطع امي السوالف بارسال انذار:
وطو صوتكم يا بنات
مرة
مرتين
ثلاث
لما تستلم وتنام
!
تبدا السهره بمشاهده التلفزيون
تعرج بنا الاحاديث لهذه وتلك من الفنانات
عندما يتناصف الليل ننتقل..لغرفتي وتبدأ الاستهبالات
نستلقي ثلاثتنا بجانب بعض...ونطلق لافكارنا العنان
قد نرقص
قد نتمكيج
قد نلعب
قد نجن في لحظات
!!
نعد نفسنا بأن النومه بعد ساعه
ساعه تجر ساعه
وننسى وعودنا والكلمات
...كنا مراهقات
تفتحن أزهار شبابنا في ظل عائله كبيرة
لم نجد امامنا الا ابناء الخالات
أحبت هي فلان،وتلك كانت تهتم لفلان
وانا كنت مرسول الغرام والمستشار العاطفي لهوؤلاء
احب الجميع دون استثناء
!!
مع ساعات الصباح الأولى نصل لأعتاب الملاقه
وقمة الجنون
تضحكنا كلمه
ونفصل على صوت
نتفق على ان لا نتفق
ونضحك بكل لحظة بسبب وبدون سبب
!!كم كنا سعيدات
هل تتذكرون أكل أول الصباح؟
قرصات الجوع تحثنا ان ننزل بالبجامات
نعفس المطبخ ..نحن قطط الصباح
نأكل من ايدي بعض افشل الطبخات
ونندس في أسرتنا مع ساعات الصباح الأولى
نغمض أعيننا فجأة....وننام
!!كم اشتقت لتلك الأيام
.
.
.
شالطاري؟
الطاري كان مع صور قديمه جمعتنا معا
زمان الطفوله والعجايف في الشاليهات
المراهقه ..وموضه الكتافيات
منتصف المراهقه..واجكر اللحظات
صور لابد من طمسها وعمل تعتيم اعلامي عليها
حفاظا على مستقبل الآنسات
:pP~
.
.
.
كبرنا؟
انشغل مع تجهيز بنت خالتي الكبيرة لموللودها البكر
واستقبل شكاوي بنت خالتي على شطانة ابنها الجميل وتعبها مع الحمل الجديد
واصل لقمة انشغالي مع ملجة بنت خالتي الصغيره في الجمعة الماضي
!!
غريب كيف يمر العمر
وغريب كيف الايام تمر
ونكبر
نتغير
ويبقى في داخلنا دائما
شئ جميل يجمعنا
وذكرى حلوة لن ننساها

هناك 56 تعليقًا:

ولد الديرة يقول...

المشكلة اننا شعوب ما تقدر الوقت

احلى شيء الملاقة

عن نفسي

اذا مر يوم ما استملقت فيه اتيني حجه

:P

يسلموا :)

QiYaDiYa يقول...

ايي والله نذكر !!
ايااااااااااااام !!

;p


ضحكت ضحك على هالبوست !!

سالفة السهر مادري ليش كانت عندنا شي واااااااااااو !!

يعني احنا سهرانين لي الصبح كشخة !!

;p

و طول الليل تكركر و ضحك و بلعة !!
;p

و سوالف عن الينانوة !!
و الساعة 6 الصبح نطلب بيزا هت
نطلع ولا نلقى الخدم يغسلون سيارات بالفريج نسلم عليهم و ندخل ;p

و نفس الحالة كانت التجمعات عندنا بالبيت كون اني ماحب افارق بيتنا و هم لانه ظروف بيتنا مواتية للفصلة ;p

قبل النوم تعلن ساعة الصفر ..
ضحك على معنى و من غير معنى !
لما فجأة صخة الكل نايم !!

;p

و الحين كل هذول الي اسولف عنهم
الي توها متزوحة
و اغلبهم عيالهم بيدهم
ليلحين اطفرهم اقولهم تعالوا ناموا عندنا ;p

الايام تمر بسرعة . .
وحدة من بنات خالتي لما كنا صغار ..
كانت تقول انا اذا تزوجت بييب درزن يهال و بحطهم بوانيت و امشي فيهم !!

طبعا ليلحين نعايرها بالكلمة هذي ..
توها قبل جم شهر متزوجة ..
نقولها ناطرين الدرزن !!

منو يتخيل ان كلمة مثل هذي اطلعت بلحظات عفوية تمر السنين بالسرعة هذي و تصير الصجية و نقعد نضحك عليها !! ;p



بوست ممتع لأقصى درجة !!

شكرا من القلب ;*

DiLLi O MiLLi يقول...

ههههههههههه

عاااااد اليوم يمعة العشا في بيت أبوي
وكانوا خواتي واخوي ومرتة وأولاد عمي وبنات عماتي وخالاتي
وتذكرنا صديقة أختي اللي أكبر مني وشلون امي ما ترضى تروح تنام عندها
وفي يوم أمي سافرت .. فأبوي خلاها تروح تنام ليلة عند صديقتها
فأختي تقول عاااد ذيك الليلة ما عرفت أنام يتني كوابيس طول الليل ..هههههههههه
:)
ردت عليها أمي رد له علاقة بعلم النفس بما أن امي شهادتها بعلم النفس جان تقول لها : أكيد كوابيس هذا الشعور بالذنب لأنج تدرين انا ما أرضى ورحتي من وراي ههههههههههه
ردت أختي : بس أنا قلت لأبوي ووافق
بس الله وكيلج من يومهااااا وهي ماااا تنااام عند أحد
ههههههههه وعللليه تعقدت البنت
:)

جان أي دوري في السوالف
عااااد أنااا موو عاجل مثل أختي لاااااا
أنا شاقه الأرض وقايلة أمباع
أنا ما أحب أنام عند أحد .. بس بنات عماتي ساعات أيون ينامون عندي
آخر مرة يوني كل وحدة حطيت لها دوشق وحدة يمين فراشي والثانية بيسار فراشي
وأنا كان عندي ذاااك الستيريو العجييب
وسماعاتة كبر الكومودينه وحدة يمين الفراش ووحدة شمال الفراش
يعنى فوق راس بنات عماتي الثنتين
نمناااا بعد سوالف وضحك والجماعه حطوا روسهم بمان الله
وفي الصباح الباكر (وعلامي قلبت فصحى)ههههه
المهم قعدت الصبح ألا كل وحدة شخيرها واصل الخفجي
قومي يا دللي وحطي أسطوانة لبت هوفن تبتدي أبــ
تراااا راااا رااااا مشهورة هالسمفونية مووو سمفونية ألا تخروعيه لأنها تبتدي بموسيقى عالية
روحي يا دللي وحطي الستيريو عالعالي
ء(عيزت وأنا أكتب)ء
المراد .. وشغلي سمفونية ولد هوفن و
ء(((((تـــراااااااااااا راااااااااا رااااااااااا )))))ء
جااااااان يقحصوووون من فرشهم وكشيشهم قاااااايمه
وعيوووونهم بتطلللللع من مكاااانهاااااا
أنااااا قلت هدب عيونهم بيحت من التبقق
أشوووه ما يتهم جلطة جااان أستاااثمت فيهم
والله وكيلج من يومهااااا وهم ماااا ينااامون عندي
ههههههههههههه

والله انا هذي كانت سوالفنا اليوم
عن الزوارة أول
وعن طلعة الشالية
وعن اليمعه مع بنات خالتنا وبنات عماتنا
الله يا ذيج الأيام أأأأأشحلاتهاااا
براءة الأطفال في عيوننا هههههههه
ألاااا أناااا
:)
وألحين اللي أم واللي يدة واللي عانسة
أأأأأأييييييه يااا استكااانة كانت أياااام

عسى ما طولت عليج !؟
ههههههههههه
:)





عســـاج مـا تفقديــن غــالي يـا الغــــاليـة

:***

ReLaaaX يقول...

أبشرج إذا ببجي هالمره من الوناسه



والله أياااااااام .. كل مراحلي حلوة حتى مرحلة الملاقة .. بس على قولتج فيه صور مالاداعي احد يشوفها ;p
بس تصدقين مادري ليش محتفظة بهالصور ليلحين ؟ .. مادري احب اضحك على كل لحظة عشتها وهالصوره كانت بهالمكان .. وكانت سالفتها على قولتهم كيت وكيت



وعلى قولتج كبرنا .. وكل وحدة الحين لها مسؤولياتها

صقر قريش يقول...

الذكريات هي نقطة ضعفي يااااه ما أكثر الأصحاب الذين كانوا معي في صغري والآن لا أراهم إلا فيما ندر لازلت أذكر أيام النشء والشباب في جمعية الإصلاح الإجتماعي(مو انا محسوب من الأخونجية خالصين يعني :) )وأذكر الأناشيد التي كانوايضعونهاعندما نكون في الحافلة وكنا نرددها يادعوتي والله غايتنا وامطري ياسماء يالله والله كانت ايام لاتنسى لا أنساها ابدا واذكر ان والدي حفظه الله أخذني الى أحد مراكزهم الصيفية وكانت تلك المرة الأولى لي وكانت سنة 1995فتركني عندهم وذهب وجلست وحدي من خوفي ووحشتي بكيت اوخنقتني العبرة حتى أتى من يطمأنني وكان عمري وقتها 10سنين (عشر سنين ودلوع والله حاله أيام الطفوله أفشل آنا :) ) أيام المراهقة مع الشباب بس يتني حالات صياعة تدخين ومصبنة بس الحمدلله الله هداني وتركت الزقاير والشيشة ورديت للشباب مرة ثانية الله يرحم أيام أول كانت عفوية وجميلة. ومنو يدري يمكن لما نتزوج ونعيل نتذكر أيامنا هذي ونقول الله ياحلو ايام الشباب ايام المدونات ومواضيع المدونات بعد هذي الدنيا :)

فريج سعود يقول...

ليش الكويتيين يتشابهون بكل شي ؟

الزين يقول...

مبين صدى الحديث بينا البارحه البوست

بعدين يا بنية احنا اتفقنا نسويها الحين

يعني لما الحين ما كبرنا
هالسوالف مو بس حق الأطفال

تعالي نجربها واحنا كبار
:)

صدقيني راح تكون احلى

هاااااا
شرايج

slumber party
My house

;-)

I have some new dvd's
just say yes

:))))

حلو البوست كالعاده
تثيرين في نفسي الحنين لأشياء قد كانت
والآن مضت

أيام اخذت من القليل
واعطتنا الكثير

واللي كبر كبر
واللي تزوج ودبر
واللي راح راح

ودنيا

هاااااو
شفيني قلبتها دراما

يا حافظ

بخليج وللحديث بقية

:*****

charisma يقول...

صبحج الله بالخيير يا ويه الخير
:**


يا حلوها من ذكرياات
ويا حلوه من زمان يا استكانه
:)

كل ما نتيمع انا وبنات خالتى لالالازم نذكر هالايام

احنا مو بس جذى احنا لو تقعدين معانا ما تفهمين شنقول لوووول
لنا لغه خاااصه ومن ويين مصدر هاللغه يا ترى

مصدرها هاليمعات والزواير ومجابل بعض
ههههههههههههههه

بدعنا

فعلا الايام تركض
سبحان الله كل وحده فينا لهت بعالمها الخاص
الله يعطى يداتنا وامهاتنا الصحه والعافيه
والله لو ما الزواير جان خذتنا الدنيا
من الامور الى احرص عليها الزواره
لالازم نتوارثها ولا انتفلل
مثل ما عودونا اهلنا عليها لازم انعود الاجيال القادمه عليها

ترى صج

:**

charisma يقول...

ديللى

هههههههههههه

انتى عسل عسل

:*

ARTFUL يقول...

يوم عن يوم أكتشف ان حياة الكويتيين طبق الأصل حتى لو ما يصيرون حق بعض

بالضبط زوارة سهر لوية عبط طفاقة لقافة نفس اللبس نفس الروتين نفس الحركات

والشي المشترك والخطير لازم عند كل واحد او وحده صور تم التقاطهابعمر معين الله لا يعودها من صور
لوووووووووووووول

حتى الشباب تزور بيت خالتك او خالك لو تدخل اي بيت لازم تسويلك ملعب كره انشالله بين بابين بس الملعب حاجة ضرورية ماهو رفاهية

ولما الوالد ينام اششش ابوي نايم واش واصص واشش واصص لما يصير صراخ بااااااااااااااااااااااااااس ابوي نايم واقوم الوالد على صراخ اللي يسكت ويشخلنا شخال وننحكر بدار وحده

وطبعا لاااااااااااااازم تحر اللي ماسهر معاكم او ما زار معاكم

نحاسة يهال كويتيين

وتعال شوف القواري قاريي أحسن من قاريك ومادري شنهو ولوية بالفريج واذا شفت بنت قدك تدوس يمها وتحاول تلفت نظرها
قززز طفولي كويتي قديم لووووول

وطبعا وقت الامتحانات ((يمه بروح أصلي بالمسجد)) بعد عمري الوالده الفقيره روح الله يهديك ويحفظك وتحوس بالقاري لما جريب تخلص الصلاة تدخل معاهم وتخلص الركعات بسرعه وتروح الفرع وتقعد مددده اللي يسمع يقول بتشتري ماجلة البيت آخر شي والا بيبسي وبطاط وجبريت ((تشب العود وتطفيه بحلجك تالي تطلع دخنه وتحط العود على الطرف تطقه يشب ويطير وتحرق كلنكسات وزبالة الفريج)) تالي ترد البيت تكمل دراسه

أيام حلوه كانت أيام حلوه

شكرا على الذكريات

ARTFUL

Najmah يقول...

انتي شي عجيييب

قاعدة اقرا البوست وبنت خالتي يمي

ضحكنا
وضحكنااا

ومابقى شي ماتذكرناه

قتلهاا الحين
قومي صارلي ساعه كامله وانا ابي اكتب تعليق
:)

قررنا نسوي لنا سهره الاسبوع الياي نعيد فيهاا الذكريات
وياكثر ماصرنا نقرر
ولا نطبق
:)
اللي راح ماينعاد
وحتى لو انعاد
مايكون مانفس الطعم

كل يوم له نكهته الخاصة :)

آخر فقرة
ادمعت عيووننا
فتحت باب من ذكريات مخزونة

استكانه
ليش لما تكتبين عن شي نحب هالشي ونشتاق له بكل مافينا :)

mantovani يقول...

استكانة

الذكريات الجميلة تظل محفورة بالذاكرة
و جميل جدا ان نسترجعها في كل لحظة نحتاج
بها الى شيء يسلينا و يذكرنا بأننا كنا نعيش واقع جميل , و بالامكان ان نسترجعه

ولكن المصيبة عندما نسترجع الذكريات
الجميلة , و لا نجد لها صدى ... او ندفنها لغياب اشخاص الذكرى

الموت لا يجعلنا ننسى و ندفن الذكريات الجميلة

ولكن هناك من هو اسوأ من الموت
و هو المقاطعة و الاحقاد و التحاسد
و هذا ما حصل للكثيرين ممن هم في مرمى حياتي

====

الله يوفقكم يا رب و يخليكم لبعض
و انا ادعي من الله ان عيالكم يكونون في مثل هالتلاحم الجميل

الله يجمعكم على خير


مانتوفاني

Najmah يقول...

وعلى طاري مرسول الغرام والمستشار العاطفي
انا بعد كنت نفسج
نفس هالدور الخطير :P

5roofa يقول...

اتمنى ترد ايام اول الي كل همنا اللعب و الضحك و الوناسه

بدل ما الحين شايلين هموم الدنيه على راسنا

احسد اليهال الي يلعبون بالساحه و ابر مشاكلهم

انه هذي خذة كاوكاوي و لا بطاطي

مشكورة يالغاليه على البوست الروعه

الله يديم الذكريات الحلوة عليج يالغاليه و يوفقج و كل من تحبين

salamz sis....

فراوله يقول...

مساالورد والجوري
غاليتي الحبيبه
والله ذكرتينا باشياء لها
نكهتها الخاصه واللي اكثرنا فقدها
ياحلات ذيك الايام يوم ماكنا
تنطر يوم الاربعاء
وحزة اللقيا مع بنات الخاله
والخال
والاهل
ويييه صج ايام من عمرنا ابد ماراح ننساها
تحياتي لاحساسج الرائع
:**

قلب طفله يقول...

الله الله الله يا استكانه

ماضي جمييييييييييل و لحظات ما تنعاد

الزوارات و القعده على صوب و تسمع الحجي من الكبار و السهر تالي الليل و الفصلات و الضحك الهستيري اللي لو ناديتي وحده باسمها تسدحنا من الضحك و الطلعات مع بعض ما ئاء الله طابور بنات و الحراس الصبيان يا ويل اللي تروح بعيد عن هالطابور لوووووول
و لا مسرحيات هدى حسين و غناويها شي اساسي عندنا :))

و لا المبارايات اللي يسونها الصبيان في الحوش و احنا نقعد ع الدرايش ملوت الدوانيه فيبيت يدي و نشجع باعلى صوت و غناوي و اللي يفوز اوووف الكل يتلصق فيه و يقول هذا اخوي هذاو لد خالتي جنه مسوي انجاز هههههههههه

يا الله على هالايام بس الحمدلله للحين لجتمعنا نضحك و نعلق على الصور و عيال اللي تزوجوا جياكر مثل اهلهم و لا حلوين لوووول
بس مو بنكهة قبل و حلاتها


استكانه ودي ارد بالزمن لورااااااا

بوست يهبل ذكرنا بالذي مضى

الله يحفظج ^_^

violinist_q8 يقول...

مافي احلا من الذكريات
يوم الاربعا كان افضل يوم من الاسبوع وبعده الخميس الصبح
الخميس احبه ليما الساعه 12 الظهر لاتستغرين :)
يبتدي الخميس بقعدتي مع اهلي بالحديقه نتريق او نروح مركز سلطان
اما يوم الاربعا فكان يومي الخاص يبتدي بعد انتهاء الدوام ( المتوسط - ليما ثالثه ثانوي )
ارجع البيت و بعز الظهر اروح عند واحد من ربعي نقعد بالسرداب ليما العصر ونلعب كرة من ال4 ليما ينهد حيلنا ونسوي دوري و في حكم ( اذا كنا خسرانين ما اخلي الحكم يصفر الا لما نفوز او نتعادل ونلعب بلنتيات )
والخميس كنت اروح المركز العلمي اعشق الفلك اروح لمرصد العجيري و كنت مشترك بقسم الفيزيا طبعا ماكان له شغل بالمعادلات مجرد مشاريع يدويه كنا نشتغل عليها بطريقه علميه حلوه ..
كنا نروح للناددي العلمي بالباص الخاص فيهم اتذكر الباص رقم 6 السايق عبدالقادر شاف الويل مسكين من تظلم الدنيا نروح للملعب مال النادي كان ملاصق للرابطة مالت السيارات من نشوف الاوضاع هاديه شقحنا للرابطه نستانس و نطلع للباص ونرد البيت
صج كانت ايام حلوه

الخيلاء يقول...

الله استكانه

بهالبوست فتحتي صندوق ذكرياتي
مع انه خالتي ما قصرت بالزواره
منزله كرتون كامل كله اشرطه فيديو
ملوت اول الي الاشرطه صغار

تدرين شنو احلى شي فيهم

انه اليهال اقتنعوا اني كنت بيبي لوول . يعني انسانه طبيعه انمو و ازدهر

و الذكريات شي حلو يعيشنا باجواء نحتاجها من وقت لي الثاني

و بعد اتبين لنا اشلون السنين تركض و ماكو شي يبقى على حاله

و تذكرنا انه نستغل للحظات عشان اتكون مميزه .. تنحفر بقلبنا و ذاكرتنا ..

لا خلا ولا عدم منج ولا من بوستاتج :)

waterfall يقول...

استكانه

والله وذكرتيني بما مضى وانقضى
لا ما انقضى للحين موجود الحمدالله

كنا 4 بنات ربع حييل
وبنات عماتي الكبار دايما يعايرونا ونقول لهم انتوا محترين لان احنا دايما مع بعض

كانت عمتي مضبطتنا طلعاتنا مع بعض نروح شاليه عمتي كل ويكند
الشاليه وايام الشاليه من احلى ايام عمري .. كنا نسهر على البحر لي الفير وعمتي مخليتنا على كيفنا
كان عندنا ليت عجييب كل دقيقه يطفى واذا طقيناه يشب
اذا مر احد كنا نستحي ومانبي يشوفنا نحط تراب على الليت يعني حركه لوول

وفصلاتنا لما نسبح بهدومنا لوول ونقط حجابتنا وفجأه يمرون شباب ونغوص عشان ما يشوفونا

يعني عميان ما يشوفون فوطنا اللي على الكراسي !!

وعلى طاري اليمعات ايام بيت العديليه العود كنا نتيمع على الغدا كل سبت وعقب الغدا عمامي كل واحد ينسدح على قنفه واحنا نحوس بالحوش

اما عمي العود اذا راضي علينا يدخلنا غرفته يقولنا اخذوا بارد ( يعني بيبسي ) وكاكاو وكنا نبوق برده لوول

بعدين تحولت يمعتنا حق بيتنا وصرنا احنا يالل4 بنات نطلع الحوش عشان ننحاش من التطرش اللي ما يخلص
وكل ما دخل احد يقول لنا انتوا شتسون بالحوش !! يعني شنسوي قاعدين نسولف

على فكره احنا كنا 2 كبر بعض و2 اصغر منا بسنه بس ما فرقت هالسنه.. تفكيرنا يظل واحد وسوالفنا وحده

كلللش ولا مره بالشاليه سوينا رقصه يعني كلنا نسوي نفس الحركات
كان عندنا شريط مسرحيه وقاعدين نرقص على اغاني المسرحيه لوول شكلنا فلم

واذكر بعد مرات لما نسوي روحنا مباحث واااي نبدع من نشوف واحد مع وحده نقعد نألف قصص هذا حبيبها لا هذا ريلها لوول وكله بصوب ولما نفصل قبل النوم بصووب لوول ومرات كانت تطفى مكيف الغرفه اللي ننام فيها وحررر واحنا قاعدين ونضحك لوول على اتفه شي نضحك لما نخدر وننام

وكان مقرر ريوقنا بزاليا وخبز يابس لوول

والله من احلى ايام عمري

الله يخلينا حق بعض
ويخليج لأهلج يا رب

bin3li يقول...

من المدارس فينا حيل نسهر!!
لكن في الصيف نصير خفافيش
و نصير مطاوعة ما نطوف الفجر لكن باقي الفروض نجمعهم ويا العشا

بعد الفجر نطلع برا الهوا غير كله رطوبة
أذكر كنا نروح نقطع لوز، ما أعرف شو تسمون الثمر هذا في الكويت
عاد أنا عبالي خفيف و رشيق أتعلق في الشجر و أكسره

معقولة تتكلمين عن الطفولة و يوم الأربعاء و ما تيبين طاري مجلة ماجد؟
:P

ClOuDs يقول...

الله.. ذكرتينا بالذي مضى ..

أنا ما أتمنى شي كثر ما أتمنى إن الزمن يرد لحظه وحده لي وره

أيام الطفوله و المراهقه كانت شي.. كانت كل شي :)

الحين .. كل شي تغير.. الدوام و البيت و الأهل و المسئوليات و الهموم

أول ما كان يهمنا شي أبد.. أبد أبد
كل اللي يهمنا اللعب و الوناسه و التكركر و الحلاو و الكاكاو و مسرحيات هدى حسين
:P

مشكورة استكانه
ضاق خلقي شويه :P


نشوفج على خير

esTeKaNa يقول...
أزال المؤلف هذا التعليق.
هنوفي يقول...

الللله ياحلات ذيك الايام صج كنا ننطر يوم الاربعا نطره ونااااسة بالزوارة وباخر الليل كنت اسوي روحي نايمة عشان يدتي تقولها خليها تنام عندنا حرام نايمة !!!وتذكرين كنا نقعد يوم الجمعة من الصبح ننطر " قصص الشعوب كانوا يحطونها الساعة 10 والجباتي والجبن كلاس والجاي حاطته يدتي من الصبح اما عاد عاد الشاليه كان حدث ولا حرج الخبال بعينه والتسبح الفير كان متعة .. ولما بنات خالتي ينامون ندي كنا نسوي مقاطع ابييي تذكرون ؟؟ كانت عندي ستيرية ح كاسيتين وكنت مهرة بالمقاطع وكا شريط له قصة خاصة وله اسم والله ايام
مشكورة يالغالية على هالبوست وعلى اثارة هالذكريات تصدقين احنا محتاجين جرعات علشان ننسى هالمسؤوليات شوي

حياتي هدف مو عبث يقول...

ودي أرد صغييييييرة

:(

feelingstalk يقول...

الله يا استكانه وديتني لوقت نسيته
احلا شي لما ذكرتيني بالواوي وبنات الشاوي .. هذي مسرحيتي المفضله .ز ايام لما كنا نمثل ونغني معاهم
الله على ايام اليمع والنوم عند بيت خالتي
مشكوووووووره على الذكريات الحلوه اللي ذكرتيني فيها ,, الايام نستنا

esTeKaNa يقول...

ولد الديرة
~~~~~~~~~~~~~~
اي واللله ما نقدر ولا نحس بالوقت
!!
حجة؟
اسم الله عليك من الحجة
هالحجوة بس تخليني اشهد انك ولد ديرتي
:Pp~

vancouver يقول...

الله يخلييييييييييكم لبعض يا استكانه

تتحجين وانا اتذكر ذيج الايااام
والله والله نفس ما وصفتي
واهم شيء اكل الصبح
هههههه

ناااااااكل بعدين نناااااام
هههه

اثاري الذكريات مشتركه بين وايد ناس
يااااااااحلوج

esTeKaNa يقول...

qiadiya
~~~~~~~~~~~~
ياهلا ووأمية هلا
:)
اي والله نذكر لانه هالحجي من جم سنه واحنا صغار تونا على اعتاب الشباب عشتو
:Pp~
واي ضحكتيني
ترا انا كله اطلع تصاريح وبنسهر وبنسوي وااول واحده تنام انا
!!
واهم شي بيتزا هت بدعتو
:))
سبحان الله مرات احس هالحجي جنه امس
صج السنين تركض
!
نورتي يا قياديه الاخلاق انتي
:*

esTeKaNa يقول...

DILLi o Milli
~~~~~~~~~~~~~~~
انلام انا لي فقدتج؟
هالسوالف والحجيات ما تطلع الا منج
:)
عيل ستريو وبتهوفن؟
ههههههههههههههههههه
هههههههههههههههههههه
واي ما اصدق
بعد تقولين ما نامو عندج؟
اصلا ما ظنتي يفكرون ابد
هذا تعذيب مو وناسه وعليه عليهم
:))
انزين قصي علي
قولي عيوني تنقط براءه
واتصرف بشفافيه وعفويه
خليني اصدق
بس ماكو فايده حتى سوالفج كلها شطانه
عسى تسوين مونتاج حق عيالا ألختج واخوج وتطلعين روحج كله بريئه؟
:))
وعلى طاري اخيتج تصدقين دلي انا كله اقول حق امي يمه ارضي علي ترا مالي خلق اطلع وتطلع وياي لعنة الفراعنة
هههههههههههههههههه
اذا امي مو راضيه
والله
حتى موقف حق سيارتي ما القى
كل شي يتعسر
فالظاهر عشان جذي اختج وعليه ما نامت
:))
وترا تفسر اميج ذكرني بامي
امي خريجة علم نفس
وكل شي عندها اسقاط وشعور بالذنب
ههههههههههههه
واي يا زينج دللي
صج صج صج الكشره من هني لي هني
من قريت اسمج لييييييي خلصت التعليق
ياربي زوقه تنحب هالددلي
:***
ش

esTeKaNa يقول...

reLaax
~~~~~~~~~
يعني فرح ولا ضيقه خلق لازم تبجين؟
:))
انا ابيج تكركرين لو سمحتي
:p~
الصور تونس
بس ما حلاته احد غريب يشوفها
انا مسويه تعتيم اعلامي على الصور
:))

esTeKaNa يقول...

صقر قريش
~~~~~~~~~~~
أهااا..طلعت من عيال النشئ ها
حياك اللله
وسبحان الله ترا الانسان حتى لو تيله مرحلة مراهقه ينحرف شويه ويستخف لابد يرد على اساسه وطفولته ووين عاشها
:))
عيل تقول دلوع هااا
لا لا مو خوش خبر لا تنشره وايد
:pP~
تتخيل بينا وقت نقول الله يا المدونات؟
وايد فكرت فيها
:))
حياك الله

esTeKaNa يقول...

فريج سعود
~~~~~~~~~~~~
ببساطة
لأنهم كويتين
:Pp~

esTeKaNa يقول...

الزين
~~~~~~
أهلا بملهمتي
:)
ايييييييييي بخاطري اسويها
عاد انا فيني طبع
تصدقين ماحب اطالع فلم مع احد
اذا معاي احد احاول استغل الوقت بقدر المستطاع بالقرقه
هههههههههههههههه
يعني هذا تحذير رسمي من الحين اقولج
:))
يا بعد قلبي قلبج انتي
قلبيها دراما
كوميديا
انتي ملهمتي
سوي اللي تبين
واكيد..كل حديث معاج بيكون له باذن الرحمن بقية
:***

esTeKaNa يقول...

Charissma
~~~~~~~~~~~
صبحج الله بالنور
ومساج دوم بالخير والسرور
:*
تصدقين ضحكتيني على اللغه الخاصه
صاجة
احنا مرات يكون بينا جم حجوة اذا قلناها غشينا غشينا من الضحك مع ان الغريب اللي قاعد يطالعنا هاو اشحقه تضحكون؟
بس لانه تلقين الكلمة لها ماضي ذكريات واحداث في بالنا
:))
اي والله لازم نحافظ على الزواره وننقلها للاجيال اليايه
اللي الله يستر منهم
لا يقدرون زواره ولا يعرفون اهل
!!
نورتي يا الغاليه

esTeKaNa يقول...

artfull
~~~~~~~~~
كلنا نصير حق بعض ترا
الكويت هالكبر
:Pp~
بس لا تذكرني بالصور
عندي صورة عمري ثلاث سنين
فيني بوشنتير
ومعاديه اخوي وعيال خالتي ثلاث صبيان
الصورة انا بالنص الضحكة من هني لي الخفجي
وهم دار مداري مأشرين علي يعني حركة
وخالتي كاتبه التاريخ وكاتبه ذكرى موسم بو شنتير
لانه الصورة ظييييييييييييم
وتفشششششششششششل
ومادري ليش مصورين
صج الله لا يعودها
لوووووووووووووووووول
بس ترا صج صج صج
موتني من الضحك
على كل شي وخاصه القز الكويتي القديم
يا حسرة قلبي
جني ارى في هذا التعليق ولد خالتي
مممممممم
انته ولد خالتي؟
:)
وكلش ولا نداره الصلاه بالمسيد
مشالله هذا وقت الالتزام الصجي للشباب
وعقب اخر يوم يفضى المسيد من غير شر
:Pp~
اي والله صاجة نوال
اياااام حلوة
:)

esTeKaNa يقول...

NAJMAH
~~~~~~~~~
هلا ومرحبا بنجمة الكل
ويا مرحبا ببنت خالتها
:)
وي يا عساكم دوم تضحكون وتكركرون
ليتني مرتزه بينكم بالنص
:pP~
تصدقين قلتي شي مهم
اهو مرات ممكن ينعاد
بس اذا انعاد ما نعاد بنفس احساس قبل ولا بنفس الطريقة
!!
كل وقت له حلاته والله
وجواب سؤالج
مممممممم
ممممممممم
يمكن لاني اكتب الشي من قلبي؟
مادري
:))
تنورين يا النجمة بضوا احساسج وقلبج

esTeKaNa يقول...

مانتوفاني
~~~~~~~~~~~
يا هلا ويا مرحبا
هذي الساعه المباركة اللي تشرف فيها بلوقي
!!
ما تتخيل شكثر اثر فيني تعليقك
فعلا..هناك من يغيبهم الموت ويبقون رغم ذلك في داخلنا لحبنا لهم ولعشرتهم الطيبه ،وهناك من هم حولنا ولكن
الحقد
واتقطع العلاقات
وامور كثيرة
تجعلنا نفقدهم ويغيبهم موت الاحساس في داخلنا
!!
الله يهدي الجميع
ويصلح النفوس
كل شي يهون..الا القطاعه بين الاهل
:(
امييين ويزاك الله كل خير على هالدعاء الطيب
حسيت بتعليقك بعض الحزن
يارب الله يسعدك دنيا وآخره ويبعد عنك اي حزن
:)

esTeKaNa يقول...

najmah
~~~~~~~~~
مو خوش دور متعب
ولا فادنا شي
وعاشت فوزيه دريع
:Pp~

esTeKaNa يقول...

5Roofa
~~~~~~~~
كل القلوب اطفال
!!
انطلقي
وافرحي
واني كل هموم الدنيا
خلج طفله جميله بكل يوم تشرق من جديد
:)

esTeKaNa يقول...

فراولة
~~~~~~~~
يا صباح الفراوله الجميلة
:)
ترا الذكريات الحلوة دايما لها بالقلب مكان
المهم تبقى فينا
نسترجعها ولا ننساها
تحياتي لحضور الفراوله الرائع
:*

esTeKaNa يقول...

قلب طفلة
~~~~~~~~~~
يا زين اسمج
انا قلت لج ان اسمج حلو؟
احستنتي الاختيار
:)
اي والله لو ينادون واحده متنا من الضحك
حتى انتو كان عندكم حراس؟
احنا لازم بدي جارد
عشتو حجرين حجرين
:Pp~
hahahahahhahaha
واي موتيني من الضحك على التشجيع
يختج سنعات نشجع شبابنا جنه صج
والمراهقه ذابحتنا حزتها
:)
كل عمر له حلاته وانا اخيتج
العمر اللي احنا فيه الحين حلو
وباجر لي كبرنا بنتذكره ونقوله ليته ينعاد
:)
وجودج بالنسبه لي ممتع
وحابته وايد
نوريني وشرفيني بكل بوست

esTeKaNa يقول...
أزال المؤلف هذا التعليق.
ARTFUL يقول...

لووووووووووول
الله يقطع ابليسج

انتي بنت خالتي

اممم يمكن!!

بس ما اتوقع

;p

esTeKaNa يقول...

violinist-q8
~~~~~~~~~~~~~~~
اي واللله كان يوم الاربعا احلى يوم
انا للحين مو عارفه احب الخميس مثل حبي السابق للاربعا
!!
واللله يا مركز سلطان
وريوق مركز سلطان
كنت استانس على البان كيك مالهم اقعد طول الاسبوع اتنطع فيه
:))
مشالله ذكرياتك حلوة
وطفوله حافلة
استمتعت بقراءة تعليقك الجميل
:)

esTeKaNa يقول...

الخيلاء
~~~~~~~
loooooooooooool
:))
واي موتيني من الضحك
يعني ليش جذي هاليهال
عبالهم طلعتي كبيرة
!!
والله عدل كلامج
لازم نستغل كل اللحظات ونستمتع فيها عشان نخليها تنحفر بذاكرتنا طول العمر
وعسى الرحمن ما يخليني من مرورج الناااطع على قلبي
:*

esTeKaNa يقول...

waterfall
~~~~~~~~~~~
يا هلا ويا مرحبا بصاحبة هالذكريات الحلوة....صج صج استانست وانا اقرا تعليقج
اهم شي التسبح بالبحر الفير
واستهبال الشاليه
ابيه انا قمت اشك فيكم
انتو تصيرون لي؟
لووووووووووووول
ما تتخيلين شكثر استانست بذكرياتج
صج صج
احس الكويتين كلنا ذكرياتنا تتشابه
:)

esTeKaNa يقول...

بن علي
~~~~~~~~~
ههههههه
اي والله
انا تتخيط عيوني بس انطر
الا اصلي الفجر
!!
واستغفر الله لما تنطر الاذان
يطول
مادري ليش
:)
ومجلة ماااجد
اللله ....هذي بروحها يبيلها بوست
انا اتذكر من احلى سفراتي بحياتي كنت صغيره ورحنا الامارات ورحنا مدينة العاب في العين اعتقد الا حاطين شخصيات وواحد من الشخصيات لابس على شكل ماجد
زين مااستخفيت
:)

esTeKaNa يقول...

clouds
~~~~~~~~
يا حبي للغيم انا
:)
ليش يضيق خلقج وانا اخيتج؟
استمتعي بكل لحظاتج؟
ما كنتي تحلمين تخلصين دراسه
وتشتغلين
وتصيرين عروسه
وتيبين بيبيه؟
الحمدلله ربي قاعد حقق جزء كبيير من احلامج وكل شي حلو ياي بالطريج
كل عمر له حلاته وذكرياته
:)

esTeKaNa يقول...

هنوفي
~~~~~
يا مسا الهنوفي
يا هلا ويا مرحبا
:))
الله الله يا زينها من ذكريات
اهم شي شريط المقاطع
واي عندنا اشرطة تضحك تسمعين فيها نفس اللي قاعده يم المسجله بتسجل
لوووول
واي انا لحين اتنطع بالجباتي
ولا ينزل ولا يصعد عندي
!!
انتي اللي مشكورة على هالمرور
وعلى ذكرياتج الجميلة
:)

esTeKaNa يقول...

حياتي هدف مو عبث
~~~~~~~~~~~~~~~~~
واذا رديتي صغيره
بتقولين واي متى اصير كبيرة
:Pp~

esTeKaNa يقول...

feelingstalk
~~~~~~~~~~~~~~~~
ياهلا ويا مرحبا
ايييي
انا بعد مسرحيتي المفضله
كنت حافظتها من قلب جنه بيمتحونني فيها
:)

esTeKaNa يقول...

vancouver
~~~~~~~~~~~~
اهلييييييييين وسهلييين
:)
اهم شي اكل الصبح
ولوية المطيخ
والخرابيط اللي نسويها
!!
حلت دنياج والله
:*

esTeKaNa يقول...

artfull
~~~~~~~~~
توقع غير المتوقع
:Pp~

وردة حب يقول...

مع انة البوست حلوو وفية طعم للايام الحلوة

الا احس بشوية حزن ماادري هي حزن عالايام اللي راحت

ولا عالعمر اللي يركض بدون حساب

الله يرزقج ويديم الايام الحلوة عليج:)

shakshaka يقول...

allaaah ya youm il arbe3a athker kel arbe3a raktha 3la hungry bunny il 3daileya anagz bil nagazeyaaa wo banat khalaty ya3ni akbar menee fa no3hum mujalad majid madre shisma wana ma '3aair bs anaaagiz loool 3ad wo youm obart la 3ad got an6er larbe3a na6ra 7ag yam3at banat khalaty wo suwalif flan wo 3ilan:P

esTeKaNa يقول...

وردة حب
~~~~~~~~
كلنا نحن للأيام الحلوة
بس المفروض هذا ما يخلينا ننسى فرحتنا بالايام اللي نعيشها
:)
حياج الله يا وردة الحب
:*













shakshaka
~~~~~~~~~~~~~
تصدقين؟
اكيد انتي كنت رفيجتي بالنقازيه
وهذا سبب من اسباب حبي لج
:pP~
وااااي ما ودرنا الا سوالف فلان وعلان وبنات الخاله ترا
لوووووووووووووول
:)))