الثلاثاء، مارس 18، 2008

مشاهدات يومية ..وهمسة ليلية

كان ممر طويل وضيق
وكانت خطواتي سريعة
لم انتبه لوقوفه إالا حين شاهدت بياض دشداشته يقف أمامي
...حركة مكرره
اتقدم خطوة ويتقدم معي
ارجع خطوة يكرر رجوعه معي
نكرر الحركة مرتين فأقف مكاني واستحثه ان يتحرك:
تفضل أخوي
!!
يعقد النونه
وتعتفس ملامح وجهه
ويعبر عن غضب لا داعي له من اعماق قلبه:
اوففففففففففففففففففففف....ويمشي
تنبهر كل ملامحي واناا افكر
اهو ليش عصب علي؟
مو جنه يفترض ان اهو اللي يوقف وانا البنت امر؟
.
.
.
.
.
.
كنت قادمه لأخذ بعض الأوراق من هذه القاعه
تتميز القاعه بباب ثقيل
كبير
عادة اجد متبرع يفتح لي الباب او يمسكه لي على الأقل
ولكن هالمرة كان موقف جديد علي
الأخ المحترم يدخل قبلي
وطرااااااااااااااخ الباب في وجهي
!!
لييييش يا حافظ؟
وقت خروجي من القاعه لاحظت ان الاخ المحترم خرج بعدي
كان يقف خلفي
وعادة انا امسك الباب لمن يكون خلفي
لا شعوري فتحت الباب لأقصى مسافه
وتركته...وطااااااااااااااااخ
:D~
لا أعلم لما اكون شريرة في بعض الأحيان
ولكني أكيده اني لا اكون شريره بلا سبب
.
.
.
.
ما سبق كان مثالين لقليلين السنع الذي اصادفهم يوميا
وبجانب قليلين السنع هناك موديل للمتميلحون ثقال الدم والطينة
!!
يفتح باب الاصنصير ليراني اقف وحدي متوجهه للدور الارضي
يدخل راسه ويبتسم ابتسامة خبيثه:
صباح الخير
ويدخل ويسطر بجانبي:
الأخت جديده؟
اختصر اجاباتي :
اي نعم
يبتسم اكثر:
حياج الله انا فلان الفلاني
و اعمل في ...و
من الدور السادس الى الارضي يشرح لي قصه حياته
وعمله
ولا نصل الدور الارضي الا وقد وصل لمرحلة التنكيت
!!
دائما افترض حسن النية في من حولي ولكن،لدي كاشف احساس يكشف لي ولو مبدئيا الشخص من عينه
من ابتسامته
من نبره صوته
هناك نوعية من الناس لا ترتاح من وجودهم قريبن منك بصورة كبيرة
وهناك حدود مفترضه مابين البنت والرجل اياكانت العلاقة التي تجمعهم في العمل وغيره
وبجانب هذا كله هناك تصرفات بسيطة تعكس لك ولو قليل من الشخصية الأخرى التي تتعامل معها
ومشكلتي...اني انتبه لبعض التفاصيل الصغيره التي قد لا ينتبه لها غيري
.
.
.
.
هناك ندرة وانقراض في السنع
هل انا وحدي من الاحظ ذلك ؟
السنع بامور اخلاقيه بسيطة تعكس جوانب جميله من رجولة الشخص وانوثة البنت
تلك الرجوله التي تجعل الشخص يفترض بالبنت التي تقابله دائما حسن النية
السنع في نظرة العين حين تخاطبه فيحترم كيانها وتفكيرها
حين يحترم حدودها ويحافظ عليها كما يحافظ على أهل بيته
حين يخدمها بأي امر ليس لسبب سوى ان يخدمها
وبجانب آخر اصبحنا نفتقد الأنوثه الراقية
نفتقد البنت المحترمه التي تحترم نفسها قبل كل شئ وتفرض احترامها على من حولها بتعاملها ورقي اسلوبها ومحافظتها على منظرها الراقي دائما
أمس رأيت منظرين متشابهين ولكن في اماكن مختلفة
الأولى تقف بسيارتها في الاشاره المجاورة لسوق شرق
تخرج من حقيبتها قلم تحديد واحمر شفاة لتزين شفتيها دون اي اعتبار لمن يوجد حولها في الشارع
والأخرى اخرجت قلم كحل لترتب كحلها في وسط المطعم
جنه عيب ولا تروالي؟
لي زميلة بالعمل متكلفه جدا في لبسها
في مكياجها
في تسريحات شعرها اليومي
احترمها كزميلة دراسه وعمل ولكن..لي بعض التحفظات عليها
قبل يومين وجدتها غاضبه بل كانت تكاد تنفجر من الغضب
جلست بجانبي تشتكي نظرات البعض
وتحرشات لبعض الوقحة
فلان وعلان..غير المراجعين وفلان الآخر
سمعتهاالى الاخر ووجدت نفسي بلا تخطيط ادس نصيحتي بالعسل:
انتي اسم الله عليج مزيونه
واللبس والزين له زهوة عليج غير نمونه
بس عاد تهقين الزين بوسط الشارع يقطونه؟
يا ينباق
يا ياخذونه
!!
هل استوعبت ما كنت ارمي اليه؟
أتمنى ذلك
:)
.
.
.
بوست فضفضه لمشاهدات يومية تلفت نظري
ومشاعر طارئة تتمخطر في خاطر استكانة لتبوح بها اليكم
هل أطلت؟
لا اعلم ولكن..اجد ان النوم بدأ يتسلل لعيني
همسة:
~~~~~~~~~~
يا أنته ...يا أنا
منهو اللي فينا بيبتدي؟
خلنفتعل الفراق
ونجرح الأشوق
دام الحزن واحد
أدري..
ترد تشتــــــــــــــــــــــــــــــــــــــــــــــــــاق
ومثلك أنابشتـــــــــــــــــــــــــــــــــــــــــــــــــــاق
بس لازم نعاند
ومهما دمعي ودمعك هل
بيدي وبيدك يبقى الحل
إما بجرحك ولا بجرحي...لازم واحد فينا يضحي
لا لا تخاف حاول حبيبي ولا تخاف
لا لا تخاف..قرر حبيبي ولا تخاف
ما بقى بحبنا بعد شي عليه ينخاف
!!
خل الحزن مرة..يبدي ولو مرة باختياري واختيارك
ومهما دمعي ودمعك هل...بأيدي وبيدك يبقى الحل
ليلة سعيده
وصباح جميل للجميع
دمتم بسنع دائم

هناك 74 تعليقًا:

Sn3a يقول...

ولا نصل الدور الارضي الا وقد وصل لمرحلة التنكيت

مت من الضحك لما قريت هذي!


اخيه الاغنيه حلوة استكاانه
يعطيج الف عافيه

Sara يقول...

خوووووووس بوست يا استكانة والله ولهنا علييييج وايد .. الدوام خذااااج من البلوقز

شخبارج ؟ وشلون الشغل معاج؟

هالشباب موجودين بكل مكان تلقينهم لا تعطينهم أي اهمية

والبنات هم هذيل مشكلة .. أعرف وحدة كل مفشلتنا والسبة هالحركة كله تتكحل وتتحمر جدام الأوادم وساعات تحط صبغ اظافر بعد

الله كريم .. احنا نقول فشلة واهما يقولون عادي

Purgatory يقول...

متي اشتغلتي!!! والله دنيا، و صرتي كوب شاي

:)

ديري بالج من البنات عندج، يحبون الحش

طائر بلا وطن يقول...

طول ما انتي عايشة يا استكانة بتشوفين

و في كل مكان
:)


أنا عندي قناعة و خاصة ان احنا كبار
و بعمر معقول و عندنا نسبة جيدة من الوعي
و القدرة على ضبط السلوك

كل إنسان يقدر يفرض احترامه
في أي بيئة ممكن ينحط فيها

و الإطار أو الحد انتي اللي تحطينه حواليك
لأنك و ان افترضتي حسن النية عمرك ما راح
تقدرين تضمنين كل الناس



و أؤمن - ما اعتبره ابدا نفاق - ان لكل
مقام مقال و شخصيتي بالعمل غيرها في
البيت بين أهلي أو بين ربعي

و المسألة مالها علاقة بالتلون أو الكذب
أبدا

لكن هي مثل المؤشر يصعد و ينزل ما بين
العام و الخاص

و المدى المسوح لي في الكشف عن حياتي
أو خصوصياتي و عقبها ستوب

و كيف اتعامل مع الآخرين

..


كل واجهة و لها شباك مختلف يغطي مساحة
مختلفة .. و إن كان البيت واحد


Good Morning
:)

Mr_CHoCoLaTe يقول...

ما كان ودي ارد الحين لاني تعبان و اخاف ما اعطي ردي حقه

عموماً

اكره المواقف المحرجه اللي تصادفني بشخص جدام باب او بطريجي و ما ادري وين اروح

فالافضل انطره يطوف الا اذا اهو عرض عليي


و في ناس جريئه تفتح مواضيع مع أي شخص تلتقي فيه


بالنسبه للتزيين كل بنت تتحمل اللي مسويته بعمرها

مو كل الرياييل زينين و يهدون كل بنت بحالها لي شافوها بهالشكل


لو كانت لابسه عبايه و متستره محد يلتفت لها حتى


تسلم ايدج

هالأيام طايح له Ice Tea

عادي اشربه بستكانه ؟

هههههه باي باي

darkness يقول...

welcome to the club

:p

اول شي الله يعينج على هالاشكال

و ترى بتوصلين الى قناعه انه كلهم سيئين الى ان يثبتو العكس

و البنات هالايام الوحده عن ثمان عيونهم تلاقط يخرعون و الحيا مفقود

و بتنصدمين ان هذيلي اللي سوقهم قايم


استكانه جد جد جد انتي غييييييييييييييييييييييييييييييييييييييييير


و تهبلين و يا رب يحفظج و يحميج من كل مكروه

و ان شاء الله ربي يوفقج و يرزقج على قد نيتج

:)

7osen يقول...

بوست حلوو من بوستات إستكانه إللى فيها شي يخليك مبتسم وسعيد

بط جبدي الأخ إللى بالموقف الأول شعنده يتأفف
صج مافي ذوق هذا بدل مايخليج تمرين

:
وإللي بالمصعد
صراحة أنا أستغرب
شكو يشرحلج قصة حياته
بس يالله حسن الظن أحسن شي
أحب إن الإنسان يبدي حسن الظن دائماً

:
ولا خطاوينا وراها لقى

تحياتي
لإستكانه

bin3li يقول...

من ناحية شريرة فأنتي شريرة
هذه ما عليها خلاف
:P

أنتي مستغربة من بنات يحطون مكياج في الطريج
شو رايج في ريايل يحلقون في السيارة!

و شو سالفة الهمسات الحزانية؟
اجرحني و اجرحك و تحمل
أنتي وايد شريرة
:P

ولد الديرة يقول...

بالتوفيج ان شاء الله

انتي سوي اللي انتي مرتاحة منه و دعي الخلق للخالق

السنع سنع

واللي مو سنع و ما يبي يصير سنع بعد هذي مشكلته

نصيحة

استخدمي السلم :P

عائشه يقول...

هههههههههههه
ضحكتيني

بس أجديتي فيه الي رضيتي الباب في ويه الي مايستحي

تبين الصدق شبابنا صاروا وايد دفشين مع البنات الي يشوفونهن أحشام

كأنه نحن نستاهل هالتعامل وتشوفين الحركات والتصنع جدام المتبرجات

بدخل الأًسنصير عادي أشكره يخطف جدامي ويدخل ...
وأنا أطالع وأقول شو ها
وأسمعه "أخلاق أخر زمن " ولا كأني اكلم حد

نفس الشخص يوم يشوف وحده إزقرت ... يوقف تعظيم سلام ويرتز ويفتح الباب لها

والبنات مع ناطحات السحاب الي على روسهن عاد في دبي شكلهن يبن ينافسن برج دبي

تبين الصدق هالزمن الأخلاقيات صارت شي غريب

مانقول غير الله المستعان

إجازة سعيده

feelingstalk يقول...

عيش رجب .. تشوف عجب
الكلام اللي قليتيه كله مار لي بشكل او بأخر .. الناس ماهي عارفه شتسوي اب روحه
عجبتني الأغنيه .. ذكرتيني اب ايام المراهقه

qesat_5ayal يقول...

لانني وعدت بالعودة

ها أنذا

والمعذرة على التأخير
بس كل قشي متناثر
وأستثقل استخدام جهاز غير جهازي
:)


استكانتك الأولى
استكانة الصمت

أحسست بها
بتفاصيل ذلك الصمت
بحرفية اتقان الدور


والتواصل أاساس الاستمرارية


..

الاستكانة الثانية
لو كانت امامي كمشهد لكنت ضحكت
ليس على مضمونه
بل فرحة بشقاوة طفولية
:P


..

الاستكانة الثالثة

توقفت عندها
أحيانا كثيرة وكثيرة جدا

تكون طرق الهرب ، النسيان ، التخلص من الذكريات بحركات
قد وقد تكون كثير بين الناس ان يحسبوها
جنون ، شذة عقل ، ولكن يبقى الأثر
في قلب الفاعلة

تبقى بعملها بطلة
ومظلومة كذلك


..

الرابعة

أغني ؟
أطير

:)




بدعت وخذيت راحتي
ولا بعد
:P

qesat_5ayal يقول...

استكانة

أتعلمين
كثر ما شدني

التفاصيل في الأدب العام والخاص

كثيرا لا يقدموا لها اي اعتبار
اشياء صغيرة في حياتنا
لكن في نظر الكثيرين هي كبيرة

في نظرك ونظري
ونظر من يهتم للأمور بعين مؤدب


في حياتنا العامة كلها
حتى وصولنا لحد ان يقال لنا
" اشدعوى"

اشدعوى

كلينكس طاح أشيله
صينيتي اوديها

حتى تقصير الصوت بالأماكن العامة

صار غيير مقبول
!


انعكاس في الموازين

كل هذه التصرفات
الصغيرة في نظرهم

تؤدي إلى معرفة عوالم شخصياتهم الكبيرة

Kuw_Son يقول...

في مرض هاليومين منتشر .. ألا وهو فقر حاد في السنع من الجنسين !!


إلا من عافاه الله ..

اختيار جميل لأغنية قديمة رائعة

الخيلاء يقول...

قل السنع ياوخيتي صاير اهو السائد الله لا يبلانا

و لي صارت الوحده سنعه و كلمتها بوزن و سوالفها بحدود صارت معقده و غروره

اكره ماعلي احد يصك الباب بويهي وايد امقت هالحركه .. خاصه اذا من ريال احس مافيها ذوق كلش .. المفروض الي يطلع يفتح الباب للي وراه .. وزين سويتي فيه .. الجزاء من جنس العمل :)

حتى الي يتميلحون يجسون النبض و يشوفون المايه ان شافو الوحده سيده تعدلوا و ان شافوها خفيفه كملوا

و البنات صايرين فضيعين بالخز ,, ولا اتنزل عينها انتي و امج انتي و ابوج و اخوج مالها شغل تاخذج من راسج لي ساسج فوكس .. انتي تنحرجين منها و اهي عادي مكمله

اما عن التمكيج بالسياره فا عيييييب و قل سنع سببه انعدام الحيا

الله يديم علينا الحيا و يزينا فيه .. البنت من غير حيا ماتسوى والله

حلم جميل بوطن أفضل يقول...

بليز بليز

آخر مرة سمعت مصطلح سنع من وحدة ، إستبشرت خير فيها. لكن صدمت بما رأيت فيما بعد

لا أقصدك أبداً يا زميلتنا. لكن كلمة سنع أصبحت سهلة و الكل يعتقد أن الزين عنده و الشين حوالينه

خليها على الله

حسافتج يا كويت يقول...

بحسبة بسيطة نجد أن استكانتنة إسم على مسمى

فهي بنت مثل الإستكانة بالضبط

رقيقة وحساسة ولكنها تتحمل حرارة الجاي الحار

كيوتة وصغيرونة ماتقدر تدز الباب مثل الإستكانة

سوالفها حلوة مثل استكانة الجاي تحلى سوالفها

مواضيعها مفيدة ودسمة ولها طابع يومي نراه في كل يوم بس ما نحسة ولا قرينة مدونة استكانة نقول اي واللة صح احنا يصير لنا جذي بعد

تضبط المخ مواضيع إستكانة مثل الجاي لا قند الراس


وأخيرا وليس آخرا تحس بضعفها لشدة الانوثة مثل ضعف الإستكانة وتريد مساعدة الأخرين بفتح الباب كمساعدة القفشة للإستكانة عند صب الشاي الحار عليها حتى لا تنكسر


كثري من هالمواضيع فهي واقعية وتجعلنا ننتبة للامور اليومية من حولنا

وردة حب يقول...

لوووووووووووول

الله يقطع هالنوعية من الريايل مليقين ومايستحون كلللش

خوش بوست قواج الله

vancouver يقول...

صباح العسل
استكانه


يازين السنع
!
تدرين الجم سنه اللي طافوا علي
شفت فيها اشكال عجييبه
خلوني صج اتساءل
وييييين السنع
اشياء بالنسبه لنا بديهيه
بس ليش عند غيرنا مالها اي اعتبار
!!
---
لوووووووووووووول
يعني رقعتي الباب في ويهه
هههههه
تهقين عاد حس على دمه
وسأل نفسه ليش ؟ اعتقد امثاله
ماكو احسااااااااااس
---

عاااااااااشت موظفتنا
النشييييطه
:))
---

الزميله ام اللي تكشخ من صباح الله خير
سئليها
اشلون من صباح الله خير
تسوي تسريحة
وتخب عمرها
ودي اعرف
من وين لهم خلق من صباح الله خير
؟

5roofa يقول...

عاد صجج انا يبطون جبدي الي ما يفتحون الباب
لوول

اول امس انا طالعه من السوق و بيدي ستين الف جييس
و اعابل بروحي بالباب قولي احد فكر يساعدنيي

والله انقهرت بغيت اصرخ انادي احد

الله يعافي الهندي فتحلي الباب و هم فتحه عشان بعدين اعطي المقسووم لول

وعلى الي يكون معاج بحوار تعرفين شنو معناته

تصدقين انا ماعر ف اتصيد شنو الي صج قاعد يصير

مافي مشكله انه اهو يسولف و يمكن قاعد يتحرش و انا يا غافلين لكم الله

لوول مره يالي ولي امر و قعد يسولف و المدرسة تقولي امبي شووفييي شيسوي اشكره يتحرش فيج

و انا ويهي مصفوق اقولها وين ما سوه شي
:/

لوول مشكله العبط

طمنيني على دوامج و شغلج تصدقين في بالي اغير دوامي بس مادري بناتي مو قادره اخليهم

salamz sweet sis...

غير معرف يقول...

سأمر من هنا للأبد .. ولو من دوم أن أدون شيئاً..

أحسك "أنا" في كثير من المواقف..

أحببتك استكانه..

الله يحفظج من كل شر..

أختج ~هند~

غير معرف يقول...

سأمر من هنا للأبد .. ولو من دوم أن أدون شيئاً..

أحسك "أنا" في كثير من المواقف..

أحببتك استكانه..

الله يحفظج من كل شر..

أختج ~هند~

someone_q8 يقول...

السلام عليكم
اختي استكانه , في الحياة العملية اتشوفين انماط كثيرة من الشخصيات , وهالشيء يبيله صبر وتحمل وذلك لانك راح تتعاملين معاهم على طول , والتعامل معاهم يكون بشكل رسمي بأغلب الاحوال عشان ما تنحطين بأي موقف محرج , الا اذا لقيتي الصديقة او الزميلة اللي تستحق انج تتعاملين معاها بروح الاخوه وتكسبين اخت جديدة في قائمة الاصدقاء
ميخالف اختي تحملي واحترامك لنفسك
ولغيرك اهو المفتاح لتفادي اي موقف , يمكن يكون خاني التعبير لما قلت احترامك
لنفسك ولكني اقصد بشكل عام وليس بالخصوص
لكي مني كل تحية واحترام

Peace يقول...

وما احد سألج بالاصنصير
انتي بأي دور و بأي اداره
:)

هالاشكال بكل مكان
بالدوام و غيره

و الحمد لله
الناس تعرف تميز ما بين
المحترم و غيره

الله الحافظ

حسافتج يا كويت يقول...

استكانتنة الغالية
بما ان الشيء بالشيء يذكر

اهديج هذي المقالة



http://7asaftech-ya-kuwait.blogspot.com/2008/03/blog-post_13.html

فريج سعود يقول...

هذا الي سكر الباب بويهج لو ماسكة له الباب جان استحى على دمه وما سواها مرة ثانية بس شريرة شقول فيج

غير معرف يقول...

ياحلوج وياسنعج يا استكانه
لج وحشه والله مامر بلوجر الا علشانج
:D
اشوف شاخر اخبارج وسوالفج العجيبه
ياختي ترى بعض الناس ماعندها سنع
ولو اهلهم ناس سنعه بس احس
عيال هالايام يعتبرون قواة العين
قوة شخصيه :S
ويعتزون بها الله يهداهم !
وحده تفتخر انها تلاسنت ويا شباب
يعني اثبتت وجودها !
وين الفخر في الموضوع ؟
الله يهداهم الله يوفقج يارب دنيا وأخر

*Simple

esTeKaNa يقول...

sn3a
~~~~~
لما يكون في ندره بالسنع
استانس انا لما اشوف اول المعلقين سنعه
:D~
الله يعافيج وعساج دوم مستانسه وتضحكين
:)

esTeKaNa يقول...

sara
~~~~~~
هلا وغلا بسارة
سمعتي أغنية محمد عبدو :
لعيون ساره تشرق الشمس وتغيب؟

سمعيها ترا اختي مسويتها نشيد وطني بالبيت من كثر ما تسمعها
:))
ولهت عليج العافية يارب
حياتي فجأة انشغلت ومقصرة والله
سامحوني على القصور
وانا بخير دامي مو عايشه بفراغ الحمدلله
:)
واي صبغ اظافر؟
انا بالبيت وبروحي ورازه اليد وهدؤ
واتدوده مرات
اشلون هذيله اللي جدام خلق الله كلهم
:(
والله ما ندري شصار بهالدنيا يا ساره؟

esTeKaNa يقول...

purg.
~~~~~~
شفت اشلون اشتغلت؟
كل صغير يكبر ولا شرايك
:Pp~
اي والهل يا حب البنات حق الحش
بس انا بدوامي غير
انا الفتاة المدللة
:))

esTeKaNa يقول...

طائر بلا وطن
~~~~~~~~~~~~~
يا مسا العقل كله
:)
لكل مقام مقال
والقدرة على ضبط السلوك
هنا يمكن الموضوع كله يا طائر
مو بس بالشخصيه حتى باللبس والمظهر
ما يمكن ان نرتديه في مكان العمل مختلف تماما على ما يمكن ان نرتديه في محيط العائله والمناسبات الخاصه
في ناس مختلطة عليها الامور للاسف
!!
شكرا لمرورك الجميل والعاقل دوما

esTeKaNa يقول...

mr_chocolate
~~~~~~~~~~~~~~~
يا مسا الكاكو يا هلا
اسم الله عليك من التعب
اتمنى ان تكون بخير حاليا
:))
انا مثلك عادة اوقف عشان انهي هالموقف المحرج..وتصدق اخوي حاليا الوضع مو مثل السابق
اول البنت اللي لابسه عباة بنت حافظة نفسها ماحد ينظر لها اي نظرة الحين الوضع مختلف
حتى اللي يلبسون عبي قامو يبدعون
!!
الله المستعان


اكيد يصير اكيد
واصلا راح يصير لذيذ اكثر
ههههههه

حياك الله

esTeKaNa يقول...

Darkness
~~~~~~~~~~~
يا هلا ويا مرحبا
:)
اي والله الواحده عن ثمان
تدرين انا منو اللي صج تنرزفني؟
اللي تكونين معاها بمكان في ناس وتكلمج وعيونها تفتر
وتردين عليها ما تطالعج
مشغوله مشغوله
وانا طبيعتي ما اعرف اتكلم الا اذا حطيتي عينج بعيني
عوبه شوي
:))
وتعالي تعالي
فعلا انا شايفه هالشي
ليش هالموديل سوقهم قايم؟
يا حسرتي عسى ما راحت موضتنا بس
:)))
ياااااااااااااااا بعد قلبي انتي
الله اعلم انتي بعد غير
ما تشوفيني انطلق واتحطلم وياج؟
امييين واجمعين يارب
:***

esTeKaNa يقول...

7osen
~~~~~~~
يا مسا حسين المبتسم
:)
اي والله ليش يتأفف
انا بعد كنت مستغربه؟
وفي عندي مشكله يا حسين
اني ماحب نفسي لما اقدر احد واحقره بس انا مظطرة اسوي جذي
!!
ولا خطاوينا ابداع متجدد
يناسب كثير من القلوب المتألمه
الله يبعد عنك الألم

esTeKaNa يقول...

bin3Li
~~~~~~~~~
انا شريرة؟
قليل مما عندكم
:pP~
يحلقون بالسيارة؟
ليش ليش
ماكو بيوت؟
!!
الهمسه هذي ابداع لعبدالكريم
شي مو طبيعي
احبها وايد رغم الالم اللي فيها

esTeKaNa يقول...

ولد الديرة
~~~~~~~~~~~~
الله يوفقج الجميع يارب
ويييه انا مخليه الخلق للخالق
بس الخلق يأّذوني مرات
يعني اشلون ما اتحلطم؟
انا مستعده انزل من السلم
بس ما احب اركب
اتعب
:Pp~

esTeKaNa يقول...

عائشة
~~~~~~~
حيالله عاشه
بقول عاشه رغم كل شي
:))
اي والله تصدقين
!!
يعني لو انا فاله الشعر
والمكياج والحاله
جان ابتسم في ويهي ما تأفف

وحتى انتو عندكم موديلات ناطحات السحاب؟
ههههههههههههههه
الحال من بعضو يا عاشه
لا لا
لازم نسوي حمله كبيرة ضد هالحاله الكسيفه اللي قاعد تصير
:))
الله يحفظك يارب

esTeKaNa يقول...

Feelingstalk
~~~~~~~~~~~~~~
بالضبط
!!
مو عارفين شنو يسون بروحهم
الله يستر علينا وعليهم

esTeKaNa يقول...

qesat_5aYaL
~~~~~~~~~~~~~~
ياهلا بصاحبة الوعد
ومسموح ياللي تعذر
مسموح لوما تعذر
:)
تعليقك على بوست الاستكانات رسم الابتسامة علي وجهي
شكرا لمرورك وشكرا لانك لم تنسي التعليق على ذاك البوست الذي زان بتعلقيك



اما بالنسبه لهذا البوست
فانا مثلك
تلفت نظري التفاصيل الخاصة والعامة
هل هذا شي جيد ام متعب جدا؟
اشدعوة كلمة مرات يكون الهدف منها وضعك في قالب الشخصيه المضطهوله اللي تكبر كل موضوع
احيان
كلمة شدعوة تنرزفني تصدقين
!!

esTeKaNa يقول...

kuw-son
~~~~~~~~~~
الله يهدي الجميع قول آمين
والاغنيه هذي مؤلمه وواقعيه لحد الآه
:)
شكرا لمرورك الجميل

esTeKaNa يقول...

الخيلاء
~~~~~~~
يا مسا الخيلاء والله
:)
تقولج داركنس هالبني قايم حظهم
خلينا احنا معقدات ومغروروات
:Pp~
اييييه يا الخيلاء
انا اذا انرقع الباب بويهي اخاف
احس جنه الدنيا ارنقعت في ويهي
يعني انته والدنيا علي
:))
وصاجة البنات صايرين يخزوون اكثر من الشباب،هذا احنا بنات ونشهد عليهم اخياتنا وبناتنا بس العيون صايره بس تتلاقط اللهم يا كافي

!!
الله يهدينا جميعا يارب
ويزيد الحيا قولي امين

esTeKaNa يقول...

حلم جميل بوطن أفضل
~~~~~~~~~~~~~~~~~~
فعلا الكل يعتقد الزين عنده والشين حواليه
ولا نزكي انفسنا على احد يا اخي العزيز
ولكن ,,هناك مظاهر فقر حاد بالسنع واضحه والكل متفق عليها
الله يهدي الجميع يارب
:)

esTeKaNa يقول...

حسافتج يا كويت
~~~~~~~~~~~~~~~~
شنو هالكلام هذا؟
والله العظيم اني استحيت
بيب لي بوشية وبغطي ويهي من الحيا
:pP~
عاد كيوته وما اقدر ادز الباب
هههههههههه
لامو جذي الموضوع
اهو صج صج ثقيل
:))
وترا مادري شنو اقولك
الله يجبر بخاطرك قول امين
وابشر ابشر بالسوالف
دامنا عايشين بكل يوم بنشوف شي يديد

وشكرا على اللنك الحين بروح اشوفه

esTeKaNa يقول...

وردة حب
~~~~~~~~
أكره صفه على الرجل ثقاله الدم والطينه
ويقرق وايد بعد
يا الله
الله يعين اهله
:)

esTeKaNa يقول...

vancouver
~~~~~~~~~~~
مسائج قشطة يا عسل
:)
اي والله انا احسها اشيا بديهيه
اشيا ما تفكرين فيها قبل لا تسوينها
لانها ببساطة فطريه فيج
بس في ناس لا عندهم هذي اشيا كلش مالها اي اهميه



اي لاحظتي اني رقعت الباب؟
ما شفتي ويهي
كنت سعيده
ههههههههههههه
:))

اي واللله من وين لهم خلق
انا زين اغسل ويهي واييهم ركض
وجان بخاطري اكشخ شخطت كحل بعيني وييت
:)
اسئلها جود انها تعلمني الحركه
واقولج
:Pp

esTeKaNa يقول...

5Roofa
~~~~~~~~
واي يا كره هالموقف
بيدج جياس
ويالله تمشين
ويمر يمج واحد يطالع ويمشي
انزين دز الباب الله يهديك
!!
اقولج شي؟
انا احس اذا اللي معاي مو مريح وخبيث
بس مشكلتي ماعرف اصيرجامده وادقر
يعورني قلبي
!!
يا بعد قلبي انتي
انتي طيبه عشان جذي ما تحسين
الله يحفظج بحفظه قولي امين


دوامي حلو وممتع جدا
بس مؤقت لي ربي يفتح علي بوظيفه ثانيه
واذا انتي مرتاحة بوظيفتج ومكانج
لا تغامرين ابد بمكان ثاني
الله يوفقج يارب
:*

esTeKaNa يقول...

هند
~~~~~~
أحبك الذي أحببتني فيه
مرورك دائما يسعدني
حياج الله
:)

esTeKaNa يقول...

some-oneq8
~~~~~~~~~~~~
وعليكم السلام ورحمه الله وبركاته
شكرا لمرورك
شكرا لنصائحك القيمة جدا
الله يحفظك
:)

esTeKaNa يقول...

peace
~~~~~~~
اي اهوا سوا تحقيق
وبعدين انطلق
اشوة انهم ست ادوار مو اكثر
:))
الله يحفظنا يارب

esTeKaNa يقول...

فريج سعود
~~~~~~~~~~~~
انا ما اصير شريرة من غير سبب
مو كل مرة بسامحة
انته لو شايف ضحكتي الشريره لما تسكر الباب بويهه
جان قلت زين سويتي
ما تسوا فرحتج
:Pp~

esTeKaNa يقول...

SimPle
~~~~~~~~~
يا هلا وأمية هلا
تو ما نور البلوق والله
انا بخير بشريني عنج؟
اول يقولون الحب يطلع على بذره
الحين والله ما تدرين الحب يطلع على منو
!!
وبعدين صح انا لاحظت بنات وايد عبالهم مرادد الريايل قوه
وانا بنظري قمة القوة الترفع عن بعض الحوارات اللي مالها نتيجة سوا انزال بمستوى البنت نفسها
ولا الولد ما يضره شي
:))
حياج الله
لا تطولين الغيبه علينا
:*

بعثرة مشاعر يقول...

ياشين الريال لا قعد يسولف و يستخف دمه مع البنت

شكو شكو شكو


و السنع نااااادر هالايام !!

DiLLi O MiLLi يقول...

ويييييه ياااا أستكااانة
ياااامااا بتصااادفيين أشكال وأرناق


ولكني أكيده اني لا اكون شريره بلا سبب

شااااكه بهالمقولة
هههههههههه
أتغشمر
:)

شوفي حبيبتي
الأنسان بأسلوبة الخاص يقدر يفرض أحترامة
الزمالة بمكان الشغل حلوة
نتناقش .. نضحك
لكن لكل شيء حدود

حتى اللي متكلفة بالمكياج والتسريحة
تقدر تفرض أحترامها بتصرفاتها

مع أحترامي للرجال
لكن البعض منهم
لووو البنت متغطية من ساسها لراسها ما تبين ألا عيونها
هم يلحقونها ويتحرشون فيها !!!ء






نبي يوميات الدكتور والوالد والدرب
;)
ســـلامــات حبيبتي

:***

بـابـل يقول...

صباح الورد

إستكانة والله ضحكنى سالفة "كاشف إحساس"

والله السنع إنقرض

وإختلط الحابل بالنابل

ولو بي أسولفلك عن هالنوعيات مانخلص اليوم


بس كل واحد يعمل بأصله وتربيته



أغنية لاخطاوينا أغنية لها ذكرى عزيزة عندي وفيها بركان مشاعر

تسلمين عزيزتي


وبس


بابل

فراوله يقول...

مساالورد والجوري
غاليتي الحبيبه
اول شي الله يعينج علي هالاشكال تري منها وايد
هاليومين
بس قطيعه بط جبدي هم ثقيل طينه
وهم ماعنده ذوووق
الله يعينه علي نفسه
مسكيييييين حده
دمت غاليتي
:**

حسافتج يا كويت يقول...

صبحج اللة بالخير

esTeKaNa يقول...

بعثرة مشاعر
~~~~~~~~~~~~~
اهم شي شكو
شكو
شكو
:))
صاجة اي والله شكو؟
:))
حياج الله

esTeKaNa يقول...

dilli o milli
~~~~~~~~~~~~~~~
اي والله اشكال
وارناق
وموديلات
شي عجيب
:)))
ههههههههههههههه
تهقين انا شريرة بلا سبب؟
!!
الكل يقدر يفرض احترامة ان اراد ذلك
ولكن المظهر
والسمت
شي مهم


يا بعد قلبي الله يسلمج من الشر
:**
ما سوت علي النوم اللي نمته العصر
اذن الفجر وانا للحين قاعده
:(

esTeKaNa يقول...

بابل
~~~~~~
صباحك سكر
صباح رقيق ومبتسم
اشك في ان من له رقه احساسك لا يملك كاشف احساس
:)
لا خطاوينا بركان مشاعر
وواقع مؤلم مكرر
!!
شكرا لمرورك

esTeKaNa يقول...

فراولة
~~~~~~~~~
يا صباح الفراولة اللذيذة
:)
اي والله مسكين حده
بس اشرايج فيني وانا راقعه الباب؟
ههههههه
اشوي بردت قلبي
:)
حياج الله

esTeKaNa يقول...

حسافتج يا كويت
~~~~~~~~~~~~~~~~
صبحك الله بالنور
صباح الجاي حليب
صباح البقصم
صباح الكويت الجميلة
وصباحك سكر
:)

حسافتج يا كويت يقول...

بروح اصلي وأدعيلج بالتوفيج

وتصبحين على خير

esTeKaNa يقول...

حسافتج يا كويت
~~~~~~~~~~~~~~~~
الله يتقبل منا ومنك صالح الأعمال
ويزاك الله كل خير يا اخي العزيز
:)
وانته من اهله يارب

S i m p l e يقول...

مفااااااااجععععععه
:P
كله منج ماقدرت استحمل اغرائات بوستاتج
واشتركت (a)
ياختي عندج كارزما مب طبيعيه !
وانا بقطر حسستيني اني بالكويت !
ياسسلام عليج والله

mtfa2el يقول...

انا مرة صايرلي هالموقف
قلت حق وحدة تفضلي
قالت اوفففف
زين ما قالت قطيعة و كمت عليي بعد !!!

Expatriate يقول...

ليلحين عندج امل استكانة ؟ المفروض خلاص تعودتي من أيام جامعة الكويت على الواقع وعلى هالاشكال

على فكرة شخبار اخوج الصغير ؟ خبرنا باخباره وسوالفه من زمااان
شصار عليه ؟

p.s. قبل اغنيتين حق نوال بالغلط
الحين عبدالكريم و اغاني ام 8 دقايق
شصاير ؟
;)

|:| DUBAI |:| يقول...

يا حبيبي


المبادرات الشرق الاوسطية عند بعض الشباب

جدا راقية هذه الايام

و تضحياتهم غير نمونة

بس أهم شيء نحن نصفي النية دوم

لوووول


لو أن النية صعب تتصفى

!!


:

:

:

لا و وايدات حركات و حركات

لا طاح اليريور في الشبك

عقدوا النونة على قولتكم

و قالوا ما تستحي أنت؟ ما عندك أهل؟

خووووووو ليش عطيتيه ويه من البداية؟

Q8DOLL يقول...

انتي السنع كله والله
صاااجه في قله السنع هالأيام
ونفس تفكيري
تصدقين الشباب ما يصيرون ذربين الا وراهم شي
او دفش وزهقان حياته ومايعرف السنع

اما تضبيط الحمره والكحل صار في كل اشاره
الرياييل يلعبون بخشومهم " سوري بهالكلمه"
والحريم يطلعون علبه الميك اب وهاااات يا رسم وشخبط شخابيط

انتي توج يديده بالشغل فتنصدمين وايد من الناس اللي تعرف عن روحها وتقط ويهها
وتر يموتون بالوجوه الجديده
يعني انتي الحين فقع في نص شهر سبعه
لووووووول

والله ذكرتيني بما مضى
:)
موفقه ودوووم انتي سنعه

esTeKaNa يقول...

simpLe
~~~~~~~~
ياهلا وأمية هلا
!!
هذي الساعه المباركة
تو ما تباركت البلوقات واله
حياج الله والله والله ونستيني
:)))
وشكرا على رقه كلامج
خجلتني قلب استكانة
:**

esTeKaNa يقول...

metfa2el
~~~~~~~~~~~
اخاف المشكلة بكلمة تفضلي تصدق
!!
انا بعد قلت تفضلي قالو لي اوففف
تهقه مرة ثانيه نغير الكلمه؟
نقول طوف طوف
مثلا
:Pp

esTeKaNa يقول...

Expat.
~~~~~~~~~
ياهلا ويا مرحبا
:)
انا ما افقد الامل
دام في ناس طيبه شرواك
وناس طيبين من ههالبنات اللي هني
ليش افقد الامل؟



ما شاء الله ذاكرتك قوية
اخوي للاسف ناجح بكل شي ما عدا الدراسه
اعتقد ناوي يقدم ماستر بالثانوية
واحتمال يعطونه ترقيه يصير مدرس
:))
ملاحظات قوية
مادري شصاير؟
ممممم
احط مقاطع من كلمات اغاني شعبان عبدالرحيم؟
مشكله كلماته تبجي من كثر ماهي قوية
:pP~

esTeKaNa يقول...

dubai
~~~~~~~~
اهم شي الحركات الشرق اوسطية
لوووول
عيل الحاله واصله لي عندكم
الله يستر
:Pp

esTeKaNa يقول...

q8doLL
~~~~~~~~
يا هلا بالسنع كله والله
:)
يا بعد قلبي انتي ما تقصرين
:*
واي من صجج وصلنا هالمرحله؟
انزين ليش جذي؟
كل هذا محاولات لفت نظر
يعني عندج هواية التلوين على ويهج يا يمة مارسيها بالبيت
والريال القذر
لا تعليق
:((
عيل انا فقع بنص شهر سبعه؟
لوووووووووووووووووووول


اه لو بس اقدر اقولج انا وين اشتغل
جان عرفتي الموديلات اللي تمر علي كل يوم
:))
الله يحفظج يارب
ويديم السنع عليج
:*

فريج سعود يقول...

يعني شلون ما نعلق على الموضوع الي فوق ونتحمد لج بالسلامة ؟
:(