الجمعة، أبريل 18، 2008

(4)

(1)
~~~~
مع ارتفاع درجات الحرارة الانتخابية
تشتعل الحرب الكلامية
فذاك متحمس متفائل...وآخر يائس وخامل
وما بين هذا وذاك...يكثر الكلام
!!
كن صادق مع نفسك
كن حريص على كلماتك
عندما تقتنع بشخص ما...لا يعني ان هذا الشخص منزه عن الأخطاء معصوم
إن اكتشفت ان هناك خطأ ما عبر عن رأيك وقل :
لي تحفظ على ذاك الموضوع
وإن كنت بشكل عام موافق على عموم مواقفه وشخصه
!!
ان كنت تظن بأنه رجل صالح ورجل خير..لا تنسى:
أنك تحسبه كذلك والله حسيبه
فالله وحده هو العالم بالنوايا والاسرار
....أسمع،وتسمع،ونسمع الكثير
تثبت
تحرص
قبل أن تنقل كلمة او اي امر في ذمه شخص او في اخلاقه
عندما لا اقتنع بقريبك،بصديقك أو بمن انته له متحمس وقريب
هذا لا يعني اني ضدك انت
!!
لما لا نتعلم كيف نحترم اختلافاتنا؟
.
.
.
قبل ان تقرر انشغالك مع شخص ما ،او تقرر ان يكون صوتك لسين من الناس
فكر..وقرر...ويكن قرارك نابع من قناعاتك لا قناعات الغير
استخير ،ابذل سبب،ولا تنسى الدعاء لهذا البلد
وما أحوج بلدنا لدعاء أبنائه
(2)
~~~~~~~~
مدوناتنا ...كتابنا المفتوح برغبتنا للغير
انت حر
تكتب وتنقل ما تريد
ولكن
وتحت اللكن هذه عشر خطوط
لا تنسى ...ما ينطق من قول الا لديه رقيب عتيد
!!
كن راقي بالتعبير عن مشاعرك دون ان تخدش حياء الغير
كن محترم بنقل ما تريد نقله دون ان تأخذ ذنب كل عين
تذكر...انت لست وحدك هنا
ان كنتي بنت...فليس كل ما يقال مابين الصديقات يقال هنا
وان كنت شاب..فليس كل ما يقال في الدواوين بين الرجال يقال بجرأة هنا
نحن احرار بحدود
ان كنت لست قادر على هذه الحدود
ضع كلمه سريه تمنع زوار مدونتك الدخول
او امتنع عن التعليق في فضا مدونات الغير
!!
عندما تفتح مدونتك للغير ليقرأ
ويعبر
ويعلق
فانته تفتح قلبك لهم بيت
تفاعل معهم بصدق
وقدر مرورهم وتعقيبهم على كلماتك
وتناقش معهم دون ان تجرح باشخاصهم
!!
انتقد ولا تجرح
كن جرئ وصريح...ولكن لا تكن بذئ
!
(3)
~~~~~~
حضرت دورة لمدة شهرين وكان يفترض ان استلم الشهاده شهر 12
الى هذا التاريخ لم يتم استلامي للشهاده
!!
اربع مرات اصل لمقر المعهد ويكون الرد:
آسفين شهادتج الوحيده المتأخره
تم اعتمادها في مصر وتأخرت في دبي
انتظرت ،واعطتيهم فرصه...ولكن مو معقوله اربع اشهر لوصول الشهاده من دبي
شدعوة؟
قررت اكون شريره
رفست الباب ودخلت
وزامة الحلج
ومقرره اني ابي اتهاوش
شنو سويت؟
اللي سويته اني جابلت الريال وقلت له :
انا حيل متضايقه
مو معقوله جذي
ما راح استفيد من الشهاده اذا ما وصلت الحين
انته ضميرك مرتاح
!!
قالي انا غلطان وآسف وراح اسوي اللي اقدر عليه
ابتسمت
شكرته
ومشيت
:(
متى اعرف اتهاوش؟
متى اصير شريرة؟
بخاااااااطري اصير شريرة ولساني طويل
!!
(4)
~~~~~~
قدمت للعمل في مكانين...الأول ارغب فيه بشده
والثاني تقديمي ليس الا ليكون كفرصه أخرى
!
الأول بذلت كل ما في وسعي ليتم قبولي هناك
والآخر قدمت فيه دون اهتمام
ورغم ذلك تسهلت أموري فيه مبدئيا
وتم الاتصال علي لأحضر المقابله الشخصيه يوم الأحد صباحا
هذه أول مقابله عمل احضرها
اشعر ببعض التوتر
ولكن ...الله المستعان
ادعو لي
:)

هناك 60 تعليقًا:

waterfall يقول...

السلام عليكم

تبين تعرفين تعصبين وتخلين اللي جدامج يحس بعصبيتج ؟؟

انا تعلمت هالشغله من ابوي

اول شي خزي خزه تخرع
بعدين عبري بويهج واذا احتقن ويهج يكون المفعول اسرع
ثالث شي عبري بايدج
رابع شي كلمه السر وهي وبعديييين يعني ؟؟؟ ما يصير جذي
راح تييج ضحكه بس مسكي روحج وحتى اذا سوالج اللي تبينه لا تبتسمين جنه ما صار شي
لا ابتسمي ابتسامه مجامله على كتر


جربي وقوليلي اذا ضبطت الحركه

esTeKaNa يقول...

waterfall
~~~~~~~~~~~~~
وعليكم السلام ورحمة الله وبركاته
!!
مممممم
يعني عادي ابتسم على كتر؟
مو انا ماعبر لازم اتبوسم حمدلله والشكر
ويهي كله يتعبر
بس حتى تعابير ويهي نادر ماتعصب
ابي اعصب
:Pp~
بجرب الحركة
ونشكر لك خدماتك ونصائحك الجليله
الله يحفظك ولا يحرمك من الوالد يارب
خوش تعلوم
:)

bin3li يقول...

يا عصبي أنته
في تطور
اليوم رافسه الباب، باجر كافخة موظف
ورا باجر متناشبه ويا المدير في الشارع
في تطور
بس أنتي تفائلي و إن شاء الله الخير بقبال
:P


موفقة إن شاء الله في المقابلة

mtfa2el يقول...

اشوف طاريي ثالث سطر
شسالفة :p
اللي بالجدر بيطلعه الملاس يوم 17 /5

Zabo0o6a يقول...

موفقة حبيبتي :)

Sn3a يقول...

انا لما اعصب اعصب
بس اعصب بادب
يعني اللي جدامي مايدري انا شنو لول

الله يوفقج بالمقابله انشالله
وربي يكتبلج حظ الدنيا وجنه الاخره

SolaimaN يقول...

الله يوفقج انشالله يا شريرة

:)

violinist_q8 يقول...

الله يوفقج ان شاءالله للامانه تستاهلون كل خير

New Bride يقول...

يا حلوج استكانه ما تلوق عليج العصبية

انا هم خذيت دورة و صارلي خمس شهور ما وصلت شهادتي لي الحين

تصدقين المكان اللي تتعبين عليه دايما يصير فيه تأخير و المكان اللي ما تدرين عنه يتسهل

هذا دليل انه التساهيل بإيد رب العالمين :)

الله يوفقج

5roofa يقول...

اناا بعد اي اصير شريرة تين استكانه نسوي نادي لتعليم الشر لول

مووووووووووووفقه يالغاليه ربي يفتحها عليج و يوفقج و ينولج الي في بااالج قولي اميين

و تطلعين من الوظيفه و يقولون وي و وي هذي منو الي يت بس خاص كنسلو كل اللقائات لقيينا الي نبيها و تصيرين نفس دعاية فير ان لافلي سيده يختارونج و يقولون

هيديي الي بدنا ياااهااا

لوول

:p

salamz sis...

الخيلاء يقول...

مسائج سكر :)

-1-
الله يقدرنا على حسن الاختيار
و انه الكويت اتكون نصب عيونا
وقت التصويت و نتذكر انه الله
سبحانه اهو رقيب علينا
:)



-2-
وايد ناس ينسون او يتناسون
انه المدونات عنوان للبيئه
و التربيه الي تربوا عليها

و الله يعينا انه انكون سفراء للبيوتنا

:)


-3-
استكانه دوره ICDL
اذا هالدوره ترى يعلون القلب
على ماتوصل شهادتها انا 3 شهور
يالله استلمتها و من زود الحظ
الدوره 7 اسابيع على حظي صارت
شهرين و نص .. وبالزور استلمتها

بس ان شاء الله تستلمينها قريب

:)


-4-

يالله يارب يا كريم
انك اتوفج استكانه
و ترزقها الوظيفه التي اتسرها
و تحقق احلامها و امنياتها
و ان شاء الله اتكون وظيفه احلامج
موفقه .. و بشرينا :)

DiLLi O MiLLi يقول...

هههههههههههه

كـاااااسره الباب !!؟؟
أستكانة كااااسرة الباب !!؟؟ عسى ما أنـثـلمتــــي .. أووووه ... قصـدي تعورتي !!؟؟
:)

وبعديييين شخباااار "الضميــر"!!؟؟
قدييييمه ضمير .. ألحيين الناس مااا تمشي بالضمييير
:)

حركتج هذي .. بشري بالشهاده على قولة أبوي : راح تشوفينها بدربيل مقلووب هههههههه
:)

ذكرتيني بوحدة نسخه منج بالخناق والتعصب
لا قلتلها : هااا اشسويتي عسى رديتي عليها ووقفتيها عند حدهاااا !!؟؟
ترد وتقول : أأأي
وتهذر علي وتسكت !!؟
أقولها : هاااا أي وبعدين !!؟؟
تقولي : وبس !!ء
دللي : شنووو وبس !!؟؟ ويين "وقفتيها عند حدهاااا" راحت!!؟؟
ترد : هذا اللي قلته .. شنوو موو كفاية !؟
دللي : أنتي لووو بايسه راسها بعد .. جااان حــدج وقفتييييهاااا عند حـدهااااااا !!!!!!ء



حبيبتي .. الله يوفقج بالمقابلة وتفائلي
تفائلوا بالخير تجدوه
أنشااااء الله وويين ما تطقينها .. عدله



:**

`~MnO YeNSa! ~` يقول...

mashlaa 3lech :**
eslobch
7lw
ragii
sahel
ya3jbnii
miss you
:*


etha ta3lmtii
etzfeen
please
3lmeni

صقر قريش يقول...

(1)
معكِ في كل كلمة ليت كل الناخبين يحسوا بالمسؤولية وهم يصوتون لأي كان والمهم في كل شي ان تصوت لرجل يخدم دينك ووطنك بتفانٍ وإخلاص بالتوفيق لكل من يريد مصلحة ديننا ووطننا اللهم آمين.

(2)
وأيضا اتفق معك في كلامكِ هنا جزاكِ الله كل خير نعم للاسف هناك مفهوم خاطئ يقولون مدونتنا فكتب فيها مانشاء نعم تكتب فيها لكن بحدود وحدودها ألا تتعدى الأدب فهناك اخوات يتابعن الموضوع (هذا للمدونين) وإيضا على أخواتنا المدونات ألا يتكلمن بكل شيء وخصوصا مايخصهن فهناك شباب يقرأون كلامهن إلا غذا جعلن مدوناتهن لايدخل إليها إلا من دعي إليها ولاتدعى إلا الفتيات فهذا شأن آخر والعكس صحيح نتمنى أن تكون لنا حرية مسؤولة فنحن
نريد الحرية وليس التفلت والإنحلال
(3)
عفوا شهادة هذي ولاسيارة؟!!أربع أشهر وماعطوج إياها يحليلهم الظاهر بعد ماخلوها تقز بمصر خلوها تقز بدبي شلون لوكانت بأمريكا؟!!
وليش تبين تصيرين شريرة وليش الصراخ إيبي أبوج الله يطول بعمره خل يرنجفهم وإذا مو ابوج أخوج ولا اقول كتبي عنوانهم اروح أرنجفهم (إلا أذا كانوا ربعي:) ) عموما هذي الحياة بديرتنا للأسف ماكو ضمير الله يعينج عليهم.

(4)
الله يوفقج بحياتج المقبله وطبعا لازم التوتر يكون موجود بس إن شاء الله كل شي يعدي على خير وتتوفقين والله يعطيج على قد نيتج إن شاء الله.

موضوع رائع كالعادة سؤالي الأخير:

متى ستنتهي المقاطعة؟:).

طموح نحو أفق الإبداع يقول...

لأول مرة أزور المدونة
أعجبتني منذ قراءة الكلمة الأولى

ما شاء الله راق لي أسلوبك كثيرا

في شيء مشترك بينا ، ما أعرف أرد في المواقف هذي .. لكن الدنيا تعلم ولازم نتعلم ، إن لكل انسان مفتاح للتواصل و التفاهم معه ومن خلال الملاحظة ، خذوهم بالصوت ليغلوبكم ناجحة كثيرا ، لكني لا أطبقها لأني لا أستلطف هذه الطريقة ...

موفقة عزيزتي لكل خير
وسعيدة حقا أن تعرفت على مدونتك الجميلة

manaf يقول...

اللي قلتيه كان بس لأنج متوتره والا من صج


:))


مو متعودين عليج عصبيه


..



انشالله تنقبلين بالمكان اللي تحبينه

حلم جميل بوطن أفضل يقول...

أتمنى طباعة هذا البوست و إهدائه على عواشة دي دي كاو

esTeKaNa يقول...

bin3Li
~~~~~~~~
صج صج انته حاس في تطور؟
الله كريم طمنتني
انته قدوتي بهالمجال
:Pp~
اجمعين يارب

esTeKaNa يقول...

mtfa2eL
~~~~~~~~~
انته متحمس متفائل؟
تبارك البوست تبارك
:pP~
عندي سؤال
ليش ما تخلينا نسير على بلوقك
:(

esTeKaNa يقول...

zaboOoO6a
~~~~~~~~~~~~
اجمعين يارب
ماقصرتي
:)







sn3a
~~~~~~
hahahahahaha:))
يختج سنعه انتي حتى لما تعصبين
انا بعد
اعصب بأدب
بس الظاهر راحت موضة السنع
:Pp~








SoLaiman
~~~~~~~~~~~~
منين طالعه الشمس؟
:pP~
اللله يسمع منك
ابي انقبل
وابي اصير شريرة
:)











violinist
~~~~~~~~~~~~~
يوفق الجميع يارب
يزاك الله كل خير
:)

esTeKaNa يقول...

new bride
~~~~~~~~~~~
صج والله خمس شهور؟
انا اذا ما قدمتها حق الوظيفه
ما راح احتاجها بعدين
!!
اي والله التساهيل بيد رب العالمين
عسى ربي يوفقج يارب ويرزقج كل ما تتمنين
:))








5Roofa
~~~~~~~~
شوفي
انا اقول نورة :
كيف تصبحين شريرة
وعقبها لما نتطور ونتقدم بهالمجال
نفتح نادي :
خروفه واستكانة لتعليم الشر
:Pp~
واي ذكرتيني بالدعايه
لووووووووووووول
الله كريم
واي رفعتي معنوياتي
:))

esTeKaNa يقول...

الخيلاء
~~~~~~~~
يا زينج ويا زين تعليقاتج
تبردين القلب
تحسسيني بقيمة كل كلمة كتبتها
:*
اي والله دورة اي سي دي ال
انا بعد خذيتها شهرين طلعت من عيني
وايد كانت مملة
شدعوة كل هذا يعتمدونها صج ما صارت
:(
اميين يا بعد قلبي انتي واجمعين
ما قصرتي

esTeKaNa يقول...

Dilli o Milli
~~~~~~~~~~~~~~~~
ياهلا ويا مرحبا بالدلللي والله
:*
انثلمتي ها؟
هههههههههههههههههههه
انتي ما شفتيني
عايده اللقطة جم مرة قبل لا ادش
كنت ابي لا دشيت يتراعدون
بس الله وكيلج بس دشيت تدرين شنو قالو لي؟
يا اهلااااااااااا
كيفك
وحشتينا
!!
جان استحي
ههههههههههههههههه
لا مالج شغل
ترا انا اعصب والله
بس مممممممممم
نادر نادر
انا الحليم اذا غضب اشفيج
:Pp~
سلمي لي على رفيّجتج عورت قلبي
ذكرتني بواحده
احم احم
:))
والله انا متفائله
وبدعي
والله كريم
:**

esTeKaNa يقول...

MNo Yensa
~~~~~~~~~~~~
حبيبتي واللله
الله يجبر بخاطرج انتي
دايم ترفعين معنوياتي وتشجعيني
اللله لا يحرمني
:**
اقري تعليقي حق خروفه
تبين تدشين الدورة ولا نادي الشر
اختاري وتدللي
hehehehehe
:))

esTeKaNa يقول...

صقر قريش
~~~~~~~~~~
اي والله شهاده ولا سياره؟
مممممم
والله عطيتني خوش فكرة
ماكو الا اقول حق اخوي جود يصارخ بدالي
:)
يزاك الله خير ما قصرت على المرور والتعليق الحلو
والله يا صقر طول بالك علي
ما من مقاطعه
بس شوف باجي البلوقرز
انا مقصره بحق الجميع
مو قاطعه صقر شخصيا
والسموحة من اخيتك
مو لاقيه وقت كافي للانترنت
:(

esTeKaNa يقول...

طموح نحو أفق الإبداع
~~~~~~~~~~~~~~~~~~~~
ياهلا وأمية هلا
هذي الساعة المباركة اختي العزيزه
وعلى فكرة
لك اسم جميل جدا يدفع للتفاؤل والطموح واللله
:)
الله يوفقك وحياج الله
نورتي المدونة كلها

esTeKaNa يقول...

manaf
~~~~~~
فقدناك من غير شر
!!
ترا انا اعصب
بس يمكن كل اربع سنين مرة
:)
امين وما قصرت
وعسى ربي يوفقك ويحفظك








حلم جميل بوطن أفضل
~~~~~~~~~~~~~~~~~~~
معطيتك هذي المهمة
والبلوق وكل بوست فيه تحت امرك
:)

حسافتج يا كويت يقول...

استكانة انتي مو توج متوظفة؟؟

وعل فكرة أنا شاهادتي الجامعية ليلحين ما خلصت وقالولي تخلص عقب خم سنسن من التخرج

وبقالي سنة ونص

عادي

mtfa2el يقول...

انتي ثالث سطر تقولين
فذاك متحمس متفائل
انا ماني متحمس و صراحة ماني متفائل بالوضع السياسي كلش :(
البلوق ماخذ اجازة :p

قلب طفله يقول...

و الله يا استكانه اذا عرفتي

شلون تصيرين شريره علميني

بلييييييز

نفسي اصير عصبيه و شريره

على حقي و لا غيره اخش العصبيه

لوقت العازه لووول

و الله يوفقج حبيبتي و يسهل امرج

بالوظيفه اللي تتمنينها

^_^

Peace يقول...

اييدج بانه كل واحد لازم يعرف حدوده
و يحترم حريات الاخرين

mantovani يقول...

انا فاشل في العصبية
و اتمنى اني اعرف اعصب

charisma يقول...

ياا مسا الاشواق يا روحى

:**

اصلا مو لالالايق علييج تصيريين شريره واتهاوشين
ما يلووق يا ماما
استريحاى

:)))

ومن كل قلبى الله يوفقج ويسهل امرج يا استكانه يا بنت امج وابوج

:**

ولد الديرة يقول...

استكانة و عصبية
!

ما يستوي
!

لو قوري ممكن

خلج مثل عصير سيزر

طبيعية :)

الزين يقول...

واااحلوهم اللي يعصبون

كلش مو لايق

بس تعالي انا بعطيج دروس

بتصيرين أقشر من القشاره

:**

ARTFUL يقول...

شصار على المقابلة؟؟!!

5roofa يقول...

استكانه طمنيني عليج شصار بالمقابله؟؟

ها نكت نون؟؟

لول طمنينا خيتو

salamz sis...

Shaima'a Alkandari يقول...

موفقه يارب

وبعدين ليش تبين لسانج يصير طويل خلج نفس ماانتي وعاملى الناس باخلاقج

وبعدين بشري شصار وياج

وشهادتج يت ولا لأ


وحلو ان الواحد يتحجى بس بحد

Barrak يقول...

قررت اكون شريره
رفست الباب ودخلت
وزامة الحلج


زامه الحلج هذي اخر واحد قالها سنة 1920


الله يوفقج

فريج سعود يقول...

كلام كبير
ما تكفيه استكانة يبيله قلاص
يعطيج العافية والله يوفقج بالوظيفة

someone_q8 يقول...

السلام عليكم
اختي استكانه , اتمنى ان تكون المقابلة مرت على خير ,
بالنسبة للناخب حاليا الوضع اختي مو مثالي وايد كل من ينتخب يا حق حزبه ولا تكتله او حق قبيلته او حق ولد عايلته , وان شاء الله بالمستقبل يكون للناخب وعي كامل انه ينتخب للكويت فقط لا غير ,

وبالنسبة للعصبية , الحمدالله انج مو عصبية وان حاولتي لذلك فا اعتقد انها عادة مو حلوه خصوصا للبنت , ولا تنسين قول رسولنا الكريم صلى الله وعليه وسلم : ليش الشديد بالصرعة وانما الذي يمسك نفسه عند الغضب . او كما قال الحبيب المصطفى
عرفتي الحين ان العصبية مو حلوه وان الصفة اللي فيج من اعظم الصفات :))
اتمنى لج وظيفة تليق بأخلاقج الطيبة لانج تستاهلين كل خير
موفقه اختي

U-Turn يقول...

مســاج الله بالخيــر:)
بالنسبــه حق "part 1 & 2"
مـــا عندي أي كـــلام أزيده عليـــج ..,,
كفيــتي ووفيـــتي :)
يــاليـــت في من يســمع ويطبــق


أما بالنسبه حق "part 3"
معنــي ما أحب أنصــح أحد بنصيــحه أنــا ما أطبقهــا على روحي :$
بــس بقولهــا لج وإن شــاء الله تفيدج
أول شي ليمــا تتعامليــن مع أحد بإحتــرام واهو غلطــان صدقيــني راح يستـــحي منــج ويحــاول يساعدج ..,, " والنــاس أجنــاس بالنهــايه "

أمـــا بالنسبــه أنج تكــونين إنســانه شــريره ..,, ما أعتقــد تقدرين من كــلامج قلبــج طيــب وايد ;)
ومو لازم تتهــاوشيين ..,, فكري فيها إن كل هالصبــر والنطــره بيكــون لهــا نتيجه
ولا تنسيــن من صفــات المتقيــن
وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللَّهُ يُحِبُّ الْمُحْسِنِينَ) (آل عمران:134)
وإن شاء الله تكونين ونكــون منهم ;)

جنيــني تفلســفت وايد ..,, عادي تحمليني شوي ;p
أمــون صح ;p


المهم ال " part" الأخيير

الله يــوفقج ويعيــنج ويكتـــبلج إلي فيــه خير وصالــح


و سامحيني على الروايــه الي كتبتــها ;p
والتـــفلسـف الزايد
والرسمــيه إلي مــالهــا داعي

وســـلامة قلـــبج;)

,

esTeKaNa يقول...

حسافتج يا كويت
~~~~~~~~~~~~~~~~~
اي موظفه توظيف مؤقت
:)
عقب سنتين من التخرج اعتقد
!!
الله يوفقك يارب









متفائل
~~~~~~~~~~
تفائل واجتهد بالدعاء
وربنا سبحانه رحيم فينا وبديرتنا
تفائل يا متفائل
:)
ومن غير شر
نتمنى يكون بريك واجازة مؤقته

esTeKaNa يقول...

قلب طفلة
~~~~~~~~~~~
واي طلعنا كلنا طيبين
لوووول
صاجة الشر يفيد وقت العازه
الله لا يعوزنا قولي آمين
:)
حياج الله















peace
~~~~~~~~
اوافقج الراي
:)









mantovani
~~~~~~~~~~~~
عندي وعندك خير
:)

esTeKaNa يقول...

charissma
~~~~~~~~~~~~
يا هلا وأمية هلا
:)
ياربي ينشرح قلبي كل ما قريت تعليق منج....آمييييييييييين يا بعد قلبي واجمعين
يعني تهقين ما ينفع؟
:pP~












ولد الديرة
~~~~~~~~~~~~
عساك ما تنضل
حكم حكم
:)
قوري ها؟
:pP~







الزين
ّّّ~~~~~~~
يا مسا الزين كله
:*
ابي دروس
بس مو بالقشاره
بشي ثاني
:pP~

esTeKaNa يقول...

artfuL
~~~~~~~~
انته شفت واحده بالمقابله يسئلونها وتسئلهم؟
هذي انا
:pP~
والله انا وايد كنت عفويه وسولفت جني مسيره عليهم
والله كريم
:))










خروفه
~~~~~~~~~
الله كريم
!
ان شا ءالله خير
مسكي النون لي يطلع القبول وابشرج
:)













شيما الكندري
~~~~~~~~~~~~~~~
للحين ما وصلت الشهاده
!
والمقابله زينه
بس الله كريم
:)
شكرا على مرورج وحياج الله

esTeKaNa يقول...

barrak
~~~~~~~~~~
hehehehe
:)
صج والله؟
ياربي ليش تحسسني اني عيوزه؟
:Pp~










فريج سعود
~~~~~~~~~~~~
الله يعافيك وما قصرت
:)



















SOMEOne-q8
~~~~~~~~~~~~~
جزاك الله كل الخير
وماقصرت
الله يشهد تعليقك فرحني وايد
وامين ماقصرت
عسى ربي يوفقك لكل خير يارب
:)














U-TURN
~~~~~~~~~~
ياهلا ويا مرحبا باختنا الجديده
مرورج جميل
وعند استكانة قولي كل اللي بخاطرج
محلج القلب قبل البلوق
فلا تتعذرين من شي
:))

Purplecious يقول...

weeeen ta3leqy?????

:(((((

ARTFUL يقول...

بس هذا اهو

سوالف أهم شي تكونين واثقه من نفسج

وتجاوبين على أسئلتهم

مع شوية تفلسف بالانجليزي

لانج اذا تكلمتي بالانجليزي جنج صابه عليهم ماي باااارد

وجم كلمه بتخصصج

وشوية فلفل علوب ((واسطه))

وأولا وأخيرا ربج الرزاق

لا تحطين 1000 واسطه وأحسن المقابلات ولا يمكن ابوج صاحب الشركة والله مو كاتب لج اتوظفين ماراح اتوظفين

ويمكن من غير ما تسوين شي تدق عليج الشركة وتعطيج عرض من غير مقابله

هالله هالله بالدعاء

والله يوفقج ويكتب لج الخير

=)

kazmawy يقول...

قوةةةةةةةةةة استكانة شلوونج شخباارج
الله يوفقج يبا دنيا واخرة
ماشاء الله المدونة منووورة وهالكلام العسل الى يقطر منها والحجى الكبييير يالسيااسسيية

الله يكتب الخير لديرتنا يارب
خوش بوستات وان شاءالله تتوظفين بالمكان المناسب
ولا تنسين
ماخاب من استشار الخلق واستخار الخالق سبحانه

Najmah يقول...

1
صح لسانج
لماذا لا نتعلم ان نحترم اختلافاتنا؟
كنا دايما نسمع
الاختلاف في الراي لا يفسد للود قضية
لكن للأسف اللي اشوفه يفسد ونص
يضيق خلقي من هالموضوع
اذكر اول مادشيت الجامعة وكنت مشتطة ابي اشتغل حق الانتخابات
ابوي قال لي اذا شفتي انج راح تخسرين علاقات لا تشتغلين
اذا حسيتي ان هالشي يأثر على بعض صداقاتج حافظي على صداقاتج وخلي الانتخابات
الحين بديت احس بكلامه
ليش في وايد ناس تخسر علاقات طيبة عشان منصب وعشان ماديات
!
يعور قلبي هالموضوع




2
نحن احرار بحدود
صح
:)



3
اذا تعلمتي علميني :\
اكره العصبية
لما احد يعصب جدامي احس بخنقة
حتى لو ماعصب عليي
حتى لو على شخص يمي اتضايق :\
بس شريرة
والله مرات لازم تصيرين شريرة
بس مااقدر
بس شاطرة بالكلام :P



4
الله يكتب لج اللي فيه الخير يارب :)

مُحَسّدْ يقول...

موفقه استكانة
ولا تنسين عزومة الوظيفة :)

حسام بن ضرار يقول...

معاهد التدريب صج ترفع الضغط

اذا كنتي ماخذه الدوره التدريبية عن طريق جهة عملك

احسن شي تهددين المعهد بأنج بتكتبين كتاب بالحاله و انج للحين ما استلمتي الشهاده

" راجين منكم اتخاذ ما يلزم"

و تخلين الشئون الادارية او شئون الموظفين يشوفون شغلهم

هالمعاهد ما يفيد فيهم إلا جذي

Kuw_Son يقول...

الظار قاعدين يسوون شهادتج طرشي
:P

الله يوفقج في مقابلتج و يسهل عليج ..

و كلامج اللي سبق سالفة الدوام مميز و كلنا نرغب في تحري الرجل الكفؤ لتمثيلنا .. و من باب الأمانة و الصدق و احترام الرأي الآخر أن نكون منصفين و عقلانيين في طرحنا في المدونات من غير تجريح و لأشخاص .. اللي أشوفه إن بإمكاننا نقد فكر أو تصرف أو توجه وليس شخصا بذاته ..

موفقه

esTeKaNa يقول...

Purpe.
,,,,,,,,,,
وي وين راح تعليقج؟
ترا ما وصلني شي
انا انزلهم اول باول
:(

esTeKaNa يقول...

artful
~~~~~~~~
تكفي اقولك يزاك الله كل خير؟
والله ما تتخيل شكثر كلامك يبرد القلب
سبحان الله مرات وايدة في كلام نعرفه
وندري فيه
بس نحتاج نسمعه اكثر واكثر عشان يزيد يقينا فيه
!!
ندعي ونجتهد بالدعاء
وما ندري الخيرة وين
الله المستعان
:)
الله يوفقك ويحفظك ولا يحرم استكانة وبلوق استكانة من صدق تواصلك

esTeKaNa يقول...

kazmawy
~~~~~~~~~~
ياهلا ويا مرحبا
:)
هذا قليل مما عندكم يا الكظماوي
وصاج والله..مهما يكون لنا رغبه بشي
ما نستغني عن الاستخاره
والخيرة فيما اختاره رب العالمين

حياك الله

esTeKaNa يقول...

najmah
~~~~~~~~
ياهلا بالنجمة
اللي تنور كل بوست وكلمه
:)
الله لا يحرمج من ابوج الغالي
كلامه عدل
هذا واقع
!!
مهما احاولتي تتجنبين الصدام مع بعض المتخلفين معاج الا انه لابد منه خصوصا اذا كنتي بالواجهة وتمثلين ناس معينين
نادر من يفهم رقي الاختلاف
فعلا مووضوع يعور القلب
:(
وبنسوي نادي نعلم الشر والعصبيه
ونرحب بكل المنضمين
:Pp~
ويوفقج يارب ويرزقج الدرجات العليا بالجنة والآخره قولي آمين
:)

esTeKaNa يقول...

محسد
~~~~~~
اجمعين يارب
وابشر بالخير
:)













حسام بن ضرار
~~~~~~~~~~~~~~~
هذي الساعه المباركة
من زمان ما نورت البلوق
:)
للاسف..ماخذتها بروحي
لاني الى الآن لم استقر بجهة عمل
انتظر القبول والتعين المعلق حتى انتهاء الانتخابات

شكرا على النصيحة
:)














KUw-son
~~~~~~~~~~~
حياالله ولد الكويت
عاش من شافك
:)
تهقه طرشي؟
:Pp~
يزاك الله خير وعسى ربي يوفقك ويرزقك احلى واكثر من كل ما تتمنى
وعدل كلامك ولله
درر درر
:)

لؤلؤة يقول...

بوست حلو...ويوسع الصدر
تسلمين استكانة